အံ့ဩစရာပဲ၊ ဧကရာဇ်က စာခိုးချတာကို ကူညီပေးခဲ့တာတဲ့ (၁)

ရှုရန်မြောင်သည် နန်းတွင်းအစိုးရယန္တရားကြီး၏ နွေးထွေးပျူငှာမှုကို လက်တွေ့ခံစားလိုက်ရလေသည်။

တစ်ဖက်တွင်မူ တော်ဝင်မြေးတော်သည် နန်းတွင်းအစိုးရယန္တရားကြီး၏ မည်းမှောင်စုတ်ပဲ့လှသော အရိပ် မည်းကြီးကို စနစ်တကျ ခံစားလိုက်ရရှာသည်။

နှစ်ယောက်စလုံး၏ အနာဂတ်လမ်းခရီးမှာ အလွန်အမင်း တောက်ပလင်းလက်နေခဲ့ကြသည်မှာ အမှန်ပင် ဖြစ်၏။

“ကျွန်တော်မျိုး ကန့်ကွက်ပါတယ်”

တော်ဝင်မြေးတော်၏ မျက်လုံးအစုံမှာ ဒေါသအမျက်ချောင်းချောင်း ထွက်လွန်းလှသဖြင့် သွေးကြောမျှင်များ ယှက်သန်းကာ နီမြန်းလို့ နေခဲ့ပြီး သွားများကို တကျိကျိ ကြိတ်လျက် ဆိုလိုက်တော့သည်။

“ဘာဖြစ်လို့ သူ့ကို အပြစ်မရှိဘူးလို့ ကြေညာလိုက်ရတာလဲ ဘုရား”

ဧကရာဇ်အိုကြီး၏ မျက်နှာပေါ်က ပြုံးယောင်သန်းနေမှုမှာ ရုတ်တရက် မှေးမှိန်သွားခဲ့ရသည်။ သူသည် အလွန်အမင်း တည်ကြည်လေးနက်လှသော မျက်နှာထားဖြင့် တော်ဝင်မြေးတော်အား စိုက်ကြည့်လိုက်သည်။

“ကောင်းချီရှန်း၊ ရှုရန်မြောင်အပေါ် စာမေးပွဲခိုးချပါတယ်ဆိုပြီး မတရားသဖြင့် လုပ်ကြံစွပ်စွဲထားတဲ့ မင်းရဲ့ မဟုတ်မမှန်တဲ့ အကွက်တွေကို ငါကိုယ်တော်မြတ်ကော၊ ဒီညီလာခံတစ်ခုလုံးက နန်းတွင်းအမတ်ကြီးတွေကော ရိပ်မိခြင်း မရှိကြဘူးလို့ တကယ်ပဲထင်နေတာလား”

*မင်းက တကယ်ကြီး ဉာဏ်မမှီတာလား၊ ဒီနန်းတွင်းတစ်ခုလုံးက အမတ်တွေက ကိုယ့်ရဲ့ လျှို့ဝှက် အရှုပ်တော်ပုံတွေ အပြင်ကို ပေါက်ကြားသွားမှာ ကြောက်လွန်းလို့သာ ရှုရန်မြောင်ကို အပြစ်မဲ့ လွှတ်ပေး လိုက်ကြတာလို့ ဘယ်သူ ကများ ရူးရူးမိုက်မိုက် ထင်မှတ်နေမှာလဲ*

တကယ်တမ်းတွင် ရှုရန်မြောင်၏ ရင်တွင်းရေရွတ်သံများကို ကြားရုံနှင့်တင် သူက တော်ဝင်မြေးတော်ရဲ့ တမင်သက်သက် မတရားသဖြင့် အကွက်ဆင် စွပ်စွဲခြင်းကို ခံနေရရှာတာ ဖြစ်မှန်း မည်သူမဆို အလွယ်တကူ သိရှိနိုင်ပေသည်။

ရှုရန်မြောင်၏ ရင်တွင်းရေရွတ်သံများကို ကြားနိုင်စွမ်းသော စွမ်းရည်သာ မရှိခဲ့လျှင် သို့မဟုတ် ယခု စွပ်စွဲခံရသူမှာ အခြားသော သာမန်နန်းတွင်း အရာရှိတစ်ဦးဦးသာ ဖြစ်ခဲ့မည်ဆိုပါက ထိုလူမှာ ယခုအချိန်တွင် မတရားသဖြင့် နန်းတွင်း အကျဉ်းထောင်ထဲသို့ ရောက်ရှိနေလောက်ပြီ ဖြစ်၏။ ထိုနည်းတူစွာပင် ပြစ်မှုထဲတွင် အတင်းအဓမ္မ ဆွဲသွင်း ခံလိုက်ရသော အခြားသော စာစစ်မှူးချုပ်ကြီးများလည်း တူညီလှသော ဘဝပျက်ကံကြမ္မာဆိုးကြီးကိုသာ ရင်ဆိုင်ကြရပေလိမ့်မည်။ ဤကဲ့သို့သော မတရားသဖြင့် အကွက်ဆင်ကာ ဘဝဖျက်ဆီးတတ်သည့် အဖြစ်အပျက်မျိုးမှာ မင်းဆက်၏ သမိုင်းကြောင်းတစ်လျှောက်တွင်လည်း သာဓက မြောက်မြားစွာ ရှိခဲ့ဖူးပေသည်။

ထျန်းထုံ မင်းဆက်၏ တစ်ဆယ့်နှစ်နှစ်မြောက် တော်ဝင်စာမေးပွဲကြီး ကျင်းပစဉ်အခါတုန်းက နန်းတွင်းအရာရှိ 'ချန်' အမည်ရှိသူနှင့် အလွန်အမင်း ရင်းနှီးကျွမ်းဝင်လှသော စာမေးပွဲဖြေဆိုသူ ကျောင်းသားတစ်ဦး ရှိခဲ့ဖူးသည်။ ထိုကျောင်းသားသည် စာမေးပွဲမဖြေဆိုမီ ရက်ပိုင်းအလိုတုန်းက အမတ်မင်းချန်၏ နေအိမ်ဆီသို့ အကြိမ်ကြိမ် သွားရောက်လည်ပတ်ခဲ့ဖူးပေသည်။ တကယ်တမ်းတွင် တော်ဝင်စာမေးပွဲရာသီအတွင်း၌ ဤကဲ့သို့သော သွားရောက် ဂါရဝပြု လည်ပတ်ခြင်းမျိုးမှာ ပုံမှန်အားဖြင့် အလွန်အမင်း ရိုးသားပြီး ဘာအပြစ်မှ ပြောစရာ မရှိလှသော ကိစ္စရပ်တစ်ခုသာ ဖြစ်ပေသည်။ သို့သော်လည်း ပြဿနာမှာ အဆိုပါ နန်းတွင်းအရာရှိချန်သည် နောက်ပိုင်းတွင် ၎င်းတော်ဝင်စာမေးပွဲကြီး၏ စာစစ်မှူးချုပ်အဖြစ် တိုက်တိုက်ဆိုင်ဆိုင် ခန့်အပ်ခြင်း ခံလိုက်ရသည့် အခါတွင်မူ ထိုရိုးသားလှသော လည်ပတ်မှုကြီးမှာ အဓိက အရှုပ်တော်ပုံကြီးတစ်ခုအဖြစ်သို့ ပြောင်းလဲသွားခဲ့ရ တော့သတည်း။

ပြဿနာ ပိုမို၍ ဆိုးရွားသွားခဲ့ရသည်မှာ အဆိုပါ စာမေးပွဲဖြေဆိုသူ ကျောင်းသားလေးမှာ ပုံမှန်အားဖြင့် လွတ်လပ် ပေါ့ပါးစွာ နေထိုင်တတ်ပြီး ပါရမီအလွန်အမင်း ထူးချွန်ပြောင်မြောက်လှသူအဖြစ် နာမည်ကြီးသူ ဖြစ်ပေသည်။ သူသည် တော်ဝင်စာမေးပွဲကြီးတွင် မေးမြန်းမည့် မေးခွန်းခေါင်းစဉ် အတော်များများကို ကြိုတင်၍ မှန်ကန်စွာ ခန့်မှန်းနိုင်ခဲ့ပြီးနောက် သူငယ်ချင်းများအကြားတွင်လည်း ထိုအကြောင်းကို ကြွားမိခဲ့လေသည်။ တကယ်တမ်း စာမေးပွဲ ဖြေဆိုသည့်အခါတွင်မူ သူ ခန့်မှန်းခဲ့သည့် ခေါင်းစဉ်များအတိုင်း တထပ်တည်း ထွက်ပေါ်လာခဲ့ရုံတင်မက သူကိုယ်တိုင်လည်း တော်ဝင်စာမေးပွဲကြီး၏ ပထမရွှေတံဆိပ်ဆုရှင်အဖြစ် အောင်မြင်ခဲ့သဖြင့် သူ၏ သူငယ်ချင်း ဖြစ်သူက စာစစ်မှူးချုပ်ကြီးထံသို့ ငွေကြေးအမြောက်အမြား လာဘ်ထိုးပြီး မေးခွန်းများကို ကြိုတင် ပေါက်ကြား အောင် လုပ်ဆောင်ခဲ့ခြင်း ဖြစ်သည်ဟူသော ကောလာဟလ သတင်းဆိုးများမှာ တစ်နိုင်ငံလုံးအနှံ့ ပျံ့နှံ့သွားခဲ့ ရတော့သည်။

နောက်ဆုံးတွင်မူ သူ၏ သူငယ်ချင်းဖြစ်သူမှာ နန်းတွင်း အကျဉ်းထောင်ထဲသို့ ရောက်ရှိသွားခဲ့ရပြီး အဆိုပါ ကျောင်းသားလေးသည်လည်း ပြစ်မှုထဲတွင် အတင်းအဓမ္မ ဆွဲသွင်းခံလိုက်ရတော့သည်။ နန်းတွင်းအရာရှိများ၏ အကြိမ်ကြိမ် အပြင်းအထန် စစ်ဆေးမေးမြန်းမှုများအတွင်း ၎င်းတို့နှစ်ဦးစလုံးက မတရားသဖြင့် စွပ်စွဲခံရခြင်း ဖြစ်ကြောင်း အသည်းအသန် ငြင်းဆိုခဲ့ကြသော်လည်း နောက်ဆုံးတွင်မူ ၎င်းတို့၏ ရာထူးဂုဏ်ပုဒ်များနှင့် ဘွဲ့ထူး မှန်သမျှကို အဓမ္မရုပ်သိမ်းခြင်း ခံလိုက်ရရှာသည်။ ဤကိစ္စတွင် ပါဝင်ပတ်သက်သည်ဟု ယူဆခြင်းခံရသော စာစစ်မှူးချုပ်ကြီးသည်လည်း ဖမ်းဆီးထိန်းသိမ်းခြင်း ခံခဲ့ရပြီး နောက်ဆုံးတွင် ရာထူးမှ အပြီးအပြတ် ထုတ်ပယ်ခြင်း ခံလိုက်ရလေတော့သည်။

ဧကရာဇ်အိုကြီးသည် တော်ဝင်မြေးတော်အား အဓိပ္ပာယ်ပါပါဖြင့် တစ်ချက် လှည့်ကြည့်လိုက်သည်။

“အမတ် ရှုရန်မြောင်က အဲဒီနေ့ညတုန်းက ယဉ်ကျေးမှုဌာန ဒုတိယဝန်ကြီးနဲ့ လျှို့ဝှက် တွေ့ဆုံခဲ့တယ်လို့ မင်း ပြောခဲ့တယ်…”

ယခုအချိန်တွင်မူ ယဉ်ကျေးမှုဌာန ဒုတိယဝန်ကြီးသည် သူ၏ မျက်နှာပေါ်ရှိ ရှက်ပြုံးနှင့် အရှက်ရစရာ အမူအရာ မှန်သမျှကို အပြီးအပြတ် ဖျောက်ဖျက်ပစ်လိုက်ပြီး အလွန်အမင်း တည်ကြည်လေးနက်လှသော မျက်နှာထားဖြင့် ဧကရာဇ်အား အရိုအသေပြု ဦးညွှတ်လိုက်ပြီးနောက် တော်ဝင်မြေးတော်ဘက်သို့ လှည့်၍ မေးခွန်းထုတ် လိုက်တော့သည်။

“အရှင်မင်းသား၊ ကျွန်တော်မျိုးကို သေသေချာချာ ရှင်းလင်းပေးစေလိုပါတယ်၊ တော်ဝင်မြေးတော်အနေနဲ့ ကျွန်တော်မျိုးက ဘယ်နေ့၊ ဘယ်အချိန်၊ ဘယ်ညတုန်းကများ ရှုရန်မြောင်နဲ့ လျှို့ဝှက်တွေ့ဆုံခဲ့တယ်လို့ စွပ်စွဲ နေတာပါလဲ”

တော်ဝင်မြေးတော်သည် စိတ်ချလက်ချရှိလှသော လေသံဖြင့် ပြတ်သားစွာ ကြေညာလိုက်တော့သည်။

“သေချာပေါက် ခင်ဗျားရဲ့ ကိုယ်ပိုင်စံအိမ်မှာပေါ့”

ယဉ်ကျေးမှုဌာန ဒုတိယဝန်ကြီးသည် တော်ဝင်မြေးတော်အား အေးစက်စက် အကြည့်ကြီးဖြင့် စိုက်ကြည့် လိုက်တော့သည်။

“ဒါပေမဲ့ အဲဒီနေ့ညက ကျွန်တော်မျိုး တချို့သော အရေးကြီးကိစ္စရပ်တွေကြောင့် စစ်သူကြီးရဲ့ နေအိမ်မှာပဲ တစ်ညလုံး နေခဲ့တာ ဖြစ်ပါတယ်၊ အဲဒီအိမ်မှာရှိတဲ့ လူမှန်သမျှ ဒါကို သက်သေခံ ပေးနိုင်ကြပါတယ်၊ တော်ဝင် မြေးတော်ရဲ့ ရုတ်တရက် လာရောက်စွပ်စွဲမှုကြောင့်လဲ ကျွန်တော်မျိုးအနေနဲ့ စစ်သူကြီးအိမ်က အိမ်စေတွေ၊ ရေရှည် အလုပ်သမားတွေ၊ နေ့စားအလုပ်သမားတွေနဲ့ ကြိုတင်ဇာတ်တိုက်ပြီး လိမ်လည်ခွင့် မရှိခဲ့ပါဘူး၊ သူတို့ကို ရိုးရိုးရှင်းရှင်းလေး ခေါ်ယူစစ်ဆေးလိုက်ရုံတင်နဲ့တင် အမှန်တရားက ပေါ်ပေါက်လာမှာ ဖြစ်ပါတယ်”

ဧကရာဇ်သည်လည်း ဖြစ်ရပ်မှန်ကို စုံစမ်းစစ်ဆေးရန်အတွက် တော်ဝင်နန်းတွင်း ကိုယ်ရံတော်များကို စစ်သူကြီး၏ နေအိမ်ဆီသို့ ချက်ချင်း သွားရောက်စေခဲ့တော့သည်။

အတန်ကြာပြီးနောက် နန်းတွင်းကိုယ်ရံတော်များမှာ သက်သေထွက်ဆိုချက်များကို အသီးသီး သယ်ဆောင်လျက် ပြန်လည်ရောက်ရှိလာခဲ့ကြတော့သည်။

ယခုတစ်ကြိမ်တွင် သူတို့သည် စစ်သူကြီးအိမ်ရှိ အခြေခံ အလုပ်သမားများထံမှ စနစ်တကျ ကောက်ယူလာခဲ့သည့် တရားဝင် ထွက်ဆိုချက်များကို တင်ပြလာခဲ့ကြခြင်း ဖြစ်၏။

“အရှင်မင်းကြီး၊ကျွန်တော်မျိုးတို့ သက်သေထွက်ဆိုချက်တွေကို စေ့စေ့စပ်စပ် ကောက်ယူခဲ့ပါတယ် ဘုရား၊ အိမ်တော်က အလုပ်သမားတွေရဲ့ အတည်ပြုချက်အရ စစ်သူကြီးက အဲဒီနေ့ညနေတုန်းက ဧည့်သည် တစ်ယောက်ကို တကယ်ကြီး လက်ခံ ကြိုဆိုခဲ့တာ ဟုတ်ပါတယ်၊ အဲဒီဧည့်သည်ဟာ နေဝင်ရီတရော အချိန်မှာ ရောက်ရှိလာခဲ့ပြီး နောက်တစ်နေ့ အရုဏ်တက်ချိန်မှပဲ ပြန်လည်ထွက်ခွာသွားခဲ့တာ ဖြစ်ပါတယ်၊ ရှုအချိန် (ည ၇ နာရီမှ ည ၉ နာရီအတွင်း) ကျတော့ ယဉ်ကျေးမှုဌာန ဒုတိယဝန်ကြီး အထူးနှစ်သက်တတ်တဲ့ ဟင်းလျာအချို့ကို တကူးတက ပြင်ဆင်ချက်ပြုတ်ခိုင်းခဲ့ပါတယ်၊ အဲဒီဟင်းတွေက ဒုတိယဝန်ကြီးအနေနဲ့ နန်းတွင်း တော်ဝင် ပွဲတော်တွေတုန်းကလဲ အမြဲတမ်း ရွေးချယ်သုံးဆောင်လေ့ရှိတဲ့ ဟင်းတွေ ဖြစ်ပါတယ်၊ ညဉ့်နက်သန်းခေါင်ယံ အချိန်တွေမှာ အိပ်ဆောင်နားကနေပြီးတော့ ရေသောက်ချင်လို့ဆိုပြီး အကြိမ်ကြိမ် အော်ဟစ်တောင်းဆိုသံတွေ ထွက်ပေါ်ခဲ့ဖူးတယ်လို့ ထွက်ဆိုကြပါတယ် ဘုရား”

တော်ဝင်မြေးတော်သည် ခဏမျှ အူကြောင်ကြောင် ဖြစ်သွားခဲ့ရပြီးမှ ဘာမှနားမလည်သည့် လေသံဖြင့် မေးမြန်းလိုက်တော့သည်။

“နေပါဦး… ညဉ့်နက်သန်းခေါင်ယံမှာ အကြိမ်ကြိမ် ရေတောင်းတယ်ဆိုတာက ဘာအဓိပ္ပာယ်လဲ”

*အေးလေ၊ အဲဒါက ဘာအဓိပ္ပာယ်ကြီးမို့လို့လဲ၊ ဟားဟားဟား*

“အဲ့ဒါက အရေးမကြီးပါဘူး”

ဒုတိယဝန်ကြီးသည် စကားသံ ပေါက်ကြားသွားမည်ကို စိုးရိမ်သဖြင့် အလောတကြီးဖြင့် ကြားဖြတ်ကာ အော်ဟစ် လျှောက်တင်လိုက်တော့သည်။

“ကျွန်တော်မျိုးကို အမှန်ကန်ဆုံး စီရင်ချက် ချမှတ်ပေးပါရန် တောင်းပန်အပ်ပါတယ် အရှင်မင်းကြီး၊ ကျွန်တော်မျိုး အဲဒီနေ့ညတုန်းက ကိုယ်ပိုင်နေအိမ်မှာ လုံးဝရှိမနေခဲ့ဘဲ တခြားနေရာတစ်ခုမှာ အလုပ်ကိစ္စတွေနဲ့ အသည်းအသန် အလုပ်ရှုပ်နေခဲ့တာ ဖြစ်ပါတယ်၊ ကျွန်တော်မျိုးက ဘယ်လိုနည်းနဲ့များ ရှုရန်မြောင်နဲ့ လျှို့ဝှက် တွေ့ဆုံနိုင်ပါ့မလဲ ဘုရား”

“စစ်သူကြီးကိုယ်တိုင် ဒီမတရားမှုထဲမှာ အတူတူ ပူးပေါင်းပါဝင်နေခဲ့တာမျိုး မဖြစ်နိုင်ဘူးလား”

တော်ဝင်မြေးတော်သည် မိမိအပေါ်သို့ ကျရောက်လာနေသော အခြေအနေဆိုးကြီးကို လုံးဝဂရုမစိုက်ဘဲ ဇွတ်မှိတ်၍ ထပ်မံ အကြံပြု စွပ်စွဲလိုက်ပြန်သည်။

စစ်သူကြီးကမူ ထိုစကားကို ကြားလိုက်ရသောအခါ နှာခေါင်းတစ်ချက် ရှုံ့လျက် ရယ်မောလိုက်တော့သည်။

“အဲဒီနေ့ညတုန်းက ကျွန်တော်မျိုးက ယဉ်ကျေးမှုဌာနက ဒုတိယဝန်ကြီးနဲ့ အိပ်ရာတစ်ခုတည်းမှာ အတူတူ လှဲလျောင်း နေခဲ့တာ ဖြစ်ပါတယ်၊ ဒါကြောင့်မို့လို့ တခြားဘယ်သူနဲ့မှ သွားရောက်တွေ့ဆုံဖို့အတွက် အချိန်ကို လုံးဝ မရှိခဲ့ပါဘူး”

လက်ရှိတွင် နန်းတွင်းညီလာခံတစ်ခုလုံး၌ မိမိတို့နှစ်ဦး၏ အတိတ်က ‘မင်္ဂလာဆောင် ခုနစ်ကြိမ်၊ နာရေး ခြောက်ကြိမ်’ အရှုပ်တော်ပုံ ကောလာဟလ သတင်းဆိုးကြီးတစ်ခုလုံး ဗြောင်ကျကျ ပျံ့နှံ့သွားခဲ့ပြီ ဖြစ်ရာ စစ်သူကြီးအနေဖြင့် ဘာမှထိန်ချန်ထားစရာမလိုတော့ဘဲ တစ်ခါတည်း ဗြောင်ကျကျ ထုတ်ဖော် ပြောဆို ပစ်လိုက်ခြင်းက ပိုပြီး အကျိုးရှိလိမ့်မည်ဟု တွေးတောလိုက်ခြင်း ဖြစ်ပေသည်။

အကယ်၍ အခြားသော ပြစ်မှုစွပ်စွဲချက်များသာ ဖြစ်ခဲ့မည်ဆိုပါက တော်ဝင်မြေးတော်အနေဖြင့် ဇာတ်လမ်းကို လိုသလို လှည့်ပတ်ပြောဆိုနိုင်ဦးမည် ဖြစ်သော်လည်း ယခုကဲ့သို့သော ထိပ်တန်းကိုယ်ရေးကိုယ်တာ အခြေအနေ မျိုးနှင့် ကြုံတွေ့လိုက်ရသည့်အခါတွင်မူ…

တော်ဝင်မြေးတော်သည် မျှော်လင့်ချက်ကင်းမဲ့စွာဖြင့် သူ၏ မျက်ဝန်းအစုံကို ခဏမျှ မှိတ်ချလိုက်မိတော့သည်။

“ခင်ဗျားတို့ သုံးယောက်စလုံး တစ်နေရာတည်းမှာ ဆုံတွေ့ပြီး လျှို့ဝှက်ပူးပေါင်း ကြံစည်နေခဲ့ကြတာလည်း ဖြစ်နိုင်တာပဲ”

ဧကရာဇ်သည် ချက်ချင်းပင် မျက်မှောင်ကြုတ်လိုက်မိသည်။

“ကောင်းချီရှန်း၊ အဓိပ္ပာယ် မရှိတာတွေ ပြောမနေနဲ့”

ဧကရာဇ်က ဆက်လက်မိန့်ကြားလိုက်ပြန်သည်။

“ဒီကိစ္စကို နောက်ထပ် ထပ်ပြီး စုံစမ်းစစ်ဆေးနေစရာ အကြောင်းမရှိတော့ဘူး၊ မင်းဘက်က တင်ပြလာတဲ့ မဟုတ် မမှန်တဲ့ မတရားစွပ်စွဲချက်တစ်ခုကို ဖော်ထုတ်နိုင်ခဲ့ပြီးပြီဆိုကတည်းက ကျန်တဲ့ စွပ်စွဲချက်တွေ အားလုံး ဘာအခြေအမြစ်မှမရှိဘဲ လျှောက်ပြီး လုပ်ကြံဖန်တီးထားတာတွေ ဖြစ်တယ်ဆိုတာ ရှင်းနေတာပဲ”

မျှော်လင့်ချက် ကင်းမဲ့လုနီးပါး ဖြစ်သွားခဲ့ရရှာသော တော်ဝင်မြေးတော်သည်လည်း မျက်နှာပြောင်တိုက်လျက် တန်ပြန် လျှောက်တင်လိုက်တော့သည်။

“ဒါပေမဲ့ ရှုရန်မြောင်က တော်ဝင်စာမေးပွဲကြီးတုန်းက သူကိုယ်တိုင် ရေးသားဖြေဆိုခဲ့တဲ့ ပြောင်မြောက်လှတဲ့ စကားလုံးတွေကို ယခုအချိန်မှာ လုံးဝ ပြန်မရေးပြနိုင်တာ အမှန်ပါပဲ၊ ကျွန်တော်မျိုး မေးခွန်း တစ်ခုတည်း မေးပါရစေ၊ သူ တကယ်ကြီး မခိုးချခဲ့ဘူးဆိုရင် ဘာဖြစ်လို့ အဲဒီစာတွေကို အခုအချိန်မှာ တစ်ခါမျှ ပြန်မရေးပြ နိုင်ရတာလဲ”

ဧကရာဇ်က အေးစက်စက် လေသံဖြင့် ပြန်လည်တုံ့ပြန်လိုက်တော့သည်။

“သူ့ကို ပြန်မရေးပြနိုင်ဘူးလို့ ဘယ်သူက ပြောတာလဲ”

[ငါ ခိုးမချခဲ့ပင်မယ့် တကယ် ပြန်မရေးပြနိုင်ဘူး]

ရှုရန်မြောင်၏ ရင်ထဲကနေ အသည်းအသန် ငြင်းဆန်ကန့်ကွက်နေမှုများကို လုံးဝဥဿုံ လျစ်လျူရှုက ဧကရာဇ်သည် တီးတိုး၍ အမိန့်အချို့ ပေးလိုက်တော့သည်။ ခဏအကြာတွင်မူ တော်ဝင်နန်းတွင်း ကိုယ်ရံတော်များသည် စာရေး စားပွဲတစ်ခု၊ ခုံတန်းနိမ့်တစ်ခုနှင့် စာရေးကိရိယာ အစုံအလင်ကို ညီလာခံအလယ်သို့ သယ်ဆောင်၍ ချထားပေး လိုက်ကြတော့သည်။

ဖြစ်စဉ်တစ်ခုလုံး မျှတပွင့်လင်းမှု ရှိစေရန်အတွက် သူတို့သည် မည်သည့်စာသားမျှ ရေးသားထားခြင်းမရှိသော စက္ကူအလွတ်ကြီးကို တော်ဝင်မြေးတော်အပါအဝင် နန်းတွင်း၌ ရှိနေကြသော ဝန်ကြီးအမတ်များအားလုံး မြင်တွေ့နိုင်စေရန် အပေါ်သို့ မြှောက်၍ ပြသခဲ့ကြပြီးမှ ရှုရန်မြောင်၏ လက်ထဲသို့ လွှဲပြောင်းပေးအပ်လိုက်ကြသည်။

စစ်သူကြီး၏ မျက်နှာပေါ်တွင်မူ အံ့ဩတုန်လှုပ်သွားသည့် အရိပ်အယောင်တစ်ခု ဖြတ်သန်းသွားခဲ့ရသည်။ သူသည် တိုးတိုးလေး ရေရွတ်လိုက်မိတော့သည်။

“ဧကရာဇ်မင်းကြီး ဘာတွေ တွေးတောနေတာလဲ၊ ရှုရန်မြောင်က ဒီစာတွေကို ဘယ်လိုနည်းနဲ့များ ပြန်ပြီး ရေးသားနိုင်ပါ့မလဲ၊ သူက မကြာသေးခင်ကမှ ညာဉ်ရေးရာ ပိတ်ဆို့မှု လျှို့ဝှက်ချက်ကနေ ပေါ်လာခဲ့တာလေ”

အဆိုပါ ညာဉ်ရေးရာ ပိတ်ဆို့မှု လျှို့ဝှက်ချက်ဆိုသည်မှာ ဟိုးရှေးယခင်ကတည်းက ဝိညာဉ်ရေးရာပိုင်း၌ အထူး ယုံကြည် စွဲလမ်းခဲ့ကြသော အယူအဆတစ်ခု ဖြစ်ပေသည်။ ဘုရားလောင်းများ သို့မဟုတ် ရဟန္တာအရှင်မြတ်များကပင် လူ့လောကထဲသို့ တစ်ကျော့ပြန် ဝင်စားကြသည့်အခါတွင် အတိတ်ဘဝက အမှတ်သညာများနှင့် ပါရမီထူးများကို ခေတ္တမျှ မေ့လျော့သွားတတ်ကြသကဲ့သို့ပင် သာမန်လူသားများထဲကမှ ထူးခြားဆန်းပြားလှသော ကံကြမ္မာ အလှည့် အပြောင်းနှင့် မွေးဖွားလာခဲ့ကြသူများသည်လည်း မွေးဖွားပြီးစ အရွယ်တွင် မိမိတို့၏ ထူးခြားလှသော စွမ်းရည်များနှင့် အသိပညာ ဗဟုသုတများအပေါ် ခေတ္တခဏမျှ မှုံဝါးပိတ်ဆို့နေသော အခြေအနေဆိုးမျိုးကို ခံစားရလေ့ရှိသည်ဟု အလေးအနက် ယုံကြည်ထားကြသောကြောင့် ဖြစ်ပေသတည်း။

ယဉ်ကျေးမှုဌာန ဝန်ကြီးချုပ်သည် အခြေအနေတစ်ခုလုံးကို သေသေချာချာ သုံးသပ်ကြည့်လိုက်ပြီးနောက် တိုးတိုးလေး ရေရွတ်လိုက်မိတော့သည်။

“အရှင်မင်းကြီးက တကယ့်ကို လောဘကြီးလှပါပေတယ်၊ သူဟာ ရှုရန်မြောင်ဆီကနေ ရရှိနိုင်မယ့် ပိုင်ကျီ နတ်သားရဲ့ မင်္ဂလာအပေါင်းကိုလည်း လိုချင်သလို၊ တစ်ဖက်မှာလည်း သူ့ရဲ့ ဂုဏ်သတင်းကျော်စောမှုကိုလည်း အပြစ်အနာအဆာ မရှိစေချင်ဘူး၊ ကြည့်ရတာ သူ ဒီစက္ကူအလွတ်ကြီးပေါ်မှာ ကြိုတင်ပြီးတော့ တစ်ခုခု ထည့်ထားခဲ့တာ သေချာတယ်”

တစ်ချိန်တည်းမှာပင် ရှုရန်မြောင်မှာမူ မိမိ၏ လက်ထဲ၌ စုတ်တံကို တင်းတင်းကြပ်ကြပ် ဆုပ်ကိုင်ထားမိရင်း စိုးရိမ်စိတ်ကြောင့် လက်ကောက်ဝတ်တစ်ခုလုံး တောင့်တင်းလို့ နေခဲ့ရရှာသည်။

ဘေးနားရှိ တော်ဝင်မြေးတော်သည် သူ၏ ရင်ထဲ၌ မောက်မာဝင့်ကြွားမှုများနှင့် ရလဒ်ကောင်းကို စိတ်ချလက်ချ ယုံကြည်နေမှုများ အပြည့်အဝဖြင့် ရှုရန်မြောင်၏ လှုပ်ရှားမှုမှန်သမျှကို တစိုက်မတ်မတ် စိုက်ကြည့် နေခဲ့တော့သည်။