အခန်း ၁၉၇၈

အခန်း (၁၉၇၈) အရိုင်းဆန်ဆန်ကြီးပြင်းလာသည့်ချူးယွင်းဖန်း

လူတိုင်း၏ အကြည့်များက ချူးယွင်ဖန်းထံသို့ စုပြုံရောက်ရှိသွားကြသည်။ သူ့ကို ကာကွယ်ရန်အတွက် အသက်ပေးရန်ပင် ဆုံးဖြတ်ထားကြသည့် ဤအခြေအနေမျိုးတွင် ချူးယွင်ဖန်းက ဘာများပြောမည်နည်းဟု လူတိုင်းက သိချင်နေကြသည်။

"ကျွန်တော့်အတွက်နဲ့ အားလုံး အသက်ပေးစရာ မလိုပါဘူး"

ချူးယွင်ဖန်းက ဆိုလိုက်သည်။

"ချူးယွင်ဖန်း ဒါက စိတ်လိုက်မာန်ပါ လုပ်ရမယ့်အချိန် မဟုတ်ဘူး။ တစ်ဖက်လူတွေက မင်းကို အလွတ်ပေးမှာ မဟုတ်ဘူးဆိုတာ ရှင်းနေတာပဲ။ ဒါက အန္တရာယ်အရှိဆုံးအချိန်ပဲ။ ငါတို့တွေ အနစ်နာခံရတာက အရေးမကြီးဘူး။ နတ်ဒေဝါဂိုဏ်းမှာ ငါတို့လို လူအိုကြီးတွေ အများကြီးရှိတယ်၊ ဒါပေမဲ့ မင်းကတော့ ဂိုဏ်းရဲ့ အနာဂတ်ပဲ။ မင်းကို အဆုံးရှုံးခံလို့ မဖြစ်ဘူး"

အကြီးအကဲက လေးနက်သော မျက်နှာထားဖြင့် တားမြစ်လိုက်သည်။

ကျန်ရှိနေသော တပည့်ရင်းများမှာမူ စိတ်ထဲတွင် မည်သို့ပင်ရှိစေကာမူ ဤသည်မှာ သူတို့၏ ကံကြမ္မာဖြစ်ကြောင်း သိထားကြသည်။ အပြင်လောကတွင် ကိုယ့်အားကိုယ်ကိုး ကြီးပြင်းလာခဲ့သော ချူးယွင်ဖန်းနှင့် မတူဘဲ သူတို့မှာ ဂိုဏ်း၏ အရင်းအမြစ်များနှင့် ပံ့ပိုးမှုများကို အစဉ်တစိုက် ရယူခဲ့ကြသူများ ဖြစ်သည်။ ဂိုဏ်းသာမရှိလျှင် သူတို့ ယခုကဲ့သို့ အခြေအနေမျိုးသို့ ရောက်ရှိလာမည်မဟုတ်ပေ။ ထို့ကြောင့် အရေးကြုံလာလျှင် ဂိုဏ်းအတွက် ပြန်လည်ပေးဆပ်ရန်မှာ သူတို့၏ တာဝန်ပင် ဖြစ်တော့သည်။ ယခင်က အခြားသူများက သူတို့အတွက် အနစ်နာခံပေးခဲ့ဖူးသလို၊ ယခုမူ သူတို့က ချူးယွင်ဖန်းအတွက် အလှည့်ကျလာခြင်းသာ ဖြစ်၏။

တပည့်ရင်းများအားလုံးမှာ နှုတ်ဆိတ်နေကြပြီး အကြီးအကဲ၏ စကားကို တိတ်တဆိတ် သဘောတူလက်ခံထားကြသည်။

"ကျွန်တော် စိတ်လိုက်မာန်ပါ လုပ်နေတာ မဟုတ်ပါဘူး။ ကျွန်တော့်မှာ ကိုယ်ပိုင်အစီအစဉ် ရှိပါတယ်။ ကျွန်တော်က ဘာက ကောင်းတယ်၊ ဘာက ဆိုးတယ်ဆိုတာကို မခွဲခြားနိုင်တဲ့သူ မဟုတ်ပါဘူး။ ဒီပွဲမတိုင်ခင်ကတည်းက ကျွန်တော် အရာအားလုံးကို ကြိုတင်ပြင်ဆင်ထားပြီးသားပါ။ သူတို့တွေ အေးချမ်းမသေမျိုးနတ်တောင်တော်ကို ဘယ်လောက်ပဲ ဝိုင်းထားပါစေ၊ ကျွန်တော့်ကို ဘာမှလုပ်နိုင်မှာ မဟုတ်ပါဘူး"

ချူးယွင်ဖန်းက တည်ငြိမ်အေးဆေးစွာဖြင့် ပြန်လည်ပြောကြားလိုက်သည်။

လူတိုင်း၏ မျက်လုံးများမှာ အံ့အားသင့်မှုကြောင့် ပြူးကျယ်သွားကြသည်။ ချူးယွင်ဖန်းတစ်ယောက် မည်သည့်အရာကို ကြိုတင်ပြင်ဆင်ထားသနည်းဆိုသည်ကို သူတို့ အလွန်သိချင်နေကြပြီ ဖြစ်သည်။

သို့သော် ချူးယွင်ဖန်းတွင်မူ ထိုအရာကို ရှင်းပြရန် ရည်ရွယ်ချက်မရှိပေ။ အဘယ်ကြောင့်ဆိုသော် ဤကိစ္စမှာ သူ၏ရင်ထဲမှ အကြီးမားဆုံးသော လျှို့ဝှက်ချက်ဖြစ်သည့် တော်တောင်မြစ်ချောင်းပန်းချီကားနှင့် သက်ဆိုင်နေသောကြောင့်ပင်။ ထိုပန်းချီကားချပ်ထဲတွင်သာ သူဝင်ရောက်ပုန်းအောင်းနေမည်ဆိုပါက ပြင်ပမှလူများ ကမ္ဘာပတ်၍ ဝိုင်းထားပါစေဦးတော့၊ သူ့ကို မည်သို့မျှ လုပ်နိုင်မည်မဟုတ်ပေ။

ရန်သူများ စိတ်မရှည်နိုင်ဖြစ်ပြီး လူစုကွဲသွားမည့်အချိန်အထိ သူသည် ပန်းချီကားချပ်ထဲ၌သာ အေးအေးလူလူ စောင့်ဆိုင်းနေရုံသာ ရှိသည်။

ဤသည်မှာ သူ၏ အကြီးမားဆုံးသော ဝှက်ဖဲပင် ဖြစ်သည်။ ဤပန်းချီကားချပ်သာ ရှိနေပါက နဂါးတွင်း၊ ကျားဂူဖြစ်ပါစေ သူသည် ရဲရဲဝံ့ဝံ့ ဝင်ရောက်ရဲသည်။ ယနေ့အထိ သူသည် ပန်းချီကားချပ်ထဲသို့ ဝင်ရောက်သွားသည့်အခါတိုင်း မည်သူမျှ သူ့ကို ရှာမတွေ့နိုင်ခဲ့သလို၊ ဘာမှလည်း မလုပ်နိုင်ခဲ့ကြပေ။

ဤအရာသည် ရှေးဟောင်းခေတ်က ဆေးဧကရာဇ်၏ ကိုယ်ပိုင်အဆောင်အယောင် ပစ္စည်းတစ်ခု ဖြစ်သည်။ ထိုဧကရာဇ်သည် ရှေးခေတ်ဧကရာဇ်များထဲတွင် အစွမ်းအထက်ဆုံး မဟုတ်ခဲ့လျှင်ပင် ယနေ့ခေတ် ပညာရှင်အားလုံးကို အမှုန့်ဖြစ်အောင် ချေမှုန်းနိုင်စွမ်း ရှိသည်။ လက်ရှိကမ္ဘာပေါ်တွင် ထိုဧကရာဇ်နှင့် ယှဉ်နိုင်သူမရှိသကဲ့သို့ တော်တောင်မြစ်ချောင်းပန်းချီကားကို ဖျက်ဆီးပြီး သူ့ကို အတင်းအဓမ္မ ထွက်လာအောင် လုပ်နိုင်သူမှာလည်း လုံးဝမရှိနိုင်ပေ။

ယခင်က နတ်ဆိုးအင်အားစုများ၏ လုပ်ကြံမှုကို ခံရစဉ်က တိုက်ခိုက်မှုမှာ ရုတ်တရက်ဆန်လွန်းသဖြင့် ပန်းချီကားချပ်ထဲသို့ ဝင်ရန် အချိန်မရခဲ့ခြင်း ဖြစ်သည်။ အကယ်၍သာ အချိန်မီခဲ့ပါက သူသည် သေလုမတတ် ဒဏ်ရာရခဲ့မည် မဟုတ်ပေ။ ထို့ကြောင့်လည်း အပြင်ဘက်ရှိ ပိတ်ဆို့မှုများမှာ အခြားသူများအတွက် အသက်အန္တရာယ်ရှိသော အခြေအနေဖြစ်သော်လည်း သူ့အတွက်မူ လိုအပ်ပါက အလွယ်တကူ ရှောင်တိမ်းသွားနိုင်မည့် ကိစ္စရပ်သာ ဖြစ်သည်။

ဤပန်းချီကားချပ်သာ မရှိခဲ့လျှင် ချူးယွင်ဖန်းသည် အကြိမ်ကြိမ် သေဆုံးခဲ့ပြီးလောက်ပြီ ဖြစ်သည်။ နတ်ဒေဝါဂိုဏ်းမှာ သူ၏ ကျောထောက်နောက်ခံဖြစ်သော်လည်း သူသည် ထိုအပေါ်၌သာ အလုံးစုံ မှီခိုနေသူမဟုတ်ပေ။ သူသည် မိမိကိုယ်မိမိသာ အားကိုးသူ ဖြစ်သည်။ ၎င်းအပြင် သူသည် အခြားသော ပြင်ဆင်မှုများကိုလည်း ပြုလုပ်ထားပြီးသား မဟုတ်ပါလား။

"အားလုံးပဲ စိတ်မပူကြပါနဲ့။ နောက်သုံးရက်လောက်ပဲ စောင့်ကြည့်ပေးပါ။ သုံးရက်ပြည့်ရင် ရလဒ်ကို သိရပါလိမ့်မယ်။ ကျွန်တော့်ကို ယုံကြည်ပေးကြပါ၊ ကျွန်တော်က ကိုယ့်အသက်နဲ့ရင်းပြီး နောက်ပြောင်မယ့်သူ မဟုတ်ပါဘူး"

ချူးယွင်ဖန်းက ပေါ့ပါးစွာ ပြောလိုက်သည်။

ချူးယွင်ဖန်းအနေဖြင့် သူ၏လျှို့ဝှက်ချက်ကို ထုတ်ပြောရန် ရည်ရွယ်ချက်မရှိကြောင်း လူတိုင်း သဘောပေါက်လိုက်ကြသည်။ သို့သော် ဤသည်မှာ သူ၏ အသက်ရှင်ရပ်တည်နိုင်စွမ်းနှင့် သက်ဆိုင်နေသော အရာဖြစ်လိမ့်မည်ဟု သူတို့ ခန့်မှန်းမိကြသည်။ ဂိုဏ်း၏ အထောက်အပံ့မပါဘဲ ဤအဆင့်အထိ ရောက်အောင် လျှောက်လှမ်းနိုင်ခဲ့သည့် ချူးယွင်ဖန်း၏ စွမ်းဆောင်ရည်မှာ အမှန်တကယ်ပင် တုန်လှုပ်ဖွယ်ရာ ကောင်းလှသည်။ ထို့ကြောင့်လည်း အကြီးအကဲသည် သူ့အတွက် အသက်ပေးရန်အထိ ဆုံးဖြတ်ခဲ့ခြင်း ဖြစ်တော့သတည်း။

အကယ်၍ ချူးယွင်ဖန်းတွင် အသက်ဘေးမှ လွတ်မြောက်နိုင်သော စွမ်းရည်ထူးများသာ မရှိခဲ့လျှင် သူသည် လွန်ခဲ့သော နှစ်ပေါင်းများစွာကတည်းက သေဆုံးခဲ့ပြီးဖြစ်ပေလိမ့်မည်။ လူတိုင်းက သူ သေဆုံးသွားပြီဟု ယုံကြည်နေချိန်တွင်ပင် သူသည် အသက်ရှင်လျက် ပြန်လည်ရောက်ရှိလာတတ်သည်။ ဤသည်မှာ သူရရှိထားသော ရှေးဟောင်းအမွေအနှစ်များနှင့် သက်ဆိုင်နေမည်မှာ အသေအချာပင်။

ဂိုဏ်း၏ တပည့်ရင်းများမှာလည်း ထိုအခါမှသာ သက်ပြင်းချနိုင်တော့သည်။ အခြေအနေက အဆုံးစွန်အထိ အကျပ်မရိုက်ခဲ့လျှင် မည်သူက ဤကဲ့သို့ အလဟဿ အသက်အသေခံလိုပါမည်နည်း။ အထူးသဖြင့် နတ်ဒေဝါဂိုဏ်း၏ တပည့်ရင်းများ ဖြစ်ကြသည့်အလျောက် သူတို့၏ အဆင့်အတန်းမှာ မြင့်မားလှပြီး အနာဂတ်မှာလည်း အကန့်အသတ်မရှိ တောက်ပနေကြသူများ ဖြစ်သည်။

"ဒါဆိုရင်တော့ ငါတို့ သုံးရက် စောင့်ကြည့်ကြတာပေါ့။ ဒါပေမဲ့ အခြေအနေက မဟန်တော့ဘူးဆိုရင်တော့ ငါတို့ အမြန်ဆုံး ဆုံးဖြတ်ချက်ချရလိမ့်မယ်။ အချိန်ဆွဲလေလေ ရန်သူဘက်က ပညာရှင်တွေ ပိုရောက်လာလေလေပဲ။ အဲဒီကျရင်တော့ လွတ်ဖို့လမ်း လုံးဝရှိမှာမဟုတ်တော့ဘူး"

အကြီးအကဲက ဆိုသည်။

ချူးယွင်ဖန်းသည် ထိုအကြီးအကဲကို ကြည့်လိုက်မိသည်။

သူသည် ဂိုဏ်း၏အပြင်ဘက်တွင်သာ အချိန်အတော်များများ ကုန်လွန်စေခဲ့သူ ဖြစ်သော်လည်း၊ တစ်ဖက်လူက သူ့ကို ကယ်တင်ရန် စိတ်ရင်းမှန်ဖြင့် ကြိုးစားနေသည်ကို မြင်ရသောအခါတွင် စိတ်လှုပ်ရှားမိသည်။

"ကျွန်တော့်ကို ကာကွယ်ပေးတဲ့အတွက် ကျေးဇူးတင်ပါတယ်ခင်ဗျာ။ အကြီးအကဲရဲ့ နာမည်ကို သိပါရစေ"

ချူးယွင်ဖန်းက မေးလိုက်သည်။

အကြီးအကဲသည် ချူးယွင်ဖန်းကို ကြည့်ကာ သူ၏မုတ်ဆိတ်မွေးကို ပွတ်သပ်ရင်း ပြန်ဖြေလိုက်၏။

"ငါ့နာမည်က ဟူသင်းထျန်ပါ။ ငါက တစ်နှစ်ပတ်လုံး အပြင်မှာပဲ လှည့်လည်သွားလာနေတာဆိုတော့ မင်း ငါ့ကို မမြင်ဖူးတာ မဆန်းပါဘူး။ ငါတို့ဂိုဏ်းမှာ ပါရမီရှင်သစ်တစ်ယောက် ထွက်ပေါ်လာတယ်လို့ ကြားခဲ့ပေမဲ့ မင်းနဲ့ ဆုံဖို့ အခွင့်မသာခဲ့ဘူး။ နောက်တော့ မင်း ကျဆုံးသွားပြီလို့ ကြားရတော့ နှမြောမိသေးတာ။ ဒါပေမဲ့ ကောင်းကင်ဘုံက ကရုဏာထားလို့ မင်း အသက်ဘေးက လွတ်ခဲ့တာပဲ။ ဒါဟာ နတ်ဒေဝါဂိုဏ်း ပြန်လည် ထွန်းတောက်ဖို့ ကောင်းကင်ဘုံက အလိုရှိနေတာပဲ ဖြစ်လိမ့်မယ်"

ချူးယွင်ဖန်းသည် ဟူသင်းထျန်ကို ကြည့်ရင်း သူနှင့် ကျောင်းဝမ်အန်းတို့မှာ အကြီးအကဲချင်း တူသော်လည်း စရိုက်ချင်း လုံးဝကွဲပြားနေသည်ကို သတိပြုမိလိုက်သည်။ ဟူသင်းထျန်သည် ဂိုဏ်းအပေါ်တွင် စိတ်ရင်းစေတနာရှိသူ ဖြစ်သည်။

သို့သော် ပြန်စဉ်းစားကြည့်လျှင် ဤသည်မှာ သဘာဝကျလှပေသည်။ နတ်ဒေဝါ၏ အကြီးအကဲများသည် တရှအင်ပါယာအတွင်း၌ပင် သြဇာအာဏာကြီးမားသော ပုဂ္ဂိုလ်များ ဖြစ်ကြသည်။ ဂိုဏ်းချုပ် စစ်ထူရွှမ်းကိုယ်တိုင် တောင်းဆိုမှသာ သူတို့ ထွက်ပေါ်လာတတ်ကြပြီး သာမန်အချိန်တွင်မူ သူတို့၏ လှုပ်ရှားမှုများမှာ မထင်ရှားလှပေ။

အချို့မှာ ကျင့်စဉ်များတွင် အာရုံစိုက်နေကြပြီး အချို့မှာမူ အင်ပါယာအနှံ့ လှည့်လည်နေကြကာ အချို့ကမူ အင်ပါယာနန်းတွင်းနှင့် စစ်တပ်အတွင်း၌ အဆင့်မြင့်အရာရှိကြီးများအဖြစ် တာဝန်ထမ်းဆောင်နေကြသည်။ ထို့ကြောင့်လည်း ချူးယွင်ဖန်းအနေဖြင့် အကြီးအကဲများထဲမှ လူအနည်းငယ်ကိုသာ သိရှိခြင်း ဖြစ်သည်။

"အကြီးအကဲရဲ့ စိုးရိမ်ပေးမှုကို ကျေးဇူးတင်ပါတယ်"

ချူးယွင်ဖန်းက လက်ချင်းယှက်၍ ဂါရဝပြုလိုက်သည်။

"ရပါတယ်။ မင်းက ဒီလိုစောင့်ရှောက်မှုနဲ့ ထိုက်တန်ပါတယ်"

ဟူသင်းထျန်က ပြုံး၍ ဆိုလိုက်လေ၏။

--