အခန်း ၁၁၈

အပိုင်း (၁၁၈)

ဓာတ်မြေဩဇာ ၁၀ မျိုးကျော်က နောက်ကွယ်တွင် အသက်အန္တရာယ် ခြိမ်းခြောက်နေသကဲ့သို့ ရှိနေသဖြင့် စိုက်ပျိုးရေးဝန်ကြီးသည် လက်ရှိ လက်ထဲတွင် ရှိနေသော အမျိုးအစားကို မည်သို့ အသုံးပြုရမည်ကို အမြန်ဆုံး သိရှိလိုနေလေသည်။ ထို့ကြောင့် ချူအိမ်တော်မှ ထွက်ခွာလာပြီးသည်နှင့် ဓာတ်မြေဩဇာ တစ်အိတ်ကို သယ်ဆောင်ကာ စိုက်ပျိုးရေးရုံးသို့ အပြေးအလွှား ပြန်သွားလေတော့သည်။

ဘဏ္ဍာရေးဝန်ကြီးသည် ဆောက်လုပ်ရေးဌာနသို့ အလျင်အမြန် ရောက်ရှိလာပြီး ပုံဆွဲနေသော ဆောက်လုပ်ရေးဝန်ကြီးကို ဆွဲကိုင်ကာ လှုပ်ခါလိုက်၏။ "ခင်ဗျား ဘိလပ်မြေ၊ သံချောင်းနဲ့ ကွန်ကရစ် ဆိုတာ ကြားဖူးလား"

ဆောက်လုပ်ရေးဝန်ကြီးသည် ပုံဆွဲနေရာမှ ကြောင်တောင်တောင်ဖြင့် မော့ကြည့်လာသည်။

"ဘာပစ္စည်းတွေလဲ"

"မကြားဖူးဘူးလား၊ ဒါဆို ကိစ္စမရှိတော့ဘူး" ဘဏ္ဍာရေးဝန်ကြီးသည် ပါးစပ်ဖြဲကာ ကျယ်လောင်စွာ ရယ်မောလိုက်ပြီး သူ့အပြုံးမှာ ဝံပုလွေအဘွားကြီးကဲ့သို့ပင်။ "လူကြီးမင်းချူ ပြောတာလေ၊ အဆောက်အဦ ဆောက်တာနဲ့ လမ်းခင်းတာတွေမှာ သုံးလို့ရတယ်တဲ့"

ချူဟွား ပြောသည်ဟု ကြားလိုက်ရသောအခါ ဆောက်လုပ်ရေးဝန်ကြီး၏ စိတ်ထဲတွင် အတန်ငယ် နားလည်သွားလေသည်။ သူမ၏လက်ထဲတွင် ပစ္စည်းကောင်းများစွာ ရှိသော်လည်း ပညာသင်ကြားနေရသဖြင့် အလုပ်ရှုပ်ကာ ထုတ်ပြရန် အချိန်မရှိခြင်း ဖြစ်ပေလိမ့်မည်။

ဤကာလအတွင်း နန်းစောင့်တပ်မှ တင်ပြလာသော အစီရင်ခံစာများတွင် ချူဟွားသည် ရှန်လု၏ သင်တန်းကို မတက်ရောက်သည်မှာ လဝက်ခန့် ရှိပြီဖြစ်ကြောင်း၊ နေ့စဉ် ဓာတ်ခွဲခန်းထဲတွင်သာ အောင်းပြီး သုတေသန လုပ်နေကြောင်း ပါဝင်သည်ကို ပြန်လည် သတိရလိုက်မိ၏။ ဆောက်လုပ်ရေးဝန်ကြီးသည် ရုတ်တရက် ဉာဏ်ပွင့်သွားပြီး ပြောလိုက်လေသည်။ "လဝက်အတွင်းမှာ ဘိလပ်မြေ၊ သံချောင်းနဲ့ ကွန်ကရစ် သုံးမျိုးလုံး လုပ်လိုက်တာလား၊ ဒီလောက်တောင် မြန်တာလား"

ဤစွမ်းဆောင်ရည်မှာ မဆိုးလှပေ။

"မြန်တယ် ဟုတ်လား" ဘဏ္ဍာရေးဝန်ကြီး၏ မျက်နှာထားမှာ တစ်ခဏမျှ ရှုံ့မဲ့သွားလေသည်။ "ဘာကို မြန်တာလဲ။ လဝက်နေမှ ဓာတ်မြေဩဇာ တစ်မျိုးပဲ ထွက်လာတာ၊ အဲဒါတောင် လုပ်ပဲ လုပ်တတ်ပြီး မသုံးတတ်ဘူးတဲ့၊ ဘဏ္ဍာရေးဌာနနဲ့ စိုက်ပျိုးရေးရုံးက ကိုယ့်ဘာသာ စမ်းသပ်ရဦးမှာ"

မကျေနပ်ချက်များ ပြည့်နှက်နေသော စကားသံ ထွက်ပေါ်လာသည်နှင့် ဘဏ္ဍာရေးဝန်ကြီး ဘာလာလုပ်သည်ကို ဆောက်လုပ်ရေးဝန်ကြီး သိလိုက်လေသည်။ သူ့ကို လာပြီး ညည်းညူနေခြင်းပင်။

ထင်ထားသည့်အတိုင်းပင်။ ဘဏ္ဍာရေးဝန်ကြီးက အံကြိတ်ကာ ပြောလာလေသည်။ "ဓာတ်မြေဩဇာ သုံးရင် သီးနှံအထွက်နှုန်းက ၃၊ ၄ ဆ တိုးလာမယ် ဆိုတဲ့ ရလဒ်ကို ရှေ့မှာ မုန်လာဥလို ချိတ်ထားမှတော့ ငါတို့လို မြည်းအိုကြီးတွေက အသက်ကုန် ကြိုးစားရတော့မှာပေါ့"

ဆောက်လုပ်ရေးဝန်ကြီး: "..."

အမှတ်မမှားလျှင် ဤလူ ဘဏ္ဍာရေးဒုဝန်ကြီး ဖြစ်စဉ်က "ငါက ငယ်ပါသေးတယ်၊ သာ့ရှန်းအတွက် နောက်ထပ် နှစ် ၃၀ လောက် ဆက်လုပ်နိုင်သေးတယ်" ဟု ကြွားဝါခဲ့ဖူးလေသည်။ ထိုအချိန်က အရှင်မင်းကြီးသည် မင်းဆရာကြီးနှင့် မင်းဆရာအိုကြီးတို့ကို ကြည့်ပြီး သူတို့နှစ်ဦးလုံး နောက်ထပ် နှစ် ၃၀ ခန့် ဆက်လုပ်နိုင်မည်ဟု ထင်မှတ်သွားခဲ့ရသည်။

နောက်ထပ် နှစ် ၃၀ ဆက်လုပ်နိုင်သည်ဟု တွင်တွင်ပြောနေသူက ယခုအခါ ကိုယ့်ကိုယ်ကိုယ် မြည်းအိုကြီး တစ်ကောင်ဟု ဝန်ခံလာရသည်အထိ ဓာတ်မြေဩဇာက ကြောက်စရာ ကောင်းလှပေသည်။

ပြောသင့်သည်ကို ပြောရမည် ဆိုလျှင် ဆောက်လုပ်ရေးဝန်ကြီးက တရားမျှတသော စကားတစ်ခွန်း ပြောလိုက်လေ၏။

"တကယ်လို့ ၃၊ ၄ ဆ တိုးလာမယ် ဆိုရင် ပြည်သူတွေ စားဝတ်နေရေး ပြေလည်သွားမှာပဲ၊ ခင်ဗျားတို့ လုပ်နေတာက တိုင်းပြည်နဲ့ ပြည်သူအတွက် အကျိုးရှိတဲ့ ကိစ္စကြီးပဲ၊ သမိုင်းတွင်ကျန်ရစ်မဲ့ ကိစ္စလေ"

စာပေပညာရှင်များ အလိုချင်ဆုံးက အဘယ်နည်း။ သမိုင်းတွင်ကျန်ရစ်ပြီး နာမည်ကျော်ကြားဖို့ မဟုတ်ပါလား။ ဓာတ်မြေဩဇာက သူတို့ကို တစ်လှမ်းတည်းနှင့် ထိုနေရာသို့ ရောက်စေနိုင်မည် ဖြစ်ရာ ဘာများ မကျေနပ်စရာ ရှိဦးမည်နည်း။

ဆောက်လုပ်ရေးဝန်ကြီး၏ စိတ်ထဲတွင် အနည်းငယ် မနာလို ဖြစ်မိသွားသည်။ ဘဏ္ဍာရေးဝန်ကြီးက သူ့ကို လာရှာပြီး ပွစိပွစိ လုပ်နေခြင်းက ညည်းညူတာဟု ခေါင်းစဉ်တပ်ထားသော်လည်း တကယ်တမ်းတွင် ကြွားဝါနေခြင်း ဖြစ်သည်ဟု သူ ခံစားလိုက်ရသောကြောင့်ပင်။

ဘဏ္ဍာရေးဝန်ကြီးသည် ထိုမနာလို ဝန်တိုသည့် အငွေ့အသက်ကို အာရုံခံမိလိုက်သဖြင့် မျက်ခုံးများ လှုပ်သွားလေသည်။ ဟာ၊ ကျုပ် ဒီလောက် သနားစရာ ကောင်းနေတာကို ခင်ဗျားက မနာလို ဖြစ်နေသေးတာလား။

"အရင်တုန်းက ကျုပ်တို့ စိုက်ပျိုးရေးမှာ မြေဩဇာ တစ်မျိုးပဲ ရှိတာ၊ အခု လူကြီးမင်းချူက မြေဩဇာ ၁၀ မျိုးကျော် လုပ်ဖို့ ပြင်နေပြီ၊ အပင်တွေ လိုအပ်သမျှ ဖြည့်ဆည်းပေးမယ်တဲ့၊ သူက ယေဘုယျလောက်ပဲ သိတာ၊ တကယ်တမ်း ဘယ်လို သုံးရမလဲ၊ ပမာဏ ဘယ်လောက် သုံးရမလဲ၊ ဘယ်အချိန် သုံးရမလဲ ဆိုတာတွေကို ဘဏ္ဍာရေးဌာနနဲ့ စိုက်ပျိုးရေးရုံးက ကိုယ့်ဘာသာ လေ့လာရမှာ"

"ခင်ဗျားက ဒီအလုပ် ကောင်းတယ်၊ သမိုင်းတွင်မယ်လို့ ထင်ရင် ငါတို့နှစ်ယောက် နေရာလဲကြမလား"

ဒီနာမည်ဂုဏ်သတင်း ခင်ဗျားကို ပေးမယ်လေ။

ဆောက်လုပ်ရေးဝန်ကြီး: !!! ဒီလိုကိုး ဟားဟားဟားဟား။

သူ၏အပြုံးကို ဖုံးကွယ်၍ မရတော့ချေ။ "မြေဩဇာ ၁၀ မျိုးကျော်ဆိုတော့ ခင်ဗျား သာ့ရှန်းအတွက် နောက်ထပ် နှစ် ၃၀ ဆက်လုပ်ဖို့ လုံလောက်ပါတယ်၊ ဒီလောက်ကောင်းတဲ့ အလုပ်ကို ကျွန်တော် မလုတော့ပါဘူး"

ဘဏ္ဍာရေးဝန်ကြီး နှုတ်ခမ်းများ တွန့်သွားလေသည်။ ဒီလိုနေ့မျိုး ရောက်လာမည်မှန်း သိခဲ့လျှင် သူ မည်သည့်အတွက်ကြောင့် ထိုမျှ ကြွားဝါခဲ့မိမည်နည်း။ အခုတော့ အရင်က ပြောခဲ့သည့် စကားများဖြင့် ပြန်ပိတ်လှောင်ခံနေရပြီး ပြန်ပြောစရာ စကားမရှိ ဖြစ်နေရသည် မဟုတ်ပါလား။

သို့သော် ငါ သေလျှင် မင်းလည်း မရှင်စေရ။

ဘဏ္ဍာရေးဝန်ကြီး၏ အပြုံးမှာ မဲမှောင်အေးစက်နေပြီး လေသံမှာလည်း ကြောက်မက်ဖွယ် ကောင်းနေလေသည်။ "သူများ ဒုက္ခရောက်တာကို ပျော်နေတာလား"

ဆောက်လုပ်ရေးဝန်ကြီး တုန်လှုပ်သွားပြီး အလျင်အမြန် ငြင်းဆိုလိုက်၏။ "ဘယ်ကသာ၊ အားလုံးက လုပ်ဖော်ကိုင်ဖက်တွေပဲ၊ ကျုပ်က ဘယ်လိုလုပ် အဲဒီလို ဖြစ်ရမှာလဲ"

ပါးစပ်ကသာ ထိုသို့ ပြောနေသော်လည်း နှုတ်ခမ်းထောင့်မှ အပြုံးကိုမူ မည်သို့မျှ ဖုံးဖိထား၍ မရပေ။ လုပ်ဖော်ကိုင်ဖက် သံယောဇဉ် ဆိုတာ ဒီလောက်ပါပဲ၊ ရှိတုန်းလေး တန်ဖိုးထားပါ ဟု မျက်နှာပေါ်တွင် အထင်းသား ပေါ်နေလေသည်။

ဘဏ္ဍာရေးဝန်ကြီး: "..." ဟွန်း၊ ခင်ဗျား ပြောတာကို ယုံမဲ့အစား သရဲကို ယုံလိုက်မယ်။

"ဘိလပ်မြေ၊ သံချောင်း၊ ကွန်ကရစ် ဆိုတာ မကြားဖူးဘူး မဟုတ်လား။ အဲဒါတွေ အကုန်လုံးက ခင်ဗျားတို့ ဆောက်လုပ်ရေးဌာနရဲ့ အလုပ်တွေပဲ"

ဆောက်လုပ်ရေးဝန်ကြီး တစ်စုံတစ်ခုကို သတိထားမိလိုက်ပြီး အပြုံးများ တဖြည်းဖြည်း အေးခဲသွားလေသည်။ သူ တွေးနေတဲ့ အဓိပ္ပာယ်မျိုးတော့ မဟုတ်လောက်ပါဘူးနော်။

ဘဏ္ဍာရေးဝန်ကြီးက ခိုင်မာပြတ်သားသော အကြည့်ဖြင့် သူ့ကို အဖြေပေးလိုက်သည်။ ခင်ဗျား တွေးနေတဲ့ အဓိပ္ပာယ်မျိုးပါပဲ။

ထို့အပြင် ပို၍ပင် ဆိုးရွားနိုင်သေးသည်။ "လူကြီးမင်းချူ လက်ထဲမှာ ပစ္စည်းကောင်းတွေ အများကြီး ရှိသေးတယ်၊ သံမဏိတို့ စတီးတို့ ဆိုလား၊ ဓာတ်မြေဩဇာလိုပဲ လုပ်ပဲ လုပ်တတ်ပြီး သုံးမတတ်ဘူးလား ဆိုတာတော့ မသိဘူး"

"အဆောက်အဦ ဆောက်တာနဲ့ လမ်းခင်းတာက ကျုပ်တို့ စိုက်ပျိုးရေးထက် ပိုနှေးတယ်ဗျ၊ ခင်ဗျားတို့ လေ့လာဖို့ နှစ် ၃၀ လောက်တောင် လောက်ပါ့မလား မသိဘူး ဟီးဟီး" ဒီတစ်ခါတော့ သူများ ဒုက္ခရောက်တာကို ပျော်ရွှင်ရမည့်အလှည့်က သူ့ဆီ ရောက်လာလေပြီ။

ဆောက်လုပ်ရေးဝန်ကြီး: "..."

ဟာ၊ မြေခွေးမြီး ပေါ်လာပြီပဲ။ တမင်သက်သက် သူ့ကို လာပြီး ဟားတိုက်တာကိုး။

"ဝန်ကြီး၊ ငါတို့က နှစ်ပေါင်းများစွာ လုပ်ဖော်ကိုင်ဖက်တွေပါ၊ ဘယ်လိုလုပ် ဒီလို ဖြစ်ရတာလဲ"

ဆောက်လုပ်ရေးဝန်ကြီးသည် ရင်ထုမနာ ဖြစ်သွားရလေသည်။ ပြောထားတဲ့ လုပ်ဖော်ကိုင်ဖက် သံယောဇဉ်တွေ ဘယ်ရောက်ကုန်ပြီလဲ။

ဘဏ္ဍာရေးဝန်ကြီးက အေးစက်စွာ ပြုံးလိုက်၏။ အခုမှ ဘယ်လိုလုပ် ဒီလို ဖြစ်ရတာလဲတဲ့လား။ စောစောက ခင်ဗျား ခိုးရယ်နေတုန်းကရော။ ခင်ဗျား သူများဒုက္ခရောက်တာကို ပျော်နေတုန်းကရော။ အဲဒီတုန်းကကျတော့ ဘာလို့ ဒီစကား မပြောခဲ့တာလဲ။

လှည့်ထွက်သွားပြီး ဘဏ္ဍာရေးဌာနသို့ ပြန်ရန် ပြင်လိုက်သော်လည်း မဖြစ်သေးဘူးဟု တွေးလိုက်သည်။ သူတစ်ယောက်တည်း အင်အားက မလုံလောက်သေးဘူး၊ နောက်ထပ် စစ်ကူမိတ်ဆွေအချို့ ရှာရဦးမယ်။

ဆောက်လုပ်ရေးဝန်ကြီး၏ စိတ်ထဲတွင် ဂနာမငြိမ် ဖြစ်နေပြီး ပုံဆွဲရန်လည်း စိတ်မပါတော့ပေ။ မျှော်လင့်ချက် အနည်းငယ် ထားရှိနေသေးသည်။ ဖြစ်ကောင်း ဖြစ်နိုင်ပါတယ်လေ။

ယနေ့အတွက် အစီရင်ခံစာ ရောက်ရှိလာသောအခါ ထိုမျှော်လင့်ချက်လေး လုံးဝ ပျက်စီးသွားရတော့သည်။ ဆောက်လုပ်ရေးဌာန လုပ်ရမည့် အလုပ်တွေက တကယ်ပဲ များလွန်းလှသည်ပင်။

ချူဟွား၏ သုံးသပ်ချက်များကို ထပ်ကြည့်လိုက်သောအခါ...

အရာရှိ မလုပ်တာက ပိုကောင်းတယ် ဆိုတာ ဘာစကားလဲ။ အဲဒီလို မရှိဘူး။ ပစ္စည်းကောင်းတွေ အကုန် ထုတ်ပေးလိုက်ရင် ညီလာခံမှာ အားနေတဲ့လူ ရှိတော့မှာ မဟုတ်ဘူး ဆိုတာ ဘာစကားလဲ။ အနာဂတ် လုပ်ဖော်ကိုင်ဖက်တွေကို ဒီလို ဂျင်းထည့်လို့ မရဘူးလေ။

ဆောက်လုပ်ရေးဝန်ကြီးခမျာ ရင်တုန်ပန်းတုန်နှင့် စိတ်ရှုပ်ထွေးနေလေပြီဖြစ်သည်။

သူတစ်ယောက်တည်း မဟုတ်ပေ။ ဤအစီရင်ခံစာကို မြင်လိုက်ရသော အရှင်မင်းကြီးနှင့် မှူးမတ်အရာရှိများသည်လည်း စိတ်ထဲတွင် အနည်းငယ် ထိတ်လန့်သွားကြသည်။

ချူဟွားလက်ထဲမှ ပစ္စည်းကောင်းများကို သူတို့ ရသလောက် ယူပြီးပြီဟု ထင်မှတ်ထားခဲ့သော်လည်း မြေဩဇာ တစ်မျိုးတည်းနှင့်ပင် သူမက ၁၀ မျိုးကျော် ထပ်ထုတ်ပေးလိုက်ပြီး ဘဏ္ဍာရေးဌာနနှင့် စိုက်ပျိုးရေးရုံးကို ဆယ်စုနှစ်များစွာ အလုပ်ရှုပ်သွားစေမည်ဟု မည်သူက ထင်ထားပါမည်နည်း။

စစ်ဘက်ရေးရာဝန်ကြီးသည် ဒီဇိုင်းဆန်းပြားသော ပေါင်းးစပ်လေး ပုံကြမ်းကို သတိရသွားသည်။ ထိုအပေါ်မှ စက်သီးများ၊ ဝက်အူရစ်များနှင့် အခြား အစိတ်အပိုင်းများကပင် သူတို့ကို အတော်လေး ခေါင်းစားစေခဲ့သည်။

အားလုံးကို သေချာ လေ့လာပြီး ထုတ်လုပ်ကာ အခြားနယ်ပယ်များတွင် အသုံးပြုနိုင်ရန် အနည်းဆုံး နှစ်နှင့်ချီ ကြာမြင့်ဦးမည်။

တရားရေးဝန်ကြီးသည်လည်း ယခင်က အမှုစစ်ဆေးစဉ် ချူဟွား ရံဖန်ရံခါ ပြောတတ်သော ရာဇဝတ်မှု စိတ်ပညာ၊ ရာဇဝတ်သား ပုံဖော်ခြင်း စသည်တို့ကို သတိရသွားလေသည်။ ထိုအကြောင်းအရာများသည် နားထောင်စဉ်က အလွန် အကျိုးကြောင်း ဆီလျော်သော်လည်း သူတို့ကိုယ်တိုင် ရာဇဝတ်သား ဖမ်းဆီးရာတွင် အသုံးပြုသောအခါ အနည်းငယ် စိမ်းသက်နေသေးသည်။

ချူဟွားကို စနစ်တကျ ပြောပြခိုင်းရဦးမည်။ အကယ်၍ ထိုအသိပညာများကို စုစည်းပြီး စာအုပ်အဖြစ် ပြုစုကာ ဖြန့်ဝေနိုင်ပါက သာ့ရှန်း အရာရှိများ၏ အမှုစစ်ဆေးနိုင်စွမ်းကို မြှင့်တင်ပေးနိုင်လိမ့်မည်။

ဝန်ထမ်းရေးရာဝန်ကြီးသည် ဓာတ်မြေဩဇာကြောင့် ဖြစ်ပေါ်လာမည့် လူအင်အား ရွှေ့ပြောင်းမှုများကို ကြိုတင် မြင်တွေ့နေရပြီ ဖြစ်၏။ လာမည့် ဆယ်စုနှစ်များစွာ အတွင်း ညီလာခံ တစ်ခုလုံး၏ ရာထူး ခန့်အပ်မှု၊ ပြောင်းရွှေ့မှုနှင့် ရာထူးတိုးမြှင့်မှုများ မကြာခဏဆိုသလို ဖြစ်ပေါ်လာနိုင်သည်ဟု ခန့်မှန်းရသည်။

ယဉ်ကျေးမှုဝန်ကြီးဌာနသည် ဂယက်အရိုက်မခံရဆုံးဌာန ဖြစ်သင့်သော်လည်း ယဉ်ကျေးမှုဝန်ကြီးသည် ကျင်းပရနိုင်ခြေရှိသော ကောက်သစ်စားပွဲတော်ကို ကြိုတင် မြင်ယောင်နေမိ၏။

စစ်ဘက်အရာရှိများ၏ အတွေးက ပိုရိုးရှင်းသည်။ ချူဟွားသည် သူတို့ကို ပိုသက်သာပြီး ပိုအားကောင်းသော လက်နက်များ၊ ပိုများသော ရိက္ခာများ၊ ပိုထိရောက်သော ဆေးဝါးများ ထောက်ပံ့ပေးနိုင်ပြီး သူတို့၏ နောက်ကွယ်မှ စိုးရိမ်ပူပန်မှုများကို လျှော့ချပေးနိုင်သူ ဖြစ်သည်။ တကယ့် လူကောင်းပဲ။

အရပ်ဘက် စစ်ဘက် အရာရှိများ အားလုံး အပြန်ပြန်အလှန်လှန် စဉ်းစားပြီးနောက် နောက်ဆုံးတွင် ကောက်ချက်တစ်ခု ချလိုက်ကြ၏။ ကောင်မလေးက အသက်ငယ်ငယ်ရွယ်ရွယ်နှင့် အရာရှိလုပ်ပြီး နိုင်ငံတော်အတွက် ပေးဆပ်ဖို့ အသင့်တော်ဆုံးပဲ။

အရမ်း ငယ်လွန်းတယ် ဟုတ်လား။ ငယ်တာ ကောင်းတာပေါ့။ ငယ်မှ သာ့ရှန်းအတွက် နောက်ထပ် ဆယ်စုနှစ်များစွာ ပိုပေးဆပ်နိုင်မှာ။

မှူးမတ်အရာရှိများသည် အရှင်မင်းကြီးထံသို့ အသီးသီး အသနားခံစာများ ပေးပို့ကြတော့သည်။ အရပ်ဘက်အရာရှိများ၏ စာများက သွယ်ဝိုက်ရေးသားကြပြီး စစ်ဘက်အရာရှိများ၏ စာများက တိုတိုတုတ်တုတ် ဖြစ်သည်။ မည်သူ ပေးပို့သည် ဖြစ်စေ အသနားခံစာ၏ အဓိက အချက်မှာ တစ်ခုတည်းသာ။ အရှင်မင်းကြီး၊ ချူဟွားကို စောစောစီးစီး အရာရှိ လုပ်ခိုင်းလိုက်ပါတော့။

အရှင်မင်းကြီး: "..."

သူ သည်းမခံနိုင်တော့ဘဲ နန်းစောင့်တပ်မှူး လင်ယိုကို ဖွင့်ပြောလိုက်တော့သည်။ "ချူဟွားက ပစ္စည်းတစ်ခု ထုတ်လိုက်တိုင်း သူတို့တွေ အလုပ်ရှုပ်သွားပြီး ချူဟွား တစ်ယောက်တည်း ဘေးမှာ အေးအေးဆေးဆေး နေနေရတာကို သူတို့ ကြည့်မရ ဖြစ်နေတယ်လို့ ကျန်း သံသယ ရှိတယ်"

လင်ယိုက စိတ်ထဲတွင် တွေးလိုက်သည်။ ချူဟွားလည်း မအားပါဘူး၊ ညသင်တန်း မတက်၊ အလှလေးတွေ မကြည့်ဘဲ နေလိုက်တာ နှစ်ပေါင်လောက်တောင် ပိန်သွားရှာပြီ။

အရှင်မင်းကြီးက ဆက်ပြောလေသည်။ "ကျန်းက သူ့ကို ညီလာခံထဲ စောစော မခေါ်ချင်လို့လား။ ကျန်းက သူ့ကို သာ့ရှန်းအတွက် စောစော အလုပ်မလုပ်စေချင်လို့လား။ မင်းဆရာကြီးနဲ့ မင်းဆရာအိုကြီးက လူမလွှတ်ပေးချင်လို့လေ"

မင်းတို့ပဲ ဝမ်းနည်းတတ်တာလား။ ကျန်းလည်း ဝမ်းနည်းတာပါပဲ။

လင်ယိုက ခဏ စောင့်လိုက်သော်လည်း ဆက်ပြောမည့် စကား မကြားရသဖြင့် ထောက်ခံစကား တစ်ခွန်း ပြောလိုက်သည်။ "အရှင်မင်းကြီး၊ မင်းဆရာကြီးနဲ့ မင်းဆရာအိုကြီးက ချူဟွားကို ဆွေကြီးမျိုးကြီးတွေနဲ့ အရာရှိတွေရဲ့ ထောက်ခံချက်နဲ့ ညီလာခံ ဘာလို့ ဝင်ခွင့် မပေးတာလဲ"

အကယ်၍ ထောက်ခံချက်ဖြင့် ညီလာခံ ဝင်ရောက်မည် ဆိုပါက နောက်ထပ် ငါးနှစ် စောင့်စရာ မလိုဘဲ ချက်ချင်း ရာထူးယူပြီး အလုပ်စလုပ်နိုင်မည် ဖြစ်သည်။

အရပ်ဘက် စစ်ဘက် အရာရှိများ အသနားခံစာ ပေးပို့ရခြင်း၏ ရည်ရွယ်ချက်မှာလည်း ချူဟွားကို ဤလမ်းကြောင်းမှ သွားစေချင်သောကြောင့် ဖြစ်သည်။

အရှင်မင်းကြီးသည် အသနားခံစာ အနည်းငယ်ကို လှန်ကြည့်လိုက်ရာ အားလုံးက ချူဟွားကို အရာရှိ ခန့်စေချင်သည့် အကြောင်းအရာများသာ ဖြစ်နေသဖြင့် ဘေးသို့ လွှင့်ပစ်လိုက်မှ မျက်စိနောက် သက်သာသွားတော့သည်။ ထို့နောက် ခေါင်းကိုက်စွာဖြင့် မျက်ခုံးနှစ်ခုကြားကို နှိပ်နယ်လိုက်လေသည်။

"အမျိုးသမီးတွေ ညီလာခံ ဝင်တာက အငြင်းပွားစရာတွေ အများကြီး ရှိနေပြီးသား၊ ထောက်ခံချက်နဲ့ ဝင်ရင် ပြည်သူတွေက နောက်ဖေးပေါက်က ဝင်လာတယ်လို့ ထင်သွားလိမ့်မယ်၊ သူ့မှာ အကျိုးဆောင်မှုတွေ ဘယ်လောက်ရှိရှိ ဘေးလူရဲ့ ကောင်းမှုတွေလို့ပဲ သတ်မှတ်ခံရလိမ့်မယ်၊ နန်းတွင်းစာမေးပွဲကျတော့ မတူတော့ဘူးလေ"

"ပြည်သူတွေရဲ့ မျက်လုံးထဲမှာ နန်းတွင်းစာမေးပွဲက တရားမျှတတဲ့ နည်းလမ်း တစ်ခုပဲ၊ သူက ဖြေဆိုသူတွေ အများကြီးထဲကနေ ထူးချွန်စွာ အောင်မြင်လာရင် သူ့မှာ အရည်အချင်း ရှိတယ် ဆိုတာ သေချာသွားပြီ၊ အငြင်းပွားစရာတွေ နည်းသွားလိမ့်မယ်"

လင်ယိုကမူ ဤကိစ္စကို စိတ်ထဲတွင် သိပ်ဘဝင်မကျလှပေ။ နန်းတွင်းစာမေးပွဲမှာလည်း စာခိုးချတာ၊ မေးခွန်းပေါက်ကြားတာတွေ ရှိတာပဲ။

ပြည်သူများက လူတစ်ယောက်ကို မယုံကြည်လျှင် မည်သည့် နည်းလမ်းဖြင့် ညီလာခံ ဝင်ရောက် အရာရှိ ဖြစ်လာသည် ဖြစ်စေ ယုံကြည်မည် မဟုတ်ပေ။ နောင်တစ်ချိန်တွင် နိုင်ငံရေး စွမ်းဆောင်ရည်များနှင့် အချက်အလက်များကို အသုံးပြုပြီး လူတိုင်းကို သက်သေပြနိုင်မှသာ ယုံကြည်ကြလိမ့်မည်။

ဒါပေမဲ့ ချူဟွားက အရည်အချင်းနဲ့ နိုင်ငံရေး စွမ်းဆောင်ရည် မရှိတာမှ မဟုတ်တာ။

သူမ လုပ်ဆောင်ခဲ့သော အကျိုးပြုမှုများထဲမှ အများပြည်သူကို ချပြနိုင်သည့် အစိတ်အပိုင်းများကို ရွေးထုတ် ရှင်းပြလိုက်လျှင် အနည်းဆုံး အဆင့် ၄ အရာရှိလောက်တော့ ရနိုင်လိမ့်မည်။

ယခုအချိန်တွင် အရည်အချင်းလည်း ရှိ၊ အားကိုးစရာလည်း ရှိသော ချူဟွားသည် ညီလာခံဝင် အရာရှိ ဖြစ်လိုသော်လည်း လုပ်ငန်းစဉ်များက ဤမျှ ကွေ့ကောက် ရှုပ်ထွေးနေသဖြင့် အရှင်မင်းကြီးပင် သက်ပြင်းမချဘဲ မနေနိုင်တော့ပေ။

ထားလိုက်ပါတော့၊ အမျိုးသမီး နန်းတွင်းစာမေးပွဲ ကိစ္စကို အရင် လုပ်လိုက်တာ ပိုကောင်းမယ်။

နောက်တစ်နေ့မှ စတင်ပြီး ညီလာခံတွင် အမျိုးသမီး နန်းတွင်းစာမေးပွဲအကြောင်း စတင် ဆွေးနွေးကြတော့သည်။

ယခင်က မှူးမတ်အရာရှိများသည် ဤကိစ္စအပေါ် သဘောထား မကွဲပြားခဲ့ကြပေ။ ကန့်ကွက်သူ ကန့်ကွက်၊ ကြားနေပြီး အချိန်ဆွဲသူ ဆွဲနှင့် ရှိခဲ့ကြသည်။

ယခုတွင် ကန့်ကွက်သူ အနည်းငယ် ရှိနေသေးသော်လည်း သဘောထားများမှာ ယခင်ကလောက် မပြင်းထန်တော့သလို အသံလည်း မကျယ်လောင်ကြတော့ပေ။ အကြောင်းမှာ ဤမူဝါဒသည် မည်သူ့အတွက် လမ်းခင်းပေးနေသည်ကို သူတို့ ရှင်းရှင်းလင်းလင်း သိနေကြသောကြောင့်ပင်။

မူဝါဒသစ် တစ်ခု ထွက်ပေါ်လာရန်အတွက် အချိန်ကြာမြင့်စွာ ဆွေးနွေး ငြင်းခုံရလေ့ရှိပြီး အကောင်အထည်ဖော်ရန် မမြန်ဆန်လှပေ။

အရှင်မင်းကြီးက ဤကိစ္စအတွက် အနည်းဆုံး ၂ နှစ်၊ ၃ နှစ်ခန့် ကြာမြင့်မည်ဟု ထင်မှတ်ထားပြီး ချူဟွား ပထမဆုံး အကြိမ် အမျိုးသမီး နန်းတွင်းစာမေးပွဲကို အချိန်မီ ဖြေဆိုနိုင်မည်ဟု ယူဆထားသော်လည်း ဤကိစ္စတွင် ထူးဆန်းသော တိုးတက်မှု တစ်ခု ရှိလာလိမ့်မည်ဟု ထင်မထားခဲ့ပေ။

မုန်လာဥ မျိုးစေ့ချချိန်မှ ရိတ်သိမ်းချိန်အထိ ယေဘုယျအားဖြင့် ၂ လမှ ၃ လခန့် ကြာမြင့်တတ်သည်။ ချူဟွား၏ ဓာတ်မြေဩဇာသည် လမ်းခုလတ်တွင် ထွက်ပေါ်လာခြင်း ဖြစ်ရာ ဘဏ္ဍာရေးဌာနနှင့် စိုက်ပျိုးရေးရုံးက အလျင်အမြန် စီစဉ်ပြီး နှိုင်းယှဉ် စမ်းသပ်မှုများစွာ ပြုလုပ်ခဲ့ကြသည်။

စမ်းသပ်ရန် ဓာတ်မြေဩဇာ မလုံလောက်တော့သဖြင့် ချူဟွား၏ ဓာတ်ခွဲခန်းမှ တစ်အိတ်ပြီး တစ်အိတ် သယ်ယူရန် လူလွှတ်ခဲ့ရသည်။

ချူဟွား တစ်ယောက်တည်းသာ ရှိသဖြင့် မည်မျှပင် အချိန်ပိုဆင်းပြီး ထုတ်လုပ်စေကာမူ သူတို့ စမ်းသပ်ရန် လိုအပ်သော ပမာဏကို ထောက်ပံ့ပေးနိုင်ရန် မဖြစ်နိုင်ပေ။

သူမသည် ဓာတ်မြေဩဇာ ထုတ်လုပ်ပုံ အဆင့်ဆင့်နှင့် ပမာဏများကို အသေးစိတ် မှတ်တမ်းတင်ကာ သတိပြုရမည့် အချက်များကို တစ်ခုမကျန် ရေးသားပြီး ညီလာခံသို့ လွှဲပြောင်းပေးအပ်လိုက်တော့သည်။

စိုက်ပျိုးရေးဝန်ကြီး: "..." ဒီကိစ္စ ဘယ်သူ့ လက်ထဲ ထည့်ပေးရမလဲ။

ဘဏ္ဍာရေးဌာန၊ စိုက်ပျိုးရေးရုံးနှင့် ဆောက်လုပ်ရေးဌာနတို့က မိမိတို့ လုပ်ဆောင်နိုင်သည်ဟု ထင်မြင်ကြသလို တစ်ဖက်လူလည်း လုပ်ဆောင်နိုင်သည်ဟု ယူဆကြသဖြင့် လူတစ်စုသည် ထိုနေရာတွင် အပြန်အလှန် လွှဲချ ငြင်းခုံနေကြတော့သည်။

မကြာမီတွင် အပြန်အလှန် လွှဲချနေခြင်းက အလုပ်မဖြစ်တော့ပေ။ အကြောင်းမှာ ချူဟွားက ဒုတိယ၊ တတိယနှင့် စတုတ္ထမြောက် ဓာတ်မြေဩဇာများကို ထုတ်ပြလိုက်သောကြောင့်ပင်။

သူမ စကားတစ်ခွန်းမှ မပြောသော်လည်း လူတိုင်းက သူမ ပြောလိုက်သည်ဟု ခံစားလိုက်ရသည်။ ကဲ၊ မငြင်းကြနဲ့တော့၊ မြင်တဲ့သူတိုင်း ဝေစု ရမယ်၊ ငါက တရားမျှတပါတယ်။

ဘဏ္ဍာရေးဝန်ကြီး၊ စိုက်ပျိုးရေးဝန်ကြီးနှင့် ဆောက်လုပ်ရေးဝန်ကြီးတို့သည် တကယ်ပင် မငြင်းခုံကြတော့ဘဲ ဝန်ထမ်းရေးရာဝန်ကြီးကို သွားရှာကြလေသည်။ လူမလောက်တော့ဘူး၊ ထပ်ခေါ်ပေးပါဦး။

ဝန်ထမ်းရေးရာဝန်ကြီး: "..."

မင်းတို့က ဝန်ထမ်းရေးရာဌာနကို အရာရှိတွေ သီးသန့် ထုတ်လုပ်တဲ့ စက်ရုံလို့ ထင်နေကြတာလား။ စနစ်တစ်ခု စက်ရုံက ထွက်လာရင်တောင် သင်တန်းပေးပြီးမှ အလုပ်ခွင် ဝင်ရတာ၊ အများကြီး ထပ်လိုချင်သေးတယ် ဟုတ်လား။ အိပ်မက်မက်ရင်တောင် ဒီလောက် မမက်သင့်ဘူး။

ဆဲသာ ဆဲနေရသည်။ အလုပ်ကတော့ လုပ်ရဦးမည်။

ဓာတ်မြေဩဇာက သီးနှံများအပေါ် အကျိုးသက်ရောက်မှု အလွန် ကောင်းမွန်သဖြင့် သာ့ရှန်းကိုယ်တိုင် မသုံးရသေးခင် တခြားနိုင်ငံများ ခိုးယူသွားခြင်း မခံရစေရန် လျှို့ဝှက်စွာ လုပ်ဆောင်ရမည် ဖြစ်သည်။ လူအများကြီး ခေါ်ပြီး ဖြစ်သလို လုပ်၍ မရဘဲ လူရွေးချယ်ရာတွင် သတိထားရမည် ဖြစ်သည်။

ဘဏ္ဍာရေးဌာန၊ စိုက်ပျိုးရေးရုံးနှင့် ဆောက်လုပ်ရေးဌာနသို့ အရာရှိ အချို့ လွှဲပြောင်းပေးပြီး ကျင့်ရှီများနှင့် ကျွီရန် အချို့ကိုပါ စီစဉ်ပေးလိုက်ကာစ ရှိသေးသည်၊ ချူဟွားက ၅၊ ၆၊ ၇၊ ၈ မျိုးမြောက် ဓာတ်မြေဩဇာများကို ထပ်ထုတ်ပေးလိုက်သဖြင့် လူထပ်လိုပြန်လေပြီ။

ဝန်ထမ်းရေးရာဝန်ကြီးသည် အော်ဟစ်ပြီး ငိုလုမတတ် ဖြစ်သွားရလေ၏။

ဒီတစ်သုတ် မစီစဉ်ရသေးဘူး၊ ၉၊ ၁၀၊ ၁၁ မျိုးမြောက် ဓာတ်မြေဩဇာ ထွက်လာပြန်ပြီ၊ လူထပ်လိုပြန်လေပြီ။

ဝန်ထမ်းရေးရာဝန်ကြီး: "..." ဒီဝန်ကြီး နေရာကို သူ သိပ်မလုပ်ချင်တော့ဘူး။

ယဉ်ကျေးမှုဝန်ကြီးနဲ့ လဲလိုက်ရမလား။ ဒါမှမဟုတ် ဝန်ထမ်းရေးရာ ဒုဝန်ကြီးကို ရာထူး တိုးပေးလိုက်ရမလား။

ယဉ်ကျေးမှုဝန်ကြီးက ထိုနေ့တွင်ပင် ရင်ဘတ်အောင့်သည်ဟု အကြောင်းပြကာ ခွင့်တင်လိုက်သည်။ ရာထူးတိုးကာစ ဝန်ထမ်းရေးရာ ဒုဝန်ကြီးကလည်း ခေါင်းကိုက်သည်ဟု အကြောင်းပြကာ ခွင့်တင်လိုက်သည်။ ဝန်ထမ်းရေးရာဝန်ကြီးလည်း အတုယူပြီး တစ်ရက် ခွင့်တင်လိုက်တော့သည်။

အရှင်မင်းကြီး: "..."

မှူးမတ်အရာရှိများ: "..."

ပစ္စည်းကောင်းများကို ဒီအတိုင်းထားပြီး မလေ့လာဘဲ နေရန် မဖြစ်နိုင်ပေ။ ဒါမှမဟုတ် ချူဟွားရဲ့ သုတေသနကို ခဏလောက် ရပ်နားခိုင်းထားရမလား။ မှိုပေါက်သလို ဒီလောက် မြန်စရာ မလိုပါဘူး။

သူတို့ တွေဝေဆွေးနွေးနေစဉ် ချူဟွားက ၁၂၊ ၁၃၊ ၁၄၊ ၁၅ မျိုးမြောက် ဓာတ်မြေဩဇာများကို ထပ်ထုတ်ပေးလိုက်ရာ ဝန်ထမ်းရေးရာဝန်ကြီး ကြားသိပြီးနောက် ညတွင်းချင်းပင် အနားယူခွင့်ပြုရန် အသနားခံစာ ရေးတင်လိုက်တော့သည်။

အရှင်မင်းကြီး: "..."

မှူးမတ်အရာရှိများ: "..."

...