အခန်း ၁၄၈

အခန်း ၁၄၈။ သေဆုံးခြင်းမရှိသော မျှော့ကောင်များ၊ ပါရမီရှင် စာရင်းသို့ ဝင်ရောက်ခြင်း

"ဝုန်း"

ဆူပွက်နေသော ချော်ရည်များက ကြမ်းတမ်းသော ပင်လယ်လှိုင်းလုံးများအလား မုန်လဲ့ကို ချက်ချင်း ဖုံးလွှမ်းသွားပြီး ကြောက်မက်ဖွယ် အပူရှိန်များက မုန်လဲ့ကို လောင်ကျွမ်းကာ ကမ္ဘာမြေ ကာကွယ်ရေး သံချပ်ကာကို အရည်ပျော်စေပြီး မုန်လဲ့ကို ပြာအဖြစ်သို့ ပြောင်းလဲပစ်ရန် ကြိုးစားနေလေသည်။

"ဂါး"

ကျောက်နီ မီးမိစ္ဆာများက ထိုအခြေအနေကို မြင်သောအခါ အောင်ပွဲခံသည့် အသံဖြင့် အော်ဟစ်လိုက်ကြပြီးနောက် ချော်ရည်ကန်ထဲသို့ ပြန်ဆင်းကာ အိပ်စက်ရန် ပြင်ဆင်လိုက်ကြလေသည်။

သူတို့၏ အမြင်တွင် ဤအပြင်လူက သေချာပေါက် သေဆုံးသွားပြီ ဖြစ်ပြီး သူတို့၏ ချော်ရည် တိုက်ခိုက်မှုအောက်တွင် မည်သူမျှ အသက်မရှင်နိုင်ဟု ယုံကြည်နေကြလေသည်။ သူတို့ လက်အောက်တွင် သေဆုံးခဲ့ရသော အပြင်လူများက သန်းရာချီ မက ရှိနေပြီ မဟုတ်ပါလား။

သို့သော် နောက်တစ်စက္ကန့်တွင် ကျောက်နီ မီးမိစ္ဆာများ အံ့အားသင့်သွားကြလေသည်။

မုန်လဲ့။

သူက ဘာဒဏ်ရာမှ မရဘဲ နေရာတွင် ရပ်နေပြီး သူ၏ ကိုယ်ပေါ်ရှိ မှော်ဝတ်ရုံကပင် အသစ်စက်စက် အတိုင်း ရှိနေကာ ထိခိုက်မှု အနည်းငယ်မျှပင် မရှိပေ။

"ဘာ"

ကျောက်နီ မီးမိစ္ဆာများ အလွန် အံ့အားသင့်သွားကြလေသည်။

ထိုအချိန်တွင် မုန်လဲ့က အလင်းတန်း တစ်ခုအလား သူတို့ဆီသို့ ပြေးဝင်လာပြီ ဖြစ်လေသည်။

"ဒိုင်း ဒိုင်း ဒိုင်း"

ဆက်တိုက် ဆိုသလို ထွက်ပေါ်လာသော တိုက်ခိုက်သံများကြားတွင် ကျောက်နီ မီးမိစ္ဆာများ၏ ခေါင်းများက ဖရဲသီး ကွဲသွားသကဲ့သို့ အသီးသီး ပေါက်ကွဲသွားကြလေတော့သည်။

ကျောက်စရစ်ခဲများ လွင့်စင်သွားပြီး ချော်ရည်များ ပန်းထွက်သွားလေသည်။

"ဒင်... ကျောက်နီ မီးမိစ္ဆာ ၁ ကောင် သတ်ဖြတ်သည့်အတွက် ရွှေဒင်္ဂါး ၆၄၀၀၀၀၀၀ ရရှိပါသည်"

"ဒင်... ကျောက်နီ မီးမိစ္ဆာ ၁ ကောင် သတ်ဖြတ်သည့်အတွက် ရွှေဒင်္ဂါး ၆၃၇၀၀၀၀၀ ရရှိပါသည်"

"ဒင်... ကျောက်နီ မီးမိစ္ဆာ ၁ ကောင် သတ်ဖြတ်သည့်အတွက် ရွှေဒင်္ဂါး ၆၂၉၀၀၀၀၀ ရရှိပါသည်"

"ဒင်..."

"ဂါး ဂါး ဂါး"

ကျန်ရှိနေသော ကျောက်နီ မီးမိစ္ဆာများက မျက်နှာများ ဖြူရော်သွားကြပြီး မုန်လဲ့၏ တိုက်ခိုက်မှုမှ လွတ်မြောက်ရန် ချော်ရည်ကန်ထဲသို့ အလျင်စလို ခုန်ဆင်းသွားကြသော်လည်း အချည်းနှီးသာ ဖြစ်လေသည်။

လက်ဖျစ် တစ်ချက် တီးလိုက်သည်။

ကောင်းကင်တွင် အချင်း မီတာ ရာချီရှိသော ဧရာမ ကျောက်တုံးကြီး တစ်တုံး ရုတ်တရက် ပေါ်လာပြီး ထိုချော်ရည်ကန်ကို ဦးတည်ကာ အားကုန် ပစ်ချလိုက်လေသည်။

"ဝုန်း"

ကောင်းကင်နှင့် မြေကြီးကို တုန်လှုပ်စေသော အသံကြီးနှင့်အတူ ဧရာမ ကျောက်တုံးကြီးက ချော်ရည်ကန်၏ အလယ်ဗဟိုသို့ ပြင်းထန်စွာ ဝင်တိုက်သွားပြီး ချော်ရည်များ အများအပြား ပန်းထွက်သွားကာ ချော်ရည်ကန်ထဲတွင် ပုန်းကွယ်နေသော ကျောက်နီ မီးမိစ္ဆာများကို ဖော်ထုတ်လိုက်လေသည်။

ကံမကောင်းသော ကောင်များက ကျောက်တုံးကြီးအောက်တွင် အသားပြားများ အဖြစ် ပြောင်းလဲသွားပြီး ကံကောင်းသော ကောင်များကတော့ ကြီးမားသော ခွန်အားကြောင့် လေထဲသို့ လွင့်ထွက်သွားကာ မုန်လဲ့၏ လက်အောက်တွင် အသက်ဆုံးရှုံးသွားကြလေတော့သည်။

ဤအထပ်တွင် မြင့်မြတ်သောနယ်မြေ မှော်သားရဲများနှင့် မတွေ့ရသော်လည်း အထပ် ၂၁ တွင် နေရာယူထားသော ဤကျောက်နီ မီးမိစ္ဆာများမှာ တကယ်ကို အစွမ်းထက်ပြီး ပထဝီ အနေအထား အားသာချက်ကိုလည်း ရယူထားကြောင်း မုန်လဲ့ ဝန်ခံရမည် ဖြစ်လေသည်။

သူတို့ကို ရင်ဆိုင်ရမည် ဆိုပါက ဖရန်စစ် ကဲ့သို့သော အဆင့်ကိုး အထွတ်အထိပ် စွမ်းအားရှင်များပင်လျှင် သေချာပေါက် အလွန် အန္တရာယ် များမည် ဖြစ်လေသည်။ သတိမထားမိပါက ဤအထပ်တွင်ပင် အသက်ဆုံးရှုံးသွားနိုင်လေသည်။

သို့သော် မုန်လဲ့ကတော့ မတူညီပေ။

ကျောက်နီ မီးမိစ္ဆာများက ပထဝီ အနေအထားနှင့် အရေအတွက် အားသာချက်ကို ရယူထားသော်လည်း သူ၏ ရှေ့တွင်တော့ အလွယ်တကူ ရိတ်သိမ်းနိုင်သော ကြက်သွန်မြိတ်ပင်များသာ ဖြစ်လေသည်။

အဆင့်ကိုး။

မြင့်မြတ်သောနယ်မြေ။

တစ်ဆင့်သာ ကွာခြားသော်လည်း ကောင်းကင်နှင့် မြေကြီးကဲ့သို့ ကွာခြားလှပေသည်။

"ဝှစ်"

ချော်ရည်ကန်က တဖြည်းဖြည်း ငြိမ်သက်သွားပြီး ယခုလေးတင် ဟိန်းဟောက် သောင်းကျန်းနေခဲ့သော ကျောက်နီ မီးမိစ္ဆာများမှာတော့ ထာဝရ အိပ်စက်ခြင်းသို့ ရောက်ရှိသွားကြလေပြီ။

သူတို့ အားလုံး သတ်ဖြတ်ခံလိုက်ရပြီး တစ်ကောင်မှ အသက်မရှင်နိုင်ခဲ့ပေ။

"ရွှေဒင်္ဂါး ၇.၈ ဘီလီယံ ရပြီပဲ"

မုန်လဲ့၏ မျက်နှာပေါ်တွင် အပြုံးများ ထွက်ပေါ်လာပြီး သူ၏ လက်ထဲတွင် လက်သီးဆုပ် အရွယ်အစားခန့်ရှိသော မီးနီရောင် ကျောက်သလင်း တစ်ခု ပေါ်လာလေသည်။

"တကယ်လို့ ကျောက်နီ မီးမိစ္ဆာ မှော်အမြုတေ ၁၂၈ ခုကိုပါ ထည့်တွက်မယ်ဆိုရင် အထပ် ၂၁ က ငါ နဂါးနတ်ဘုရား မျှော်စင်ထဲ ဝင်လာပြီးကတည်းက ဝင်ငွေ အများဆုံး ရတဲ့ အထပ်ပဲ"

"ကျွတ် ကျွတ် မှော်သားရဲတွေကို သတ်ရတာက ပိုက်ဆံရတာ အမြန်ဆုံးပဲ"

"ဟုတ်ပြီ နောက်တစ်ထပ်ကို သွားမယ်"

"မြင့်မြတ်သောနယ်မြေ မှော်သားရဲတွေနဲ့ တွေ့ဖို့ မျှော်လင့်ပါတယ်"

"ဝှစ်"

အထပ် ၂၂။

...

အထပ် ၂၃။

...

အထပ် ၂၄။

...

မုန်လဲ့က ဝါးခြမ်းကို ခွဲသကဲ့သို့ တစ်လျှောက်လုံး အထက်သို့ တက်လာခဲ့ရာ ပျမ်းမျှအားဖြင့် နာရီဝက်လျှင် တစ်ထပ်နှုန်းဖြင့် ဖြတ်ကျော်လာခဲ့ပြီး သူ၏ အမြန်နှုန်းမှာ ယုံကြည်နိုင်စရာ မရှိလောက်အောင် မြန်ဆန်လှကာ ၅ နာရီ အကြာတွင် အထပ် ၃၀ သို့ ရောက်ရှိလာလေသည်။

"ဝုန်း ဝုန်း ဝုန်း"

မုန်လဲ့က လျှပ်စီး တစ်ခုအလား လျင်မြန်စွာ လှုပ်ရှားကာ တိုက်ခိုက်နေပြီး သူ၏ ပတ်လည်တွင်တော့ ရွှံ့နွံများနှင့် ဖွဲစည်းထားကာ တီကောင်များ၊ မျှော့ကောင်များနှင့် တူသော ထူးဆန်းသည့် မှော်သားရဲများ ရှိနေလေသည်။

တစ်ချက် ကြည့်လိုက်ရုံဖြင့် မရေမတွက်နိုင်လောက်အောင် များပြားလှပေသည်။

၎င်းတို့မှာ အဆင့်ကိုး အထွတ်အထိပ် မှော်သားရဲများ - သေဆုံးခြင်းမရှိသော မျှော့ကောင်များပင် ဖြစ်လေသည်။

အဆင့်ကိုး မှော်သားရဲ ဆိုသည်မှာ သိပ်ထူးဆန်းသည့် အရာ မဟုတ်သော်လည်း မုန်လဲ့ကို စိတ်ပျက်စေသည်မှာ ဤမျှော့ကောင်များက လုံးဝ သတ်မသေသည့် ပိုးဟပ်များ ဖြစ်နေခြင်းပင်။

လက်သီးနဲ့ ထိုးတယ်။

မှော်ပညာတွေနဲ့ ပစ်တယ်။

အလကားပဲ။

လုံးဝ အလကားပဲ။

သူတို့ကို ဘယ်လိုမှ သတ်လို့ မရဘူး။

"ကောင်လေး မင်းက ဒီမျှော့ကောင်တွေရဲ့ အားနည်းချက်ကို ရှာတွေ့မှ သူတို့ကို သတ်နိုင်မှာ မဟုတ်ရင် သူတို့က မင်းရဲ့ ခန္ဓာကိုယ်နဲ့ မှော်စွမ်းအင်တွေကို ဖြည်းဖြည်းချင်း ကုန်ခမ်းစေပြီး နောက်ဆုံးမှာ မင်းကို သတ်ပစ်လိမ့်မယ်" အဖိုးအိုက အချိန်ကိုက် သတိပေးလိုက်လေသည်။

"အားနည်းချက် ရှာရမယ် ဆိုတာတော့ သိပါတယ် ဒါပေမဲ့ ဒီလို ကောင်မျိုးတွေမှာ တကယ်ပဲ အားနည်းချက် ရှိလို့လား"

မုန်လဲ့လည်း ဤပြဿနာကို စဉ်းစားနေမိလေသည်။

အထပ် ၂၁ မှ စတင်ကာ မြင့်မြတ်သောနယ်မြေ မှော်သားရဲများနှင့် မတွေ့ရသော်လည်း အလွန် အစွမ်းထက်သည့် အဆင့်ကိုး မှော်သားရဲ အုပ်စုများနှင့် တွေ့ခဲ့ရပြီး အရေအတွက် များပြားရုံသာမက လုံးဝ ရင်ဆိုင်ရန် ခက်ခဲလှပေသည်။

တစ်ခုခုဆိုရင် ခံနိုင်ရည်က အရမ်း ကောင်းပြီး သတ်ဖို့ ခက်ခဲတယ်။

ဒါမှမဟုတ်ရင် အသက်စွမ်းအင်က အရမ်း ပြည့်နှက်နေပြီး ဘယ်လို သတ်သတ် မသေဘူး။

ဒါမှမဟုတ်ရင် မဆုံးနိုင်အောင် ထွက်လာပြီး သတ်လို့ မကုန်ဘူး။

ဒီအရာတွေကို မုန်လဲ့က စိတ်ရှည်လက်ရှည်ဖြင့် တစ်ကောင်ချင်းစီ ဖြေရှင်းခဲ့သော်လည်း အထပ် ၃၀ သို့ ရောက်သောအခါ တွေ့ရသော ဤမျှော့ကောင် အုပ်စုကတော့ သူ့ကို အလွန် ခေါင်းခဲစေခဲ့လေသည်။

ရိုက်ခွဲလိုက်ရင် မူလ ပုံစံ ပြန်ဖြစ်သွားတယ်။

မှော်ပညာနဲ့ မီးရှို့၊ ခုတ်ထစ်လိုက်ရင်...

ခဏလေး အတွင်းမှာပဲ ဘာမှ မဖြစ်သလို ပြန်ကောင်းသွားတယ်။

ရုပ်ပိုင်းဆိုင်ရာ တိုက်ခိုက်မှုတွေ အလကားပဲ။

မှော်ပညာ တိုက်ခိုက်မှုတွေကိုလည်း ကာကွယ်နိုင်စွမ်း ရှိတယ်။

ဒါကို ဘယ်လို ဆက်ပြီး တိုက်ရမှာလဲ။

"ရုပ်ပိုင်းဆိုင်ရာ တိုက်ခိုက်မှုနဲ့ မှော်ပညာ တိုက်ခိုက်မှုတွေ အလကားပဲ ဆိုရင် စိတ်စွမ်းအင် တိုက်ခိုက်မှုကို စမ်းကြည့်ပေါ့"

အဖိုးအိုက သတိပေးလိုက်လေသည်။ "ဘယ်လို သက်ရှိမျိုးမှာမဆို အားနည်းချက် ရှိတာချည်းပဲ သေဆုံးခြင်းမရှိတဲ့ မျှော့ကောင်တွေလည်း ချွင်းချက် ဖြစ်မှာ မဟုတ်ဘူး"

"ကျွန်တော်လည်း အဲဒီလိုပဲ တွေးနေတာ"

မုန်လဲ့က လေးနက်စွာ ခေါင်းညိတ်လိုက်ပြီး သူ၏ စိတ်စွမ်းအင်များက ဒီရေအလား ထွက်ပေါ်လာကာ အနီးဆုံးတွင် ရှိနေသော မျှော့ကောင်များဆီသို့ ဖိနှိပ်သွားလေသည်။

"ဝုန်း ဝုန်း ဝုန်း"

မုန်လဲ့၏ စိတ်စွမ်းအင်က အထွတ်အထိပ်သို့ ရောက်ရှိနေပြီး မျှော့ကောင်များ၏ အသိဉာဏ် ပင်လယ်ကို အရူးအမူး ဝင်ရောက် တိုက်ခိုက်လိုက်ရာ မုန်လဲ့ကို အံ့အားသင့်စေသည်မှာ မျှော့ကောင်များ၏ စိတ်စွမ်းအင်က သူ ထင်ထားသည်ထက် အများကြီး ပိုမို အားနည်းနေခြင်းပင် ဖြစ်လေသည်။

သာမန် စိတ်စွမ်းအင် တိုက်ခိုက်မှု တစ်ခုတည်းဖြင့်ပင် မျှော့ကောင် အချို့၏ အသိဉာဏ် ပင်လယ်ကို လွယ်ကူစွာ ဖျက်ဆီးပစ်နိုင်ခဲ့ပြီး ၎င်းတို့မှာ မျက်လုံးများ ပြူးကျယ်သွားကာ ချက်ချင်း ပျော့ခွေ ကျသွားကြလေတော့သည်။

"ဒင်... သေဆုံးခြင်းမရှိသော မျှော့ကောင် ၁ ကောင် သတ်ဖြတ်သည့်အတွက် ရွှေဒင်္ဂါး ၉၄၀၀၀၀၀၀ ရရှိပါသည်"

"သေသွားပြီလား"

မုန်လဲ့၏ စိတ်ဓာတ်များ တက်ကြွသွားပြီး ဆက်လက် တိုက်ခိုက်လိုက်လေသည်။

"ဖောင်း ဖောင်း ဖောင်း"

မျှော့ကောင်များက ရိတ်သိမ်းခံနေရသော ကြက်သွန်မြိတ်ပင်များအလား အစုလိုက် အပြုံလိုက် လဲကျသွားကြပြီး မကြာမီမှာပင် မျှော့ကောင်များ အားလုံး သေဆုံးသွားကြလေတော့သည်။

"ဒင်... သေဆုံးခြင်းမရှိသော မျှော့ကောင် ၁ ကောင် သတ်ဖြတ်သည့်အတွက် ရွှေဒင်္ဂါး ၉၄၉၀၀၀၀၀ ရရှိပါသည်"

"ဒင်... သေဆုံးခြင်းမရှိသော မျှော့ကောင် ၁ ကောင် သတ်ဖြတ်သည့်အတွက် ရွှေဒင်္ဂါး ၉၆၂၀၀၀၀၀ ရရှိပါသည်"

စနစ်၏ အသိပေးသံများ အဆက်မပြတ် ထွက်ပေါ်လာပြီး ရွှံ့နွံထဲသို့ ပြုတ်ကျသွားသော မျှော့ကောင် အလောင်းများကို ကြည့်ကာ မုန်လဲ့က သက်ပြင်းချလိုက်လေသည်။

"ကျောင်းအုပ်ကြီး နဂါးနတ်ဘုရား မျှော်စင်ကို ဘာလို့ ဖြတ်ကျော်ဖို့ ခက်ခဲတယ် လို့ ပြောကြလဲ ဆိုတာကို အခုတော့ ကျွန်တော် သဘောပေါက်သွားပြီ"

"ပထမ ၁၀ ထပ်က လွယ်တယ်"

"အထပ် ၁၁ ကနေ စပြီး အဆင့်ကိုး မှော်သားရဲတွေ ထွက်လာတော့ အခက်အခဲက တဖြည်းဖြည်း တိုးလာတယ်"

"အထပ် ၂၁ ကို ရောက်တော့ အဆင့်ကိုး မှော်သားရဲတွေက ပိုပိုပြီး များလာတယ် ပိုပိုပြီး အစွမ်းထက်လာတယ် ပိုပိုပြီး ရင်ဆိုင်ဖို့ ခက်လာတယ် အခက်အခဲက ဆတက်ထမ်းပိုး တိုးလာတာပဲ"

"မြင့်မြတ်သောနယ်မြေ အောက်က လူတွေဆိုရင် အထပ် ၂၅ ကိုတောင် ဖြတ်ကျော်ဖို့ ခက်ခဲမှာပဲ"

"အခုမှ သိတာလား"

အဖိုးအိုက ပြုံး၍ ပြောလိုက်လေသည်။ "ပထမ ၁၀ ထပ်က အလွယ်ဆုံးပဲ သာမန် ပါရမီရှင်တွေက အံကြိတ်ပြီး ကြိုးစားရင် အောင်မြင်စွာ ဖြတ်ကျော်နိုင်ပါတယ်"

"အထပ် ၁၁ ကနေ စပြီး နည်းနည်း ခက်ခဲလာပြီ ဖလှယ်ရေးပြိုင်ပွဲဝင် ၉၀ ရာခိုင်နှုန်းက ဒီ ၁၀ ထပ်မှာ ပိတ်မိနေပြီး ရှေ့ဆက် မတိုးနိုင်ကြတော့ဘူး"

"အထပ် ၂၁ ကနေ ၃၀ အထိ အထူးသဖြင့် နောက်ဆုံး ၅ ထပ်မှာတော့ အဆင့်ကိုး စွမ်းအားရှင်တွေ ဖြတ်ကျော်ဖို့ ဆိုတာ လုံးဝ မဖြစ်နိုင်သလောက်ပဲ"

"အရေအတွက် အများကြီးနဲ့ ရင်ဆိုင်ဖို့ အရမ်း ခက်ခဲတဲ့ အဆင့်ကိုး မှော်သားရဲတွေကို ရင်ဆိုင်ရတဲ့ အခါမှာ သွေးစစ်တဲ့ ဧရာမနဂါးတွေတောင် ဒူးထောက်ရမှာပဲ"

"တကယ်ပဲ"

မုန်လဲ့က ဖြည်းညင်းစွာ ခေါင်းညိတ်လိုက်လေသည်။

"ဒါကြောင့် အထပ် ၃၀ ကို ဖြတ်ကျော်နိုင်တဲ့ သူတွေ အများစုက မြင့်မြတ်သောနယ်မြေ စွမ်းအားရှင်တွေ ဒါမှမဟုတ် မြင့်မြတ်သောနယ်မြေရဲ့ တိုက်ခိုက်ရေး စွမ်းအား ရှိတဲ့သူတွေချည်းပဲ"

အဖိုးအိုက ပြုံးရွှင်စွာ ပြောလိုက်လေသည်။ "ဒီအဆင့်ကို ရောက်ပြီဆိုရင် နဂါးနတ်ဘုရား ပါရမီရှင် စာရင်းမှာ ပါဝင်ဖို့ လုံလောက်နေပါပြီ"

"..."

မုန်လဲ့ ကြောင်အမ်းသွားပြီး "ဒီလိုဆိုတော့ ကျွန်တော့် နာမည်က နဂါးနတ်ဘုရား ပါရမီရှင် စာရင်းမှာ ပေါ်နေလောက်ပြီပေါ့" ဟု အံ့ဩတကြီး မေးလိုက်လေသည်။

"ဟုတ်တယ်"