အခန်း ၁၀၂

အပိုင်း (၁၀၂)

ရွှင့်ထျန်းမြို့တော်ဝန်ကြီးသည် မီးခဲပေါ် ရောက်နေသကဲ့သို့ ပူပန်သောက ရောက်နေသည်ကို မြင်လိုက်ရသောအခါ ချူဟွားသည် သူ့ကို ချူအိမ်တော်သို့ ခေါ်သွားရန် မဖြစ်နိုင်တော့ပေ။

အကယ်၍ မြင်းလှည်းထဲတွင် ပြောဆိုမည်ဆိုပါက systemက ဖရဲသီးစားသည့်အခါ လမ်းသွားလမ်းလာများ ကြားသွားနိုင်သည်။

သာမန် ခံစားချက်ရေးရာ အတင်းအဖျင်းများကို မျှဝေခြင်းက ကိစ္စမရှိသော်လည်း ဤကဲ့သို့ လူ့အသက်နှင့်ဆိုင်ပြီး ထိတ်လန့်မှုကို ဖြစ်စေနိုင်သော အမှုမျိုးကိုတော့ မပြောဘဲ နေလိုက်ခြင်းက ပိုကောင်းပေလိမ့်မည်။

ချူဟွားသည် ရှန်လုအိမ်တော် တံခါးကို ခေါက်ရန် ပြင်လိုက်စဉ် အတွင်းဘက်မှ ရှန်လုသည် system၏ အသံကို ကြားလိုက်ရပြီး အရေးကြီးကိစ္စ ဖြစ်ပွားနေမှန်း သိသဖြင့် သူတို့ကို အထဲသို့ ဝင်ရန် ဖိတ်ခေါ်လိုက်၏။

ရွှင့်ထျန်းမြို့တော်ဝန်ကြီးသည် ရှန်လုက မည်သူမည်ဝါ ဖြစ်ကြောင်းကို သိရှိပြီး သူများအိမ်တွင် ရောက်နေခြင်း ဖြစ်သောကြောင့် ရှောင်ဖယ်နေသင့် မသင့်ကို တွေးတောခြင်း မရှိတော့ပေ။

လူ ၃ ယောက် ထိုင်လိုက်သည်နှင့် သူက မကြာသေးမီက ဖြစ်ပျက်ခဲ့သော အကြောင်းအရာများကို စတင် ပြောဆိုလာသည်။ "မိန်းကလေးချူ၊ မင်း မသိပါဘူး၊ ကွင်းဆက်လူသတ်မှုက ဒီမှာတင် ပြီးဆုံးသွားပြီလို့ ကျုပ် ထင်ထားခဲ့တာ၊ မြို့တော်က ပြည်သူတွေ အပြင်ထွက်ဖို့ နှစ်သက်လာကြပြီး အပြင်ထွက်ရင် အသက်အန္တရာယ် ရှိမှာကို စိုးရိမ်ခြင်း မရှိကြတော့ဘူး၊ ဒါပေမဲ့ ဒီနေ့ မျက်လုံး ထုတ်ခံထားရတဲ့ လူတစ်ယောက်ကို တွေ့လိမ့်မယ်လို့ ဘယ်သူက ထင်မှာလဲ"

ရွှင့်ထျန်းမြို့တော်ဝန်ကြီး၏ စိတ်ခံစားချက်ကို ဖော်ပြရန် စကားလုံး လေးလုံး ရှိသည်။ အဲ့ဒါကတော့ သရဲတစ္ဆေ မြင်လိုက်ရသလိုပင်။

System တောင်မှ "သရဲတစ္ဆေ မြင်လိုက်ရသလိုပဲ" ဟု အော်ဟစ်ချင်သွားသည်။ [ဘယ်လိုလုပ်ပြီး ဒီလိုဖြစ်ရတာလဲ]

ချူဟွားနှင့် ရှန်လုတို့သည် အလွန်အမင်း အံ့အားသင့်သွားကြ၏။ Systemသည် အတင်းအဖျင်းကိစ္စတွင် တစ်ခါမျှ လက်လွတ်ခဲ့ဖူးခြင်း မရှိပေ။

ထို့အပြင် စူးရှို့၊ ဝမ်လင်နှင့် ရန်စစ် တို့ ၃ ဦးကို ဖမ်းဆီးပြီးနောက် လူသက်သေ ပစ္စည်းသက်သေများ ပြည့်စုံပြီး ထွက်ဆိုချက်များ ကိုက်ညီကာ လက်မှတ်ရေးထိုးပြီး ဖြစ်သည်။ ပြစ်ဒဏ်များပင် ချမှတ်ပြီးဖြစ်ရာ ယခုအခါ မည်သို့ ဖြစ်ပြီး လူသတ်သမား နောက်တစ်ယောက် ပေါ်ထွက်လာရသနည်း။

ရွှင့်ထျန်းမြို့တော်ဝန်သည် မကြာသေးမီ ရက်များအတွင်း ခေါင်းမူးနောက်နေပြီး "ကျုပ်လည်း မသိဘူးလေ" ဟူသော စကားတစ်ခွန်းကို ပါးစပ်မှ လွှတ်ခနဲ ပြောထွက်လုနီးပါး ဖြစ်သွားတော့သည်။

ကံကောင်းထောက်မစွာ ဖြေကြားခြင်း မပြုမီ သူသည် လျှာကို ကိုက်ထားလိုက်နိုင်၏။ ပါးစပ်ထဲမှ သွေးညှီနံ့ဖျော့ဖျော့က မည်မျှပင် စိုးရိမ်ပူပန်နေပါစေ အချို့သော စကားများကို မပြောသင့်ကြောင်း သူ့ကို အဆက်မပြတ် သတိပေးနေလေသည်။

ကိစ္စမရှိပါဘူး။ systemက ဖရဲသီးစားပြီးသွားရင် ဒီတစ်ကြိမ် မျက်လုံးတူးတဲ့ အရူးကောင်က ဘယ်လိုလဲဆိုတာ သိရမှာပါ။

ဒီည တစ်ညလုံး လူဖမ်းပြီး ပြဿနာကို ဖြေရှင်းလို့ ရနိုင်တာပဲ။ စိတ်မပူနဲ့။ စိတ်ပူနေလဲ အလကားပဲ။

ရွှင့်ထျန်းမြို့တော်ဝန်ကြီးသည် ကိုယ့်ကိုယ်ကိုယ် အောင်မြင်စွာ နှစ်သိမ့်လိုက်ပြီး ဆက်လက် ရှင်းပြလာသည်။

"ဒီတစ်ခေါက် အမှုက အလောင်းကို သင်္ချိုင်းကုန်းကနေ တူးဖော်ရရှိခဲ့တာပါ၊ ဒီနေရာက အလောင်းစွန့်ပစ်ဖို့နဲ့ ရာဇဝတ်မှု သက်သေတွေကို ဖျောက်ဖျက်ဖို့ အရမ်း လွယ်ကူလွန်းတယ်လို့ တွေးမိတာနဲ့ ကျုပ်က လက်အောက်ငယ်သားတွေကို ပုံမှန်မဟုတ်တာ ရှိမရှိ သွားကြည့်ခိုင်းလိုက်တာ"

"လွန်ခဲ့တဲ့ ရက်တွေတုန်းက အကုန် အဆင်ပြေနေခဲ့တာ၊ ဒါပေမဲ့ ဒီနေ့ အလောင်းတစ်လောင်း တွေ့ခဲ့တယ်၊ မျက်လုံး ထုတ်ခံထားရတယ်၊ ကွင်းဆက်လူသတ်မှု အမှုပိတ်လိုက်တာ လဝက်ပဲ ရှိသေးတယ်၊ ဒီကိစ္စကိုသာ ပြည်သူတွေ သိသွားရင် လွန်ခဲ့တဲ့ လဝက်က လူသတ်တရားခံက အစွပ်စွဲ ခံရတာလို့ သူတို့ သေချာပေါက် ထင်သွားကြလိမ့်မယ်၊ ရွှင့်ထျန်းရုံးတော်က လူ့အသက်ကို တန်ဖိုးမထားဘဲ တွေ့ကရာလူကို ပြစ်ဒဏ်ချမှတ်တယ်လို့ ယူဆသွားကြလိမ့်မယ်"

အသေးအဖွဲ ပြောရလျှင် ရွှင့်ထျန်းရုံးတော်၏ ကိစ္စဖြစ်ပြီး ကြီးကြီးမားမား ပြောရလျှင် ညီလာခံတစ်ခုလုံးနှင့် ပတ်သက်နေနိုင်ပေသည်။

အကယ်၍ ပြဿနာ ကြီးထွားလာပါက ရိုက်ခတ်မှုသည် အမှန်တကယ်ပင် ပြင်းထန်လေသည်။

အဆုံးတွင် ဤကိစ္စသည် ချူဟွား၊ systemတို့နှင့် ဆက်စပ်မှု ရှိနေသဖြင့် ကူညီ ဖြေရှင်းပေးရပေမည်။

ချူဟွား: "အလောင်းရဲ့ လက္ခဏာတွေက အရင်အတိုင်းပဲလား"

ရွှင့်ထျန်းမြို့တော်ဝန်ကြီးသည် အမှုတွဲများနှင့် မှုခင်းဆေးစစ်ချက် အစီရင်ခံစာများကို အထူးတလည် ယူဆောင်လာခဲ့ပြီး ဖတ်ရှုရ လွယ်ကူစေရန် စာကြည့်စားပွဲပေါ်တွင် တစ်ခုချင်းစီ ဖြန့်ခင်းထားလိုက်၏။

ကွင်းဆက်လူသတ်မှု အပိုင်းကို ချူဟွားက system ပြောပြထားသဖြင့် ကြားသိပြီးဖြစ်ရာ တစ်ချက်ကြည့်ရုံဖြင့် ကျော်သွားလိုက်ပြီး အဓိကအချက်မှာ အသစ် တွေ့ရှိထားသော အလောင်းပင် ဖြစ်သည်။

မှုခင်းဆေးစစ်ချက် အစီရင်ခံစာအရ အလောင်း၏ မျက်လုံးများ ထုတ်ခံထားရပြီး ၎င်းမှာ သေဆုံးပြီးမှ ရရှိသော ဒဏ်ရာဖြစ်ကာ နှလုံးကို ဓားချက် နှစ်ချက် ထိုးထားပြီး ၎င်းမှာ သေစေနိုင်သော ဒဏ်ရာ ဖြစ်ကြောင်း ဖော်ပြထားသည်။

ချူဟွားသည် ကွင်းဆက်လူသတ်မှု၏ မှုခင်းဆေးစစ်ချက် အစီရင်ခံစာများကို သွားရောက် ကြည့်ရှုပြန်သည်။ သားကောင် အရေအတွက် များပြားသဖြင့် မှုခင်းဆေးစစ်ချက် အစီရင်ခံစာများမှာ ဒါဇင်နှင့်ချီ ရှိနေပြီး အများစုမှာ ဖော်ပြထားသည်က အလောင်း၏ မျက်လုံးများ ထုတ်ခံထားရပြီး ၎င်းမှာ သေစေနိုင်သော ဒဏ်ရာ ဖြစ်ကာ ခေါင်းဖြတ်ခံထားရခြင်းမှာ သေဆုံးပြီးမှ ရရှိသော ဒဏ်ရာ ဖြစ်ကြောင်းပင်။

သူမ၏ စိတ်ထဲတွင် ဝေဝါးသော အတွေးတစ်ခု ရှိနေပြီဖြစ်သော်လည်း သက်သေအထောက်အထား မရှိ ဖြစ်နေသည်။ [system]

System၏ ကလေးသံလေးသည် ဒေါသထွက်နေပုံ ပေါက်နေ၏။ [ငါ ပြောသားပဲ systemက အမှားမလုပ်မိနိုင်ပါဘူးလို့၊ ဒီအပြစ်က ငါ့အပြစ် မဟုတ်ဘူး၊ လုံးဝ မဟုတ်ဘူး]

ချူဟွား: [အတုခိုးပြီး ကျူးလွန်တာလား]

System: [သေချာတာပေါ့၊ ဒါပေမဲ့ နောက်ကွယ်က လူက ဘယ်သူလဲဆိုတာ နင် သေချာပေါက် စဉ်းစားမိမှာ မဟုတ်ဘူး]

ချူဟွားသည် မူလက မသေချာသေးသော်လည်း system၏ လေသံကြောင့် သူမ အပြည့်အဝ သေချာသွားလေသည်။ [ရွှီထောင် မဟုတ်လား]

ရှန်လု: ???

ရွှင့်ထျန်းမြို့တော်ဝန်ကြီး: ???

မင်း ဘယ်လိုလုပ်ပြီး သူမဆီ တွေးမိသွားတာလဲ။ သူမက မြင်တောင် မမြင်ရသလောက် ဖြစ်နေတာလေ။ ဘယ်လိုလုပ် လူသတ်နိုင်မှာလဲ။

မထင်မှတ်ထားဘဲ systemက ထိတ်လန့်သွားပြီး ယောက်ျားသံမြင့်ကြီးဖြင့် အော်ဟစ်လာတော့သည်။

[!!! နင် ဘယ်လိုလုပ်ပြီး သိတာလဲ]

ရှန်လု: "..."

ရွှင့်ထျန်းမြို့တော်ဝန်ကြီး: "..."

တကယ်ပဲ ရွှီထောင် ဖြစ်နေတာလား။ ဒါ ဘယ်လို လုပ်လိုက်တာလဲ။ ထူးဆန်းလိုက်တာ။

ချူဟွားသည် မှုခင်းဆေးစစ်ချက် အစီရင်ခံစာများကို လှန်လှောကြည့်ရှုရင်း တည်ငြိမ်စွာ ပြန်ဖြေလိုက်၏။ [မှန်းကြည့်တာ၊ နင် ဆက်ပြောပါ]

Systemသည် ကိုယ့်ကိုယ်ကိုယ် ရှင်းလင်းရန် အလျင်မလိုဘဲ ဤအချက်ကို ဆုပ်ကိုင်ထားလိုက်သည်။

[မမကြီးဟွား နင် ဘယ်လို မှန်းလိုက်တာလဲ၊ ငါ့ကို ပြောပြပါလား]

[ကြည့်စမ်း၊ ပုံမှန်ဆို နင် ဘယ်လို အတင်းအဖျင်းတွေ သိချင်လဲ၊ ငါ နင့်ကို ချက်ချင်း ပြောပြတာပဲလေ၊ ငါ့ရဲ့ ဒီလို တောင်းဆိုမှု သေးသေးလေးကိုတောင် နင် မဖြည့်ဆည်းပေးဘဲ မနေသင့်ဘူး မဟုတ်လား၊ မမကြီးဟွား နော်~]

ချူဟွားသည် တိကျသော ဖရဲသီးကို စားရန် စောင့်ဆိုင်းနေပြီး systemနှင့် စကားစစ်ထိုးရန် အချိန်မဖြုန်းချင်သဖြင့် လျင်မြန်စွာ ပြန်ဖြေလိုက်သည်။ [တကယ်လို့ လုံးဝ မသက်ဆိုင်တဲ့ သူစိမ်းတစ်ယောက်သာ လုပ်ခဲ့မယ်ဆိုရင် နင် ချက်ချင်း ပြောပြမှာပဲလေ]

[လူသတ်မှုနဲ့ ဘာမှမဆိုင်သလို ဖြစ်နေတဲ့သူ၊ ဒါမှမဟုတ် ဒီကိစ္စကို လုပ်ဖို့ အရည်အချင်းမရှိတဲ့သူ ဖြစ်နေမှသာ နင်က "နောက်ကွယ်က လူက ဘယ်သူလဲဆိုတာ နင် သေချာပေါက် စဉ်းစားမိမှာ မဟုတ်ဘူး" ဆိုတဲ့ စကားမျိုး ပြောမှာ]

[နင်က "လူသတ်တရားခံ" လို့ မသုံးဘဲ "နောက်ကွယ်ကလူ" လို့ သုံးထားတာက ရွှီထောင်နဲ့ ဆက်စပ်ပြီး လူသတ်တဲ့သူက ရွှီထောင် မဟုတ်ဘူးဆိုတာ ပြနေတာပဲ၊ သူမက လူသတ်သမား ငှားရမ်းတာ ဒါမှမဟုတ် ညွှန်ကြားတာ ဖြစ်သင့်တယ်]

[သူမက အိမ်တွင်းပုန်း သခင်မလေးတစ်ယောက် ဖြစ်နေတာ၊ မျက်လုံး မကောင်းတာ၊ အပြင်လူတွေနဲ့ အဆက်အသွယ် သိပ်မရှိတာတွေကို ထည့်စဉ်းစားလိုက်ရင် အသက်ကို ပဓာနမထားတဲ့ လူမိုက်တွေကို သိမှာ မဟုတ်ဘူး၊ ရွှီစန်း လူသတ်တဲ့ သက်သေအထောက်အထား မတွေ့မချင်း အဖမ်းခံရမှာ မဟုတ်ဘူးဆိုတော့ ရွှီစန်း သတ်တာပဲ ဖြစ်ဖြစ်၊ ရွှီစန်းက ကူညီပြီး လူသတ်သမား ငှားပေးတာပဲ ဖြစ်ဖြစ် ဖြစ်နိုင်တယ်]

ရှန်လုနှင့် ရွှင့်ထျန်းမြို့တော်ဝန်ကြီးတို့သည် တိတ်တဆိတ် ခေါင်းညိတ်လိုက်ကြသည်။ ခွဲခြမ်းစိတ်ဖြာချက်က အလွန် အဓိပ္ပာယ် ရှိလှသည်။ သို့သော် အဓိပ္ပာယ် မရှိသော အချက်တစ်ချက် ရှိနေသည်။ ရွှီထောင်က ဘာကြောင့် လူသတ်ချင်စိတ် ပေါက်သွားရသနည်း။

ရွှီထောင်က ဒဏ်ရာအပြင်းအထန် ရထားတဲ့ ရွှီစန်းကို တွေ့တော့ ရွှီစန်းကို ဆေးကုသဖို့ ပို့ပေးခဲ့ပြီး ဆေးဖိုး ပေးခဲ့တယ်လို့ systemက အရင်တုန်းက ပြောခဲ့တယ် မဟုတ်လား။

အဲဒီလောက် ကြင်နာတတ်တဲ့ မိန်းကလေးတစ်ယောက်က ဘယ်လို ကိစ္စမျိုး ကြုံတွေ့ခဲ့ရလို့များ လူသတ်ချင်စိတ် ပေါက်သွားရတာလဲ။

Systemသည် ၎င်း၏ စကားအနည်းငယ်မှနေ၍ အမှန်တရားကို မှန်းဆနိုင်သော ချူဟွား၏ အရည်အချင်းကြောင့် အံ့ဩမှင်တက်သွားပြီး အချိန်အတော်ကြာ စကားမပြောနိုင် ဖြစ်သွားတော့သည်။ ၎င်း၏ သခင်သည် တိုက်ပွဲပေါင်းများစွာ ကြုံတွေ့ခဲ့ဖူးသော စုံထောက်တစ်ဦးနှင့် တူနေသည်ပင်။

အရမ်း မိုက်တာပဲ။ အနာဂတ်မှာ ဘုရင်မဖြစ်လာမဲ့သူနဲ့ တကယ် ထိုက်တန်ပါတယ်။

Systemသည် ပင်လယ်ဖျံကဲ့သို့ လက်ခုပ်တီးလိုက်သည်။ [မမကြီးဟွား နင် အရမ်းတော်တာပဲ၊ ဒီအဆင့်ထိ တွေးမိပြီးမှတော့ ဆက်ပြီး တွေးကြည့်ပါဦးလား]

ချူဟွားလက်ထဲတွင် သက်သေအထောက်အထား များများစားစား မရှိပေ။ တွေးခေါ် ယူဆချက်ဟု ဆိုသည်ထက် ထင်ကြေးပေးခြင်းဟု ဆိုလျှင် ပိုမှန်ကန်ပေလိမ့်မည်။

သူမသည် အိမ်ပြန် အိပ်ချင်နေသဖြင့် systemကို မြန်မြန် ပြောစေချင်သော်လည်း သူမ၏ တွေးခေါ်ယူဆနိုင်စွမ်းကို သက်သေပြရန် အခွင့်အရေး ရခဲလှသဖြင့် ပေါ့ပေါ့ပါးပါး စမ်းသပ်ကြည့်ရန် ဆုံးဖြတ်လိုက်သည်။

ချူဟွားသည် မှုခင်းဆေးစစ်ချက် အစီရင်ခံစာများကို စုစည်းလိုက်သည်။ "လူကြီးမင်းရွှင့်ထျန်း ကျေးဇူးပြုပြီး ကြည့်ပါဦး"

ရွှင့်ထျန်းမြို့တော်ဝန်ကြီးသည် နားစွင့်ပြီး ဖရဲသီးစားနေစဉ် ချူဟွားက သူ့ကို ခေါ်လိုက်သဖြင့် ရုတ်တရက် ကြောင်သွားပြီး ငုံ့ကြည့်လိုက်ရာ သူ အကြိမ်ကြိမ်အခါခါ ကြည့်ရှုခဲ့ပြီးသော မှုခင်းဆေးစစ်ချက် အစီရင်ခံစာများ ဖြစ်နေလေသည်။

"ဘာပြဿနာ ရှိလို့လဲ"

ချူဟွား: "လူ့မျက်လုံးက အာရုံကြောတွေနဲ့ ဦးနှောက်ကို ချိတ်ဆက်ထားတာ၊ စူးရှို့မှာ ဒီလို အသက်မွေးဝမ်းကျောင်းဆိုင်ရာ ဗဟုသုတ မရှိလို့ မလျော်ကန်တဲ့ ကိုင်တွယ်မှုတွေကြောင့် သားကောင်တွေ သေဆုံးသွားခဲ့ရတာ၊ မျက်လုံးနေရာက ဒဏ်ရာက သေစေနိုင်တဲ့ ဒဏ်ရာ၊ သေဆုံးပြီးမှ ရတဲ့ ဒဏ်ရာ မဟုတ်ဘူး"

"စမ်းသပ်မှု လုပ်ငန်းစဉ်မှာ အနှောင့်အယှက် မရှိဖို့ သေချာစေဖို့အတွက် စူးရှို့က သားကောင်တွေကို မေ့ဆေး သို့မဟုတ် ထုံဆေးတွေ ပေးခဲ့တယ်၊ ဒါကြောင့်လည်း ကွင်းဆက်လူသတ်မှုမှာ သားကောင်တွေရဲ့ ခန္ဓာကိုယ်ပေါ်မှာ ပြင်ပဒဏ်ရာ၊ မသေခင် ရတဲ့ ဒဏ်ရာ၊ ခုခံဒဏ်ရာတွေ သိပ်မရှိရတာ ဖြစ်တယ်"

"အခု အလောင်းသစ်ရဲ့ သေစေနိုင်တဲ့ ဒဏ်ရာက နှလုံးမှာ ဖြစ်ပြီး မျက်လုံးက သေပြီးမှ ထုတ်ခံရတာ၊ ဒါက လူသတ်သမားက သားကောင် အရှင်လတ်လတ် မျက်လုံး ထုတ်ခံရမှာကို မကြည့်ရက်ကြောင်း ပြသနေတယ်"

အလားတူ ခွဲခြမ်းစိတ်ဖြာမှုကို ရွှင့်ထျန်းမြို့တော်ဝန်ကြီးလည်း လုပ်ဆောင်ခဲ့ဖူးသော်လည်း သံသယ ဖြစ်စရာ တစ်ချက် ရှိနေသေးသည်။ "ခုခံဒဏ်ရာဆိုတာ ခုခံတဲ့ လုပ်ငန်းစဉ်ကနေ ဖြစ်လာတဲ့ ဒဏ်ရာကို ပြောတာလား"

ချူဟွားသည် တုံ့ဆိုင်းသွားပြီး အလွန်အမင်း ကျွမ်းကျင်သော မှုခင်းဆေးပညာ ဝေါဟာရများကို ထုတ်မပြောတော့ဘဲ စားပွဲပေါ်ရှိ စုတ်တံကို ကောက်ယူကာ ရှန်လုကို ကမ်းပေးလိုက်သည်။ "ဆရာ ဒါကို ဓားမြှောင်လို့ သဘောထားပြီး ကျွန်မကို ထိုးလိုက်ပါ"

အရေးကြီးကိစ္စ ဖြစ်နေသဖြင့် ရှန်လုသည် ငြင်းဆန်ခြင်း မပြုဘဲ စုတ်တံဖြင့် ချူဟွားကို ထိုးလိုက်၏။

ချူဟွားသည် ရှန်လု ထိုးလိုက်သော စုတ်တံကိုင်ထားသည့် လက်ကို လက်တစ်ဖက်ဖြင့် ဖမ်းဆုပ်လိုက်ပြီး အခြားလက်တစ်ဖက်ဖြင့် စုတ်တံကို လှမ်းဆွဲလိုက်သည်။ "တစ်ယောက်ယောက်က လက်နက်နဲ့ ကျွန်မကို သတ်တဲ့အခါ အသက်ရှင်ချင်စိတ်ကြောင့် ကျွန်မ သူ့ကို သေချာပေါက် တားဆီးမိလိမ့်မယ်၊ တစ်ဖက်လူကလည်း ကျွန်မကို တားဆီးမယ်၊ ဒါမှမဟုတ် ထပ်ပြီး သတ်ဖို့ ကြိုးစားလိမ့်မယ်"

ရှန်လုသည် သဘောပေါက်သွားပြီး စုတ်တံ မကိုင်ထားသော အခြားလက်တစ်ဖက်ဖြင့် ချူဟွားကို တွန်းလိုက်သည်။ "လူသတ်သမားနဲ့ သားကောင်ကြားက ရုန်းရင်းဆန်ခတ်ဖြစ်မှုကနေ ရတဲ့ ဒဏ်ရာကို ခုခံဒဏ်ရာလို့ ခေါ်တာလား"

ရှင်းပြပြီးနောက် ချူဟွားနှင့် ရှန်လုတို့သည် လက်များကို ပြန်ရုပ်လိုက်ကြသည်။

ချူဟွား: "ဟုတ်တယ်၊ ခုခံဒဏ်ရာ ရှိနေတာက ဒါဟာ လူသတ်မှု ဖြစ်ကြောင်း ဆိုလိုတာပဲ၊ တကယ်လို့ လူသတ်သမားနဲ့ သားကောင်ကြားက သက်ဆိုင်ရာ ဆက်စပ်မှုကို ရှာတွေ့နိုင်ရင် လူသတ်သမားကို ဖော်ထုတ်ဖို့ အဓိက သက်သေအထောက်အထား ဖြစ်လာနိုင်တယ်"

"ဥပမာ ခုခံတဲ့ လုပ်ငန်းစဉ်မှာ ဖြစ်ပေါ်လာနိုင်တဲ့ ကိုက်ရာ၊ ကုတ်ရာတွေ၊ သားကောင်ရဲ့ သွားတွေ ဒါမှမဟုတ် လက်သည်းကြားမှာ ကျန်ရစ်ခဲ့တဲ့ အရေပြားအပိုင်းအစ၊ သွေးစက်တွေ စတာတွေပေါ့၊ ဒါတွေအားလုံးက လူနဲ့ ကိုက်ညီမှု ရှိမရှိ စစ်ဆေးလို့ရတယ်"

ခေတ်သစ်တွင် DNA စစ်ဆေးနိုင်ပြီး DNA ဖော်ထုတ်ခြင်းမှတစ်ဆင့် လူသတ်သမားကို ရှာဖွေနိုင်သော်လည်း ရှေးခေတ်တွင် အဆင့်မြင့် နည်းပညာ မရှိသဖြင့် အများကြီး ပိုမို ခက်ခဲလေသည်။

ချူဟွားသည် ရွှင့်ထျန်းရုံးတော်က အမှုကို မည်သို့ ကိုင်တွယ်သည်ကို မသေချာသော်လည်း ပြောရင်းဆိုရင်း အဆင်သင့်သလို ထည့်ပြောလိုက်ခြင်း ဖြစ်သည်။

ရွှင့်ထျန်းမြို့တော်ဝန်ကြီးသည် မျက်လုံးများ အရောင်တောက်သွားသည်အထိ နားထောင်နေလေသည်။ ချူဟွား ပြောသော အရာများသည် အတွေ့အကြုံရှိသော ရုံးတော် အမှုထမ်းများနှင့် မှုခင်းသမားတော်များသာ သိရှိကြပြီး အမှုစစ်ဆေးရာတွင် အသုံးပြုကြသော်လည်း ချူဟွားကဲ့သို့ သီးသန့် ဝေါဟာရ သတ်မှတ်ထားခြင်းမျိုး မရှိပေ။

ချူဟွားသည် အမှုအကြောင်း ပြန်ပြောလိုက်သည်။ "အလောင်းအသစ်ရဲ့ လက်တွေနဲ့ လည်ပင်းမှာ လတ်ဆတ်တဲ့ ဒဏ်ရာတွေ မရှိဘူး၊ နှလုံးနေရာက ဒဏ်ရာကလည်း တစ်ချက်တည်းနဲ့ အသေထိုးတာ မဟုတ်ဘူး၊ ဘာတုံ့ပြန်မှုမှ မရှိခဲ့ဘူး၊ ဒါကြောင့် မေ့ဆေး ပေးပြီးမှ လုပ်ဆောင်ခဲ့တာ ဖြစ်သင့်တယ်"

"မှုခင်းဆေးစစ်ချက် အစီရင်ခံစာအရ အလောင်းအသစ်ရဲ့ မျက်လုံး ထုတ်ခံထားရတဲ့ အရာတွေက စူးရှို့ ချန်ထားခဲ့တဲ့ အရာတွေနဲ့ အရမ်း တူနေတယ်၊ စူးရှို့က မျက်လုံးကို ပိုမို ပြည့်ပြည့်စုံစုံ တူးထုတ်ဖို့အတွက် မျက်လုံးတစ်ဝက်ပုံသဏ္ဌာန် ကိရိယာတစ်ခု ဖန်တီးဖို့ အချိန်အကြာကြီး ယူခဲ့တယ်၊ အဆက်မပြတ် ပြုပြင်ပြီး စမ်းသပ်ခဲ့တယ်၊ ဒါမှ မျက်ခွံကို မထိခိုက်စေဘဲ မျက်လုံးကို တူးထုတ်နိုင်ခဲ့တာ"

"ဒီလောက် တူအောင် တုပနိုင်တာကို ကြည့်ရင် ဒီလူက စူးရှို့ ကျူးလွန်ခဲ့တဲ့ အမှုရဲ့ အသေးစိတ် အချက်အလက်တွေကို သိနေတယ်၊ စူးရှို့ သိတဲ့ လူတစ်ယောက်ယောက် ဖြစ်ရမယ်၊ ဒါမှမဟုတ် ရွှင့်ထျန်းရုံးတော်က တစ်ယောက်ယောက် သတင်းပေါက်ကြားတာ ဖြစ်ရမယ်"

ရွှင့်ထျန်းမြို့တော်ဝန်ကြီး၏ ကိုယ်မွေးများသည် ထောင်ထလာလေသည်။

သူသည် ချူဟွားနှင့် systemတို့၏ စကားပြောဆိုမှုမှတစ်ဆင့် နောက်ကွယ်က လူသည် ရွှီထောင် ဖြစ်ကြောင်း သိရှိပြီးဖြစ်ရာ ရှေ့က ဖြစ်နိုင်ခြေကို ဖယ်ထုတ်လိုက်သော်လည်း ရွှီထောင်က စူးရှို့ ကျူးလွန်ခဲ့သော အမှု၏ အသေးစိတ်ကို မည်သို့များ သိနိုင်ပါမည်နည်း။ ရွှင့်ထျန်းရုံးတော်ထဲမှာ တကယ်ပဲ အမှုအကြောင်း ပေါက်ကြားတဲ့သူ ရှိနေတာလား။

Systemသည် ပျော်ရွှင်စွာ လက်ခုပ်တီးလိုက်သည်။ [ဖြောင်း ဖြောင်း ဖြောင်း—— မမကြီးဟွား နင် အရမ်းတော်တာပဲ၊ ရှိသေးလား]

ချူဟွား: "..." သူမနှင့် system၏ နေရာများ ပြောင်းပြန် ဖြစ်နေပြီ မဟုတ်ပါလား။

"အတုခိုးပြီး ကျူးလွန်ရတဲ့ ရည်ရွယ်ချက်က ဘာလဲ"

သူမသည် ကိုယ့်မေးခွန်း ကိုယ်ပြန်ဖြေပြီး နောက်ဆက်တွဲ စကားများကို ပြောရန် ရည်ရွယ်ထားသော်လည်း ရွှင့်ထျန်းမြို့တော်ဝန်ကြီးက လျင်မြန်စွာ ဝင်ပြောလိုက်၏။ "မိမိကိုယ်ကို သံသယဖြစ်မှုကနေ လွတ်မြောက်ဖို့နဲ့ လူသတ်မှု သံသယကို တကယ့်လူသတ်သမားဆီ လွှဲချဖို့ ဖြစ်နိုင်တယ်"

တစ်နည်းအားဖြင့် ကြုံတုန်းကြုံခိုက် လူသတ်လိုက်ခြင်းပင်။

ရှန်လုသည် ရှိနေသော အခြားနှစ်ဦးက အမှုကို ဖြေရှင်းရန် နည်းလမ်း ရှာနေကြပြီး သူ ပါဝင်ခြင်း မရှိလျှင် အဆင်မပြေဟု ခံစားရသဖြင့် လိုက်ပြီး စဉ်းစားပေးလိုက်သည်။ "တကယ့်လူသတ်သမားက တခြားလူပါလို့ သက်သေပြဖို့နဲ့ မူလလူသတ်သမားအတွက် အပြစ်လွတ်အောင် လုပ်ပေးဖို့ ဖြစ်နိုင်တယ်"

"စူးရှို့က သုတေသန လုပ်ဖို့အတွက် ခေါင်ပါးတဲ့ နေရာမှာ နေထိုင်တာ၊ ပုံမှန်ဆိုရင် ရင်းနှီးတဲ့ သူငယ်ချင်းလည်း မရှိဘူး၊ ဒါကြောင့် ဆရာ ပြောတဲ့ အကြောင်းပြချက်က မခိုင်လုံဘူး၊ ရွှင့်ထျန်းမြို့တော်ဝန်ကြီး ပြောတဲ့ အကြောင်းပြချက် ဖြစ်နိုင်တယ်" ချူဟွားသည် ရွှင့်ထျန်းမြို့တော်ဝန်ကြီးကို ကြည့်လိုက်သည်။ "လူကြီးမင်းရွှင့်ထျန်း သေဆုံးသူက ဘယ်သူလဲ"

သူမ မေးချင်သည်မှာ သေဆုံးသူနှင့် ရွှီထောင်တို့ မည်သို့ ပတ်သက်နေသနည်း ဟူ၍ပင်။

ကံကောင်းစွာဖြင့် ရွှင့်ထျန်းမြို့တော်ဝန်ကြီးသည် သူမ အမှန်တကယ် မေးမြန်းလိုသည့် အကြောင်းအရာကို သိရှိသဖြင့် ပြန်ဖြေလိုက်၏။ "မှုခင်းသမားတော်က အလောင်းစစ်ဆေးပြီးတာနဲ့ ကျုပ်က မင်းကို လာရှာတာ၊ ဒီလူ မည်သူမည်ဝါ ဖြစ်ကြောင်းကို အတည်မပြုရသေးဘူး"

သေဆုံးသူ၏ ခန္ဓာကိုယ်ပေါ်ရှိ အဝတ်အစားများကို ကြည့်ရှုပြီး မည်သူမည်ဝါ ဖြစ်ကြောင်း ခွဲခြားနိုင်သည့် ပစ္စည်းများ ရှိမရှိ ကြည့်ရှုကာ သေဆုံးရသည့် အကြောင်းအရင်းကို ရိုးရှင်းစွာ စစ်ဆေးခြင်းသာ ဖြစ်သည်။ ရင်ခွဲစစ်ဆေးရန် မလိုသလို မိသားစု၏ သဘောတူညီချက် ရယူရန်လည်း မလိုသဖြင့် ဤမျှ မြန်ဆန်နေခြင်း ဖြစ်သည်။

ချူဟွားလည်း မတတ်နိုင်တော့ပေ။

မည်သူမည်ဝါမှန်း အတည်မပြုနိုင်သေးလျှင် ရွှီထောင်နှင့် မည်သို့မျှ ချိတ်ဆက်၍ ရနိုင်မည် မဟုတ်ပေ။

Systemသည် ခါးထောက်ချင်စိတ် ပေါက်သွားတော့သည်။ [ကြည့်ရတာ နင်တို့ ငါမရှိဘဲ မဖြစ်ဘူးနဲ့ တူတယ်]

ချူဟွားကလည်း systemကို ချော့မော့ရတော့သည်။ [ဟုတ်တာပေါ့၊ systemက အရမ်း အရေးကြီးတာပေါ့၊ ဘယ်လိုဖြစ်တာလဲဆိုတာ ငါ့ကို မြန်မြန် ပြောပြပါဦး]

System: [ရွှီစန်းနဲ့ ရွှီထောင်က ဒီကွင်းဆက်လူသတ်မှုနဲ့ ပတ်သက်နေတော့ အမှုကြောင်း အပြည့်အစုံ သိရဖို့ သူတို့ရဲ့ ထွက်ဆိုချက်က မရှိမဖြစ် လိုအပ်တာပေါ့၊ သူတို့ကို ရွှင့်ထျန်းရုံးတော်ကို ခေါ်ပြီး မေးမြန်းခဲ့တယ်လေ]

[ရွှီစန်းကို မျက်လုံးထုတ်တာ၊ အဆိပ်ကောင် အကြောင်းတွေ မေးမြန်းခဲ့တယ်၊ ပြီးတော့ စူးရှို့က သူ့ကို အရင်တုန်းက ကိစ္စတချို့ မေးခဲ့ဖူးတယ်၊ မျက်လုံး လဲလှယ်ဖို့ ဘယ်လို စိတ်ကူးရလဲ ဆိုတာတွေ အပါအဝင်ပေါ့၊ ဒါကြောင့် ရွှီစန်းက အသေးစိတ် အကုန်လုံးကို နားမလည်ရင်တောင် အများစုကိုတော့ သိနေတယ်]

[ကိစ္စ ဖြစ်ပွားပြီးတဲ့နောက် ရွှီအိမ်တော်ထဲမှာ အတင်းအဖျင်းတွေ အများကြီး ရှိနေခဲ့တယ်၊ အဲဒီအထဲမှာ "ရွှီထောင်ကြောင့်သာ မဟုတ်ရင် လူတွေ ဒီလောက် အများကြီး ဘယ်လိုလုပ် သေမှာလဲ"၊ "ရွှီထောင်က ကပ်ဆိုးပဲ"၊ "ရွှီထောင်က လူသတ်သမား" ဆိုတာတွေ ပါဝင်ပြီး ဒါတွေ မကသေးဘူး၊ ရွှီထောင်နဲ့ ရွှီစန်းက အများကြီး ကြားခဲ့ရတယ်]

[ရွှီထောင်က ငယ်စဉ်ကတည်းက ကြုံတွေ့ခဲ့ရတာတွေနဲ့ ကိုယ်ခန္ဓာ ချို့ယွင်းချက်တွေကြောင့် စိတ်နှလုံး နုနယ်ပြီး ထိခိုက်လွယ်တယ်၊ ရွှီအိမ်တော်က အစေခံတွေ သူမကွယ်ရာမှာ အတင်းပြောနေကြတာကို အကြိမ်ကြိမ် ကြားရတော့၊ ဒီအစေခံမ ပြောတာက အရမ်း လွန်လွန်းတယ်ဆိုပြီး ရွှီထောင်က ဒေါသထွက်ပြီး ရွှီစန်းကို အဲဒီအစေခံမကို သတ်ခိုင်းလိုက်တာ]

[အစေခံမ သေဆုံးပြီးနောက် ရွှီထောင်က စိတ်တည်ငြိမ်သွားတော့ ထိတ်လန့်သွားတယ်၊ ရွှီစန်းက သူမကို ဘာမှ မဖြစ်ပါဘူးလို့ နှစ်သိမ့်ပေးပြီး စူးရှို့ နေထိုင်ခဲ့တဲ့ နေရာကို သွားပြီး ကိရိယာတစ်ခု ခိုးယူခဲ့တယ်၊ အစေခံမရဲ့ မျက်လုံးကို တူးထုတ်ပြီး အစေခံမကို သင်္ချိုင်းကုန်းမှာ မြှုပ်နှံလိုက်တယ်လေ]

…