အခန်း (၇၆၇-၇၆၈)

အပိုင်း (၇၆၇)

ဤတစ်ကြိမ်တွင် ထိပ်တန်း ပညာရှင် သုံးရာကျော်နှင့် အုပ်ချုပ်ရေးမှူး နှစ်ဦးတို့၏ စေ့စပ်ဆွေးနွေးမှုသည် အဆင်မပြေဘဲ အဆုံးသတ်သွားခဲ့၏။

ထို့နောက် ဤထိပ်တန်း ပညာရှင် သုံးရာကျော်သည် လူထု သဘောထားကို စတင် လှုံ့ဆော်တော့ပြီး နေရာအနှံ့ သွားရောက် စည်းရုံးဟောပြောကြသည်။

အဓိက ပစ်မှတ်ထားခံရသူများမှာ အင်ပါယာ စာသင်ကျောင်းကြီးများမှ ဆရာများနှင့် ကျောင်းသားများပင် ဖြစ်သည်။ ထိပ်တန်း ပညာရှင် သုံးရာကျော်က နေရာအနှံ့ သွားရောက်၍ မိန့်ခွန်းပြောကြားပြီး စာသင်ကြားကြ၏။

ယဉ်ကျေးမှုသစ် ရောက်ရှိလာတော့မည် ဖြစ်ကြောင်း၊ ရူပဗေဒ တော်လှန်ရေးသစ် ရောက်ရှိလာတော့မည် ဖြစ်ကြောင်း ကြေညာကြသည်။ ဤတော်လှန်ရေးကို လက်ခံကြမည်လား သို့မဟုတ် ရှေးရိုးစွဲ အဖွဲ့ဝင်များ အဖြစ် ကျန်ရစ်ခဲ့မည်လား။

အနည်းဆုံးတော့ ပညာရေး လောကတွင် ဤလူသုံးရာသည် အမြင့်ဆုံး အာဏာပိုင်များ ဖြစ်ကြပြီး တပည့်များစွာ ရှိသည်။

အင်ပါယာ စာသင်ကျောင်းကြီးများမှ ကျောင်းသားများ၏ ဦးနှောက်သည် အတော်လေး ဖြူစင်ကြပြီး ပိုမို မြင့်မားသော စံပြ ရည်မှန်းချက်များနှင့် ပိုမို တိုးတက်သော ယဉ်ကျေးမှုကို ရှာဖွေလိုကြ၏။

မကြာမီမှာပင် ဆရာများနှင့် ကျောင်းသားများ အများစုသည် ဖော်ပြထားသော ယဉ်ကျေးမှုသစ်၏ ဆွဲဆောင်မှုကို ခံလိုက်ရသည်။

အင်ပါယာ မူဝါဒသစ်ကို ထောက်ခံသူများ ဖြစ်လာကြသည်။ ဤသို့ လှုံ့ဆော်မှုသည် ပိုမို ပြင်းထန်လာပြီး မီးဟုန်းဟုန်း တောက်နေသကဲ့သို့ ဖြစ်လာ၏။

အုပ်ချုပ်ရေးမှူး နှစ်ဦးနှင့် အထက်လွှတ်တော်ထံမှ တုံ့ပြန်မှု မရရှိသောကြောင့် ထိပ်တန်း ပညာရှင် သုံးရာကျော်သည် တံခါးပိတ် အစည်းအဝေးကို ထပ်မံ ကျင်းပခဲ့ကြပြန်သည်။

အစည်းအဝေး အပြီးတွင် ထိပ်တန်း ပညာရှင် သုံးရာကျော်က ရှင်းကျုံး ပါတီကို တည်ထောင်ကြောင်း ကြေညာလိုက်၏။

ဤသတင်း ထွက်ပေါ်လာပြီးနောက် အင်ပါယာ တစ်ခုလုံး ထပ်မံ တုန်လှုပ်သွားပြန်သည်။

ဤအချက်ပြမှုက အရမ်း ကြောက်စရာ ကောင်းလွန်းလှသည်။ ဆိုလိုသည်မှာ ဤထိပ်တန်း ပညာရှင်များသည် အုပ်ချုပ်ရေးမှူးနှင့် အထက်လွှတ်တော်ထံမှ တောင်းဆိုချက်များကို မရရှိသောကြောင့် ပါတီသစ် တစ်ခု တည်ထောင်ကာ နောက်ဆက်တွဲ အင်ပါယာသစ် တည်ထောင်ရန်အတွက် ပြင်ဆင်နေကြခြင်းပင် ဖြစ်၏။

နောက်ပိုင်း၌ ပါတီချင်း အားပြိုင်မှုများ ဖြစ်လာတော့မှာ ဖြစ်သည်။ အမှန်တကယ်တွင် ဤလူများ အစပိုင်းတွင် တည်ထောင်လိုသော ပါတီမှာ ရှင်းကျုံး ပါတီ မဟုတ်ဘဲ တာ့ယန် ဘုရင်စနစ် ကာကွယ်ရေး ပါတီ၊ သို့မဟုတ် တာ့ယန် ပါတီသစ် ဖြစ်သည်။

ယွင်ကျုံးဟဲ့နှင့် မိဖုရား တူရှားတို့ သိရှိသွားချိန်မှာတော့ အမြန် သွားရောက်၍ နာမည်ပြောင်းရန် တောင်းဆိုခဲ့ကြ၏၊

အကယ်၍ မူလက တာ့ယန် ဘုရင်စနစ် ကာကွယ်ရေး ပါတီ သို့မဟုတ် တာ့ယန် ပါတီသစ်ကို အသုံးပြုမည် ဆိုပါက အင်ပါယာကို ခွဲထွက်လိုက်ခြင်း ဖြစ်ပြီး အင်ပါယာ နိုင်ငံသား အများအပြား၏ ခံစားချက်ကိုလည်း ထိခိုက်စေမှာဖြစ်သည်။

ဘုရင်စနစ် ကာကွယ်ရေး ပါတီ ဆိုသည်မှာ အလွန် အစွန်းရောက်လွန်းသည်။ အဘယ်ကြောင့်ဆိုသော် တာ့ယန် အင်ပါယာသစ်တွင် ဧကရာဇ် မရှိသည်မှာ နှစ်ပေါင်း တစ်ထောင်ကျော် ရှိနေပြီဖြစ်ပြီး လူတိုင်းက ကျင့်သားရနေပြီ ဖြစ်ရာ ရုတ်တရက် ဘုရင်စနစ် ကာကွယ်ရေး ပါတီ ဆိုပြီး ထွက်လာပါက လူများကို လန့်သွားစေပေလိမ့်မည်။

တာ့ယန် ပါတီသစ် ဆိုသော နာမည်ကလည်း အင်ပါယာရှိ အခြား လူအများစုကို ဆန့်ကျင်ဘက်သို့ တွန်းပို့လိုက်ခြင်း ဖြစ်ပြီး သူတို့သည် နောက်ကျပြီး ဟောင်းနွမ်းနေသည်ဟု တိုက်ရိုက် စွပ်စွဲလိုက်ခြင်းပင် ဖြစ်သည်။

ထို့အပြင် ဤနာမည် နှစ်ခုစလုံးသည် တရားမဝင် ဖြစ်သွားနိုင်ခြေ ရှိပြီး အထက်လွှတ်တော်က အချိန်မရွေး ဖျက်သိမ်းနိုင်၏။

သို့ပေမည့် ရှင်းကျုံး ပါတီကတော့ မတူညီပေ။ ယန်ရှင်းကျုံးကို တာ့ယန် အင်ပါယာသစ်၏ ဘိုးဘေး ဧကရာဇ် အဖြစ် လူတိုင်းက သတ်မှတ်ထားကြပြီး နှစ်ပေါင်း ထောင်ချီကြာအောင် စိတ်ပိုင်းဆိုင်ရာ ခေါင်းဆောင်နှင့် အထိမ်းအမှတ် အဖြစ် သတ်မှတ်ထားကာ လုံးဝ အစားထိုး၍ မရနိုင်ပေ။ ထို့ကြောင့် ရှင်းကျုံး ပါတီသည် လုံးဝ ဖျက်သိမ်းခံရမည် မဟုတ်ပေ။

ရှင်းကျုံး ပါတီ တည်ထောင်ပြီးနောက် ယွင်ကျုံးဟဲ့ကို အမြင့်ဆုံး ခေါင်းဆောင် အဖြစ် ကြေညာလိုက်သည်။

ထို့နောက် ရှင်းကျုံး ပါတီသည် အဖွဲ့ဝင်သစ်များကို စတင် လက်ခံသည်။ အင်ပါယာ စာသင်ကျောင်းကြီးများမှ ဆရာများနှင့် ကျောင်းသားများသည် ရှင်းကျုံး ပါတီသို့ အသီးသီး ဝင်ရောက်လာကြ၏။

နှင်းလုံးကြီး လိမ့်ကျလာသကဲ့သို့ပင် လဝက်ခန့် အချိန်တို အတွင်းမှာပင် ရှင်းကျုံး ပါတီတွင် အဖွဲ့ဝင် နှစ်သောင်း ရှိလာသည်။

ဤအဖွဲ့ဝင် နှစ်သောင်းသည် နေရာအနှံ့ သွားရောက်၍ ယွင်ကျုံးဟဲ့၏ ရူပဗေဒ သီအိုရီများကို ဟောပြောကြပြီး ယဉ်ကျေးမှုသစ်၊ ဒဿနိကဗေဒသစ်ကို ဟောပြောကြ၏။

ခဏတာ အတွင်းမှာပဲ အင်ပါယာ အတွင်း၌ ပိုမို ကြီးမားသော ဩဇာလွှမ်းမိုးမှုများ ဖြစ်ပေါ်လာခဲ့သည်။ သို့ပေမည့် အဖွဲ့ဝင် အရေအတွက် တိုးလာသည်နှင့်အမျှ ရှင်းကျုံး ပါတီ၏ လုပ်ရပ်များမှာလည်း ပိုမို အစွန်းရောက်လာပြီး မြို့တော်မှာလည်း ပို၍ ပို၍ မငြိမ်မသက် ဖြစ်လာသည်။

အင်ပါယာ အုပ်ချုပ်ရေး နန်းတော် အတွင်းတွင်…

“ဖျက်သိမ်းရမယ်၊ ဒီရှင်းကျုံး ပါတီကို သေချာပေါက် ဖျက်သိမ်းရမယ်၊ အင်ပါယာရဲ့ တရားမဝင် အဖွဲ့အစည်း အဖြစ် ကြေညာရမယ်။”

“ဒါက ပုန်ကန်တာပဲ၊ ဒါက အာဏာလုတာပဲ။”

“ရှင်းကျုံး ပါတီရဲ့ ခေါင်းဆောင် တချို့ကို ဖမ်းရမယ်၊ ယွင်ကျုံးဟဲ့ကို ဖမ်းရမယ်။ အဲဒီလိုမှ မဟုတ်ရင် အင်ပါယာက အကြီးအကျယ် မငြိမ်မသက် ဖြစ်သွားပြီး ခွဲထွက်တဲ့အထိတောင် ဖြစ်သွားနိုင်တယ်။”

အထက်လွှတ်တော် အစည်းအဝေးကို အကြိမ်ကြိမ် ကျင်းပခဲ့ပြီး အချို့သူများ၏ ပြောဆိုမှုများမှာလည်း ပို၍ ပို၍ ပြင်းထန်လာ၏။

“ဒီရှင်းကျုံး ပါတီကို ဆက်ပြီး ကြီးထွားလာခွင့် ပေးလို့ မရဘူး။”

“ဟောပြောပွဲတွေ အားလုံးကို အုပ်ချုပ်ရေးရုံးဆီ တင်ပြရမယ်။ မဟုတ်ရင် အားလုံးကို တရားမဝင်အဖြစ် သတ်မှတ်မယ်။ ရှင်းကျုံး ပါတီဝင်တွေ လူသိရှင်ကြား ဟောပြောခွင့် မပြုဘူး၊ ပြည်သူတွေကို လှုံ့ဆော်ခွင့် မပြုဘူး။”

“ပထမ တပ်တော်ကို မြို့တော်ထဲ ဝင်ရောက်ပြီး အခြေအနေကို ထိန်းချုပ်ဖို့ အမိန့်ပေးပါ။”

စာပေနှင့် သိုင်းပညာ အုပ်ချုပ်ရေးမှူး နှစ်ဦး၏ မျက်နှာများမှာ အေးစက်နေသည်။

အရင်က ဆွေးနွေးမှု အဆင်မပြေ ဖြစ်ပြီးတည်းက ချက်ချင်း အရေးယူသင့်ခဲ့ပြီး ရှင်းကျုံး ပါတီကို တည်ထောင်ခွင့် မပြုသင့်ခဲ့ပေ။ ရှင်းကျုံးပါတီ တည်ထောင်ပြီးနောက် ချက်ချင်း ဖိနှိပ်သင့်ခဲ့ပြီး မြန်မြန်ဆန်ဆန် ဖွံ့ဖြိုးလာခွင့် မပြုသင့်ခဲ့ပေ။

ယခုအခါ အရာအားလုံးသည် နှင်းလုံးကြီး လိမ့်ကျလာသကဲ့သို့ ဖြစ်နေ၏။ ယခုအခါ ဤရေစီးကြောင်းသည် အခြေခံ ပညာရေး အထိပင် ပျံ့နှံ့သွားခဲ့ပြီး ဆယ်ကျော်သက်အရွယ် လူငယ် အများအပြားကလည်း ရှင်းကျုံး ပါတီသို့ ဝင်ရောက်လိုကြသည်။ အခြေခံ ပညာရေးမှ ဆရာများလည်း ရှင်းကျုံး ပါတီသို့ ပိုမို ဝင်ရောက်လာကြ၏။

ထို့အပြင် ကုန်ထုတ်လုပ်မှု စွမ်းအားနှင့် သက်ဆိုင်သော အလုပ်ရုံများ၊ သတ္တုကြိုစက်ရုံများ စသည်တို့မှ ထူးချွန်သူများလည်း ရူပဗေဒ ပညာရှင်များ ဖြစ်ကြပါက ရှင်းကျုံး ပါတီသို့ အသီးသီး ဝင်ရောက်လာကြသည်။

အနုပညာ၊ စာပေ၊ ဒဿနိကဗေဒ သင်ယူနေသူများ ဆိုလျှင် ပို၍ပင် အစွန်းရောက်ကြပြီး ပို၍ ရူးသွပ်သော လုပ်ရပ်များကိုပင် ပြုလုပ်လာကြ၏။

ဥပမာအားဖြင့် သူတို့သည် ဧရာမ ပန်းချီကားကြီး တစ်ချပ်ကို တာ့ယန် နန်းတော်နှင့် အုပ်ချုပ်ရေး နန်းတော်ပေါ်တွင် ဆေးမှုတ် ရေးဆွဲခဲ့ကြပြီး ထိုပန်းချီကားမှာ ယွင်ကျုံးဟဲ့၏ ပုံပင် ဖြစ်၏။ ယွင်ကျုံးဟဲ့ကို ဆန့်ကျင်သူများကို ဝိုင်းဝန်း တိုက်ခိုက်ကြပြီး လုပ်ကြံမည်ဟုပင် ခြိမ်းခြောက်ကြသည်။

ရူပဗေဒ ကျောင်းသားများက ယွင်ကျုံးဟဲ့အပေါ် ထောက်ခံမှုသည် အသိဉာဏ်ကို အခြေခံသည် ဆိုပါက အနုပညာ သင်ယူနေသော ကျောင်းသားများမှာမူ လုံးဝ ရူးသွပ်မှုနှင့် စိတ်ခံစားမှုကို အခြေခံနေ၏။

အုပ်ချုပ်ရေးမှူး နှစ်ဦးက ဖိနှိပ်ချင်စိတ် မရှိခြင်း မဟုတ်သော်လည်း သူတို့သည် အတားအဆီးများ၊ လျှို့ဝှက် အတားအဆီးများကို ကြုံတွေ့ခဲ့ရသည်။

ထိုအတားအဆီးများထဲမှ တစ်ခုမှာ မိဖုရား တူရှား ဖြစ်သည်။ ယခင် အုပ်ချုပ်ရေးမှူး၏ နောက်ဆုံး ဆယ်နှစ်တာ ဘဝသည် အိပ်ရာပေါ်တွင်သာ ကုန်ဆုံးခဲ့ရသောကြောင့် မိဖုရား တူရှားက ယောက်ျားကိုယ်စား အာဏာကို ကိုင်စွဲခဲ့ရာ အင်ပါယာတွင် သူမ၏ ပါတီဝင် အင်အားစု အများအပြား ရှိ၏။

ထို့အပြင် မိဖုရား တူရှား၏ နောက်ကွယ်တွင် ပို၍ ကြီးမားသော ပုဂ္ဂိုလ် တစ်ဦးလည်း ရှိနေသေး၏။ ထို့ကြောင့် အထက်လွှတ်တော် အမတ် တစ်ဦးက ရှင်းကျုံး ပါတီကို ဖျက်သိမ်းရန် အဆိုပြုချိန်မှာတော့ တားဆီးခံခဲ့ရသည်။

ရှင်းကျုံး ပါတီ၏ အစွန်းရောက် အဖွဲ့ဝင်များကို ဖမ်းဆီးရန် အဆိုပြုချိန်တွင်လည်း တားဆီးခံခဲ့ရသည်။ အဓိက အချက်မှာ ဤအဆိုပြုချက်များကို အထက်လွှတ်တော် အမတ်များကသာ တင်ပြနိုင်ပြီး အများစု သဘောတူညီချက် ရရှိမှသာ အုပ်ချုပ်ရေးမှူးက အတည်ပြု ဆုံးဖြတ်ရခြင်း ဖြစ်၏။

သို့ပေမည့် အထက်လွှတ်တော် အမတ် တစ်ဦးက အဆိုပြုလိုက်သည်နှင့် ချက်ချင်း ပယ်ချခံရ၏။ ထို့အပြင် အထက်လွှတ်တော် အမတ် အများစုမှာ စောင့်ကြည့်နေကြသည်။ အဘယ်ကြောင့်ဆိုသော် တကယ့် ထိပ်သီး ခေါင်းဆောင် တစ်ဦး သဘောထား မဖော်ပြသေးသောကြောင့် ဖြစ်သည်။

ထိုသူမှာ ချင်ဝမ် ကျီးရှန့် ဖြစ်ပြီး အရင်၊ အရင် အုပ်ချုပ်ရေးမှူး ဖြစ်ကာ တော်ဝင် ဆွေမျိုးစု အဖွဲ့အစည်း၏ အမြင့်ဆုံး ခေါင်းဆောင် ဖြစ်၏။

သို့ပေမည့် ယေဘုယျအားဖြင့် ပြောရလျှင် ရှင်းကျုံး ပါတီနှင့် အထက်လွှတ်တော်၊ အုပ်ချုပ်ရေးမှူးတို့၏ ပဋိပက္ခမှာ ပို၍ ပို၍ ပြင်းထန်လာပြီး ပို၍ ပို၍ ဆန့်ကျင်ဘက် ဖြစ်လာသည်။

အင်ပါယာ၏ လေထုမှာလည်း ပို၍ ပို၍ အန္တရာယ်များလာပြီး နှစ်ဖက်စလုံး၏ ပွတ်တိုက်မှုများက ပို၍ ပို၍ ပြင်းထန်လာကာ သွေးထွက်သံယို ဖြစ်လုနီးပါးပင် ဖြစ်နေလေ၏။

အထက်လွှတ်တော်မှ လူများက ပထမ တပ်တော်ကို မြို့တော်ထဲ ဝင်ရောက်စေပြီး ရှင်းကျုံး ပါတီ၏ အစွန်းရောက် နိုင်ငံရေး လှုပ်ရှားမှုများကို နှိမ်နင်းရန် အကြိမ်ကြိမ် အဆိုပြုခဲ့ကြ၏။ သို့ပေမည့် အဆိုပြုချက် တိုင်းသည် အင်အားကြီးမားသော စွမ်းအား တစ်ခု၏ ဖိနှိပ်ခြင်းကို ခံခဲ့ရသည်။

“ယွင်ကျုံးဟဲ့... ဒီလို ဆက်သွားလို့ မဖြစ်ဘူး။”

မိဖုရား တူရှားက ပြောလိုက်၏။ “ရှင်းကျုံး ပါတီရဲ့ လှုပ်ရှားမှုတွေက အရမ်း ပြင်းထန်လွန်းတယ်။ စစ်တပ်က ဗိုလ်ချုပ်တွေကိုတောင် သွားရောက် စည်းရုံးနေကြပြီ။ ပြီးခဲ့တဲ့ လဝက်အတွင်း ရှင်းကျုံး ပါတီက အစွန်းရောက် အဖွဲ့ဝင်တွေ အုပ်ချုပ်ရေး နန်းတော်ကို ဝင်စီးတာ၊ မြို့တော် အုပ်ချုပ်ရေးရုံးကို ဝင်စီးတာ ဆယ်ကြိမ်လောက် ရှိနေပြီ။

ဒါတင် မကဘူး။ ရှင်းကျုံး ပါတီ အတွင်းမှာ လျှို့ဝှက် လက်နက်ကိုင် အဖွဲ့အစည်းတွေ စတင် တည်ထောင်နေကြပြီ။ ပြီးတော့ အထက်လွှတ်တော်က ဆန့်ကျင်တဲ့ အမတ်တွေကို လုပ်ကြံဖို့တောင် ပြင်ဆင်နေကြတယ်။

အထက်လွှတ်တော် အမတ် တစ်ယောက်က အစည်းအဝေးမှာ ရှင်းကျုံး ပါတီကို ဖျက်သိမ်းဖို့နဲ့ ပထမ တပ်တော်ကို မြို့တော်ထဲ ဝင်ရောက်ပြီး ရှင်းကျုံး ပါတီကို နှိမ်နင်းဖို့ အပြင်းအထန် အဆိုပြုခဲ့တယ်။ ရလဒ် အနေနဲ့ သူ့အိမ် တိုက်ခိုက်ခံရပြီး ကျွန်မတို့ ရှင်းကျုံး ပါတီက အစွန်းရောက်တွေ သူ့အိမ်ထဲ ဝင်ပြီး မီးရှို့ခဲ့ကြလို့ သူ့မိသားစုတွေ အရမ်း လန့်သွားကြတယ်။

အင်ပါယာရဲ့ လုံခြုံရေးက အရမ်း ကောင်းတယ်ဆိုတာ ရှင်လည်း သိမှာပါ။ တချို့ အထက်လွှတ်တော် အမတ်တွေရဲ့ စံအိမ်တွေက ခမ်းနားတဲ့ ရဲတိုက်ကြီးတွေ မဟုတ်သလို အစောင့်တွေလည်း အရမ်း မများဘူးဆိုတော့ မီးရှို့ဖို့ အရမ်း လွယ်ကူတယ်။”

ယွင်ကျုံးဟဲ့ ဤကိစ္စကို သိသည်။ တစ်လပင် မပြည့်သေးသော အချိန်အတွင်း ရှင်းကျုံး ပါတီဝင် ရာပေါင်းများစွာ အဖမ်းခံခဲ့ရပြီး အားလုံးက အစွန်းရောက်များ ဖြစ်ကြ၏။ သို့ပေမည့် အများစုမှာ မိဖုရား တူရှား၏ အင်အား ကြီးမားမှုကြောင့် မကြာမီ အာမခံဖြင့် လွတ်မြောက်လာခဲ့ကြသည်။

မိဖုရား တူရှားက ဆက်ပြောလိုက်၏။ “ခေါင်းဆောင်… ဒီလို ဆက်သွားရင် ကျွန်မတို့နဲ့ အင်ပါယာ အထက်လွှတ်တော်ရဲ့ ပဋိပက္ခက ပိုပို ပြင်းထန်လာပြီး နောက်ဆုံးမှာ ပြေလည်အောင် ဖြေရှင်းလို့ မရတော့ဘူး ဖြစ်သွားလိမ့်မယ်။ ပြီးတော့ ကျွန်မတို့ လက်ထဲမှာ စစ်တပ် မရှိဘူး။

အကယ်၍ အုပ်ချုပ်ရေးမှူးနဲ့ အထက်လွှတ်တော်က တကယ်ပဲ ပထမ တပ်တော်ကို မြို့တော်ထဲ ဝင်ရောက်စေပြီး ကျွန်မတို့ ရှင်းကျုံး ပါတီကို နှိမ်နင်းခိုင်းလိုက်လို့ သွေးထွက်သံယို ဖြစ်သွားပြီ ဆိုရင် အရာအားလုံး ပြန်ပြင်လို့ မရတော့ဘူး။

ပြီးတော့ ကျုပ်တို့ ရှင်းကျုံး ပါတီက တချို့ အစွန်းရောက်တွေရဲ့ လုပ်ရပ်က အင်ပါယာက သာမန် နိုင်ငံသားတွေကိုလည်း မနှစ်မြို့စေဘူး။ မကြာသေးခင်က မြို့တော်ရဲ့ လုံခြုံရေး ပိုဆိုးလာတာက ကျွန်မတို့ ရှင်းကျုံး ပါတီထဲက အဲဒီ ရူးသွပ်တဲ့ သူတွေကြောင့်ပဲ။”

ယွင်ကျုံးဟဲ့ ခေါင်းညိတ်လိုက်သည်။

မိဖုရား တူရှားက ပြောလိုက်၏။ “အုပ်ချုပ်ရေးမှူးနဲ့ အထက်လွှတ်တော်က လူတချို့က ပထမ တပ်တော်ကို မြို့တော်ထဲ ဝင်ရောက်ပြီး ကျွန်မတို့ကို နှိမ်နင်းစေချင်နေတာ အမြဲတမ်းပဲ။ ဒါပေမဲ့ အကြိမ်တိုင်း လူတစ်ယောက်က လျှို့ဝှက် တားဆီးပေးခဲ့တယ်။ စစ်တပ်ကို မြို့တော်ထဲ မဝင်လာအောင် တားဆီးပေးတဲ့သူက ဘယ်သူလဲ ဆိုတာ ရှင် သိသင့်တယ်။”

အပိုင်း (၇၆၈)

ယွင်ကျုံးဟဲ့ သေချာပေါက် ထိုသူမှာ မည်သူနည်း ဆိုသည်ကို သိသည်။ အင်ပါယာ တော်ဝင်မိသားစု၏ အမြင့်ဆုံး ခေါင်းဆောင်ပင် ဖြစ်သည်။

မိဖုရား တူရှားက ပြောလိုက်၏။ “သူ့ရဲ့ ဩဇာက အရမ်း ကြီးမားပြီး စစ်တပ်မှာလည်း ကြီးမားတဲ့ လွှမ်းမိုးမှု ရှိပေမယ့် အုပ်ချုပ်ရေးမှူးနဲ့ အထက်လွှတ်တော်ကို အကန့်အသတ်မရှိ ဖိနှိပ်ထားလို့ မရဘူးလေ။ ကျွန်မတို့ဘက်ကိုလည်း လုံးဝ ရပ်တည်ပေးမှာ မဟုတ်ဘူး။

ကျွန်မတို့ မှတ်ထားရမယ့် အချက်က စစ်တပ်က ကျွန်မတို့ လက်ထဲမှာ မရှိဘူး ဆိုတာပဲ။ ပြီးတော့ ရှင်က တကယ်ပဲ အထက်လွှတ်တော်၊ အင်ပါယာ အထက်တန်းလွှာတွေနဲ့ လုံးဝ ဆန့်ကျင်ဘက်ဖြစ်ပြီး လုံးဝ အဆက်အသွယ် ဖြတ်ချင်လို့လား။ ရန်သူတွေ ဖြစ်ချင်လို့လား။ အင်ပါယာကို ခွဲထွက်ချင်လို့လား။”

ယွင်ကျုံးဟဲ့ ခေါင်းယမ်းလိုက်သည်။ သေချာပေါက် သူ မလိုလားပေ။ ယခုအချိန်အထိ အင်ပါယာ အထက်တန်းလွှာများသည် အလွန် ပွင့်လင်းမြင်သာမှု ရှိပြီး ခွင့်လွှတ်မှု ရှိကြောင်း ပြသနေသည်။

ဆန့်ကျင်ဘက် အနေဖြင့် သူ၏ ရှင်းကျုံး ပါတီကသာ အတင်းအကျပ် ဖိအားပေးနေခြင်း ဖြစ်ပြီး အထူးသဖြင့် အချို့သော ရူးသွပ်သူများသည် တစ်နေ့တည်းဖြင့် အာဏာကို လုယူကာ တစ်နေ့တည်းဖြင့် အင်ပါယာ အထက်တန်းလွှာများကို နှင်ထုတ်ပစ်ချင်နေကြပြီး ချက်ချင်းပဲ တော်လှန်ရေး လုပ်ချင်နေကြ၏။

ယွင်ကျုံးဟဲ့၏ အမြင်တွင် အင်ပါယာ အထက်တန်းလွှာများသည် ယခုအချိန်၌ ရှေးရိုးစွဲ အဖွဲ့အစည်း ဖြစ်လာနိုင်ခြေ ရှိသော်လည်း သူတို့ကို စည်းရုံး၍ ရနိုင်သည်။

အကယ်၍ အင်ပါယာ တစ်ခုသည် လုံးဝ နောက်ကျပြီး ဖောက်ပြန်နေပြီ ဆိုပါက အစွမ်းကုန် ကြိုးစား၍ ဖြုတ်ချ ဖျက်ဆီးပစ်ရမှာဖြစ်၏။

သို့ပေမည့် လက်ရှိ တာ့ယန် အင်ပါယာသစ်သည် နောက်ကျနေသလား။ ယိုယွင်းနေသလား။ မဟုတ်ပေ။ ၎င်းသည် တက်ကြွစွာ ကြိုးပမ်းနေဆဲပင် ဖြစ်သည်။

ယွင်ကျုံးဟဲ့သည် ကိုယ်ပိုင် ရည်မှန်းချက်အတွက် တာ့ယန် အင်ပါယာသစ် တစ်ခုလုံးကို သွေးထွက်သံယို ဖြစ်စေကာ အလောင်းများ ပြည့်နှက်နေစေလိုခြင်း မရှိပေ။ အင်ပါယာသစ် တစ်ခု ထပ်မံ တည်ထောင်၍ အင်ပါယာကို ခွဲထွက်လိုခြင်း ပို၍ပင် မရှိပေ။

အနည်းဆုံးတော့ ယခုအချိန်အထိ အင်ပါယာ အထက်တန်းလွှာများသည် သူ့ကို ညှဉ်းပန်းနှိပ်စက်ခြင်း မရှိသေးသလို ရှင်းကျုံး ပါတီကိုလည်း တကယ်တမ်း နှိမ်နင်းခြင်း မရှိသေးပေ။ စာပေ နည်းလမ်းနှင့် တိုက်ခိုက်ရမှာဖြစ်ပြီး သိုင်းပညာ နည်းလမ်းနှင့် တိုက်ခိုက်လို့ မရချေ။

အကယ်၍ ငြိမ်းချမ်းသော တော်လှန်ရေးဖြင့် ပြဿနာကို ဖြေရှင်းနိုင်ပါက အကြမ်းဖက်မှုကို အသုံးမပြုသင့်ပေ။ ဤအင်ပါယာသည် ကိုယ်တိုင် အဆင့်မြှင့်တင်နိုင်စွမ်း၊ ကိုယ်တိုင် ပြောင်းလဲနိုင်စွမ်း ရှိပုံရသည်။ အင်ပါယာရှိ လူအများစု၏ အကျိုးစီးပွားနှင့် ခံစားချက်ကို မထိခိုက်စေသင့်ပေ။

ယွင်ကျုံးဟဲ့က ပြောလိုက်သည်။ “နောက်ဆက်တွဲ ရှင်းကျုံး ပါတီ တစ်ခုလုံးရဲ့ အာဏာကို ကျုပ် လွှဲပြောင်း ရယူမယ်။ တိုက်ခိုက်ရေး နည်းလမ်းတွေကို လုံးဝ ပြောင်းလဲပစ်မယ်။ အင်ပါယာရဲ့ အမြင့်ဆုံး အာဏာကို ရယူဖို့ လုံးဝ အသစ်စက်စက် နည်းလမ်းကို အသုံးပြုမယ်။”

မိဖုရား တူရှားက ပြောလိုက်၏။ “ကောင်းပြီ။ ကျွန်မရဲ့ ပိုက်ဆံတွေ၊ ကျွန်မရဲ့ အရင်းအမြစ်တွေ အားလုံးက ရှင့်ကို ထောက်ခံမယ်။ ဒါပေမဲ့ ရှင်လည်း နည်းလမ်းတွေကို သတိထားရမယ်။ ရှင်းကျုံး ပါတီက အရမ်း နုနယ်သေးတယ်၊ အရမ်း အစွန်းရောက်တယ်၊ ရူးသွပ်တယ်။ ဒါပေမဲ့ သူတို့ရဲ့ နှလုံးသားက ပူနွေးနေတယ်။ သူတို့ကို ဝမ်းနည်းအောင် မလုပ်နဲ့၊ လုံးဝ ငြင်းပယ်တာမျိုး ပိုလို့တောင် မလုပ်နဲ့။”

ယွင်ကျုံးဟဲ့က ပြောလိုက်သည်။ “စိတ်ချပါ။ အဲဒီလို မလုပ်ပါဘူး။”

မိဖုရား တူရှားက မေးလိုက်၏။ “နောက်ဆက်တွဲ ရှင့်ရဲ့ လှုပ်ရှားမှုကို ဘယ်လို ခေါ်မလဲ။”

ယွင်ကျုံးဟဲ့က ဖြေလိုက်သည်။ “ကြယ်ပွင့်ဖန်တီးရေး လှုပ်ရှားမှုလို့ ခေါ်မယ်။”

ထို့နောက် ရှင်းကျုံး ပါတီသည် အစည်းအဝေးကို ထပ်မံ ကျင်းပခဲ့ပြန်သည်။ ယွင်ကျုံးဟဲ့သည် ခေါင်းဆောင် တစ်ဦးအနေဖြင့် ရှင်းကျုံး ပါတီ၏ အမြင့်ဆုံး အာဏာကို အပြည့်အဝ လွှဲပြောင်းရယူခဲ့ပြီး ဤလုပ်ငန်းစဉ်တွင် မည်သည့် အတားအဆီးမှ မရှိခဲ့ပေ။

အဘယ်ကြောင့်ဆိုသော် ရှင်းကျုံး ပါတီ၏ ထိပ်သီး ခေါင်းဆောင်များသည် ပညာရှင်များ ဖြစ်ကြပြီး အလွန် ဖြူစင်ကာ သွေးဆူလွယ်ကြသည်။

ထို့အပြင် သူတို့၏ ရည်မှန်းချက်မှာ တစ်ခုတည်းသာ ရှိသည်။ ၎င်းမှာ ယွင်ကျုံးဟဲ့ကို အင်ပါယာ၏ ဘုရင်အဖြစ် တင်မြှောက်ပြီး အင်ပါယာ ယဉ်ကျေးမှုသစ်ကို ဦးဆောင်စေရန် ဖြစ်၏။

ထို့အပြင် ဤလူများသည် အင်ပါယာကို ချစ်မြတ်နိုးသူများ ဖြစ်ကြပြီး သွေးထွက်သံယို ပဋိပက္ခများ ဖြစ်ပွားမည်ကို မလိုလားကြပေ။

ယွင်ကျုံးဟဲ့ အာဏာကို လွှဲပြောင်းရယူပြီးနောက် တိုက်ခိုက်ရေး နည်းလမ်းကို ချက်ချင်း ပြောင်းလဲပစ်ခဲ့သည်။ ချက်ချင်းပဲ ရှင်းကျုံး ပါတီ၏ လေထု အကြီးအကျယ် ပြောင်းလဲသွား၏။

ယွင်ကျုံးဟဲ့၏ ပထမဆုံး စီမံကိန်း၊ အလင်းရောင် စီမံကိန်း…

ရှင်းကျုံး ပါတီတွင် ထိပ်တန်း လက်တွေ့ လုပ်ဆောင်နိုင်စွမ်း ရှိပြီး ကြီးမားသော ဓာတ်ခွဲခန်း ဆယ်ဂဏန်းခန့်နှင့် အလုပ်ရုံ ရာဂဏန်းခန့် ရှိသည်။

ဒိုင်နမို အချို့ကို စတင် တပ်ဆင်နေပြီ ဖြစ်ပြီး သက်ဆိုင်ရာ စက်ရုံများကလည်း စတင် ထုတ်လုပ်နေပြီ ဖြစ်သည်။ အင်ပါယာ စာသင်ကျောင်းကြီးများ၏ မီးအလင်းရောင် ပြောင်းလဲမှုနှင့် လျှပ်စစ်ကြိုး ပြောင်းလဲမှုများကိုလည်း စတင်နေပြီ ဖြစ်၏။

သုံးလပိုင်း ငါးရက်နေ့…

မြို့တော်ရှိ စာသင်ကျောင်းကြီးများ၏ လျှပ်စစ်ကြိုး ပြောင်းလဲမှု ပြီးစီးသွားခဲ့သည်။

“တရားဝင် မီးဖွင့်ပြီ။ “

ခလုတ်ကို နှိပ်လိုက်ပြီးနောက် ပထမ စာသင်ကျောင်း တစ်ခုလုံး မီးရောင် ထိန်လင်းသွားပြီး အလွန် တောက်ပနေ၏။

“သက်တော်ရာကျော် ရှည်ပါစေ။ သက်တော်ရာကျော် ရှည်ပါစေ။ သက်တော်ရာကျော် ရှည်ပါစေ။ “

“ပညာရပ်သစ် သက်တော်ရာကျော် ရှည်ပါစေ။ ယဉ်ကျေးမှုသစ် သက်တော်ရာကျော် ရှည်ပါစေ။ “

အုပ်ချုပ်ရေး နန်းတော်၏ အမြင့်ပိုင်းတွင် အုပ်ချုပ်ရေးမှူး နှစ်ဦးသည် မီးရောင် ထိန်လင်းနေသော စာသင်ကျောင်းကြီးများကို ကြည့်နေသည်။

ကွာခြားချက်က အရမ်း ကြီးမားလွန်းလှသည်။ အုပ်ချုပ်ရေး နန်းတော်တွင် အသုံးပြုနေသည်မှာ ဇီဝဓာတ်ငွေ့ မီးအိမ်၊ သဘာဝ ဓာတ်ငွေ့ မီးအိမ်များ ဖြစ်ပြီး အလင်းရောင်က လျှပ်စစ်မီးလောက် မတောက်ပသည်မှာ သေချာ၏။

ထို့အပြင် ဇီဝဓာတ်ငွေ့ မီးအိမ်၊ သဘာဝ ဓာတ်ငွေ့ မီးအိမ်များ တပ်ဆင်ရသည့် အခြေအနေက အလွန် ခက်ခဲသည်။

လျှပ်စစ်မီး ကတော့ မတူညီပေ။ လျှပ်စစ်ကြိုး သွယ်တန်းနိုင်သည့် နေရာတိုင်းတွင် မီးသီး တပ်ဆင်၍ ရသည်။ ထို့ကြောင့် ဤအလင်းရောင် စီမံကိန်းသည် ကြီးမားသော နိုင်ငံရေး ပြသမှု တစ်ခုပင် ဖြစ်၏။

အလင်းရောင် ဆိုတာ ဘာလဲ၊ အမှောင်ထု ဆိုတာ ဘာလဲ။ တိုးတက်မှု ဆိုတာ ဘာလဲ၊ နောက်ကျမှု ဆိုတာ ဘာလဲ။ လူတိုင်း မြင်တွေ့စေရန်အတွက် ဖြစ်သည်။

မြို့တော်ရှိ ပြည်သူများက တစ်ချက် ကြည့်လိုက်ရုံဖြင့် စာသင်ကျောင်းကြီးများက ပိုမို လင်းထိန်နေပြီး အုပ်ချုပ်ရေး နန်းတော်နှင့် အထက်လွှတ်တော်က ပိုမို မှောင်မိုက်နေကြောင်း တွေ့မြင်နိုင်သည်။ ဤအရာက လင်းထိန်နေသော နေရာများကသာ တိုးတက်မှုကို ကိုယ်စားပြုကြောင်း တွေးထင်သွားစေနိုင်၏။

အုပ်ချုပ်ရေးမှူး နှစ်ဦးက ဘာလုပ်နိုင်မည်နည်း။ လျှပ်စစ်မီး မသုံးဖို့၊ ယဉ်ကျေးမှုသစ် မဖွံ့ဖြိုးဖို့ အမိန့်ပေးမည်လား။

ထိုသို့ဆိုရင် ပို၍ပင် ရှေးရိုးစွဲ အင်အားစု ဖြစ်သွားပြီး လွန်ခဲ့တဲ့ နှစ်ပေါင်း တစ်ထောင်ကျော်က တာ့ယန် အင်ပါယာဟောင်း၏ ရှေးရိုးစွဲ အင်အားစုများက ပညာရှင်သစ် အင်အားစုတွေကို ဖိနှိပ်ခဲ့တာကို ပိုပြီး သတိရသွားစေပေလိမ့်မည်။

အုပ်ချုပ်ရေးမှူး နှစ်ဦးသည် အချင်းချင်း ကြည့်လိုက်ကြပြီး သူတို့၏ အကြည့်များတွင် အနည်းငယ် မတတ်သာသည့် အမူအရာများ ရှိနေသည်။

မကြာသေးမီက ရှင်းကျုံး ပါတီ၏ အစွန်းရောက် လှုပ်ရှားမှုများ မရှိတော့သောကြောင့် မြို့တော်မှာ ချက်ချင်း ငြိမ်းချမ်းသွားခဲ့၏။

သို့ပေမည့် နောက်ဆက်တွဲက ပို၍ ဖြေရှင်းရ ခက်ခဲလာမည်လား။ ယခုတော့ မသိနိုင်သေးပေ။ ယွင်ကျုံးဟဲ့က ရှင်းကျုံး ပါတီ၏ အာဏာကို လွှဲပြောင်းရယူပြီးနောက် တိုက်ခိုက်ရေး နည်းလမ်းက လျှပ်စစ်မီး သက်သက်ပဲလား။

အလင်းနှင့် အမှောင်ကို ပြင်းထန်စွာ နှိုင်းယှဉ်ပြရုံ သက်သက်ပဲလား။ ထိုသို့ဆိုလျှင် ယွင်ကျုံးဟဲ့၏ နည်းလမ်းက စိတ်ပျက်စရာ ကောင်းလွန်းမနေဘူးလား။

နောက်ဆက်တွဲ ယွင်ကျုံးဟဲ့ ကိုယ်စားပြုသော ရှင်းကျုံး ပါတီက တီထွင်မှု အသစ် တစ်ခုကို ထပ်မံ ထုတ်ဖော်လိုက်ပြန်သည်။

ဤတစ်ကြိမ် တီထွင်မှုက သိပ်မကြီးမားပေ။ ဓာတ်ပြား ဖွင့်စက်ပင် ဖြစ်သည်။ ဤပစ္စည်းကို ပြုလုပ်ရန် မခက်ခဲပေ။ အကြမ်းဆုံး ဓာတ်ပြား ဖွင့်စက် ဆိုလျှင် လျှပ်စစ်ပင် မလိုအပ်ဘဲ စပရိန် လှည့်ပေးရုံဖြင့် ရ၏။

အင်ပါယာ၏ ပစ္စည်းများက အဆင့်မြင့်ပြီး လျှပ်စစ်လည်း ရှိနေပြီ ဖြစ်၏။ ထို့ကြောင့် ထုတ်လုပ်လိုက်သော ဓာတ်ပြား ဖွင့်စက်သည် ချက်ချင်းပဲ အလွန် အဆင့်မြင့်သော ဓာတ်ပြား ဖွင့်စက် ဖြစ်သွား၏။ ၎င်းသည် အင်ပါယာ၏ ပထမဆုံးသော ဖျော်ဖြေရေး ပစ္စည်းကြီး ဖြစ်မှာ သေချာသည်။

မိဖုရား တူရှားက ငွေထုတ်ပေးပြီး ဓာတ်ပြား ဖွင့်စက် အများအပြားကို ထုတ်လုပ်ခဲ့ကာ ဓာတ်ပြား အများအပြားကိုလည်း အသံသွင်းခဲ့၏။

ဓာတ်ပြား အားလုံးနီးပါးမှာ ယွင်ကျုံးဟဲ့၏ တေးဂီတ ဖျော်ဖြေပွဲမှ ဖြစ်ပြီး သူက ဂန္ထဝင် အဖြစ်ဆုံး သီချင်းများကို ရွေးချယ်ကာ အသံသွင်းထားခြင်း ဖြစ်၏။ ထို့အပြင် ယွင်ကျုံးဟဲ့၏ မိန့်ခွန်းများလည်း ပါဝင်သည်။

ဤပစ္စည်းကို ပြည်သူများကြားသို့ ဖြန့်ချိလိုက်ချိန်မှာတော့ ချက်ချင်းပဲ ကြီးမားသော ဂယက်ရိုက်ခတ်မှုကို ဖြစ်ပေါ်စေခဲ့၏။

‘မထင်ထားခဲ့ဘူး... ဒီလောကမှာ ဒီလို စက်မျိုး ရှိနေသေးတာပဲ။ လူတွေရဲ့ အသံကို သိမ်းထားပြီး အကြိမ်ကြိမ် ပြန်ဖွင့်ပြနိုင်တာပဲ။ ဒါက အရမ်း ဆန်းကြယ်လွန်းတယ် မဟုတ်ဘူးလား။ ဒါက ယွင်ကျုံးဟဲ့ ပြောတဲ့ အင်ပါယာ ယဉ်ကျေးမှုသစ် ဆိုတာလား။’

ကမ္ဘာမြေပေါ်တွင် အသံဖမ်းစက်သည် ကမ္ဘာ တစ်ဝန်းလုံး၏ ဖျော်ဖြေရေးကို နှစ်ပေါင်းများစွာ လွှမ်းမိုးခဲ့ဖူး၏။ မရေမတွက်နိုင်သော လူများက ဂီတကို ရူးသွပ်ခဲ့ကြပြီး ထိုအချိန်က ကြယ်ပွင့် အများအပြားကို မွေးဖွားပေးခဲ့သည်။

Elvis Presley၊ John Lennon၊ Michael Jackson စသည်တို့ကို လူအများအပြားက နတ်ဘုရားများကဲ့သို့ သတ်မှတ်ခဲ့ကြ၏။

၂၁ ရာစုသို့ ရောက်ရှိလာပြီးနောက် ဖျော်ဖြေရေး နည်းလမ်းများ အလွန် ပေါများလာသောကြောင့် ဓာတ်ပြား လုပ်ငန်း ကျဆင်းသွားခဲ့ပြီး နတ်ဘုရား အဆင့် အဆိုတော်များ ထပ်မံ မွေးဖွားနိုင်ခြင်း မရှိတော့ပေ။

ယခု တာ့ယန် အင်ပါယာသစ်သည် ဖျော်ဖြေရေး ရှားပါးသော ကနဦး အဆင့်တွင် ရှိနေသည်။ ထို့ကြောင့် ဓာတ်ပြားဖွင့်စက် ဆိုသော ပစ္စည်းသစ်လေး ထွက်ပေါ်လာချိန်မှာတော့ မည်မျှလောက်အထိ ခေတ်စားပြီး ဂယက်ရိုက်ခတ်သွားမည်နည်း။ လုံးဝ တွေးကြည့်၍ ရနိုင်၏။

ထိုညက ယွင်ကျုံးဟဲ့၏ တီးခတ်မှုကို နားထောင်ခဲ့ရသူမှာ လူနည်းစုသာ ဖြစ်သော်လည်း နတ်ဘုရား တစ်ပါးကဲ့သို့ သတင်းမွှေးပျံ့သွားခဲ့ပြီး မရေမတွက်နိုင်သော လူများက နားထောင်ချင်ကြသော်လည်း အခွင့်အရေး မရခဲ့ကြပေ။

ယခုအခါ ရှင်းကျုံး ပါတီသည် ပထမဆုံး အနေဖြင့် ဓာတ်ပြား ဖွင့်စက် ထောင်ချီကို ထုတ်လုပ်ခဲ့ပြီး မရောင်းချဘဲ အင်ပါယာ၏ စားသောက်ဆိုင်များ၊ အများသုံး မြင်းလှည်းများ၊ စာသင်ကျောင်းများ၊ အရက်ဆိုင်များ၊ အများသုံး အဆောင်များ စသည့် အများပြည်သူနှင့် သက်ဆိုင်သော နေရာများတွင် အခမဲ့ ဖြန့်ဝေပေးခဲ့သည်။

ဤနေရာများသည် လူအသွားအလာ အများဆုံး နေရာများ ဖြစ်ကြပြီး နေ့စဉ်နှင့်အမျှ မရေမတွက်နိုင်သော လူများက ယွင်ကျုံးဟဲ့၏ တီးခတ်မှုနှင့် မိန့်ခွန်းများကို နားထောင်ကြရ၏။

ဤသည်မှာ အင်ပါယာ၏ ပထမဆုံးသော ကြယ်ပွင့်ဖန်တီးရေး လှုပ်ရှားမှု၊ နတ်ဘုရားဖန်တီးရေး လှုပ်ရှားမှု ဖြစ်လောက်သည်။

ခေတ်သစ် လူ့အဖွဲ့အစည်းတွင် အရည်အချင်း သိပ်မရှိသော အနုပညာရှင် တစ်ဦးပင်လျှင် အကြီးအကျယ် ကြော်ငြာပြီး ပြည်သူလူထုကို အမြင်အာရုံနှင့် အကြားအာရုံများဖြင့် ကြီးမားစွာ ထိုးနှက်လိုက်ပါက ကြီးမားသော အောင်မြင်မှုကို ရရှိနိုင်ပြီး မည်သည့် လက်ရာမှ မရှိလျှင်ပင် ထိပ်တန်း နာမည်ကြီး ကြယ်ပွင့် တစ်ဦး ဖြစ်လာနိုင်၏။

ယွင်ကျုံးဟဲ့တွင်မူ လက်ရာများ ရှိနေပြီး အားလုံးက ထိပ်တန်း လက်ရာများချည်း ဖြစ်၏။ ထို့အပြင် ဤကဲ့သို့သော တစ်ခါမှ မရှိဖူးသည့် ကြယ်ပွင့်ဖန်တီးရေး လှုပ်ရှားမှုကိုပါ ပေါင်းထည့်လိုက်ပြီး အင်ပါယာ ပြည်သူများကို ကြီးမားသော အမြင်အာရုံနှင့် အကြားအာရုံများဖြင့် ထိုးနှက်လိုက်သည်။