အခန်း ၁၃၅

အပိုင်း (၁၃၅)

ဟွိုင်မိသားစု စစ်ဆေးခံရပြီး တစ်လလောက်အကြာတွင် ချူချင်း ပြန်ရောက်လာလေသည်။

သူသည် နန်းတော်ထဲ၌ တာဝန်ပြီးဆုံးကြောင်း အစီရင်ခံစာ တင်သွင်းပြီးနောက် အိမ်ပြန်ကာ ရက်အနည်းငယ် အနားယူပြီး အရှေ့ဘက်သို့ ခရီးဆက်ခဲ့၏။

ဤတစ်ကြိမ် ခရီးစဉ်တွင် အရှင်မင်းကြီးနှင့် မှူးမတ်များက မျှော်လင့်ချက်ကြီးစွာ ထားရှိကြလေသည်။ နောက်ထပ် သတ္တုတွင်းတစ်ခု ရှာတွေ့ဖို့ပင်။

ပုဂ္ဂလိက ကြေးနီတွင်း ရရှိခဲ့ပြီးပြီ။ အခိုးခံရသည့် ရွှေတွင်းလည်း ရရှိခဲ့ပြီးပြီ။ ဒီတစ်ခါတော့ ဘယ်လိုစဉ်းစား စဉ်းစား ငွေတွင်း ဖြစ်သင့်သည် မဟုတ်ပါလား။

တကယ်တော့ သတ္တုတွင်း အရင်းအမြစ် လိုချင်လျှင် system ကို မေးလိုက်တာက ပိုမြန်ဆန်၏။ တည်နေရာ အတိအကျနှင့် ထွက်ရှိမည့် ပမာဏကို ရှင်းရှင်းလင်းလင်း မေးမြန်းနိုင်ပြီး လူအင်အား ငွေအင်အား အများကြီး သက်သာစေနိုင်သည်။ သို့သော် သတ္တုတွင်းဟူသည် ပြန်လည် မပြည့်ဖြိုးနိုင်သော အရင်းအမြစ် ဖြစ်ပြီး တစ်နေ့နေ့တွင် ကုန်ခမ်းသွားရမည့်အရာ ဖြစ်လေသည်။

နိုင်ငံတော်ဘဏ္ဍာတိုက်တွင် ငွေကြေး မရှားပါးသည့် အခြေအနေမျိုး၌ ချူဟွားက ဤအရာများကို မျိုးဆက်သစ်များ အသုံးပြုရန် ချန်ထားပေးချင်ခဲ့သည်။

သူမသည် မင်းဆရာကြီးနှင့် မင်းဆရာအိုကြီးတို့ကို ရေရှည်တည်တံ့သော ဖွံ့ဖြိုးတိုးတက်မှု သဘောတရားနှင့် အကျိုးသက်ရောက်မှုများကို ရှင်းပြခဲ့၏။ ရွှေငွေ အလွန်အကျွံ သန့်စင်ခြင်းက ပတ်ဝန်းကျင်ကို ညစ်ညမ်းစေကြောင်း၊ သတ္တုတွင်း အလွန်အကျွံ တူးဖော်ခြင်းက မြေဆီလွှာနှင့် ရေအရင်းအမြစ်ကို ညစ်ညမ်းစေကြောင်း စသည့် ခေတ်သစ်လူသားများ ရင်းနှီးပြီးသား ဗဟုသုတများကို ပြောပြခဲ့လေသည်။

ဤစဉ်းစားချက်များသည် လက်ရှိ သာ့ရှန်းအတွက် အနည်းငယ် ရှေ့ရောက်လွန်းနေပြီး လူများစွာက သူမ ပြောသည်ကို နားထောင်ချင်မှ နားထောင်ကြမည် ဖြစ်ကာ အချည်းနှီး ဖြစ်သွားနိုင်လေသည်။

သို့သော် သူမက ဆိုးကျိုးများစွာ ရှိသည်ကို သိထားပြီး ဖြစ်၏။ သာ့ရှန်းက ငွေကြေး မရှားပါးသဖြင့် ဤကဲ့သို့ လုပ်ဆောင်ရန် မလိုအပ်ဘဲ မသိချင်ယောင်ဆောင်နေ၍ မရနိုင်ပေ။

အချိန်များစွာတွင် လူသားများသည် အသက်ရှင်ရပ်တည်ရေးအတွက် ထိုမျှလောက် ထည့်သွင်း စဉ်းစားနိုင်ခြင်း မရှိကြပါချေ။ ချူဟွားက ဓာတ်မြေဩဇာ အလွန်အကျွံ သုံးစွဲခြင်းသည် မြေဆီလွှာ ညစ်ညမ်းစေကြောင်း သိသော်လည်း ပြည်သူများ ဘေးဒုက္ခသင့်ပြီး ငတ်ပြတ်သေဆုံးရတော့မည့် အခြေအနေမျိုးတွင် ထုတ်ပေးလိုက်ရပြီး ဓာတ်မြေဩဇာကို ချင့်ချိန်သုံးစွဲရန် အကြိမ်ကြိမ် မှာကြားရသကဲ့သို့ပင်။

မင်းဆရာကြီးနှင့် မင်းဆရာအိုကြီးတို့သည် မျက်မှောင်ကြုတ်လျက် နားထောင်နေကြပြီး ခေတ်သစ် ဝေါဟာရများ ပါဝင်သော မေးခွန်းများကို တစ်ခုပြီးတစ်ခု မေးမြန်းကြလေသည်။

ချူဟွားက ဖုံးကွယ်ထားခြင်း မရှိဘဲ တစ်ခုချင်းစီကို ရှင်းပြခဲ့၏။ သူတို့ကို ယုံကြည်လက်ခံလာစေရန် ခေတ်သစ် နေရာအများအပြားတွင် သတ္တုတွင်း အလွန်အကျွံ တူးဖော်မှုကြောင့် မြေမျက်နှာပြင် နိမ့်ကျသွားခြင်း၊ မြေဆီလွှာတွင် သတ္တုဒြပ်စင် အဆိပ်သင့်မှု ပြင်းထန်ခြင်း၊ လူသားများ နေထိုင်ရန် မသင့်တော်တော့သဖြင့် ပြောင်းရွှေ့ရခြင်း စသည့် ဥပမာများကို ထုတ်နုတ် ရှင်းပြခဲ့လေသည်။

သူမသည် အိမ်ရှိ ကြက်တစ်ကောင်ကို ယူလာပြီး ပြဒါးသာမိုမီတာ ပြုလုပ်ရန် သိမ်းဆည်းထားသော ပြဒါးကို အသုံးပြုကာ သတ္တုဒြပ်စင် အဆိပ်သင့်ခြင်း ဆိုသည်မှာ ဘာလဲ၊ နောက်ဆက်တွဲ ဆိုးကျိုး မည်မျှ ပြင်းထန်လဲ ဆိုသည်ကို ဆရာနှစ်ဦးအား လက်တွေ့ သရုပ်ပြခဲ့၏။

မင်းဆရာကြီးနှင့် မင်းဆရာအိုကြီးတို့သည် ကြည့်ရှုပြီးနောက် မျက်နှာထား တည်ကြည်လေးနက်သွားကြပြီး ချူဟွား၏ အကြံဉာဏ်ကို သဘောတူလိုက်ကြလေသည်။

ညီလာခံ လက်ထဲတွင် မူလကတည်းက သတ္တုတွင်းကြော အများအပြား ရှိနေပြီး အသစ်တွေ့ရှိထားသော ကြေးနီတွင်းနှင့် ရွှေတွင်းပါ ပေါင်းလိုက်လျှင် နှစ်စဉ် ထွက်ရှိမှုက လုံလောက်နေပြီ ဖြစ်၏။ သာ့ရှန်း နယ်နိမိတ်အတွင်းရှိ သတ္တုတွင်း အရင်းအမြစ်များကို အခြားနိုင်ငံသားများက ခိုးယူတူးဖော်ခြင်း မရှိကြောင်း သေချာစေမည့် အခြေအနေအောက်တွင် ဤကိစ္စကို ဤနေရာ၌ ရပ်တန့်လိုက်လေသည်။

သို့သော် ချူချင်းက အပြင်ရောက်နေစဉ် ကွင်းဆင်းကိုယ်စားလှယ်အဖြစ် တာဝန်ထမ်းဆောင်နေချိန်တွင် ရှာတွေ့ခဲ့လျှင် ညီလာခံကလည်း ကောင်းမွန်သော အရင်းအမြစ်များကို ဒီအတိုင်း ပစ်ထားလိမ့်မည် မဟုတ်ပေ။

ချူချင်း ထွက်ခွာသွားပြီး ရက်အနည်းငယ်အကြာတွင် ဒီနှစ်အတွက် ညီလာခံစာမေးပွဲ စတင်လေသည်။

ချူမိသားစုတွင်လည်း စာမေးပွဲဖြေဆိုသူ တစ်ဦး ရှိနေ၏။ ချူချီပင်။

လတ်တလော ညီလာခံတွင် "အမျိုးသမီးများ စာမေးပွဲ ဝင်ရောက်ဖြေဆိုသင့် မသင့်" ဟူသည့် အကြောင်းအရာကို အဆက်မပြတ် ငြင်းခုံနေကြသည်။ မင်းဆရာကြီးနှင့် မင်းဆရာအိုကြီးတို့သည် နားထောင်ရတာ ငြီးငွေ့လာသဖြင့် အကြောင်းပြချက် တစ်ခုပေးပြီး ခွင့်ယူကာ ချူအိမ်တော်သို့ လာရောက်ပြီး သူတို့သုံးဦးကို စာသင်ပေးလေသည်။

ညီလာခံတွင် မည်သို့ပင် ငြင်းခုံနေပါစေ နောက်တစ်ကြိမ် စာမေးပွဲတွင် အမျိုးသမီးများ ဝင်ရောက်ဖြေဆိုရတော့မည် ဖြစ်ရာ သူတို့က အချည်းနှီး အလုပ်များ မလုပ်ချင်ကြပေ။

နန်းတွင်းစာမေးပွဲ ဖြေဆိုသည့် ကုန်းယွမ် အဆောက်အဦထဲသို့ သာမန်လူများ ဝင်ရောက်ခွင့် မရှိသဖြင့် မင်းဆရာကြီးနှင့် မင်းဆရာအိုကြီးတို့သည် နေရာတစ်နေရာ ရွေးချယ်ပြီး ပြင်ဆင်လိုက်ကြ၏။

စာအုပ်ကြီးလေးအုပ်နှင့် ဂန္တဝင်စာအုပ်ကြီးငါးအုပ်ထဲမှ မေးခွန်းထုတ်ပြီး တကယ့် နန်းတွင်းစာမေးပွဲနှင့် တစ်ပြိုင်နက်တည်း ကျင်းပကာ ချူဟွားနှင့် နန်ကုန်းလင်တို့ကို စာမေးပွဲ အငွေ့အသက်ကို ကြိုတင် ခံစားစေလေသည်။

မင်းသား ၅ သည် စာမေးပွဲ လမ်းကြောင်းကို လျှောက်လှမ်းရန် မလိုအပ်သော်လည်း သုံးယောက်ထဲတွင် တစ်ယောက်တည်း ကျန်ရစ်ခဲ့သူ မဖြစ်ချင်သောကြောင့် အတူတကွ ပါဝင် ဖြေဆိုခဲ့သည်။

နန်းတွင်းစာမေးပွဲကို နွေဦးစာမေးပွဲဟုလည်း ခေါ်ဆိုပြီး စုစုပေါင်း သုံးရက် ကြာမြင့်ကာ ကျမ်းဂန်များနှင့် မူဝါဒရေးရာ အကြောင်းအရာများကို ဖြေဆိုရ၏။

စာမေးပွဲဖြေဆိုသူများသည် ကုန်းယွမ်ခန်းမထဲသို့ ဝင်ရောက်ပြီးပါက ပြန်ထွက်ခွင့် မရှိပေ။ ထို့ကြောင့် သုံးရက်စာ စားသောက်ဖွယ်ရာများကို ကိုယ်တိုင် ပြင်ဆင်လာရပြီး ထမင်းဟင်း မချက်တတ်ပါက မန်ထိုပေါက်စီများကို ယူဆောင်သွားပြီး သုံးရက်လုံး သည်းခံစားသောက်ရလေသည်။

ရာသီဥတု အေးခဲနေချိန်တွင် ကုန်းယွမ်က ပြင်ဆင်ပေးသော မီးသွေး ပမာဏမှာ အကန့်အသတ် ရှိသဖြင့် သုံးရက်ခံအောင် မည်သို့ အသုံးပြုရမည်ကို ကိုယ်တိုင် တွက်ချက်ရ၏။

ဤအရာများကို သည်းခံနိုင်သေးသော်လည်း အခက်ခဲဆုံးမှာ ခန္ဓာကိုယ် သဘာဝ လိုအပ်ချက် ပြဿနာပင်။

တကယ့် ကုန်းယွမ်ခန်းမသည် သုံးဖက် ကာရံထားပြီး တစ်ဖက် ပွင့်နေသော အခန်းငယ်လေးသာ ဖြစ်၏။ အဖြေလွှာ ရေးသားရန် ကြားခံပျဉ်ပြား၊ အိပ်စက်ရန် သစ်သားပျဉ်ပြားနှင့် အပေါ့အလေးသွားရန် အညစ်အကြေးထည့်သည့်ပုံး တစ်လုံးသာ ရှိပြီး အပြင်ထွက်ခွင့် မရှိပေ။

အပေါ့အလေးသွားချိန်တွင် အကာအကွယ် မရှိသဖြင့် အမျိုးသားများပင် နေရခက်ကြရာ အမျိုးသမီးများဆိုလျှင် ပြောစရာပင် မလိုတော့ချေ။

ကိစ္စ ပြီးသွားလျှင်လည်း အညစ်အကြေးပုံးကို ဘေးနားတွင် ထားရှိရပြီး ထိုပတ်ဝန်းကျင် အနေအထားဖြင့် သုံးရက်ကြာအောင် စားသောက် နေထိုင်ရလေသည်။

အစမ်းစာမေးပွဲ ပြီးဆုံးသွားချိန်တွင် သုံးဦးစလုံး၏ မျက်နှာများမှာ မကောင်းကြတော့ပေ။

ချူဟွားနှင့် မင်းသား ၅ တို့သည် သိုင်းပညာ လေ့လာထားသူများ ဖြစ်သဖြင့် ခန္ဓာကိုယ် အခြေခံ အနည်းငယ် ကောင်းမွန်ကြသော်လည်း နန်ကုန်းလင်ကတော့ မခံနိုင်ရှာပေ။ ဒုတိယမြောက်နေ့တွင် အအေးမိသွားပြီး တတိယမြောက်နေ့တွင် ဖျားနာလျက်နှင့် စာမေးပွဲ ဖြေဆိုခဲ့ရသည်။

စာမေးပွဲ အချိန် ပြည့်သည်နှင့် မင်းဆရာကြီး ကြိုတင် ခေါ်ထားသော တော်ဝင်သမားတော်များက သုံးဦးစလုံးကို အလှည့်ကျ စမ်းသပ်ပေးကြ၏။ နှစ်ယောက်က ချင်းပြုတ်ရည် တစ်ပန်းကန် အပြည့် သောက်လိုက်ရပြီး နန်ကုန်းလင်ကတော့ ဆေးခါးကြီးကို မျက်နှာမဲ့လျက် သောက်ရလေသည်။

မင်းဆရာကြီးက ပြောလိုက်သည်။ "စာမေးပွဲဆိုတာ ဒီလိုပဲ၊ စတင်ပြီဆိုတာနဲ့ ပြီးဆုံးချိန် မရောက်မချင်း ဘယ်သူမှ ထွက်ခွင့်မရှိဘူး။ ဒါကြောင့် မင်းတို့အားလုံး စိတ်ပိုင်းဆိုင်ရာ ပြင်ဆင်ထားကြရမယ်"

မင်းဆရာအိုကြီးက ပြောလိုက်သည်။ "စာမေးပွဲတိုင်းမှာ ဖြေဆိုသူတွေ ဖျားနာပြီး သတိမေ့လို့ ထမ်းထုတ်ရတာမျိုး ရှိတတ်တယ်၊ ဒါကြောင့် မင်းတို့ သိုင်းပညာကို ဇွဲရှိရှိ လေ့ကျင့်ရမယ်၊ ခန္ဓာကိုယ် ကျန်းမာပြီး တောင့်ခံနိုင်အောင် ကြိုးစားရမယ်"

စကားဆုံးသည်နှင့် အားလုံး၏ အကြည့်များက နန်ကုန်းလင်အပေါ် ကျရောက်သွားကြ၏။ နင့်ကို ပြောနေတာ၊ နင့်ခန္ဓာကိုယ်က အားအနည်းဆုံးပဲ။

နန်ကုန်းလင်က မျက်နှာငယ်လေးဖြင့် ပြန်ဖြေလိုက်ရသည်။ "ဟုတ်ကဲ့ပါ၊ တပည့် မနက်ဖြန်ကစပြီး သိုင်းပညာ လေ့လာပါတော့မယ်"

ဤကဲ့သို့ တစ်ကြိမ်တစ်ခါမျှ မကြုံဖူးပါက သူမ၏ ခန္ဓာကိုယ်သည် ဤမျှ အားနည်းကြောင်း သိရှိနိုင်မည် မဟုတ်ပေ။ အားနည်းလွန်းသဖြင့် တကယ်တမ်း စာမေးပွဲ ဝင်ဖြေလျှင် အသက်တစ်ဝက်လောက် ပါသွားနိုင်လေသည်။

အဖြေလွှာ စစ်ဆေးမှု ရလဒ် ထွက်ပေါ်လာချိန်တွင် ကာယကံရှင်များ မသိသေးသော်လည်း မင်းဆရာကြီးနှင့် မင်းဆရာအိုကြီးတို့၏ အစီရင်ခံစာနှင့် သုံးဦး၏ အဖြေလွှာများသည် နဂါးစားပွဲထက်သို့ ရောက်ရှိနေပြီ ဖြစ်၏။

ဤတစ်ကြိမ် ကျင်းပသော အစမ်းစာမေးပွဲ အငယ်စားသည် ချူဟွားနှင့် နန်ကုန်းလင်တို့ကို စမ်းသပ်စေလိုသည့် သဘော ရှိသကဲ့သို့ အမျိုးသမီးများ စာမေးပွဲ ဖြေဆိုခြင်းသည် တကယ်တမ်း ဖြစ်နိုင်ခြေ ရှိမရှိကို စောင့်ကြည့်လိုခြင်းလည်း ဖြစ်သည်။

ရလဒ်က ရှင်းလင်းစွာ မြင်တွေ့ရပြီး အခက်အခဲများကို ကျော်လွှားနိုင်သလို အဖြေများကလည်း မဆိုးလှပေ။

စာမေးပွဲကို ယဉ်ကျေးမှုဌာနက ဦးစီးကျင်းပပြီး အရာရှိ အများအပြားမှာ အဖြေလွှာ စစ်ဆေးရန် အလုပ်များနေသဖြင့် ဤတစ်ကြိမ် တော်ဝင်စာကြည့်ဆောင်တွင် စုဝေးနေသူမှာ များစွာ လျော့နည်းနေ၏။ သုံးဦး၏ အဖြေလွှာများကို ကြည့်ရှုပြီးနောက် စိတ်ထဲတွင် အတိုင်းအတာ တစ်ခုအထိ သတ်မှတ်ချက် ရှိသွားကြသည်။

"မင်းသား ၅ က ငယ်ပါသေးတယ်၊ ဒီလောက် ဖြေဆိုနိုင်တာ အတော်လေး ကောင်းမွန်နေပါပြီ"

"နန်ကုန်းလင်ရဲ့ အဖြေတွေက ဟာကွက်များပြီး အပေါ်ယံ ဆန်နေတယ်၊ စိတ်လောနေပုံ ရတယ်"

"ချူဟွားရဲ့ အဖြေတွေထဲမှာ ထူးခြားချက်တွေ ရှိပေမဲ့ အသေးစိတ် ချဲ့ထွင်ရေးသားတာ မရှိဘူး။ ယူသုံးလို့ရမဲ့ အချက် သိပ်မများဘူး"

"တကယ်ပဲ သုံးနှစ်လောက် ထပ်စောင့်ရဦးမယ်၊ မဟုတ်ရင် ကျင့်ရှီ ရဖို့ ခက်ခဲလိမ့်မယ်"

"သုံးနှစ်နဲ့ရော လုံလောက်ပါ့မလား"

နောက်ဆုံးတွင် စာမေးပွဲ အောင်မြင်ပြီး နန်းတွင်းစာမေးပွဲ ဝင်ရောက်နိုင်သည့် စာဖြေသူများသည် ထောင်ချီထဲမှ တစ်ယောက် ရွေးချယ်ခံရသူများ မဟုတ်ပါလား။

ချူဟွားနှင့် နန်ကုန်းလင်တို့တွင် မင်းဆရာကြီးနှင့် မင်းဆရာအိုကြီးတို့ကဲ့သို့ ထိပ်တန်း ဆရာများ ရှိသော်လည်း နှစ်နှစ်တာ အချိန်ဖြင့် သူတပါး၏ ဆယ်နှစ်ကျော်၊ ဆယ်စုနှစ်များစွာ ကြိုးစားအားထုတ်မှုကို ယှဉ်ပြိုင်၍ မရနိုင်ပေ။

အရှင်မင်းကြီးသည် ထိုအဖြေလွှာများကို ကြည့်ရှုလိုက်သည်။ မင်းသား ၅ ၏ အဖြေလွှာကိုတော့ ထည့်မပြောတော့ပေ။ သက်သက်မဲ့ အပျော်ဝင်ဖြေခြင်း ဖြစ်၏။

ချူဟွားနှင့် နန်ကုန်းလင်၏ အဖြေများသည် အလယ်အလတ် အဆင့်တွင် ရှိနေသော်လည်း အမျိုးသမီးများ ဖြစ်နေခြင်း၊ ပထမဆုံးအကြိမ် အမျိုးသမီးများလည်း ဖြေဆိုနိုင်မည့် စာမေးပွဲကို ဝင်ရောက်ဖြေဆိုကြမည် ဖြစ်ခြင်း၊ အမျိုးသားများနှင့် တန်းတူ အခွင့်အရေး ရယူလိုခြင်းတို့ကြောင့် ပိုပြီး တင်းကျပ်သော ဝေဖန်မှုကို ခံကြရမည် ဖြစ်သည်။

အလွန် ထူးချွန်ခြင်း မရှိလျှင် ထိုလူများ၏ ပါးစပ်ပေါက်ကို ပိတ်နိုင်မည် မဟုတ်ပေ။

အရှင်မင်းကြီးက ပြောလိုက်သည်။ "အမျိုးသမီးတွေ စာမေးပွဲ ဖြေဆိုဖို့ ဖြစ်နိုင်ခြေ ရှိမှတော့ နောက်လ နန်းတွင်းစာမေးပွဲ ပြီးတာနဲ့ အမျိုးသမီးများအတွက် အထူးစာမေးပွဲ ဖွင့်လှစ်မဲ့ သတင်းကို ထုတ်ပြန်ကြေညာလိုက်တော့"

တစ်စုံတစ်ယောက်က ကန့်ကွက်ချင်သော်လည်း အရှင်မင်းကြီး၏ ငြင်းဆန်၍ မရနိုင်သော မျက်နှာထားကို မြင်လိုက်ရသဖြင့် ဤကိစ္စသည် ညှိနှိုင်းစရာ မလိုတော့ကြောင်း သိရှိကာ ပါးစပ်ပိတ်နေလိုက်ကြ၏။

ထားလိုက်ပါတော့။ အရှင်မင်းကြီးနှင့် ဆန့်ကျင်ဘက် မလုပ်တာ ကောင်းပါတယ်။

အမျိုးသမီး အထူးစာမေးပွဲ ဖွင့်လှစ်လိုက်ရင်တောင် တကယ် လာဖြေမဲ့ အမျိုးသမီးက ဘယ်နှယောက် ရှိမှာမို့လို့လဲ။

တစ်ချက်က အတိတ်တုန်းက စာအုပ်ကြီးလေးအုပ်နှင့် ဂန္တဝင်စာအုပ်ကြီးငါးအုပ်ကို လေ့လာသည့် အမျိုးသမီး မရှိသလောက် နည်းပါးသဖြင့် ဝင်ရောက်ဖြေဆိုလျှင်လည်း ပထမအဆင့်မှာပင် ပြုတ်သွားကြမည် ဖြစ်သည်။ နောက်တစ်ချက်က စာမေးပွဲတွင် မသမာမှု မရှိစေရန် စည်းကမ်းချက်များ တင်းကျပ်လွန်းပြီး ထိုကဲ့သို့ အခန်းကျဉ်းလေးထဲတွင် ရက်ပေါင်းများစွာ စာမေးပွဲ ဖြေဆိုနိုင်သည့် အမျိုးသမီး မရှိသလောက် နည်းပါးခြင်းကြောင့် ဖြစ်သည်။

နန်ကုန်းလင်က အကောင်းဆုံး ဥပမာ တစ်ခု မဟုတ်ပါလား။

အမျိုးသမီးများလည်း စာမေးပွဲ ဝင်ရောက်ဖြေဆိုနိုင်သည့် သတင်း ထွက်ပေါ်လာသည်နှင့် သာ့ရှန်းတစ်နိုင်ငံလုံး လှုပ်ခတ်သွားပြီး ရှီးရုံ၊ ပေတိ၊ တုန်းယီနှင့် နန်မန်တို့ပါ အံ့အားသင့်သွားကြသည်။

စာမေးပွဲ စနစ် စတင် တည်ထောင်ခဲ့သည့် နှစ်ပေါင်း ထောင်ချီသော ကာလတစ်လျှောက်လုံးတွင် အမျိုးသားများသာ ဖြေဆိုခဲ့ကြပြီး ဧကရီ လက်ထက်တွင်ပင် ဓလေ့ထုံးစံကို ဆန့်ကျင်ပြီး အမျိုးသမီး အထူးစာမေးပွဲ ဖွင့်လှစ်ခြင်း မရှိခဲ့ပေ။ ယခု သာ့ရှန်း အရှင်မင်းကြီးက ဘာဖြစ်သွားတာလဲ။

အတွင်းသိ အများအပြားက ပြောဆိုကြသည်။ "ဒါက တစ်စုံတစ်ယောက်အတွက် အဆင်ပြေအောင် တံခါးဖွင့်ပေးလိုက်တာပဲ"

တစ်စုံတစ်ယောက်က ဘယ်သူလဲဟု ထပ်မေးကြသည်။ ထိုလူများက ထုတ်မပြောရဲကြပေ။

သို့သော် ဒါက စုံစမ်းရန် ခက်ခဲသော ကိစ္စ မဟုတ်ပေ။ အရှင်မင်းကြီးနှင့် မှူးမတ်များကို အဆင်ပြေအောင် တံခါးဖွင့်ပေးစေနိုင်သူမှာ အလွန် အရည်အချင်း ရှိသူ သို့မဟုတ် အလွန် အာဏာရှိသူသာ ဖြစ်နိုင်သဖြင့် ရှာဖွေရန် လွယ်ကူလွန်းလှသည်။

ချူဟွားနှင့် နန်ကုန်းလင်တို့က အမျိုးသမီးများ ဖြစ်လျက်နှင့် မင်းသား ၅ ၏ စာသင်ဖော်များ ဖြစ်လာခဲ့ကြသည်။ ဤကိစ္စကို မြို့တော်တွင် ပြောဆိုနေကြသည်မှာ ကြာမြင့်နေပြီ ဖြစ်သည်။ နောက်ပိုင်းတွင် အိမ်အများအပြားမှ မိန်းကလေးများသည် ဆရာ ခေါ်ယူပြီး "စာအုပ်ကြီးလေးအုပ်" နှင့် "ဂန္တဝင်စာအုပ်ကြီးငါးအုပ်" ကို သင်ယူစေခဲ့သဖြင့် အမျိုးသမီး အထူးစာမေးပွဲ ဖွင့်လှစ်မည့် ကိစ္စသည် စောစီးစွာကပင် အရိပ်အယောင် ပြနေခဲ့သည်။

ငွေရှိ အာဏာရှိသော အိမ်များက စောစီးစွာ သိရှိကြပြီး သာမန် ပြည်သူများက နောက်ကျမှ သိရှိကြခြင်းသာ ဖြစ်၏။

အချိန် တွက်ချက်ကြည့်လျှင် တစ်နှစ် နှစ်နှစ်ခန့် ရှိနေပြီ ဖြစ်သည်။ ပြည်သူများထံမှ ဆက်စပ် တွေးတောမှုများနှင့် မကျေနပ်သံများ ထွက်ပေါ်လာလေသည်။

"အာဏာရှိ ငွေရှိတဲ့သူတွေက တကယ် အထင်ကြီးစရာပဲ"

"မိန်းမတွေက ဘာကိစ္စ စာမေးပွဲ ဖြေမှာလဲ"

"စာမေးပွဲ မဖြေခင် လူအများကြီး ရှေ့မှာ ကိုယ်ခန္ဓာ ရှာဖွေတာ ခံရမှာလား"

"ချူဟွားက အရှင်မင်းကြီးရဲ့ တရားမဝင် သမီး မဟုတ်ပါဘူးနော်၊ အရှင်မင်းကြီးက သူ့ကို အရမ်း အလိုလိုက်လွန်းတယ်"

"ဘာလို့ ချူဟွားဖြစ်နေရတာလဲ၊ နန်ကုန်းလင် ဒါမှမဟုတ် တခြားလူ မဟုတ်ရတာလဲ"

ချူဖျင်သည် ဤအဓိပ္ပာယ် မရှိသော ကောလာဟလများကို ကြားလိုက်ရချိန်တွင် ကြောင်အမ်းသွားတော့သည်။

ဖခင် ဖြစ်သူက ကြောင်အမ်းသွားသလို ဒေါသလည်း ထွက်မိသည်။ ဝမ်သခင်မကို ပြောပြချိန်တွင် ဝမ်းနည်းစိတ်ပင် ဝင်လာမိ၏။

"ဟွားအာက ဘယ်လိုလုပ်ပြီး အရှင်မင်းကြီးရဲ့ သမီး ဖြစ်သွားရတာလဲ၊ ငါ့သမီးက အဲဒီလောက် ထူးချွန်လို့ မရဘူးလား၊ ဘာလို့ ထူးချွန်တဲ့ ကလေးတွေက တော်ဝင်မိသားစုဝင်တွေပဲ ဖြစ်နေရတာလဲ"

ဝမ်သခင်မမှာ ပြောစရာ စကား မရှိတော့ဘဲ မျက်စောင်းထိုးမိမတတ် ဖြစ်သွားသည်။ ရှင် အဓိကထားတာက ဒါကြီးလား။

"အရှင်မင်းကြီးက မင်းသားတွေနဲ့ မင်းသမီးတွေအတွက် သာ့ရှန်းရဲ့ အကောင်းဆုံး ဆရာတွေကို ရှာဖွေပေးနိုင်လို့ပေါ့၊ မင်းဆရာကြီးနဲ့ မင်းဆရာအိုကြီးလို ဆရာမျိုးတွေက ငယ်ငယ်ကတည်းက သင်ကြားပေးမှတော့ ဘယ်သူက မထူးချွန်ဘဲ နေမှာလဲ"

"အဲဒါတော့ ဟုတ်သား၊ မင်းဆရာကြီးနဲ့ မင်းဆရာအိုကြီးသာ ရှိရင် ဝက်တစ်ကောင်တောင် ဉာဏ်ကောင်းလာအောင် သင်ပေးနိုင်မှာပဲ" ချူဖျင်က သက်ပြင်းချလိုက်သည်။ "ငါ နောင်တရလိုက်တာ၊ အစကတည်းက ဟွားအာအတွက် ဆရာကောင်းကောင်း ရှာပေးပြီး များများ သင်ခိုင်းခဲ့ရင် နောက်တစ်ကြိမ် စာမေးပွဲကျရင် သူ ပထမအဆင့် သုံးနေရာလုံး ရယူနိုင်လောက်တယ်"

ဝမ်သခင်မ"..." ပြောလေ ကဲလေပါလား။

အပြင်မှာ ကောလာဟလတွေ များလွန်းသဖြင့် ဝမ်သခင်မက ဘယ်သူတွေ လျှောက်ပြောနေမှန်း မသိသော်လည်း ဤစကားများကို ချူဟွားအား ပေးမသိရဲပေ။ သမီးဖြစ်သူ စိတ်အနှောင့်အယှက် ဖြစ်ပြီး စာမေးပွဲ ပြင်ဆင်မှုကို ထိခိုက်မည် စိုးရိမ်သောကြောင့်ပင်။

သူမသည် အိမ်ရှိ အစေခံများကို ပါးစပ်လုံအောင် ထားကြရန်၊ ချူဟွားနားသို့ သတင်းအမှားများ မရောက်စေရန် မှာကြားဖို့ ဆုံးဖြတ်လိုက်တော့သည်။

ပြီးတော့ ပါးစပ်အဖွာဆုံး ဒီလူကိုလည်း သတိပေးရမယ်။

ဝမ်သခင်မက အလေးအနက် မှာကြားလိုက်၏။ "ဒီစကားကို ကျွန်မကိုပဲ ပြောရင် ပြီးရော၊ ဟွားအာကို သွားမပြောနဲ့နော်"

ချူဖျင်က စိတ်ထိခိုက်သွားသည်။ " မင်းက ငါ့ကို ဒီလောက်တောင် စိတ်မချ ဖြစ်ရတာလား၊ ငါက အဲဒီလောက် အနေအထိုင် မတတ်တဲ့သူလား"

ဝမ်သခင်မက ခင်ပွန်းသည်ကို မျက်နှာသာ လုံးဝ မပေးဘဲ ပြတ်ပြတ်သားသား ပြောလိုက်၏။ "ရှင်က အဲဒီလိုလူပဲ"

ချူဖျင် "..."

အရှင်မင်းကြီးသည် ကြားသိရပြီးနောက် သက်ပြင်း အကြိမ်ကြိမ် ချမိလေသည်။ "ငါကိုယ်တော်မှာသာ ဒီလိုသမီးမျိုး ရှိရင် ဘယ်လောက် ကောင်းမလဲ"

ဤစကားကို အပါးတော်မြဲကုန်းကုန်း ချန်ကျို့က သက်သေခံနိုင်သည်။

ချူဟွားဆီမှ သုတေသန ရလဒ်အသစ်များ ထွက်ပေါ်လာတိုင်း အရှင်မင်းကြီးက မကြာခဏ ညည်းတွားလေ့ ရှိသည်။ "ဒါသာ ငါကိုယ်တော်ရဲ့ သမီး ဖြစ်ရင် ဘယ်လောက် ကောင်းမလဲ"

တစ်ခါတစ်ရံ အရှင်မင်းကြီးသည် သူ၏ သားတော် လေးပါးထဲမှ ရွေးထုတ်ကြည့်သေးသည်။

"သားကြီးက နယ်စပ်မှာ၊ သားတော် ၂ က ခေါင်းမာတယ်၊ သားတော် ၅ က ငယ်သေးတယ်၊ သားတော် ၄ ပဲ အရွယ်ရောက်နေပြီ၊ သားတော် ၄ နဲ့ ချူဟွားကို လက်ထပ်ပေးလိုက်ရင် ကောင်းမလား"

ဤစကားကို ချန်ကျို့က လေတစ်ချက် တိုက်သွားသလို သဘောထားပြီး နားထောင်ပြီးသည်နှင့် မေ့ပစ်လိုက်သည်။ ဒုတိယလူ နားထဲသို့ လုံးဝ မရောက်စေရပေ။

သို့သော် သူ မပြောလျှင်လည်း ဒါက ထင်ရှားနေသည့် အချက်ပင်။ လူအများအပြားက ချူဟွားသည် အနာဂတ်တွင် တော်ဝင်မိသားစုထဲသို့ ဝင်ရောက်လာမည်၊ မင်းသား ၄ သို့မဟုတ် မင်းသား ၅ နှင့် လက်ထပ်လိမ့်မည်ဟု ထင်မြင်နေကြသည်။

"အခု အချိန်အခါ မကောင်းသေးဘူး" အရှင်မင်းကြီးက လက်ထပ်ထိမ်းမြားပေးလိုလျှင်လည်း လူအများက ချူဟွားကို စောင့်ကြည့်နေသည့် ယခုအချိန်မျိုးကို ရွေးချယ်မည် မဟုတ်ပေ။ သူမ တစ်ယောက်တည်းအတွက် အမျိုးသမီး အထူးစာမေးပွဲ ဖွင့်လှစ်ပေးသည်ဟု ပြည်သူများ ထင်မြင်သွားမည် စိုးရိမ်သောကြောင့်ပင်။

ချူဟွားသည် သူ အမျိုးသမီး အထူးစာမေးပွဲ ဖွင့်လှစ်ချင်ရသည့် အဓိက အကြောင်းရင်း ဖြစ်သော်လည်း တစ်ခုတည်းသော အကြောင်းရင်း မဟုတ်ပေ။

အမှန်ကန်ဆုံး အကြောင်းရင်းမှာ ချူဟွားနှင့် system တို့က အကျင့်ပျက်ခြစားမှု စစ်ဆေးရင်း ဖမ်းဆီးလိုက်သော အရာရှိ များပြားလွန်းခြင်း၊ ချူဟွားထုတ်ပေးလိုက်သော ပစ္စည်းများ များပြားလွန်းခြင်းတို့ကြောင့် အရာရှိ မလုံလောက်တော့ခြင်းပင်။ ထို့ပြင် သူက ကိစ္စများစွာတွင် အမျိုးသမီးများ၏ အဆင်ပြေမှုကို တွေ့မြင်ခဲ့ရပြီး ကိုယ့်သမီး အပါအဝင် ထူးချွန်သော အမျိုးသမီးများ ပေါ်ထွက်လာခြင်းကြောင့် ဤစိတ်ကူး ဖြစ်ပေါ်လာခြင်း ဖြစ်သည်။

အရှင်မင်းကြီးက အမိန့်ပေးလိုက်သည်။ "သင့်တော်တဲ့ အချိန် ရွေးပြီး ချူဟွားအရင်က လုပ်ခဲ့တဲ့ ကိစ္စတချို့ကို ထုတ်ဖော်လိုက်ပါ"

ချူဟွားမသိလိုက်ခင်မှာပင် သာ့ရှန်းက ကောလာဟလ စစ်ပွဲတစ်ခုကို ဆင်နွှဲလိုက်လေသည်။

အမျိုးသမီး အထူးစာမေးပွဲက ချူဟွားတစ်ယောက်တည်းအတွက် ဖွင့်လှစ်ပေးတာလား။

ချူဟွားက တရားရေးဝန်ကြီးဌာန အဆင့် ၅ အရာရှိရဲ့ တရားဝင် သမီးလေ၊ တကယ် အရာရှိ ဖြစ်ချင်ရင် ထောက်ခံချက် လမ်းကြောင်းကနေ သွားလို့ ရတာပဲ၊ စာမေးပွဲ ဖြေရတာ ဘယ်လောက် ရှုပ်ထွေးလဲ။

ချူဟွားက မင်းသား ၅ ရဲ့ စာသင်ဖော် ဖြစ်လာပြီး မင်းဆရာကြီးနဲ့ မင်းဆရာအိုကြီးတို့ရဲ့ သင်ကြားမှုကို ခံယူရတယ် ဆိုတော့ အရှင်မင်းကြီးရဲ့ တရားမဝင် သမီးမို့လို့လား။

မင်းသား အများအပြားတောင် အဲဒီလို အခွင့်အရေး မရကြဘူး။ မင်းသမီးက မင်းသားထက် ပိုအရေးပါလို့လား။ တခြား မင်းသား မင်းသမီးတွေကျတော့ မင်းဆရာကြီးနဲ့ မင်းဆရာအိုကြီးတို့ရဲ့ သင်ကြားမှုကို မရကြဘူးလေ။

ချူဟွားက ဘာဖြစ်လို့ မင်းဆရာကြီး၊ မင်းဆရာအိုကြီးနဲ့ စစ်သူကြီးရွှမ်ဝေ တို့ရဲ့ သင်ကြားမှုကို ရရှိခဲ့တာလဲ။

အကြောင်းရင်းက ပင်နီစလင်၊ ကျောက်ရောဂါ ကာကွယ်ဆေး၊ ကန်စွန်းဥ တို့ကို အစောဆုံး ရှာဖွေတွေ့ရှိခဲ့တာ သူ ဖြစ်လို့လေ။ ပြီးတော့ အခမဲ့ ညီလာခံကို ပေးအပ်ခဲ့လို့ နောက်ဆက်တွဲ သုတေသနတွေ လုပ်နိုင်ခဲ့တာ၊ ဒါက ညီလာခံက ပေးတဲ့ ဆုချီးမြှင့်မှု တစ်ခုပါပဲ။ ခင်ဗျားတို့လည်း လုပ်နိုင်ရင် ညီလာခံက ခင်ဗျားတို့ကို ခွင့်ပြုမှာပါပဲ။

ပြည်သူများ "..." ကြည့်ရတာ နည်းနည်းတော့ ထိမိနေသလိုပဲနော်။

မြို့တော်က ပြည်သူများကို ကြားခံလူများ အသုံးပြုပြီး လမ်းကြောင်း လွှဲလို့ ရသော်လည်း အခြားနေရာက ပြည်သူများကို ဘယ်လို လုပ်မလဲ။

ဤအချိန်တွင် တုန်းဖန်ဟန် ကိုယ်တိုင် ရေးသားထားသော ချူဟွား၏ အတ္ထုပ္ပတ္တိသည် အဓိက ကျသော နေရာမှ ပါဝင်လာတော့သည်။

ဝတ္ထု မပြီးသေးတာ ကိစ္စ မရှိပါဘူး။ လောလောဆယ် အခန်းဆက်တွေ အများကြီး ရှိနေပြီပဲ၊ တစ်အုပ်ပြီး တစ်အုပ် ဖြည်းဖြည်းချင်း ထုတ်ရုံပေါ့။

"ချူဟွား၏ အတ္ထုပ္ပတ္တိ" ပထမတွဲ၏ အစပိုင်းကပင် လူကို စိတ်ဝင်စားစေသည်။

သုံးနှစ်အရွယ် ချူဟွားက "အမေ၊ လိမ္မော်သီးက ဘာလို့ မှိုတက်တာလဲ၊ မှိုတက်တဲ့ လိမ္မော်သီးကို ဘာလို့ စားလို့ မရတာလဲ" ဟု ရိုးသားစွာ မေးလိုက်သည်။

စာအုပ် ဖွင့်ဖတ်သူ အများအပြားမှာ အမေးခံလိုက်ရသလို ဖြစ်သွားသည်။

ဟုတ်သားပဲ၊ ဘာလို့ မှိုတက်တာလဲ၊ ဘာလို့ စားမရတာလဲ။

စာဖတ်သူများ ဖြည်းဖြည်းချင်း ဆက်ဖတ်ကြည့်မှ သူတို့အတွက် အလေ့အကျင့် ဖြစ်နေပြီး တစ်ခါမှ အာရုံမစိုက်မိသော ကိစ္စများသည် ချူဟွားငယ်လေး၏ မျက်လုံးထဲတွင် အလွန် ထူးဆန်းသော ကိစ္စတစ်ခု ဖြစ်နေကြောင်း တွေ့ရှိလိုက်ရသည်။

သူမ အမြင်တွင် အရာအားလုံး၌ တည်ရှိနေရသည့် အကြောင်းရင်း ရှိသည်။ မှိုတက်ခြင်းကလည်း အပါအဝင်ပင်။

ဤသံသယသည် သူမနှင့်အတူ နှစ်ပေါင်းများစွာ ပါရှိလာခဲ့ပြီး မှိုတက်နေသော လိမ္မော်သီးထဲမှ ပင်နီစလင်ကို ထုတ်ယူနိုင်သည့် အချိန်ကျမှ သူမက ရုတ်တရက် သဘောပေါက်သွားခဲ့သည်။ "ဪ လိမ္မော်သီး မှိုတက်တာက ငါတို့ကို ပိုကောင်းတဲ့ အရာတွေ ပေးဖို့ပါလား၊ မှိုတက်တဲ့ လိမ္မော်သီးကိုလည်း စားလို့ ရတယ်၊ စားတဲ့ ပုံစံ ပြောင်းလိုက်ရုံပါပဲ"

အဖြေ ရှာတွေ့သွားသောအခါ ချူဟွားသည် တော်ဝင်ဆေးဌာနသို့ အခမဲ့ ပေးအပ်ခဲ့သည်။ အကြောင်းအရင်းမှာ ကျွမ်းကျင်မှု ဆိုင်ရာ ကိစ္စများကို ကျွမ်းကျင်သူများသာ လုပ်ဆောင်သင့်သည်ဟု သူမ ယူဆပြီး သူမက အခြားကိစ္စ တစ်ခုကို သွားလုပ်ရဦးမည် ဖြစ်သောကြောင့်ပင်။

တစ်ရွာလုံး ကျောက်ရောဂါ ဖြစ်ပွားပြီး ရွာသူရွာသား အကုန်လုံး သေဆုံးသွားကြောင်း သူမ ကြားသိလိုက်ရသည်။

စိတ်ထား ကောင်းမွန်သော ချူဟွားသည် ဤသတင်းကို ကြားလိုက်ရသည်နှင့် မျက်ရည်ကျခဲ့ပြီး ကျောက်ရောဂါကို ကုသနိုင်မည့် နည်းလမ်းကို ရှာဖွေချင်ခဲ့သည်။ ထို့ကြောင့် သူမ...

စိတ်ထား ကောင်းမွန်သော ချူဟွားကိုယ်တိုင် "..."

ဒီနေ့ ဟုန်မေ ဝတ္ထုဖတ်နေသည်ကို မတော်တဆ တွေ့လိုက်ရပြီး သူမကို တွေ့လိုက်သည်နှင့် ဟုန်မေက ဝတ္ထုကို ကမန်းကတန်း ဝှက်လိုက်သည့် ပုံစံမှာ သံသယ ဖြစ်စရာ ကောင်းနေသဖြင့် သူမ မေးမြန်းလိုက်လို့သာ၊ မဟုတ်လျှင် "ချူဟွား၏ အတ္ထုပ္ပတ္တိ" စာအုပ် ထွက်ရှိနေပြီ ဖြစ်ကြောင်း၊ ဇာတ်လိုက် ကိုယ်တိုင်တောင် အဓိပ္ပာယ် မရှိဘူးဟု ထင်ရလောက်သည့် ပုံစံမျိုးဖြင့် ထွက်ရှိနေကြောင်း သူမ သိလိုက်ရမည် မဟုတ်ပေ။

ချူဟွားသည် လေတစ်ချက် ရှူသွင်းလိုက်ပြီး စာအုပ်ကို ဖျက်ဆီးပစ်ချင်သော စိတ်ဆန္ဒကို ထိန်းချုပ်လိုက်ကာ system ကို တတ်နိုင်သမျှ တည်ငြိမ်အောင် မေးလိုက်သည်။ [ထုံအာ၊ ဒီကိစ္စကို နင် သိလား]

system ၏ အသံက အနည်းငယ် အပြစ်ရှိသလို ဖြစ်နေသည်။ [ငါ... ငါ မသိဘူးလို့ ပြောရင် နင် ယုံမှာလား]

ချူဟွား[ဟွန်း၊ နင် ဘယ်လို ထင်လဲ]

system [ဒါဆို ငါက ကုတ်အများကြီးနဲ့ ဖွဲ့စည်းထားတာမို့ ဒီကိစ္စကို ဘာမှ မတတ်နိုင်ဘူးလို့ ပြောရင်ရော နင် ယုံမှာလား]

ချူဟွား[… နင် တွေ့တွေ့ချင်း ငါ့ကို ပြောပြရင် တားဆီးလို့ ရနိုင်သေးတယ်]

system က ချက်ချင်း ပြန်ဖြေလာသည်။ [အဲဒါ မဖြစ်နိုင်ဘူး။ နင် စိတ်လျှော့လိုက်တော့]

[ဒီကိစ္စ နောက်ကွယ်မှာ အရှင်မင်းကြီးရဲ့ တွန်းအားပေးမှု ပါဝင်တယ်၊ မင်းဆရာကြီးနဲ့ မင်းဆရာအိုကြီးတို့က စိစစ်ပေးထားတယ်၊ ဒီဝတ္ထုကို အရှင်မင်းကြီးနဲ့ မိဖုရားခေါင်ကြီးတောင် ကြိုက်ကြတယ်၊ မင်းသားနဲ့ မင်းသမီးတွေ လက်ထဲမှာ တစ်ယောက် တစ်အုပ် ရှိကြတယ်၊ နယ်စပ်မှာ ရောက်နေတဲ့ မင်းသားကြီးနဲ့ မင်းသမီး ၂ ဆီကိုတောင် ပို့ပေးလိုက်သေးတယ်၊ နင် တားလို့ ရမယ် ထင်လား]

ချူဟွား!!!

ဒီလောက်ထိ လုပ်စရာ လိုလို့လား။ ဒီလောက်ထိ လုပ်စရာ လိုလို့လား။

မြို့တော် တစ်ခုလုံးမှာ သူမကို လူမှုရေးအရ သေဆုံးစေတာ မလုံလောက်သေးဘဲ နယ်စပ်အထိပါ သွားပြီး လူမှုရေးအရ သေဆုံးခိုင်းနေတာလား။ နင်တို့က လူကို သတ်ပြီး အသည်းနှလုံးကိုပါ ထပ်ခွဲတာပဲ။

ချူဟွားသည် ရှက်လွန်းသဖြင့် မတ်တတ်ရပ်လျက်နှင့် ခရမ်းရောင် နန်းတော်မြို့တော် တစ်ခုလုံးကို တူးဖော်နိုင်လောက်သည့် အခြေအနေ ဖြစ်နေပြီး လူတော မတိုးရဲတော့ပေ။

[ဒါကြောင့်] ကာယကံရှင်က အံကြိတ်ပြီး အလွန်အမင်း နာကျည်းစွာဖြင့် မေးလိုက်သည်။ [ဘာလို့ ဒီဝတ္ထုက ကာယကံရှင်ဖြစ်တဲ့ ငါတောင် မမှတ်မိနိုင်လောက်တဲ့ အထိ ရေးသားထားရတာလဲ]

[ငါ သုံးနှစ်သားတုန်းက ဘယ်လိုလုပ် ဒီလို မေးခွန်းမျိုး မေးတတ်မှာလဲ။ ငါသာ အဲဒီလောက် စွမ်းနေရင် ကမ္ဘာ့ဆွဲအား နိယာမကို ရှာဖွေတွေ့ရှိသူက ငါ ဖြစ်သွားမှာပေါ့]

ဒီကိစ္စအတွက် system ပြန်ဖြေစရာ မလိုဘဲ ဝတ္ထုကြိုက်သူ ဟုန်မေက အဖြေပေးနိုင်ပါသည်။

"ဇာတ်လမ်း ကြည့်လို့ကောင်းအောင်လေ။ သခင်မလေး အရင်က ပြောဖူးတယ် မဟုတ်လား၊ ဝတ္ထုဆိုတာ ယုတ္တိရှိအောင်၊ ဇာတ်လမ်း အချိတ်အဆက် မိအောင်၊ စိတ်လှုပ်ရှားစရာ ကောင်းအောင် အနုပညာ ဆန်ဆန် ပြုပြင်ဖန်တီးမှ ပိုကြည့်ကောင်းတာဆို"

ချူဟွား"..." ဒါဆို ငါ့အပြစ်ပေါ့လေ။

[ထားလိုက်ပါတော့၊ ထုံအာ၊ မုန့်ဟန် ပြန်ရောက်ပြီလား]

system [နင်က မုန့်ဟန်ကို တုန်းဖန်ဟန်ရဲ့ မူကြမ်းတွေကို ဖျက်ဆီးခိုင်းချင်ရင်လည်း အလကားပဲ၊ မုန့်ဟန်နဲ့ သူ့ဆရာ၊ ဆရာတူညီမလေးတွေ အကုန်လုံးက "ချူဟွား၏ အတ္ထုပ္ပတ္တိ" ရဲ့ ပရိသတ်စစ်စစ်တွေပဲ၊ သူသာ အဲဒီလို လုပ်ရဲရင် ဂိုဏ်းကနေ ထုတ်ပယ်ခံရလိမ့်မယ်]

ချူဟွားမှာ ခေါင်းမူးသွားပြီး မျက်လုံးများ ပြာသွားကာ နာကျင်စွာဖြင့် မျက်လုံး မှိတ်လိုက်သည်။ [… ဒီစာအုပ် ရောင်းတာ ကြာပြီလား]

system [မကြာသေးပါဘူး။ သုံးလလောက်ပဲ ရှိပါသေးတယ်]

[ညီလာခံက အမျိုးသမီး အထူးစာမေးပွဲ ဖွင့်လှစ်တာနဲ့ ညီလာခံက နင့်အတွက်ကြောင့် အမျိုးသမီး အထူးစာမေးပွဲ ဖွင့်လှစ်ပေးတယ် ဆိုတဲ့ သတင်းတွေ အတူတူ ထွက်သွားတာလေ၊ နင့်နာမည်ကို အဖတ်ဆယ်ဖို့အတွက် အရှင်မင်းကြီးက နေရာတိုင်းမှာ လမ်းဖွင့်ပေးပြီး အကြီးအကျယ် ပုံနှိပ်ခိုင်းတာ၊ စာအုပ်ဆိုင် အများအပြားက ရူးသွပ်မတတ် ရောင်းချကြလို့ သုံးလအတွင်း သာ့ရှန်း နေရာအနှံ့ ရောင်းချနိုင်ခဲ့တာပေါ့]

ချူဟွား၏ မျက်လုံးများမှာ အရောင်ပျောက်ကွယ်သွားတော့သည်။

ဘုရားရေ၊ သူမက ကူးပြောင်းလာသူတွေ လုပ်လေ့လုပ်ထ ရှိတဲ့ ကိစ္စလေး နည်းနည်းပဲ လုပ်ခဲ့တာပါ၊ ဘာလို့ တခြား ကူးပြောင်းလာသူတွေကျတော့ နေရာအနှံ့ လွှမ်းမိုးပြီး သမိုင်းတွင်ကျန်ရစ်ခဲ့ပေမဲ့ သူမကျတော့ သာ့ရှန်းပြည်သူ အားလုံး ရှေ့မှောက်မှာ လူမှုရေးအရ သေဆုံးရတာလဲ။

system [ကုန်သည် အများအပြားက စီးပွားရေး အခွင့်အလမ်းကို မြင်ပြီး စာအုပ်တွေကို ရှီးရုံ၊ ပေတိ၊ နန်မန်၊ တုန်းယီ တို့ဆီ ပို့ဆောင်လိုက်ကြပြီ၊ ခန့်မှန်းရရင် နှစ်ဝက်တောင် ကြာမှာ မဟုတ်ဘူး။ နင့်နာမည်က အိမ်နီးချင်း နိုင်ငံ အသီးသီးဆီ ပျံ့နှံ့သွားတော့မှာ]

[မမကြီးဟွား၊ နင် နာမည်ကြီးသွားပြီ] system ကတော့ အလွန် ပျော်ရွှင်လို့နေသည်။

ချူဟွား"..." အင်း၊ ငါ သေသွားပြီ၊ နင် ရွေးလိုက်တာလေ။

…