အခန်း ၇၅၁

အပိုင်း (၇၅၁)

ဤစိန်ခေါ်စာ ထွက်ပေါ်လာသည်နှင့် တာ့ယန် အင်ပါယာသစ် တစ်ခုလုံး ထပ်မံ၍ ဒေါသပေါက်ကွဲ သွားကြပြန်သည်။

‘အရမ်း မောက်မာလွန်းနေပြီ။ ယွင်ကျုံးဟဲ့... ကျုပ်တို့ တာ့ယန် အင်ပါယာသစ်က ခင်ဗျားရဲ့ အနုပညာ စွမ်းရည်ကို မနည်း လက်ခံပေးခဲ့ရတာ။ ခင်ဗျားလည်း အင်ပါယာ အနုပညာ စာသင်ကျောင်းမှာ နှစ်လလောက် အေးအေးဆေးဆေး စာသင်နေလို့ ခင်ဗျား နှိမ့်ချသွားပြီလို့ ကျုပ်တို့ ထင်နေခဲ့တာ။ ခင်ဗျားက ပိုပြီးတောင် ရူးသွပ်လာလိမ့်မယ်လို့ မထင်ထားခဲ့ဘူး။

ခင်ဗျားက အရမ်း ဉာဏ်ကောင်းတယ်၊ ခင်ဗျားက ပါရမီရှင် တစ်ယောက်ပဲ ဆိုတာ ကျုပ်တို့ ယုံတယ်။ ခင်ဗျားရဲ့ စစ်တုရင် ကစားစွမ်းရည်က အင်ပါယာမှာ ထိပ်တန်း အဆင့် ဝင်နိုင်တယ် ဆိုတာကိုလည်း ကျုပ်တို့ ယုံတယ်။ ဒါပေမဲ့ ခင်ဗျားက တစ်ယောက်တည်းနဲ့ ဆယ်ယောက်ကို၊ တစ်ရာကို ရင်ဆိုင်နိုင်တယ် ဆိုတာကိုတော့ ကျုပ်တို့ သေချာပေါက် မယုံကြည်နိုင်ဘူး။’

သို့ပေမည့် ယွင်ကျုံးဟဲ့က အင်ပါယာ တစ်ခုလုံးကို စိန်ခေါ်လိုက်ပြီ ဖြစ်ရာ တာ့ယန် အင်ပါယာသစ်၏ စစ်တုရင် ပညာရှင်ကြီးများမှာ စိန်ခေါ်မှုကို မဖြစ်မနေ လက်ခံရတော့မှာဖြစ်၏။

ပထမဆုံး ထွက်လာသူမှာ အင်ပါယာ၏ ဝေချီ ပါရမီရှင် လီရှင်း ဖြစ်၏။ လူထောင်ချီ၏ ရှေ့မှောက်တွင် သူနှင့် ယွင်ကျုံးဟဲ့တို့ စတင် ကစားကြ၏။ သုံးနာရီ အကြာတွင် အင်ပါယာ၏ ဝေချီ ပါရမီရှင် လီရှင်း ရှုံးနိမ့်သွားသည်။

ထို့နောက် အင်ပါယာ၏ ဝေချီ ပညာရှင်ကြီး လီယွီကျိုက် ထွက်လာ၍ စိန်ခေါ်သည်။ သုံးနာရီခွဲ အကြာတွင် လီယွီကျိုက် ရှုံးနိမ့်သွား၏။

ဤအသက်ကြီးသူနှင့် လူငယ် နှစ်ဦးသည် တာ့ယန် အင်ပါယာသစ်၏ ဝေချီ အကျော်အမော်များ ဖြစ်ကြပြီး နှစ်ဦးစလုံး ရှုံးနိမ့်သွားခဲ့ကြသည်။

ထို့ကြောင့် ထိုနှစ်ဦးသည် အတူတကွ ပူးပေါင်းကာ ယွင်ကျုံးဟဲ့နှင့် တပြိုင်နက်တည်း ကစားကြသည်။ ဤသို့ လုပ်ဆောင်ခြင်းက မတရားသလို သူတို့၏ နာမည်ဂုဏ်သတင်းကိုလည်း ထိခိုက်စေသော်လည်း ယွင်ကျုံးဟဲ့၏ စစ်တုရင် ကစားစွမ်းရည် မည်မျှ မြင့်မားသနည်း ဆိုသည်ကို သူတို့ သိချင်ကြ၏။

မည်မျှ မြင့်မားသနည်း။ ကောင်းကင်ပေါ် ရောက်သည့်အထိ မြင့်မား၏။ အဘယ်ကြောင့်ဆိုသော် ဤအချိန်တွင် အမှတ်ကိုး စိတ်ရောဂါသည် ကွမ်တမ် ပြန်လည် ပူးကပ်လာသောကြောင့် ဖြစ်ပြီး ၎င်းသည် Google ၏ Artificial Intelligence (AI) ကွန်ပျူတာထက် အများကြီး ပိုတော်သည်။

ဝေချီ ကစားရာတွင် လုံးဝ ပြိုင်ဘက်ကင်း ဖြစ်သည်။ ထို့အပြင် တစ်ယောက်တည်းဖြင့် ဆယ်ယောက်ကို ရင်ဆိုင်သည်ဖြစ်စေ၊ တစ်ရာကို ရင်ဆိုင်သည်ဖြစ်စေ လုံးဝ ကွာခြားမှု မရှိဘဲ လှည့်ကွက် တစ်ခု သက်သက်သာ ဖြစ်၏။

သို့ပေမည့် မြင်ကွင်းကတော့ အံ့ဩစရာ ကောင်းလှ၏။ နှစ်နာရီခွဲ ကြာပြီးနောက် လီရှင်းနှင့် လီယွီကျိုက် ဟုသည့် ဝေချီ ပညာရှင်ကြီး နှစ်ဦးစလုံး လုံးဝ ရှုံးနိမ့်သွားကြသည်။

ဤအရာက တကယ်ကို အံ့ဩစရာ ကောင်းလွန်းလှသည်။ တစ်ယောက်တည်း ကစားချိန်တွင် သူတို့သည် သုံးနာရီနှင့် ငါးနာရီ အထိ တောင့်ခံနိုင်ခဲ့ကြသည်။ သို့ပေမည့် နှစ်ယောက် ပေါင်းပြီး ကစားချိန်မှာတော့ နှစ်နာရီခွဲနှင့်ပင် ရှုံးနိမ့်သွားခဲ့၏။

ဤလူနှစ်ဦး၏ ရှုံးနိမ့်မှုသည် စုဝေးခရာမှုတ်သံ တစ်ခုကဲ့သို့ ဖြစ်သွားပြီး တာ့ယန် အင်ပါယာသစ်၏ ဝေချီ အကျော်အမော်များသည် တစ်ယောက်ပြီး တစ်ယောက် ထွက်ပေါ်လာကြသည်။

ယွင်ကျုံးဟဲ့သည် တစ်ယောက်တည်းဖြင့် သုံးယောက်၊ လေးယောက်ကို စတင် ရင်ဆိုင်လာသည်။ နောက်ဆုံးတွင် ရူးသွပ်စွာဖြင့် တစ်ယောက်တည်းဖြင့် ဆယ်ယောက်ကို ရင်ဆိုင်တော့၏။

စုစုပေါင်း လူသောင်းချီက ယွင်ကျုံးဟဲ့ တစ်ယောက်တည်းဖြင့် ဆယ်ယောက်ကို ရင်ဆိုင်နေသည်ကို လာရောက် ကြည့်ရှု၍ သက်သေပြုနေကြ၏။ ဤမြင်ကွင်းသည် တေးဂီတ ဖျော်ဖြေပွဲထက်ပင် ပို၍ အံ့ဩစရာ ကောင်းပြီး ပို၍ တုန်လှုပ်ဖွယ် ကောင်းသည်။

ထိုတေးဂီတ ဖျော်ဖြေပွဲတွင် ယွင်ကျုံးဟဲ့နှင့် ရှစ်ယီ တို့သည် တစ်ယောက်ချင်း ယှဉ်ပြိုင်ခဲ့ခြင်းဖြစ်ပြီး ဂီတ အဆင့်အတန်း ဆိုသည်မှာ စိတ်ပိုင်းဆိုင်ရာ ပိုဆန်သောကြောင့် ရှင်းလင်းသော အမှတ်ဖြင့် အနိုင်အရှုံး ဆုံးဖြတ်ရန် ခက်ခဲ၏။

သို့ပေမည့် စစ်တုရင် ကစားခြင်းကတော့ မတူညီပေ။ နိုင်ရင် နိုင်၊ ရှုံးရင် ရှုံ သိသာထင်ရှားသော ရလဒ် ရှိသည်။

ထို့အပြင် လူ့ဦးနှောက်မှာ အကန့်အသတ် ရှိသည်။ ဝေချီ ကစားခြင်းသည် အလွန်အမင်း အာရုံစိုက်မှု လိုအပ်ပြီး အံ့မခန်း တွေးတောမှုများ လိုအပ်၏။

ထိပ်တန်း အကျော်အမော်များ အချင်းချင်း ကစားရာတွင် တစ်ယောက်တည်းဖြင့် နှစ်ယောက်ကို ရင်ဆိုင်ရန်ပင် မဖြစ်နိုင်ပေ။ ဤကဲ့သို့သော ကိစ္စမျိုးကို စိတ်နှစ်ခွခွဲ၍ အပြည့်အဝ လုပ်ဆောင်နိုင်ရန် မည်သို့ ဖြစ်နိုင်မည်နည်း။

သို့ပေမည့် ယွင်ကျုံးဟဲ့က တစ်ယောက်တည်းဖြင့် ဆယ်ယောက်ကို ရင်ဆိုင်နေသည်။ ဤဆယ်ယောက်သည် တာ့ယန် အင်ပါယာသစ်၏ ဝေချီ အကျော်အမော်များချည်း ဖြစ်ကြသည်။

ယွင်ကျုံးဟဲ့သည် အနိုင်ရရုံသာမက လုံးဝ အပြတ်အသတ် အနိုင်ယူနေခြင်း ဖြစ်သည်။ လူတိုင်း လုံးဝ ရူးသွပ် မိန်းမောသွားကြပြီး ကြက်သီးမွေးညင်း ထသွားကြ၏။

‘အရမ်း မိုက်လွန်းတယ်၊ အရမ်း ဟန်ရေးပြလွန်းတယ်၊ အရမ်း ကြောက်စရာကောင်းလွန်းတယ်။’

အဘယ်ကြောင့်ဆိုသော် အစမှအဆုံးထိ ယွင်ကျုံးဟဲ့သည် လုံးဝ လွတ်လပ်ပေါ့ပါးနေပြီး စဉ်းစားရန် အချိန်ပင် မလိုအပ်ဘဲ ပြိုင်ဘက် တစ်ယောက်ချင်းစီ၏ ရှေ့သို့ သွားကာ ချက်ချင်း အကွက်ချသည်။

နောက်ပိုင်းတွင် သူက ဆယ်ယောက်မြောက် လူအထိ အကွက်ချပြီးသွားသော်လည်း ပထမ လူက နောက်တစ်ကွက် ဘယ်လို ချရမလဲ ဆိုသည်ကို စဉ်းစားနေဆဲ ဖြစ်၏။

တာ့ယန် အင်ပါယာသစ်၏ ဤဝေချီ အကျော်အမော် ဆယ်ဦးသည် မျက်နှာထား တင်းကျပ်နေကြပြီး ချွေးများ ပြန်နေကာ ဦးနှောက်ကို အလွန်အမင်း အသုံးချနေရသောကြောင့် အခိုးအငွေ့များပင် ထွက်တော့မှာဖြစ်သည်။

ယွင်ကျုံးဟဲ့ကမူ ပန်းခြံထဲ လမ်းလျှောက်နေသကဲ့သို့ သက်သောင့်သက်သာ ရှိနေဆဲဖြစ်ပြီး အကွက် တစ်ကွက်စီ ချရန် စဉ်းစားချိန်မှာ တစ်စက္ကန့်ပင် မကြာပေ။

‘ဒါ... ဒါက အရမ်း သန်မာလွန်းနေပြီ။’

သုံးနာရီခန့်သာ ကြာမြင့်ပြီးနောက်...

ဤတစ်ခါမှ မရှိဖူးသော စစ်တုရင် ပြိုင်ပွဲကြီး ပြီးဆုံးသွားသည်။

ယွင်ကျုံးဟဲ့သည် တစ်ယောက်တည်းဖြင့် ဆယ်ယောက်ကို ရင်ဆိုင်ကာ အပြတ်အသတ် အနိုင်ရရှိခဲ့ပြီး သုံးနာရီသာ အချိန်ယူခဲ့၏။

တာ့ယန် အင်ပါယာသစ်၏ ဝေချီ အကျော်အမော် ဆယ်ဦးစလုံး မျက်နှာများ ဖြူရော်သွားကြပြီး ဘဝကိုပင် သံသယဝင်သွားကြသည်။

‘ဒီလောကမှာ စစ်တုရင် ကစားစွမ်းရည်နဲ့ ကောင်းကင်ကို အန်တုနိုင်တဲ့သူ ရှိနေသေးတာလား။ ဒါက စက္ကန့်ပိုင်းအတွင်း အနိုင်ယူရုံတင် ဘယ်ကမလဲ။ ကျုပ်တို့က ယွင်ကျုံးဟဲ့ရဲ့ ကျောပြင်ကိုတောင် လိုက်မမီနိုင်ဘူး ဖြစ်နေတာ။ ဒီလိုဆိုရင် သူတို့ ဆက်ပြီး စစ်တုရင် ကစားနေတာ ဘာအဓိပ္ပာယ် ရှိတော့မှာလဲ။ တကယ်ကို မျှော်လင့်ချက်မဲ့စရာပဲ။’

ယွင်ကျုံးဟဲ့၏ စိတ်ထဲတွင်လည်း တကယ်တော့ အားနာမှုများ ပြည့်နှက်နေ၏။ ‘တောင်းပန်ပါတယ်။ အရှေ့ဘက်ကို စစ်ချီဖို့၊ တာ့ရှန်း မိစ္ဆာနိုင်ငံကို ဖျက်ဆီးပစ်ဖို့အတွက် ကျုပ် ဒီလို လုပ်ရတာပါ။ ဟန်ရေးပြမှုကို အမြင့်ဆုံးအထိ ရောက်အောင် လုပ်ရမှာဖြစ်ပြီး တာ့ယန် အင်ပါယာသစ်ရဲ့ နယ်ပယ် အားလုံးကို လုံးဝ အနိုင်ယူပစ်ရမှာမို့လို့ပါ။’

ထို့ကြောင့် ဤကဲ့သို့ တစ်ယောက်တည်းဖြင့် ဆယ်ယောက်ကို ရင်ဆိုင်သည့် ပြဇာတ်ကို ကပြရခြင်း ဖြစ်သည်။

သို့ပေမည့် တကယ်တမ်းတွင် ယွင်ကျုံးဟဲ့၏ ကိုယ်ပိုင် စစ်တုရင် ကစားစွမ်းရည်ဖြင့် ဆိုပါက ဤနေရာရှိ အကျော်အမော်များကို စက္ကန့်ပိုင်းအတွင်း ရှုံးနိမ့်သွားမှာဖြစ်၏။

ဤဆယ်ယောက်စလုံးသည် ထိပ်တန်း အကျော်အမော်များ ဖြစ်ကြပြီး ခေတ်သစ် ကမ္ဘာမြေတွင် ဆိုလျှင်လည်း လုံးဝ ပထမတန်းစား အဆင့်များ ဖြစ်ကြသည်။

သို့ပေမည့် နှမြောစရာကောင်းသည်မှာ သူတို့ ရင်ဆိုင်ရသော ပြိုင်ဘက်က အမှတ်ကိုး ကွမ်တမ် ဟူသော ပုံမှန် မဟုတ်သည့် လူသား ဖြစ်နေသောကြောင့်ပင်။

ထိုအချိန်မှစ၍ ယွင်ကျုံးဟဲ့၏ တာ့ယန် အင်ပါယာသစ်အပေါ် ဒုတိယမြောက် စိန်ခေါ်မှု တိုက်ပွဲ ပြီးဆုံးသွားသည်။ ဤတိုက်ပွဲတွင် သူအပြတ်အသတ် အနိုင်ရရှိခဲ့၏။

ဤတိုက်ပွဲ အပြီးတွင် တာ့ယန် အင်ပါယာသစ် တစ်ခုလုံး ထပ်မံ ပေါက်ကွဲသွားပြန်ပြီး ယခင် တေးဂီတ ဖျော်ဖြေပွဲထက်ပင် ပိုမို ကြီးမားသော ဂယက်ရိုက်ခတ်မှုကို ဖြစ်ပေါ်စေခဲ့သည်။ အဘယ်ကြောင့်ဆိုသော် ဤလှည့်ကွက်က အရမ်း အံ့ဩစရာ ကောင်းလွန်းသောကြောင့်ပင်။

တစ်ယောက်တည်းဖြင့် ဆယ်ယောက်ကို ရင်ဆိုင်ပြီး အလွယ်တကူ အနိုင်ရရှိခဲ့သည်လား။ ဤသည်က ယွင်ကျုံးဟဲ့၏ ဉာဏ်ရည်သည် လူဆယ်ယောက် ပေါင်းထားသည်ထက် ပိုများကြောင်း သက်သေပြလိုက်ခြင်း မဟုတ်ပါလား။

ထိုအချိန်မှစ၍ ဝေချီ ဟု ပြောလိုက်သည်နှင့် တာ့ယန် အင်ပါယာသစ်ရှိ လူတိုင်း မျက်နှာများ ဖြူရော်သွားကြတော့မှာဖြစ်သည်။

‘အရမ်း ကြောက်စရာ ကောင်းလွန်းတယ်။ ယွင်ကျုံးဟဲ့က တကယ့် စစ်တုရင် မိစ္ဆာပဲ။’

ထိုအချိန်မှစ၍ တာ့ယန် အင်ပါယာသစ် တစ်ခုလုံးရှိ စစ်တုရင် လောက တစ်ခုလုံး လုံးဝ တိတ်ဆိတ်သွား၏။

ဤအရာက Google ၏ AlphaGo သက်ရောက်မှုထက်ပင် ပို၍ ပြင်းထန်သည်။ Google ၏ AI AlphaGo သည် လူသား ထိပ်တန်း ကစားသမားများနှင့် ကစားရာတွင် တစ်ခါတရံ ရှုံးနိမ့်တတ်သေးပြီး အကြမ်းဖျင်းအားဖြင့် တန်းတူညီမျှ ရှိသည်ဟု ဆိုနိုင်သည်။

သို့ပေမည့် ထိုသို့ဖြစ်လျှင်ပင် လူသားများ၏ ဝေချီ လောကကို ကျဆင်းမှု တစ်ခုအတွင်းသို့ ကျရောက်သွားစေ ခဲ့သည်။ အဘယ်ကြောင့်ဆိုသော် မိမိ၏ စစ်တုရင် ကစားစွမ်းရည် မည်မျှ မြင့်မားပါစေ၊ စက်ရုပ် တစ်ရုပ်ကို မနိုင်နိုင်လျှင် ဘာအဓိပ္ပာယ် ရှိတော့မည်နည်းဟု တွေးထင်သွားကြသောကြောင့်ပင်။

ယခုမူ ယွင်ကျုံးဟဲ့သည် တာ့ယန် အင်ပါယာသစ်၏ ဝေချီ ပညာရှင်ကြီးများကို လုံးဝ တစ်ဖက်သတ် အနိုင်ယူသွားခြင်း ဖြစ်သည်။ ထိုသို့ဆိုလျှင် ဝေချီ ဆက်လက် သင်ယူနေခြင်းက ဘာအဓိပ္ပာယ် ရှိတော့မည်နည်း။

ခြောက်လပိုင်း ခုနစ်ရက်နေ့...

ယွင်ကျုံးဟဲ့သည် တာ့ယန် အင်ပါယာသစ်သို့ တတိယမြောက် စိန်ခေါ်စာကို ထပ်မံ ပေးပို့လိုက်ပြန်သည်။

‘ခင်ဗျားတို့ တာ့ယန် အင်ပါယာသစ်က ဆေးပညာမှာ အရမ်းတော်တယ်လို့ ပြောတယ်မလား။ အရှေ့ဘက် လောကကို လုံးဝ အထင်သေးပြီး အရှေ့ဘက်လောကရဲ့ ဆေးပညာတွေက လူလိမ် မှော်ပညာတွေ ဖြစ်ပြီး တာ့ယန် အင်ပါယာသစ်ရဲ့ ဆေးပညာကမှ တကယ့် အဆင့်မြင့် ဆေးပညာလို့ တိုက်ရိုက် ပြောဆိုခဲ့ကြတယ် မလား။’

ဤတစ်ကြိမ် စိန်ခေါ်မှုတွင် ယွင်ကျုံးဟဲ့၌ ပြိုင်ဘက် မရှိဘဲ သူ တစ်ယောက်တည်း၏ ဖျော်ဖြေမှု သက်သက်သာ ဖြစ်၏။

အင်ပါယာ ဆေးရုံတော် အတွင်းတွင် တာ့ယန် အင်ပါယာသစ်၏ အထူးချွန်ဆုံး သမားတော် ဆယ်ဂဏန်းခန့်က ယွင်ကျုံးဟဲ့၏ ဆေးပညာကို မျက်မြင်ကိုယ်တွေ့ ကြည့်ရှုကြသည်။

သူသည် ခွဲစိတ်မှု နှစ်ခု ပြုလုပ်ခဲ့သည်။ ပထမတစ်ခုမှာ အလွန် မပြင်းထန်သော လေဖြတ်ရောဂါသည် တစ်ဦးကို ဦးခေါင်းခွံဖွင့် ခွဲစိတ်မှု ပြုလုပ်ခြင်း ဖြစ်၏။

ဤသည်မှာ တာ့ယန် အင်ပါယာသစ်၏ ပထမဆုံး ဦးခေါင်းခွံဖွင့် ခွဲစိတ်မှု ဖြစ်၏။ သမားတော်များ အားလုံး လုံးဝ မယုံကြည်နိုင်အောင် ဖြစ်သွားကြသည်။

‘ဦးခေါင်းကို လွှဖြင့် တိုက်ပြီး ခွဲစိတ်မှု ပြုလုပ်နိုင်တယ်လား။ ဒါ... ဒါက ယုံနိုင်စရာ မရှိဘူး။’

တာ့ယန် အင်ပါယာသစ်၏ ဆေးပညာသည် အလွန် တိုးတက်သော်လည်း ဦးခေါင်းပေါ်တွင် ကြီးမားသော ခွဲစိတ်မှုများ မပြုလုပ်ရဲကြပေ။

ထို့ကြောင့် ယခုအချိန်တွင် တာ့ယန် အင်ပါယာသစ်၌ ဦးခေါင်းခွံဖွင့် ခွဲစိတ်မှုသည် လုံးဝ လောကသစ်ကို ဖွင့်လှစ်လိုက်ခြင်းဖြစ်ပြီး သမိုင်းသစ်ကို ဖန်တီးလိုက်ခြင်းပင် ဖြစ်သည်။

ထို့အပြင် ယွင်ကျုံးဟဲ့၏ ကုသမှုက အောင်မြင်သွားခဲ့သည်။ ခွဲစိတ်မှု ပြီးစီးသွားပြီးနောက် သမားတော်များ အားလုံးက သူ့ကို အလွန် ကြည်ညိုလေးစားသော အကြည့်များဖြင့် ကြည့်လိုက်ကြ၏။

တာ့ယန် အင်ပါယာသစ်၏ ဆေးပညာ သမိုင်းသည် ထိုအချိန်မှစ၍ စာမျက်နှာသစ် တစ်ခုကို ဖွင့်လှစ်လိုက်ပြီ ဖြစ်သည်။

ယွင်ကျုံးဟဲ့လည်း သက်ပြင်းရှည်ကြီး ချလိုက်မိသည်။ တာ့ယန် အင်ပါယာသစ်တွင်မှသာ သူ ဤခွဲစိတ်မှုကို ပြုလုပ်ရဲခြင်း ဖြစ်၏။

အဘယ်ကြောင့်ဆိုသော် ဤနေရာတွင် ပြီးပြည့်စုံသော ကိရိယာများ ရှိပြီး လုံလောက်သော ဆေးဝါးများ ရှိကာ ယွင်ကျုံးဟဲ့က အောက်ဆီဂျင်ကိုပင် ဖန်တီးထားနိုင်သောကြောင့် ဖြစ်သည်။

ထိုသို့ဖြစ်လျှင်ပင် ကျရှုံးနိုင်ခြေ အလွန် များသည်။ သို့ပေမည့် နောက်ဆုံးတွင် သူသည် ဤခွဲစိတ်မှုကို အောင်မြင်စွာ ပြုလုပ်နိုင်ခဲ့၏။

ဒုတိယ ခွဲစိတ်မှုမှာ ကြည့်ရသည်မှာ ပို၍ သာမန် ဆန်သော်လည်း တကယ်တမ်းတွင် ပို၍ ခက်ခဲ၏။ ၎င်းမှာ ပြတ်တောက်သွားသော လက်ကို ပြန်လည် ဆက်ပေးသည့် ခွဲစိတ်မှု ဖြစ်ပြီး အာရုံကြောများ၊ သွေးကြောမျှင်များ အားလုံးကို ပြန်လည် ဆက်စပ်ပေးရမှာဖြစ်သည်။

ဤနေရာတွင် ဆေးဘက်ဆိုင်ရာ အဏုကြည့်မှန်ဘီလူး (Microscope) မရှိသောကြောင့် သူ၏ အမြင်အာရုံကိုသာ လုံးဝ အားကိုးရမှာ ဖြစ်၏။

ထို့ကြောင့် သူသည် ဒါဗင်ချီ ပူးကပ်မှုကို အသုံးပြုပြီး မီတျဲ ချိုင့်ဝှမ်း၏ နတ်ဆေးကိုပါ အသုံးပြုကာ ဤခွဲစိတ်မှုကို အောင်မြင်စွာ ပြုလုပ်နိုင်ခဲ့ခြင်း ဖြစ်သည်။

အခြားသူများက ဤဒုတိယ ခွဲစိတ်မှု မည်မျှ ခက်ခဲကြောင်း မသိနိုင်သော်လည်း ထိုနေရာရှိ သမားတော်များကမူ သိရှိကြ၏။

တစ်လ အကြာတွင် အင်ပါယာ ပထမ စာသင်ကျောင်းက ယွင်ကျုံးဟဲ့ကို အင်ပါယာ ဆေးပညာ ပါရဂူဘွဲ့ အပ်နှင်းကြောင်း လူသိရှင်ကြား ကြေညာခဲ့ပြီး အင်ပါယာ ပထမ စာသင်ကျောင်း၏ အချိန်ပိုင်း ပါမောက္ခ အဖြစ် ဖိတ်ကြားခဲ့သည်။

ထိုမျှမက အင်ပါယာ အထက်လွှတ်တော်က ယွင်ကျုံးဟဲ့ကို ဂုဏ်ပြုဆု ချီးမြှင့်ခဲ့သည်။ အင်ပါယာ စာပေဘက်ဆိုင်ရာ အုပ်ချုပ်ရေးမှူး ကိုယ်တိုင်က ယွင်ကျုံးဟဲ့ကို အင်ပါယာ ဂုဏ်ထူးဆောင် တံဆိပ်ကို ချီးမြှင့်ခဲ့၏။

ထိုသို့ဖြင့် ယွင်ကျုံးဟဲ့၏ တာ့ယန် အင်ပါယာသစ်အပေါ် တတိယမြောက် တိုက်ပွဲသည် အပြတ်အသတ် အနိုင်ရရှိသွားခဲ့သည်။