အခန်း ၃၃၅

Chapter 335

ထိုအလယ်အလတ်အရွယ် အမျိုးသားသည် အားရပါးရ အကြိမ်နည်းငယ် ရယ်မောလိုက်ရာ ၎င်း၏ အသံမှာ ဗီလာအိမ်ကြီး၏ ကျယ်ဝန်းသော ဧည့်ခန်းမဆောင်အတွင်း၌ ကြေးစည်ကြီးတစ်လုံး တီးခတ်လိုက်သကဲ့သို့ ပဲ့တင်ထပ်သွားခဲ့သည်။

ကျိုးထျန်းသည် ထိုလူ၏ အမူအရာအတွင်း၌ နက်ရှိုင်းသော ဝမ်းမြောက်မှုနှင့်အတူ ဝမ်းနည်းရိပ်အနည်းငယ် ရောပြန်းနေသည်ကို မြင်လိုက်ရသဖြင့် ခေါင်းငုံ့ကာ ခေတ္တမျှ စဉ်းစားလိုက်မိသည်။

မာတုန်းလိုင်နှင့် ထိုအမျိုးသားသည် စကားဆက်မပြောတော့ဘဲ သူ့ကိုသာ စိုက်ကြည့်နေကြသည်။

မိနစ်ဝက်ခန့် ကြာပြီးနောက်တွင်မူ ကျိုးထျန်း၏ မျက်ဝန်းများ အနည်းငယ် လှုပ်ရှားသွားပြီး သဘောပေါက်နားလည်သွားသည့် မျက်နှာပေးမျိုး ပေါ်လာခဲ့တော့သည်။

သူ့ရှေ့တည့်တည့်ရှိ လူနှစ်ဦးမှာ အချင်းချင်း ပြုံးပြလိုက်ကြပြီး အထူးသဖြင့် ထိုသတ်လတ်ပိုင်းအမျိုးသားက ကျေနပ်အားရသည့်အလား ခေါင်းကို အသာအယာ ညိတ်လိုက်သည်။

‘ဒီကောင်လေးက ဦးနှောက်တော်တော်ပြေးတာပဲ။ သူ့လို လူတစ်ယောက်ကို ရွေးချယ်ခဲ့တာ တကယ်ကို မှန်ကန်တဲ့ ဆုံးဖြတ်ချက်ပဲ’

ထိုအမျိုးသားက လက်ဖက်ရည်ခွက်ကို မြှောက်ကာ တစ်ငုံ သောက်လိုက်ပြီးနောက်

"စကူရိုင်းမိသားစုက တချို့လမ်းကြောင်းတွေကနေတစ်ဆင့် မင်းရဲ့ အထောက်အထားကို စုံစမ်းသိရှိသွားကြလို့ မင်းနောက်ကို လိုက်ရှာကြတာ"

"ဒါ့အပြင် အဲဒီသက်တော်စောင့်တွေရဲ့ ထွက်ဆိုချက်အရ ဒီစကူရိုင်းတကဲဟီတိုဟာ သူ့အဖေနဲ့ သူ့အစ်ကိုဖြစ်သူကို လုံးဝ အသိမပေးဘဲ တိတ်တဆိတ် လာခဲ့တာဖြစ်ပြီး မိသားစုအကြီးအကဲရဲ့ ခွင့်ပြုချက် ဒါမှမဟုတ် တာဝန်ပေးချက်လည်း မပါဘူး"

"ဒါကြောင့်မို့လို့ သူတို့ရဲ့ ခရီးစဉ်တစ်ခုလုံးက အပေါက်အပြဲတွေနဲ့ ပြည့်နေတာ၊ လုံးဝကို အစီအစဉ်မရှိဘဲ စည်းမဲ့ကမ်းမဲ့ လုပ်ဆောင်ခဲ့တဲ့ လုပ်ရပ်တစ်ခုပေါ့"

ထိုအမျိုးသားက စကူရိုင်းတကဲဟီတိုအကြောင်းကို ပြောဆိုရာတွင် ကဲ့ရဲ့ရှုံ့ချသော လေသံကို သုံးနှုန်းထားရာ ယခုအခါ သေဆုံးသွားပြီဖြစ်သော ထိုလူအပေါ် အလွန်အမင်း ရွံရှာမိနေကြောင်း ထင်ရှားသည်။

"သူတို့ရဲ့ သဘောအလျောက် တရားလွန် ပြုမူခဲ့တဲ့ လုပ်ရပ်တွေက ပြင်းထန်တဲ့ နောက်ဆက်တွဲဆိုးကျိုးတွေကို ဖြစ်ပေါ်စေခဲ့တယ်”

“အဲဒါကတော့ ရှန်ဟိုင်းနဲ့ အရှေ့ဘက်ဒေသတစ်ခုလုံးမှာရှိတဲ့ စကူရိုင်းမိသားစုရဲ့ လျှို့ဝှက်စစ်ဆင်ရေးတွေကို အကုန် ဘူးပေါ်သလို ပေါ်သွားစေတာပဲ"

"ဒါတင်မကသေးဘူး... စကူရိုင်းမိသားစုက ငွေကြေးချမ်းသာတာ မှန်ပေမဲ့ မင်းရဲ့ အချက်အလက်တွေ၊ အထူးသဖြင့် ဟေးလုံကျန်းက ကမ်းဘဲလ် ဓာတ်ခွဲခန်းနဲ့ ပတ်သက်တဲ့ အချက်အလက်တွေက လျှို့ဝှက်အဆင့်အတန်း သတ်မှတ်ထားတာ။ သာမန် အစိုးရသက်တော်စောင့်တွေတောင် ကြည့်ရှုပိုင်ခွင့်မရှိတဲ့အရာကို သာမန်လူတွေက ဘယ်လိုလုပ် သိနိုင်မှာလဲ"

ကျိုးထျန်း ခေါင်းညိတ်လိုက်သည်။

ထိုအမျိုးသား၏ စကားများက သူ့သံသယကို အတည်ပြုပေးလိုက်ခြင်းပင်။

စကူရိုင်းမိသားစုမှာ ငွေကြေးအရသာမကဘဲ အခြားကဏ္ဍများတွင်ပါ ကြီးမားသော ဆုံးရှုံးမှုနှင့် ရင်ဆိုင်လိုက်ရပုံရသည်။

"ငါတို့ရဲ့ သာမန်ကိုယ်စားလှယ်တွေတောင် မင်းဆီကို မချဉ်းကပ်နိုင်တာကို စကူရိုင်းမိသားစုက မင်းရဲ့ အသေးစိတ် အချက်အလက်တွေကို သိနေတယ်ဆိုတော့ ငါတို့ အစိုးရသက်တော်စောင့်တပ်ဖွဲ့ ထဲမှာ သစ္စာဖောက် ရှိနေတယ်လို့ ဆိုလိုတာပဲ"

ထိုအမျိုးသား စကားပြောနေစဉ် ၎င်း၏ မျက်ဝန်းများထဲမှ အေးစက်သော အလင်းတန်းများ ဖြတ်ပြေးသွားပြီး တိုက်ခိုက်လိုသော အရှိန်အဝါများမှာ စူးရှထက်မြက်လွန်းသဖြင့် ကျိုးထျန်းပင်လျှင် လန့်ဖျန့်သွားရသည်။

သူ ဤမျှအထိ လူသတ်ငွေ့များ ထုတ်လွှတ်နေရခြင်းမှာ ဤဖြစ်ရပ်မှတစ်ဆင့် ၎င်းတို့သည် အဆင့်မြင့် ခြစားနေသော အရာရှိကြီးတစ်ဦးကို ဖမ်းဆီးနိုင်ခဲ့သောကြောင့် ဖြစ်သည်။

ထိုလူ၏ အစိုးရသက်တော်စောင့်တပ်ဖွဲ့အတွင်းရှိ ရာထူးနေရာမှာ သူ့ထက် တစ်ဆင့်ခွဲမျှသာ နိမ့်ကျသူ ဖြစ်သည်။

ဤသည်မှာ အလွန်တရာ အရေးကြီးလှသော အရေးကိစ္စပင်။

အကယ်၍ ခြ‌စားနေသောအရာရှိကို ဆက်လက် ဖုံးကွယ်ထားခွင့် ပြုလိုက်ပါက တရုတ်နိုင်ငံ ရင်ဆိုင်ရမည့် ဆုံးရှုံးမှုများမှာ တွက်ချက်နိုင်မည်မဟုတ်ချေ။

ဤသည်မှာလည်း စကူရိုင်းမိသားစု၏ အကြီးအကဲ စကူရိုင်းအီဟီကိုအနေဖြင့် တရုတ်နိုင်ငံအတွင်းရှိ ၎င်းတို့၏ ကြီးမားလှသော စီမံကိန်းကြီး ဘူးပေါ်သလို မပေါ်စေရန်အတွက် ငြိမ်သက်နေရန် ဆုံးဖြတ်ခဲ့သည့် အကြောင်းရင်းပင်။

သို့သော် ယခုမူ သူ့တွင်ရှိသော ဦးနှောက်မရှိသည့် သားဖြစ်သူ၏ ရူးသွပ်မှုကြောင့် တရုတ်နိုင်ငံအတွင်းရှိ ဂျပန်နိုင်ငံနှင့် စကူရိုင်းမိသားစုတို့၏ ပူးပေါင်းကြံစည်မှုကြီးတစ်ခုလုံးမှာ အကုန်အစင် ပေါ်ပေါက်သွားခဲ့ရပြီး အစိုးရသက်တော်စောင့်တပ်ဖွဲ့ကလည်း ၎င်းတို့ကို တစ်ပြိုင်နက်တည်း အမြစ်ပြတ် ချေမှုန်းပစ်ခဲ့သည်။

ဂျပန်စီးပွားရေးသမားများနှင့် ကုမ္ပဏီအမြောက်အမြား ဖမ်းဆီးစစ်ဆေးခြင်း ခံခဲ့ရသည်။

အတွင်းပိုင်းရှိ ခြစားသောအရာရှိများ အဆက်လိုက်အပြုံလိုက် ပေါ်ထွက်လာခဲ့ပြီး ဂျပန်နိုင်ငံ၏ ဆယ်စုနှစ်ပေါင်းများစွာ ကြာမြင့်ခဲ့သော ကြံစည်မှုကြီးကို လုံးဝ ဖျက်ဆီးပစ်နိုင်ခဲ့သည်။

ဤသည်မှာ ၎င်းတို့အနေဖြင့် နှစ်ပေါင်း ၅၀ ကျော် ကြာမြင့်စွာ တည်ဆောက်ခဲ့ရပြီး ငွေကြေး ဘီလီယံပေါင်းများစွာ အသုံးပြုခဲ့ရသော ပြီးပြည့်စုံသည့် သူလျှိုကွန်ရက်စနစ်ကြီး ဖြစ်သည်။

ယခုမူ စကူရိုင်းတကဲဟီတို၏ ရှန်ဟိုင်းခရီးစဉ်ကြောင့် ၎င်းတို့နိုင်ငံ၏ မကောင်းဆိုးဝါးဆန်လှသော မဟာဗျူဟာကြီးမှာ အလုံးစုံ ပျက်စီးသွားခဲ့ရလေပြီ။

ထို့ကြောင့်ပင် အစိုးရသက်တော်စောင့်တပ်ဖွဲ့၏ စစ်ဦးစီးချုပ်ဖြစ်သော ထိုအမျိုးသားမှာ ဤမျှအထိ ဝမ်းမြောက်နေခြင်း ဖြစ်သည်။

ဤသည်မှာ သူ ရာထူးလက်ခံရယူပြီးကတည်းက အကြီးမားဆုံးသော ဖမ်းဆီးနှိမ်နင်းမှု စစ်ဆင်ရေးကြီးပင်။

ဤစစ်ဆင်ရေးအပြီးတွင် တရုတ်နိုင်ငံအတွင်းရှိ ဂျပန်တို့၏ ဩဇာလွှမ်းမိုးမှုမှာ အနည်းဆုံး ၇၀ ရာခိုင်နှုန်းခန့် ကျဆင်းသွားမည်ဖြစ်ရာ နောင်နှစ်ပေါင်း ၃၀ မျှ ပြည်တွင်းအေးချမ်းသာယာမှုကို အာမခံချက် ပေးနိုင်သွားခဲ့ပြီ ဖြစ်သည်။

ထို့ပြင် အထက်လူကြီးများက ကျိုးထျန်းအား ဟေးလုံကျန်းရှိ သက်ဆိုင်ရာ စီမံကိန်းများတွင် ပူးပေါင်းလုပ်ဆောင်ရန် ဆုံးဖြတ်လိုက်ရုံရှိသေးပြီး စကူရိုင်းမိသားစုက သူ့ကို သတ်ရန် လူလွှတ်ခဲ့သည်။

ဤအချက်က ဘာကို ဆိုလိုသနည်း။

၎င်းတို့ ဘာလုပ်ရန် ကြိုးစားနေကြသနည်း။

‘ငါက ဝက်ကလေးတွေ စတင်မွေးမြူဖို့ ပြင်ဆင်နေတုန်းပဲ ရှိသေးတယ်၊ မင်းက ငါ့ရဲ့ အစာကျွေးတဲ့ကန်ထဲကို ကြွက်သတ်ဆေး လာခတ်တာပဲ။ ဒါကို တမင်တကာ လုပ်တာမဟုတ်ဘူးလို့ မင်းပြောရင် ငါက ယုံရမှာလား’

တရုတ်နိုင်ငံသည် ဟေးလုံကျန်းကို အလွန်အမင်း တန်ဖိုးထားသည်။

ထိုနေရာမှာ သယံဇာတ ကြွယ်ဝပြီး မဖွံ့ဖြိုးသေးသော ကုန်းမြေရိုင်းအမြောက်အမြား ရှိနေသဖြင့် ပြည်တွင်း ကုန်ကြမ်းစျေးကွက်ကို ကြွယ်ဝစေနိုင်ပြီး အချို့သော နိုင်ငံများ၏ ကြိုးကိုင်ချုပ်ကိုင်မှု ခံရသည့် အခြေအနေကိုလည်း လျော့ပါးသက်သာစေနိုင်သည်။

ဤသည်မှာ ရေရှည်စီမံကိန်းတစ်ခုဖြစ်ပြီး အဆင့်မြင့်ခေါင်းဆောင်ပိုင်း၏ ဆန္ဒလည်း ဖြစ်သည်။

နိုင်ငံခြား တိုင်းပြည်တစ်ခုက ကြားဖြတ်နှောင့်ယှက်ပြီး ဖျက်ဆီးသွားမည့်အရေးကို မည်သို့ ခွင့်ပြုနိုင်ပါမည်နည်း။

အထူးသဖြင့် အနားယူသွားပြီဖြစ်သော အဘိုးစွင်းမှာ ထိုအမျိုးသား၏ အထက်လူကြီးဟောင်း ဖြစ်ပြီး ကျိုးထျန်း တိုက်ခိုက်ခံရကြောင်း သိရှိရသောအခါ ၎င်း၏ လက်ထောက်ဖြစ်သူ၏ တားဆီးမှုကို ဂရုမစိုက်ဘဲ ခုတင်ပေါ်မှ ဒေါသတကြီး ထကာ စာကြည့်ခန်းရှိ ဖုန်းကို ကောက်ကိုင်လျက် ဝန်ကြီးအဖွဲ့ရှိ အဆင့်မြင့်အရာရှိကြီးများထံသို့ ချက်ချင်း ဆက်သွယ်ကာ အခြေအနေကို မေးမြန်းခဲ့သည်။

ထို့ကြောင့်ပင် ထိုအမျိုးသားကိုယ်တိုင် လာရောက်စုံစမ်းစစ်ဆေးရခြင်း ဖြစ်ပြီး ဤကဲ့သို့သော ကြီးမားလှသည့် အခင်းအကျင်းမျိုးကို ဆယ်စုနှစ်များစွာအတွင်း တွေ့ရခဲလှသည်။

စကူရိုင်းမိသားစုသည် တရုတ်နိုင်ငံထံသို့ ကန့်ကွက်လွှာ ပေးပို့ထားပြီးဖြစ်သည်။

ပထမတွင် ၎င်းတို့က မာန်မာနထောင်လွှားလျက် ၎င်းတို့သခင်လေး သေဆုံးမှုအတွက် ကျိုးထျန်းတွင် တာဝန်ရှိကြောင်း အပြစ်ပုံချလိုကြသည်။

သို့သော် အစိုးရသက်တော်စောင့်များက ကိုယ်တိုင်ကိုယ်ကျ ကြားဖြတ်ဝင်ရောက်ကာ ၎င်းတို့၏လူအားလုံးကို ထိန်းသိမ်းပြီး စေ့စေ့စပ်စပ် စုံစမ်းစစ်ဆေးမှုများ ပြုလုပ်ခဲ့ကြသည်။

စကူရိုင်းတကဲဟီတို၏ ရုပ်အလောင်းနှင့် ပတ်သက်၍မူ အလောတကြီး လုပ်ဆောင်စရာမလိုပေ။

စကူရိုင်းမိသားစုဘက်က အခြေအနေမှန်ကို သဘောပေါက်နားလည်ပြီး လျော်ကြေးပေးဆောင်ကာ တောင်းပန်လာသည့်အခါမှသာ သင်္ဂြိုဟ်ရန် ပြန်လည်သယ်ဆောင်ခွင့် ရရှိပေလိမ့်မည်။

သို့မဟုတ်ပါက ရေခဲသေတ္တာအံဆွဲထဲတွင် ရေခဲချောင်းအဖြစ်သာ ဆက်ရှိနေရပေလိမ့်မည်။

ကျိုးထျန်း ဤအချက်ကို စဉ်းစားခဲ့ဖူးသော်လည်း ဤမျှအထိ နက်နက်ရှိုင်းရှိုင်း မတွေးမိခဲ့သလို တစ်ဖက်လူ၏ ဆုံးရှုံးမှု မည်မျှအထိ ကြီးမားသည်ကိုလည်း မရိပ်မိခဲ့ချေ။

ယခုမူ သူ စကူရိုင်းတကဲဟီတိုအတွက် အမွှေးတိုင်သာ ထွန်းပေးချင်တော့သည်။

ထိုလူက တကယ့် လူကောင်းတစ်ယောက်ပင် ဖြစ်ရမည်။

"အကျဉ်းချုပ်ပြောရရင်တော့ မင်း အခုအချိန်မှာ အိမ်မှာပဲ ငြိမ်ငြိမ်သက်သက် နားနေပါ။ ကျန်တဲ့အရာအားလုံးကို ငါတို့ အစိုးရသက်တော်စောင့်တပ်ဖွဲ့က ကိုင်တွယ်ဖြေရှင်းသွားမှာပါ”

“နောက်ဆုံးရလဒ် မထွက်လာခင်အထိ ပြည်ပကို မသွားပါနဲ့၊ ပြီးတော့ မြို့ပြင်ကိုလည်း ခရီးမထွက်တာ အကောင်းဆုံးပဲ။ အိမ်မှာပဲ တတ်နိုင်သမျှ နေပေးပါ"

ထိုအမျိုးသား၏ လေသံမှာ အမိန့်ပေးသည့် ပုံစံမျိုးမဟုတ်ဘဲ သိမ်မွေ့လှသော်လည်း ကျိုးထျန်းအနေဖြင့် ထိုလူ၏ စိတ်အနှောင့်အယှက်မဖြစ်စေရန်အတွက် နာခံရမည်ဖြစ်ကြောင်း သိရှိထားသည်။

"ရှန်ဟိုင်းမှာ သေနတ်ထုတ်ရဲတဲ့လူနဲ့ ပတ်သက်လို့တော့ ငါတို့ လုံးဝ လွှတ်ထားမှာမဟုတ်ဘူး။ ရက်အနည်းငယ်အတွင်းမှာ ရလဒ်ထွက်လာမှာမို့လို့ စိတ်မပူပါနဲ့"

အဆုံးသတ်တွင် ကျိုးထျန်းအနေဖြင့် ဟေးလုံကျန်းရှိ ကိစ္စရပ်များကို ဆက်လက်ကိုင်တွယ်ရန် လိုအပ်နေသေးရာ အထက်လူကြီးများက သူ့ကို တတ်နိုင်သမျှ နှစ်သိမ့်ပေးရန် ကြိုးစားနေကြခြင်း ဖြစ်သည်။

ကျိုးထျန်း ပြုံး၍ ခေါင်းညိတ်ပြလိုက်ပြီး မိမိအနေဖြင့် ပူးပေါင်းဆောင်ရွက်မည်ဖြစ်ကြောင်း ပြသလိုက်သည်။

"ဒါဆိုရင် စကူရိုင်းမိသားစုဆီကနေ ကျွန်တော် လျော်ကြေးနည်းနည်း တောင်းလို့ရမလား"

ကျိုးထျန်းက မကောင်းဆိုးဝါးဆန်ဆန် ပြုံးလိုက်သည်။ ဤကိစ္စကို ဤအတိုင်း အလကားတော့ အဆုံးသတ်ခွင့်မပြုနိုင်ပေ။

၎င်းတို့က သူ့ကို လမ်းမထက်တွင် ကြားဖြတ်တိုက်ခိုက်ခဲ့သည့်အပြင် သေနတ်ဖြင့်ပင် ပစ်ခတ်ရန် ကြိုးစားခဲ့ကြသည်။

အကယ်၍ ၎င်းတို့ဘက်က တန်ဖိုးပြန်မပေးဆပ်ရပါက နောက်နောင်တွင် သူ့ဘေးကင်းလုံခြုံရေးအတွက် အာမခံချက် ရှိတော့မည်မဟုတ်ချေ။

‘ငါ့ကို လာ ရန်စဝံ့တဲ့သူ ဘယ်သူမဆို ဆယ်ဆမကတဲ့ တန်ဖိုးကို ပြန်ပေးဆပ်ဖို့ ပြင်ဆင်ထားရလိမ့်မယ်’

"စိတ်မလောပါနဲ့ဦး။ လောလောဆယ်တော့ ပြဿနာမရှာပါနဲ့ဦး"

ကျိုးထျန်း ထိုစကား၏ ဆိုလိုရင်းကို နားလည်လိုက်သည်။

လောလောဆယ် ပြဿနာမရှာရန် ဆိုသည်မှာ အခြေအနေများ ငြိမ်သက်သွားသည့်အခါ အထက်လူကြီးများက စကူရိုင်းမိသားစုကို သူ ကလဲ့စားချေမည့်အရေးကို တိတ်တဆိတ် ခွင့်ပြုပေးမည်ဟူသော သဘောပင်။

"ကောင်းပါပြီ၊ ကျွန်တော် ဒီရက်ပိုင်း အိမ်မှာပဲ အနားယူနေပါ့မယ်"

ထိုအမျိုးသားက ကျေနပ်အားရစွာဖြင့် ခေါင်းညိတ်လိုက်သည်။

"ညစာစားဖို့ အချိန်နီးနေပြီဆိုတော့ ဒီမှာပဲ တစ်ခွက်တစ်ဖလား စားသောက်သွားပါဦးလား။ အန်တီလီရဲ့ လက်ရာက တော်တော်ကောင်းပါတယ်"

"မဖြစ်ဘူး၊ ငါတို့က မင်းလိုမျိုး အားယားနေတာမဟုတ်ဘူး။ လုပ်စရာတွေ အများကြီး ရှိသေးတယ်"

ထိုအမျိုးသားက မတ်တတ်ထရပ်ကာ တံခါးဝဆီသို့ ဦးတည်လျှောက်လှမ်းလေသည်။

မထွက်ခွာမီ ကျိုးထျန်း၏ ပုခုံးကို ပုတ်ကာ

"ကျိုးထျန်း... မင်းက အခြေခံမူတွေရှိပြီး စံပြဖြစ်တဲ့ လူငယ်တစ်ယောက်ပဲ။ အခု မင်း လမ်းမှန်ပေါ်ကို ရောက်နေပြီဖြစ်သလို တောက်ပတဲ့ အနာဂတ်လည်း ရှိနေတယ်။ ဒါကြောင့်မို့လို့ စိတ်မလောပါနဲ့ဦး"

ဆုံးမစကားနှင့် နှစ်သိမ့်စကား နှစ်မျိုးစလုံး ရောပြန်းနေသော ဤစကားကို ဆိုပြီးနောက် ထိုလူနှစ်ဦးသည် အပြင်ဘက်တွင် ရပ်နားထားသော ပြည်တွင်းဖြစ်ကားပေါ်သို့ တက်ရောက်ကာ ဗီလာအိမ်ရာဝင်းအတွင်းမှ အလျှင်အမြန် မောင်းထွက်သွားကြတော့သည်။

ကျိုးထျန်း တံခါးဝတွင် ရပ်လျက် ကားမောင်းထွက်သွားသည်ကို စောင့်ကြည့်နေမိသည်။

ကားနောက်မီးပွားများ ပျောက်ကွယ်သွားသည့်တိုင်အောင် သူသည် ထိုနေရာ၌ပင် ရပ်နေဆဲဖြစ်ပြီး အနည်းငယ် စဉ်းစားခန်း ဝင်နေမိသည်။

‘အခြေခံမူတွေရှိပြီး စံပြဖြစ်တဲ့လူ ဟုတ်လား...’

‘အဲဒီလိုမျိုးလား’

ကျိုးထျန်း သက်ပြင်းတစ်ချက် ချလိုက်သည်။

တစ်ဖက်လူက သူ့ကို စိတ်ရှည်ရန်နှင့် အခြေအနေ အရပ်ရပ်ကို အကျိုးအမြတ်အမြင်ဖြင့် ကြည့်ရှုတတ်ရန် ပြောကြားခဲ့သည်။

သို့သော် မည်သည့်လူငယ်ကမှ သွေးမဆူဘဲ နေပါမည်နည်း။

ယခုမူ ၎င်းတို့က သူ့ကို လာရောက် ရန်စခဲ့ပြီဖြစ်ရာ သူက ဖင်ခေါင်းထဲ အမြီးဝှက်ပြီး ထွက်ပြေးရမည်လော။

မဖြစ်နိုင်ပေ၊ သူ ရှောင်တိမ်းလိမ့်မည်မဟုတ်ချေ။

သူ လုပ်ဆောင်ရမည့်အရာမှာ ပြင်းထန်လှသော တန်ပြန်တိုက်စစ်ကို ဆင်နွှဲပြီး ၎င်းတို့အား နောက်ထပ်တစ်ကြိမ် ရန်မစဝံ့အောင် ပြုလုပ်ကာ ရန်သူတို့၏ တောခွေးကဲ့သို့ ရူးသွပ်လှသော ရည်မှန်းချက်များကို အမြစ်ပြတ် ချေမှုန်းပစ်ရန်ဖြစ်သည်။