အခန်း ၃၂၈

အခန်း (၃၂၈) ရုပ်ခန္ဓာဖြင့် သိုင်းသူတော်စင်အဖြစ် တက်လှမ်းခြင်း

ထျန်းနန်မြို့... မြို့တော်ဝန်အိမ်တော်။

နဂါးကျား တာအိုဂိုဏ်း ဖျက်ဆီးခံရပြီးနောက် ကျန်းချဲ့သည် အချိန်များစွာ ဖြုန်းတီးမနေတော့ဘဲ ယဇ်ပူဇော်စရာ ပစ္စည်းများကို ရရှိပြီးသည်နှင့် ထျန်းနန်မြို့သို့ တိုက်ရိုက် ပြန်လာခဲ့လေသည်။

နဂါးကျားတောင်တွင် ဆက်နေခြင်းက ကျန်းချဲ့အတွက် ဘာမှ အသုံးမဝင်လှချေ။ မြောက်ပိုင်း ချီမိသားစု၏ အခြေခံအုတ်မြစ်ဖြင့် သူရသင့်ရထိုက်သော အကျိုးအမြတ်များကို ခိုအောင်းသိမ်းပိုက်ထားမည် မဟုတ်ကြောင်း သူ အပြည့်အဝ ယုံကြည်ထားလေသည်။

မြို့တော်ဝန်အိမ်တော်သို့ ပြန်ရောက်ပြီးနောက်တွင်တော့ ကျန်းချဲ့သည် တောင်ပိုင်းယွဲ့ဘက်မှ တုံ့ပြန်မှုကို နောက်ဆုံးတွင် သိရှိလိုက်ရလေသည်။

နဂါးကြောစွမ်းအင်နှင့် ပတ်သက်သော ကိစ္စကို လူသိရှင်ကြား တရားဝင် ထုတ်ပြန်ကြေညာလိုက်ခြင်း ပင်ဖြစ်သည်။

ယခုအခါ ထျန်းနန် သိုင်းလောက တစ်ခုလုံးတွင် တိတ်တဆိတ် လှုပ်ရှားမှုများ ပြင်းထန်နေလေပြီ။

နဂါးကြောစွမ်းအင်၏ တန်ဖိုး မည်မျှကြီးမားကြောင်း ကျန်းချဲ့ ကောင်းစွာ သိရှိထားလေသည်။ အထူးသဖြင့် ရည်မှန်းချက်ကြီးမားသော သူများအတွက် အလွန် ဆွဲဆောင်မှု ရှိလှပေသည်။ ယင်းကို အခြေခံ၍ လူအများ၏ စွမ်းအားများကို စုပ်ယူကာ နိုင်ငံတော် ကံကြမ္မာ အဖြစ်သို့ ပြောင်းလဲနိုင်လေသည်။

အခြားသော အသုံးဝင်မှုများလည်း များစွာ ရှိသေးလေသည်။

ကျင့်ကြံခြင်း ခရီးစဉ်တွင်ပင် အံ့မခန်း အကျိုးသက်ရောက်မှုများ ရှိလေသည်။

ဥပမာအားဖြင့် တော်ဝင်မိသားစုဝင် ဖြစ်သော ဂျီဟုန်လျန် သည် နဂါးကြောစွမ်းအင်ကို အသုံးပြု၍ ကျင့်ကြံနိုင်သကဲ့သို့ သာမန် သိုင်းပညာရှင်များ အတွက်လည်း အများကြီး အသုံးဝင်လိမ့်မည်ဟု ကျန်းချဲ့ ခန့်မှန်းမိလေသည်။ မဟုတ်ပါက ချီရွှယ်မိစ္ဆာသခင် က ဤမျှလောက် အလေးထားမည် မဟုတ်ချေ။

သို့သော် ယခုအချိန်အထိ ချီရွှယ်မိစ္ဆာသခင် က ထိုကိစ္စကို လုံးဝ ထုတ်ဖော်ပြောဆိုခြင်း မရှိသေးချေ။

"ဒီကိစ္စက တကယ်ပဲ ရှောင်လွှဲလို့ မရနိုင်တော့ဘူးပဲ..."

အိမ်တော် နောက်ဖေးခြံဝင်း အတွင်း၌ ချီရွှယ်မိစ္ဆာသခင် က သက်ပြင်းချကာ ပြောလိုက်လေသည်။ တောင်ပိုင်းယွဲ့ ဘက်မှ အိုးပဲ့ကို ပစ်ပေါက်လိုက်သကဲ့သို့ လုပ်ဆောင်လာမည့် တုံ့ပြန်မှုကို သူနှင့် ကျန်းချဲ့တို့ ကြိုတင် ခန့်မှန်းထားပြီး ဖြစ်လေသည်။

သို့သော် ထိုသို့ ကြိုသိနေသော်လည်း သူတို့ တားဆီးနိုင်စွမ်း မရှိခဲ့ချေ။

အဘယ်ကြောင့်ဆိုသော် သူတို့၏ လက်ရှိ အင်အားမှာ တောင်ပိုင်းယွဲ့ နိုင်ငံကို ဖျက်ဆီးပစ်ရန် မလုံလောက်သေးသောကြောင့် ပင်ဖြစ်သည်။

"စီနီယာကများ နဂါးကြောစွမ်းအင်ရဲ့ အသုံးဝင်ပုံ အတိအကျကို ပြောပြပေးလို့ ရနိုင်မလား..."

ကျန်းချဲ့ က ခေါင်းမော့ကာ တစ်ဖက်လူကို စူးစိုက်ကြည့်ရင်း မေးလိုက်လေသည်။

ချီရွှယ်မိစ္ဆာသခင် ၏ မျက်လုံးများ ကျဉ်းမြောင်းသွားပြီး ရုတ်တရက် ညင်သာစွာ ပြုံးလိုက်လေသည်။

"မင်း တကယ် သိချင်လို့လား..."

"သတင်းကလည်း အပြင်ကို ပေါက်ကြားသွားပြီဆိုတော့ နောက်ပိုင်း သေချာပေါက် တပ်မက်တဲ့သူတွေ ပေါ်လာတော့မှာပဲ အစောသိသိ နောက်သိသိ သိရမှာပဲဟာကို စီနီယာက ဘာလို့ ဖုံးကွယ်ထားဦးမှာလဲ ဘယ်လိုပဲဖြစ်ဖြစ် ကျွန်တော်က အတင်းအဓမ္မ လုယူမှာမှ မဟုတ်တာ..."

ချီရွှယ်မိစ္ဆာသခင် သည် အချိန်ခဏမျှ တိတ်ဆိတ်သွားပြီးနောက် ကိုယ်တွင်းမှ လေပူများကို မှုတ်ထုတ်လိုက်ကာ လေးနက်သော အသံဖြင့် ပြောလိုက်လေသည်။

"ကျုပ် လည်း မင်းကို မဖုံးကွယ်တော့ပါဘူး ဒီနဂါးကြောစွမ်းအင် တစ်ပိုင်းက တကယ်တော့ ကျုပ်ရဲ့ ရုပ်ခန္ဓာနဲ့ ပေါင်းစပ်ဖို့ ပြင်ဆင်ထားတာ အရင်တုန်းက ရှေးဟောင်း အမွေအနှစ် နေရာတစ်ခုကနေ လျှို့ဝှက်ချက် တစ်ခုကို မတော်တဆ သိခဲ့ရတယ် နိုင်ငံတော်ရဲ့ နဂါးကြောစွမ်းအင်က ရုပ်ခန္ဓာကို သိုင်းသူတော်စင်အဆင့် ရောက်အောင် ကူညီပေးနိုင်တယ်တဲ့..."

"ရုပ်ခန္ဓာနဲ့ သိုင်းသူတော်စင်အဆင့် တက်လှမ်းတာလား..."

ကျန်းချဲ့ ၏ မျက်လုံးများ လှုပ်ရှားသွားပြီး နောက်ထပ် လျှို့ဝှက်ချက် တစ်ခုကို ကြားလိုက်ရပြန်လေသည်။

"မှန်တယ် ရုပ်ခန္ဓာနဲ့ သိုင်းသူတော်စင်အဆင့် ရောက်တာပဲ..."

"စီနီယာ ကျေးဇူးပြုပြီး ရှင်းပြပေးပါဦး..."

ချီရွှယ်မိစ္ဆာသခင် က အချိန်အနည်းငယ် စဉ်းစားခန်း ဝင်သွားပြီး ကျန်းချဲ့ကို တစ်ချက် အကဲခတ်ကြည့်လိုက်လေသည်။

"အဲ့ဒီ ရှေးဟောင်း အမွေအနှစ် နေရာက မှတ်တမ်းတွေအရဆိုရင် လွန်ခဲ့တဲ့ နှစ်ထောင်ပေါင်းများစွာ က သိုင်းသူတော်စင် ဆိုတာက ရုပ်ခန္ဓာနဲ့ သိုင်းသူတော်စင် ဖြစ်လာတာကို ခေါ်တာ ခြေလက် ပြတ်သွားရင်တောင် ပြန်ပေါက်နိုင်တယ် သွေးတစ်စက် ရှိနေသရွေ့ မသေနိုင်ဘူး အဲ့ဒီလောက် ကြီးမားတဲ့ နတ်စွမ်းရည်တွေ ရှိတယ် ဒါပေမဲ့ ဒီလမ်းစဉ်က အရမ်း ခက်ခဲလွန်းတော့ နှစ်ထောင်ပေါင်းများစွာ ကြာလာတဲ့အခါ တဖြည်းဖြည်း တိမ်ကောသွားခဲ့တယ် သိုင်းသူတော်စင် ဆိုတဲ့ နာမည်ကလည်း မူလဝိညာဉ် မိုးကြိုးဘေးဒဏ်ကို ဖြတ်ကျော်နိုင်တဲ့ သိုင်းပညာရှင်တွေကိုပဲ ရည်ညွှန်းလာကြတော့တယ် တကယ်တမ်းကျတော့ အခုခေတ်က သိုင်းသူတော်စင် တာအိုသခင် နတ်ဘုရား လို့ ခေါ်နေကြတာတွေက လမ်းစဉ်တစ်ခုတည်းပါပဲ အခေါ်အဝေါ်ပဲ ကွာသွားတာ လွန်ခဲ့တဲ့ နှစ်ထောင်ပေါင်းများစွာ က သိုင်းသူတော်စင် ကမှ အစစ်အမှန် သိုင်းသူတော်စင်ပဲ..."

"ခြေလက် ပြတ်သွားရင် ပြန်ပေါက်နိုင်တယ် သွေးတစ်စက် ရှိနေသရွေ့ မသေနိုင်ဘူး ဒါတွေအပြင် တခြား အကျိုးသက်ရောက်မှုတွေရော ရှိသေးလား..."

"ရှေးဟောင်း မှတ်တမ်းတွေထဲမှာ သေချာ မရေးထားလို့ အတိအကျတော့ ငါလည်း မသိဘူး ဒါပေမဲ့ သေချာတာ တစ်ခုက ရုပ်ခန္ဓာနဲ့ သိုင်းသူတော်စင် ဖြစ်လာတဲ့သူတွေက တိုက်ခိုက်ရေး စွမ်းအား အလွန် ကြီးမားပြီး မျိုးဆက်တူချင်း ပြိုင်ဘက်ကင်းတယ် သိုင်းသူတော်စင် ဖြစ်လာဖို့ လမ်းစဉ်တွေ အများကြီး ရှိတဲ့အထဲက တစ်ခုကတော့ နိုင်ငံတော်ရဲ့ နဂါးကြောစွမ်းအင်ကို ရုပ်ခန္ဓာထဲ ပေါင်းစပ်ဖို့ပဲ အဲ့ဒါကြောင့်လည်း အရင်တုန်းက ကျုပ် စိတ်ကူးပေါက်ပြီး ချီဖျင်တောက် သတိလက်လွတ် ဖြစ်နေတုန်း တောင်ပိုင်းယွဲ့ နန်းတော်ထဲ ခိုးဝင်ပြီး အဲ့ဒီ နဂါးကြောစွမ်းအင် တစ်ပိုင်းကို ယူလာခဲ့တာ နောက်မှ ငါသိရတာက ဒီနဂါးကြောစွမ်းအင် တစ်ပိုင်းက အရင်တုန်းက ရှေးဟောင်းယွဲ့နိုင်ငံ ပိုင်ဆိုင်ခဲ့တာ နောက်ပိုင်း ရှေးဟောင်းယွဲ့နိုင်ငံ ပြိုကွဲသွားတော့ တောင်ပိုင်းယွဲ့ က တစ်စိတ်တစ်ပိုင်းကို ရလိုက်တာ ဖြစ်ဖို့များတယ်..."

"စီနီယာရဲ့ ရည်မှန်းချက်က မသေးပါလား သိုင်းသူတော်စင်အဆင့်ကို ထိုးဖောက်ချင်ရုံတင် မကဘူး ရုပ်ခန္ဓာနဲ့ပါ သိုင်းသူတော်စင်အဆင့်ကို တက်လှမ်းချင်နေတာကိုး..."

ကျန်းချဲ့ က တစ်ဖက်လူကို အပေါ်အောက် အကဲခတ်ကြည့်ရင်း အနည်းငယ် အံ့သြစွာဖြင့် ပြောလိုက်လေသည်။

"ဖြစ်နိုင်ခြေတော့ သိပ်မများပါဘူး ကျုပ် ကလည်း နည်းနည်း စမ်းသပ်ကြည့်ရုံ သက်သက်ပါ နောက်ပိုင်းမှ နဂါးကြောစွမ်းအင်ရဲ့ ထူးခြားမှုကို ဖြည်းဖြည်းချင်း သဘောပေါက်လာတာ သွေးပင်လယ် ပုတီးစေ့ထဲကိုတောင် ပေါင်းစပ်လို့ ရပြီး နယ်မြေကိုပါ ကျယ်ပြန့်လာစေတာပဲ..."

"ဖြစ်နိုင်ခြေ သိပ်မများဘူး ဟုတ်လား စီနီယာက ဘာလို့ အဲ့ဒီလို ပြောရတာလဲ..."

ကျန်းချဲ့ က ဆက်လက် မေးမြန်းလိုက်လေသည်။

"ရုပ်ခန္ဓာနဲ့ သိုင်းသူတော်စင် ဖြစ်ဖို့က ဘယ်လောက်တောင် ခက်ခဲလဲ ဆိုတာ မင်း စဉ်းစားကြည့်လေ နဂါးကြောစွမ်းအင် တစ်ပိုင်းလေးကို အားကိုးရုံနဲ့ ဘယ်လိုလုပ် အောင်မြင်နိုင်မှာလဲ သေချာပေါက် တခြား နဂါးကြောစွမ်းအင်တွေ အများကြီး လိုအပ်ဦးမှာပဲ ဒါ့အပြင် တခြား သဘာဝ ရတနာတွေလည်း အများကြီး လိုသေးတယ် အဲ့ဒါမှ မသေနိုင်တဲ့ ရုပ်ခန္ဓာကို တည်ဆောက်နိုင်မှာလေ ဒီပစ္စည်းက တကယ်တော့ မျှော်လင့်ချက်လေး တစ်ခု သက်သက်ပါပဲ နောက်ပိုင်း တကယ်လို့ အစွမ်းထက်တဲ့သူ တစ်ယောက်ယောက်က လာတောင်းရင်လည်း ဒါကို သုံးပြီး သိုင်းသူတော်စင်အဆင့် တက်ဖို့ အထောက်အကူ ဖြစ်စေမယ့် ပစ္စည်းတွေနဲ့ လဲလှယ်လိုက်ရင်လည်း မဆိုးပါဘူး..."

ချီရွှယ်မိစ္ဆာသခင် က မိမိကိုယ်မိမိ ကောင်းစွာ နားလည်ထားပုံရကာ ခေါင်းယမ်းလိုက်လေသည်။

နဂါးကြောစွမ်းအင် တစ်ပိုင်းကို ရရှိခဲ့ခြင်းက ကံကောင်းမှု တစ်ခု ဖြစ်သော်လည်း ဤအရာကို အားကိုးပြီး သိုင်းသူတော်စင် အဖြစ်သို့ ရောက်ရှိမည်ဟု သူ လုံးဝ မမျှော်လင့်ထားချေ။ သူ၏ စိတ်ကူးမှာ လုပ်လို့မရတော့သည့် အဆုံးတွင် ဤအရာကို အသုံးပြု၍ သိုင်းသူတော်စင်အဆင့် သို့ တက်လှမ်းရန် အထောက်အကူ ဖြစ်စေမည့် အရင်းအမြစ်များနှင့် လဲလှယ်ရန် သက်သက်သာ ဖြစ်လေသည်။

"ခန္ဓာကိုယ် ကျင့်ကြံခြင်းနဲ့ ပတ်သက်ပြီး စီနီယာ ဘာတွေ သိထားသေးလဲ..."

ကျန်းချဲ့ က ခေါင်းအနည်းငယ် ညိတ်ပြလိုက်ပြီးနောက် စကားလမ်းကြောင်း လွှဲလိုက်လေသည်။

ချီရွှယ်မိစ္ဆာသခင် က အချိန်အနည်းငယ် စဉ်းစားလိုက်ပြီးနောက် ခေါင်းညိတ်ကာ ပြန်ပြောလိုက်လေသည်။

"ခန္ဓာကိုယ် ကျင့်ကြံခြင်း လမ်းစဉ်က ခက်ခဲကြမ်းတမ်းတယ် ဆိုပေမဲ့ သိုင်းလောကမှာ လုံးဝ မရှိတာတော့ မဟုတ်ဘူး အရင်က မင်း တွေ့ခဲ့တဲ့ ကျောက်ယွမ်မင် ဆိုရင် ခန္ဓာကိုယ် ကျင့်ကြံခြင်းမှာ ကြီးကျယ်တဲ့ အောင်မြင်မှု ရထားတဲ့ သူပဲ သူ့ရဲ့ စွမ်းအားက ရှန်ရှန်းအဆင့်မှာတောင် ထိပ်တန်း အဆင့်မှာ ရှိတယ် ခန္ဓာကိုယ် ကျင့်ကြံခြင်းမှာလည်း အဆင့်သတ်မှတ်ချက်တွေ သေချာပေါက် ရှိတာပေါ့ ပထမအဆင့်ကို သေမျိုးရုပ်ခန္ဓာ လို့ ခေါ်တယ် ပုံမှန် ကျင့်ကြံခြင်းနဲ့ သိပ်မကွာခြားဘူး ဒုတိယအဆင့်ကတော့ နဂါးသွေးသား လို့ ခေါ်ပြီး မွေးရာပါအဆင့်နဲ့ ညီမျှတယ် တတိယအဆင့်က ရွှေကိုယ်ထည် မပျက်စီးနိုင်သော ရုပ်ခန္ဓာပဲ အခု မင်းရဲ့ ရုပ်ခန္ဓာက ဒီအဆင့်နဲ့ ညီမျှတယ် မင်း ကျင့်ကြံနေတဲ့ ရွှမ်ထျန်း နဂါးပြောင်းလဲခြင်း ကျင့်စဉ်က ကျုပ်ရဲ့ အမြင်အရတော့ ရုပ်ခန္ဓာနဲ့ ချီစွမ်းအင်ကို ပေါင်းစပ် ကျင့်ကြံတဲ့ ကျင့်စဉ်ပဲ အဲ့ဒါကြောင့်လည်း မင်းက မျိုးဆက်တူချင်းတွေကြားမှာ ဒီလောက်တောင် အစွမ်းထက်နေတာ စတုတ္ထအဆင့်ကိုတော့ နတ်စွမ်းရည်အဆင့် လို့ ခေါ်ပြီး ရှန်ရှန်းအဆင့်နဲ့ ညီမျှတယ် ကိုယ်ပိုင် မဟာနတ်စွမ်းရည် တစ်ခုကို ဖန်တီးနိုင်ပြီး အလွန် ကြောက်စရာကောင်းတယ် ပဉ္စမအဆင့်ကတော့ ရုပ်ခန္ဓာနဲ့ သိုင်းသူတော်စင် ဖြစ်လာတဲ့ အဆင့်ပေါ့..."

ချန်းချဲ့ အလွန် စိတ်ဝင်စားနေသည်ကို မြင်သောအခါ ချီရွှယ်မိစ္ဆာသခင် သည် လုံးဝ ဖုံးကွယ်မနေတော့ဘဲ အသေးစိတ် ရှင်းပြလိုက်လေသည်။

ချီရွှယ်မိစ္ဆာသခင် ၏ စကားများက ကျန်းချဲ့ အတွက် နောက်ထပ် တံခါးတစ်ချပ်ကို ဖွင့်လှစ်ပေးလိုက်သကဲ့သို့ ပင်ဖြစ်သည်။

နတ်စွမ်းရည်အဆင့်... ရှန်ရှန်းအဆင့်...

ရုပ်ခန္ဓာဖြင့် သိုင်းသူတော်စင် ဖြစ်ခြင်း... သွေးတစ်စက်မှ ပြန်လည် ရှင်သန်ခြင်း...

ဤအရာများနှင့် ပတ်သက်၍ ကျန်းချဲ့ အလွန် စိတ်ဝင်စားသွားမိလေသည်။ အမှန်တကယ်တော့ ရွှမ်ထျန်း နဂါးပြောင်းလဲခြင်း ကျင့်စဉ် အရ ဆိုလျှင် သူသည် အမြဲတမ်း ကျင့်စဉ် နှစ်မျိုးစလုံးကို ပေါင်းစပ် ကျင့်ကြံနေခဲ့ခြင်း ဖြစ်လေသည်။ ထို့ကြောင့်လည်း ယဇ်ပူဇော်စရာ ပစ္စည်းများစွာ လိုအပ်နေခဲ့ခြင်း ပင်ဖြစ်သည်။

မူလက သူ တွေးထားခဲ့သည်မှာ သူ၏ ပါရမီ က သာမန်သာ ဖြစ်သောကြောင့် ဟု ထင်ခဲ့သော်လည်း ယဇ်ပူဇော်မှု အကြိမ်ပေါင်းများစွာ ပြုလုပ်ပြီးနောက် ယခုအခါ သူ၏ ပါရမီ မှာ မညံ့တော့ချေ။ သူ၏ ခန္ဓာကိုယ် သည်ပင်လျှင် နဂါးဟိန်းသံ ခန္ဓာကိုယ် အဖြစ်သို့ ရောက်ရှိနေခဲ့ပြီ ဖြစ်သည်။

သို့သော် ယဇ်ပူဇော်မှု ပြုလုပ်တိုင်း သက်တမ်း အများအပြား ကို လျော့ကျစေသည့်အပြင် တန်ဖိုးကြီးမားသော ယဇ်ပူဇော်စရာ ပစ္စည်းများစွာ လည်း လိုအပ်နေဆဲ ပင်ဖြစ်သည်။

ယခု ကြည့်ရသည်မှာ ကောင်းကင်ယဇ်ပလ္လင် ကျောက်တိုင် ကြောင့် မဟုတ်ဘဲ ရွှမ်ထျန်း နဂါးပြောင်းလဲခြင်း ကျင့်စဉ် က ယူဆောင်လာသော ခက်ခဲမှုများ ကြောင့်သာ ဖြစ်ကြောင်း ထင်ရှားလှပေသည်။

သို့သော် ထိုသို့ ခက်ခဲမှုများ ကြောင့်ပင် ကျန်းချဲ့ ၏ စွမ်းအား သည် မျိုးဆက်တူ သိုင်းပညာရှင် များကို အပြတ်အသတ် ကျော်လွန်နေစေခဲ့ခြင်း ပင်ဖြစ်သည်။ ယခု လက်ရှိ အခြေအနေ ကဲ့သို့ပင် လက်တစ်ချက် ဝှေ့ယမ်းရုံမျှဖြင့် မျိုးဆက်တူ ပါရမီရှင် သိုင်းပညာရှင် များကို အလွယ်တကူ ဖိနှိပ်နိုင်စွမ်း ရှိနေခြင်း ဖြစ်လေသည်။

ဤသည်မှာ ချီစွမ်းအင် နှင့် ရုပ်ခန္ဓာ ပေါင်းစပ် ကျင့်ကြံခြင်း ၏ အားသာချက် ပင်ဖြစ်ကြောင်း အလွန် ထင်ရှားလှပေသည်။

'ဒါဆိုရင် နောက်ပိုင်းကျရင်ရော...'

ရွှမ်ထျန်း နဂါးပြောင်းလဲခြင်း ကျင့်စဉ် က လမ်းဆုံးကို ရောက်ရှိနေပြီ ဖြစ်သည်။ အထွတ်အထိပ်သို့ ရောက်ရှိခဲ့သော ကျွန်းဟိုင်နန်းတော် ၏ အစွမ်းအထက်ဆုံး သူများပင်လျှင် ဤအဆင့် အထိသာ ကျင့်ကြံနိုင်ခဲ့ကြခြင်း ဖြစ်လေသည်။ သူ အနေဖြင့် ချီစွမ်းအင် နှင့် ရုပ်ခန္ဓာ ပေါင်းစပ် ကျင့်ကြံခြင်း လမ်းစဉ်ကို ဆက်လက် လျှောက်လှမ်းလိုပါက ကျင့်စဉ် အသစ် ပြောင်းလဲ ရမည် သို့မဟုတ် သူ့အတွက် အသင့်တော်ဆုံး ကျင့်စဉ် တစ်ခုကို ကိုယ်တိုင် ဖန်တီး ရမည် ဖြစ်လေသည်။

'မဆိုးပါဘူး ကိုယ်တိုင် ဖန်တီးဖို့လည်း အရည်အချင်း ရှိတာပါပဲ ဉာဏ်ရည်ဉာဏ်သွေး မမြင့်မားပေမဲ့ ကောင်းကင်ယဇ်ပလ္လင် ကျောက်တိုင် ရှိနေတယ်လေ ယဇ်ပူဇော်စရာ ပစ္စည်းတွေသာ လုံလုံလောက်လောက် ပေးနိုင်ရင် လိုချင်တဲ့ ရည်မှန်းချက် မှန်သမျှ အကုန် အောင်မြင်နိုင်တာပဲ ရွှမ်ထျန်း နဂါးပြောင်းလဲခြင်း ကျင့်စဉ် ရဲ့ အဆက်ကို ဖန်တီးဖို့ ဆိုတာလည်း မဖြစ်နိုင်တဲ့ ကိစ္စမှ မဟုတ်တာ...'

"မင်းလည်း ရုပ်ခန္ဓာ ကျင့်ကြံခြင်း လမ်းစဉ်ကို လျှောက်ချင်နေတာလား..."

ချီရွှယ်မိစ္ဆာသခင် က ကျန်းချဲ့ ၏ တွေဝေနေမှုကို ရိပ်မိသွားပြီး အလွယ်တကူ မေးလိုက်လေသည်။

ကျန်းချဲ့ က ပြုံးလိုက်ပြီး တိုက်ရိုက် မဖြေဘဲ သက်ပြင်းတစ်ချက် ချကာ ပြောလိုက်လေသည်။

"ကျွန်တော် ကတော့ ကျင့်ကြံခြင်း ခရီးစဉ် က တကယ်ကို ခက်ခဲကြမ်းတမ်းတယ် လို့ တွေးမိလို့ပါ..."

ယခု လက်ရှိ သူ၏ အဓိက ရည်မှန်းချက် မှာ ရှန်ရှန်းအဆင့် သို့ တက်လှမ်းရန် ပင်ဖြစ်သည်။ ယခုအချိန်တွင် အများကြီး တွေးနေ၍လည်း အပိုပင် ဖြစ်လေသည်။ မည်သို့ပင်ဆိုစေ သူ မဟာသိုင်းသခင် အဆင့်သို့ ရောက်ရှိမှသာ ကျင့်စဉ် အသစ် ဖန်တီးရန် အတွက် ပြင်ဆင်နိုင်မည် ဖြစ်လေသည်။

ကျန်းချဲ့ ၏ သက်ပြင်းချသံ ကို ကြားသောအခါ ချီရွှယ်မိစ္ဆာသခင် သည်လည်း ကိုယ်ချင်းစာ သွားမိပြီး လေးနက်သော အသံဖြင့် ပြောလိုက်လေသည်။

"ကျင့်ကြံခြင်း ခရီးစဉ် က ကောင်းကင်ကို တက်ရသလို ခက်ခဲတာပေါ့ကွာ..."

"ယောကျ်ား..."

ကျန်းချဲ့ နှင့် ချီရွှယ်မိစ္ဆာသခင် တို့ နှစ်ယောက်စလုံး တိတ်ဆိတ်သွားပြီး လေထု ငြိမ်သက်သွားချိန်တွင် အခွင့်အရေးကို စောင့်နေသော ဟွမ်ရှန်းရှန်း က ရုတ်တရက် တိုးညှင်းစွာ ခေါ်လိုက်ပြီး ကျန်းချဲ့ကို မျက်နှာလေး နီရဲကာ တစ်ချက် လှမ်းကြည့်လိုက်လေသည်။

ထို့နောက် သူ့ကို မျက်စိမှိတ်ပြလိုက်လေသည်။

သူမ တော်တော်လေး လောနေပြီ ဖြစ်ကြောင်း ထင်ရှားလှပေသည်။

စွမ်းအားများ ရုတ်တရက် တိုးတက်လာသည့် ခံစားချက်ကို မြည်းစမ်းမိပြီးနောက် ဟွမ်ရှန်းရှန်း သည် မိမိဘာသာ ကြိုးစား ကျင့်ကြံရသည့် အရှိန်မှာ လိပ်တစ်ကောင် သွားနေသကဲ့သို့ အလွန် နှေးကွေးလွန်းလှသည်ဟု ထင်မြင်လာမိလေသည်။

ဤအရှိန်နှုန်းဖြင့် ဆိုလျှင် ကျန်းချဲ့ က သူမကို အရင်းအမြစ်များ အများအပြား ထောက်ပံ့ပေးမည် ဆိုလျှင်တောင် ရှန်ကွမ်းအထွတ်အထိပ် အဆင့် သို့ ရောက်ရှိရန် အနည်းဆုံး နှစ်အနည်းငယ်ခန့် အချိန်ယူရမည် ဖြစ်လေသည်။

သို့သော် အကယ်၍ မကြာခဏ နှစ်ကိုယ်တူ ကျင့်ကြံနိုင်မည် ဆိုပါက ထိုအရှိန်နှုန်းမှာ အများကြီး ပိုမြန်သွားမည် ဖြစ်လေသည်။

နှစ်နှစ်လား...

တစ်နှစ်လား...

အလွန်ဆုံး ခြောက်လ အတွင်းမှာပင် သူမ ရှန်ကွမ်းအထွတ်အထိပ် အဆင့် သို့ ရောက်ရှိနိုင်မည်ဟု ဟွမ်ရှန်းရှန်း ယုံကြည်ထားလေသည်။

လတ်တလော အချိန်များတွင် ကျန်းချဲ့ က ကိစ္စ မျိုးစုံဖြင့် အလုပ်ရှုပ်နေသဖြင့် သူမ အနေဖြင့် အလွန် စိတ်မရှည်နိုင်အောင် ဖြစ်နေခဲ့ပြီး ယခုအခါတွင်တော့ ပွင့်ပွင့်လင်းလင်းပင် အချက်ပြနေလေပြီ။

ဤမြင်ကွင်းကို မြင်သောအခါ ကျန်းချဲ့ က ချီရွှယ်မိစ္ဆာသခင် ကို တစ်ချက် ကြည့်လိုက်ပြီး လည်ချောင်းတစ်ချက် ရှင်းကာ ပြောလိုက်လေသည်။

"စီနီယာ လည်း ဒီရက်ပိုင်း အရမ်း ပင်ပန်းနေလောက်ပြီ ပြန်ပြီး ရက်အနည်းငယ်လောက် ကောင်းကောင်း အနားယူလိုက်ပါဦး နောက်ထပ် အချိန်အနည်းငယ် ကြာရင် ကျွန်တော်တို့ အရှေ့ပင်လယ် ကို သွားရတော့မှာမို့ ပြင်ဆင်စရာ ရှိတာတွေ သေချာ ပြင်ဆင်ထားရမယ်..."

"မင်း ကောင်လေး..."

ချီရွှယ်မိစ္ဆာသခင် က ခေါင်းယမ်းလိုက်ပြီး ချက်ချင်း မတ်တပ်ရပ်ကာ ထွက်ခွာရန် ပြင်လိုက်လေသည်။

ကျန်းချဲ့ ၏ လုပ်ရပ်များကို သူ တကယ် နားမလည်နိုင်အောင် ဖြစ်ရလေသည်။ မိန်းမတွေက ကျင့်ကြံခြင်းထက် ဘယ်နေရာက ပိုကောင်းနေလို့လဲ...

သူသည် ဖြောင့်မတ်သော သူတော်ကောင်း တစ်ယောက် မဟုတ်သော်လည်း ကျန်းချဲ့ နှင့် နှိုင်းယှဉ်ပါက အများကြီး သာလွန်လှပေသည်။ အဘယ်ကြောင့်ဆိုသော် သူ၏ ပထမဆုံး ရည်မှန်းချက် မှာ အမြဲတမ်း မိန်းမများ မဟုတ်ဘဲ အသက်ရှည်ခြင်း နှင့် ကျင့်ကြံခြင်း သာ ဖြစ်သောကြောင့် ပင်ဖြစ်သည်။

ချီရွှယ်မိစ္ဆာသခင် ထွက်သွားပြီးနောက် ဟွမ်ရှန်းရှန်း က ကျန်းချဲ့ ၏ ရင်ခွင်ထဲသို့ တိုက်ရိုက် ခုန်ဝင်သွားပြီး အဆက်မပြတ် ပွတ်သီးပွတ်သပ် လုပ်နေကာ ကျန်းချဲ့ ကို တမင် မျက်စိမှိတ်ပြပြီး စကတ်စကို အနည်းငယ် မကာ အတွင်းဘက်မှ လှပသော ရှုခင်းများကို ပြသလိုက်လေသည်။

"ဒီအဝတ်အစား တွေကို ဘယ်ကရလာတာလဲ..."

ကျန်းချဲ့ ၏ မျက်ခုံးများ ပင့်တက်သွားလေသည်။ အဝတ်စ အနည်းငယ်သာ ပါဝင်သော ဤအဝတ်အစားမျိုးက ဤခေတ်ကာလ နှင့် သိပ်ပြီး မကိုက်ညီလှချေ။

ဟွမ်ရှန်းရှန်း က ကျန်းချဲ့ ၏ နားနားသို့ ကပ်ကာ လေပူလေး မှုတ်ထုတ်ပြီး တိုးညှင်းစွာ ပြောလိုက်လေသည်။

"ကျွန်မ အစ်ကို့အတွက် သီးသန့် ပြင်ဆင်ထားတာလေ သဘောကျရဲ့လား..."

ချစ်စရာကောင်းပြီး လှပလွန်းသော ဟွမ်ရှန်းရှန်း ကို ကြည့်ရင်း ကျန်းချဲ့ ၏ စိတ်ထဲတွင် ယခင်က ပထမဆုံး တွေ့ဆုံခဲ့စဉ်က မြင်ကွင်းများကို အလိုအလျောက် ပြန်လည် တွေးတောမိလိုက်လေသည်။

ထိုအချိန်က ဟွမ်ရှန်းရှန်း မှာ အလွန် မာနကြီးပြီး အထက်စီးဆန်လွန်းလှပေသည်။ အထူးသဖြင့် လုဖျင်ကျိုး ၏ အရှေ့တွင် ကျူးလွန်၍ မရနိုင်သော နတ်သမီးလေး တစ်ပါး အလား ပင်ဖြစ်သည်။

သို့သော် သူ၏ သွန်သင်ဆုံးမမှု အောက်တွင်တော့ ဤကဲ့သို့ လုံးဝ ဆန့်ကျင်ဘက် အခြေအနေမျိုး သို့ ပြောင်းလဲသွားခဲ့လေပြီ။

တကယ့်ကို လောကဓံ တရားပါပဲလေ...

"ဟွန့် ကြည့်ရတာ ကျွန်မ လာတာ အချိန်အခါ မတော်ဘူး ထင်တယ်..."

ပန်းခြံ ထောင့်ချိုး လေးမှ ချီနင်ပင်း က ရင်ဘတ်ကို လက်ပိုက်ကာ ဖက်တွယ်နေသော သူတို့ နှစ်ယောက်ကို ကြည့်ရင်း အနည်းငယ် မကျေမနပ် ဖြစ်နေကာ ဟွမ်ရှန်းရှန်း ကို မျက်စောင်းထိုး ကြည့်လိုက်လေသည်။

သူမ က အစောကြီး ရောက်လာပြီဟု ထင်မှတ်ထားခဲ့သော်လည်း နောက်ဆုံးတွင် ခြေတစ်လှမ်း နောက်ကျသွားခဲ့ရဆဲ ပင်ဖြစ်သည်။

"မဟုတ်ပါဘူး နင်ပင်း မင်း လာတာ အချိန်အရမ်းကိုက်တယ် လာ အတူတူပေါ့ အစ်ကို က မင်းရဲ့ ကျင့်ကြံခြင်းကိုပါ တစ်ခါတည်း လမ်းညွှန်ပေးလိုက်မယ်လေ..."

ကျန်းချဲ့ က လက်တစ်ဖက်ဖြင့် ဟွမ်ရှန်းရှန်း ကို ဖက်ထားရင်း ချီနင်ပင်း ကို လှမ်းခေါ်လိုက်လေသည်။

ချီနင်ပင်း ၏ အကြည့်များက ကျန်းချဲ့ ၏ ဖြူဖွေးသွယ်လျသော လက်ချောင်းများ ဆီသို့ အလိုအလျောက် ရောက်ရှိသွားလေသည်။

"ဖူး အဲ့ဒါက ကျင့်ကြံခြင်းကို လမ်းညွှန်ပေးတာတဲ့လား သိသာလွန်းပါတယ်..."

"ဘာကို သိသာတာလဲ..."

"ဟွန့်..."

ပန်းခြံ အပြင်ဘက် သိပ်မဝေးသေးသော နေရာမှ ချီရွှယ်မိစ္ဆာသခင် သည် သူတို့၏ စကားများကို ကြားလိုက်ရသဖြင့် အသက်ပြင်းပြင်း တစ်ချက် ရှူသွင်းလိုက်ပြီးနောက် ချက်ချင်း ခပ်မြန်မြန် လျှောက်သွားလေတော့သည်။

သို့သော် အနီးအနားရှိ အစေခံ မိန်းကလေး များက တိုးညှင်းသော ညည်းတွားသံ တစ်ခုကို မသဲမကွဲ ကြားလိုက်ရလေသည်။

"ဟင်း အခုခေတ် လူငယ်တွေများ..."

"နင်ပင်း နင်ပင်း..."

"ဟင်..."

မူးဝေနေသော ချီနင်ပင်း က မျက်တောင်လေး ခတ်လိုက်ပြီးနောက် အသက်ပြင်းပြင်း တစ်ချက် ရှူသွင်းလိုက်ကာ အလျင်စလို ထိုင်လိုက်ပြီး စောင်ကို ဆွဲခြုံလိုက်ကာ အသံလာရာဆီသို့ မျက်လုံးပြူးလေး ဖြင့် ကြည့်လိုက်လေသည်။

"ဘာလုပ်မလို့လဲ ကျွန်မ မလုပ်နိုင်တော့ဘူး အဲ့ဒီ ဟွမ် ရှန်းရှန်း ကိုပဲ ခိုင်းလိုက်ပါတော့..."

"မင်းကို နှိုးတာ အရေးကြီး ကိစ္စ ရှိလို့ကွ..."

ကျန်းချဲ့ ၏ မျက်နှာထား လေးနက်သွားလေသည်။

"ဪ ပြော ပြောလေ..."

အရေးကြီး ကိစ္စ ဟု ကြားလိုက်ရသောအခါ မှသာ ချီနင်ပင်း သက်ပြင်းချနိုင်သွားလေသည်။

"ကိုယ် ရှန်ရှန်းအဆင့် ကို ထိုးဖောက်ဖို့ ပြင်ဆင်နေပြီ မင်းလည်း..."

"ကောင်းပြီ မနက်ဖြန် ကျွန်မ သီးသန့် တရားထိုင်ပြီး ရွှေအမြုတေ တည်ဆောက်ဖို့ ကြိုးစားကြည့်မယ်..."

ချီနင်ပင်း က လေးနက်စွာ ခေါင်းညိတ်လိုက်လေသည်။ သူမ အတွက် ဤသည်မှာ အလွန် အရေးကြီးသော ကိစ္စ ပင်ဖြစ်သည်။

"သီးသန့် တရားထိုင်တာ ရပါတယ် ဒါပေမဲ့ ရွှေအမြုတေ တည်ဆောက်ဖို့တော့ အတင်းအကျပ် မလုပ်နဲ့နော် သဘာဝအတိုင်းပဲ ဖြစ်ပါစေ အဲ့ဒီ ဝိညာဉ်စွမ်းအင် အတွက်လည်း ကိုယ် သိပ်မလောပါဘူး..."

ကျန်းချဲ့ က နှစ်သိမ့်ပေးလိုက်လေသည်။

သူ၏ အကြောင်းပြချက် ကြောင့် ချီနင်ပင်း ကို အတင်းအကျပ် ရွှေအမြုတေ တည်ဆောက်ခိုင်းပြီး အခြေခံ အုတ်မြစ် ကို ထိခိုက်သွားစေမည်ကို သူ လုံးဝ မလိုလားချေ။ အကယ်၍သာ ထိခိုက်သွားခဲ့ပါက ဘယ်အချိန်မှ ပြန်လည် ကောင်းမွန်လာမည်ကို မသိနိုင်တော့ချေ။

"အစ်ကို စိတ်ချပါ အစ်ကို မရှိတဲ့ အချိန်တုန်းက ကျွန်မအစ်မ က အမြဲတမ်း ကျွန်မရဲ့ ကျင့်ကြံခြင်းကို ကူညီပေးတယ် ရွှေအမြုတေ တည်ဆောက်တဲ့ အတွေ့အကြုံ တွေကိုလည်း သင်ပေးတယ် အခု ရွှေအမြုတေ တည်ဆောက်ဖို့ အတွက် ကျွန်မ တော်တော်လေး ယုံကြည်ချက် ရှိပါတယ်..."

ချီနင်ပင်း က မေးစေ့လေးကို မော့ကာ အလွန် မာနတကြီး ဖြင့် ပြောလိုက်လေသည်။

"ဪ ဘယ်နှရာခိုင်နှုန်းလောက် သေချာလဲ..."

"သိပ်တော့ မများပါဘူး ကိုးဆယ့်ရှစ် ရာခိုင်နှုန်း လောက်ပါပဲ..."

ချီနင်ပင်း က နှာခေါင်းရှုံ့ ကာ ပြောလိုက်လေသည်။

"ကောင်းပြီ မင်း ရွှေအမြုတေ အောင်မြင်စွာ တည်ဆောက်နိုင်တဲ့ အချိန်ကျရင် မင်းအတွက် လက်ဆောင် တစ်ခု ပေးမယ်..."

"ဘာလက်ဆောင်လဲ..."

"အချိန်ကျမှပဲ သိရမှာပေါ့ အခု ကြိုပြောပြလိုက်ရင် အရသာ မရှိတော့ဘူးလေ..."

ကျန်းချဲ့ က ချီနင်ပင်း ၏ ပါးပြင်လေးကို ဆွဲညှစ်ကာ ပြုံး၍ ပြောလိုက်လေသည်။

"ဒါနဲ့ ကျွန်မအစ်မ ကိစ္စကရော အခု ဘယ်လို အခြေအနေ ရှိနေပြီလဲ ကျွန်မတောင် ရွှေအမြုတေ တည်ဆောက်နိုင်ပြီကို အစ်ကိုက အခုထိ ဖြေရှင်းလို့ မပြီးသေးဘူးလား..."

ချီနင်ပင်း က မျက်နှာလေး နီရဲကာ မေးလိုက်လေသည်။

"ဝမ်ကျင်း ကိစ္စကတော့ စိတ်ချပါ ကိုယ့်မှာ ယုံကြည်ချက် ရှိပါတယ် သူက စကားပြောရင် နည်းနည်း မာတယ် ဆိုပေမဲ့ ရင်ထဲမှာတော့ ကိုယ့်ကို ချစ်နေတာပါပဲ အဆင့်တက်တဲ့ ကိစ္စမျိုးမှာ သူက နားမလည်ဘဲ နေမှာ မဟုတ်ပါဘူး..."

ကျန်းချဲ့ က အချိန်အနည်းငယ် တွေဝေသွားပြီးနောက် နှစ်သိမ့်ပေးလိုက်လေသည်။

"ဒါဆိုရင်တော့ တော်သေးတာပေါ့..."

ချီနင်ပင်း က ခေါင်းညိတ်လိုက်သော်လည်း ဘာတွေ စဉ်းစားနေမှန်း မသိဘဲ မျက်လွှာချကာ အနည်းငယ် စိတ်မကောင်း ဖြစ်နေပုံ ရလေသည်။

"ဘာတွေ တွေးနေတာလဲ..."

"ဘာ ဘာမှ မတွေးပါဘူး..."

"ဒါနဲ့ ကိစ္စ တစ်ခု ရှိသေးတယ် မင်း သိချင်လား..."

"ဘာကိစ္စလဲ..."

ချီနင်ပင်း က ခေါင်းမော့ကာ လှပသော မျက်လုံးလေးများကို ပုတ်ခတ်ပုတ်ခတ် လုပ်ပြလိုက်လေသည်။

"ကိုယ် အရှေ့ပင်လယ် ကနေ ပြန်လာရင် မင်္ဂလာပွဲ အတွက် ပြင်ဆင်ရတော့မယ် အဲ့ဒီအချိန်ကျရင် ကိုယ် လာပြီး တင်တောင်းမယ်လေ..."

"ဪ..."

ချီနင်ပင်း က ခေါင်းညိတ်လိုက်ပြီး ဘာမှ ထပ်မပြောတော့ချေ။

"မပျော်ဘူးလား..."

"မ မဟုတ်ပါဘူး..."

ချီနင်ပင်း က ခေါင်းယမ်းလိုက်လေသည်။ သူမ က အစောပိုင်းကတည်းက စိတ်ပိုင်းဆိုင်ရာ ပြင်ဆင်ထားပြီး ဖြစ်လေသည်။ မည်သို့ပင်ဆိုစေ သူမ နှင့် ကျန်းချဲ့ တို့၏ ပတ်သက်မှု မှာ တရားဝင် မဟုတ်သဖြင့် နောင်တစ်ချိန် အတူတူ နေရလျှင်တောင် တိတ်တဆိတ် သာ နေရမည် ဖြစ်သည်။

မင်္ဂလာဆောင်ခြင်း ကဲ့သို့သော ကိစ္စမျိုးတွင် သူမ အနေဖြင့် အစ်မဖြစ်သူကို စိတ်ထဲမှသာ အားကျနေရုံ သက်သက်သာ ရှိလေသည်။

"အများကြီး မတွေးပါနဲ့ကွာ အချိန်ကျရင် ကိုယ်က တင်တောင်းမယ့် ပစ္စည်း နှစ်စုံ ပြင်ဆင်ထားမှာပါ အခုဆိုရင် မင်းနဲ့ ကိုယ့်ကြားက ကိစ္စကို ဖွင့်ပြောဖို့ ကိုယ့်မှာ လုံလောက်တဲ့ အရည်အချင်း နည်းနည်းတော့ ရှိနေပါပြီ မင်းကို တစ်သက်လုံး တရားမဝင် ဇနီးအဖြစ် ထားဖို့ လုံးဝ မဖြစ်နိုင်ပါဘူး..."

ကျန်းချဲ့ က တစ်ဖက်လူ၏ စိတ်ထဲမှ အတွေးများကို ရိပ်မိသွားပြီး ညင်သာစွာ ပြုံး၍ ပြောလိုက်လေသည်။

ချီနင်ပင်း က မျက်တောင်လေး ခတ်လိုက်ပြီး တွေဝေစွာ ဖြင့် မေးလိုက်လေသည်။

"ဒါ ဒါက သိပ်မကောင်းဘူး ထင်တယ်နော် တကယ်လို့ ကျွန်မအဖေ ဒေါသထွက်သွားရင် ဘယ်လိုလုပ်မလဲ…”