အခန်း ၈၂

အပိုင်း (၈၂)

ချူဟွား: [ပုဂ္ဂလိက ဒင်္ဂါးသွန်းလုပ်ခြင်းနဲ့ ငွေတုဆိုတာ တူညီတဲ့ သဘောတရား လုံးဝ မဟုတ်ဘူး]

[ပုဂ္ဂလိက ဒင်္ဂါးသွန်းလုပ်ခြင်းက ရှေးခေတ် ငွေကြေးဆိုင်ရာ ဝေါဟာရတစ်ခု၊ အရပ်သားတွေက ကိုယ့်သဘောနဲ့ကိုယ် ဒင်္ဂါးတွေ သွန်းလုပ်တာကို ဆိုလိုတယ်။ ငွေတုဆိုတာကတော့ အကျိုးအမြတ်ရဖို့ အရည်အသွေး လျှော့ချပြီး အကြမ်း သွန်းလုပ်ထားတဲ့ ဒင်္ဂါးတွေပဲ။ ပုဂ္ဂလိက ဒင်္ဂါးသွန်းလုပ်ခြင်းမှာ ငွေတုပါဝင်ပေမဲ့ အားလုံးက ငွေတု မဟုတ်ဘူး]

ရှင်းလင်းချက်က ရိုးရှင်းပြီး ပြတ်သားလွန်းသဖြင့် systemသည် ချက်ချင်း နားလည်သွားပြီး ၎င်း၏ ရိုးရှင်းသော စကားလုံးများဖြင့် ဘာသာပြန်လိုက်လေသည်။

[ပုဂ္ဂလိက ဒင်္ဂါးသွန်းလုပ်ခြင်းဆိုတာ ကိုယ့်ဘာသာကိုယ် တိတ်တဆိတ် လုပ်တာ၊ ငွေတုဆိုတာကတော့ အတုပဲ။ ကုန်ကျစရိတ်သက်သာတဲ့ ကြေးနီဒင်္ဂါးတွေကို အစစ်နေရာမှာ အစားထိုးဖို့ ကြိုးစားတာ။ မူလက တစ်သန်းရှိတာကို နှစ်သန်း ဒါမှမဟုတ် အဲ့ဒီထက်ပိုပြီး ဖြစ်အောင် လုပ်တာပေါ့]

ချူဟွားက အတည်ပြုပေးလိုက်၏။ [ဟုတ်တယ်]

System၏ လေသံသည် ချက်ချင်း ပြောင်းလဲသွားသည်။ [ဟေး— ဒီလူတွေက ဘာအိပ်မက်လှလှတွေ မက်နေကြတာလဲ]

[လူတွေက ကြေးပြားအနည်းငယ် ရဖို့ တစ်လလုံး အပင်ပန်းခံ လုပ်နေရတာ၊ နင်က ကြေးနီကို အရည်ဖျော်ပြီး တခြားသတ္တု နည်းနည်း ရောလိုက်ရုံနဲ့ အများကြီး ပွားသွားလို့ရတယ်ဆိုရင် ဘယ်သူက အလုပ်လုပ်ချင်တော့မှာလဲ။ အားလုံးက ကြေးနီဒင်္ဂါး အတုလုပ်ဖို့ အပြေးအလွှားသွားပြီး ချမ်းသာကုန်ကြတော့မှာပေါ့]

ချူဟွား: [ရှေးခေတ်က ပုဂ္ဂလိက ဒင်္ဂါးသွန်းလုပ်တဲ့ နည်းပညာ လိုအပ်ချက်က ခေတ်သစ်က ငွေတုလုပ်တာလောက် မမြင့်မားဘူး။ အစစ်နဲ့ အတု ခွဲခြားဖို့ နည်းနည်း ခက်ခဲတယ်။ ဒါကြောင့် အရပ်သားတွေ ကြေးနီဒင်္ဂါး အတုလုပ်တဲ့ အပြုအမူက ပိတ်ပင်လို့ မနိုင်ဘူး ဖြစ်နေတာ]

System: [ကြေးနီဒင်္ဂါး သွန်းလုပ်ရတာ လွယ်ကူလို့လား]

ချူဟွား: [မူရင်းဒင်္ဂါး၊ ပုံစံခွက်၊ ကြေးနီရည်တွေ လိုအပ်တယ်ဆိုတာ ငါ သိတယ်၊ ဘယ်လို လုပ်ရလဲဆိုတာ အတိအကျ မသိဘူး]

ဒီ မဖြစ်စလောက် သဲလွန်စကလည်း တီဗီစီးရီးတွေထဲကနေ ရထားခြင်း ဖြစ်သည်။ မှန်မမှန်တော့ မသိပေ။ အကြောင်းအရင်းမှာ ရှေးခေတ် ကြေးနီဒင်္ဂါး ပြုလုပ်ပုံ အဆင့်ဆင့်ကို အတိအကျ ပြန်လည် ဖန်တီးပြနိုင်လောက်အောင် ချမ်းသာသည့် ရိုက်ကူးရေးအဖွဲ့ မရှိသောကြောင့်ပင်။

Systemသည် ကြေးနီဒင်္ဂါး သွန်းလုပ်ပုံ အဆင့်ဆင့်ကို စိတ်ကူးသက်သက်ဖြင့် မသိရှိနိုင်ပေ။ စူးစမ်းလိုစိတ်ကို ဖျောက်ဖျက်လို့ မရနိုင်တော့ချေ။ [ငါ သွားကြည့်လိုက်ဦးမယ်]

လူအများ: !!!

မလုပ်ပါနဲ့။ မလုပ်ပါနဲ့။ လုံးဝ မလုပ်ပါနဲ့။

ကြေးနီဒင်္ဂါး သွန်းလုပ်တာ ဘယ်လောက်တောင် ကြီးမားတဲ့ ကိစ္စရပ်တဲ့။ သူတို့ သိခွင့်ရှိတဲ့ လျှို့ဝှက်ချက် ဟုတ်ရဲ့လား။

ဒီညသာ ဒီလောက် အသက်အန္တရာယ် များတဲ့ လျှို့ဝှက်ချက်ကို ကြားလိုက်ရရင် ညသန်းခေါင်ကြီး ငြိမ်ဝပ်ပိပြားရေးရုံးတော်ကို ဖိတ်ခေါ်ခံရပြီး နှစ်သစ်ကူး အကြိုညကို ထောင်ထဲမှာ ကုန်ဆုံးရလိမ့်မယ်။ နှစ်သစ်ကူးကို ဒီလို ကြိုဆိုမဲ့အိမ် ဘယ်မှာ ရှိလို့လဲ။

ချူဟွားသည်လည်း သည်လိုလုပ်လို့ မဖြစ်မှန်း သိလေသည်။ သီးသန့် ဆိုလျှင် နားထောင်နိုင်သော်လည်း အဖွဲ့လိုက် စကားပြောခန်းတွင်တော့ လုံးဝ ထုတ်ပြော၍ မဖြစ်ပေ။

သေမှာ ကြောက်သူ အချို့သည် မီတာ ၅၀ အကွာအဝေးမှ လွတ်မြောက်ရန် အစွမ်းကုန် ပြေးလွှားနေကြပြီ ဖြစ်၏။

ငါ မြန်မြန် ပြေးနိုင်သရွေ့ လျှို့ဝှက်ချက်က ငါ့ကို မီမှာ မဟုတ်ဘူး။ ထောင်တံခါးကလည်း ငါ့ကို ကြိုဆိုနေမှာ မဟုတ်ဘူး။

အဝေးတွင် ရှိနေသူ အချို့သည် ခြေလှမ်း အနည်းငယ် ပြေးလိုက်ရုံဖြင့် ဆက်သွယ်မှု ဧရိယာထဲမှ လွတ်မြောက်သွားကြသဖြင့် ရင်ဘတ်ကို ပုတ်ကာ သက်သာရာ ရသွားကြသည်။

ဖရဲသီး စားရန်အတွက် ချူဟွားနှင့် နီးသော နေရာတွင် ထိုင်နေသူများလည်း ရှိကြသည်။ ယခု အကျပ်အတည်းနှင့် ကြုံတွေ့ရသောအခါ သုံးပေလောက် ခုန်တက်သွားကြပြီး ခြေဖဝါးများ မီးခိုးထွက်လုမတတ် ပြေးလွှားကြတော့သည်။

ချူချီနှင့် ချူရှူး တို့သည် ပြေးသင့် မပြေးသင့် တွေးတောနေကြဆဲပင်။ အတွေ့အကြုံများသော သခင်မကြီး ချူကတော့ အဝတ်အစားများ ချွတ်ပြီး အိပ်ရာဝင်နေပြီ ဖြစ်သော်လည်း အသက်အန္တရာယ် ရှိသော ကိစ္စဖြစ်ကြောင်း ကြားလိုက်ရသည်နှင့် အလျင်အမြန် ထလိုက်သည်။ အဝတ်အစားကို ပြီးစလွယ် ဝတ်ဆင်ပြီး ခြေကုန်သုတ် ပြေးတော့သည်။

အပြင်တွင် ပုန်းနေသူများက ပြေးနိုင်သေးသည်။ ဧည့်ခန်းထဲမှ အစေခံမများသည်လည်း တိတ်တဆိတ် ထွက်ပြေးရန် အခွင့်အရေး ရှာနိုင်ကြသည်။ စက္ကန့်ပိုင်း အတွင်း မီတာ ၅၀ ပြေးနိုင်စွမ်း မရှိသော ချူဖျင်နှင့် ဝမ်သခင်မ တို့ကတော့ လုံးဝ လဲလျောင်းနေလိုက်ကြတော့သည်။

နားထောင်ရင်လည်း နားထောင်လိုက်ပါတော့။ သာ့ရှန်းက ချူဟွားကို လိုအပ်နေသရွေ့ သူတို့နှစ်ယောက် အသက်အန္တရာယ် စိုးရိမ်စရာ မရှိနိုင်ပါဘူး။

Systemသည် အလွန် လျင်မြန်စွာ ပြန်ရောက်လာလေသည်။ [ကြေးနီဒင်္ဂါး သွန်းလုပ်ရတာ ခက်တယ်လို့ ငါ ထင်ခဲ့တာ၊ တကယ်တော့ အရမ်း လွယ်တာပဲ၊ ဒါကို ယူပြီး...]

လူတိုင်း၏ မျက်နှာတွင် နာကျင်မှုများ ပေါ်လာကြတော့သည်။ ဒီလောက် အသက်အန္တရာယ် များတဲ့ လျှို့ဝှက်ချက်ကို မဖြစ်မနေ နားထောင်ရမှာလား။

ဖေ့မင်ချန် ထွက်ခွာသွားပြီးနောက် ထူဝမ်ကွမ်းက ချူမိသားစုကို စောင့်ကြပ်ရန် တာဝန်ယူခဲ့သည်။ တစ်မိနစ် မပြည့်ခင် အချိန်အတွင်း သူသည် ကြေးနီဒင်္ဂါး သွန်းလုပ်သည့် ကိစ္စ ပေါက်ကြားသွားပါက ချူမိသားစုဝင်များကို မည်သို့ ကိုင်တွယ်ရမည်ကို စဉ်းစားပြီး ဖြစ်နေသည်။

ချူဖျင်နှင့် ဝမ်သခင်မ တို့လို လူများကို ထိပါး၍ မရပေ။ သခင်မကြီးချူနှင့် ချူရှူး တို့ကို ခြံဝင်းသို့ ပို့ဆောင်ပြီး စောင့်ကြည့်ခိုင်းထားရမည်။ အစေခံများကတော့ ကိုင်တွယ်ရ လွယ်ကူသည်။ သွေးထွက်သံယို ဖြစ်ရုံသာ ရှိသည်။ သို့သော် ချူဟွား သံသယ မဝင်စေရန် နည်းလမ်း ရှာရဦးမည်။

မထင်မှတ်ထားသော အချိန်တွင် ချူဟွားက systemကို တားဆီးလိုက်သည်။ [System၊ ဒီကိစ္စ ပြောလို့ မဖြစ်ဘူးနော်]

System: [?]

တစ်စက္ကန့်ခန့် စဉ်းစားပြီးနောက် ပြဿနာက ဘယ်မှာ ရှိသည်ကို သိရှိသွားသည်။ [ကောင်းပါပြီ၊ မမကြီးဟွား ပြောတာ နားထောင်မယ်၊ မပြောတော့ဘူး]

လူတိုင်းသည် ပေါ်တင်ရော တိတ်တဆိတ်ပါ သက်ပြင်းချလိုက်ကြသည်။ အသက်ရှည်ရှည်နေရမဲ့ ဘဝလေးတွေတော့ ဘေးကင်းသွားကြပြီ။

ထူဝမ်ကွမ်းနှင့် နန်းစောင့်တပ်သားများသည်လည်း အလုပ်တာဝန် လျော့ပါးသွားသဖြင့် ဝမ်းသာသွားကြသည်။ နှစ်သစ်ကူး အကြိုညတွင် အချိန်ပို ဆင်းရသည်မှာ အလွန် ပင်ပန်းလှပြီ ဖြစ်ရာ မည်သူက နှစ်ဆ အချိန်ပို ဆင်းချင်ကြမည်နည်း။ ဘေးကင်းစွာ ကုန်ဆုံးသွားသည်က အကောင်းဆုံးပင်။

ချူသခင်မလေးကို ကျေးဇူးတင်ပါတယ်။

Systemသည် ယခင်က လမ်းကြောင်းလွဲသွားသော စကားကို ဆက်ပြောလိုက်သည်။ [ဒီလူတွေ လုပ်တဲ့ကိစ္စက ပုဂ္ဂလိက သွန်းလုပ်တာရော၊ ငွေတု လုပ်တာရော ဆိုတော့ ပြစ်မှု နှစ်ဆပဲ]

ချူဟွား: [သူတို့ လုပ်တာ ဘယ်လောက် ကြာပြီလဲ]

System: [တစ်နှစ် မပြည့်သေးဘူး]

ဟုတ်ပါသည်။ အကယ်၍ ထိုလူစုသည် နှစ်ပေါင်းများစွာ လုပ်ကိုင်ခဲ့ပြီး ငွေတု အမြောက်အမြား ဈေးကွက်ထဲ ဝင်ရောက်နေခဲ့လျှင် တစ်စုံတစ်ယောက်က မှားယွင်းနေကြောင်း စောစီးစွာ တွေ့ရှိခဲ့မည်မှာ သေချာသည်။

ချူဟွား: [ပုဂ္ဂလိက သွန်းလုပ်ထားတဲ့ ကြေးနီဒင်္ဂါးတွေ များလား။ ဈေးကွက်ထဲ ဘယ်လောက် စီးဆင်းသွားပြီလဲ]

ဒါက system စားသုံးနေကျ အချစ်ရေး ဖရဲသီး မဟုတ်ဘဲ နယ်ပယ် အနည်းငယ် ကျော်လွန်နေသဖြင့် ခေတ္တမျှ သွားရောက် ရှာဖွေလိုက်သေးသည်။

[ကြေးနီဒင်္ဂါး ၅ သန်းကျော် သွန်းလုပ်ထားပြီး လက်ရှိ ဈေးကွက်ထဲ ၂ သန်းကျော် စီးဆင်းသွားပြီ။ များလား]

ချူဟွား: [...ဘာနဲ့ ယှဉ်မလဲဆိုတဲ့ အပေါ် မူတည်တယ်]

[သာ့ရှန်း တစ်ခုလုံး အနေနဲ့ ကြည့်ရင် ၂ သန်းကျော် ဆိုတာ မိုးဖွဲ ကျတာလောက်ပဲ ရှိတယ်။ ဒါပေမဲ့ ဒေသခံ ခရိုင်တစ်ခုတည်းကိုပဲ အကုန် စီးဆင်းသွားတာ ဆိုရင် ၂ သန်းကျော် ပမာဏက အရမ်း ကြီးမားတယ်]

[System၊ အဲဒီ အသစ် သွန်းလုပ်ထားတဲ့ ကြေးနီဒင်္ဂါးအတုတွေ ဘယ်ရောက်သွားလဲ ဆိုတာ ကြည့်လိုက်ပါဦး]

System: [နေရာတိုင်းမှာ ရှိတယ်။ ခရိုင်တစ်ခုတည်းမှာပဲ မဟုတ်ဘူး။ ဒီလူစုက ဘေးအန္တရာယ်ကို ဘယ်လို ရှောင်ရမလဲ ဆိုတာ သိတယ်]

ချူဟွားသည် ရင်ထဲမှ စိုးရိမ်မှုကို အနည်းငယ် လျှော့ချလိုက်သည်။ ကံကောင်းထောက်မစွာပင် ထိုလူစုသည် ခရိုင်တစ်ခုတည်းကို ပစ်မှတ်ထားခြင်း မရှိသဖြင့် သက်ရောက်မှုကို အနည်းငယ် လျှော့ချနိုင်ခဲ့သည်။

သူမသည် ဝေးလံသော မြို့တော်တွင် ရှိနေသဖြင့် မည်မျှပင် စိုးရိမ်နေပါစေ အရာမထင်ပေ။ အစ်ကိုဖြစ်သူ ချူချင်က ပြဿနာ ဘယ်မှာ ရှိသည်ကို ရှာဖွေတွေ့ရှိနိုင်မလား ဆိုသည့်အပေါ်တွင်သာ မူတည်နေသည်။ ငွေတု ထုတ်လုပ်သူများကို အမြန်ဆုံး ဖမ်းဆီးပြီး ဈေးကွက်ထဲ ဝင်ရောက်သွားသော ငွေတုများကို ပြန်လည် သိမ်းဆည်းနိုင်ရန် မျှော်လင့်ရသည်။

နှစ်သစ် အစမှာပင် ဒီလောက် ကြီးမားသော ကိစ္စရပ် ဖြစ်ပွားခဲ့ရာ အရှင်မင်းကြီးနှင့် မှူးမတ်များ၏ စိတ်အခြေအနေ ကောင်းမွန်ကြမည် မဟုတ်ပေ။ ဒီညသည်လည်း အိပ်မပျော်သော ညတစ်ည ဖြစ်လာပေဦးမည်။

မနက်ဖြန်တွင် အရှင်မင်းကြီးသည် မှူးမတ်များနှင့်အတူ ဘိုးဘေးကန်တော့ရန် ဘုရားကျောင်းသို့ စောစောစီးစီး သွားရောက်ရဦးမည်။ အခမ်းအနား အစီအစဉ်များက အတော်ပင် ရှုပ်ထွေးလှသည်။ သူတို့ တောင့်ခံနိုင်ကြပါစေဟုသာ မျှော်လင့်ရသည်။

ချူဟွားသည် တိတ်တဆိတ် ဆုတောင်းပေးလိုက်ပြီး တစ်ချိန်တည်းမှာပင် သူမကိုယ်တိုင် ထိုကဲ့သို့ ဒုက္ခများ ခံစားစရာ မလိုသည့်အတွက် ဝမ်းသာနေမိသည်။

[နှစ်ဝက်လောက် အချိန်အတွင်း ၅ သန်းကျော် သွန်းလုပ်ခဲ့တာဆိုတော့ တစ်ရက်ကို ဒင်္ဂါးပြား ၂ သောင်း။ ဒီ နှုန်းထားက... နည်းလား၊ များလား]

အဓိက အကြောင်းအရင်းမှာ သူသည် ကြေးနီဒင်္ဂါး သွန်းလုပ်ခြင်း၏ ခက်ခဲမှုကို နားမလည်သလို သွန်းလုပ်သည့် လူအရေအတွက်ကိုလည်း မသိရှိသောကြောင့်ပင်။ သတ်မှတ်ထားသော စံနှုန်း မရှိသဖြင့် တိုင်းတာရန် ခက်ခဲလှသည်။

System: [များတာပေါ့။ သူတို့က ကြေးနီဒင်္ဂါးတွေကို တိုက်ရိုက် အရည်ဖျော်တာ မဟုတ်ဘဲ သတ္တုတူးဖော်ရေးကနေ စလုပ်တာ]

[အဲဒီမှာ သိပ်မကြီးတဲ့ ကြေးနီသတ္တုတွင်း တစ်ခု ရှိတယ်။ ကြေးနီဒင်္ဂါး သွန်းလုပ်ဖို့ မတူးဖော်ခင် သန့်စင်ရသေးတယ်။ အဲဒီလူစုက အစတုန်းက အတွေ့အကြုံ မရှိတော့ ပုံစံခွက် မှားတာ၊ နည်းပညာ မကျွမ်းကျင်တာတွေ ဖြစ်ပြီး လုပ်လိုက်တဲ့ ငွေတုတွေက အထူအပါး အရမ်း ကွာခြားနေတယ်။

စာလုံးတွေကလည်း တချို့ ရှင်းလင်းပြီး တချို့ ဝါးနေတယ်။ ကိုင်ကြည့်လိုက်တာနဲ့ မှားနေမှန်း သိသာလွန်းလို့ သုံးလို့ မရဘူး]

[အထူအပါးကို အစစ်နဲ့ တူအောင် ညှိလို့ ရသွားတဲ့ အခါကျပြန်တော့လည်း အသစ် သွန်းလုပ်ထားတဲ့ ကြေးနီဒင်္ဂါးတွေက အရမ်း သစ်လွင်နေပြီး ပွန်းပဲ့ရာ မရှိတာကြောင့် မှားနေမှန်း သိသာသွားပြန်ရော။ ဒါနဲ့ သူတို့က အတုလုပ်နည်း၊ ဟောင်းနွမ်းအောင် လုပ်နည်းတွေကို စတင် လေ့လာပြီး အစစ်နဲ့ ခွဲမရအောင် လုပ်ကြပြန်တယ်]

[ကြေးနီဒင်္ဂါး မျက်နှာပြင်ပေါ်မှာ အစစ်နဲ့ ခွဲမရနိုင်တဲ့ ကြေးနီ သံချေးတက်အောင် လုပ်ပြီး ဈေးသည်တွေ သတိမထားမိဘဲ ချောချောမွေ့မွေ့ သုံးစွဲနိုင်တဲ့ အချိန်ရောက်တော့ လပေါင်းများစွာ ကြာသွားပြီ။ ဒါကြောင့် သူတို့ ငွေတု ၅ သန်းကျော် ထုတ်လုပ်ခဲ့တဲ့ အချိန်က ၃ လပဲ ရှိတယ်]

တွက်ချက်ကြည့်လိုက်လျှင် တစ်ရက်ကို ကြေးနီဒင်္ဂါး ၆ သောင်း သွန်းလုပ်ခြင်း ဖြစ်ရာ ထိရောက်မှု အားကောင်းသည်ဟု ဆိုနိုင်သည်။

ချူဟွားသည် system၏ အကြမ်းဖျင်း ဖော်ပြချက်ကို နားထောင်ရုံဖြင့် ထိုလူစုသည် ငွေတုပြုလုပ်ရာတွင် ပြဿနာများစွာ ကြုံတွေ့ခဲ့ရသည်ကို မှန်းဆနိုင်လေသည်။

[နားထောင်ရတာ ယာယီ ဖွဲ့စည်းထားတဲ့ အဖွဲ့လိုပဲ။ ကျွမ်းကျင်တဲ့ ငွေတုလုပ်သူတွေ လုပ်တာ မဟုတ်ဘူးလား]

System: [ဟုတ်တယ်။ ဘာလို့လဲဆိုတော့ ဒီအဖွဲ့ကို အစက ဒေသခံ တပ်ဖွဲ့က ကိုယ်တိုင် ဦးစီး လုပ်ကိုင်ခဲ့တာ။ ကျွမ်းကျင်တဲ့ နည်းပညာရှင်တွေကို မငှားရမ်းခဲ့ဘူး။ ဒါပေမဲ့ ပုဂ္ဂလိက ဒင်္ဂါးသွန်းလုပ်တာက ခေါင်းပြတ်နိုင်တဲ့ ကိစ္စဆိုတော့ သာမန်လူတွေက ဘယ်လုပ်ချင်ကြမှာလဲ]

ချူဟွား: ???

လူအများ: ???

တပ်စွဲထားတဲ့ စစ်သည်တွေက ပုဂ္ဂလိက ဒင်္ဂါးသွန်းလုပ်တာ ဟုတ်လား။ သူတို့ ပိုက်ဆံ လိုနေလို့လား။ တစ်ယောက်ယောက်က စစ်သည် ရိက္ခာငွေကို အလွဲသုံးစား လုပ်ပြီး သူတို့ကို အသက်ဆက်မရအောင် ဖိအားပေးလိုက်တာများလား။

အရင် မင်းဆက်တုန်းက အလားတူ အခြေအနေမျိုး ဖြစ်ပျက်ခဲ့ဖူးသည်။ နောက်ဆုံး မင်းဆက် ဧကရာဇ်သည် မိမိ ပျော်ပါးဖို့သာ သိပြီး စစ်တပ်ကို ရိက္ခာငွေ မပေးလိုဘဲ အကြောင်းပြချက် အမျိုးမျိုးဖြင့် ဖြတ်တောက်လေ့ ရှိသည်။

စစ်သည်များသည် အသက်ရှင်ရန် ခက်ခဲလာသဖြင့် အနီးနားရှိ ကြေးနီသတ္တုတွင်းကို ဝိုင်းရံပြီး ကိုယ့်ဘာသာ ဒင်္ဂါးသွန်းလုပ်ကာ ရိက္ခာငွေ ဖြေရှင်းခဲ့ကြသည်။

အစိုးရ တပ်ဖွဲ့များက ဦးဆောင်ပြီး ဒင်္ဂါးအတု သွန်းလုပ်ကြရာ အရပ်ဘက်မှ သူဌေးများနှင့် ကုန်သည်များသည်လည်း မရိုးသားသော အတွေးများ ဝင်လာကြသည်။ -မင်းတို့ လုပ်နိုင်ရင် ငါတို့လည်း လုပ်နိုင်တာပဲ။ ငွေတု အမျိုးမျိုး ဈေးကွက်ထဲ အမြောက်အမြား ဝင်ရောက်လာသည်။ ကုန်ထုတ်လုပ်မှုနှင့် ကုန်ပစ္စည်း စုစုပေါင်း ပမာဏ မပြောင်းလဲသော်လည်း ကုန်ဈေးနှုန်းများကတော့ သဘာဝအတိုင်း မြင့်တက်လာသည်။

မူလက ကြက်ဥ တစ်လုံးလျှင် ၃ ဝမ်သာ ရှိသော်လည်း နောက်ပိုင်းတွင် ၁၂ ဝမ်အထိ ဈေးတက်သွားခဲ့သည်။

ဒါကြောင့်လည်း ချူဟွားသည် တစ်စုံတစ်ယောက်က ကြေးနီသတ္တုတွင်းကို တိတ်တဆိတ် တူးဖော်နေသည်ဟု ကြားလိုက်ရသည်နှင့် သတိထားမိလိုက်ခြင်း ဖြစ်သည်။ သာ့ရှန်း၏ ဧကရာဇ် အဆက်ဆက်သည် ရေခဲပြင်ပါးပါးပေါ် လမ်းလျှောက်နေရသကဲ့သို့ ဝီရိယ ရှိရှိ ကြိုးစားခဲ့ကြပြီးမှ တည်ငြိမ်သော ဘဝလေးကို ရရှိခဲ့ခြင်း ဖြစ်သည်။ အမှန်တကယ်ပင် ထပ်ပြီး အဖျက်စီး မခံနိုင်တော့ပေ။

ချူဟွား: [တိုင်းပြည်ဘဏ္ဍာတိုက်က ဘယ်လောက် မွဲနေပါစေ စစ်သည် ရိက္ခာငွေကို ဘယ်တုန်းကမှ မဖြတ်တောက်ခဲ့ဖူးဘူး။ ဒေသခံ တပ်ဖွဲ့က ဘာလို့ ဒီလို လုပ်ရတာလဲ]

လွန်ခဲ့သော နှစ်များက နိုင်ငံ့ဘဏ္ဍာတိုက် အခက်အခဲ ဖြစ်နေချိန်တွင် အရှင်မင်းကြီးနှင့် မှူးမတ်များသည် စစ်သည် ရိက္ခာငွေကို မထိပါးမိစေရန် သတိထားခဲ့ကြသည်။ ဖြတ်တောက်လိုက်ပါက အဆင်ပြေသွားမည် ဖြစ်သော်လည်း ဧကရာဇ် နှစ်ပါးစလုံးက မင်းသားများကို စစ်ထဲဝင်စေပြီး နယ်စပ်ကို ဦးဆောင် ကာကွယ်စေခဲ့သည်။

ပြုပြင်ပြောင်းလဲမှုများစွာ ပြုလုပ်ခဲ့ပြီးနောက် စစ်သည် ရိက္ခာငွေကို ဖြတ်တောက်လိုက်ပါက ယခင် ကြိုးပမ်းမှုများ အချည်းနှီး ဖြစ်သွားမည်ကို စိုးရိမ်သဖြင့် ခါးပတ်ကို တင်းတင်း စည်းကာ အခြား နည်းလမ်းများကိုသာ ရှာဖွေခဲ့ကြသည်။

Systemက မျက်ဖြူဆိုက်မတတ် ဖြစ်သွားသည်။ [ဘာလို့လဲဆိုတော့ အဲဒီ ကြီးကြပ်ရေးမှူးဟွမ်က လောင်းကစားသမားကြီး ဖြစ်နေလို့လေ။ ကိုယ့်ကိုယ်ကိုယ် မွဲပြာကျအောင် ကစားရုံသာမကဘဲ လက်မလျှော့နိုင် ဖြစ်နေပြီး ပိုက်ဆံ နည်းနည်း ချေးပြီး နောက်တစ်ပွဲလောက် ဆော့ရင် အရင်းပြန်ရနိုင်မယ်လို့ အမြဲ တွေးနေတတ်တယ်။ နောက်ဆုံးတော့ ထုတ်ပေးရမဲ့ စစ်သည် ရိက္ခာငွေတွေကို ယူသုံးလိုက်တာပဲ]

[ရလဒ်ကတော့ ခန့်မှန်းလို့ ရပါတယ်။ ၁၀ ပွဲ ကစားရင် ၉ ပွဲ ရှုံးတာပဲ။ သူက စစ်သည် ရိက္ခာငွေတွေကို ရှုံးသွားတော့ အောက်ခြေက စစ်သည်တွေ ပိုက်ဆံ မရရင် သေချာပေါက် ဆူပူကြတော့မှာ။ သာ့ရှန်းက စစ်သည် ရိက္ခာငွေကို ဘယ်တော့မှ ဖြတ်တောက်တာ၊ နောက်ကျတာမျိုး မလုပ်ခဲ့ဖူးတော့ သူက တခြား ဆင်ခြေ ရှာမရဘဲ တခြား နည်းလမ်း စဉ်းစားရတော့တာပေါ့]

[သူက အတိုးကြီး ပိုက်ဆံ ချေးပြီး စစ်သည် ရိက္ခာငွေကို အရင် ထုတ်ပေးလိုက်တယ်။ ပြီးမှ အကြွေး ပြဿနာကို ဘယ်လို ဖြေရှင်းမလဲ ဆိုတာ စဉ်းစားတာ။ တိုတောင်းတဲ့ အချိန်အတွင်းမှာ ပိုက်ဆံ အများကြီး ရနိုင်မဲ့ နည်းလမ်း ဘယ်မှာ ရှိလို့လဲ။ တိုက်တိုက်ဆိုင်ဆိုင် တပ်စွဲထားတဲ့ နေရာမှာ ကြေးနီသတ္တုတွင်းငယ် တစ်ခု ရှိနေတယ်။ သူ့မှာ လက်သမား ပညာတတ်တဲ့ ညီအစ်ကို တစ်ယောက်လည်း ရှိနေတော့ အဲဒီလူကို ကြေးနီဒင်္ဂါး ပုံစံခွက် လုပ်ခိုင်းလိုက်တာ]

ချူဟွားလည်း ပြောစရာ စကား မရှိတော့ပေ။ ခေါင်းပြတ်လွယ်တဲ့ ဒီလို အကြံအစည်မျိုး လုပ်မဲ့အစား ရှင် ဘာလို့ လောင်းကစားကို အပြတ် မဖြတ်လိုက်ရတာလဲ။

လောင်းကစား ဖြတ်ရတာက မူးယစ်ဆေး ဖြတ်သလိုပဲ အရမ်း ခက်ခဲတယ် ဆိုတာ သူမ သိပါတယ်။ ဒါပေမဲ့ ဘယ်လောက်ပဲ ခက်ခဲပါစေ ခေါင်းပြတ်တာထက်တော့ မခက်ခဲပါဘူးနော်။

System: [ဒီကိစ္စက စလုပ်လိုက်တာနဲ့ လှုပ်ရှားမှုက ကြီးမားသွားပြီး ဒီအတိုင်း ဖုံးကွယ်ထားလို့ မရနိုင်ဘူး။ တခြားလူတွေ သိသွားတဲ့အခါ အကျိုးအမြတ်ကို မက်မောပြီး ဝင်ပါလာကြရော။ ပါဝင်တဲ့ လူတွေ များလာတော့ အရှိန်အဝါ ကြီးလာတာပေါ့]

[အဲဒီ မိန်းကလေးရဲ့ မိသားစုက သတ္တုတွင်း တူးဖို့ အလိမ်ခံရတုန်းက စောသေးတယ်။ အဲဒီတုန်းက သူတို့ စိတ်နှလုံးက သိပ်မမိုက်မဲသေးလို့ လူကို ဝေးလံတဲ့ နေရာက ဆောင်ကြာမြိုင်ကို ရောင်းစားပြီး ပိုက်ဆံ ရှာလိုက်ကြတယ်။ နောက်ပိုင်း သူတို့ လျှို့ဝှက်ချက်ကို သိသွားတဲ့ လူတွေ ရှိရင်တော့ တန်း သတ်ပစ်လိုက်တာပဲ]

ဒါကလည်း ခေါင်းပြတ်မဲ့ ကိစ္စကို လူတွေ သိသွားတာတောင် ဘာလို့ လူသတ် နှုတ်ပိတ်တာမျိုး မလုပ်ခဲ့တာလဲ ဟူသည့် ချူဟွား၏သံသယကို ဖြေရှင်းပေးလိုက်ခြင်းပင်။

မုန့်ဟန် မရှိသဖြင့် ချူဟွားသည် မုန့်ဟန်ကို တရားရေး ဝန်ကြီး သို့မဟုတ် တရားစီရင်ရေး ပြန်လည်သုံးသပ်ရေးရုံးတော် ဝန်ကြီးအိမ်သို့ သက်သေ သွားပို့ခိုင်း၍ မရနိုင်ပေ။ System ကလည်း စကားများများ ပြောမိပြီး မှားသွားမည် စိုးသဖြင့် လုံခြုံစိတ်ချရသော အကြောင်းအရာများကို ပြောင်းလဲ ပြောဆိုလိုက်သည်။

System: [အဲဒီ မိန်းကလေးက နင့်အစ်ကို ရောက်လာပြီး အကျင့်ပျက် မှူးမတ်တွေကို ရှင်းလင်းနေတာ မြင်ပြီး သမာသမတ်ကျတဲ့ အရာရှိကောင်း တစ်ယောက်လို့ သေချာသွားမှ ပြောရဲတာ]

[အစက ဒေသခံ မြို့အုပ်ချုပ်ရေးမှူးက နာမည်အကြီးဆုံး ထိပ်တန်း အလှမယ်ကို ငွေပေးပြီး ခေါ်ချင်တာ။ အဲဒီ မိန်းကလေးက ဧည့်သည်က တော်ဝင်ကိုယ်စားလှယ်ဆိုတာ ကြားတော့ ထိပ်တန်း အလှမယ်ကို ဒူးထောက်ပြီး တောင်းပန်ခယတယ်။ သူ့ကို အခွင့်အရေး ပေးပါဆိုပြီး]

[ထိပ်တန်း အလှမယ်က တော်ဝင်ကိုယ်စားလှယ်က မြို့တော်က လာတာဆိုတော့ တကယ်လို့ တွယ်ကပ်နိုင်ခဲ့ရင် နောင်တစ်ချိန် စည်းစိမ်ဥစ္စာ ခံစားရပြီး ဒီလို ဘဝမျိုးမှာ နေစရာ မလိုတော့ဘူးလို့ တွေးခဲ့တာ။ ဒါပေမဲ့ ဒီမိန်းကလေးမှာ တကယ့် အခက်အခဲ ရှိနေတာ မြင်တော့ အံကိုကြိတ်၊ ခြေကို ဆောင့်ပြီး အခွင့်အရေးကို လွှဲပေးလိုက်တယ်]

[မြို့အုပ်ချုပ်ရေးမှူးက ပိုက်ဆံပေးပြီး ခေါ်တာက ထိပ်တန်း အလှမယ်လေ။ ထိပ်တန်း အလှမယ်က လူစားထိုးလိုက်ရင် အဖမ်းခံရမှာ စိုးရိမ်လို့ မိန်းကလေးကို သူ့ အစေခံမ အဖြစ် ဝတ်ဆင်ခိုင်းပြီး အတူတူ လိုက်သွားပေးတယ်။ ဟိုရောက်မှ မိန်းကလေးကို နင့်အစ်ကိုဆီ အကူအညီ သွားတောင်းခိုင်းတာ]

ဆောင်ကြာမြိုင်က မိန်းကလေးတွေက ဧည့်သည်တွေကို မကြာခဏ ဧည့်ခံရတယ်။ ရှေးခေတ်မှာ ကောင်းမွန်တဲ့ သားဆက်ခြား နည်းလမ်းတွေ မရှိသလို မိန်းကလေးတွေကလည်း ဧည့်သည် ရွေးချယ်ခွင့် မရှိကြဘူး။ ရောဂါ အမျိုးမျိုး ကူးစက်ခံရဖို့ လွယ်ကူတယ်။ သမားတော် အများစုကလည်း ဆောင်ကြာမြိုင်က မိန်းကလေးတွေကို ကုသပေးဖို့ ဝန်လေးကြတယ်။ ရောဂါ ဖြစ်လာရင် ဆေးနည်းနည်းပါးပါး ဝယ်သောက်ရင် သောက်၊ မဟုတ်ရင် ကိုယ့်ဘာသာ ကြိတ်မှိတ် သည်းခံပြီး ပျောက်ကင်းဖို့ စောင့်ဆိုင်းရတာပဲ။

သူတို့ရဲ့ ပန်းပွင့်ချိန်က တခြား မိန်းကလေးတွေထက် ပို တိုတောင်းတယ်။ နာမည်ကြီးနေတုန်း အရင်းအနှီး လုံလောက်အောင် စုဆောင်းထားရတယ်။ မဟုတ်ရင် အသက်ကြီးလာတဲ့ အခါ ဒါမှမဟုတ် ဖျားနာပြီး ဧည့်သည် လက်မခံနိုင်တဲ့ အခါကျရင် ဘဝက အရမ်း ခက်ခဲသွားလိမ့်မယ်။

ဒါတောင်မှ ထိပ်တန်း အလှမယ်က ဒီလို ရှားပါးတဲ့ အခွင့်အရေးကို လက်လွှတ်ပေးခဲ့တယ်။ ဘယ်ခေတ်မှာပဲ ဖြစ်ဖြစ် အမျိုးသမီး အချင်းချင်းက ကိုယ်ချင်းစာတရား ပိုရှိပြီး အပြန်အလှန် ကူညီချင်ကြတယ် ဆိုတာ ထင်ရှားတယ်။

...