အခန်း ၃၉

အခန်း ၃၉ တိုက်ပွဲရလဒ် ပေါ်ထွက်လာခြင်းနှင့် မီးနဂါး သွေးမျိုးဆက်

အရပ်လေးမီတာကျော် ရှည်လျားပြီး တစ်ကိုယ်လုံး ကြေးနီရောင် သန်းနေသည်။

ကြွက်သားများက ကျောက်တုံးများအလား အဖုအထစ်များ ဖြစ်နေသည်။

မျက်လုံးများက တောက်ပနေပြီး လက်ထဲတွင် သံဆူးပါသော တုတ်ကြီးကို ကိုင်ဆောင်ထားသည်။

ရွှေရောင် ချပ်ဝတ်တန်ဆာကို ဝတ်ဆင်ထားပြီး ခေါင်းတွင် နွားချိုပါသော ဦးထုပ်ကို ဆောင်းထားသည်။

သူကတော့ သုံးကြိမ်တိုင်တိုင် တိုက်ခိုက်ရေးဘုရင် ဖြစ်ခဲ့သူ... ဧရာမနတ်ဘုရား နီကိုးလပ်စ် အော်စတင် ပင် ဖြစ်သည်။

"ဧည့်သည်တော်များ သိကြတဲ့အတိုင်းပဲ... ကျွန်မတို့ရဲ့ ဧရာမနတ်ဘုရားမှာ ရှေးဟောင်း ဧရာမလူသားကြီးတွေရဲ့ သွေးမျိုးဆက် ရှိပြီး အင်အား အလွန် ကြီးမားပါတယ်... သူက တိုက်ခိုက်ရေးဘုရင် နေရာကို သုံးကြိမ်တိုင်တိုင် ရယူထားနိုင်ခဲ့သလို ဒီနှစ် အင်ပါယာက ကျင်းပတဲ့ တိုက်ခိုက်ရေးဧကရာဇ် ပွဲစဉ်မှာလည်း အင်အားကြီးမားတဲ့ ပြိုင်ဘက်တွေကို အနိုင်ယူပြီး တတိယ နေရာကို ရရှိခဲ့ပါတယ်..."

အစီအစဉ် တင်ဆက်သူ၏ အသံက တိုက်ကွင်း တစ်ခုလုံးတွင် ကျယ်လောင်စွာ ထွက်ပေါ်နေသည်။ "ဒီနေ့မှာတော့ နီကိုးလပ်စ် အနေနဲ့ ပြိုင်ဘက်ကို အနိုင်ယူပြီး တိုက်ခိုက်ရေးဘုရင် ဒဏ္ဍာရီကို ဆက်လက် ရေးထိုးနိုင်မလား ဆိုတာ စောင့်ကြည့်ကြရအောင်ပါ..."

"ဧရာမနတ်ဘုရား..."

"ဧရာမနတ်ဘုရား..."

"ဧရာမနတ်ဘုရား..."

ပို၍ ရူးသွပ်သော အားပေးသံကြီးများက မိုးချုန်းသံများအလား ထွက်ပေါ်လာပြီး မီးတောက် သေမင်းတမန် စင်မြင့် တစ်ခုလုံးကို လွှမ်းခြုံသွားကာ နားစည်ကွဲမတတ် ဆူညံသွားတော့သည်။

သုံးကြိမ်တိုင်တိုင် တိုက်ခိုက်ရေးဘုရင် ဖြစ်ခဲ့သူ ဖြစ်သည့်အလျောက် ဧရာမနတ်ဘုရား နီကိုးလပ်စ်သည် ပရိသတ်များ၏ အလွန်အမင်း အားပေးမှုကို ရရှိထားသည်။ တိုက်ခိုက်ရေးဘုရင်သစ် အော်ဒန်တွင် တော်ဝင် သွေးမျိုးဆက် ရှိနေသော်လည်း သူနှင့် လုံးဝ ယှဉ်၍မရသေးချေ။

"အခုတော့ တိုက်ကွင်းကို တိုက်ခိုက်ရေးဘုရင် နှစ်ယောက်အတွက် လွှဲပေးလိုက်ပါပြီရှင်..."

အစီအစဉ် တင်ဆက်သူက သူမ၏ ဖြူဖွေးသော အတောင်ပံများကို ခတ်ကာ တိုက်ကွင်းပေါ်မှ ဖြည်းညင်းစွာ ထွက်ခွာသွားသည်။ ထိုအခါ စင်ငယ်လေးပေါ်မှ အော်ဒန်နှင့် နီကိုးလပ်စ်တို့ တစ်ပြိုင်နက်တည်း လှုပ်ရှားလိုက်ကြသည်။

အော်ဒန်က အတောင်ပံများကို ခတ်လိုက်ပြီး မီးတောက်ရောင် အလင်းတန်း တစ်ခုအဖြစ် ပြောင်းလဲကာ တိုက်ကွင်းပေါ်သို့ မျက်တောင်တစ်ခတ် အတွင်းမှာပင် ရောက်ရှိသွားသည်။ လျှပ်စီးအလား မြန်ဆန်လွန်းလှသဖြင့် စူးရှသော အော်ဟစ်အားပေးသံများကို ထွက်ပေါ်လာစေသည်။

"ဝေါင်း..."

နီကိုးလပ်စ်က ဒေါသတကြီး ဟိန်းဟောက်လိုက်ပြီး စင်မြင့်ကို ခြေဖြင့် တစ်ချက် ဆောင့်နင်းလိုက်သည်။ 'ဒုန်း' ခနဲ မြည်သံနှင့်အတူ စင်မြင့်မှာ ကွဲအက်သွားပြီး နီကိုးလပ်စ်၏ ကြီးမားလှသော ခန္ဓာကိုယ်ကြီးက လေထဲသို့ ခုန်တက်သွားကာ တိုက်ကွင်းပေါ်သို့ ရောက်ရှိသွားတော့သည်။

"အော်ဒန် နိုင်ရမယ်..."

"ဧရာမနတ်ဘုရား နိုင်ရမယ်..."

ဒီအချိန်မှာတော့ တိုက်ကွင်းတစ်ခုလုံး၏ အားပေးသံများနှင့် ဟစ်ကြွေးသံများက အမြင့်ဆုံးသို့ ရောက်ရှိသွားသည်။ လူတိုင်းမှာ ရူးသွပ်နေသည့်အလား စိတ်လှုပ်ရှားစွာ အော်ဟစ်နေကြသည်။

"ရူးသွပ်လိုက်ကြတာ... တကယ်ကို ရူးသွပ်နေကြတာပဲ... ဘယ်ကမ္ဘာမှာမဆို အသိဉာဏ်မဲ့တဲ့ ပရိသတ်တွေ ဆိုတာ ရှိတာပဲကိုး... ဟင်... အဲ့ဒါက..."

ဤသို့ ရူးသွပ်နေသော ပရိသတ်များ၏ ကိုယ်ပေါ်မှ အလင်းတန်း တစ်ခုပြီး တစ်ခု ကျဆင်းလာသည်ကို မုန်လဲ့ မြင်လိုက်ရသည်။ အရောင်များကို ကြည့်ခြင်းအားဖြင့် ထိုအလင်းတန်း အများစုမှာ စိတ်စွမ်းအင် အလင်းတန်းများ ဖြစ်ကြောင်း သိနိုင်ပေသည်။

"လူတွေ စိတ်လှုပ်ရှားလာရင် စိတ်စွမ်းအင် အလင်းတန်းတွေ ပိုကျလာတတ်တာလား..."

မုန်လဲ့ တိတ်တဆိတ် အံ့အားသင့်သွားသော်လည်း အားမနေခဲ့ချေ။ သူသည် တိုက်ခိုက်ရေးသမားများ ကြည့်ရှုသည့် နေရာမှ ထွက်လာခဲ့ပြီး လုံခြုံရေး လမ်းကြောင်းအတိုင်း ပရိသတ်များ ရှိရာသို့ တိတ်တဆိတ် ရောက်ရှိသွားတော့သည်။

တိုက်ခိုက်ရေးသမားများသည် တိုက်ကွင်း၏ အတွင်းလူများ ဖြစ်ကြသဖြင့် ဗီအိုင်ပီ အခန်းများမှလွဲ၍ ကျန်သည့် နေရာအားလုံးသို့ သွားရောက်ခွင့် ရှိပေသည်။

"ဒင်... ပေါင်းစပ်ခြင်း ပြီးမြောက်ပါပြီ... စိတ်စွမ်းအင် အမှတ် ၅ မှတ် တိုးလာပါတယ်..."

"ဒင်... ပေါင်းစပ်ခြင်း ပြီးမြောက်ပါပြီ... စိတ်စွမ်းအင် အမှတ် ၇ မှတ် တိုးလာပါတယ်..."

ပရိသတ် ထိုင်ခုံများကြားတွင် လျှောက်သွားရင်း မုန်လဲ့သည် ကျဆင်းနေသော အလင်းတန်းများကို အဆက်မပြတ် ကောက်ယူနေခဲ့သည်။ "ဟီးဟီး... အရမ်း မိုက်တာပဲ... တိုက်ကွင်းကို လာတာ တကယ် မှန်သွားပြီ..."

'ဖျတ်...'

မုန်လဲ့ အလင်းတန်းများ ကောက်ယူနေစဉ် တစ်ကွင်းလုံး၏ အားပေးသံများက ရုတ်တရက် ရပ်တန့်သွားသည်။ အသံတိတ်ခလုတ် နှိပ်ခံလိုက်ရသကဲ့သို့ပင်။ မုန်လဲ့ ခေါင်းမော့ကြည့်လိုက်ရာ တိုက်ခိုက်ရေးဘုရင် ပွဲစဉ် စတင်နေပြီ ဖြစ်ကြောင်း တွေ့လိုက်ရသည်။

မှော်အကာအကွယ်များ ပေါ်ထွက်လာပြီး တိုက်ခိုက်ရေးဘုရင် နှစ်ယောက်က ခပ်လှမ်းလှမ်းမှ မျက်နှာချင်းဆိုင် ရပ်နေကြကာ သူတို့၏ မျက်လုံးများမှ မီးပွင့်မတတ် အကြည့်များဖြင့် တိုက်ခိုက်နေကြသည်။

"နီကိုးလပ်စ်... မင်းရဲ့ အောင်မြင်မှု လမ်းကြောင်းကို ငါ အဆုံးသတ်ပေးမယ်..."

အော်ဒန်က အတောင်ပံများ ခတ်ကာ လေထဲတွင် ဝဲပျံနေပြီး သူ၏ အသံက ဓားတစ်လက်အလား အေးစက်နေကာ မျက်လုံးများထဲတွင်လည်း ရက်စက်မှုများ ပြည့်နှက်နေသည်။

"လေလုံးထွားတဲ့ ကလေးပေါက်စ... မင်းရဲ့ လက်သီးက မင်းပါးစပ်လောက် မာကျောပါစေလို့ မျှော်လင့်ပါတယ်..." နီကိုးလပ်စ်က နှာခေါင်းရှုံ့လိုက်ပြီး မျက်နှာပေါ်တွင် အထင်သေးမှုများ အပြည့်အဝ ရှိနေသည်။

"သေစမ်း..."

အော်ဒန်က ဟိန်းဟောက်လိုက်ပြီး အောက်သို့ စိုက်ဆင်းလာကာ လက်သီးဖြင့် ပြင်းထန်စွာ ထိုးချလိုက်သည်။

"ကောင်းတယ်..."

"ဘုန်း..."

ဥက္ကာပျံကြီး တစ်ခု ကမ္ဘာမြေနှင့် ဝင်တိုက်မိသကဲ့သို့ အော်ဒန်နှင့် နီကိုးလပ်စ်တို့ ပြင်းထန်စွာ ရိုက်ခတ်သွားကြသည်။ မိုးခြိမ်းသံအလား ပေါက်ကွဲသံကြီးများနှင့်အတူ သူတို့ နှစ်ယောက်မှာ အပြန်အလှန် ပြင်းထန်စွာ တိုက်ခိုက်နေကြတော့သည်။

လက်သီးချက်တိုင်းက အသားများကို ထိမိနေပြီး...

လုံးဝ သက်ညှာခြင်း မရှိကြချေ။

"အော်ဒန်... အော်ဒန်... အော်ဒန်..."

"ဧရာမနတ်ဘုရား... ဧရာမနတ်ဘုရား... ဧရာမနတ်ဘုရား..."

ပရိသတ်များမှာ အလွန်အမင်း ရူးသွပ်နေကြပြီး အားကုန် အော်ဟစ်နေကြတော့သည်။

"တစ်ဖက်က မီးနဂါး သွေးမျိုးဆက် ရှိတဲ့ တော်ဝင် နဂါးလူသား..."

"နောက်တစ်ဖက်က ရှေးဟောင်း ဧရာမလူသား သွေးမျိုးဆက် ရှိတဲ့ ဧရာမလူသားမျိုးနွယ်ခွဲ..."

"တကယ်ကို မီးပွင့်လောက်အောင် အင်အားကြီးသူ နှစ်ယောက်ရဲ့ တိုက်ပွဲပဲ..."

မုန်လဲ့က အလင်းတန်း ကောက်ယူခြင်းကို ရပ်တန့်လိုက်ပြီး တိုက်ကွင်းပေါ်သို့ စူးစိုက်ကြည့်နေကာ မျက်လုံးများထဲတွင် အားကျမှုများ ပြည့်နှက်နေသည်။ တိုက်ခိုက်ရေးဘုရင်များ ဖြစ်ကြသည့် အော်ဒန်နှင့် နီကိုးလပ်စ်တို့သည် အဆင့်ကိုး စစ်သည်တော်များ ဖြစ်ကြသည်မှာ သေချာလှသည်။

အဆင့်ကိုး။

၎င်းသည် ထူးခြားသော အဆင့်တစ်ခု ဖြစ်သည်။

အကြောင်းမှာ ၎င်းသည် အထွတ်အထိပ်အဆင့်နှင့် ခြေတစ်လှမ်းသာ ကွာဝေးသောကြောင့် ဖြစ်သည်။

အထွတ်အထိပ်အဆင့်...

အလွန် မြင့်မြတ်ပြီး...

သေခြင်းရှင်ခြင်းမှ လွတ်ကင်းကာ...

မိုးမြေကို ထိန်းချုပ်နိုင်စွမ်း ရှိသည်။

သက်ရှိအားလုံး၏ အထက်တွင် ရပ်တည်နေသော အမှန်တကယ် ကြီးမြတ်သည့် တည်ရှိမှုပင် ဖြစ်သည်။

ထို့အပြင် အဆင့်ကိုး ဆိုသည်မှာလည်း အလွန်တရာ ကြီးမားသော စွမ်းအားကို ကိုယ်စားပြုပေသည်။

မီးနဂါး တိုင်းပြည် တစ်ခုလုံးတွင် အဆင့်ခြောက် အဆင့်ခုနစ် စစ်သည်တော်များမှာ အများအပြား ရှိသည်။ သွေးမျိုးဆက် အနည်းငယ် သန့်စင်သော နဂါးလူသားများ ဆိုလျှင် သိပ်မလေ့ကျင့်လျှင်တောင် အရွယ်ရောက်လာချိန်တွင် အဆင့်ခြောက် အဆင့်ခုနစ် စစ်သည်တော်များနှင့် ညီမျှပေသည်။

အဆင့်ရှစ် စစ်သည်တော်ကတော့ အတော်လေး ရှားပါးသွားပြီ ဖြစ်သည်။ သွေးမျိုးဆက် တစ်ခုတည်းဖြင့် မရောက်နိုင်ဘဲ ကြိုးစားအားထုတ် လေ့ကျင့်ရန် လိုအပ်ပေသည်။

အဆင့်ကိုး ဆိုလျှင်တော့ ပို၍ပင် ရှားပါးသွားပြီ ဖြစ်သည်။

နဂါးလူသား တစ်သောင်းတွင် တစ်ယောက်ပင် အဆင့်ကိုးသို့ ရောက်ရန် မသေချာချေ။

ထို့ကြောင့် အဆင့်ကိုး စစ်သည်တော်များ အားလုံးတွင် မြင့်မားသော အဆင့်အတန်းများ ရှိကြရာ လူအများ ကြည့်ရှု အပန်းဖြေရန်အတွက် တိုက်ခိုက်ရေးသမား လုပ်ချင်သူ ဆိုလျှင် ပို၍ပင် ရှားပါးလှပေသည်။

ဤအချက်ကလည်း အော်ဒန်နှင့် နီကိုးလပ်စ်တို့ ဤမျှလောက် နာမည်ကြီးနေရခြင်း၏ အခြား အကြောင်းရင်း တစ်ခု ဖြစ်ပေလိမ့်မည်။

"ဘုန်း... ဘုန်း... ဘုန်း..."

တိုက်ကွင်းပေါ်မှ တိုက်ပွဲမှာ အမြင့်ဆုံး အခြေအနေသို့ ရောက်ရှိနေပြီ ဖြစ်သည်။ မီးနဂါးလူသား အော်ဒန်က မီးတောက် အလင်းတန်း တစ်ခုအဖြစ် ပြောင်းလဲကာ အမြန်နှုန်းနှင့် ခွန်အားကို အမြင့်ဆုံးအထိ မြှင့်တင်ထားရာ တိုက်ကွင်းပေါ်တွင် သူ၏ အရိပ်များကိုသာ တွေ့မြင်နေရတော့သည်။

ဧရာမနတ်ဘုရား နီကိုးလပ်စ်၏ အမြန်နှုန်းက အော်ဒန်ကို မမီသည်မှာ သိသာသော်လည်း သူက တောင်ကြီးတစ်လုံးအလား အော်ဒန် မည်မျှပင် ပြင်းထန်စွာ တိုက်ခိုက်ပါစေ မတုန်မလှုပ် ရပ်တည်နေပေသည်။

တိုက်ပွဲ အခြေအနေကို ကြည့်ခြင်းအားဖြင့် လူတိုင်း သိနိုင်ပေသည်။

အော်ဒန်က အမြန်နှုန်း မြန်ဆန်ပြီး တိုက်ခိုက်မှုများက ပြင်းထန်သည်။

နီကိုးလပ်စ်က ကာကွယ်မှုနှင့် ခွန်အားပိုင်းတွင် ပို၍ သာလွန်သည်။

တစ်ယောက်က မြန်ပြီး၊ တစ်ယောက်က အားသန်သည်။

တစ်ယောက်က ပြိုင်ဘက်ကို ထိမှန်အောင် တိုက်ခိုက်နိုင်သော်လည်း အသေအလဲ ဒဏ်ရာ ရအောင် မလုပ်နိုင်ချေ။

နောက်တစ်ယောက်က ခွန်အား ပိုကြီးသော်လည်း အမြဲတမ်း တစ်လှမ်း နောက်ကျနေပေသည်။

"ဒီအတိုင်းပဲ ဆက်ပြီး အခြေအနေ တင်းမာနေတော့မှာလား..."

မုန်လဲ့ တိတ်တဆိတ် အံ့အားသင့်နေမိသည်။ ပရိသတ်များကလည်း တိုက်ကွင်းပေါ်ရှိ အခြေအနေကို မကျေနပ်ကြသဖြင့် မိမိတို့ အားပေးသော ကစားသမား အနိုင်ရစေရန် ပို၍ပင် အားကုန် အော်ဟစ်နေကြတော့သည်။

"ကလေးပေါက်စ... မင်းက ကြွက်တစ်ကောင်လို လျှောက်ပြေးဖို့ပဲ တတ်တာလား..."

နီကိုးလပ်စ်က သံဆူးတုတ်ကြီးကို လွှဲရမ်းကာ လေထဲသို့ချည်း ထုနှက်နေရသဖြင့် အော်ဟစ်လိုက်သည်။ "သတ္တိရှိရင် ငါနဲ့ မျက်နှာချင်းဆိုင် လာတိုက်စမ်းပါ... ထွက်ပြေးနေရုံနဲ့ ငါ့ကို နိုင်မှာ မဟုတ်ဘူး..."

"ဟွန့်..."

အော်ဒန်၏ ရင်ထဲတွင် ဒေါသထွက်သွားသော်လည်း ဘာမှ မလုပ်နိုင်ချေ။ သူသည် အလွန် ငယ်ရွယ်သေးသဖြင့် သူ၏ ခန္ဓာကိုယ်ကို အမြင့်ဆုံးအထိ လေ့ကျင့်နိုင်ခြင်း မရှိသေးရာ ခွန်အားပိုင်းတွင် နီကိုးလပ်စ်ကို ရှုံးနိမ့်နေရခြင်း ဖြစ်သည်။

'ငါသာ မီးနဂါး ကျမ်းစာကို အထွတ်အထိပ်အထိ လေ့ကျင့်နိုင်ခဲ့ရင် သူ့ကို တစ်ချက်တည်း ရိုက်သတ်လို့ ရတယ်... နှမြောစရာပဲ...'

အော်ဒန်မှာ စိတ်ပျက်သွားပြီး အနည်းငယ် အာရုံလွင့်သွားသည်။

သို့သော် အဆင့်မြင့် သိုင်းသမားများ တိုက်ခိုက်ရာတွင် တစ်စက္ကန့်လေးမျှပင် အာရုံလွင့်သွား၍ မရချေ။

ထိုတစ်ခဏလေး အတွင်းမှာပင် အတွေ့အကြုံ ရင့်ကျက်သော နီကိုးလပ်စ်က အခွင့်အရေးကို ဖမ်းဆုပ်လိုက်ပြီး သံဆူးတုတ်ကြီးဖြင့် ရိုက်ချလိုက်သည်။ အော်ဒန်က အလျင်အမြန် ရှောင်တိမ်းလိုက်နိုင်သော်လည်း ထိုအချိန်မှာပင် နီကိုးလပ်စ်၏ လက်သီးပြင်းကြီးက အရှိန်အဟုန်ဖြင့် ထိုးချလာတော့သည်။

ဒီတစ်ခါတော့ အော်ဒန် ကံမကောင်းတော့ချေ။

"ဘုန်း..."

သံမဏိ လက်သီးကြီးက အော်ဒန်ကို ပြင်းထန်စွာ ထိမှန်သွားရာ အော်ဒန်က အော်ဟစ်လိုက်ပြီး ပါးစပ်မှ သွေးများ ပန်းထွက်ကာ အနောက်သို့ လွင့်စင်သွားတော့သည်။

"ရှုံးလိုက်စမ်း..."

နီကိုးလပ်စ်က အခွင့်အရေး ရသွားသဖြင့် မညှာတမ်း ဆက်လက် တိုက်ခိုက်လိုက်သည်။ မုန်တိုင်းများအလား ပြင်းထန်သော တိုက်ခိုက်မှုများ အောက်တွင် ကြက်သီးထဖွယ် ရိုက်ခတ်သံများနှင့်အတူ အော်ဒန်သည် လေထဲမှ သစ်ရွက်ခြောက်လေး တစ်ရွက်အလား အောက်သို့ ပြုတ်ကျသွားတော့သည်။

"ဝေါ..."

တစ်ကွင်းလုံး ချက်ချင်း တိတ်ဆိတ်သွားတော့သည်။

ပရိသတ်များမှာ ဤမြင်ကွင်းကို ကြည့်ကာ ကြောင်အမ်းနေကြပြီး သတိပင် မဝင်နိုင်တော့ချေ။

စောစောလေးတင်က အခြေအနေ တင်းမာနေခဲ့သော တိုက်ပွဲက ရုတ်တရက်ကြီး ကြီးမားသော အပြောင်းအလဲ ဖြစ်သွားခဲ့သည်။

အော်ဒန်... ရှုံးသွားပြီလား...

"ဟေး..."

အချိန်ခဏမျှ တိတ်ဆိတ်သွားပြီးနောက် နီကိုးလပ်စ်၏ ပရိသတ်များက ကြီးမားသော အောင်ပွဲခံသံများကို အော်ဟစ်လိုက်ကြသည်။ အော်ဒန်၏ ပရိသတ်များကမူ ကျိန်ဆဲနေကြပြီး ဤရလဒ်ကို လုံးဝ လက်မခံနိုင်ကြချေ။

"ရလဒ် ထွက်လာပြီ... မီးနဂါးလူသား ရှုံးသွားပြီပဲ..."

မုန်လဲ့က ခေါင်းခါကာ သက်ပြင်းချလိုက်ပြီး မတ်တပ်ရပ်၍ တိုက်ကွင်းရှိရာသို့ လျှောက်သွားလိုက်သည်။ "လက်သီးချက်တွေ ဒီလောက်တောင် အများကြီး အထိုးခံလိုက်ရတာဆိုတော့... အော်ဒန် တစ်ယောက် အူတွေ အသည်းတွေတောင် ထွက်လာလောက်ပြီ..."

အော်ဒန် တစ်ယောက် အူတွေ အသည်းတွေ ထွက်လာသလား ဆိုတာကိုတော့ မုန်လဲ့ မသိချေ။ သူ သိသည်မှာ အော်ဒန် လက်သီးဖြင့် အထိုးခံရပြီး လွင့်စင်သွားချိန်တွင် သူ၏ ကိုယ်ပေါ်မှ သွေးရောင် တောက်ပနေသော အလင်းတန်း တစ်ခု ကျဆင်းလာသည်ကိုသာ မြင်လိုက်ရသည်။

'အော်ဒန်က အဆင့်ကိုး စစ်သည်တော် ဆိုတော့... သူ့ကိုယ်ပေါ်က ကျလာတဲ့ အလင်းတန်းက သာမန်တော့ မဖြစ်နိုင်ဘူး... အင်း... ငါ မြန်မြန် သွားကောက်မှပဲ...'

"ဒင်... ပေါင်းစပ်ခြင်း ပြီးမြောက်ပါပြီ... မီးနဂါး သွေးမျိုးဆက်ကို ရရှိတဲ့အတွက် ဂုဏ်ယူပါတယ်..."

"ဘာ... "