အခန်း ၆၅

အပိုင်း (၆၅)

လူတိုင်းသည် မင်းသားငါးက ကျောင်းပြေးပြီး တင်ပါးအရိုက်ခံရသည့် ဖရဲသီးကို ခုလေးတင် စားပြီးသွားကြရာ ယခုတစ်ခါ အရှင်မင်းကြီး၏ တင်ပါးအရိုက်ခံရသည့် ဖရဲသီးကို စားရမည်ဆိုသဖြင့် စိတ်လှုပ်ရှားလွန်းပြီး တံတွေးပင် မျိုမကျနိုင်အောင် ဖြစ်နေကြလေသည်။

ဒီပုဂ္ဂိုလ်က လက်ရှိအုပ်ချုပ်နေသော အရှင်မင်းကြီး၊ အထွတ်အထိပ် အာဏာရှင်လေ။

သူ ငယ်စဉ်က မိခင်၏ ရိုက်နှက်မှုကို ခံခဲ့ရပါက ကြီးမားသော ပျော်ရွှင်မှုကြီး ဖြစ်ပေလိမ့်မည်။

စမ်းကြည့်ချင်စိတ် ဖြစ်မိသည်။

မျှော်လင့်မိသည်။

မကြာမီ systemသည် ကျယ်လောင်သော ရယ်မောသံကြီးဖြင့် ပြန်ရောက်လာလေသည်။

[ဟားဟားဟားဟား]

ဘဲတစ်ကောင်လို ရယ်နေပါလား။ ဖရဲသီးအကြီးကြီး လာတော့မည့် အရိပ်အယောင်ကို ချူဟွား အာရုံခံမိလိုက်သည်။

အတင်းအဖျင်း နားထောင်ရန်အတွက် မင်းသားငါးသည် ခန္ဓာကိုယ်အပေါ်ပိုင်းကို နံရံတွင်ကပ်ပြီး ဖင်ကို ကုန်းထားလိုက်သည်။ သူ့ကိုယ်ဟန်အနေအထားက အတော်လေး ကြည့်မကောင်းလှပေ။

သူသည် ခမည်းတော်၏ ဖရဲသီးအကြီးကြီးကို နားထောင်ရန် အာရုံစိုက်လွန်းနေသဖြင့် သူ့နောက်သို့ တစ်စုံတစ်ယောက် ရောက်လာသည်ကို သတိမထားမိလိုက်ချေ။

System: [သားအဖနှစ်ယောက် ပီသပါပေတယ်]

[သားက ကျောင်းပြေးဖို့ နေမကောင်းဟန်ဆောင်ပြီး အဖေက ကျောင်းပြေးဖို့ နံရံကျော်တက်တယ်။ နံရံကျော်တက်တာ မကျွမ်းကျင်တော့ နံရံပေါ်က ခုန်ချတဲ့အချိန် ကိုယ်နေဟန်ထား မမှန်လို့ ခြေထောက်ကျိုးသွားတယ်လေ]

[မျက်နှာမပျက်ချင်တာနဲ့ သူက မတော်တဆ ခြေခေါက်လဲတာလို့ ဇွတ်ငြင်းပေမဲ့ သမားတော်က သူ့မယ်တော်၊ လက်ရှိ မယ်တော်ကြီးနဲ့ ယခင် ကြင်ရာတော်ရုံကို ပြောပြီးသားဆိုတာ သူ မသိဘူး]

ချူဟွားသည် တော်ဝင်သားအဖနှစ်ယောက်စလုံး သမားတော်လက်ချက်ဖြင့် ဖမ်းမိသွားကြပြီး သမားတော်၏ ရိုးသားမှုက အနည်းငယ် ရင်းနှီးနေသဖြင့် အံ့အားသင့်သွားသည်။

[လွန်ခဲ့တဲ့ နှစ် ၃၀ ကျော်က သမားတော်... တိုက်ဆိုင်လွန်းနေတာတော့ မဟုတ်ပါဘူးနော်]

Systemက ရယ်မောလိုက်လေသည်။ [ဟုတ်တယ်။ ဒီ တော်ဝင်ဆေးဌာန အုပ်ချုပ်ရေးမှူးပါပဲ]

[ဘုရားရေ] ချူဟွား တိတ်တဆိတ် ရယ်မောလိုက်မိသည်။ [တော်ဝင်ဆေးဌာန အုပ်ချုပ်ရေးမှူးက သားအဖနှစ်ယောက်လုံးကို တစ်ယောက်တည်း ဖြိုချလိုက်တာပဲ]

မင်းသားငါးမှာ စိတ်ပျက်သွားတော့သည်။ ခြေထောက်ကျိုးရုံ ကိစ္စလေးတစ်ခုတည်း ဘယ်လိုလုပ် ဖြစ်နိုင်မှာလဲ။ အနည်းဆုံးတော့ ပိုပြီး ရှက်စရာကောင်းသင့်တာပေါ့။

သူသည် systemကို အားပေးရန် လက်သီးကို တိတ်တဆိတ် ဆုပ်ထားလိုက်သည်။ လုပ်စမ်းပါ ထုံအာ။ မင်း ပိုစိတ်ဝင်စားစရာကောင်းတဲ့ အတင်းအဖျင်းတွေကို သေချာပေါက် ရှာတွေ့မှာပါ။

မင်းဆရာအိုကြီးက ဖြည်းညင်းစွာ လျှောက်လာလေသည်။ "..."

ရင်းနှီးနေသော ဖရဲသီးစားသံကို ကြားလိုက်ရသဖြင့် မင်းသားငါး ဖင်ကုန်းပြီး ဒီနေရာမှာ ဘာလုပ်နေလဲဆိုတာ သူ သိလိုက်လေသည်။ သူ့အဖေ ဖင်အရိုက်ခံရတဲ့ ဖရဲသီးကို စားနေတာပဲ။

တော်တော့်ကို လိမ္မာတဲ့ သားပဲ။

မင်းဆရာအိုကြီးသည် အသံတိတ် သက်ပြင်းချလိုက်ပြီး ငြိမ်သက်စွာ ရပ်နေကာ ဝတ်ရုံကို သပ်ရပ်အောင် ပြင်လိုက်သည်။

သူ ဒီရောက်နေမှတော့ နားထောင်လိုက်ဦးမယ်။

ချူဟွားက တိုက်တွန်းလိုက်သည်။ [နောက်တော့ ဘာဆက်ဖြစ်လဲ]

System: [ကြင်ရာတော်ရုံက အဲဒီအချိန်က အရှင်မင်းကြီးရဲ့ စာဖတ်ဖော်ကို ခေါ်ပြီး အခြေအနေကို မေးမြန်းလိုက်တော့ စာဖတ်ဖော်က ဘာမှ မတွန့်ဆုတ်ဘဲ သူ့ကို သစ္စာဖောက်လိုက်တယ်]

[ကြင်ရာတော်ရုံက ပြောတယ်။ ဒီတစ်ခါ ဒဏ်ရာက မပြင်းထန်ဘူး။ မင်းသားကလည်း မင်းအတွက် တောင်းပန်ပေးထားတော့ ငါ မင်းကို အပြစ်မပေးတော့ဘူး။ အရှင်မင်းကြီးကလည်း မင်းကို ခွင့်လွှတ်ပေးလိမ့်မယ်။ ဒါပေမဲ့ နောက်တစ်ခါ ထပ်ဖြစ်ရင် ငါ အပြစ်မပေးရင်တောင် အရှင်မင်းကြီးက မင်းကို ခွင့်လွှတ်မှာ မဟုတ်ဘူးတဲ့]

[စာဖတ်ဖော်ဆိုတာ ကစားဖော်နဲ့ စာသင်ဖော်လေ။ အဲဒီတုန်းက အရှင်မင်းကြီးနဲ့ ရွယ်တူဆိုတော့ သူ အရမ်း ကြောက်သွားတယ်။ တာဝန်ယူစရာ မလိုတော့မှန်း သိလိုက်ရတော့ ကြင်ရာတော်ရုံရဲ့ ကြင်နာမှုအတွက် သူက မြန်မြန်ဆန်ဆန်ပဲ ကျေးဇူးတင်စကား ပြောလိုက်တယ်]

[ကြင်ရာတော်ရုံက စာဖတ်ဖော်ကို အရှင်မင်းကြီးနောက် သေချာ လိုက်ပါဖို့ မှာကြားလိုက်တယ်။ တကယ်လို့ စာဖတ်ဖော် တားမရတဲ့ ကိစ္စတစ်ခုခု ဖြစ်လာရင် ချက်ချင်း လူလွှတ်ပြီး သူ့ကို လာပြောခိုင်းတယ်]

ချူဟွားက မျက်ခုံးပင့်လိုက်မိသည်။ [သူက သားဖြစ်သူဘေးမှာ သူလျှိုတစ်ယောက် ထားဖို့ အကြမ်းရော အနုရော သုံးခဲ့တာပဲ။ ကြင်ရာတော်ရုံရဲ့ နည်းလမ်းက တော်တော် ပြောင်မြောက်တယ်]

နန်းတွင်းတိုက်ပွဲရဲ့ နောက်ဆုံး ချန်ပီယံဆီက မျှော်လင့်ထားတဲ့အတိုင်းပါပဲ။

Systemက ရယ်မောလိုက်လေသည်။ [စာဖတ်ဖော်က နောက်လှည့်လိုက်တာနဲ့ အရှင်မင်းကြီးကို အကုန် ပြန်ပြောပြလိုက်တယ်]

ချူဟွား: ? ? ?

အားလုံး: ? ? ?

ကျွတ်ကျွတ်။ ဒီကောင်လေးက တကယ် သူတို့ကို အငိုက်ဖမ်းလိုက်တာပဲ။

ကြင်ရာတော်ရုံရဲ့ သူလျှိုဆို။ ဘာလို့ နောက်လှည့်တာနဲ့ ကြင်ရာတော်ရုံကို ပြန်ရောင်းစားလိုက်ရတာလဲ။ ဒါဆို စာဖတ်ဖော်က အရှင်မင်းကြီးဘက်မှာ ခိုင်ခိုင်မာမာ ရပ်တည်နေတာပေါ့။

System: [အရှင်မင်းကြီးက စာဖတ်ဖော်ကို အလုပ်ကောင်းကောင်း လုပ်ခဲ့တဲ့အတွက် ချီးကျူးပြီး ပြန်တောင်းပန်လိုက်သေးတယ်။ တောင်းပန်ပါတယ်။ ငါ မင်းကို ဒုက္ခပေးမိပြီတဲ့]

[စာဖတ်ဖော်က မင်းသားရဲ့ တောင်းပန်မှုကို ဘယ်လို လက်ခံနိုင်မှာလဲ။ သူ ချက်ချင်း ပြောလိုက်တယ်။ ကျွန်တော်မျိုးရဲ့ အပြစ်ပါ။ ကျွန်တော်မျိုး သေချာ မသင်ပေးနိုင်ခဲ့သလို မင်းသားကိုလည်း ဖမ်းမမိလိုက်ပါဘူးတဲ့]

[ဒီကိစ္စ ပြီးသွားတော့ ကြင်ရာတော်ရုံက သူ့မှာ နားပါးတဲ့လူ ရှိတယ်လို့ ထင်ခဲ့ပြီး အရှင်မင်းကြီးကလည်း သူ့မှာ ရင်းနှီးတဲ့ သူငယ်ချင်းတစ်ယောက် ရှိတယ်လို့ ထင်ခဲ့တယ်။ ဒါပေမဲ့ သူတို့နှစ်ယောက်လုံး မသိခဲ့ကြတာက...]

ဒီအကြောင်းကို ပြောရင်း systemက တမင်တကာ ရပ်လိုက်ပြီး လူတိုင်းကို စိတ်ကူးကြည့်ရန် အချိန်ပေးလိုက်လေသည်။

လူတိုင်းက မျှော်လင့်ချက်အတိုင်း ဆက်လက် စိတ်ကူးယဉ်နေကြသည်။ ဒါပေမဲ့ ဆိုတဲ့ စကားလုံး ထွက်လာပြီဆိုရင် နောက်ကွယ်မှာ မမျှော်လင့်ထားတဲ့ အရာတစ်ခု ရှိနေမယ်လို့ ဆိုလိုတာပဲ။

ဘာဖြစ်နိုင်မလဲ။

စာဖတ်ဖော်က တစ်ယောက်ယောက်ဆီက ပိုက်ဆံယူပြီး အရှင်မင်းကြီးရဲ့ ခြေထောက်ကို တမင်တကာ ချိုးလိုက်တာများလား။

ဒါမှမဟုတ် အရှင်မင်းကြီးက ခြေထောက်ကျိုးလို့ နားနေရတဲ့ အခွင့်အရေးကို ယူပြီး အတန်းမတက်ဘဲ နေချင်တာလား။

ချူဟွားလည်း အထက်ပါ ဖြစ်နိုင်ခြေနှစ်ခုကို တွေးမိသလို တတိယတစ်ခုကိုလည်း စဉ်းစားမိလိုက်သည်။

[စာဖတ်ဖော်က သုံးပွင့်ဆိုင် သူလျှိုများ ဖြစ်နေမလား]

မဖြစ်နိုင်ပါဘူး။ ချူဟွား စိတ်ထဲကနေ ငြင်းလိုက်သည်။

စာဖတ်ဖော်တွေအားလုံးက မင်းသားနဲ့ ရွယ်တူ ကလေးတွေလေ။ အတူတူ ကစားကြ၊ စာသင်ကြပြီး ကြီးလာရင် မင်းသားရဲ့ လက်ရုံး ဖြစ်လာကြမဲ့သူတွေ။

စာဖတ်ဖော်က အသက် ဘယ်လောက်ရှိလို့လဲ။ ဘယ်သူက ဒီလောက်ငယ်တဲ့ ကလေးကို သုံးပွင့်ဆိုင် သူလျှို ဖြစ်အောင် သင်ပေးမှာလဲ။

ဒါပေမဲ့...

[မမကြီးဟွား မိုက်လိုက်တာ] Systemက တရစပ် လက်ခုပ်တီးလိုက်လေသည်။ [နင် ဘယ်လို ခန့်မှန်းလိုက်တာလဲ]

ချူဟွားတစ်ယောက် မှင်တက်သွားမိသည်။ [ငါ ဒီအတိုင်း လျှောက်ပြောလိုက်တာ] ဖြစ်နိုင်ခြေ ဒီလောက်နည်းတဲ့အရာက တကယ် မှန်နေမယ်လို့ ဘယ်သူ ထင်မှာလဲ။

Systemက ပုံမှန်အတိုင်း ချီးကျူးလိုက်သည်။ [လျှောက်ပြောလိုက်တာတောင် တည့်တည့်မှန်တယ်ဆိုတော့ မမကြီးဟွားက ဘယ်လောက် မိုက်လဲဆိုတာ သိသာနေတာပဲ မဟုတ်လား]

မင်းဆရာအိုကြီးလည်း ကြားလိုက်ရသည့်အရာကြောင့် ဇဝေဇဝါ ဖြစ်သွားသည်။ အဲဒီလူက ငယ်ငယ်ကတည်းက ဒီလောက်တောင် ကောက်ကျစ်ခဲ့တာလား။

မင်းသားငါး၏ မျက်ခွံများ တရစပ် လှုပ်နေတော့သည်။ သွားပြီ။

ခမည်းတော်မှာ စာဖတ်ဖော်တစ်ယောက်ပဲ ရှိတာ။ သူတို့ ဆက်ဆံရေးက ကောင်းတယ်။ ခမည်းတော်က ရံဖန်ရံခါ သူ့ရှေ့မှာ စာဖတ်ဖော်နဲ့ ဆက်ဆံရေးအကြောင်း ပြန်ပြောပြတတ်တယ်။ သူတို့က စာပေနဲ့ သိုင်းပညာမှာ အပြန်အလှန် ဖြည့်ဆည်းပေးကြပြီး သူတို့ရဲ့ ဆက်ဆံရေးက နက်ရှိုင်းလွန်းလို့ အပြန်အလှန် စာရေးကြတယ်တဲ့။

အခု နန်းစောင့်တပ်သားက သတင်းပို့လိုက်တာနဲ့ အဲဒီလူ ဒုက္ခရောက်ပြီ။

အိုး။ သတင်းကို အမြန်ဆုံး ပို့ပေးလိုက်ရင် သူ့ကို ကယ်တင်လို့ ရနိုင်မလား မသိဘူး။

Systemသည် မင်းဆရာအိုကြီးနှင့် မင်းသားငါး ဘာတွေးနေလဲဆိုတာ လုံးဝ မသိဘဲ ပျော်ရွှင်စွာ တေးဆိုနေလေသည်။ [စာဖတ်ဖော်ကို ယခင်မင်းကြီးက အရှင်မင်းကြီးအတွက် ရှာပေးခဲ့တာလေ]

[ကြင်ရာတော်ရုံက သူ့သားအတွက် အစက ရှာပေးထားတဲ့ စာဖတ်ဖော်က သူ့မောင်ရဲ့ သား။ ဝမ်းကွဲတွေဆိုတော့ ဆက်ဆံရေး ကောင်းမယ်လို့ ထင်ခဲ့တာ။ အရှင်မင်းကြီးက အဲဒီတုန်းက ဓလေ့ထုံးတမ်းဝန်ကြီးဌာန ဒုဝန်ကြီးရဲ့ အငယ်ဆုံးသားကို ရှာတွေ့ခဲ့တယ်။ သူက အခု ပထမအဆင့် စစ်သူကြီး ရွှမ်ဝေ လေ]

[စစ်သူကြီး ရွှမ်ဝေက ငယ်ငယ်ကတည်းက သိုင်းပညာကို ကြိုက်တယ်။ သူ့အဖေက ဝါးခြမ်းပြားနဲ့ လိုက်ရိုက်တာတောင် သူက စာပေသင်ဖို့ ဇွတ်ငြင်းခဲ့တာ။ သူ့ရဲ့ အငယ်ဆုံးသား စာဖတ်ဖော်အဖြစ် ရွေးချယ်ခံရတယ်ဆိုတာ သိလိုက်ရတော့ သူ့အဖေ ကြောက်လွန်းလို့ ဝါးခြမ်းပြား လွတ်ကျသွားပြီး ယခင်မင်းကြီးဆီ သွားငိုပြခဲ့တယ်။ အရှင်မင်းကြီး၊ ကျွန်တော်မျိုးရဲ့သားက အရမ်း ဆိုးသွမ်းပြီး စာမသင်ချင်ပါဘူးတဲ့]

[ယခင်မင်းကြီးက ဓလေ့ထုံးတမ်းဝန်ကြီးဌာန ဒုဝန်ကြီး ဘယ်လောက် ဇဝေဇဝါ ဖြစ်နေလဲဆိုတာ မြင်တော့ နည်းနည်း ဖွင့်ပြောပြလိုက်တယ်။ ကိစ္စမရှိပါဘူး။ ငါကိုယ်တော် သူ့ကို ရှာနေတာပါတဲ့]

ချူဟွား၏ လက်ရှိ အပြုအမူသည် အဲဒီတုန်းက ဓလေ့ထုံးတမ်းဝန်ကြီးဌာန ဒုဝန်ကြီးနှင့် အတူတူပင် ဖြစ်လိမ့်မည်။ ခေါင်းပေါ်တွင် မေးခွန်းထုတ်စရာများ ပြည့်နှက်နေလေသည်။

[ဘာဖြစ်လို့လဲ]

System: [ဘာလို့လဲဆိုတော့ အရှင်မင်းကြီးက အဲဒီတုန်းက အရမ်း အတွင်းစိတ်ကို ထိန်းချုပ်ပြီး အရမ်း တိတ်ဆိတ်လွန်းနေလို့လေ]

ချူဟွား ခေါင်းပေါ်တွင် မေးခွန်းထုတ်စရာများ ပိုများလာသည်။ [ကျောင်းပြေးပြီး နံရံကျော်တက်တဲ့လူက လူတွေနဲ့ သိပ်မဆက်ဆံဘူး ဟုတ်လား။ စကားနည်းတယ် ဟုတ်လား]

မင်းသားငါးခမျာ ခြေချော်သွားပြီး နံရံတွင် ကပ်သွားကာ အတော်လေး ဖရိုဖရဲ ဖြစ်သွားလေသည်။

သူ့အဖေရဲ့ လက်ရှိ သေးသိမ်တဲ့၊ အငြိုးကြီးတဲ့၊ တခြားသူတွေကို ဒုက္ခပေးတတ်တဲ့ အပြုအမူနဲ့ အတွင်းစိတ်ကို လူတွေနဲ့ သိပ်မဆက်ဆံဘဲ စကားနည်းတယ် ဟုတ်လား။ တကယ်ကြီးလား။

System: [အဲဒါ စာဖတ်ဖော်ကြောင့် ပျက်စီးသွားတာ မဟုတ်ဘူးလား]

ချူဟွားက ခဏလောက် တိတ်ဆိတ်သွားကာ [စာဖတ်ဖော်က မိုက်တာပဲ]

မင်းဆရာအိုကြီးနှင့် မင်းသားငါးတို့ တိတ်တဆိတ် သဘောတူလိုက်ကြသည်။ တကယ် မိုက်တာပဲ။

ချူဟွား: [ဒါဆို စစ်သူကြီး ရွှမ်ဝေက ငယ်ငယ်ကတည်းက သုံးပွင့်ဆိုင် သူလျှို ဖြစ်နေတာပေါ့။ သူ လစာ ၃ ခု ရလား]

[မမကြီးဟွား၊ နင့်ရဲ့ ရှုထောင့်က တော်တော် ထူးခြားတာပဲ] Systemက ဒီအချက်ကို တွေးတောင် မတွေးမိပေ။ သူက အထဲ ဝင်မွှေပြီး အကြာကြီး ရှာဖွေလိုက်ပေမဲ့ ဘာရလဒ်မှ မတွေ့ရပေ။ [သူ အလုပ်တွေ အများကြီး လုပ်ခဲ့ပေမဲ့ လစာ မရခဲ့ပါဘူး]

ချူဟွားလည်း ကိုယ်ချင်းစာကြည့်လိုက်မိသည်။ သူ အလုပ် ၃ ခုကို ကြိုးကြိုးစားစား လုပ်ခဲ့ပေမဲ့ တစ်ပြားမှ မရဘူးဆိုတော့...

အလုပ်သမားတစ်ယောက်ရဲ့ လွန်ကဲတဲ့ဒေါသ: [ကပ်စေးနှဲလိုက်တာ]

System: [ဟုတ်တယ်လေ။ အရမ်း ကပ်စေးနှဲတာပဲ]

အားလုံး: "..."

ယခင်မင်းကြီးက အရှင်မင်းကြီးအတွက် ရွေးချယ်ပေးခဲ့တဲ့ ဆရာက မင်းဆရာအိုကြီး။ စစ်သူကြီး ရွှမ်ဝေ အလောင်းအလျာလေးက အရှင်မင်းကြီးဆရာရဲ့ တပည့်၊ မင်းသားရဲ့ လက်ရုံး၊ ပြီးတော့ အရှင်မင်းကြီး ယုံကြည်ရတဲ့ ပထမအဆင့် စစ်သူကြီး ဖြစ်လာခဲ့တာလေ။ သူ အကျိုးအမြတ် အများကြီး ရခဲ့တာ ဟုတ်တယ်မလား။

ငွေက တကယ် ပြောပလောက်တာ မဟုတ်ပါဘူး။ လူတစ်ယောက်နှင့် systemတစ်ခုက ထပ်ပြီး မကောင်းသည့် ဖရဲသီးများကို တူးဖော်ပြီး အရှင်မင်းကြီးနှင့် စစ်သူကြီး ရွှမ်ဝေတို့၏ ရေရှည် ဆက်ဆံရေးကို အက်ကြောင်းမဖြစ်စေရန် အလို့ငှာ မင်းဆရာအိုကြီးမှာ အလျင်အမြန် ရှေ့တိုးလာလေသည်။ "အဟမ်း”

ဟန်ဆောင် ချောင်းဟန့်သံက မင်းသားငါး၏ အာရုံစိုက်မှုကို အောင်မြင်စွာ ဆွဲဆောင်နိုင်ခဲ့သည်။ သူ လှည့်ကြည့်လိုက်တော့ သူ့နောက်မှာ မင်းဆရာအိုကြီး ရောက်နေပြီး သူ့ကို အေးဆေးစွာ ကြည့်နေသည်ကို တွေ့လိုက်ရသည်။ ချက်ချင်းပင် မကောင်းသော ခံစားချက်တစ်ခု ရလိုက်၏။

သူ ဖရဲသီးစားနေတာ မိသွားပြီ။

ပြီးတော့ ဒီလို ကိုယ်ဟန်အနေအထားနဲ့။

အားးးး။ သူ မင်းဆရာကြီးရှေ့မှာ တကယ် အရူးလုပ်မိပြီ။

မင်းသားငါး၏ ကျင့်ကြံမှု မပြည့်စုံသေးသဖြင့် သူ့နားရွက်များ ရှက်စိတ်ကြောင့် နီရဲနေသည်။ သို့တိုင်အောင် သူသည် အခြေခံ ယဉ်ကျေးမှုကို သတိရပြီး ရိုသေစွာ ဂါရဝပြုလိုက်သည်။

"တပည့်ရှောင်ဟုန် ဆရာ့ကို နှုတ်ဆက်ပါတယ်”

မင်းဆရာအိုကြီး: “ထပါ”

သူသည် လက်တစ်ကမ်းတွင် ရှိသော ချန်ဟွားကျွီကို တစ်ချက် ကြည့်လိုက်ပြီး ခဏလောက် တွန့်ဆုတ်နေပြီးမှ သွားဖို့ ရွေးချယ်လိုက်သည်။

ခြံဝင်းထဲရှိ ချူဟွားသည် အပြင်ဘက်က လှုပ်ရှားမှုကို ကြားလိုက်ရသဖြင့် ထွက်ကြည့်လိုက်ရာ ခြံဝင်းတံခါးဝတွင် မင်းဆရာအိုကြီးနှင့် မင်းသားငါးတို့ကို တွေ့လိုက်ရလေသည်။

"မင်းဆရာကြီးကို နှုတ်ဆက်ပါတယ်”

မင်းဆရာအိုကြီးက ကြင်နာသော မျက်နှာထားကို ဆင်မြန်းထားကာ "ထပါ။ စာသင်ချိန် ရောက်ပြီ”

"ဟုတ်ကဲ့ပါ" ချူဟွားက ဘာမှ မမေးဘဲ အစီအစဉ်အတိုင်း လိမ္မာစွာ လိုက်နာလိုက်သည်။

မင်းသားငါးအနားမှ ဖြတ်သွားစဉ် သူက သူမကို နာကြည်းသော အကြည့်ဖြင့် ကြည့်လိုက်သည်။ "အစ်မ ကြည့်လေ။ ကျွန်တော်က စာဖတ်ဖော်ပါလို့ ပြောသားပဲ”

ချူဟွား၏ နှုတ်ခမ်းထောင့်မှာ အနည်းငယ် ကွေးတက်သွားပြီးမှ ပြန်ကျသွားသည်။

နန်းတွင်းစာမေးပွဲ တံခါးပေါက်က သူမအတွက် ပိတ်ထားပေမဲ့ မင်းဆရာကြီးက သူမကို သင်ပေးတဲ့ ပြတင်းပေါက်က အများကြီး အစားထိုးပေးနိုင်တယ်။ ဒါ့အပြင် တစ်ယောက်ဝယ် တစ်ယောက်လက်ဆောင် မင်းဆရာကြီးလည်း ရှိသေးတယ်လေ။ ဒီအမြတ်က တော်တော် ကြီးတာပဲ။

မင်းသားငါး နေထိုင်သော ခြံဝင်း၏ အရှေ့ဘက်ဆောင်ကို စာကြည့်ခန်းအဖြစ် ယာယီ ပြောင်းလဲထားပြီး စာကြည့်စားပွဲ သုံးလုံးနှင့် စာအုပ်များစွာ တင်ထားသည်။ စာပေဆိုင်ရာပစ္စည်း ရတနာလေးပါးကို အစောကြီးကတည်းက ပြင်ဆင်ထားပြီး ဖြစ်သည်။

မင်းဆရာအိုကြီးသည် ချူဟွား၏ အခြေခံ မည်သို့ရှိသည်ကို မသိသဖြင့် အရင် မေးလိုက်သည်။ "မင်း ဘယ်စာအုပ်တွေ ဖတ်ဖူးလဲ”

ချူဟွား: "စာအုပ်ကြီးလေးအုပ်နဲ့ ကျမ်းငါးစောင်ကို ဖတ်ဖူးပါတယ်။ မူဝါဒဆိုင်ရာ မေးခွန်းတချို့ ရေးနိုင်ပေမဲ့ ကျွန်မရဲ့ လေ့လာမှုက အရမ်း ယေဘုယျဆန်ပါတယ်”

မင်းဆရာအိုကြီးသည် အနည်းငယ် အံ့အားသင့်သွားလေသည်။ သူက ဘာလို့ နန်းတွင်းစာမေးပွဲ ပုံစံအတိုင်း ဖတ်ထားရတာလဲ။

သူသည် ချူမိသားစုနှင့် ပတ်သက်ပြီး ဖြစ်ပျက်နေသည့် အခြေအနေကို မသိသလို အခု မေးဖို့လည်း မလွယ်ကူပေ။

ချူဟွားက "ယေဘုယျဆန်တယ်" ဟု ပြောသည်ကို ကြားလိုက်ရသဖြင့် သူသည် ဒီနှစ် နန်းတွင်းစာမေးပွဲမှ မေးခွန်းတစ်ခုကို ယူပြီး ချူဟွားကို မေးလိုက်သည်။ ချူဟွားက အတော်လေး ကောင်းမွန်စွာ ဖြေဆိုနိုင်လိမ့်မည်ဟု ဘယ်သူက ထင်မိပါမည်နည်း။

မင်းဆရာအိုကြီးသည် မေးခွန်းသုံးခု ဆက်တိုက် မေးလိုက်ရာ ချူဟွားက အားလုံးကို ကောင်းစွာ ဖြေဆိုနိုင်ခဲ့သည်။ ထူးချွန်ပြောင်မြောက်ခြင်း မရှိသော်လည်း သူမ၏ ရွယ်တူအများစုထက် သာလွန်သည်။

ထိုအချက်ဖြင့် မင်းဆရာအိုကြီးမှာ စိတ်အား ထက်သန်လာတော့သည်။ "မင်း ဘယ်က သင်လာတာလဲ”

ချူဟွား: "ကျွန်မအစ်ကိုက နန်းတွင်းစာမေးပွဲမှာ တတိယ ရခဲ့တာလေ။ နန်းတွင်းစာမေးပွဲမှာ သူ့ကို ကူညီဖို့အတွက် စာအုပ်တချို့ စုဆောင်းခဲ့တာပါ”

မင်းဆရာအိုကြီးက ဒီအကြောင်းကို သိသည်။ သူသည် ညဉ့်နက်သန်းခေါင် systemက နန်းတွင်းစာမေးပွဲ မေးခွန်းများကို ဖြေဆိုနေသည့် သတင်းကို စားခဲ့ဖူးသော်လည်း ချူဟွားက အချက်အလက်များ စုဆောင်းနေစဉ် အားလုံးကို မှတ်မိနေလိမ့်မည်ဟု မမျှော်လင့်ခဲ့ပေ။

သူမက ၁၃ နှစ်ပဲ ရှိသေးပြီး သင်ယူစရာတွေ အများကြီး ကျန်နေသေးသည်။

သူမကို ကောင်းစွာ လေ့ကျင့်ပေးလျှင် အနာဂတ်တွင် အရာရှိတစ်ဦး ဖြစ်လာနိုင်သည်။ System၏ အကူအညီဖြင့် သူမသည် သေချာပေါက် ကြီးမားသော မဏ္ဍိုင်တစ်ခု ဖြစ်လာလိမ့်မည်။

မင်းဆရာအိုကြီးသည် သူ့စိတ်လှုပ်ရှားမှုကို ထိန်းချုပ်ထားလိုက်၏။ "ကောင်းပြီ။ ဒါဆို စာအုပ်ကြီးလေးအုပ်ကနေ ပြန်လေ့လာကြစို့”

ချူဟွား: "ဟုတ်ကဲ့ပါ"

အသုံးတော်ခံ ဖြစ်နေသော မင်းသားငါး: ?

သူ့ကို မေးခွန်းတစ်ခွန်းတောင် မမေးဘူးလား။ ဟန်ပြတောင် မလုပ်ဘူးလား။

စာအုပ်ကြီးလေးအုပ်နှင့် ကျမ်းငါးစောင်သည် ကွန်ဖြူးရှပ်ဝါဒ၏ ဂန္ထဝင် လက်ရာများ ဖြစ်ပြီး မင်းဆက်တိုင်း၏ နန်းတွင်းစာမေးပွဲများတွင် မပါမဖြစ် မေးခွန်းများ ဖြစ်သည်။

မင်းဆရာအိုကြီးသည် ချူဟွားကို ပြန်လည် လေ့လာစေခြင်းဖြင့် တစ်နေ့တွင် သူမသည် နန်းတွင်းစာမေးပွဲကို ဖြေဆိုပြီး ညီလာခံသို့ ဝင်ရောက်နိုင်မည်ဟု မျှော်လင့်နေသည်။ သူမ ကျရှုံးလျှင်ပင် အခြားသူများနှင့် ငြင်းခုံရာတွင် ဂန္ထဝင်စာပေများကို ကိုးကားနိုင်သဖြင့် အားနည်းချက် ဖြစ်လိမ့်မည် မဟုတ်ပေ။

မင်းဆရာအိုကြီးသည် အသက် ၇၀ နီးပါး ရှိနေပြီဖြစ်ပြီး ကျန်းမာရေးက ယခင်ကလောက် မကောင်းတော့ပေ။ တစ်နာရီလောက် သင်ပြီးသည်နှင့် အနည်းငယ် ပင်ပန်းလာတော့သည်။ အနားယူပြီးနောက် သူသည် ချူဟွားနှင့် မင်းသားငါးအတွက် အိမ်စာတချို့ ထားခဲ့ပြီး ပြန်သွားခဲ့လေသည်။

မင်းသားငါးသည် လွန်ခဲ့သော နှစ်နှစ်က မင်းဆရာအိုကြီး သူ့ကို ငြင်းပယ်ခဲ့သည့် အကြောင်းရင်းမှာ အမှန်ဖြစ်ကြောင်း သိလိုက်ရပြီး သူ့ရင်ထဲက အဖုအထစ် အနည်းငယ် ပြေပျောက်သွားသည်။

ထို့နောက် သူ တစ်စုံတစ်ခုကို သတိရသွားပြီး စစ်သူကြီး ရွှမ်ဝေ၏ အိမ်တော်သို့ စာတစ်စောင် ပို့ရန် လူလွှတ်လိုက်လေသည်။

ဒီနှစ်ရက်အတွင်း စစ်သူကြီး ရွှမ်ဝေ၏ ဒဏ်ရာဟောင်း ပြန်ဖြစ်လာသဖြင့် အိမ်တွင် အနားယူရန် ခွင့်ယူထားသည်။ မင်းသားငါးက သူ့ဆီ စာပို့လိုက်သည်ကို ကြားလိုက်ရသောအခါ သူ့မှာ အထူးတဆန်း ဖြစ်သွားတော့၏။ သူက မင်းသားငါးနဲ့ အဆက်အသွယ် မရှိဘဲ ဘာလို့ မင်းသားငါးက သူ့ဆီ စာပို့ရတာလဲ။

ထူးဆန်းသော်လည်း သူက စာကို ယူလာရန် အမိန့်ပေးလိုက်သည်။

စာကို ဖွင့်ဖတ်လိုက်သည်နှင့် စစ်သူကြီး ရွှမ်ဝေ ရုတ်တရက် မတ်တတ်ထရပ်လိုက်ပြီး နဂါးတစ်ကောင်၊ ကျားတစ်ကောင်လို လမ်းလျှောက်သွားတော့သည်။ "မြင်း ပြင်လိုက်”

အစေခံ:?

စစ်သူကြီးက ခြေထောက်နာနေတယ်လို့ ပြောထားတယ် မဟုတ်ဘူးလား။

မွန်းလွဲပိုင်းတွင် မင်းဆရာကြီးက ချူမိသားစုထံ ရောက်လာလေသည်။

သူက ချူဟွား၏ တိုးတက်မှုကို မေးမြန်းပြီး မနက်ပိုင်းက မင်းဆရာအိုကြီး ဘာသင်ပေးခဲ့လဲ၊ ဘယ်လောက် သင်ပေးခဲ့လဲ၊ ဘယ်လောက် ကြာကြာ သင်ပေးခဲ့လဲ စသည့် အကြောင်းအရာများကို မေးမြန်းခဲ့သည်။

အဖြေရပြီးနောက် မင်းဆရာကြီးသည် ကျမ်းငါးစောင်ကို မင်းဆရာအိုကြီးထက် ၁၅ မိနစ် ပိုသင်ပေးခဲ့ပြီးမှ အိမ်စာ ထားခဲ့လေသည်။

နောက်ကျောပုံရိပ်က အလွန် သက်သောင့်သက်သာရှိပြီး လှပနေသည်။ 'ငါ နိုင်ပြီ' ဆိုသည့် ခံစားချက်မျိုးပင်။

ချူဟွား: "..."

မင်းသားငါး: "..."

ဒါက ခင်ဗျားတို့နှစ်ယောက် ကြိတ်နေကြတာလား။

ဒီနေ့ ဖရဲသီးက အရေးမကြီးသဖြင့် နန်းစောင့်တပ်သားသည် နန်းတော်သို့ ပို့ရန် မလောဘဲ မင်းဆရာကြီး အတန်းပြီးသည်အထိ စောင့်ကာ ဒီနေ့ ဖရဲသီးနှင့် ထောက်လှမ်းရေးသတင်းများကို အတူတကွ ပို့လိုက်လေသည်။

မင်းသားငါး နေမကောင်းဟန်ဆောင်ပြီး ကျောင်းပြေးသည့် အပိုင်းကို ရောက်သောအခါ အရှင်မင်းကြီး ရယ်မောပြီး ပေါင်ကို ရိုက်လိုက်သည်။ "ဒီကောင်လေးရဲ့တင်ပါး အရိုက်ခံထားရတာကိုး”

သူကိုယ်တိုင် ကျောင်းပြေးပြီး နံရံကျော်တက်လို့ ခြေထောက်ကျိုးသည့် အပိုင်းကို မြင်သောအခါ အရှင်မင်းကြီး၏ အပြုံး တဖြည်းဖြည်း ပျောက်ကွယ်သွားသည်။ ချူဟွားရဲ့ စပ်စုချင်စိတ်က အချိန်မှားနေတာပဲ။

သူ ဒီအကြောင်းအရာအပိုင်းကို သိမ်းထားရမယ်။ မှူးမတ်တွေကို ပေးသိလို့ မဖြစ်ဘူး။

စစ်သူကြီး ရွှမ်ဝေက သုံးပွင့်ဆိုင် သူလျှို လုပ်ခဲ့သည့် အပိုင်းကို မြင်သောအခါ အရှင်မင်းကြီး၏ အပြုံး လုံးဝ ပျောက်ကွယ်သွားတော့သည်။ ရှန့်ဇီ၊ မင်း တော်တော် စွမ်းတာပဲ။

ငါက မင်းကို ညီအစ်ကိုလို သဘောထားပြီး ငါ့အတွက် မယ်တော်ကို ကိုင်တွယ်ပေးရတာ ဖိအားများနေမယ်လို့ ထင်ခဲ့တာ။ ငါ မင်းကို ယုံကြည်ပြီး နေရာတိုင်းမှာ ကာကွယ်ပေးခဲ့ပေမဲ့ မင်းက ငါ့ကွယ်ရာမှာ ခမည်းတော်နဲ့ ပူးပေါင်းကြံစည်နေခဲ့တာလား။

ငါ့ယုံကြည်မှုတွေ လွဲမှားခဲ့ပြီ!!!

မကြာမီ စစ်သူကြီး ရွှမ်ဝေ၏ အိမ်တော်သို့ အမိန့်တော် တစ်စောင် ရောက်ရှိလာလေသည်။ ချန်ကျို့ ကိုယ်တိုင် အမိန့်တော်ကို ကြေညာရန် သွားရောက်ပြီး စစ်သူကြီး ရွှမ်ဝေကို နန်းတော်သို့ ဆင့်ခေါ်လိုက်သော်လည်း စစ်သူကြီး ရွှမ်ဝေသည် မွန်းလွဲပိုင်းက မြို့ပြင်ထွက်ပြီး မြို့တော်ပြင်ပရှိ ရေပူစမ်းသို့ သွားရောက်ခဲ့ကြောင်း သိလိုက်ရသည်။ ပြန်လာမည့်ရက်က မသေချာပေ။ စစ်သူကြီး ရွှမ်ဝေသည် စစ်မြေပြင်တွင် နှစ်ပေါင်းများစွာ တိုက်ပွဲဝင်ခဲ့ပြီး ကြီးငယ်မဆို ဒဏ်ရာများစွာ ရရှိခဲ့သည်။ သူသည် ရံဖန်ရံခါ ရေပူစမ်းသို့ သွားတတ်သော်လည်း ပုံမှန်အားဖြင့် တစ်ရက် သို့မဟုတ် နှစ်ရက်သာ ကြာတတ်သည်။ ရက်အတိအကျမရှိဘဲ ပြန်လာမဲ့အချိန်ကို မသိရတာမျိုး ဘယ်တုန်းက ရှိခဲ့လို့လဲ။

ဒါ့အပြင် ဒီအချိန်ကိုက်နေပုံက နည်းနည်း တိုက်ဆိုင်လွန်းနေတာ မဟုတ်ဘူးလား။

အရှင်မင်းကြီး သံသယဝင်ပြီး နန်းစောင့်တပ်မှူးကို ဆင့်ခေါ်မေးမြန်းလိုက်သည်။ မင်းသားငါးက တိတ်တဆိတ် သတင်းပို့လိုက်ခြင်း ဖြစ်ကြောင်း သိလိုက်ရလေသည်။

ကောင်လေး၊ မင်း အဖေ့အတွက် တွင်းတူးပေးလိုက်တာပဲ မဟုတ်လား။

အရှင်မင်းကြီးတစ်ယောက် ကြောက်မက်ဖွယ် ကောင်းအောင် ပြုံးလိုက်လေသည်။

ထိုအခိုက်အတန့်တွင် နှုတ်မိန့်တော်ကို ပြောင်းလဲပြီး မင်းသားငါးကို နန်းတော်သို့ ဆင့်ခေါ်လိုက်လေသည်။

မင်းသားငါးသည် မတ်မတ်ဝင်သွားပြီး ခြေထောက်တစ်ဖက် ထော့နဲ့ထော့နဲ့ဖြင့် ပြန်ထွက်လာသည်။ ပြန်ရောက်ပြီးနောက် သူသည် အိပ်ရာပေါ်တွင် လှဲအနားယူခြင်း မရှိဘဲ ရွှေငွေ လက်ဝတ်ရတနာများ၊ ပိုးထည်များနှင့် သန္တာကျောက်၊ ကျောက်စိမ်းများ အပါအဝင် ပစ္စည်းသေတ္တာ သုံးလုံးဖြင့် ချန်ဟွားကျွီသို့ ရောက်လာလေသည်။

"အစ်မ၊ ဒါက ခမည်းတော်က ကျွန်တော့်ကို ယူလာပေးခိုင်းတဲ့ ရတနာတွေပါ။ ဒီကာလအတွင်း ကျွန်တော့်ကို လက်ခံပေးတဲ့အတွက် ကျေးဇူးတင်ပါတယ်တဲ့”

ချူဟွားက systemကို သီးသန့် မေးလိုက်၏။ [တကယ်လား]

System: [အတုပါ။ အရှင်မင်းကြီးက နင် သူ့ကို ကပ်စေးနှဲတယ်လို့ ဆဲလိုက်လို့ ဒေါသထွက်နေတာ။ သက်သေက ဒီမှာလေ]

ချူဟွား၏ မျက်လုံးများမှာ ဖြည်းဖြည်းချင်း တောက်ပလာသည်။

အရှင်မင်းကြီးကို ကပ်စေးနှဲတယ်လို့ ဆဲလိုက်တာက ဒီလို အကျိုးကျေးဇူးတွေ ရှိတာကိုး။

သူမ သင်ယူလိုက်ရပါပြီ။

...