အခန်း (၇၇၃-၇၇၄)

အပိုင်း (၇၇၃)

“ခေါင်းဆောင်… ဒုက္ခရောက်ပါပြီ၊ ဒုက္ခရောက်ပါပြီ။ အမတ်ကြီး လီဖူ ကိုယ့်ကိုယ်ကိုယ် သတ်သေသွားပါပြီ။” ထိုအချိန်တွင် လူတစ်ယောက် အပြေးအလွှား ဝင်ရောက်လာပြီး သတင်းပို့လိုက်၏။

ယွင်ကျုံးဟဲ့ အံ့ဩသွားပြီး မိဖုရား တူရှားလည်း အံ့ဩသွားသည်။ ‘ဘာ… အမတ်ကြီး လီဖူက ကိုယ့်ကိုယ်ကိုယ် သတ်သေသွားတယ်တဲ့လား။ ဒါ... ဒါက ပြဿနာကြီး ဖြစ်တော့မယ်၊ ပြဿနာကြီး သေချာပေါက် ဖြစ်တော့မယ်။’

အမတ်ကြီး လီဖူသည် ယခုနှစ်တွင် အသက် ခုနစ်ဆယ်ကျော် ရှိနေပြီ ဖြစ်ပြီး အင်ပါယာတွင် အလွန် မြင့်မားသော ဩဇာတိက္ကမ ရှိသူ ဖြစ်သည်။ သူသည် ကျောင်းသုံးစာအုပ်များတွင်ပင် ပါဝင်ခဲ့ဖူးသူ ဖြစ်ပြီး အထက်လွှတ်တော်၏ ထိပ်သီး ခေါင်းဆောင်များထဲမှ တစ်ဦး ဖြစ်၏။

ဤအမတ်ကြီးက လာဘ်စားမှုဖြင့် စွပ်စွဲခံရပြီးနောက် မိမိ၏ အပြစ်ကင်းစင်မှုကို သက်သေပြရန်အတွက် ဤမျှ ပြတ်သားစွာ ကိုယ့်ကိုယ်ကိုယ် သတ်သေသွားလိမ့်မည်ဟု မည်သူကမှ မထင်ထားခဲ့ကြပေ။

သူ၏ သေဆုံးမှုက ကြီးမားသော အပြောင်းအလဲများကို သေချာပေါက် ဖြစ်ပေါ်စေမှာဖြစ်ပြီး ကောင်းကင်ယံအထိ တုန်လှုပ်စေမည့် ပြဿနာကြီး ဖြစ်လာတော့မှာဖြစ်သည်။

ထို့နောက် ယွင်ကျုံးဟဲ့သည် ချက်ချင်း အပြင်သို့ ထွက်လာခဲ့ရာ ရဲတိုက် အပြင်ဘက်တွင် လူအုပ်ကြီး ပြည့်ကျပ်နေသည်ကို တွေ့လိုက်ရ၏။

လူသောင်းချီက ဤနေရာတွင် စုရုံးနေကြပြီး လူတိုင်းသည် တစ်ပုံစံတည်း တူညီသော အဝတ်အစားများကို ဝတ်ဆင်ထားကာ အနီရောင် ခေါင်းစည်းများကို စည်းထားကြပြီး လက်ထဲတွင်လည်း လက်နက်များ ကိုင်ဆောင်ထားကြ၏။ အများစုမှာ လူငယ်များ ဖြစ်ကြသည်။

တစ်နှစ်ကျော်ကြာ လှုံ့ဆော်မှုများနှင့် ဖွံ့ဖြိုးတိုးတက်မှုများ အပြီးတွင် ရှင်းကျုံး ပါတီ၌ အဖွဲ့ဝင် တစ်သိန်းကျော် ရှိနေပြီဖြစ်သည်။ ဤသည်မှာ ဝင်ခွင့် သတ်မှတ်ချက်များကို မြှင့်တင်ထားသောကြောင့်သာ ဖြစ်ပြီး ထိုသို့မဟုတ်ပါက လွယ်ကူစွာပင် လူတစ်သန်းကျော် သွားမှာဖြစ်၏။

ယွင်ကျုံးဟဲ့က မေးလိုက်သည်။ “ခင်ဗျားတို့ ဘာလုပ်ကြမလို့လဲ။”

လူငယ် တစ်ယောက်က ကျယ်လောင်စွာ အော်ပြောလိုက်၏။ “ခေါင်းဆောင်… သူတို့ကို တိုက်ကြရအောင်။”

“ခေါင်းဆောင်က ကျုပ်တို့ကို ဦးဆောင်ပြီး အုပ်ချုပ်ရေး နန်းတော်ထဲ ဝင်စီးပါ။ အထက်လွှတ်တော်နဲ့ အုပ်ချုပ်ရေးမှူးတွေကို ရာထူးကနေ ဖြုတ်ချကြရအောင်။”

“ဟုတ်တယ်။ ဟုတ်တယ်။ သူတို့ကို တိုက်ကြရအောင်။ ယိုယွင်းနေတဲ့ အုပ်ချုပ်ရေးမှူးကို ဖြုတ်ချကြမယ်။ ယိုယွင်းပြီး နောက်ကျနေတဲ့ အထက်လွှတ်တော်ကို ဖြုတ်ချကြမယ်။”

လူသောင်းချီက လက်သီးလက်မောင်းတန်း၍ အော်လိုက်ကြရာ သူတို့၏ အော်ဟစ်သံများက ကောင်းကင်ယံအထိ ပဲ့တင်ထပ်သွားသည်။

“ခေါင်းဆောင်… အုပ်ချုပ်ရေး နန်းတော်ကို ဝင်စီးကြမယ်။ အုပ်ချုပ်ရေးမှူးကို ဖြုတ်ချကြမယ်။”

“သူတို့က အရမ်း အနိုင်ကျင့်လွန်းတယ်။ ကျုပ်တို့ ပြန်တိုက်ရမယ်။ ကျုပ်တို့ ပြန်တိုက်ရမယ်။”

ထိုအချိန်တွင် အဘိုးအို တစ်ဦး ထွက်လာသည်။ သူသည်လည်း လူငယ်များနှင့် တစ်ပုံစံတည်း တူညီသော ဝတ်စုံကို ဝတ်ဆင်ထားပြီး ဒုတိယ စာသင်ကျောင်း၏ ကျောင်းအုပ်ပင် ဖြစ်သည်။ သူသည် အသက်ကြီးနေပြီ ဖြစ်သော်လည်း လုံးဝ အစွန်းရောက် သူတစ်ဦး ဖြစ်၏။

သူ့တွင် အခြား အဆင့်အတန်း တစ်ခုလည်း ရှိသေး၏။ ထိုအရာမှာ လီဖူ၏ တပည့် တစ်ဦး ဖြစ်သည်။ အမတ်ကြီး လီဖူသည် အသက် သုံးဆယ်အရွယ်တွင် အင်ပါယာ ပထမ စာသင်ကျောင်း၏ ပါမောက္ခအဖြစ် တာဝန်ထမ်းဆောင်ခဲ့ဖူးသည်။

ဒုတိယ စာသင်ကျောင်း ကျောင်းအုပ်က ပြောလိုက်၏။ “ယွင်ကျုံးဟဲ့... ဒီကိစ္စကို ဒီအတိုင်း ထားလိုက်လို့ မဖြစ်ဘူး။ အုပ်ချုပ်ရေးမှူးနဲ့ အထက်လွှတ်တော်က ယိုယွင်းပြီး နောက်ကျနေပြီ။ အခုပဲ ကျုပ်တို့ အာဏာသိမ်းပြီး သူတို့ကို ရာထူးကနေ ဖြုတ်ချကြမယ်။ စိတ်ချပါ။ အင်ပါယာရဲ့ စစ်တပ်က ပြည်သူတွေဘက်မှာ ရှိတယ်။ သူတို့က တရားမျှတမှု အပြည့် ရှိပြီး ကျုပ်တို့ကို လုံးဝ တိုက်ခိုက်မှာ မဟုတ်ဘူး။”

“ယွင်ကျုံးဟဲ့... လုပ်ကြရအောင်။”

“ယွင်ကျုံးဟဲ့... လုပ်ကြရအောင်။ အုပ်ချုပ်ရေး နန်းတော်ကို ဝင်စီးပြီး အုပ်ချုပ်ရေးမှူးကို ဖြုတ်ချကြမယ်။ အထက်လွှတ်တော်ကို ဖြုတ်ချကြမယ်။”

လူသောင်းချီက ထပ်မံ၍ လက်သီးလက်မောင်း တန်းကာ အော်ဟစ်ကြပြန်၏။ သို့ပေမည့် ဤအချိန်တွင် ယွင်ကျုံးဟဲ့ကမူ ပို၍ တည်ငြိမ်သွားသည်။

အဘယ်ကြောင့်ဆိုသော် ရှင်းကျုံး ပါတီ ဌာနချုပ်သို့ စုရုံးလာသော လူအရေအတွက်က ပို၍ ပို၍ များပြားလာသောကြောင့်ပင်။

ယွင်ကျုံးဟဲ့ကို ကြည်ညိုသူ မရေမတွက်နိုင်သော လူများ၊ ရှင်းကျုံး ပါတီဝင်များသည် အဆက်မပြတ် ဝင်ရောက်လာကြသည်။

မကြာမီ ဤနေရာရှိ လူအရေအတွက်သည် တစ်သိန်းကျော်သွားမည် ဖြစ်ပြီး ထို့ထက်ပင် ပိုများလာနိုင်၏။

ယွင်ကျုံးဟဲ့၏ စိတ်ထဲတွင် တာ့ကျိုး အင်ပါယာ၏ အခြေအနေများကို အလိုအလျောက် တွေးမိသွား၏။ ထိုအချိန်က သူသည် ဧကရာဇ်ဟောင်းဘက်တွင် ရပ်တည်နေခဲ့ပြီး ဧကရာဇ်ဝမ်ယွင်က ဧကရာဇ်ဟောင်းကို အရှုံးပေးရန်နှင့် ပြန်လည် အကျဉ်းချရန် ဖိအားပေးရန်အတွက် စာမေးပွဲ အောင်မြင်သူများကို တစ်ကြိမ်ပြီး တစ်ကြိမ် အသုံးပြု၍ ရှန်ချင် နန်းတော်ကို ဝိုင်းရံစေခဲ့သည်။

အကယ်၍ သူကသာ အမိန့်တစ်ခွန်း ပေးလိုက်ပါက လူသောင်းချီ၊ သို့မဟုတ် သိန်းချီက အုပ်ချုပ်ရေး နန်းတော် အတွင်းသို့ ဝင်ရောက်သွားမည်မှာ သေချာပြီး အာဏာသိမ်းမှု ဖြစ်ပွားမှာဖြစ်၏။

ထိုအချိန်သို့ ရောက်ပါက အင်ပါယာ စစ်တပ်သည် မြို့တော် အတွင်းသို့ သေချာပေါက် ဝင်ရောက်လာပေလိမ့်မည်။

ထိုအခါ ဖြစ်နိုင်ခြေ နှစ်ခု ရှိသည်။ အင်ပါယာ စစ်တပ်က အမိန့်ကို နာခံပြီး ရှင်းကျုံး ပါတီကို နှိမ်နင်းပါက သွေးချောင်းစီးမည် ဖြစ်ပြီး အင်ပါယာသည် ပြည်တွင်းစစ် အတွင်းသို့ ကျရောက်သွားနိုင်သည်။

နောက်ထပ် ဖြစ်နိုင်ခြေ တစ်ခုမှာ အင်ပါယာ စစ်တပ်က အမိန့်ကို မနာခံဘဲ ယွင်ကျုံးဟဲ့၏ အာဏာသိမ်းမှု အောင်မြင်သွားခြင်း ဖြစ်သည်။

သို့ပေမည့် ယွင်ကျုံးဟဲ့က အာဏာသိမ်းပြီး တက်လာချင်သလား။ မဟုတ်ပေ။ အဆိုးမြင် အစဉ်အလာကို စတင်သူဟာ နောင်ဆက်ခံမယ့်သူ မရှိဘူး ဆိုသော စကားရှိ၏။

အာဏာသိမ်းပြီး တက်လာခြင်းသည် အင်ပါယာ၏ နိုင်ငံရေး ချိန်ခွင်လျှာကို လုံးဝ ဆုတ်ဖြဲလိုက်ခြင်းနှင့် တူညီသည်။

ထို့အပြင် အင်ပါယာ အထက်တန်းလွှာများ၏ လူထု ထောက်ခံမှုက ထိုမျှလောက်အထိ ကျဆင်းနေခြင်း မရှိသေးပေ။ အကယ်၍ အာဏာသိမ်းပြီး တက်လာပါက ကြီးမားသော အန္တရာယ်များကို ယူဆောင်လာမှာ ဖြစ်၏။

ယခုအချိန်သည် အရေးကြီးဆုံး အချိန်ဖြစ်ပြီး ယွင်ကျုံးဟဲ့ အနေဖြင့် အရှေ့တိုင်းမှ လာသော ပြင်ပလူ တစ်ယောက် ဖြစ်ရာ မှန်ကန်သော အကြောင်းပြချက်ကို ပိုမို ကိုင်စွဲထားရန် လိုအပ်သည်။

အတိုချုပ် ပြောရလျှင် ရာထူးကို မှန်ကန်စွာ ရယူရမည်။ သူ တိုးတက်လာသည့် အရှိန်က မူလတည်းက အရမ်း မြန်လွန်းနေပြီး အခြေခံ အုတ်မြစ်ကလည်း မခိုင်မာသေးသောကြောင့် မှန်ကန်သော အကြောင်းပြချက် ပိုမို လိုအပ်၏။

တာ့ယန် အင်ပါယာသစ် ကဲ့သို့သော အတော်လေး အဆင့်မြင့်သည့် ယဉ်ကျေးမှုတွင် အကြံအစည်များဖြင့် လုယူရရှိသော ဘုရင်ရာထူးသည် မခိုင်မာနိုင်သလို အကြံအစည်များကြောင့်ပင် ပြန်လည် ဆုံးရှုံးသွားနိုင်ခြေ အလွန် များသည်။

ယခုအခါ အမြင့်ဆုံး အာဏာနှင့် အလွန် နီးကပ်နေပြီ ဖြစ်သော်လည်း ယခုလို အချိန်မျိုးတွင် ပို၍ တည်ငြိမ်ရန် လိုအပ်၏။

ယွင်ကျုံးဟဲ့က လက်နှစ်ဖက်ကို မြှောက်လိုက်ရာ တစ်ကွင်းလုံး တိတ်ဆိတ်သွားသည်။

ယွင်ကျုံးဟဲ့က ကျယ်လောင်စွာ အော်ပြောလိုက်၏။ “တည်တည်ငြိမ်ငြိမ် နေကြပါ။ အားလုံး တည်တည်ငြိမ်ငြိမ် နေကြပါ။ ရှင်းကျုံး ပါတီဝင် အားလုံး နားထောင်ကြ။ အုပ်ချုပ်ရေး နန်းတော်ကို မဝိုင်းကြနဲ့။ အင်ပါယာရဲ့ အများပြည်သူ လုံခြုံရေးကို မထိခိုက်စေနဲ့။

အားလုံးကို ကျုပ် ဖြေရှင်းချက် ပေးပါ့မယ်။ အုပ်ချုပ်ရေးမှူးနဲ့ အထက်လွှတ်တော်ကိုလည်း တစ်လောကလုံးကို ဖြေရှင်းချက် ပေးအောင် ကျုပ် လုပ်ပါ့မယ်။ အားလုံး ဒီမှာပဲ နေကြပါ။ မလှုပ်ကြနဲ့၊ မလှုပ်ကြနဲ့။”

ထို့နောက် ယွင်ကျုံးဟဲ့သည် ရှင်းကျုံး ပါတီ၏ ထိပ်သီး ခေါင်းဆောင် အချို့ကို ပြောလိုက်သည်။ “လူကြီးမင်းတို့… အခုလို အချိန်မျိုးမှာ ပိုပြီး မလှုပ်ရှားသင့်ဘူး။ ကျုပ် ပြန်လာတဲ့အထိ အားလုံး စောင့်နေကြပါ။”

ရှင်းကျုံး ပါတီ၏ ထိပ်သီး ခေါင်းဆောင် အချို့က ဖြေလိုက်၏။ “ကောင်းပါပြီ။”

ထို့နောက် ယွင်ကျုံးဟဲ့သည် မြင်းလှည်းပေါ်သို့ တက်ကာ အမတ်ကြီး လီဖူ၏ အိမ်သို့ ထွက်ခွာသွားသည်။

ယွင်ကျုံးဟဲ့ လီဖူ ၏ အိမ်သို့ ရောက်ရှိသွားချိန်မှာတော့ အပြင်ဘက်တွင်လည်း လူတွေ ပြည့်ကျပ်နေပြီ ဖြစ်၏။

အမတ်ကြီး လီဖူ သည် အထက်လွှတ်တော်တွင် အဆင့် သိပ်မမြင့်ဘဲ နံပါတ်ကိုး နေရာတွင်သာ ရှိသည်။ သို့ပေမည့် သူ၏ အသက်အရွယ်က ကြီးရင့်ပြီး ဩဇာတိက္ကမ မြင့်မားကာ ယခင်တည်းက ကိုယ်ကျင့်တရား စံပြ ပုဂ္ဂိုလ် တစ်ဦး ဖြစ်ခဲ့သည်။

အင်ပါယာ ပထမ စာသင်ကျောင်းမှ ပါရဂူဘွဲ့ ရရှိခဲ့ပြီးနောက် ပထမ စာသင်ကျောင်းတွင် ပါမောက္ခ အဖြစ် ဆက်လက် နေထိုင်ခဲ့၏။

စာသင်ကြားပြီး နှစ်အနည်းငယ် အကြာတွင် နိုင်ငံရေးလောကသို့ ဝင်ရောက်ခဲ့ပြီး ခရိုင် အုပ်ချုပ်ရေးမှူးမှ စတင်ကာ အနောက်ဘက် ပြည်နယ် ဘုရင်ခံအထိ တာဝန်ထမ်းဆောင်ခဲ့ပြီးနောက် အထက်လွှတ်တော်သို့ ဝင်ရောက်ခဲ့ခြင်း ဖြစ်သည်။

သူ့ကို တစ်လောကလုံးက သိရှိရသည့် အခြား အကြောင်းရင်း တစ်ခုလည်း ရှိသေးသည်။ သူသည် အင်ပါယာ၏ အခြေခံ ပညာရေး ကျောင်းသုံးစာအုပ်များတွင် ပါဝင်ခဲ့ဖူးသူ ဖြစ်၏။

အသက် ရှစ်နှစ် အရွယ်တွင် သူသည် သူငယ်ချင်းများနှင့် အတူ စွန့်စားခရီး ထွက်ခဲ့ရာ သဘာဝ လိုဏ်ဂူနက်ကြီး တစ်ခုထဲသို့ ကျသွားပြီး ရက်ပေါင်းများစွာ ပျောက်ဆုံးသွားခဲ့သည်။

အင်ပါယာက ကလေးများကို ရှာဖွေရန် လူထောင်ချီ စေလွှတ်ခဲ့သော်လည်း မတွေ့ရှိခဲ့ဘဲ လူတိုင်းက ကလေးများ သေချာပေါက် သေဆုံးသွားပြီဟု ထင်မှတ်ခဲ့ကြသည်။

သို့ပေမည့် လီဖူသည် ဤကလေးများကို ခေါ်ဆောင်ကာ ဝင်္ကပါကဲ့သို့သော လိုဏ်ဂူနက်ကြီးထဲမှ ထွက်လာ နိုင်ခဲ့လိမ့်မည်ဟု မည်သူကမှ မထင်ထားခဲ့ကြပေ။

ကလေး အချို့၏ ပြောပြချက်အရ သူတို့ အသက်ရှင်နိုင်ခဲ့ခြင်းမှာ လီဖူကြောင့်သာ ဖြစ်ကြောင်း သိရှိရသည်။

ကလေး တစ်ယောက် ခြေထောက် ကျိုးသွားခဲ့ပြီး အခြေခံအားဖြင့် အစားအစာလည်း မရှိခဲ့ပေ။ လီဖူသည် အလွန် ကောင်းမွန်သော ခေါင်းဆောင်မှု စွမ်းရည်ကို ပြသခဲ့ပြီး သူငယ်ချင်းများကို စိတ်ဓာတ် ခွန်အားပေးကာ နည်းပါးလှသော အစားအစာများကို စနစ်တကျ ခွဲဝေပေးခဲ့ပြီး မည်သည့် သူငယ်ချင်းကိုမှာ စွန့်ပစ်ခြင်း မရှိခဲ့ပေ။

ထိုမျှမက သူသည် လေစီးကြောင်းနှင့် လေသံများကို အခြေခံ၍ လိုဏ်ဂူနက်ကြီး၏ ထွက်ပေါက်ကို ရှာဖွေတွေ့ရှိခဲ့သည်။

တစ်ချိန်တည်းမှာပဲ သူသည် အင်ပါယာ၏ အကျော်ကြားဆုံး ကလေးငယ် ဖြစ်လာခဲ့ပြီး ပါရမီရှင် တစ်ဦး ဖြစ်ရုံသာမက ခေါင်းဆောင်ငယ် တစ်ဦးလည်း ဖြစ်လာခဲ့သည်။ အခြေခံ ပညာရေး၏ ကျောင်းသုံးစာအုပ်များတွင် ထည့်သွင်း ရေးသားခံရပြီး အင်ပါယာရှိ မရေမတွက်နိုင်သော လူငယ်များ၏ စံပြပုဂ္ဂိုလ် ဖြစ်လာခဲ့၏။

ထို့နောက်ပိုင်းတွင်လည်း လီဖူသည် အံ့မခန်း ကလေးငယ် ဆိုသည့် နာမည်ဂုဏ်သတင်းကို မပျက်ပြားစေဘဲ အတားအဆီးများ အားလုံးကို ကျော်လွှားနိုင်ခဲ့သကဲ့သို့ ဖြစ်လာသည်။

ရှစ်နှစ်တာ အခြေခံ ပညာရေး အပြီးတွင် သူသည် ပြည်နယ် အဆင့် ပထမ ရရှိကာ အင်ပါယာ ပထမ စာသင်ကျောင်းသို့ ဝင်ရောက်ခဲ့ပြီး တက္ကသိုလ် ကျောင်းသားမှသည် ပါရဂူ အထိ အခြေခံအားဖြင့် ပထမ နေရာတွင်သာ အမြဲတမ်း ရှိခဲ့၏။

ထို့အပြင် အင်ပါယာ အရာရှိ အဖြစ် တာဝန်ထမ်းဆောင်ချိန်တွင်လည်း သူသည် အရာရှိများကို စည်းမျဉ်းများဖြင့် မချုပ်ချယ်ဘဲ လွတ်လပ်စွာ ရာထူးတိုးပေးခဲ့သောကြောင့် ဝေဖန်မှု အချို့ကိုလည်း ခံခဲ့ရသည်။

အင်ပါယာ အရာရှိများသည် ပညာအရည်အချင်းကို အလွန် အလေးထားကြပြီး အရာရှိကြီး ဖြစ်လိုပါက အခြေခံအားဖြင့် စာသင်ကျောင်းကြီးများမှ ပါရဂူဘွဲ့ ရရှိထားသူများ ဖြစ်ရမည်။ တက္ကသိုလ် ကျောင်းသားများ အနေဖြင့် ခရိုင် အုပ်ချုပ်ရေးမှူး အဖြစ် ရာထူးတိုးရန်ပင် ခက်ခဲ၏။

သို့ပေမည့် လီဖူသည် ပညာအရည်အချင်း မမြင့်မားသော အရာရှိ အများအပြားကို ရာထူးတိုးပေးခဲ့ပြီး အရည်အချင်းကိုသာ အလေးထားကာ ပညာအရည်အချင်းကို သိပ်အလေးမထားခဲ့ပေ။

ဤလုပ်ရပ်သည် ဝေဖန်မှုများ ခံရသော်လည်း အရာရှိ အများအပြားကို သူ၏ ကျေးဇူးကို သိရှိစေခဲ့သည်။

ထို့အပြင် ပထမ စာသင်ကျောင်း၏ ပါမောက္ခ အဖြစ် ဆယ်နှစ်တာ တာဝန်ထမ်းဆောင်ချိန်တွင် သူ၏ ထူးခြားသော ကိုယ်ရည်ကိုယ်သွေးကြောင့် ကျောင်းသား အများအပြားကို သိမ်းပိုက်နိုင်ခဲ့ပြီး သူ့ကို ဘဝ လမ်းပြဆရာ အဖြစ် သတ်မှတ်ခဲ့ကြ၏။

ယခုအခါ ထိုကျောင်းသားများ အများအပြားသည် အင်ပါယာ၏ အထက်တန်းလွှာများ ဖြစ်နေကြပြီဖြစ်ပြီး အချို့မှာ အင်ပါယာ အရာရှိများပင် ဖြစ်နေကြပြီ ဖြစ်သည်။

ယခု လီဖူ ကိုယ့်ကိုယ်ကိုယ် သတ်သေသွားပြီ ဖြစ်ရာ ဤလူများ၏ စိတ်ထဲတွင် မူလတည်းက မကျေနပ်မှုများ ပြည့်နှက်နေသည့် ဒေါသ မီးတောက်များသည် နောက်ဆုံးတွင် ပေါက်ကွဲထွက်လာတော့၏။

အပိုင်း (၇၇၄)

လူထောင်ချီက လီဖူ၏ စံအိမ် အပြင်ဘက်တွင် ဝိုင်းရံထားကြ၏။ ဤစံအိမ်တွင် နေထိုင်ခြင်းက ဇိမ်ခံသည်ဟု မပြောနိုင်ပေ။ အဘယ်ကြောင့်ဆိုသော် ၎င်းသည် အင်ပါယာက ခွဲဝေပေးထားခြင်း ဖြစ်ပြီး အင်ပါယာ အရာရှိကြီး တိုင်းတွင် ရှိသည်။

တာ့ယန် အင်ပါယာသစ်သည် လစာမြင့်မားစွာ ပေး၍ အကျင့်ပျက် ခြစားမှုကို တားဆီးသည့် စနစ်ကို လုံးဝ ကျင့်သုံးထားခြင်း ဖြစ်၏။

ဤလူထောင်ချီ တစ်ယောက်ချင်းစီတိုင်းက အလွန် ဒေါသထွက်နေကြပြီး အခေါင်းတလားကို ထမ်းကာ အုပ်ချုပ်ရေး နန်းတော် အတွင်းသို့ ဝင်ရောက်ပြီး အုပ်ချုပ်ရေးမှူးများနှင့် အထက်လွှတ်တော်ကို လီဖူ အတွက် ဖြေရှင်းချက် ပေးရန် တောင်းဆိုရန် ပြင်ဆင်နေကြသည်။

ယွင်ကျုံးဟဲ့ မြင်းလှည်းပေါ်မှ ဆင်းလာသည်ကို မြင်ချိန်မှာတော့ လူအုပ်ကြီး ချက်ချင်း ဝိုင်းအုံလာကြပြီး ကျယ်လောင်စွာ အော်ဟစ်လိုက်ကြ၏။ “ကျီးရှား ရောက်လာပြီ။ ကျီးရှား ရောက်လာပြီ။”

“ယွင်ကျုံးဟဲ့ ရောက်လာပြီ။”

“ကျီးရှား… အမတ်ကြီး လီဖူ အတွက် တရားမျှတမှု ရအောင် လုပ်ပေးပါ။”

လူထောင်ချီက ကျယ်လောင်စွာ အော်ဟစ်လိုက်ကြသည်။

ယွင်ကျုံးဟဲ့က ခေါင်းညိတ်လိုက်ပြီးနောက် လီဖူ၏ စံအိမ် အတွင်းသို့ ဝင်ရောက်သွားသည်။

လီဖူ၏ ဇနီးနှင့် သား အချို့က ယွင်ကျုံးဟဲ့ကို ဧည့်ခံကြသည်။ ကျောက်တုံးများကို အရူးအမူး နှစ်သက်သော သူ၏ သားမှာမူ လာဘ်စားမှုဖြင့် အဖမ်းခံထားရပြီ ဖြစ်၏။

သူ၏ သားအကြီးဆုံးမှာ မြို့တော် အုပ်ချုပ်ရေးရုံးမှ အရာရှိ တစ်ဦးဖြစ်ပြီး ယခင်က ဖခင်နှင့်အတူ ရာထူးမှ နှုတ်ထွက်ခဲ့သူ ဖြစ်သည်။

ဤလူများ၏ မျက်နှာများတွင် ဝမ်းနည်းမှုများ ပြည့်နှက်နေပြီး မျက်လုံးများက နီရဲနေကာ ယွင်ကျုံးဟဲ့ကို မြင်ချိန်မှာတော့ မျက်ရည်များ ထပ်မံ ကျဆင်းလာပြန်၏။

ယွင်ကျုံးဟဲ့သည် လီဖူ၏ ရုပ်အလောင်း ရှေ့သို့ ရောက်လာပြီး ခါးညွှတ် အရိုအသေပေးလိုက်သည်။

ယွင်ကျုံးဟဲ့က ပြတ်သားစွာ ပြောလိုက်၏။ “အားလုံး စိတ်ချပါ။ အမတ်ကြီး လီဖူနဲ့ ကျုပ်က တစ်ခါမှ မသိကျွမ်းခဲ့ဖူးပေမယ့် ကျုပ်ကြောင့် သေဆုံးသွားရတာပါ။ သူ့အတွက် တရားမျှတမှု ရအောင် ကျုပ် သေချာပေါက် လုပ်ပေးပါ့မယ်။”

လီဖူ၏ ဇနီးအိုက ဝမ်းနည်းခြင်း အထိမ်းအမှတ် အဖြူရောင် ဝတ်စုံကို ဝတ်ဆင်ထားပြီး စာတစ်စောင် ကမ်းပေးကာ ပြောလိုက်သည်။ “ကျီးရှား… ဒါက ကျွန်မယောက်ျား ရှင့်ကို ပေးခဲ့တဲ့ စာပါ။”

ယွင်ကျုံးဟဲ့ အနည်းငယ် အံ့ဩသွားသည်။ အမတ်ကြီး လီဖူ သည် မသေဆုံးမီတွင် သူ့အတွက် သေတမ်းစာ တစ်စောင် ချန်ထားခဲ့သည်လား။

သူသည် လီဖူ၏ ရုပ်အလောင်းကို ထပ်မံ၍ ခါးညွှတ် အရိုအသေပေးလိုက်ပြီးနောက် သေတမ်းစာကို ဖွင့်ဖတ်လိုက်သည်။

“ကျီးရှား ကိုယ်တိုင် ဖတ်ရန်…

ကျုပ် ကိုယ့်ကိုယ်ကိုယ် သတ်သေရခြင်းက ကိုယ့်ရဲ့ အပြစ်ကင်းစင်မှုကို သက်သေပြဖို့ ဖြစ်သလို အပြစ်ကင်းစင်မှု သက်သက်အတွက်လည်း မဟုတ်ပါဘူး။ အသက်ကို ပေးပြီး အကြံပေးချင်လို့ပါ။

တာ့ယန် အင်ပါယာသစ်မှာ အသက်ကို ပေးပြီး အကြံပေးတာက အရှေ့တိုင်း အင်ပါယာဟောင်းရဲ့ ယိုယွင်းနေတဲ့ သင်္ကေတ တစ်ခု ဖြစ်ပြီး အင်ပါယာသစ်မှာ ဒါကို အားမပေးဘူး ဆိုတာ မှန်ပါတယ်။ ဒါပေမဲ့ ကျုပ်ကတော့ ကျီးရှားကို အသက်ကို ပေးပြီး အကြံပေးပါရစေ။

အခု တစ်လောကလုံးက ကြီးမားတဲ့ အပြောင်းအလဲတွေကို ရင်ဆိုင်နေရပြီး တာ့ယန် အင်ပါယာသစ် ကလည်း မပြောင်းလဲလို့ မရတော့ဘူး။

အုပ်ချုပ်ရေးမှူး နှစ်ပါးနဲ့ အထက်လွှတ်တော်က တကယ်တမ်း ယိုယွင်းပြီး နောက်ကျနေတာ မဟုတ်ပါဘူး။ သူတို့က လောကအဆင့် စစ်ပွဲကြီးအတွက် ပြင်ဆင်မှု မလုပ်ရသေးသလို အာဏာ လွှဲပြောင်းပေးဖို့အတွက်လည်း ပြင်ဆင်မှု မလုပ်ရသေးတာပါ။

အင်ပါယာ အရာရှိတွေဟာ အဆုံးစွန်မှာတော့ ဉာဏ်ကောင်းတဲ့ သူတွေပါပဲ။ သူတို့ရဲ့ စိတ်ထဲမှာ အမှားအမှန် ဆိုတာကို သိကြပါတယ်။ အင်ပါယာရဲ့ စစ်တပ်ကလည်း ဝိညာဉ် ရှိပြီး တရားမျှတမှု ရှိကာ အမှားအမှန်ကို သိကြပါတယ်။

အင်ပါယာမှာ အာဏာအတွက် အောက်ခြေလွတ်သွားတဲ့ သူတချို့ ရှိတာ သေချာပါတယ်။ ဒါပေမဲ့ အရာရှိ အများစုကတော့ ကိုယ်ချင်းစာတရား ရှိကြပါသေးတယ်။

လောကကြီးက ကြီးမားတဲ့ အပြောင်းအလဲတွေကို ရင်ဆိုင်နေရပြီး ကျုပ်တို့ရဲ့ ရန်သူက တစ်ခါမှ မရှိဖူးလောက်အောင် အင်အား ကြီးမားနေတယ်။ ဒါက အရှေ့ဘက်လောကရဲ့ ရန်သူ သက်သက် မဟုတ်ဘဲ တစ်လောကလုံး ယဉ်ကျေးမှုရဲ့ ရန်သူပါပဲ။

ယဉ်ကျေးမှု ပျက်စီးမယ့် အချိန်က မျက်စိရှေ့မှာတင် ရောက်နေပြီ။ အရင်က နှစ်ပေါင်း ရာချီ အတွင်းမှာ အင်ပါယာက အရှိန်အဟုန်နဲ့ ဖွံ့ဖြိုးတိုးတက်ခဲ့ပြီး အသက်အန္တရာယ် ပေးနိုင်တဲ့ ရန်သူ မရှိခဲ့ဘူး။

အဲဒါကြောင့် အာဏာကို ခွဲဝေပေးထားပြီး အုပ်ချုပ်ရေးမှူးတွေနဲ့ အထက်လွှတ်တော်က အာဏာကို အတူတကွ ကိုင်စွဲထားကြတယ်။ အာဏာရှင်ဆန်တဲ့ လုပ်ရပ်တိုင်းက ပြင်းထန်တဲ့ တိုက်ခိုက်မှုကို ခံရတယ်။ ဒါက အမှား မဟုတ်ပါဘူး။

ဒါပေမဲ့ အခု ရန်သူကြီးက ရှေ့မှာ ရောက်နေပြီဆိုတော့ အင်ပါယာဟာ အင်အားကြီးမားပြီး အလင်းရောင် တောက်ပတဲ့ ခေါင်းဆောင် တစ်ယောက် လိုအပ်နေပြီ။ အင်ပါယာဟာ ယဉ်ကျေးမှုလောကကို ဦးဆောင်ပြီး အမှောင်တပ်တော်ကို အနိုင်ယူနိုင်ဖို့အတွက် အာဏာကို တစ်ဦးတည်း ကိုင်စွဲထားတဲ့ ဧကရာဇ် တစ်ပါး လိုအပ်နေပြီ။

ကျုပ် လုပ်ခဲ့သမျှက ကျီးရှားအတွက် မဟုတ်ဘဲ အင်ပါယာရဲ့ ကြီးကျယ်တဲ့ ရည်မှန်းချက်အတွက်ပါ။

နောက်ဆုံး အနေနဲ့ ကျုပ် အသက်ကို ပေးပြီး ကျီးရှားကို တောင်းပန်ချင်ပါတယ်။ အင်ပါယာက မငြိမ်မသက် ဖြစ်လို့ မရဘူး၊ အာဏာ လွှဲပြောင်းတာက ချောမွေ့ရမယ်။ အင်ပါယာက ခွဲထွက်လို့ မရဘူး၊ ပြည်တွင်းစစ် ပိုလို့တောင် မဖြစ်ရဘူး။ အင်ပါယာက မငြိမ်မသက် ဖြစ်လို့ မရဘူး၊ အာဏာသိမ်းစရာ မလိုရင် အတတ်နိုင်ဆုံး အာဏာ မသိမ်းပါနဲ့။”

ယွင်ကျုံးဟဲ့သည် လီဖူ၏ သေတမ်းစာကို သုံးကြိမ်တိတိ ဖတ်ရှုပြီးနောက် ဤကိုယ်ကျင့်တရား စံပြ ပုဂ္ဂိုလ်၏ စေတနာကို နားလည်သွားသည်။

လီဖူသည် မိမိ၏ အပြစ်ကင်းစင်မှုကို သက်သေပြရန်အတွက် သေဆုံးခဲ့ရသည်ဟု ဆိုခြင်းထက် ယွင်ကျုံးဟဲ့ကို အသက်ပေး၍ တောင်းပန်ရန်အတွက် သေဆုံးခဲ့ရသည်ဟု ဆိုခြင်းက ပို၍ မှန်ကန်၏။

ရာထူးကို မှန်ကန်စွာ ရယူရမည်၊ မှန်ကန်သော အကြောင်းပြချက်ကို ကိုင်စွဲထားရမည်၊ အာဏာသိမ်းစရာ မလိုပါက အတတ်နိုင်ဆုံး အာဏာ မသိမ်းရပေ။ လူအများစုကို စည်းရုံးပြီး လူနည်းစုကို တိုက်ခိုက်ရမည်။ ရန်သူကြီး ရှေ့ရောက်နေချိန်တွင် အင်ပါယာ၏ အင်အားများကို ထပ်မံ မခွဲဝေသင့်တော့ပေ။

ဤသည်မှာလည်း ပြိုင်ဘက်ကင်း နိုင်ငံရေးသမား တစ်ဦး၊ တကယ့်ကို အသိတရား ရှိသူ တစ်ဦးပင် ဖြစ်၏။ ဤသည်မှာ တကယ့် အသက်ပေး အကြံပေးမှုပင် ဖြစ်သည်။

ထို့အပြင် သူသည် သူ၏ သေဆုံးမှုကို အသုံးပြု၍ ယွင်ကျုံးဟဲ့အား မှန်ကန်သော အကြောင်းပြချက်ကို ကိုင်စွဲနိုင်မည့် နိုင်ငံရေး လက်နက် တစ်ခုကို ပေးအပ်ခဲ့ခြင်း ဖြစ်၏။

ယွင်ကျုံးဟဲ့သည် ဤအမတ်ကြီးကို တကယ်ကို သိပ်မမြင်ဖူးသလို စကားလည်း မပြောဖူးပေ။ သို့ပေမည့် ဤအမတ်ကြီးသည် အင်ပါယာအတွက်၊ သူ့အတွက် သေဆုံးသွားခဲ့သည်။

ယွင်ကျုံးဟဲ့သည် လီဖူ၏ ရုပ်အလောင်းကို ထပ်မံ၍ ခါးညွှတ် အရိုအသေပေးကာ ပြောလိုက်၏။ “အမတ်ကြီး လီဖူ… ခင်ဗျားရဲ့ စေတနာကို ကျုပ် သိပါပြီ။ ကျုပ် ခင်ဗျားကို စိတ်ပျက်အောင် မလုပ်ပါဘူး။”

ထို့နောက် ယွင်ကျုံးဟဲ့သည် လီဖူ၏ မိသားစုဝင်များကို ထပ်မံ အရိုအသေပေးကာ ပြောလိုက်သည်။ “အားလုံးပဲ... ဝမ်းနည်းမှုကို ဖြေဖျောက်ကြပါ။”

…………….

အုပ်ချုပ်ရေး နန်းတော် အတွင်းတွင် တင်းမာမှုများ ပြည့်နှက်နေသည်။

သတင်းဆိုးများ တစ်ခုပြီး တစ်ခု ထွက်ပေါ်လာခဲ့ပြီး အမတ်ကြီး လီဖူသည် ဤမျှ ပြတ်သားစွာ ကိုယ့်ကိုယ်ကိုယ် သတ်သေရန် ရွေးချယ်လိမ့်မည်ဟု မည်သူကမှ မထင်ထားခဲ့ကြပေ။

အရင်က အမတ်ကြီး လီဖူသည် ဤကဲ့သို့ လူမျိုး မဟုတ်ပေ။ သူသည် စိတ်ထား အလွန် ကြီးမြတ်ပြီး တခြားသူများ၏ တိုက်ခိုက်မှုများကို ရင်ဆိုင်ရချိန်တွင် ပြုံးရုံသာ ပြုံးပြပြီး လုံးဝ ဂရုမစိုက်တတ်သူ ဖြစ်သည်။

သူသည် အရာရှိများကို စည်းမျဉ်းများဖြင့် မချုပ်ချယ်ဘဲ လွတ်လပ်စွာ ရာထူးတိုးပေးခဲ့သောကြောင့် အငြင်းပွားမှု များစွာကိုလည်း ခံခဲ့ရသည်။ တိုက်ခိုက်ခံရမှု အကြိမ်မည်မျှ ရှိသည်ကိုပင် မသိနိုင်သော်လည်း သူသည် တစ်ခါမှပင် ပြန်လည် ချေပခြင်း မရှိခဲ့ပေ။

သို့ပေမည့် ဤတစ်ကြိမ်တွင်မူ သူသည် မည်သည့် ဖြေရှင်းချက်မျှ မပေးဘဲ ကိုယ့်ကိုယ်ကိုယ် သတ်သေသွားခဲ့သည်။

ဤကဲ့သို့ အရေးပါသော ပုဂ္ဂိုလ် တစ်ဦး သေဆုံးသွားမှုက ဖြစ်ပေါ်လာမည့် ဂယက်ရိုက်ခတ်မှုမှာ တွေးကြည့်၍ပင် မရနိုင်ပေ။

သေဆုံးသူက အကြီးမားဆုံး ဆိုသည့်အတိုင်း သူ၏ သေဆုံးမှုက ချက်ချင်းပဲ ကိုယ်ကျင့်တရား အမြင့်ဆုံး နေရာကို ရယူသွားခဲ့သည်။ မည်သို့ပင်ဖြစ်စေ သူသည် ကျောင်းသုံးစာအုပ်များတွင် ပါဝင်ခဲ့ဖူးသော ကိုယ်ကျင့်တရား စံပြ ပုဂ္ဂိုလ် တစ်ဦး ဖြစ်သည်။

လီဖူ၏ အိမ်သို့ လာရောက် ဂါရဝပြုကြသော တပည့်များနှင့် အရာရှိများမှာလည်း ပို၍ ပို၍ များပြားလာ၏။

ရှင်းကျုံးပါတီ ဌာနချုပ်ဘက်တွင်မူ စုရုံးလာသော လူအုပ်ကြီးမှာ ပို၍ပင် အံ့ဩစရာ ကောင်းပြီး ယခုအခါ လူတစ်သိန်းကျော် ရှိနေပြီ ဖြစ်သည်။

ယွင်ကျုံးဟဲ့ တစ်ခွန်း အမိန့်ပေးလိုက်သည်နှင့် ဤလူတစ်သိန်းကျော်သည် အုပ်ချုပ်ရေး နန်းတော်အတွင်းသို့ ဝင်ရောက်သွားမှာဖြစ်ပြီး ထိုအချိန်တွင် အာဏာသိမ်းမှု ဖြစ်ပွားလာပေလိမ့်မည်။

သိုင်းပညာဘက်ဆိုင်ရာ အုပ်ချုပ်ရေးမှူးက ပထမ တပ်တော်ကို မြို့တော် အတွင်းသို့ ဝင်ရောက်ပြီး အခြေအနေကို ထိန်းသိမ်းရန် အမိန့်ပေးထားပြီး ဖြစ်သည်။

ပထမ တပ်တော်သည် စတင် စုရုံးနေပြီ ဖြစ်ပြီး မြို့တော် အတွင်းသို့ ဝင်ရောက်ရန် ပြင်ဆင်နေ၏။

သို့ပေမည့် ဗိုလ်ချုပ် အချို့ကလည်း စစ်တပ်၏ သဘောထားကို အသိပေးထားပြီး ဖြစ်သည်။ သူတို့သည် အမိန့်ကို နာခံရန် ဆန္ဒရှိသော်လည်း မလွှဲမရှောင်သာသော အခြေအနေမျိုးသို့ မရောက်မချင်း အင်ပါယာ နိုင်ငံသားများအပေါ် လုံးဝ လက်နက် အသုံးမပြုပါဟု ပြောကြသည်။

သို့ပေမည့် ထင်ထားသည့် အာဏာသိမ်းမှုမျိုး ဖြစ်မလာခဲ့သလို ရှင်းကျုံး ပါတီဝင် တစ်သိန်းကျော်က အုပ်ချုပ်ရေး နန်းတော်ကို ဝင်စီးသည့် ကိစ္စလည်း ဖြစ်မလာခဲ့ပေ။

ယွင်ကျုံးဟဲ့သည် အာဏာသိမ်းမှုကို မပြုလုပ်ရုံသာမက လူတစ်သိန်းကျော်ကို အကြွင်းမဲ့ အာဏာဖြင့် ဖိနှိပ်ထားကာ အာဏာသိမ်းမှု မလုပ်ရန်၊ အုပ်ချုပ်ရေး နန်းတော်ကို မဝင်စီးရန်၊ အထက်လွှတ်တော်ကို မဝင်စီးရန် တားမြစ်ထားခဲ့သည်။

ယွင်ကျုံးဟဲ့၏ ဤသဘောထား ပြသမှုက အုပ်ချုပ်ရေးမှူးများနှင့် အထက်လွှတ်တော်ကို သက်ပြင်းချနိုင် စေခဲ့သလို မြို့တော်ရှိ ပြည်သူများကိုလည်း သက်ပြင်းချနိုင်စေခဲ့၏။

မြို့တော်ရှိ ပြည်သူများသည် ယွင်ကျုံးဟဲ့ကို ကိုးကွယ်ကြသော်လည်း အုပ်ချုပ်ရေးမှူးများနှင့် အထက်လွှ တ်တော်အပေါ်တွင်လည်း သံယောဇဉ် ရှိကြသည်။

သူတို့၏ ရှေးရိုးစွဲ ဖြစ်မှုအပေါ် စိတ်ပျက်ကြသော်လည်း မြို့တော်ရှိ ပြည်သူများသည်လည်း အာဏာသိမ်းမှု ဖြစ်ပွားမည်ကို မမြင်တွေ့လိုကြပေ။

သူတို့သည် အင်ပါယာကို ချစ်မြတ်နိုးကြပြီး မြို့တော် မငြိမ်မသက် ဖြစ်၍ မရသလို အင်ပါယာလည်း မငြိမ်မသက် ဖြစ်၍ မရပေ။ ဤသည်မှာလည်း အင်ပါယာ နိုင်ငံသား အများစု၏ ဆန္ဒပင် ဖြစ်ပြီး ယွင်ကျုံးဟဲ့၏ ဤအမိန့်က လူထု ထောက်ခံမှုကို ထပ်မံ ရရှိခဲ့သည်။

ထို့နောက် ရှင်းကျုံး ပါတီ၏ စာစောင်များ အားလုံး၊ သတင်းစာများ အားလုံးက လီဖူ၏ သေတမ်းစာကို အပြည့်အစုံ ထုတ်ဝေ ဖြန့်ချိလိုက်သည်။ စာတစ်လုံးမှ မပြင်ဆင်ခဲ့သလို လက်ရေးကိုပင် မပြင်ဆင်ခဲ့ပေ။

အင်ပါယာ အထက်လွှတ်တော်က ဤသေတမ်းစာ ဖြန့်ချိမှုကို ပိတ်ပင်ရန် အမိန့်ပေးထားသော်လည်း မြို့တော်ရှိ အဆင့်ဆင့်သော အရာရှိများက အမိန့်ကို အပြည့်အဝ မနာခံခဲ့ကြပေ။ မြို့တော် လုံခြုံရေး တပ်ဖွဲ့မှ စစ်သည်များကလည်း အမိန့်ကို အပြည့်အဝ မနာခံလိုကြချေ။

ထို့ကြောင့် လီဖူ၏ သေတမ်းစာသည် နှင်းပွင့်များကဲ့သို့ အိမ်တိုင်း အိမ်တိုင်းသို့ ပျံ့နှံ့သွားခဲ့၏။ မရေမတွက်နိုင်သော လူများက သေတမ်းစာ၏ အပြည့်အစုံကို မြင်တွေ့ခဲ့ရသည်။

ဤသည်မှာ အလွန် အင်အားကြီးမားသော နိုင်ငံရေး လက်နက်တစ်ခုဖြစ်ပြီး မြင်တွေ့ရသူတိုင်းက တုန်လှုပ်သွားကြကာ မျက်ရည်များ ကျဆင်းလာကြ၏။

အမတ်ကြီး လီဖူ ကိုယ့်ကိုယ်ကိုယ် သတ်သေခြင်းသည် သူ၏ အပြစ်ကင်းစင်မှုကို သက်သေပြရန်အတွက် ဖြစ်သည်ဟု လူတိုင်းက ထင်မှတ်ခဲ့ကြသော်လည်း လုံးဝ မဟုတ်ပေ။

သူ၏ သေဆုံးမှုသည် အင်ပါယာအတွက် ဖြစ်ပြီး ယွင်ကျုံးဟဲ့ကို အသက်ပေး၍ အကြံပေးရန်အတွက် ဖြစ်သည်။ အာဏာသိမ်းမှု မလုပ်ရန်၊ လူအများစုကို စည်းရုံးရန်၊ အင်ပါယာ မငြိမ်မသက် မဖြစ်စေရန်အတွက် ဖြစ်သည်။

‘ဒါက ဘယ်လောက် ကြီးကျယ်တဲ့ စိတ်ထားလဲ။ ဒါက ဘယ်လောက် မြင့်မားတဲ့ ကိုယ်ကျင့်တရားလဲ။ တစ်လောကလုံးက ပြည်သူတွေကို ကြည်နူးစေခဲ့တယ်။’

ထိုမျှမက အင်ပါယာ ပြည်သူ အားလုံးသည် တာ့ရှန်း မိစ္ဆာနိုင်ငံ၏ အမှောင် ခြိမ်းခြောက်မှုကိုလည်း ထပ်မံ၍ ခံစားလိုက်ရပြန်၏။

အဘယ်ကြောင့်ဆိုသော် လီဖူ၏ သေတမ်းစာတွင် ဤသည်မှာ ယဉ်ကျေးမှု ပျက်စီးမည့် အန္တရာယ် ဖြစ်ကြောင်း ရှင်းလင်းစွာ ရေးသားထားသောကြောင့် ဖြစ်သည်။

တာ့ရှန်း မိစ္ဆာနိုင်ငံ၏ အမှောင် တပ်တော်သည် အလွန် အင်အားကြီးမားပြီး ယဉ်ကျေးမှုလောက တစ်ခုလုံးကို ဖျက်ဆီးပစ်ရန် ရည်ရွယ်ထားကြောင်း၊ တာ့ယန် အင်ပါယာသစ်သည် မိုင်ပေါင်း သောင်းချီ ကွာဝေးသော်လည်း ရှောင်လွှဲနိုင်မည်ဟု မထင်မှတ်သင့်ကြောင်း ရေးသားထား၏။

အမတ်ကြီး လီဖူသည် သူ၏ သေဆုံးမှုကို အသုံးပြု၍ အင်ပါယာရှိ မရေမတွက်နိုင်သော လူများကို တာ့ရှန်း မိစ္ဆာနိုင်ငံ၏ အမှောင်အင်အားကြီးမားမှု အကြောင်းကို ပထမဆုံးအကြိမ် အနေဖြင့် နက်ရှိုင်းစွာ မှတ်မိသွားစေခဲ့သည်။

ပြည်သူများသာမက အင်ပါယာ၏ အဆင့်ဆင့်သော အရာရှိများလည်း ပြင်းထန်သော ထိုးနှက်မှုကို ခံလိုက်ရသည်။ လူတိုင်းက မိမိတို့၏ ရပ်တည်ချက်ကို ပြန်လည် စဉ်းစား သုံးသပ်ရတော့မှာဖြစ်၏။

‘တရားမျှတမှုက ဘယ်ဘက်မှာ ရှိနေလဲ။’

ထို့နောက် အင်ပါယာက လီဖူ၏ လာဘ်စားမှု အမှုကို လူသိရှင်ကြား စစ်ဆေးခြင်း စတင်သည်။

………………..