အခန်း ၁၄၆

အခန်း ၁၄၆။ အဆင့်ကိုး မှော်သားရဲများကို ဝက်များ၊ ခွေးများအလား သတ်ဖြတ်ခြင်း

"ဒင်... သွေးနီရောင် အမြီး ကင်းမြီးကောက် ၁ ကောင် သတ်ဖြတ်သည့်အတွက် ရွှေဒင်္ဂါး ၁၅၀၀၀၀ ရရှိပါသည်"

"ဒင်... ရွှံ့နွံ ဧရာမ မိကျောင်း ၁ ကောင် သတ်ဖြတ်သည့်အတွက် ရွှေဒင်္ဂါး ၁၉၀၀၀၀ ရရှိပါသည်"

"ဒင်... လေဆင်နှာမောင်း မီးတောက် လင်းယုန် ၁ ကောင် သတ်ဖြတ်သည့်အတွက် ရွှေဒင်္ဂါး ၁၇၀၀၀၀ ရရှိပါသည်"

ပထမအထပ်က သဲကန္တာရ ကမ္ဘာ။

ဒုတိယအထပ်က ရေလွှမ်းမိုးနေသော ကမ္ဘာ။

တတိယအထပ်က လေဆင်နှာမောင်း ကမ္ဘာ။

စတုတ္ထအထပ်က မီးတောက် ကမ္ဘာ။

ပဉ္စမအထပ်...

မုန်လဲ့က အပေါ်သို့ တစ်လျှောက်လုံး တက်သွားပြီး လမ်းတွင် ခဏမျှပင် မရပ်တန့်ခဲ့ပေ။ သုံးနာရီ မပြည့်ခင်မှာပင် နဂါးနတ်ဘုရား မျှော်စင် အထပ် ၁၁ သို့ ရောက်ရှိသွားရာ မုန်လဲ့က ကွာခြားမှုကို ချက်ချင်း ခံစားလိုက်ရလေသည်။

ပထမ ဆယ်ထပ်တွင် မှော်စွမ်းအင် တစ်မျိုးတည်းကသာ ပြည့်နှက်နေခဲ့သည်။ သို့သော် အထပ် ၁၁ သို့ ရောက်သောအခါ မှော်စွမ်းအင် နှစ်မျိုးက အထူး ပြည့်နှက်နေပြီး ၎င်းတို့မှာ မြေဓာတ် စွမ်းအင်နှင့် ရေဓာတ် စွမ်းအင်တို့ ဖြစ်ကြလေသည်။

ဤနေရာက ရွှံ့နွံများနှင့် ပြည့်နှက်နေသော ကမ္ဘာနယ်မြေလေး တစ်ခု ဖြစ်ပြီး အနံ့အသက်များ ဆိုးရွားကာ အဆိပ်ငွေ့များ ရစ်သိုင်းနေပြီး အမှိုက်ပုံကြီး တစ်ခုသို့ ရောက်သွားသကဲ့သို့ ဖြစ်နေလေသည်။

မုန်လဲ့၏ ထက်မြက်သော အာရုံခံနိုင်စွမ်းဖြင့် ရွှံ့နွံများထဲတွင် ပုန်းကွယ်နေသော အစွမ်းထက်သည့် အရှိန်အဝါများကို အာရုံခံမိနေပြီး အချိန်မရွေး ရုတ်တရက် တိုက်ခိုက်လာနိုင်လေသည်။

'ပထမ ဆယ်ထပ်က အများအားဖြင့် အဆင့်ခုနစ် မှော်သားရဲတွေပဲ အများဆုံးမှ အဆင့်ရှစ် မှော်သားရဲတွေ ရှိတာ'

'ဒီအထပ်မှာတော့ အဆင့်ကိုး မှော်သားရဲတွေ စပြီး ထွက်လာပြီ'

'ပိုမြင့်တဲ့ အထပ်တွေမှာဆိုရင် မြင့်မြတ်သောနယ်မြေ မှော်သားရဲတွေ ထွက်လာမလား မသိဘူး'

မုန်လဲ့က နှုတ်ခမ်းကို သပ်လိုက်ပြီး လောဘကြီးသော အပြုံးတစ်ခု ပေါ်လာကာ "တကယ်ပဲ နဂါးနတ်ဘုရား မျှော်စင်က ငါ့အတွက် အသင့်တော်ဆုံး လေ့ကျင့်ရေး နေရာပဲ" ဟု ပြောလိုက်လေသည်။

အရင်တုန်းက သူ မှော်သားရဲ တောင်တန်းမှာ ပုရွက်ဆိတ် လှိုင်းလုံးကြီးကို ကာကွယ်တုန်းက ပိုက်ဆံ အများကြီး ရခဲ့ပြီး စနစ်မှာ ငွေသုံးကာ စွမ်းအားတွေ အများကြီး တက်လာခဲ့လေသည်။

သို့သော် ထိုအချိန်မှစ၍ ရွှေဒင်္ဂါး ဝင်ငွေ အလွန် နည်းပါးသွားပြီး စွမ်းအားမှာလည်း ရှေ့ဆက် မတိုးနိုင်တော့သဖြင့် မုန်လဲ့ အလွန် စိတ်ပူနေခဲ့ရသည်။ ဖလှယ်ရေးပြိုင်ပွဲကို ဝင်ပြိုင်ရမည် မဟုတ်ပါက သူ ကျောင်းပြီးတာနဲ့ မှော်သားရဲများကို သွားရောက် သတ်ဖြတ်နေလောက်ပြီ ဖြစ်လေသည်။

အခုတော့ အဆင်ပြေသွားပြီ။

မုန်လဲ့က ပိုက်ဆံရှာရန် ပို၍ သင့်တော်သော နေရာတစ်ခုကို ရှာတွေ့သွားခဲ့လေသည်။

ထိုနေရာမှာ နဂါးနတ်ဘုရား မျှော်စင်ပင် ဖြစ်လေသည်။

နဂါးနတ်ဘုရား မျှော်စင်တွင် ကမ္ဘာနယ်မြေလေး ၁၀၀ ပါဝင်ပြီး ထိုအထဲတွင် မရေမတွက်နိုင်သော မှော်သားရဲများနှင့် ဒေသခံ သက်ရှိများ နေထိုင်ကြလေသည်။

အခြားသူများ၏ အမြင်တွင် ဤအရာများက ပိုမို မြင့်မားသော အဆင့်သို့ တက်လှမ်းရန် ဟန့်တားနေသော အတားအဆီးများ ဖြစ်သော်လည်း မုန်လဲ့၏ အမြင်တွင်တော့ တောက်ပနေသော ရွှေတောင်ကြီးများပင် ဖြစ်လေသည်။

'အဆင့်ရှစ် မှော်သားရဲတွေက ရွှေဒင်္ဂါး တစ်သန်းကနေ စတယ်'

'အဆင့်ကိုး မှော်သားရဲတွေက သန်းဆယ်ချီ ရနိုင်တယ်'

'မြင့်မြတ်သောနယ်မြေ မှော်သားရဲတွေဆိုရင်တော့ ပြောနေစရာတောင် မလိုတော့ဘူး'

'အဆင့်တက်ခါစ မြေအောက် မိစ္ဆာ ပင့်ကူ ဘုရင် တစ်ကောင်တည်းကတင် ငါ့ကို ၅.၂ ဘီလီယံ အပေါင်း ၆.၁ ဘီလီယံ ဆိုတော့ စုစုပေါင်း ရွှေဒင်္ဂါး ၁၁.၃ ဘီလီယံတောင် ရစေခဲ့တာ'

နဂါးနတ်ဘုရား မျှော်စင်က မုန်လဲ့အတွက် မည်သည့် အဓိပ္ပာယ် ရှိကြောင်းကို စိတ်ကူးကြည့်နိုင်ပေသည်။

'စနစ် အပေါင်း နဂါးနတ်ဘုရား မျှော်စင် ညီမျှခြင်း အမိုက်ဆုံး လက်နက်ပဲ'

"ဟားဟား ပိုက်ဆံရှာတဲ့ လမ်းကြောင်းက အခုကစပြီး ဖြောင့်ဖြူးသွားပြီ"

"ဂလုံ ဂလုံ"

"ဂလုံ ဂလုံ"

မုန်လဲ့ ဝမ်းသာအားရ ရယ်မောနေစဉ် မလှမ်းမကမ်းရှိ အနံ့အသက်ဆိုးရွားသော ရွှံ့နွံထဲမှ ပူစီဖောင်း အချို့ ပလုံစီ ထွက်လာလေသည်။

နောက်တစ်စက္ကန့်တွင် ညှီနံ့ ပြင်းပြင်းတစ်ခုက မျက်နှာဆီသို့ ရိုက်ခတ်လာလေသည်။

မုန်လဲ့ လှည့်ကြည့်လိုက်ရာ အရိပ်မည်း တစ်ခုက အလွန် လျင်မြန်သော အမြန်နှုန်းဖြင့် ပျံသန်းဝင်ရောက်လာပြီး မျက်စိတစ်မှိတ် အတွင်းမှာပင် အနားသို့ ရောက်ရှိလာလေသည်။

"ဖောင်း"

မုန်လဲ့က လက်ညှိုး တစ်ချက် ထိုးလိုက်ရာ ငွေရောင် လျှပ်စစ်လှိုင်းများ တောက်ပနေသော မိုးကြိုးလှံ တစ်ချောင်း တိတ်ဆိတ်စွာ ထွက်ပေါ်လာပြီး အရိပ်မည်း၏ ပါးစပ်ကြီးကို ချက်ချင်း ဖောက်ထွင်းသွားလေသည်။

"ဂါး"

အရိပ်မည်းက လေထဲတွင် ချက်ချင်း တောင့်တင်းသွားပြီး မျက်လုံးများထဲတွင် ယုံကြည်နိုင်စရာ မရှိမှုများ ပြည့်နှက်နေလေသည်။ ၎င်းက ခိုးကြောင်ခိုးဝှက် တိုက်ခိုက်ခဲ့ခြင်း ဖြစ်သော်လည်း ဤလူသားက အဘယ်ကြောင့် နောက်မှ လှုပ်ရှားပြီး အရင် ရောက်လာရသနည်း။

သို့သော် ဝမ်းနည်းစရာကောင်းသည်မှာ ဤမေးခွန်း၏ အဖြေကို ၎င်း ဘယ်တော့မှ သိရတော့မည် မဟုတ်ပေ။ ကြမ်းတမ်းသော မိုးကြိုးလှံက ပေါက်ကွဲသွားပြီး ၎င်း၏ ခေါင်းကို တစ်စစီ ဖြစ်အောင် ဖောက်ခွဲပစ်လိုက်လေတော့သည်။

"ဒင်... ရေမည်း မျှော့ ၁ ကောင် သတ်ဖြတ်သည့်အတွက် ရွှေဒင်္ဂါး ၁၃၉၀၀၀၀ ရရှိပါသည်"

'ရွှေဒင်္ဂါး ၁.၃၉ သန်း'

'မဆိုးပါဘူး'

မုန်လဲ့က လက်ကို ဝှေ့ယမ်းကာ ရေမည်း မျှော့၏ မှော်အမြုတေကို သိမ်းဆည်းလိုက်ပြီးနောက် မှော်ကော်ဇောပျံကို ထုတ်ကာ ဆက်လက် ထွက်ခွာသွားလေသည်။

သူက လေထဲတွင် ပျံသန်းနိုင်သော်လည်း ဤကဲ့သို့သော နေရာမျိုးတွင် ပို၍ နှိမ့်ချစွာ သွားလာခြင်းက ပိုကောင်းမည်ဟု မုန်လဲ့ ထင်မြင်မိလေသည်။ ထိုသို့ ပြုလုပ်ခြင်းဖြင့် အမှောင်ထဲရှိ မှော်သားရဲများကို သူ့အား တိုက်ခိုက်လာအောင် မြှူဆွယ်နိုင်မည် ဖြစ်လေသည်။

'အဲဒီလိုမှ ပိုက်ဆံ ရှာလို့ ရမှာပေါ့'

အမှန်တကယ်လည်း ထိုသို့ပင် ဖြစ်လေသည်။ သူက မှော်ကော်ဇောပျံကို မောင်းနှင်နေခြင်းမှာ အဆီတုံးကြီး တစ်တုံးက လမ်းပေါ်တွင် လျှောက်သွားနေသကဲ့သို့ ဖြစ်နေပြီး မရေမတွက်နိုင်သော မှော်သားရဲများ၏ တပ်မက်မှုကို ဆွဲဆောင်နိုင်ခဲ့လေသည်။

"ဒင်... ရေမည်း မျှော့ ၁ ကောင် သတ်ဖြတ်သည့်အတွက် ရွှေဒင်္ဂါး ၁၃၆၀၀၀၀ ရရှိပါသည်"

"ဒင်... အမြီးခြောက်ချောင်း အဆိပ် ကင်းခြေများ ၁ ကောင် သတ်ဖြတ်သည့်အတွက် ရွှေဒင်္ဂါး ၁၄၈၀၀၀၀ ရရှိပါသည်"

"ဒင်... မြစိမ်းရောင် မျက်လုံး ရွှေဖားပြုတ် ၁ ကောင် သတ်ဖြတ်သည့်အတွက် ရွှေဒင်္ဂါး ၂၇၁၀၀၀၀ ရရှိပါသည်"

"ဒင်..."

မုန်လဲ့က လမ်းတစ်လျှောက်လုံး သတ်ဖြတ်လာခဲ့ရာ အဆင့်ရှစ် မှော်သားရဲများ တစ်ကောင်ပြီး တစ်ကောင် သူ၏ လက်အောက်တွင် အသက်ဆုံးရှုံးခဲ့ရလေသည်။ အထပ် ၁၂ သို့ သွားမည့် မှော်အစီအရင် အနီးသို့ ရောက်ခါနီးတွင် နောက်ဆုံး၌ အဆင့်ကိုး မှော်သားရဲ တစ်ကောင်နှင့် တွေ့ဆုံခဲ့လေသည်။

အရပ် မီတာ ငါးဆယ်ခန့် မြင့်ပြီး တစ်ကိုယ်လုံး နှင်းလို ဖြူဖွေးကာ သံမဏိအပ်များကဲ့သို့ မွေးကြမ်းများက တစ်ကိုယ်လုံးတွင် ထောင်မတ်နေပြီး ကြွက်သားများက အဖုအထစ် ထွက်နေကာ ပေါက်ကွဲအားများ ပြည့်နှက်နေလေသည်။

ဧရာမ မျောက်ဝံကြီးနှင့် တူသော်လည်း သွေးနီရောင် ထူးဆန်းသော မျက်လုံး လေးလုံး ပါရှိပြီး လက်နှစ်ဖက်၊ ခြေနှစ်ဖက် ရှိသည့်အပြင် ငါးဆူးတောင် နှစ်စုံလည်း ပိုနေသေးလေသည်။

'အဆင့်ကိုး မှော်သားရဲ သွေးနီရောင် မျက်လုံး ရေမျောက်ဝံ'

မုန်လဲ့ ချက်ချင်း ပြုံးရွှင်သွားလေသည်။ အဆင့်ကိုး မှော်သားရဲ ဆိုသည်မှာ ရွှေဒင်္ဂါး သန်းဆယ်ချီ တန်ကြေးရှိရာ နောက်ဆုံးတော့ အကျိုးအမြတ် အကြီးကြီး ရတော့မည် ဖြစ်လေသည်။

"ဂါး"

သွေးနီရောင် မျက်လုံး ရေမျောက်ဝံက ရင်ဘတ်ကို တဒုန်းဒုန်း ထုလိုက်ရာ စစ်စည်တော်များကဲ့သို့ မိုးခြိမ်းသံများ ထွက်ပေါ်လာပြီး သွေးစွန်းနေသော ပါးစပ်ကြီးကို ဟကာ အဆက်မပြတ် ဟိန်းဟောက်နေလေသည်။

နောက်တစ်စက္ကန့်တွင် ၎င်းက ဧရာမ လက်ဝါးကြီးကို ရွယ်ကာ မုန်လဲ့ဆီသို့ ဖမ်းဆုပ်လိုက်လေသည်။

"သာမန်အချိန်ဆိုရင်တော့ မင်းနဲ့ ကစားပေးလို့ ရသေးတယ် ဒါပေမဲ့ ဒီတစ်ခါ ငါ့မှာ အချိန် သိပ်မရှိဘူး အားနာပါတယ်"

မုန်လဲ့၏ ကိုယ်ဟန်က တစ်ချက် လှုပ်ရှားသွားပြီး ထိုနေရာမှ ပျောက်ကွယ်သွားကာ တစ်ဖန် ပြန်ပေါ်လာသောအခါ သွေးနီရောင် မျက်လုံး ရေမျောက်ဝံ၏ အနောက်သို့ ရောက်ရှိနေပြီး ပြင်းထန်သော လက်သီး တစ်ချက်ကို ထိုးချလိုက်လေသည်။

"ခွပ်"

သွေးနီရောင် မျက်လုံး ရေမျောက်ဝံ၏ နောက်စေ့မှာ ကြမ်းတမ်းသော ခွန်အားကြောင့် တိုက်ရိုက် ကြေမွသွားပြီး စွမ်းအင်များက ခန္ဓာကိုယ်ထဲသို့ ထိုးဖောက် ဝင်ရောက်သွားကာ ဦးနှောက်ကို ချက်ချင်း တစ်စစီ ဖြစ်အောင် မွှေနှောက်လိုက်သဖြင့် ပွဲချင်းပြီး သေဆုံးသွားလေတော့သည်။

"ဒင်... သွေးနီရောင် မျက်လုံး ရေမျောက်ဝံ ၁ ကောင် သတ်ဖြတ်သည့်အတွက် ရွှေဒင်္ဂါး ၁၂၀၀၀၀၀၀ ရရှိပါသည်"

'ကျွတ် ကျွတ် အဆင့်ကိုး မှော်သားရဲကို သတ်တာက ပိုက်ဆံရတာ ပိုမြန်တာပဲ'

မုန်လဲ့က လက်တစ်ချက် လှုပ်ရှားကာ သွေးနီရောင် မျက်လုံး ရေမျောက်ဝံ၏ မှော်အမြုတေကို ယူလိုက်ပြီး ဝမ်းသာအားရ ထွက်ခွာသွားလေသည်။

ဒီ အဆင့်ကိုး မှော်သားရဲ အလောင်းကိုတော့ ဒီကမ္ဘာနယ်မြေလေးထဲက ဒေသခံ မှော်သားရဲတွေပဲ စားသုံးပါစေတော့။ သူက သိပ်ပြီး မျက်စိမကျတော့ပေ။

"ဝှစ်"

မှော်အစီအရင် လင်းလက်သွားပြီး မုန်လဲ့က ထိုနေရာမှ ပျောက်ကွယ်သွားကာ တစ်ဖန် ပြန်ပေါ်လာသောအခါ နဂါးနတ်ဘုရား မျှော်စင် အထပ် ၁၂ သို့ ရောက်ရှိနေပြီ ဖြစ်လေသည်။

ပတ်ဝန်းကျင်တွင် သစ်ပင်များ ထူထပ်စွာ ပေါက်ရောက်နေသော မူလ သစ်တောကြီး ရှိနေပြီး မီတာ ရာချီ မြင့်မားသော သစ်ပင်ကြီးများကို နေရာတိုင်းတွင် တွေ့နိုင်ကာ မျက်စိတစ်ဆုံး သစ်တောကြီးသာ ရှိနေလေသည်။

သို့သော် သစ်တော၏ အလယ်ဗဟိုတွင်တော့ ခန့်ညားထည်ဝါသော တောင်ကြီး တစ်တောင် ရှိနေပြီး တောင်ထိပ်မှ မီးခိုးလုံးကြီးများက မီးခိုးတိုင်များအလား ကောင်းကင်သို့ ထိုးတက်နေလေသည်။

တောင်၏ ပတ်လည်တွင်တော့ ခုနလေးတင်မှ ခဲသွားသော အမည်းရောင် ချော်ရည်များနှင့် တောင်တစ်ခွင်လုံး ပြန့်ကျဲနေသော ဖုန်မှုန့်များ၊ မြေဖြူများနှင့် ကျောက်စရစ်ခဲများ ရှိနေလေသည်။

ဒါက အချိန်မရွေး ပေါက်ကွဲနိုင်တဲ့ မီးတောင်ရှင် တစ်လုံးပဲ။

'သစ်တော'

'မီးတောင်'

'ဒီကမ္ဘာရဲ့ သစ်ဓာတ် စွမ်းအင်နဲ့ မီးဓာတ် စွမ်းအင်က အလွန် သက်ဝင်လှုပ်ရှားနေတာပဲ ကြည့်ရတာ သစ်ဓာတ် နိယာမနဲ့ မီးဓာတ် နိယာမကို အခြေခံထားတဲ့ ကမ္ဘာနယ်မြေလေး တစ်ခု ဖြစ်ရမယ်'

မုန်လဲ့က မှော်ကော်ဇောပျံကို ထုတ်ကာ သစ်ဓာတ် စွမ်းအင်နှင့် မီးဓာတ် စွမ်းအင် အပြည့်နှက်ဆုံး နေရာဆီသို့ ဖြည်းညင်းစွာ ပျံသန်းသွားလေသည်။

"ရှူး"

စူးရှသော လေခွဲသံ တစ်ခု ထွက်ပေါ်လာပြီး အဆိပ်ပြင်းသော စပါးအုံးမြွေ တစ်ကောင်အလား နွယ်ပင် တစ်ပင်က သစ်တောထဲမှ ရုတ်တရက် ထွက်လာကာ လျှပ်စီးအလား အမြန်နှုန်းဖြင့် မုန်လဲ့ဆီသို့ ပြေးဝင်လာလေသည်။

"ငါ့ကို ခိုးကြောင်ခိုးဝှက် တိုက်ခိုက်တာလား"

မုန်လဲ့က ဟက်ဟက် ရယ်လိုက်ပြီး ရှောင်လည်း မရှောင်၊ တိုက်လည်း မတိုက်ခိုက်ဘဲ ဤနွယ်ပင်က သူ့ကို ရစ်ပတ်ကာ မြေကြီးပေါ်သို့ ဆွဲချသွားသည်ကို ခွင့်ပြုလိုက်လေသည်။

ခဏအကြာတွင် မုန်လဲ့က လူဆယ်ယောက်ကျော် ဖက်မှ ရနိုင်လောက်သည့် အပင်ထူးဆန်း တစ်ပင်ရှေ့သို့ ရောက်သွားလေသည်။ အပင်ထူးဆန်းက သိပ်မမြင့်သော်လည်း သစ်ပင်ထိပ်မှ နွယ်ပင် မြောက်မြားစွာက ဆံပင်များအလား တွဲလောင်းကျနေပြီး ရှုပ်ပွနေလေသည်။

"ရှူး ရှူး ရှူး"

ထက်ရှသော ဆူးများ ပါရှိသည့် နွယ်ပင်များက ဆန့်ထွက်လာပြီး မုန်လဲ့၏ ခန္ဓာကိုယ်ဆီသို့ အားကုန် ထိုးစိုက်လိုက်ကြလေသည်။ မုန်လဲ့၏ ခန္ဓာကိုယ်ထဲသို့ ထိုးဖောက် ဝင်ရောက်ကာ သူ့ကို လူခြောက် တစ်ယောက် အဖြစ် စုပ်ယူပစ်မည့် ပုံပေါက်နေလေသည်။

"ချွင် ချွင် ချွင်"

သို့သော် အပင်ထူးဆန်း၏ အကြံအစည် မှားယွင်းသွားလေသည်။ ၎င်း၏ ဆူးများက မုန်လဲ့၏ ကိုယ်ပေါ်သို့ ထိုးစိုက်မိသောအခါ သံမဏိ အရိုးပေါ်သို့ ထိုးစိုက်မိသကဲ့သို့ ဖြစ်သွားပြီး မီးပွားများ ဆက်တိုက် ထွက်ပေါ်လာလေသည်။

ထို့အပြင် မုန်လဲ့၏ အရေပြားကို အနည်းငယ်မျှပင် ဖောက်ထွင်းနိုင်ခြင်း မရှိပေ။

'အဆင့်ကိုး မှော်သားရဲ လူစား သစ်ပင် တစ္ဆေ'

"မင်းကို ထိုးခွင့် ပေးထားရင်တောင် မင်း ငါ့ကို နည်းနည်းလေးတောင် ဒဏ်ရာရအောင် လုပ်နိုင်မှာ မဟုတ်ဘူး"