အခန်း ၁၆၃

အခန်း (၁၆၃) - ဟူလူရှီပိုင်

ဟွိုင်တောင်တန်းသို့ သွားရာခရီးသည် တစ်ပတ်ခန့် ကြာမြင့်ခဲ့လေသည်။

ထိုနေရာသည် ဗဟိုသယ်ယူပို့ဆောင်ရေးစခန်းထက်ပင် ပိုမိုဝေးကွာသောနေရာတွင် ရှိချေသည်။

ရှည်လျားပြီး ပင်ပန်းလှသောခရီးစဉ်ကြောင့် တပည့်တစ်ရာခန့်၏ စိတ်ဓာတ်များမှာ အနည်းငယ် ကျဆင်းလာခဲ့ရသည်။

အချို့မှာ တစ်ဦးနှင့်တစ်ဦး စိတ်မရှည်ဖြစ်ကာ အချင်းများလာကြလေသည်။

အမှန်စင်စစ် ၎င်းတို့သည် ယခင်ကတည်းက ရင်းနှီးကျွမ်းဝင်ကြသူများ မဟုတ်ပေ။

လင်းဖန်၏အဖွဲ့မှာမူ အဖွဲ့ဝင်တိုင်းတွင် ရှင်းလင်းသော ရည်မှန်းချက်ကိုယ်စီရှိကြသဖြင့် အတော်လေး ငြိမ်းချမ်းနေပေသည်။

ထို့ပြင် လင်းဖန်၏ အပြတ်အသတ်သာလွန်သော ခွန်အားကြောင့်လည်း မည်သူမျှခေါင်းထောင်ရန် မဝံ့ရဲကြချေ။

နောက်ဆုံးတွင် စစ်တပ်စခန်းအနီးသို့ ရောက်ရှိလာသောအခါ လူတိုင်းသည် တာဝန်ကို စတင်လိုစိတ် ပြင်းပြနေကြသဖြင့် အနားယူရန် သို့မဟုတ် အင်အားပြန်လည်စုစည်းရန်ပင် ဂရုမစိုက်ကြတော့ပေ။

တာဝန်တစ်ခုလုံးကို ဦးဆောင်သူဖြစ်သည့် ချင်ဖုန်းဂိုဏ်းမှ စီနီယာတပည့်တစ်ဦးက အကြံပြုလိုက်သည်။

“ကျွန်တော်ကတော့ ဒီနေ့ အနားယူပြီး ညဘက်ကျမှ တိုက်ခိုက်ဖို့အကြံပြုချင်တယ်... ကျွန်တော်တို့အသာစီးရဖို့အတွက် အခြေအနေကို အရင်ဆုံး စူးစမ်းလေ့လာပြီး အစီအစဉ်ဆွဲရမယ်...”

သို့သော် အခြားအဖွဲ့များမှ တပည့်များက ထိုအကြံပြုချက်ကို သဘောမကျကြချေ။

၎င်းတို့အမြင်တွင် ထိုစစ်သားများမှာ အလွယ်တကူ နှိမ်နင်းနိုင်မည့်သူများသာဖြစ်ပြီး ဤစီနီယာတပည့်က အဘယ်ကြောင့် ဤမျှအထိ သတိကြီးနေရသည်ကို နားမလည်နိုင်ကြပေ။

လင်းဖန်က ဝင်ပြောလိုက်သည်။

“ကျွန်တော်လည်း ဂိုဏ်းတူအစ်ကိုကြီးရဲ့ အမြင်ကို သဘောတူတယ်...”

ထိုအခါမှသာ အခြားတပည့်များမှာ ငြိမ်ကျသွားကြလေသည်။

လင်းဖန်နှင့် သူ၏အဖွဲ့သည် စစ်သားများနှင့်ရင်ဆိုင်ဖူးသည့် အတွေ့အကြုံအရှိဆုံးဖြစ်သဖြင့် လင်းဖန်၏စကားမှာ ပိုမိုလေးနက်မှုရှိပေသည်။

အခြားတပည့်များ၏ ယခင်တာဝန်များမှာ ချွမ်မင်းဆက်အတွင်း ပုန်ကန်မှုများကိုနှိမ်နင်းရန်နှင့် ငြိမ်းချမ်းရေး ထိန်းသိမ်းရန်သာ ဖြစ်ခဲ့ကြသည်။

၎င်းတို့သည် မလိုလားသော်လည်း သဘောတူလိုက်ကြရသည်။

ဤအခြေအနေက ပတ်ဝန်းကျင်ကိုစူးစမ်းရန်နှင့် သတင်းအချက်အလက်အချို့ကို စုဆောင်းရန် အချိန်ရရှိစေခဲ့သည်။

စစ်တပ်စခန်းမှာ ဗလာကျင်းနေပုံရပြီး လူတစ်ဦးတစ်ယောက်မျှ မတွေ့ရချေ။ ၎င်းမှာ သူတို့ မမျှော်လင့်ထားသော အခြေအနေတစ်ခုပင် ဖြစ်သည်။

တာဝန်ဦးဆောင်သူက ပြောလိုက်သည်။

“ဒါက ထောင်ချောက် ဟုတ်မဟုတ်သိရအောင် ရှေ့ပြေးအဖွဲ့တစ်ဖွဲ့ကို အရင်လွှတ်ပြီး စစ်ဆေးခိုင်းရမယ်...”

နောက်ဆုံးတွင် ၎င်းတို့သည် မိုးကြိုးလက်သီးဂိုဏ်းမှ တပည့်များပါဝင်သော အဖွဲ့တစ်ဖွဲ့ကို စေလွှတ်ရန် ဆုံးဖြတ်လိုက်ကြသည်။

လင်းဖန်နှင့် ကျန်ရှိသူများမှာမူ နောက်ကွယ်တွင်စောင့်ဆိုင်းရင်း အရေးပေါ်အခြေအနေများအတွက် အသင့်ပြင်ထားကြလေသည်။

စစ်တပ်စခန်းသည် တောင်ကြားအလယ်တွင် တည်ဆောက်ထားသော ရဲတိုက်ငယ်တစ်ခုနှင့်တူပြီး ဘေးပတ်လည်တွင် ဧရာမ ကျောက်ဆောင်နံရံကြီးများ ရှိနေသည်။

ထို့ကြောင့် ဤနေရာသည် မြောက်ဘက်သို့သွားရာ တစ်ခုတည်းသောလမ်းကြောင်း ဖြစ်ချေသည်။

မိုးကြိုးလက်သီးဂိုဏ်းမှလူများ ဝင်ရောက်သွားသည်ကို လင်းဖန်နှင့် ကျန်ရှိသူများက စောင့်ကြည့်နေကြသည်။ ၎င်းတို့ စစ်တပ်စခန်း၏ ဧရာမတံခါးကြီးဆီသို့ ရောက်ရှိသွားချိန်တွင် ပတ်ဝန်းကျင်တစ်ခုလုံး ခြောက်ခြားဖွယ်ကောင်းလောက်အောင် တိတ်ဆိတ်နေပေသည်။

ကျွီ...

ဧရာမတံခါးကြီးများ ပွင့်ဟသွားပြီး မိုးကြိုးလက်သီးဂိုဏ်းမှတပည့်များ အတွင်းသို့ဝင်ရောက်သွားသည်နှင့် နံရံများပေါ်မှ ဧရာမကျောက်တုံးကြီးများ ပြိုကျလာခဲ့လေသည်။

ညီညာသောခြေသံများ ထွက်ပေါ်လာပြီးနောက် နောက်ဆုံးတွင် မိုးကြိုးလက်သီးဂိုဏ်း တပည့်များ၏ စူးရှသောအော်ဟစ်သံများ ထွက်ပေါ်လာသည်။

“ခြုံခိုတိုက်ခိုက်တာပဲ...”

“တကယ့်ကို ယုတ်မာလွန်းတယ်...”

အော်ဟစ်သံများကို ကြားလိုက်ရသောအခါ အခြားတပည့်များမှာ မအောင့်အီးနိုင်ကြတော့ဘဲ စစ်တပ်စခန်းဆီသို့ အလုအယက် ပြေးဝင်သွားကြတော့သည်။

တာဝန်ဦးဆောင်သူက တားဆီးရန် ကြိုးစားသော်လည်း အချည်းနှီးသာ။

အမှန်စင်စစ် ၎င်းတို့သည် စနစ်တကျ လေ့ကျင့်ထားသော စည်းကမ်းရှိသည့်စစ်သားများ မဟုတ်ကြပေ။

တိုက်ပွဲတွင် ပါဝင်လိုစိတ်ပြင်းပြနေသည့် လိုင်မင်က မေးလိုက်သည်။

“ဒါဆို ကျွန်တော်တို့ ဘာကို စောင့်နေကြတာလဲ... ကျွန်တော်တို့ရဲ့ စွမ်းရည်ကို ပြရမယ့်အချိန်ပဲ...”

လိုင်ချင်းက မျက်လုံးစောင်းထိုးကြည့်ကာ ပြောလိုက်သည်။

“မင်း ဘာမှ သင်ခန်းစာမရသေးဘူးလား... ဒီခြုံခိုတိုက်ခိုက်မှုရဲ့ နောက်ကွယ်မှာ တစ်ယောက်ယောက်ရှိနေတာ... ငါတို့က အဲဒီလူကို အရင် သုတ်သင်ရမယ်...”

လင်းဖန်က စစ်တပ်စခန်း၏နံရံပေါ်တွင် ရပ်နေသောလူတစ်စုကို ညွှန်ပြလိုက်သည်။

“လိုင်ချင်း ပြောတာမှန်တယ်... ဟိုမှာ ကျွန်တော်တို့ရဲ့ ပစ်မှတ်...”

၎င်းတို့သည် ထန်ရှောင်ယောင်၏ စစ်သားများကဲ့သို့ ဝတ်ဆင်ထားခြင်းမရှိဘဲ သားရေများစွာပါရှိသော အဝတ်အစားများကိုသာ ဝတ်ဆင်ထားကြသည်။

ထိုသို့ ထူးဆန်းသော လူခြောက်ယောက်ရှိနေပြီး လင်းဖန်၏အဖွဲ့ဝင်များက မည်သူ့ကို တိုက်ခိုက်မည်ဖြစ်ကြောင်း အသီးသီးခွဲဝေလိုက်ကြသည်။

“ဘယ်ဘက်က နှစ်ယောက်ကို ကျွန်တော်တို့ဆီသာ ထားလိုက်...”

လင်းဖန်မှာမူ အဖွဲ့၏ခေါင်းဆောင်ဟု ထင်ရသော အလယ်မှလူနှင့် ရင်ဆိုင်ရန်မှတစ်ပါး အခြားရွေးချယ်စရာမရှိချေ။

အားလုံး အဆင်သင့်ဖြစ်သည်နှင့် ၎င်းတို့သည် ပြေးလွှားကာ နံရံပေါ်သို့ ခုန်တက်လိုက်ကြလေသည်။

လင်းဖန်တို့အဖွဲ့ ချဉ်းကပ်လာသည်ကို မြင်သောအခါ ဟူလူရှီပိုင်က အော်ဟစ်ရယ်မောလိုက်သည်။

“ဟားဟား... မယုံနိုင်စရာပဲ... ဒီလူကြောက်တွေထဲမှာ ဦးနှောက်ရှိတဲ့ကောင်တွေ ပါလာတာပဲ...”

သူ၏ လက်အောက်ငယ်သားများက ပြောဆိုကာ လင်းဖန်၏ အဖွဲ့ထံသို့ တိုက်ရိုက် ပြေးဝင်သွားကြသည်။

“သူတို့ကို ကျွန်တော်တို့ လက်စသတ်လိုက်မယ်...”

ကျောက်ကျားရွေ့သည် သူမ၏ရိမေဓားသိုင်းဖြင့် လျင်မြန်ဆန်းကြယ်ပြီး ရက်စက်လှသော တိုက်ကွက်များကို အသုံးပြုကာ တိုက်ခိုက်လေသည်။

သူမ၏ ဓားသွားသည် အလွန်ရုတ်တရက်ဆန်သော အချိန်များတွင် လမ်းကြောင်းပြောင်းလဲသွားသဖြင့် ရန်သူကို အံ့အားသင့်စေသည်။

ဟိုမင်သည် သူ၏ ဓားနှစ်လက်ကိုအသုံးပြုကာ ဧရာမဓားကောက်ကြီးအား ကိုင်ဆောင်ထားသောရန်သူနှင့် အပြင်းအထန် လုံးထွေးတိုက်ခိုက်နေသည်။

လိုင်ညီအစ်ကိုသည် ညီညီညွတ်ညွတ်ဖြင့် ပူးပေါင်းဆောင်ရွက်ကာ ၎င်းတို့၏ ရန်သူကို ပြင်းထန်စွာ ဖိအားပေး တိုက်ခိုက်နေကြသည်။

ဟူထော်မှာမူ ထုံးစံအတိုင်း တိတ်ဆိတ်နေပြီး သူ၏ရန်သူကို အလွန်အမင်းသတိကြီးစွာဖြင့် ရင်ဆိုင်နေပေသည်။

လင်းဖန်က ဟူလူရှီပိုင်ထံသို့ လျှောက်လှမ်းသွားရင်း ပြောလိုက်သည်။

“မင်း ဘယ်ကို ကြည့်နေတာလဲ... မင်းရဲ့ ရန်သူက ငါ...”

သူ၏ စိတ်အာရုံထဲတွင် ရင်းနှီးသော အသံတစ်ခု ထွက်ပေါ်လာသည်။

[ဒင်]

[ယုတ်မာသော ရည်ရွယ်ချက်ရှိသည့် ဝိညာဉ် ချဉ်းကပ်လာနေသည်ကို ရှာဖွေတွေ့ရှိပါသည်။]

[ကလဲ့စားချေအမှတ် ၄၀၀ ရရှိရန် ယုတ်မာသော ရည်ရွယ်ချက်ရှိသူကို သုတ်သင်ပါ]

လင်းဖန်သည် ကလဲ့စားချေအမှတ်များကို ကြည့်ကာ ပိုမိုသတိကြီးသွားလေသည်။

ဤဟူလူရှီပိုင်သည် အမြုတေဖွဲ့စည်းခြင်းအဆင့်သို့ ရောက်ရှိနေသူ ဖြစ်နိုင်ချေ ရှိပေသည်။

အရပ်နှစ်မီတာခန့်မြင့်မားသော ဟူလူရှီပိုင်သည် လင်းဖန်ကိုငုံ့ကြည့်ကာ အချိန်ဆွဲမနေဘဲ သူ၏ ဓားကောက်ကို ဆွဲထုတ်လိုက်သည်။

ထိုဓားကောက်သည် တောက်ပသော နေရောင်အောက်တွင် နီရဲသောအလင်းတန်းများဖြင့် တောက်ပနေပေသည်။

ဒုန်း… ဒုန်း... ဒုန်း…

ဟူလူရှီပိုင်၏ ဓားခုတ်ချက်နှင့်အတူ ဒုန်းစိုင်းပြေးလွှားနေသော မြင်းအုပ်ကြီးတစ်အုပ် လင်းဖန်ထံသို့ ဦးတည်ပြေးဝင်လာခဲ့လေသည်။

၎င်းတို့သည် တောက်လောင်နေသော မီးတောက်များအသွင်ရှိပြီး ပတ်ဝန်းကျင်၏အပူချိန်မှာ ချက်ချင်းမြင့်တက်သွားကာ လမ်းကြောင်းတစ်လျှောက်ရှိ အရာအားလုံးကို ပြာကျစေတော့မည့်အလား ပူပြင်းလှပေသည်။

လင်းဖန်သည် သူ၏ သံတူတစ်စုံကိုထုတ်ယူကာ ထိုမြင်းအုပ်ဆီသို့ အရှိန်ပြင်းစွာ ရိုက်ချလိုက်သည်။

ဒုန်း...

သံတူများက မြင်းများကိုထိမှန်သွားသောအခါ ၎င်းတို့သည် ချက်ချင်းပင် ပျောက်ကွယ်သွားကြလေသည်။

သံတူ၏ အနားသတ်များတွင်ပါရှိသော ဟင်းလင်းပြင်သံမဏိသည် ဒြပ်စင်တိုက်ခိုက်မှုအားလုံးကို ပျက်ပြယ်စေနိုင်စွမ်း ရှိသောကြောင့်ပင်။

ဟူလူရှီပိုင်သည် လင်းဖန်က သူ၏တိုက်ကွက်ကို ဤမျှအလွယ်တကူ ဖြေရှင်းနိုင်လိမ့်မည်ဟု မမျှော်လင့်ထားပေ။

သူသည် ချက်ချင်းပင် တိုက်ခိုက်ရေးဗျူဟာကို ပြောင်းလဲလိုက်လေသည်။

သူသည် ဓားကောက်ကိုအသုံးပြုကာ လင်းဖန်ထံသို့ တောက်ပသော အနီရောင်ဓားလှိုင်းတစ်ခုကို ပစ်လွှတ်လိုက်သည်။

လင်းဖန်သည် သဏ္ဍာန်မဲ့ခြေလှမ်းစွမ်းရည်ကို အသုံးပြုလိုက်သဖြင့် ထိုဓားလှိုင်းသည် သူ၏ ခန္ဓာကိုယ်ကို ဖောက်ထွက်သွားခဲ့လေသည်။

ဝုန်း...

လင်းဖန်သည် ဆက်တိုက်ခုန်ပျံခြင်းစွမ်းရည်ကို အသုံးပြုကာ ဟူလူရှီပိုင်၏ ရှေ့တည့်တည့်သို့ ရောက်ရှိသွားသည်။

သူသည် အချိန်ဆွဲမနေဘဲ သံတူများကို ဟူလူရှီပိုင်၏မေးစေ့ဆီသို့ ပင့်တင်ရိုက်လိုက်လေသည်။

ဒုန်း...

၎င်းသည် ဟူလူရှီပိုင်၏မေးစေ့ကို ထိမှန်သွားသော်လည်း ထိခိုက်ဒဏ်ရာ ကြီးကြီးမားမား ရရှိစေခြင်းမရှိပေ။

ဟူလူရှီပိုင်သည် ဧရာမလက်ဝါးကြီးဖြင့် လင်းဖန်၏ လည်ပင်းကိုညှစ်ကာ မျက်လုံးချင်းဆုံသည်အထိ မြှောက်တင်လိုက်သည်။

ထို့နောက် သူသည် ဓားကောက်ဖြင့် လင်းဖန်၏ဝမ်းဗိုက်ဆီသို့ အားအားပြင်းပြင်းဖြင့် ထိုးစိုက်လိုက်လေသည်။

ဇွပ်...