အခန်း ၃

အခန်း ၃ မှော်သားရဲမီးဝံပုလွေ၊ မှော်ပညာကို ကောက်ယူရရှိခြင်း။

"ကျက်သရေမရှိလိုက်တာ... မှော်သားရဲမီးဝံပုလွေဖြစ်နေတာပဲ... ဒုက္ခပါပဲလား..."

တပ်ဖွဲ့ခေါင်းဆောင် ဟာဒက်စ်က ပစ်လွှတ်လိုက်သော မီးလုံးကြီးကို ဓားဖြင့် ထက်ပိုင်းခုတ်ဖြတ်လိုက်ပြီး အသံကျယ်ကြီးဖြင့် အော်ဟစ်လိုက်သည်။

"မင်းတို့ တခြားသားရဲတွေကို သွားရှင်းကြ... ဒီမီးဝံပုလွေကို ငါ့ဘာသာ ကိုင်တွယ်လိုက်မယ်..."

စကားဆုံးသည်နှင့် သူသည် ဓားရှည်ကြီးကို ကိုင်ဆောင်ကာ ရှေ့သို့ ပြေးထွက်သွားတော့သည်။ မှော်သားရဲများသည် သာမန်သားရဲများနှင့် လုံးဝမတူညီချေ။ ခန္ဓာကိုယ်ကြံ့ခိုင်မှုသည် သာမန်သားရဲများထက် များစွာသာလွန်နေရုံသာမက မှော်ပညာကိုပါ အသုံးပြုနိုင်ကြပြီး ဖျက်ဆီးနိုင်စွမ်းမှာလည်း အလွန်တရာ အံ့မခန်းဖြစ်လှသည်။

သားရဲလှိုင်းလုံးများအတွင်း မှော်သားရဲများ ပါဝင်လာပြီဆိုပါက သားရဲလှိုင်းလုံး၏ အန္တရာယ်ရှိမှု အဆင့်သည် သိသိသာသာ မြင့်တက်သွားပြီဖြစ်ကြောင်း အဓိပ္ပာယ်သက်ရောက်ပေသည်။

'ဒင် ဒင် ဒင်...'

ဤမီးဝံပုလွေမှာ ထင်ထားသည့်အတိုင်း သာမန်မဟုတ်ချေ။ ဟာဒက်စ်၏ လက်ထဲရှိ ဓားကြီးနှင့် မီးဝံပုလွေ၏ ခြေသည်းများ ရိုက်ခတ်သွားတိုင်း မီးပွားများ ဆက်တိုက် လွင့်စင်ထွက်သွားရုံမှလွဲ၍ မီးဝံပုလွေကို မည်သည့် ထိခိုက်ဒဏ်ရာမှ မပေးနိုင်ခဲ့ပေ။

အခြားတစ်ဖက်တွင်မူ မီးဝံပုလွေသည် ဟာဒက်စ်နှင့် အနီးကပ် တိုက်ခိုက်နေရင်း လူတစ်ယောက်၏ ခေါင်းအရွယ်အစားခန့်ရှိသော မီးလုံးကြီးများကို မှုတ်ထုတ်ကာ ရုတ်တရက် တိုက်ခိုက်နေသည်။ ဟာဒက်စ်မှာ တိုက်ရိုက် မခုခံဝံ့သဖြင့် ဓားကြီးကို ဝှေ့ယမ်းကာ မီးလုံးကြီးများကို ခုတ်ခွဲပစ်နေရသည်။

သို့သော် တစ်ချက် ပိုင်းဖြတ်လိုက်တိုင်း ဓားကြီးပေါ်ရှိ အဝါနုရောင် အလင်းဝန်းမှာ အနည်းငယ်စီ ပါးလွှာသွားသည်။ ဤအခြေအနေအတိုင်းသာ ဆက်သွားနေပါက အကြိမ်အနည်းငယ်မျှပင် ခုတ်ခွဲနိုင်မည်မဟုတ်ဘဲ အဝါနုရောင် အလင်းဝန်းမှာ ပျောက်ကွယ်သွားတော့မည် ဖြစ်သည်။

"တပ်ဖွဲ့ခေါင်းဆောင်... အားတင်းထားပါ..."

"ဒီမီးဝံပုလွေကို သတ်ပစ်လိုက်ပါ..."

အစောင့်တပ်ဖွဲ့ဝင်များသည် ထိုအချက်ကို သတိမထားမိကြချေ။ သူတို့သည် သားရဲများကို အစွမ်းကုန် ခုခံနေရင်း သူတို့၏ တပ်ဖွဲ့ခေါင်းဆောင်ကို အားပေးအားမြှောက် ပြုနေကြသည်။

မီးဝံပုလွေသည် မှော်သားရဲ ဖြစ်သော်လည်း အားအနည်းဆုံး အဆင့် ၁ မှော်သားရဲမျှသာ ဖြစ်သည်။ သူတို့၏ တပ်ဖွဲ့ခေါင်းဆောင်သည် အဆင့် ၂ စစ်သည်တော်တစ်ဦး ဖြစ်ရာ မီးဝံပုလွေတစ်ကောင်ကို ရင်ဆိုင်ရသည်မှာ လက်တစ်ဖက်တည်းဖြင့် ဖမ်းယူနိုင်သကဲ့သို့ လွယ်ကူလိမ့်မည်ဟု ယုံကြည်နေကြသည်။

"ကျက်သရေမရှိလိုက်တာ..."

"ဒါ သာမန်မီးဝံပုလွေ မဟုတ်ဘူး..."

ဟာဒက်စ်မှာမူ အံ့အားသင့်ကာ ဒေါသထွက်နေမိသည်။ ဤအရာမှာ သာမန်မီးဝံပုလွေ ဘယ်ဟုတ်ပါမည်နည်း။ အဆင့် ၂ မှော်သားရဲအဖြစ် ဆင့်ကဲပြောင်းလဲထားပြီးဖြစ်သော မီးဝံပုလွေဘုရင်ကြီး ဖြစ်နေကြောင်း သိသာလှသည်။

အပြင်ပန်းသွင်ပြင်မှာ ကွဲပြားမှု မရှိသော်လည်း အမှန်တကယ် တိုက်ခိုက်ရေးစွမ်းအားမှာ များစွာ ကွာဟနေသည်။ မီးဝံပုလွေဘုရင်၏ အမြန်နှုန်း ခွန်အားနှင့် လျင်မြန်ဖြတ်လတ်မှုများသည် သာမန်မီးဝံပုလွေများနှင့် လုံးဝ ယှဉ်ယှဉ်နိုင်စရာ မရှိပေ။

ထို့အပြင် တူညီသော အဆင့်ရှိသည့်တိုင်အောင် မှော်သားရဲများသည် လူသားများထက် ပို၍ စွမ်းအားကြီးမားလေ့ရှိကြသည်။ ဟာဒက်စ်သည် အဆင့် ၂ စစ်သည်တော်တစ်ဦးမျှသာ ဖြစ်ပြီး သူလေ့ကျင့်ထားသော တိုက်ခိုက်ရေးစွမ်းအင် ကျင့်စဉ်မှာလည်း လမ်းဘေးပေါချောင်ကောင်အဆင့်မျှသာ ဖြစ်ရာ မီးဝံပုလွေဘုရင်၏ ပြိုင်ဘက် မည်သို့မျှ မဖြစ်နိုင်ချေ။

ဟာဒက်စ်၏ နဖူးပေါ်တွင် ချွေးစေးများ ပျံကျလာပြီး ယနေ့အတွက် သူ၏ ကံကြမ္မာမှာ အကောင်းထက် အဆိုးက ပိုများနေပြီဖြစ်ကြောင်း ခံစားလိုက်ရသည်။

"တော်... တော်တော် အစွမ်းထက်တာပဲ..."

မုန်လဲ့သည်လည်း ပြင်းထန်စွာ တိုက်ခိုက်နေသော တပ်ဖွဲ့ခေါင်းဆောင် ဟာဒက်စ်နှင့် မီးဝံပုလွေကို စိုက်ကြည့်နေပြီး သူ၏ မျက်လုံးများထဲတွင် အံ့ဩတုန်လှုပ်မှုများ ပြည့်နှက်နေသည်။

သူ၏ အမြင်တွင် မီးဝံပုလွေဘုရင်ဖြစ်စေ တပ်ဖွဲ့ခေါင်းဆောင် ဟာဒက်စ်ဖြစ်စေ စူပါမင်းများနှင့်ပင် တူနေတော့သည်။ တစ်ချက်ခုန်လိုက်သည်နှင့် ၅ မီတာ ၆ မီတာခန့် မြင့်တက်သွားသည်။ ဓားတစ်ချက် ခုတ်ချလိုက်တိုင်း မြေပြင်ပေါ်တွင် အက်ကွဲကြောင်းကြီးတစ်ခု ဖြစ်ပေါ်သွားသည်။ မီးလုံးတစ်လုံးသည် ဗုံးတစ်လုံးနှင့်ပင် ညီမျှနေသည်။

'ဒါ... ဒါ လူတွေရော ဟုတ်သေးရဲ့လား...'

'ဒင်... ကျလာသော ပစ္စည်းကို တွေ့ရှိပါသည်... ကောက်ယူမည်လား...'

သူ၏ နားထဲတွင် စနစ်၏ အေးစက်စက် အသံ ထွက်ပေါ်လာပြီး မီးဝံပုလွေဘုရင်၏ ကိုယ်ပေါ်မှ အနီရောင် အလင်းတန်းလေးတစ်ခု ကျလာသည်။

'မီးဝံပုလွေဆီက ကျလာတာလား...'

'မှော်သားရဲဆီကလည်း ပစ္စည်းတွေ ကျတတ်တာလား...'

မုန်လဲ့မှာ ခေတ္တမျှ မှင်သက်သွားပြီး အလွန်အမင်း အံ့အားသင့်သွားသည်။

'ဒါက မှော်သားရဲကြီးလေ... ဘာတွေများ ကျလာတာလဲ မသိဘူး...'

"ကောက်မယ်..."

'ဒင်... ပေါင်းစည်းခြင်း အောင်မြင်ပါသည်... အဆင့် ၁ မှော်ပညာ မီးလုံးအတတ် ကို ရရှိပါသည်...'

ဦးနှောက်ထဲမှ ထွက်ပေါ်လာသော စနစ်၏ အသိပေးသံကြောင့် မုန်လဲ့မှာ အံ့အားသင့်မှုများ ဆက်တိုက် ဖြစ်ပေါ်သွားရသည်။

'မီးလုံးအတတ်လား... ဒီတစ်ကြိမ် ကျလာတာက မှော်ပညာကြီးလား... မှော်ပညာကိုတောင် ကောက်ယူလို့ရတာလား...'

မုန်လဲ့မှာ အရူးအမူး ဝမ်းသာပျော်ရွှင်သွားတော့သည်။ လူသားမျိုးနွယ်တွင် နဂါးများကဲ့သို့ သန်မာသော ခန္ဓာကိုယ် မရှိပေ။ တိုက်တန်ကြီးများကဲ့သို့ ကြီးမားသော ခွန်အားများလည်း မရှိချေ။ အဲလ်ဖ်များကဲ့သို့ မှော်ပညာ ပါရမီလည်း မရှိသလို အခြားသော မျိုးနွယ်စုများ၏ ကိုယ်ပိုင်ထူးခြားစွမ်းအင်များလည်း မရှိကြချေ။

ချဲ့ကားပြောဆိုခြင်း မဟုတ်ဘဲ လူသားမျိုးနွယ်သည် ကောင်းကင်ယံတိုက်ကြီး၏ အားအနည်းဆုံး ဉာဏ်ရည်မြင့် မျိုးနွယ်စုများထဲမှ တစ်ခုဖြစ်သည်။ စွမ်းအားကြီးမားချင်ပါက တိုက်ခိုက်ရေးစွမ်းအင်နှင့် မှော်ပညာမှလွဲ၍ အခြားရွေးချယ်စရာ လမ်းကြောင်း မရှိချေ။

ဝမ်းနည်းစရာကောင်းသည်မှာ လက်အောက်ခံ မျိုးနွယ်စုတစ်ခု ဖြစ်နေသဖြင့် လူ ၉၀ ရာခိုင်နှုန်းသည် တစ်သက်လုံး တိုက်ခိုက်ရေးစွမ်းအင်နှင့် မှော်ပညာကို ထိတွေ့ခွင့်ပင် မရကြချေ။ လေ့ကျင့်ရန်ဆိုသည်မှာ ဝေလာဝေးပင် ဖြစ်သည်။

မှော်သားရဲရွာလေးမှာမူ ကံကောင်းသည်ဟု ဆိုရမည်။ အဆင့် ၂ စစ်သည်တော်ဖြစ်သော ဟာဒက်စ်၏ လမ်းညွှန်သင်ကြားမှုများ ရှိနေသဖြင့် ရွာသားများ၏ ယေဘုယျ စွမ်းအားမှာ ပတ်ဝန်းကျင်ရှိ ရွာဆယ်ရွာခန့်တွင် အမြင့်မားဆုံး ဖြစ်သည်။ သို့တိုင်အောင် တိုက်ခိုက်ရေးစွမ်းအင်ကို အမှန်တကယ် လေ့ကျင့်နိုင်သူမှာ ဟာဒက်စ် တစ်ယောက်တည်းသာ ရှိနေဆဲဖြစ်သည်။

မုန်လဲ့အနေဖြင့်လည်း တိုက်ခိုက်ရေးစွမ်းအင်နှင့် မှော်ပညာများကို လေ့ကျင့်လိုစိတ် ပြင်းပြနေပြီး စွမ်းအားကြီးမားသူတစ်ဦး ဖြစ်လာကာ ပို၍ ကောင်းမွန်စွာ အသက်ရှင်သန်ခွင့် ရလိုပေသည်။

သို့သော် ရက်စက်လှသော အမှန်တရားက သူ့ကို သတိပေးနေသည်။ နေခင်းကြောင်တောင် အိပ်မက်မက်နေခြင်းသာ ဖြစ်သည်။

သူ၏ ခန္ဓာကိုယ်မှာ အလွန်တရာ အားနည်းလွန်းနေသဖြင့် တိုက်ခိုက်ရေးစွမ်းအင်ကို လေ့ကျင့်ရန် လုံးဝ မသင့်တော်ချေ။ မှော်ပညာနှင့် ပတ်သက်၍လည်း သူ့တွင် မှော်ပညာ ပါရမီ ရှိနေပါသလော။ မှော်ပညာကို မည်သည့်နေရာတွင် သွားရောက် သင်ယူရမည်နည်း။

တိုက်ခိုက်ရေးစွမ်းအင်ကိုလည်း လေ့ကျင့်၍ မရချေ။ မှော်ပညာ သင်ယူရန် နေရာလည်း မရှိပေ။ မုန်လဲ့မှာ မျှော်လင့်ချက်မဲ့လုနီးပါး ဖြစ်နေခဲ့ပြီ ဖြစ်သည်။ သို့သော် ဤကဲ့သို့ ဖောက်ပြန်နေသော စနစ်ကြီးက မှော်ပညာကိုပင် ကောက်ယူနိုင်လိမ့်မည်ဟု သူ လုံးဝ မထင်မှတ်ထားခဲ့ချေ။

'အဆင့် ၁ မှော်ပညာ မီးလုံးအတတ်...'

မုန်လဲ့က ချက်ချင်းပင် ဝင်ရောက်စစ်ဆေးလိုက်ရာ မီးလုံးအတတ်နှင့် ပတ်သက်သော အချက်အလက်များ ထုတ်လွှတ်သည့် နိယာမများနှင့် ဖျက်ဆီးနိုင်စွမ်း အစရှိသည်တို့ကို ချက်ချင်း နားလည်သဘောပေါက်သွားသည်။

'စမ်းကြည့်ရမလား...'

မုန်လဲ့က အသက်ကို ပြင်းပြင်းရှူသွင်းလိုက်ပြီး ညာဘက်လက်ကို မြှောက်လိုက်သည်။ ဘာတုံ့ပြန်မှုမှ မရှိချေ။

မုန်လဲ့မှာ မှင်သက်သွားသည်။

'ဘာအခြေအနေလဲ... ငါ ကောက်ရလာတဲ့ မီးလုံးအတတ်က အတုကြီးများလား...'

'ဒင်... မိတ်ဆွေအဖြစ် သတိပေးချက်... မှော်ပညာကို ထုတ်လွှတ်ရန် မှော်စွမ်းအင်နှင့် စိတ်စွမ်းအင်ကို အသုံးပြုရန် လိုအပ်ပါသည်... နှစ်ခုလုံး မရှိမဖြစ် လိုအပ်ပါသည်...'

စနစ်၏ သတိပေးသံ ထွက်ပေါ်လာသည်။

'မှော်စွမ်းအင်လား... စိတ်စွမ်းအင်လား...'

မုန်လဲ့မှာ ဆွံ့အသွားပြီး စနစ်မျက်နှာပြင်အချက်အလက်ပေါ်ရှိ မှော်စွမ်းအင် ကဏ္ဍတွင် ကြီးမားသော သုညဂဏန်းကြီး တစ်လုံး ရှိနေသည်ကို ထိုအခါမှ သတိထားမိလိုက်သည်။ ဆိုလိုသည်မှာ သူ၏ ခန္ဓာကိုယ်ထဲတွင် မှော်စွမ်းအင် အနည်းငယ်မျှပင် မရှိခြင်း ဖြစ်သည်။

'ဒါကြောင့် မီးလုံးအတတ်ကို ထုတ်လွှတ်လို့ မရတာကိုး...'

မုန်လဲ့က သက်ပြင်းချလိုက်မိသည်။

'အနည်းဆုံးတော့ ကောက်ရလာတဲ့ မီးလုံးအတတ်က အတုမဟုတ်ဘူးပဲ... ဒါပေမယ့် မှော်စွမ်းအင်ကို ဘယ်ကနေ သွားရှာရမလဲ...'

'ဒင်... ကျလာသော ပစ္စည်းကို တွေ့ရှိပါသည်... ကောက်ယူမည်လား...'

မီးဝံပုလွေဘုရင်၏ ကိုယ်ပေါ်မှ အနီရောင် အလင်းတန်းလေးတစ်ခု ထပ်ကျလာပြန်သည်။

"ကောက်မယ်..."

'ဒင်... ပေါင်းစည်းခြင်း အောင်မြင်ပါသည်... ပိုင်ရှင်၏ မှော်စွမ်းအင် ၁ မှတ် တိုးလာပါသည်...'

'မှော်... မှော်စွမ်းအင် ၁ မှတ် တိုးလာတာလား...'

'ဒီတစ်ကြိမ်က မှော်စွမ်းအင်လား...'

ချက်ကြိုးအောက် နေရာမှ နွေးထွေးသော ခံစားမှုတစ်ခု ထွက်ပေါ်လာရာ အရက်ပြင်းပြင်းကို သောက်သုံးလိုက်ရသည့်အလား ပင်။ ၎င်းမှာ ယခုလေးတင် ပေါင်းစည်းလိုက်သော မှော်စွမ်းအင် ဖြစ်ကြောင်း မုန်လဲ့ သိလိုက်သည်။

သူက ညာဘက်လက်ကို မြှောက်လိုက်သည်။ ဤတစ်ကြိမ်တွင်မူ တုံ့ပြန်မှု ရှိလာခဲ့ပြီ ဖြစ်သည်။

လက်ဖဝါးထဲတွင် မီးပွင့်လေးတစ်ခု လေထဲမှ ရုတ်တရက် ထွက်ပေါ်လာပြီး လျင်မြန်စွာ ကြီးထွားလာကာ အသက်ရှူကြိမ် အနည်းငယ်အတွင်းမှာပင် ကျွဲကောသီး အရွယ်အစားခန့်အထိ ကြီးမားလာသည်။

မီးလုံးလေးမှာ မကြီးမားလှဘဲ ယိမ်းယိုင်နေသော်လည်း အလွန်ပြင်းထန်သော အပူချိန်ကို ထုတ်လွှတ်နေရာ မီးလုံးလေးအတွင်း၌ ကြောက်မက်ဖွယ် စွမ်းအင်များ ပါဝင်နေကြောင်း မည်သူမျှ သံသယဝင်ရဲမည် မဟုတ်ချေ။

'မှော်ပညာ...'

'ဒါ မှော်ပညာပဲ...'

မုန်လဲ့၏ သွေးများ ဆူပွက်လာသည်အထိ စိတ်လှုပ်ရှားသွားပြီး ဤခံစားချက်ကြီးကို စကားလုံးများဖြင့် ဖော်ပြရန်ပင် ခက်ခဲလှသည်။

အားတက်ဖွယ်ရာ...

စိတ်လှုပ်ရှားဖွယ်ရာ...

ဤသည်မှာ လုံးဝကို ကွဲပြားခြားနားသော အတွေ့အကြုံသစ် တစ်ခုပင် ဖြစ်သည်။ ဝမ်းနည်းစရာကောင်းသည်မှာ မီးလုံးလေးမှာ အချိန်ကြာကြာ မခံလိုက်ဘဲ မီးခိုးငွေ့များအဖြစ် ပြောင်းလဲကာ လေထဲတွင် လွင့်စင်ပျောက်ကွယ်သွားတော့သည်။

မုန်လဲ့၏ ကိုယ်ပေါ်သို့ အားနည်းမှုတစ်ခု ရိုက်ခတ်လာပြီး ခန္ဓာကိုယ်အတွင်းရှိ အရာအားလုံး စုပ်ယူခံလိုက်ရသည့်အလား ဟာလာဟင်းလင်း ဖြစ်သွားသည်။

"တောက်... မှော်စွမ်းအင်တွေ ကုန်သွားပြီ..."