အခန်း ၇

အခန်း ၇ အင်ပါယာကြီးလေးခု၊ လူတန်းစားလေးရပ်စနစ်။

အရက်မှာ စပ်ဖျဉ်းဖျဉ်းဖြစ်ပြီး ခါးသက်သက်ဖြစ်နေကာ အနည်းငယ် နောက်ကျိနေပြီး အရသာမှာလည်း အလွန်ဆိုးရွားလှရာ အရက်ကြမ်းလောက်ပင် မကောင်းချေ။

မုန်လဲ့က အနည်းငယ် ရွံရှာသွားသော်လည်း တစ်ငုံနှစ်ငုံခန့် မြည်းစမ်းကြည့်လိုက်သည်။ ကူးပြောင်းလာခဲ့သည်မှာ တစ်လရှိနေပြီဖြစ်ပြီး နေ့တိုင်း ရေအေးနှင့် အသားခြောက်များသာ စားနေရသဖြင့် အန်ထွက်ချင်လာပြီ ဖြစ်သည်။

ယခု နောက်ဆုံးတော့ အရက်သောက်ခွင့် ရပြီဖြစ်ရာ မသောက်ဘဲ မည်သို့ နေနိုင်မည်နည်း။

"ဖြည်းဖြည်းသောက်ဦး... ငါ့အတွက်လည်း ချန်ထားဦး..."

တပ်ဖွဲ့ခေါင်းဆောင် ဟာဒက်စ်က ရယ်မောရင်း ဆူပူလိုက်သည်။

"ဒါက ခရီးသွားကုန်သည်တွေဆီကနေ ရွှေပြား ၁ ပြား ပေးပြီး ဝယ်လာခဲ့ရတာ... ဒီတစ်ဘူးပဲ ရှိတယ်... ကုန်သွားရင် ထပ်မရှိတော့ဘူး..."

"သိပါတယ်..."

အရက် သုံးခွက်ခန့် သောက်ပြီးနောက် အသားကင်များလည်း တစ်ဝက်ခန့် ကုန်သွားခဲ့ပြီ ဖြစ်သည်။

တောဝက်ကြီး၏ တစ်ဝက်ခန့်သည် တပ်ဖွဲ့ခေါင်းဆောင် ဟာဒက်စ်နှင့် မုန်လဲ့တို့၏ ဗိုက်ထဲသို့ ရောက်ရှိသွားခဲ့ပြီ ဖြစ်သည်။ လူနှစ်ယောက်လုံး တံခါးပေါက်တွင် မှီထိုင်ရင်း တစ်ခွန်းတစ်ပါဒစီ ပြောဆိုနေကြရာ အလွန်တရာ သက်သောင့်သက်သာ ဖြစ်နေတော့သည်။

"မုန်လဲ့... မင်းမှာ မှော်ပညာ ပါရမီ ရှိနေတော့ သေချာ ကြိုးစားဖို့ မမေ့နဲ့... ဒါက မင်းရဲ့ ကံကြမ္မာကို ပြောင်းလဲပေးနိုင်မယ့် အခွင့်အရေးပဲ... လုံးဝ လက်လွတ်မခံလိုက်နဲ့..."

ဟာဒက်စ်၏ မျက်လုံးများက နက်ရှိုင်းသွားသည်။

"ငါ အရင်က စစ်တပ်ထဲ ဝင်ဖူးတယ်... နေရာအများကြီးကိုလည်း ရောက်ဖူးတယ်... ငါက ရွာမှာတော့ ဗဟုသုတ အကြွယ်ဝဆုံးလူပဲ..."

"အင်း..."

မုန်လဲ့က တိတ်တဆိတ် ခေါင်းညိတ်လိုက်သည်။

"လူအများစုက လေ့ကျင့်ရေးကျင့်စဉ်တွေနဲ့ အလှမ်းဝေးနေကြတော့ မှော်ပညာကို မသင်ယူနိုင်ကြဘူး... ဒါပေမယ့် မှော်ပညာကို လေ့ကျင့်ဖို့က ပါရမီ လိုအပ်တယ်... မှော်ပညာ ပါရမီ မရှိရင် လေ့ကျင့်ရေးကျင့်စဉ် ရှိနေရင်တောင် အဆင့်မြင့် မှော်ဆရာတစ်ယောက် ဖြစ်လာနိုင်မှာ မဟုတ်ဘူး..."

တပ်ဖွဲ့ခေါင်းဆောင် ဟာဒက်စ်က မုန်လဲ့ကို တည့်တည့် စိုက်ကြည့်နေသည်။

"မင်းကတော့ ငါတို့ အားလုံး မသိလိုက်ခင်မှာပဲ မှော်ဆရာတစ်ယောက် ဖြစ်လာခဲ့တယ်... မင်းဆီမှာ အလွန်တရာ အံ့ဩဖို့ကောင်းတဲ့ မှော်ပညာ ပါရမီ ရှိနေလောက်တယ်..."

တပ်ဖွဲ့ခေါင်းဆောင် ဟာဒက်စ်မှာ ဤကိစ္စကို ဖော်ပြရန် သင့်တော်သော စကားလုံးကိုပင် ရှာမတွေ့တော့ချေ။

မယုံကြည်နိုင်စရာ...

အံ့ဩတုန်လှုပ်စရာ...

အလွန်အမင်း အံ့ဩစရာ...

သို့သော် သေချာသည်မှာ မုန်လဲ့တွင် အလွန်တရာ ကောင်းမွန်သော မှော်ပညာ ပါရမီ ရှိနေခြင်းပင် ဖြစ်သည်။ ဤသည်မှာ မရေမတွက်နိုင်သော လူများက အိပ်မက်မက်ပြီး လိုချင်နေကြသော အဖိုးတန် ပါရမီပင် ဖြစ်သည်။

'ငါ့မှာ မှော်ပညာ ပါရမီ ရှိနေတာလား...'

မုန်လဲ့၏ ရင်ထဲတွင်မူ ဗျာများနေတော့သည်။

"မုန်လဲ့... သေချာ မှတ်ထား... အခွင့်အရေးကို သေချာ ဆုပ်ကိုင်ထားဖို့ မမေ့နဲ့..."

ဟာဒက်စ်က အရက်ချဉ်သံကြီးဖြင့် လေတက်လိုက်ပြီး အနည်းငယ် မူးယစ်နေပုံရသည်။

"မင်း သိသင့်တယ်... ငါတို့ရွာက မီးနဂါးတိုင်းပြည်ရဲ့ လက်အောက်ခံဖြစ်ပြီး မီးနဂါးတိုင်းပြည်ကလည်း နဂါးနတ်ဘုရားအင်ပါယာရဲ့ လက်အောက်ခံ တိုင်းပြည်တွေထဲက တစ်ခုဖြစ်တယ်..."

မုန်လဲ့က တိတ်တဆိတ် ခေါင်းညိတ်လိုက်သည်။

ကောင်းကင်ယံတိုက်ကြီးပေါ်တွင် မျိုးနွယ်စုများ အမြောက်အမြား ရှိနေသည်။

ထိုအထဲတွင် အစွမ်းအထက်ဆုံးနှင့် ရှေးအကျဆုံး မျိုးနွယ်စုများမှာ ဉာဏ်ရည်မြင့် မျိုးနွယ်စုကြီး ၄ ခု ဖြစ်သည့် နဂါး တိုက်တန် အဲလ်ဖ် နှင့် သားရဲလူသား မျိုးနွယ်စုများပင် ဖြစ်သည်။

ဉာဏ်ရည်မြင့် မျိုးနွယ်စုကြီး ၄ ခုသည် ကောင်းကင်ယံတိုက်ကြီးကို ကြီးစိုးထားပြီး ကောင်းကင်ယံတိုက်ကြီး၏ နယ်မြေထက်ဝက်ကျော်ကို သိမ်းပိုက်ထားကာ ကောင်းကင်ယံတိုက်ကြီးကို နှစ်ပေါင်း တစ်သောင်းကျော်တိုင်အောင် အုပ်စိုးလာခဲ့သည့် အင်ပါယာကြီး ၄ ခုကို တည်ထောင်ထားကြသည်။

နဂါးနတ်ဘုရားအင်ပါယာ...

တိုက်တန်အင်ပါယာ...

အဲလ်ဖ်အင်ပါယာ...

သားရဲလူသားအင်ပါယာ...

ထိုအထဲတွင် နဂါးနတ်ဘုရားအင်ပါယာသည် ကောင်းကင်ယံတိုက်ကြီး၏ အရှေ့ဘက်တွင် တည်ရှိပြီး အရှေ့ဘက်တွင် အဆုံးအစမရှိသော ပင်လယ်နက်ကြီး ရှိကာ အနောက်ဘက်တွင် မှော်သားရဲတောင်တန်းကြီး ရှိသည်။ ၎င်း၏ လက်အောက်တွင် တိုင်းပြည် ၁၅ ခုနှင့် နယ်စားပယ်စား နယ်မြေ ၄၈ ခု ရှိပြီး နဂါးများ အုပ်စိုးသော မျိုးနွယ်စုစုံ အင်ပါယာတစ်ခု ဖြစ်သည်။

"နဂါးတွေက ခန္ဓာကိုယ် အရမ်းကြံ့ခိုင်ပြီး နဂါးဘာသာစကား မှော်ပညာကိုလည်း ကျွမ်းကျင်ကြတယ်... သူတို့က တိုက်ကြီးပေါ်မှာ အစွမ်းအထက်ဆုံး မျိုးနွယ်စုတွေထဲက တစ်ခုပဲ... ဒါပေမယ့် နဂါးမျိုးဆက် သွေးကြောတွေက အရမ်း အစွမ်းထက်လွန်းတော့ မျိုးပွားနှုန်းက အရမ်းကို နိမ့်ကျတယ်..."

ဟာဒက်စ်၏ အသံမှာ အနည်းငယ် အက်ကွဲနေသည်။

"နဂါးနတ်ဘုရားအင်ပါယာ တစ်ခုလုံးမှာ သွေးသန့်တဲ့ နဂါးအရေအတွက်က အရမ်းကို နည်းပါးတယ်... ဒါကြောင့် အုပ်ချုပ်ရ လွယ်ကူအောင် နဂါးနတ်ဘုရားအင်ပါယာက သူတို့ လက်အောက်က မျိုးနွယ်စုတွေကို လူတန်းစား ၄ ရပ် ခွဲခြားထားတယ်..."

"လူတန်းစား ၄ ရပ်လား..."

မုန်လဲ့၏ စိတ်အာရုံ လန်းဆန်းသွားသည်။

"လူတန်းစား ၄ ရပ်စနစ် လို့လည်း ခေါ်တယ်..."

တပ်ဖွဲ့ခေါင်းဆောင် ဟာဒက်စ်က ခါးသီးစွာ ပြုံးလိုက်သည်။

"လူတန်းစား ၄ ရပ်က လုံးဝ ကွဲပြားခြားနားတဲ့ လူမှုအဆင့်အတန်း ၄ ခုကို ကိုယ်စားပြုသလို လုံးဝ ကွဲပြားခြားနားတဲ့ ဥပဒေအခွင့်အရေးတွေနဲ့ မျိုးနွယ်စု တာဝန်တွေကိုလည်း ကိုယ်စားပြုတယ်..."

"ပထမတန်းစားက သွေးသန့်တဲ့ နဂါးမျိုးနွယ်စု... သူတို့က မွေးရာပါ မှူးမတ်တွေပဲ... မွေးလာတာနဲ့ အင်ပါယာရဲ့ မြို့စားအဖြစ် ခန့်အပ်ခံရတယ်... ကြီးမားတဲ့ နယ်မြေပိုင်ဆိုင်ရုံတင် မကဘူး... ငါတို့ အိပ်မက်ထဲမှာတောင် မက်ခွင့်မရတဲ့ အထူးအခွင့်အရေးတွေကိုလည်း ခံစားရတယ်..."

ပထမတန်းစား - သွေးသန့်တဲ့ နဂါးမျိုးနွယ်စု...

မွေးရာပါ မှူးမတ်များ...

မွေးလာသည်နှင့် မြို့စားများ ဖြစ်လာခြင်း...

မုန်လဲ့က ထိုအချက်အလက်များကို တိတ်တဆိတ် မှတ်သားထားလိုက်ပြီး ထပ်မေးလိုက်သည်။

"ဒုတိယတန်းစားကရော ဘယ်မျိုးနွယ်စုလဲ..."

"ဒုတိယတန်းစားက နဂါးနွယ်ဖွား မျိုးနွယ်စုတွေပဲ..."

ဟာဒက်စ်က သက်ပြင်းချကာ ပြောလိုက်သည်။

"နဂါးတွေက သဘာဝအရ ကာမဂုဏ်ကို ခုံမင်ကြတယ်... သွေးသန့်တဲ့ နဂါးတွေက သူတို့ရဲ့ မျိုးပွားနှုန်း နိမ့်ကျတဲ့ ပြဿနာကို ဖြေရှင်းဖို့အတွက် အရှက်အကြောက်မရှိတဲ့ ကိစ္စတွေကို မကြာခဏ လုပ်တတ်ကြတယ်... ဒါကြောင့် နဂါးမျိုးဆက် သွေးကြောတွေ ပါဝင်နေတဲ့ ကပြားမျိုးဆက်တွေ အမြောက်အမြား မွေးဖွားလာကြတယ်... အဲ့ဒီလိုမျိုးဆက်တွေကို နဂါးနွယ်ဖွား မျိုးနွယ်စုလို့ ခေါ်တယ်..."

"နဂါးနွယ်ဖွား မျိုးနွယ်စုတွေကို နဂါးလူသားနဲ့ နဂါးသားရဲဆိုပြီး ထပ်ခွဲခြားထားသေးတယ်..."

မုန်လဲ့မှာ ဆွံ့အသွားပြီး သူ၏ ဦးနှောက်ထဲတွင် မျက်စိနောက်စရာ မြင်ကွင်းအချို့ ရုတ်တရက် ထွက်ပေါ်လာသည်။ ကြီးမားလှသော နဂါးကြီးတစ်ကောင်က တောဝက်မကြီးတစ်ကောင်ပေါ် ခွတက်နေပြီးနောက် နဂါးဝက်တစ်ကောင် မွေးဖွားလာခြင်းလား။

တောမြင်းမတစ်ကောင်ပေါ် ခွတက်နေပြီး နဂါးမြင်း မွေးဖွားလာခြင်းလား။

လူတစ်ယောက်ပေါ် ခွတက်ပြီး... နဂါးလူသား မွေးဖွားလာခြင်းလား။

"နဂါးနွယ်ဖွား မျိုးနွယ်စုတွေက နဂါးတွေရဲ့ ပါရမီတချို့ကို အမွေဆက်ခံထားကြတယ်... တချို့က အစွမ်းထက်တဲ့ ခန္ဓာကိုယ်ကို ပိုင်ဆိုင်ထားပြီး တချို့က နဂါးဘာသာစကား မှော်ပညာကို ကျွမ်းကျင်ကြတယ်... ပြီးတော့ သူတို့ရဲ့ အရေအတွက်ကလည်း အရမ်းများပြားတော့ နဂါးနတ်ဘုရားအင်ပါယာရဲ့ အဓိက အင်အားစုတွေ ဖြစ်လာကြတယ်... နဂါးနတ်ဘုရားအင်ပါယာရဲ့ မှူးမတ် ၈၀ ရာခိုင်နှုန်းက နဂါးနွယ်ဖွား မျိုးနွယ်စုတွေပဲ..."

"တတိယတန်းစားကရော..."

မုန်လဲ့က ထပ်မေးလိုက်ပြန်သည်။

"တတိယတန်းစားကတော့ ငါတို့ လူသားမှူးမတ်တွေပဲ..."

ဟာဒက်စ်က သက်ပြင်းချလိုက်သည်။

"နဂါးနတ်ဘုရားအင်ပါယာမှာ လူဦးရေ အများဆုံးက နဂါးနွယ်ဖွား မျိုးနွယ်စုတွေ မဟုတ်ဘူး... တခြား ဉာဏ်ရည်မြင့် မျိုးနွယ်စုတွေလည်း မဟုတ်ဘူး... ငါတို့ လူသားမျိုးနွယ်စုတွေပဲ... နဂါးနတ်ဘုရားအင်ပါယာ လူဦးရေရဲ့ ကိုးဆယ်ရာခိုင်နှုန်းလောက်က လူသားတွေချည်းပဲ..."

"လူအများစုက စွမ်းအားနည်းပါးပြီး အဆင့်အတန်း နိမ့်ကျကြတယ်... တစ်သက်လုံး မှော်ပညာနဲ့ တိုက်ခိုက်ရေးစွမ်းအင်ကို ထိတွေ့ခွင့် မရကြဘဲ မျိုးဆက်အဆက်ဆက် စတုတ္ထတန်းစား သာမန်ပြည်သူတွေအဖြစ်ပဲ နေထိုင်သွားကြရတယ်... ဒါပေမယ့် ပါရမီထူးချွန်တဲ့ ကံကောင်းသူတချို့ကတော့ ပေါ်ထွက်လာတတ်ပါတယ်... သူတို့က နည်းလမ်းအမျိုးမျိုးနဲ့ တိုက်ခိုက်ရေးစွမ်းအင်နဲ့ မှော်ပညာ လေ့ကျင့်ရေးကျင့်စဉ်တွေကို ရရှိကြပြီး နောက်ဆုံးမှာ အစွမ်းထက်တဲ့ စွမ်းအားတွေကို ပိုင်ဆိုင်လာကြတယ်..."

"စွမ်းအားကြီးသူတွေကိုသာ လေးစားတဲ့ ကောင်းကင်ယံတိုက်ကြီးမှာ စွမ်းအားဆိုတာ အဆင့်အတန်းရဲ့ ပြယုတ်တစ်ခုပဲ... ဒါကြောင့် ငါတို့ လူသားမျိုးနွယ်ထဲက စွမ်းအားကြီးသူတွေဟာ နဂါးနတ်ဘုရားအင်ပါယာရဲ့ အလေးပေးမှုကို ခံရပြီး မှူးမတ်တွေ ဖြစ်လာကြတယ်..."

"အဲ့ဒီအထဲမှာ အထင်ရှားဆုံးကတော့ နှင်းပျံ ဓားသူတော်စင် သခင်ကြီး ဂါရန် ဘိုနာပတ် ပဲ..."

ဂါရန် ဘိုနာပတ် အကြောင်းကို ပြောလိုက်ချိန်တွင် ဟာဒက်စ်၏ မျက်လုံးများထဲတွင် လေးစားကြည်ညိုမှုများ ပြည့်နှက်သွားသည်။

"သခင်ကြီး ဂါရန် ဘိုနာပတ် ရဲ့ ဒဏ္ဍာရီတွေက တိုက်ကြီးတစ်ခုလုံးကို ပဲ့တင်ထပ်နေတယ်... သူက လူသားအားလုံးရဲ့ စံပြပုဂ္ဂိုလ်နဲ့ ဂုဏ်ယူစရာဖြစ်ပြီး မျိုးဆက်သစ် လူငယ်တွေကို အမြဲတမ်း ခွန်အားပေးနေတယ်..."

"ဂါရန် ဘိုနာပတ် လား..."

မုန်လဲ့က ခေါင်းကို အနည်းငယ် ညိတ်လိုက်သည်။ ထိုနာမည်သည် မရေမတွက်နိုင်သော ကဗျာဆရာများ၏ ချီးမွမ်းခြင်းကို ခံရသည့် နာမည်တစ်ခု ဖြစ်ပြီး အလွန်တရာ ကျော်ကြားလှသဖြင့် သုံးနှစ်အရွယ် ကလေးငယ်ပင် သိရှိပေသည်။ သူသည် နဂါးနတ်ဘုရားအင်ပါယာရှိ လူသားများထဲတွင် အစွမ်းအထက်ဆုံးသူ ဖြစ်သလို အဆင့်အတန်း အမြင့်မားဆုံးသူလည်း ဖြစ်သည်ဟု ဆိုနိုင်ပေသည်။

"စတုတ္ထတန်းစားကတော့ ငါတို့လို သာမန်လူတွေပေါ့..."

ဟာဒက်စ်က ဆက်ပြောသည်။

"သာမန်လူတွေက အဆင့်အတန်း နိမ့်ကျပြီး အမြတ်ထုတ်ခံရတဲ့ လူတန်းစား ဖြစ်တယ်... အင်ပါယာ ဥပဒေရဲ့ အကာအကွယ်ကို မခံစားရတဲ့အပြင် ကြီးလေးတဲ့ လုပ်အားပေး တာဝန်တွေကိုပါ ထမ်းဆောင်ရတယ်... အင်ပါယာ ဥပဒေက ပြဋ္ဌာန်းထားတာကတော့ အသက် ၁၆ နှစ် ပြည့်ပြီးတဲ့ လူသားတိုင်းဟာ အင်ပါယာရဲ့ နေရာအနှံ့အပြားကို သွားရောက်ပြီး မဖြစ်မနေ လုပ်အားပေး တာဝန်တွေကို ထမ်းဆောင်ရမယ်... စစ်တပ်ထဲ ဝင်ရမယ်... သတ္တုတွင်းတွေမှာ သတ္တုတူးရမယ်... ဒါမှမဟုတ် မှူးမတ်ကြီးတွေရဲ့ အိမ်တော်တွေမှာ ကျွန်တွေ ဒါမှမဟုတ် အစောင့်တွေအဖြစ် အလုပ်လုပ်ရမယ်..."

"ဒါက စတုတ္ထတန်းစားတွေရဲ့ ကံကြမ္မာပဲ... ငါတို့လို သာမန်လူတွေရဲ့ ကံကြမ္မာလည်း ဖြစ်တယ်..."

"ငါ မှတ်မိတာ မမှားဘူးဆိုရင် မင်း... အသက် ၁၅ နှစ် ပြည့်ပြီမလား..."