အခန်း ၁၆၈

အခန်း (၁၆၈) - ရွှေနှင့် ငွေ

သူ့ထံသို့ ဦးတည်ပြေးဝင်လာနေသော မြွေအုပ်ကြီးကို မြင်လိုက်ရသောအခါ လင်းဖန်၏မျက်လုံးများ ပြူးကျယ်သွားရချေသည်။

၎င်းတို့က သူ့ကိုကိုက်ခဲရန် ကြိုးစားကြသော်လည်း အရေပြားကို ဖောက်ဝင်အောင် မကိုက်နိုင်ကြချေ။

သူသည် လက်ကောက်နှစ်ကွင်းကို လျင်မြန်စွာထုတ်ယူလိုက်ပြီး မြွေများကို သိုလှောင်ရေးရတနာအတွင်းသို့ တတ်နိုင်သမျှ အများဆုံး ထည့်သွင်းလိုက်တော့သည်။

လင်းဖန်သည် အစောပိုင်းက သူတွေ့ခဲ့သောအဘိုးအိုကို စိတ်ထဲမှ ကျေးဇူးတင်မိလေသည်။

၎င်းမှာ တောင်းဆိုသည့်အတိုင်း ရရှိလာသကဲ့သို့ပင်။

လင်းဖန်အနီးသို့ ရောက်သွားသည်နှင့် မြွေများ ပျောက်ကွယ်သွားသည်ကို မြင်လိုက်ရသဖြင့် အခြားအဖွဲ့ဝင်များမှာ ကြောင်အမ်းသွားကြသည်။

၎င်းတို့အတွက်မူ မြွေများကို ရင်ဆိုင်ဖြေရှင်းရန် အလုပ်ရှုပ်နေကြရသည်။

ဟိုမင်သည် သူ၏ လေပွေတိုက်ကွက်ကိုအသုံးပြုကာ မြွေများကို ဆွဲဖြဲပစ်လိုက်ပြီး လေပွေဖြတ်သန်းသွားရာ လမ်းကြောင်းတစ်လျှောက်တွင် သွေးချင်းချင်းနီသော လမ်းစတစ်ခု ကျန်ရစ်ခဲ့လေသည်။

လိုင်ညီအစ်ကိုမှာ ဘေးချင်းယှဉ်ရပ်လျက် မြွေများကိုခုခံကာကွယ်ရန် ၎င်းတို့၏ ကျားနှင့် ကြိုးကြာသိုင်းကို အသုံးပြုနေကြသည်။

ဟူထော်၏ခန္ဓာကိုယ်မှာ တောက်ပသော ဝါရောင်အလင်းတန်းများ ထွက်ပေါ်နေပြီး ကြေးရုပ်တုကြီးတစ်ခုကဲ့သို့ ဖြစ်နေချေသည်။

ထိုအရာက မြွေများ၏ကိုက်ခဲမှုကို အမှန်တကယ်ပင် ခံနိုင်ရည်ရှိစေသည်။

ကျောက်ကျားရွေ့သည် သူမ၏ ရိမေဓားသိုင်းကို အသုံးပြုကာ ဓားကိုစက်ဝိုင်းပုံသဏ္ဌာန် ဝှေ့ယမ်းလိုက်ပြီး မြွေများကို လွင့်စင်သွားစေသည်။

ရှန်းရွေ့သည် သူ၏ မိုးကြိုးမုန်တိုင်းလက်သီးသိုင်းနည်းစနစ်ကို အသုံးပြုကာ ပြင်းထန်သောလက်သီးချက်များဖြင့် မြွေများကို လွင့်ထွက်သွားစေလေသည်။

နောက်ဆုံးတွင် မြွေအားလုံးကို ရှင်းလင်းလိုက်နိုင်ပြီ ဖြစ်သည်။

လိုင်မင်က သူ၏ ချီစွမ်းအင် အတော်များများ ကုန်ဆုံးသွားသဖြင့် ပြောလိုက်သည်။

“ခဏလေး... ကျွန်တော် အရင်ဆုံး ချီစွမ်းအင်ပြန်ဖြည့်ဖို့လိုတယ်...”

ကျောက်ကျားရွေ့က တင်ပျဉ်ခွေ ထိုင်လိုက်ရင်း ပြောလိုက်သည်။

“ကျွန်မလည်း တူတူပဲ...”

လင်းဖန်က ခေါင်းညိတ်လိုက်ပြီး သွေးနှင့်ချီ ပြန်လည်အားဖြည့်ဆေးလုံးများကို သောက်သုံးလိုက်ရာ ဟိုမင်ကလည်း လိုက်လံသောက်သုံးလေသည်။

စွမ်းရည်ချင်းကွာခြားမှုရှိနေသဖြင့် အားနည်းသောအဖွဲ့ဝင်များကို ကူညီစောင့်ရှောက်ရန် စီစဉ်ရမည်ဖြစ်ကြောင်း လင်းဖန်က မိမိကိုယ်ကိုယ် သတိပေးလိုက်သည်။

လင်းဖန်က ပြောလိုက်သည်။

“ခဏနေရင် ဟိုမင်... ဟူထော်နဲ့ ငါက ရှေ့ကနေ ဦးဆောင်မယ်... ကျန်တဲ့လူတွေက ငါတို့နောက်မှာပဲနေကြ...”

လိုင်ညီအစ်ကိုနှင့် ကျောက်ကျားရွေ့တို့က ခေါင်းညိတ်လိုက်ကြသည်။

၎င်းမှာ ရှောင်လွှဲ၍မရသော အခြေအနေပင်ဖြစ်သည်။

လိုင်ညီအစ်ကို၏ ကျားနှင့် ကြိုးကြာသိုင်းမှာ လုံလောက်သောအဆင့်သို့ မရောက်သေးသဖြင့် မကြာမီ ပိုမိုကောင်းမွန်သော သိုင်းနည်းစနစ်တစ်ခုကို သင်ယူရပေလိမ့်မည်။

ကျောက်ကျားရွေ့၏ ကျင့်ကြံမှုအဆင့်မှာလည်း အခြေခံတည်ဆောက်ခြင်းအဆင့် ၁ သာ ရှိသေးသည်။

၎င်းတို့၏ ချီစွမ်းအင်များ ပြန်လည်ပြည့်ဝလာသောအခါ အဖွဲ့သည် ဆက်လက်ထွက်ခွာခဲ့ပြီး ဒုတိယထပ်သို့တက်ရန် လှေကားထစ်များအတိုင်း တက်လှမ်းခဲ့ကြသည်။

၎င်းတို့ အံ့ဩသွားရသည်မှာ ဤအထပ်တွင် ရတနာများမှလွဲ၍ အခြားမည်သည့်အရာမျှ မရှိခြင်းပင်။

လိုင်မင်က မယုံကြည်နိုင်စွာဖြင့် ရေရွတ်လိုက်သည်။

“ရွှေတွေနဲ့ ရတနာတွေကို ကြည့်စမ်းပါဦး...”

သူသည် ရွှေဒင်္ဂါးပြားများ တောင်လိုပုံနေသောနေရာသို့ ခုန်ဝင်လိုက်သဖြင့် ရွှေဒင်္ဂါးပြားများမှာ အရပ်မျက်နှာအနှံ့ လွင့်စင်သွားကြသည်။

လင်းဖန်က ပြောလိုက်သည်။

“နည်းနည်းပဲယူပြီး နောက်တစ်ထပ်ကို ဆက်သွားကြရအောင်...”

သူသည် ၎င်းတို့အားလုံးကို ယူဆောင်သွားချင်သော်လည်း ၎င်းမှာ မိမိတို့၏ ပန်းတိုင်ကို မျက်ခြေပြတ်သွားစေရန် ပြုလုပ်ထားသော ထောင်ချောက်တစ်ခုဖြစ်နိုင်ကြောင်း သူ စဉ်းစားမိလေသည်။

သူတို့သည် ရွှေနှင့် ငွေများအတွက် ဤနေရာသို့ ရောက်လာကြခြင်း မဟုတ်ပေ။

သူတို့သည် ပိုမိုတန်ဖိုးရှိပြီး အရေးကြီးသောအရာတစ်ခုကို ရှာဖွေနေကြခြင်း ဖြစ်သည်။

မျှော်လင့်ချက်အရမူ လျှို့ဝှက်ဆန်းကြယ်အဆင့် သို့မဟုတ် ကောင်းကင်အဆင့်ရှိသော လက်နက်များနှင့် မှော်ရတနာများ ဖြစ်ပေလိမ့်မည်။

လင်းဖန်၏ စကားများကြောင့် ကျန်ရှိသောလူများမှာ ခေတ္တမျှ ဝေခွဲမရဖြစ်သွားကြသည်။

၎င်းမှာ မလွယ်ကူသော်လည်း စိတ်လျှော့လိုက်ပြီး လင်းဖန်၏ညွှန်ကြားချက်ကို လိုက်နာခဲ့ကြသည်။

၎င်းတို့သည် ရွှေနှင့် ငွေအချို့ကို ယူဆောင်ပြီးနောက် တတိယထပ်သို့ ဆက်လက်ထွက်ခွာခဲ့ကြသည်။

ရှန်းရွေ့သည် ရွှေနှင့် ငွေများကို လက်လွှတ်ကာ ကျန်ရှိသောလူများနောက်သို့ လိုက်ပါနိုင်ရန် မိမိကိုယ်ကိုယ် ပြင်းထန်စွာရိုက်ပုတ်လိုက်ရချေသည်။

တတိယထပ်သို့ ရောက်ရှိသွားသောအခါ ၎င်းတို့သည် ဧရာမသားရဲကြီးနှစ်ကောင်နှင့် ချက်ချင်း ထိပ်တိုက်တွေ့ဆုံရတော့သည်။

၎င်းတို့နှစ်ကောင်မှာ အနည်းဆုံး ၁၀ မီတာခန့် ရှည်လျားပြီး နဂါးများနှင့် သဏ္ဍာန်တူသော ဧရာမတွားသွားသတ္တဝါကြီးများ ဖြစ်ကြသည်။

တစ်ကောင်တွင် ရွှေရောင်အကြေးခွံများရှိပြီး အခြားတစ်ကောင်တွင် ငွေရောင်အကြေးခွံများ ရှိသည်။

လင်းဖန်သည် သံတူကို ထုတ်ယူလိုက်စဉ် သူ၏ စိတ်ထဲ၌ ရင်းနှီးနေသော အသံတစ်ခု ထွက်ပေါ်လာလေသည်။

[ဒင်]

[ယုတ်မာသော ရည်ရွယ်ချက်ရှိသည့် ဝိညာဉ် ၂ ခု ချဉ်းကပ်လာနေသည်ကို ရှာဖွေတွေ့ရှိပါသည်။]

[ကလဲ့စားချေအမှတ် ၄၀၀ ရရှိရန် ယုတ်မာသော ရည်ရွယ်ချက်ရှိသည့် ဓာတ်ကြီးလေးပါးကို ထိန်းချုပ်နိုင်သော တွားသွားသတ္တဝါ မိစ္ဆာသားရဲ ၂ ကောင်ကို သုတ်သင်ပါ]

လင်းဖန်က ပြောလိုက်သည်။

“ဟိုမင်... ငါနဲ့အတူ ရွှေရောင်တွားသွားသတ္တဝါကို တိုက်... ကျန်တဲ့လူတွေက ငွေရောင်တွားသွားသတ္တဝါကို တိုက်ကြ...”

လင်းဖန်သည် တစ်ကောင်ကို လျင်မြန်စွာသတ်ဖြတ်ပြီးနောက် အခြားတစ်ကောင်ကိုကူညီရန် ရွေးချယ်ခဲ့ခြင်း ဖြစ်သည်။

ဟိုမင်က ခေါင်းညိတ်လိုက်ပြီး ၎င်းတို့နှစ်ဦးလုံး ရွှေရောင်တွားသွားသတ္တဝါထံသို့ ပြေးဝင်သွားကြသည်။

နှစ်ဦးလုံးမှာ လေထဲသို့ ခုန်တက်လိုက်ကြသော်လည်း ရုတ်တရက် ဟိုမင်သည် မြေပြင်ပေါ်သို့ ပြုတ်ကျသွားလေသည်။

ဆွဲငင်အားတစ်ခုက ဟိုမင်ကို ရုတ်တရက် ဆွဲကိုင်ထားသကဲ့သို့ပင်။

လင်းဖန်က အော်ဟစ်လိုက်ပြီး သံတူဖြင့် ရွှေရောင်တွားသွားသတ္တဝါ၏ ဦးခေါင်းကို ရိုက်ချလိုက်သည်။

“ဟိုမင်...”

ဝုန်း…

ထိုအရာက ရွှေရောင်တွားသွားသတ္တဝါကို ခေတ္တမျှ ကြောင်အမ်းသွားစေသည်။

ဟိုမင်သည် ထရပ်လိုက်ပြီး ရွှေရောင်တွားသွားသတ္တဝါထံသို့ ပြန်လည်ချဉ်းကပ်လိုက်သည်။

ဘုတ်…

သူသည် မြေပြင်ပေါ်သို့ ထပ်မံပြုတ်ကျသွားပြန်သည်။

လင်းဖန်သည် လှည့်၍ အခြားတစ်ဖက်သို့ ကြည့်လိုက်သည်။

ဟူထော်မှလွဲ၍ ကျန်ရှိသောလူများတွင်လည်း ထိုကဲ့သို့သောအခြေအနေမျိုး ဖြစ်ပျက်နေချေသည်။

တစ်စုံတစ်ခုက ဆွဲငင်အားကို ထိန်းချုပ်ကာ သူတို့ကို ပြုတ်ကျစေခြင်း ဖြစ်သည်။

လင်းဖန်က အော်ဟစ်လိုက်သည်။

“မင်းတို့ကိုယ်ပေါ်မှာရှိတဲ့ ရွှေနဲ့ ငွေတွေကို လွှင့်ပစ်လိုက်ကြ...”

သူ၏ စနစ်အချက်အလက်ပြဇယားတွင် မိစ္ဆာသားရဲ၏အမည်ကို ထပ်မံမြင်လိုက်ရသောအခါ ၎င်းမှာ သူတို့ကိုယ်ပေါ်ရှိ ရွှေနှင့် ငွေများနှင့် ဆက်စပ်နေရမည်ဖြစ်ကြောင်း သူ သဘောပေါက်သွားသည်။

လင်းဖန်သည် ရွှေနှင့် ငွေများကို သူ၏ သိုလှောင်ရေးရတနာအတွင်း၌ သိမ်းဆည်းထားသဖြင့် သူ့အပေါ်သက်ရောက်မှု မရှိခြင်းပင်။

သူတို့သည် လင်းဖန်၏ ညွှန်ကြားချက်အတိုင်းလိုက်နာပြီး သူတို့ကိုယ်ပေါ်ရှိ ရွှေနှင့် ငွေများကို ဖယ်ရှားလိုက်ကြသည်။

ဝေါင်း…

တွားသွားသတ္တဝါကြီးများက ဟိန်းဟောက်လိုက်ကြပြီး ရွှေရောင်တွားသွားသတ္တဝါက လင်းဖန်ကိုကိုက်ခဲရန် ကြိုးစားလေသည်။

လင်းဖန်က သံတူများကိုဝှေ့ယမ်းကာ ရွှေရောင်တွားသွားသတ္တဝါ၏ပါးစပ်ကို ရိုက်ချလိုက်သဖြင့် ၎င်းသည် မှားယွင်းသော ပစ်မှတ်ကို ရွေးချယ်မိသွားချေသည်။

ပြင်းထန်သောအရှိန်ကြောင့် ၎င်း၏ဦးခေါင်းမှာ မျက်နှာကြက်ဆီသို့ မော့တက်သွားပြီး ဟိုမင်က လေပွေတိုက်ကွက်ဖြင့် ဝင်ရောက်တိုက်ခိုက်လေသည်။

ဝုန်း…

လေပွေတိုက်ကွက်သည် အကြေးခွံများအတွင်းသို့ လက်မအနည်းငယ်ခန့် ထိုးဖောက်ဝင်ရောက်သွားပြီးနောက် ရပ်တန့်သွားသည်။

လင်းဖန်သည် မူလချီလက်သည်းဖြင့် ဆက်လက်တိုက်ခိုက်လိုက်သည်။

သူ၏ လက်သည်းများသည် တွားသွားသတ္တဝါ၏ လည်ချောင်းအတွင်းသို့ နက်ရှိုင်းစွာ ထိုးဖောက်ဝင်ရောက်သွားချေသည်။

ပြင်းထန်သောနာကျင်မှုကြောင့် ရွှေရောင်တွားသွားသတ္တဝါသည် ရုန်းကန်လှုပ်ရှားကာ အမြီးကို အရပ်မျက်နှာအနှံ့ ဝှေ့ယမ်းတော့သည်။

၎င်းသည် လင်းဖန်ကိုကုတ်ခြစ်ရန် ကြိုးစားသော်လည်း ဆွဲငင်အားကိုမထိန်းချုပ်နိုင်တော့သဖြင့် လင်းဖန်၏ပြိုင်ဘက် မဟုတ်တော့ချေ။

မကြာမီ ရွှေရောင်တွားသွားသတ္တဝါသည် လှုပ်ရှားမှုရပ်တန့်သွားပြီး လင်းဖန်၏စိတ်ထဲ၌ ရင်းနှီးသောအသံတစ်ခု ထွက်ပေါ်လာလေသည်။

[ဒင်... ယုတ်မာသော ရည်ရွယ်ချက်ရှိသူကို အောင်မြင်စွာ သုတ်သင်နိုင်ခဲ့သည့်အတွက် ဂုဏ်ယူပါသည်...]

[ကလဲ့စားချေအမှတ် + ၂၀၀]

[လက်ရှိ ကလဲ့စားချေအမှတ် - ၂၇၁၀]

သူသည် တိုက်ပွဲပြီးဆုံးသွားသောအခါ အခြားသူများ၏ အခြေအနေကို လှည့်ကြည့်လိုက်သည်။

ဟူထော်သည် ရှေ့မှဦးဆောင်ကာ ငွေရောင်တွားသွားသတ္တဝါကို တိုက်ခိုက်နေသည်။

လိုင်ညီအစ်ကိုသည် ဘေးဘက်မှနေ၍ ငွေရောင်တွားသွားသတ္တဝါကို တိုက်ခိုက်ကြသည်။

ကျောက်ကျားရွေ့နှင့် ရှန်းရွေ့တို့သည် နောက်ဘက်တွင်ရပ်နေပြီး လိုအပ်ပါက ကူညီရန် အသင့်ပြင်ထားကြသည်။

သို့သော် ၎င်းတို့သည် ငွေရောင်တွားသွားသတ္တဝါနှင့် အကြိတ်အနယ် တိုက်ခိုက်နေကြရသည်။

လင်းဖန်သည် အချိန်ဆွဲမနေဘဲ ငွေရောင်တွားသွားသတ္တဝါထံသို့ ခုန်ဝင်လိုက်ရင်း အော်လိုက်သည်။

“ဟူထော်... သတိထား...”

သူ၏ မူလချီလက်သည်းများသည် ငွေရောင်တွားသွားသတ္တဝါ၏ နဖူးအတွင်းသို့ စိုက်ဝင်သွားချေသည်။

ထို့နောက် လင်းဖန်သည် လက်များကိုဆန့်ထုတ်ကာ ဦးခေါင်းခွံကို ဆွဲဖြဲပစ်လိုက်လေသည်။

[ဒင်... ယုတ်မာသော ရည်ရွယ်ချက်ရှိသူကို အောင်မြင်စွာ သုတ်သင်နိုင်ခဲ့သည့်အတွက် ဂုဏ်ယူပါသည်...]

[ကလဲ့စားချေအမှတ် + ၂၀၀]

[လက်ရှိ ကလဲ့စားချေအမှတ် - ၂၉၁၀]