အခန်း ၁၄၅

အခန်း ၁၄၅။ နဂါးနတ်ဘုရား မျှော်စင်သို့ ဝင်ရောက်ခြင်း၊ သဲကန္တာရ ကမ္ဘာ

အဆင့် ၃ - ဂိုဘလင် ဖရက်ဒရစ်၊ ရွှေရောင် နဂါး၊ အသက် ၂၉ နှစ်၊ အထပ် ၇၅

အဆင့် ၄ - ဟိုးရေ့စ် ဖရက်ဒရစ်၊ ရွှေရောင် နဂါး၊ အသက် ၃၀ နှစ်၊ အထပ် ၇၅

အဆင့် ၅ - အဲလက်စ် ဖရက်ဒရစ်၊ ရွှေရောင် နဂါး၊ အသက် ၃၀ နှစ်၊ အထပ် ၇၅

အဆင့် ၆...

တစ်ခေါက် ဖတ်ကြည့်လိုက်ရာ အဆင့် ၁ နှင့် အဆင့် ၂ မှလွဲ၍ ထိပ်ဆုံး ဆယ်ယောက်လုံးက ဖရက်ဒရစ် ဆိုသော မျိုးရိုးနာမည်များ ဖြစ်နေပြီး အားလုံးက ရွှေရောင် နဂါးများသာ ဖြစ်နေကြလေသည်။

အဆင့် ၁၁ သို့ ရောက်မှသာ နဂါးနက် မျိုးနွယ် တစ်ယောက် ထွက်ပေါ်လာပြီးနောက် ဖရက်ဒရစ် မျိုးရိုးရှိသော ရွှေရောင် နဂါးများက ဆက်လက် နေရာယူထားကြပြန်သည်။

"ဖရက်ဒရစ် ဆိုတာ ငါတို့ နဂါးနတ်ဘုရား အင်ပါယာ ဧကရာဇ် မိသားစုရဲ့ မျိုးရိုးနာမည်ပဲ" အဖိုးအိုက ရှင်းပြလိုက်သည်။ "စာရင်းထဲက ရွှေရောင် နဂါးတွေ အားလုံးက ဧကရာဇ် မိသားစုကချည်းပဲ"

"အဆင့် ၁၀၀ မဟုတ်ဘူး အဆင့် ရာဂဏန်းလောက်အထိ ထက်ဝက်ကျော်လောက်က ရွှေရောင် နဂါး ပါရမီရှင်တွေ ဖြစ်နေတာ ယုံနိုင်စရာတောင် မရှိဘူး"

မုန်လဲ့က စာရင်းကို စိုက်ကြည့်ရင်း အလွန် အံ့အားသင့်နေမိသည်။ ကြီးမားကျယ်ပြန့်လှသော နဂါးနတ်ဘုရား အင်ပါယာကြီးတွင် မရေမတွက်နိုင်သော ပါရမီရှင်များ ရှိနေပါလျက်နှင့် ထိုလူများ အားလုံး ပေါင်းလိုက်သည်က ရွှေရောင် နဂါး အနည်းငယ်လောက်ကို မယှဉ်နိုင်ဘူးလား။

"ဒါက ပုံမှန်ပါပဲ"

အဖိုးအိုက ရယ်မော၍ ပြောလိုက်သည်။ "ရွှေရောင် နဂါးတွေက နဂါးမျိုးနွယ်စုရဲ့ ဧကရာဇ် မျိုးနွယ်တွေဆိုတော့ သူတို့ရဲ့ ပါရမီက တခြား မျိုးနွယ်တွေနဲ့ ယှဉ်လို့ ရတာ မဟုတ်ဘူး"

"ကောင်းကင်ယံတိုက်ကြီး တစ်ခုလုံးကို ကြည့်မယ်ဆိုရင် တိုက်တန် အင်ပါယာရဲ့ မိုးကြိုး တိုက်တန်၊ သားရဲလူသား အင်ပါယာရဲ့ ရွှေရောင် ဘီဟီမော့သ်၊ အယ်လ်ဖ် အင်ပါယာရဲ့ တော်ဝင် အယ်လ်ဖ် စတဲ့ မျိုးနွယ်စု အနည်းငယ်လောက်ပဲ သူတို့နဲ့ ယှဉ်နိုင်တယ်"

"မျိုးဆက်တိုင်းက ရွှေရောင် နဂါး အရေအတွက်က အရမ်း နည်းပါးပေမဲ့ တစ်ကောင်ချင်းစီတိုင်းက ပါရမီ အရမ်း ထူးချွန်ကြတယ် ဘာလို့လဲဆိုတော့ ရွှေရောင် နဂါး ဆိုတာ အရွယ်ရောက်တာနဲ့ မြင့်မြတ်သောနယ်မြေကို ရောက်ရှိသွားတဲ့ မျိုးနွယ်စု အနည်းငယ်ထဲက တစ်ခုပဲလေ"

"အရွယ်ရောက်တာနဲ့ မြင့်မြတ်သောနယ်မြေကို ရောက်တာလား"

မုန်လဲ့က ဖြည်းညင်းစွာ ခေါင်းခါလိုက်ပြီး စာရင်းကို ဆက်လက် ကြည့်ရှုလိုက်လေသည်။

"ကျောင်းအုပ်ကြီး ခင်ဗျားက အဆင့် ၆၈၉ မှာ ရှိနေတာလား"

"ဟက်ဟက် ငါ့ရဲ့ ပါရမီက သာမန်ပါပဲ"

တစ်ခေါက် ဖတ်ကြည့်ပြီးနောက် မုန်လဲ့က စာရင်းတစ်ခုလုံးကို ယေဘုယျအားဖြင့် နားလည်သွားလေသည်။

နဂါး ၆၀ ရာခိုင်နှုန်း

နဂါးမျိုးကွဲ ၃၀ ရာခိုင်နှုန်း

အခြား မျိုးနွယ်များ ၉ ရာခိုင်နှုန်း

လူသား ၁ ရာခိုင်နှုန်း

စာရင်းကို ကြည့်ရုံဖြင့် နဂါးများ၏ ပါရမီက လူသားများနှင့် အခြား မျိုးနွယ်များထက် အများကြီး ပိုမို သာလွန်ကြောင်း သိသာလှသည်။ နဂါး ၆၀ ရာခိုင်နှုန်းနှင့် နဂါးမျိုးကွဲ ၃၀ ရာခိုင်နှုန်း ပေါင်းလိုက်ပါက ၉၀ ရာခိုင်နှုန်းပင် ဖြစ်ရာ ကွာဟချက်က သာမန် ကြီးမားသည် မဟုတ်ပေ။

"ငါတို့ လူသားတွေက သနားစရာ ကောင်းလိုက်တာ ၁ ရာခိုင်နှုန်းတောင် မပြည့်ဘူး"

"ဒါက သေချာတာပေါ့ လူသားတွေရဲ့ ပါရမီက မူလကတည်းက အညံ့ဆုံးပဲလေ အရေအတွက် အများဆုံး ဖြစ်နေရင်တောင် တကယ့် ပါရမီရှင်က လက်ဆုပ်စာလောက်ပဲ ရှိတာ" လူသား ပြိုင်ပွဲဝင် တစ်ယောက်က ခေါင်းခါကာ သက်ပြင်းချလိုက်လေသည်။

'လူသားတွေရဲ့ ပါရမီက တကယ်ပဲ ညံ့ဖျင်းလို့လား'

မုန်လဲ့ တိတ်ဆိတ်နေသော်လည်း ရင်ထဲတွင်မူ မတူညီသော အမြင် ရှိနေလေသည်။ လူသားများ၏ ပါရမီက နဂါးများနှင့် ကွာဟမှု ရှိသည်မှာ မှန်သော်လည်း ယခုကဲ့သို့ ကြီးမားလှသော ကွာဟချက်ကို ဖြစ်ပေါ်စေသည့် အဓိက အကြောင်းရင်းမှာ ပါရမီကြောင့် မဟုတ်ပေ။

အဲဒါက... အဆင့်အတန်းကြောင့် ဖြစ်လေသည်။

နဂါးနတ်ဘုရား အင်ပါယာတွင် လူသားများက အောက်ခြေဆုံး အလွှာတွင် ရှိနေပြီး လူသား ၉၉ ရာခိုင်နှုန်းက လေ့ကျင့်ရန် အခွင့်အရေး မရရှိကြပေ။ မွေးရာပါ ပါရမီရှင်များ ထွက်ပေါ်လာလျှင်ပင် မည်သူက သိနိုင်မည်နည်း။

ယှဉ်ကြည့်မည်ဆိုလျှင်...

နဂါးများမှာ အရေအတွက် နည်းပါးသော်လည်း လေ့ကျင့်ရေး သယံဇာတ ၉၉ ရာခိုင်နှုန်းကို လက်ဝါးကြီးအုပ်ထားကြရာ သူတို့က စာရင်းတွင် ပါဝင်နေခြင်းမှာ သဘာဝ မကျဘူးလား။

'တကယ်လို့ တစ်နေ့နေ့ကျရင်'

'လူသားတွေလည်း လေ့ကျင့်ခွင့် ရလာမယ်ဆိုရင် ဒီ နဂါးနတ်ဘုရား ပါရမီရှင် စာရင်း ဆိုတာကြီးက သေချာပေါက် ကောင်းကင်နဲ့ မြေကြီး ပြောင်းပြန် လန်သွားသလို ပြောင်းလဲသွားမှာပဲ'

မုန်လဲ့၏ စိတ်ထဲတွင် ရှုပ်ထွေးသွားပြီး နဂါးနတ်ဘုရား မျှော်စင်၏ အဝင်ဝကို လှမ်းကြည့်လိုက်ရာ ရွှေရောင် သံချပ်ကာ ဝတ်ဆင်ထားသော သက်တော်စောင့် တစ်ဖွဲ့က ဝင်ပေါက်ကို စောင့်ကြပ်နေသည်ကို တွေ့လိုက်ရလေသည်။

ယခုအချိန်တွင် နိုင်ငံတော်များနှင့် မြို့စားနယ်များမှ ပြိုင်ပွဲဝင် အများအပြားက ဝင်ပေါက်တွင် စုဝေးနေကြပြီး အားလုံးက စိတ်လှုပ်ရှားစွာဖြင့် ဝင်ရောက်ရန် ပြင်ဆင်နေကြလေသည်။

"မင်းတို့ အားလုံးက နဂါးနတ်ဘုရား မျှော်စင်ကို ပထမဆုံး ဝင်မယ့်သူတွေလား" ရွှေရောင် သံချပ်ကာ သက်တော်စောင့် တစ်ယောက်က မေးလိုက်လေသည်။

"ဟုတ်ပါတယ်"

"ပထမဆုံးအကြိမ် ဖြစ်နေတော့ မင်းတို့ကို ရှင်းပြဖို့ လိုအပ်မယ်"

"ပထမအချက် နဂါးနတ်ဘုရား မျှော်စင် အထဲက အလွန် အန္တရာယ်များတယ် သတိမထားမိရင် အထဲမှာ အသက်ဆုံးရှုံးသွားနိုင်တယ် မဝင်ခင်မှာ အပြည့်အဝ ပြင်ဆင်ထားရမယ်"

"ဒုတိယအချက် နောက်တစ်ထပ်ကို သွားမယ့် မှော်အစီအရင်တွေ အားလုံးက မှော်စွမ်းအင် အပြည့်နှက်ဆုံး နေရာတွေမှာ ရှိတယ် အဲဒီလို နေရာတွေမှာ အစွမ်းအထက်ဆုံး ဒေသခံ သက်ရှိတွေ နေထိုင်လေ့ ရှိတယ်"

"ဒါကြောင့် အရမ်း အန္တရာယ်များတယ် သေချာပေါက် သတိထားပြီး လှုပ်ရှားရမယ်"

"တတိယအချက် တတ်နိုင်သမျှ အတူတူ မလှုပ်ရှားကြနဲ့ ပစ်မှတ် ကြီးလေလေ ဒေသခံ သက်ရှိတွေရဲ့ ဝိုင်းဝန်း တိုက်ခိုက်တာကို ခံရဖို့ ပိုလွယ်လေလေပဲ တစ်ခါ ဝိုင်းဝန်း တိုက်ခိုက်ခံရတာနဲ့ ပိုပြီး အန္တရာယ် များသွားလိမ့်မယ်"

အချက် သုံးချက် ဆက်တိုက် ပြောလိုက်ရာ အချက်တိုင်းတွင် အန္တရာယ် ဟူသော စကားလုံး ပါဝင်နေလေသည်။

အထဲတွင် မည်မျှ အန္တရာယ်များကြောင်း သိသာလှပေသည်။

သို့သော် ပြိုင်ပွဲဝင်များမှာ စိတ်လှုပ်ရှားပြီး သွေးဆူနေကြကာ နဂါးနတ်ဘုရား မျှော်စင်ထဲသို့ ချက်ချင်း ဝင်ရောက်လိုစိတ်သာ ရှိနေကြရာ မည်သူက ရွှေရောင် သံချပ်ကာ သက်တော်စောင့်၏ သတိပေးချက်များကို ခေါင်းထဲ ထည့်ထားမည်နည်း။

ရွှေရောင် သံချပ်ကာ သက်တော်စောင့်က ထိုအခြေအနေကို မြင်သောအခါ ဖြည်းညင်းစွာ ခေါင်းခါလိုက်ပြီး "နဂါးနတ်ဘုရား မျှော်စင်ကို ဝင်တာက ကလေးကစားစရာ မဟုတ်ဘူး သတိမထားမိရင် အသက် သေသွားနိုင်တယ် ပြောသင့်တာတော့ ငါ ပြောပြီးပြီ နားထောင်တာ မထောင်တာက မင်းတို့ အပိုင်းပဲ" ဟု ပြောလိုက်လေသည်။

ပြောပြီးနောက် သူက လက်ကို ဝှေ့ယမ်းကာ "သူတို့ကို ဝင်ခွင့်ပြုလိုက်" ဟု အမိန့်ပေးလိုက်လေသည်။

"ဝှစ်"

ဝင်ပေါက်ကြီး ပွင့်သွားရာ ပြိုင်ပွဲဝင်များ အားလုံး စောင့်ဆိုင်းမနေနိုင်တော့ဘဲ တစ်ပြုံလုံး ဝင်ရောက်သွားကြလေတော့သည်။

"ဒီ မာနကြီးပြီး ဘာမှ နားမလည်တဲ့ သောက်ရူးတွေ ဒီလိုပဲ ရမ်းသမ်း ဝင်သွားကြတာလား ဘာမှတောင် မပြင်ဆင်တော့ဘူးလား"

"စောင့်ကြည့်နေလိုက် ခဏနေရင် သူတို့ ငိုရလိမ့်မယ်"

"ငိုရမယ် ဟုတ်လား အဲဒီလို ငိုဖို့ အခွင့်အရေး ရရင်ကို ကောင်းနေပြီ သူတို့ တစ်သက်လုံး အဲဒီအထဲမှာ နေခဲ့ရပြီး အသက်ရှင်လျက် ပြန်ထွက်လာဖို့ အခွင့်အရေး လုံးဝ မရှိတော့မှာကိုပဲ ကြောက်ရတာ"

"ဟုတ်တယ် သူတို့ရဲ့ မိုက်မဲမှုနဲ့ မာနကြီးမှုတွေအတွက် ကြီးမားတဲ့ ပေးဆပ်မှု လုပ်ရလိမ့်မယ် နှစ်တိုင်း ဖလှယ်ရေးပြိုင်ပွဲ အချိန်က သေဆုံးသူ အများဆုံး အချိန်ဆိုတာ ဘယ်သူက မသိလို့လဲ"

"ဒီတစ်ခါကော ဘယ်နှစ်ယောက် သေဦးမလဲ မသိဘူး"

ပွဲကြည့်နေသော နဂါးနတ်ဘုရား အကယ်ဒမီမှ ကျောင်းသား အများအပြားက လက်ညှိုးထိုးကာ ပြောဆိုနေကြပြီး သူတစ်ပါး ဒုက္ခရောက်သည်ကို ဝမ်းသာနေကာ ပြဇာတ် ကြည့်နေသည့် ပုံစံမျိုး ဖြစ်နေကြလေသည်။

"ဂျိုးအယ်လ် နဂါးနတ်ဘုရား မျှော်စင်က တကယ်ပဲ ဒီလောက် အန္တရာယ်များတာလား" ပြိုင်ပွဲဝင် တစ်ယောက်က စိုးရိမ်တကြီး မေးလိုက်လေသည်။

"ဒါ မေးနေဖို့ လိုသေးလို့လား နှစ်တိုင်း နဂါးနတ်ဘုရား မျှော်စင်ထဲမှာ သေဆုံးရတဲ့ ပါရမီရှင်တွေက မြစ်ထဲက ငါးတွေလိုပဲ ဆိုတာက အလကား ပြောနေတဲ့ စကား မဟုတ်ဘူး"

ဂျိုးအယ်လ်၏ မျက်နှာထား လေးနက်သွားပြီး "ခဏနေ ဝင်သွားရင် အားလုံး သတိထားကြ အန္တရာယ် ရှိတယ်လို့ ခံစားရတာနဲ့ ချက်ချင်း ပြန်ဆုတ် ဘာပဲဖြစ်ဖြစ် ဘေးကင်းရေးက ပထမပဲ" ဟု ပြောလိုက်လေသည်။

"မင်း အဲဒီလို ပြောလိုက်တော့ ငါ ဝင်တောင် မဝင်ရဲတော့ဘူး"

"ဟုတ်တယ် ဒါက အရမ်း ကြောက်စရာ ကောင်းလွန်းတယ်"

"တကယ်တော့ အရမ်း ကြောက်နေစရာလည်း မလိုပါဘူး ငါတို့ရဲ့ စွမ်းအားနဲ့ဆိုရင် အောက်ဆုံး ၁၀ ထပ်က အတော်လေး လုံခြုံပါတယ်"

ဂျိုးအယ်လ်က ပြုံး၍ "ပြီးတော့ ငါတို့ မနက်ဖြန် ဖလှယ်ရေးပြိုင်ပွဲ ဝင်ပြိုင်ရဦးမှာလေ ဒီနေ့တော့ ဝင်ပြီး ရိုးရိုးလေးပဲ လိုက်ကြည့်ကြတာပေါ့" ဟု ပြောလိုက်လေသည်။

"ပြောတာ မှန်တယ်"

"ငါတို့ ဒီနေ့ လာတာက အတွေ့အကြုံ ယူဖို့ လာတာပါ"

ပြိုင်ပွဲဝင် အချို့က အသီးသီး ခေါင်းညိတ်လိုက်ကြလေသည်။

"မုန်လဲ့ လူကြီးမင်း အတူတူ ဝင်ကြမလား"

"သွားကြတာပေါ့"

ရေဝဲကဲ့သို့ လှည့်ပတ်နေသော မှော်အလင်းတန်း မျက်နှာပြင်ကို ဖြတ်သန်းသွားပြီးနောက် ကမ္ဘာကြီး လည်ပတ်သွားသကဲ့သို့ ခံစားလိုက်ရပြီး ပတ်ဝန်းကျင်က ချက်ချင်း ကြီးမားစွာ ပြောင်းလဲသွားလေတော့သည်။

သဲဝါများ။

ကောင်းကင် တစ်ခုလုံး ပြည့်နှက်နေသော သဲဝါများ။

မျက်စိတစ်ဆုံး ကြည့်လိုက်လျှင် အဆုံးမရှိသော သဲဝါများကိုသာ တွေ့မြင်ရလေသည်။

ကောင်းကင်တွင် ပူပြင်းသော နေမင်းကြီး။

ပတ်ဝန်းကျင်တွင် အငွေ့ပျံနေသော အပူရှိန်။

မြေပြင်ပေါ်တွင် ပြန့်ကျဲနေသော အရိုးဖြူများ။

ခြောက်သွေ့ခြင်း။ အလွန်အမင်း ပူပြင်းခြင်း။ သေလုမတတ် တိတ်ဆိတ်ခြင်း။ လူသူကင်းမဲ့ခြင်း။

ဤနေရာက သဲကန္တာရများဖြင့် ပြည့်နှက်နေသော ကမ္ဘာတစ်ခုပင် ဖြစ်လေသည်။

"ဒီနေရာက နဂါးနတ်ဘုရား မျှော်စင်ရဲ့ ပထမဆုံး အထပ်လား"

မုန်လဲ့က ပတ်ဝန်းကျင်ကို လှည့်ကြည့်လိုက်ရာ အဆုံးမရှိ ကျယ်ဝန်းလှသော သဲကန္တာရကြီးထဲတွင် ရောက်ရှိနေသကဲ့သို့ ခံစားလိုက်ရပြီး အဆုံးသတ်ကို မမြင်ရပေ။

မုန်လဲ့ သံသယဖြစ်သွားလေသည်။ 'ဒါကလည်း ကမ္ဘာနယ်မြေလေးပဲလား'

'ပြည့်စုံတဲ့ ရုပ်ဝတ္ထု ကမ္ဘာတစ်ခုနဲ့ ဘာကွာခြားလို့လဲ'

"ဂျိုးအယ်လ်တို့ကော ဘယ်ရောက်သွားလဲ"

မုန်လဲ့ကို အံ့ဩစေဆုံး အချက်မှာ သူနှင့်အတူ ဝင်လာသော ဂျိုးအယ်လ်နှင့် အခြားသူများ အားလုံး ပျောက်ကွယ်သွားပြီး သူ တစ်ယောက်တည်းသာ အဆုံးမရှိသော သဲပင်လယ်ကြီးထဲတွင် အထီးကျန်စွာ ရပ်နေရခြင်းပင် ဖြစ်လေသည်။

သူ၏ အနောက်ဘက်တွင်တော့ ရေဝဲပုံစံ တယ်လီပို့ ဝင်ပေါက် တစ်ခု ရှိနေပြီး ထိုဝင်ပေါက်ထဲ ဝင်သွားပါက နဂါးနတ်ဘုရား မျှော်စင်မှ ပြန်ထွက်နိုင်မည် ဖြစ်လေသည်။

'ကျပန်း တယ်လီပို့ လုပ်လိုက်တာလား'

'ထားလိုက်ပါတော့ ဂရုမစိုက်တော့ဘူး'

'ဒုတိယ အထပ်ကို သွားကြည့်ရမယ်'

မုန်လဲ့က ကောင်းကင်သို့ ပျံတက်သွားပြီး မှော်စွမ်းအင်များ၏ ပြောင်းလဲမှုကို သေချာ အာရုံခံလိုက်ကာ အလင်းတန်း တစ်ခုအလား လျင်မြန်စွာ ပျံသန်းသွားလေတော့သည်။

ဤကမ္ဘာနယ်မြေလေးထဲတွင် မြေဓာတ် မှော်စွမ်းအင်များက အပြင်ဘက်ထက် အများကြီး ပိုမို ပြည့်နှက်နေပြီး နေရာ မတူညီသည်နှင့်အမျှ အဆက်မပြတ် ပြောင်းလဲနေလေသည်။

ရွှေရောင် သံချပ်ကာ သက်တော်စောင့် ပြောစကားအရ ဒုတိယ အထပ်သို့ သွားမည့် ဝင်ပေါက်က မှော်စွမ်းအင် အပြည့်နှက်ဆုံး နေရာတွင် ရှိလေသည်။

ထို့ကြောင့် မြေဓာတ် စွမ်းအင် အပြည့်နှက်ဆုံး နေရာသို့ သွားရန်သာ လိုအပ်လေသည်။ မုန်လဲ့က အောက်ဆုံး အထပ်များကို သိပ်ပြီး စိတ်မဝင်စားဘဲ အပေါ်ထပ်များကိုသာ သွားကြည့်ချင်နေသဖြင့် အချိန်ဖြုန်းမနေချင်တော့ပေ။

လေအဟုန်ဖြင့် လျှပ်စီးအလား အလွန် လျင်မြန်စွာ ပျံသန်းသွားလေသည်။

"ဝုန်း ဝုန်း ဝုန်း"

အရှေ့ဘက်မှ ပြင်းထန်သော တိုက်ခိုက်သံများ ရုတ်တရက် ထွက်ပေါ်လာရာ မုန်လဲ့ ငုံ့ကြည့်လိုက်သောအခါ ခေါင်းတွင် ငွေရောင် ဦးချို ပါရှိသော လူသန်ကြီး တစ်ယောက်က အာဖရိက ဆင် အရွယ်အစားခန့်ရှိသော ကင်းမြီးကောက် တစ်အုပ်၏ ဝိုင်းဝန်း တိုက်ခိုက်ခြင်းကို ခံနေရသည်ကို တွေ့လိုက်ရလေသည်။

ဤကင်းမြီးကောက်များက မာကျောသော အခွံများကို ဝတ်ဆင်ထားပြီး တစ်ကိုယ်လုံး သဲဝါရောင် ရှိကာ အပေါ်သို့ ထောင်နေသော အမြီးများကသာ ထူးဆန်းသော သွေးနီရောင် ရှိနေကြပြီး အရေအတွက်အားဖြင့် အကောင် နှစ်ဆယ်ခန့် ရှိလေသည်။

'အဆင့်ခုနစ် မှော်သားရဲ သွေးနီရောင် အမြီး ကင်းမြီးကောက်လား'

မုန်လဲ့က လက်ကို တစ်ချက် ဝှေ့ယမ်းလိုက်ရာ လေဓား တစ်လက် ထွက်ပေါ်လာပြီး နှစ်ဆယ် အဖြစ် ကွဲထွက်သွားကာ သွေးနီရောင် အမြီး ကင်းမြီးကောက်များ၏ ခန္ဓာကိုယ်များထဲသို့ အတိအကျ ဝင်ရောက်သွားလေသည်။

"ဒင်... သွေးနီရောင် အမြီး ကင်းမြီးကောက် ၁ ကောင် သတ်ဖြတ်သည့်အတွက် ရွှေဒင်္ဂါး ၁၃၀၀၀၀ ရရှိပါသည်"

"ဒင်... သွေးနီရောင် အမြီး ကင်းမြီးကောက် ၁ ကောင် သတ်ဖြတ်သည့်အတွက် ရွှေဒင်္ဂါး ၁၂၀၀၀၀ ရရှိပါသည်"

"ဒင်..."

မျက်စိတစ်မှိတ် အတွင်းမှာပင် သွေးနီရောင် အမြီး ကင်းမြီးကောက် အကောင် ၂၀ မှာ ခေါင်းပြတ်သွားပြီး မြေပြင်ပေါ်သို့ ပြုတ်ကျကာ ငြိမ်သက်သွားကြလေတော့သည်။

"...."

"ဘာအခြေအနေလဲ" ဝိုင်းဝန်း တိုက်ခိုက်ခံနေရသော ငွေရောင် ဦးချိုနှင့် လူသန်ကြီးမှာ လုံးဝ ကြောင်အမ်းသွားလေတော့သည်။