အခန်း ၆၉၃
Vol. 47 Ch. 693
အခန်း (၆၉၃) - စစ်မှန်သော သူရဲကောင်း၊ မင်းသမီးလေး နတ်မိမယ်
"ဒေါင်"
ဟူဖေးဖေးက သူမ၏ အစွမ်းကုန် ခွန်အားဖြင့် ရိုက်ချလိုက်သည်။ အဆင့်တက်ရန် စွမ်းအင် ၀.၀၃ ရာခိုင်နှုန်းမှ ၀.၀၄ ရာခိုင်နှုန်းခန့် တိုးလာ၏။ ပမာဏမှာ နည်းပါးလှသော်လည်း အလကားရရှိသော အကျိုးအမြတ်ပါပင်။
သူမ အားရပါးရ ရိုက်နေသရွေ့ ဆုလာဘ်များကို ရရှိနေမည်သာ။
“ခွပ်..ခွပ်..ခွပ်”
ဟူဖေးဖေးက မျက်တောင်တစ်ခတ်အတွင်း သုံးချက် ဆက်တိုက် ရိုက်ချလိုက်ပြန်သည်။ စွမ်းအင်များ ၀.၁ ရာခိုင်နှုန်းခန့် ထပ်မံ တိုးလာတော့၏။
ယဲ့ဖုန်းကမူ ဘေးနားရှိ ဟင်းလင်းပြင်အတွင်း တင်ပျဉ်ခွေ ထိုင်နေသည်။ သူသည် လက်ဟန်များ ရေးဆွဲလိုက်၏။ နတ်ဘုရားလက်သီး နှင့် ထိပ်တည့်တည့်က တောက်လောင်တဲ့နေ တို့ကို ပေါင်းစပ်ရန် ကြိုးစားနေခြင်း ဖြစ်သည်။ သူ၏ စိတ်ထဲတွင် အတွေးတစ်ခု ပွင့်လင်းလာသည်။
'နတ်ဘုရားလက်သီးကို နေမင်းရဲ့ စွမ်းအားနဲ့ ပေါင်းစပ်လိုက်ရင် ... ဒါက နေမင်း နတ်ဘုရားလက်သီး ဖြစ်မလာနိုင်ဘူးလား'
ယဲ့ဖုန်း၏ မျက်လုံးအိမ်များမှာ ကျုံ့သွားရသည်။ သူသည် မျက်လုံးအစုံကို မှိတ်လိုက်၏။
ဉာဏ်အလင်းပွင့် နှလုံးသား၏ စွမ်းအားများကို အသုံးပြုကာ ဖြစ်နိုင်ခြေများကို အဆက်မပြတ် တွက်ချက်နေသည်။ မရေမတွက်နိုင်သော ရှေးဟောင်း မှော်စာလုံးများမှာ သူ၏ စိတ်ထဲတွင် စီးဆင်းနေကြ၏။ သူ၏ တစ်ကိုယ်လုံးမှာ နေမင်းကြီးအလား ရွှေရောင်များ တောက်ပလာတော့၏။
"ဝုန်း"
လနီတံခါးမှာ ယဲ့ဖုန်း၏ အရှိန်အဝါကို အာရုံခံမိသွားပုံ ရသည်။ ၎င်းက ဒေါသထွက်သလိုလို၊ ကြောက်လန့်သလိုလိုဖြင့် အသာအယာ တုန်ခါနေ၏။ တံခါး၏ အထက်မှနေ၍ နီရဲသောအလင်းတန်းများ ရေကာကာတစ်ခုပမာ ကျဆင်းလာပြီး လနီတံခါး တစ်ခုလုံးကို ဖုံးအုပ်လိုက်သည်။
ချက်ချင်းဆိုသလိုပင် နဖူးတွင် လနီအမှတ်အသား ပါရှိသော နတ်ဘုရားမျိုးနွယ်စုမှ သူရဲကောင်းတစ်ဦး ထွက်ပေါ်လာတော့၏။ သူသည် ထိပ်တန်း ကောင်းကင်ဧကရာဇ် တစ်ဦး၏ အရှိန်အဝါများကို ထုတ်ဖော်နေ၏။
“ဘယ်ကောင်က ငါတို့ လနီတံခါးကို လာပြီး ထိပါးနေတာလဲ”
ထိုသူရဲကောင်း ပေါ်လာသည်နှင့် ပတ်ဝန်းကျင်ကို ဝေ့ကြည့်လိုက်ရာ လနီတံခါးကို အသည်းအသန် ရိုက်နေသော ဟူဖေးဖေးကို မြင်သွားသည်။
“မင်းကများ ဒါကို ရိုက်ရဲတယ်ပေါ့ ... ရဲတင်းလှချေလား”
ထိုသူရဲကောင်းမှာ အရိုးတုတ်ကြီးကို ကိုင်ကာ ရိုက်ချလိုက်၏။
"ဝုန်း"
ဟူဖေးဖေးမှာ တံခါးကို ရိုက်ရင်း စွမ်းအင်များ စုပ်ယူရာတွင် အာရုံရောက်နေသဖြင့် ထိုတိုက်ခိုက်မှုကို သတိမထားမိဘဲ လွင့်ထွက်သွားရသည်။
“ငါ့ရဲ့ အစားအသောက်ကို လာနှောင့်ယှက်ရဲတယ်ပေါ့ ... နင်.. သေဖို့သာ ပြင်ထားလိုက်တော့”
ဟူဖေးဖေးသည် နောက်သို့ လှည့်ကြည့်လိုက်ရာ သူမ၏ မျက်ဝန်းများတွင် ဒေါသများ ပြည့်လျှံနေသည်။ သူမသည် တိုက်ခိုက်လိုစိတ်များ ပြင်းထန်နေသဖြင့် ချက်ချင်း ပြေးဝင်သွားပြီး မျက်တောင်တစ်ခတ်အတွင်း အကြိမ်ပေါင်း ရာနှင့်ချီ၍ ပြန်လည် တိုက်ခိုက်တော့၏။
“ဒါ ဘယ်လို တိုက်ကွက်မျိုးလဲ”
နတ်ဘုရားမျိုးနွယ်စုမှ သူရဲကောင်းမှာ ထိတ်လန့်သွားရ၏။ သူသည် အရိုးတုတ်ဖြင့် တားဆီးရန် ကြိုးစားသော်လည်း ဟူဖေးဖေး၏ ဟွမ်ယွမ်တုတ်နှင့် ရိုက်မိသောအခါ အရိုးတုတ်မှာ အက်ကွဲသွားပြီး ကျိုးတော့မည့်အခြေအနေသို့ ရောက်သွားသည်။
"ဝုန်း"
ဟူဖေးဖေးက တုတ်ဖြင့် ထပ်မံ ရိုက်ချလိုက်ရာ ထိုသူရဲကောင်းမှာ လွင့်ထွက်သွားရပြန်သည်။ သူတို့၏ တိုက်ပွဲမြေပြင်မှာ လနီတံခါးမှသည် အနီးနားရှိ လွင်ပြင်ကြီးဆီသို့ ပြောင်းရွှေ့သွားပြီး ပိုမို ပြင်းထန်လာတော့၏။
“မင်းကို ငါ အမှုန့်ခြေပြီး စွမ်းအင်တွေ စုပ်ယူပစ်မယ်”
ဟူဖေးဖေးက ထိုသူရဲကောင်းကို ကြည့်ကာ နှုတ်ခမ်းကို လျှာဖြင့် သပ်လိုက်သည်။
ထိုအကြည့်ကြောင့် သူရဲကောင်းမှာ ကြက်သီးများပင် ထသွားရ၏။
"ဝုန်း ... ဝုန်း ... ဝုန်း"
ထိပ်တန်း ကောင်းကင်ဧကရာဇ် နှစ်ဦး၏ တိုက်ပွဲကြီးမှာ အရပ်မျက်နှာ အနှံ့အပြားသို့ ပဲ့တင်ထပ်သွားသည်။ အင်အားစု အသီးသီးမှ ပညာရှင်များသည် ကောင်းကင်မျက်လုံး အတတ်ကို အသုံးပြုကာ ထိုအသည်းထိတ်ဖွယ် တိုက်ပွဲကို စောင့်ကြည့်နေကြ၏။
“ဒါ မြူခိုးဂိုဏ်းက ဟူဖေးဖေး မဟုတ်လား”
“သူက တားမြစ်နယ်မြေထဲကို တစ်ယောက်တည်း ဝင်သွားရဲတာလား။ နတ်ဘုရားမျိုးနွယ်စုရဲ့ ထိပ်တန်း ကောင်းကင်ဧကရာဇ်ကိုတောင် ရင်ဆိုင်နေတာပဲ။ တကယ့်ကို သတ္တိရှိတဲ့ မိန်းကလေးပဲ”
“မြူခိုးဂိုဏ်းရဲ့ စိတ်ဓာတ်ကတော့ တကယ့်ကို လေးစားစရာပဲ။ ပြိုင်ဘက်ကင်းတဲ့ ဂိုဏ်းချုပ်ယဲ့ပြီးရင် ... ဟူဖေးဖေးကလည်း ထိပ်တန်း ကောင်းကင်ဧကရာဇ် တစ်ယောက်ကို ရင်ဆိုင်ရဲတာပဲ”
သူတို့၏ တိုက်ပွဲသတင်းမှာ လေအလျင် ကျော်ကြားသွားတော့၏။ မိုင်ပေါင်း သန်းနှင့်ချီသော နေရာများအထိ ပညာရှင်များမှာ ထိုတိုက်ပွဲကို မြင်တွေ့နေရခြင်း ဖြစ်၏။ ကောင်းကင်ဧကရာဇ်အဆင့် တိုက်ပွဲဖြစ်သဖြင့် ကြီးမားသော လှုပ်ခတ်မှုများမှာ ကောင်းကင်ယံထက်တွင် ပုံရိပ်ယောင်များပမာ ထင်ဟပ်နေသည်။
*
စိမ်းပြာရောင် ရှေးဟောင်းမြို့အတွင်း…
ပိုင်ကျီသည် ကောင်းကင်မျက်လုံး အတတ်ဖြင့် တိုက်ပွဲကို ကြည့်ရင်း အသက်ရှူပင် မှားသွားရသည်။
“မြူခိုးဂိုဏ်းမှာ ဘယ်လိုလုပ်ပြီး ဒီလောက်အထိ အစွမ်းထက်တဲ့သူတွေ အများကြီး ရှိနေရတာလဲ”
ရှောင်ချန်းထျန်းမှာလည်း ရှေးဟောင်းမျှော်စင်ထက်တွင် တင်ပျဉ်ခွေ ထိုင်ရင်း တိုက်ပွဲဖြစ်စဉ် တစ်ခုလုံးကို အာရုံစိုက် စောင့်ကြည့်နေသည်။ သူ၏ မျက်နှာမှာ အလွန် တည်ကြည်နေ၏။
“ယဲ့ဖုန်း တစ်ယောက်တည်းတင် မြူခိုးဂိုဏ်းအတွက် လုံလောက်နေပြီ ထင်တာ ... အခုတော့ ဟူဖေးဖေးကပါ ဒီအဆင့်ကို ရောက်နေပြီလား။ ဒီဂိုဏ်းကတော့ ရှန်ကျိုးတိုက်ကြီး တစ်ခုလုံးမှာ ထိပ်တန်း အင်အားစု တစ်ခု ဖြစ်လာတော့မှာပဲ” ဟု ရှောင်ချန်းထျန်းက တီးတိုး ရေရွတ်လိုက်မိသည်။
*
မိုင်ပေါင်း သန်းနှင့်ချီ ကျယ်ပြန့်သော လွင်ပြင်ကြီးထက်တွင်..
ဟူဖေးဖေးနှင့် နတ်ဘုရားမျိုးနွယ်စု သူရဲကောင်းတို့၏ တိုက်ပွဲမှာ အပြင်းထန်ဆုံး အဆင့်သို့ ရောက်ရှိနေပြီပင်။
သူတို့၏ တုတ်ချင်း ထိခိုက်မှုကြောင့် ဖြစ်ပေါ်လာသော အားလှိုင်းများမှာ ဟင်းလင်းပြင်ကို ပြိုကွဲစေပြီး မြေပြင်ကိုလည်း နိမ့်ဆင်းသွားစေတော့၏။
“ကောင်းတယ် ... တကယ်ကို ကောင်းတယ်”
တိုက်ပွဲအတွင်းမှ ထွက်ပေါ်လာသော စွမ်းအင် တစ်စိတ်တစ်ပိုင်းကို ဟူဖေးဖေးက ဝါးမြိုလိုက်ပြီး တိုက်ခိုက်ရေး စွမ်းအင်များအဖြစ် ပြောင်းလဲလိုက်၏။ သူမ အဆင်သင့် ဖြစ်သွားသောအခါ နောက်ထပ် လက်တွန့်မနေတော့ပေ။
“တတိယ တိုက်ခိုက်ရေးပုံစံ”
သူမက ထိုသို့ ဟစ်ကြွေးလိုက်သည်နှင့် ဆံနွယ်များမှာ သုံးမီတာခန့်အထိ ရှည်ထွက်သွားပြီး လေထဲတွင် ကြမ်းတမ်းစွာ ဝဲလွင့်နေတော့၏။ ဟွမ်ယွမ်တုတ်မှာလည်း ပို၍ ရှည်ထွက်လာ၏။ သူမ၏ အဟုန်မှာလည်း နှစ်ဆခန့် မြင့်တက်လာသည်။
“ဟွမ်ယွမ်တုတ် ... စွမ်းအားဖြင့် အရာရာကို ချေမှုန်းခြင်း”
ဟူဖေးဖေးသည် တုတ်ကို မြင့်မားစွာ မြှောက်လိုက်၏။ သူမ၏ ကိုယ်တွင်းမှ တိုက်ခိုက်ရေး စွမ်းအင်များမှာ တုတ်အတွင်းသို့ စီးဝင်သွားကြသည်။ တုတ်မှာ ပေပေါင်း သောင်းချီ ရှည်လျားသော ကောင်းကင်ကျားကန်တိုင်ကြီး အဖြစ် ပြောင်းလဲသွားပြီး အောက်သို့ ပြင်းထန်စွာ ရိုက်ချလိုက်၏။
ထိုကြောက်မက်ဖွယ် ကောင်းသော အရှိန်အဝါမှာ ကောင်းကင်နှင့် မြေကြီးကိုပင် ခွဲခြမ်းပစ်
တော့မည့်အလား ရှိနေတော့သည်။
“မဖြစ်နိုင်တာ”
နတ်ဘုရားမျိုးနွယ်စုမှ သူရဲကောင်းမှာ ဟူဖေးဖေး၏ ခွန်အားက ဤမျှအထိ တစ်ဟုန်ထိုး မြင့်တက်လာလိမ့်မည်ဟု ထင်မထားခဲ့ပေ။
"ဝုန်း"
ထိုရိုက်ချက် တစ်ချက်တည်းနှင့်ပင် နတ်ဘုရားမျိုးနွယ်စု သူရဲကောင်းမှာ အစအနပင် မကျန်အောင် ပေါက်ကွဲသွားရတော့၏။
မြေပြင်ပေါ်တွင် ထိုတိုက်ကွက်၏ စွမ်းအားကြောင့် မိုင်ပေါင်း သောင်းနှင့်ချီ ရှည်လျားပြီး မိုင်ပေါင်း ရာနှင့်ချီ နက်ရှိုင်းသော ချိုင့်ခွက်ကြီး တစ်ခု ဖြစ်ပေါ်သွားသည်။ ကောင်းကင်ယံတွင်လည်း မိုင်ပေါင်း သန်းနှင့်ချီသော နေရာရှိ တိမ်တိုက်များမှာ အစိတ်စိတ်အမြွှာမြွှာ ပြိုကွဲသွားရ၏။
ဤမြင်ကွင်းကို ကြည့်နေကြသော အင်အားစု အသီးသီးမှ လူများမှာ ဆွံ့အလျက် ရှိနေကြသည်။
“ထိပ်တန်း ကောင်းကင်ဧကရာဇ် တစ်ယောက်ကို ... ဒီလိုပဲ အလွယ်တကူ သတ်လိုက်တာလား”
ပိုင်ကျီမှာ ထိတ်လန့်သွားရ၏။ ရှောင်ချန်းထျန်းပင်လျှင် လက်သီးကို ကျစ်ကျစ်ပါအောင် ဆုပ်လိုက်မိသည်။ သူ မယုံကြည်နိုင်အောင် ဖြစ်နေရ၏။
“မြူခိုးဂိုဏ်းကတော့ ... တကယ့်ကို လျှို့ဝှက်ချက်တွေနဲ့ ပြည့်နှက်နေတာပဲ”
ရှောင်ချန်းထျန်းမှာ ကြီးမားသော ဖိအားများကို ခံစားလိုက်ရသည်။
သူသည် ယဲ့ဖုန်းကို မယှဉ်နိုင်တော့သည့်အပြင်၊ ယခုအခါ ဟူဖေးဖေးကိုသာ ဆက်လက် ကြီးထွားခွင့် ပေးထားမည်ဆိုပါက သူမကိုလည်း သူ ယှဉ်နိုင်တော့မည် မဟုတ်ပေ။
သည်အခြေအနေက သူ၏ ဂုဏ်သိက္ခာအတွက် အတော်လေး ရှက်စရာ ကောင်းလှသည် မဟုတ်ပါလော။
လွင်ပြင်အတွင်း၌.. ဟူဖေးဖေးသည် လေထဲတွင် ကျန်ရှိနေသော ထူးခြားသော စွမ်းအင်များကို အကုန်အစင် ဝါးမြိုလိုက်၏။ နတ်ဘုရားမျိုးနွယ်စု သူရဲကောင်း ပေါက်ကွဲသွားရာမှ ထွက်ပေါ်လာသော စွမ်းအင်များမှာ နည်းပါးလှသည် မဟုတ်ပေ။
ဆယ်မိနစ်ခန့် ကြာသောအခါ..
(ဟူဖေးဖေး၏ အဆင့်တက်ရန် စွမ်းအင် - ၃၅ ရာခိုင်နှုန်း)
ထိပ်တန်း ကောင်းကင်ဧကရာဇ် တစ်ဦးကို သတ်ဖြတ်ပြီးနောက် သူမ၏ စွမ်းအင်မှာ ရှစ်ရာခိုင်နှုန်းခန့် တိုးလာခဲ့တော့သည်။
"ဝှစ်"
သူမသည် လနီတံခါး၏ အထက်သို့ ပြန်လည် ရောက်ရှိလာခဲ့၏။
“ဟားဟား ... တတိယပုံစံ မကုန်ဆုံးခင်မှာ ... အစွမ်းကုန် ထပ်ပြီး ရိုက်ရဦးမယ်”
ဟူဖေးဖေးသည် အသက်ကို ပြင်းပြင်းရှူလိုက်သည်။ ဟွမ်ယွမ်တုတ်ကို ကိုင်ကာ ခုနက တိုက်ကွက်ကို ထပ်မံ အသုံးပြုလိုက်ပြန်၏။ တုတ်မှာ ပေပေါင်း သောင်းချီ ရှည်လျားသွားပြီး လနီတံခါးဆီသို့ ပြင်းထန်စွာ ရိုက်ချလိုက်၏။
“သူက ပြန်ကန်အား ဒဏ်ကိုတောင် မမှုဘဲ လနီတံခါးကို ဖျက်ဆီးဖို့ ကြိုးစားနေတာလား”
“ဒါဟာ စစ်မှန်တဲ့ သူရဲကောင်း တစ်ယောက်ရဲ့ စိတ်ဓာတ်ပဲ”
အင်အားစု အသီးသီးမှ ပညာရှင်များသည် ဤမြင်ကွင်းကို ကြည့်ကာ အံ့ဩတုန်လှုပ်နေကြသည်။ ရှောင်ချန်းထျန်းပင်လျှင် မှင်တက်နေရ၏။
"ဝုန်း"
တုတ်ချက် ကျရောက်သွားသည်နှင့် ဟူဖေးဖေးမှာ လနီစွမ်းအားများ၏ ပြန်ကန်မှုကို ခံလိုက်ရပြီး မိုင်ပေါင်း ရာနှင့်ချီ အဝေးသို့ လွင့်ထွက်သွားရသည်။ သူမ၏ ကိုယ်ပေါ်တွင်လည်း ဒဏ်ရာများ ရရှိသွား၏။ သို့သော် ထိုလုပ်ငန်းစဉ်အတွင်း သူမသည် စွမ်းအင် ၀.၁ ရာခိုင်နှုန်းကို ဝါးမြိုနိုင်ခဲ့သည်။
ဟူဖေးဖေးသည် ဒဏ်ရာများကို ဂရုမစိုက်ဘဲ ဟွမ်ယွမ်တုတ်ကို ပြန်လည် ဆုပ်ကိုင်ကာ ထပ်မံ တိုက်ခိုက်လိုက်ပြန်သည်။ သူမ၏ တတိယပုံစံ မကုန်ဆုံးမီ အမြတ်များများ ထုတ်နိုင်ရန် ကြိုးစားနေခြင်းပင်။
သို့သော်လည်း စောင့်ကြည့်နေသူများ၏ အမြင်တွင်မူ ဤမြင်ကွင်းမှာ အခြားတစ်မျိုး ဖြစ်နေတော့၏။
“ဟူဖေးဖေးက သူ့ရဲ့ ဒဏ်ရာတွေကိုတောင် ဂရုမစိုက်ဘဲ လနီတံခါးကို ဖျက်ဆီးဖို့ ကြိုးစားနေတာပဲ။ သူက ရှန်ကျိုးတိုက်ကြီး တစ်ခုလုံးအတွက် ကိုယ့်ကိုယ်ကိုယ် စတေးဖို့ ကြိုးစားနေတာလား”
“ဟူဖေးဖေး ... တကယ့်ကို နတ်မိမယ် ဆိုတဲ့ နာမည်နဲ့ ထိုက်တန်တဲ့သူပဲ”
“ငါကတော့ သူ့ကို ကောင်းကင်ပျံ ဧကရီ လို့ပဲ ဂုဏ်ပြုချင်တော့တယ်”
လူတိုင်း၏ မျက်လုံးများတွင် လေးစားအားကျမှုများ ပြည့်နှက်နေတော့၏။ အထူးသဖြင့် ရှောင်ချန်းထျန်းနှင့် ပိုင်ကျီတို့မှာ လနီတံခါး၏ ပြန်ကန်အားက မည်မျှ ကြောက်စရာ ကောင်းသည်ကို သိထားကြသူများ မဟုတ်ပါလား။
ထိုအရာကို အတင်းအကျပ် တိုက်ခိုက်ခြင်းက ဘာအကျိုးမှ မရှိကြောင်း သူတို့ သိကြ၏။ သို့သော် ဟူဖေးဖေးကမူ မဖြုံဘဲ အသည်းအသန် တိုက်ခိုက်နေသည်။
ဤသည်မှာ တကယ့်ကို တုန်လှုပ်ခြောက်ခြားဖွယ် ကောင်းလှသလို ... လေးစားဖွယ်လည်း အလွန် ကောင်းလှသည် မဟုတ်ပါလား..။
-