အခန်း ၁၅၀

အခန်း ၁၅၀။ သံမဏိ လေမျောက်ဝံ၊ လေဓာတ် နိယာမ အပိုင်းအစ

နဂါးနတ်ဘုရား မျှော်စင်၊ အထပ် ၃၂။

ဤနေရာက အဆုံးမရှိ ကျယ်ဝန်းလှသော ငွေရောင် လွင်ပြင်ကြီး ဖြစ်လေသည်။

မျက်စိတစ်ဆုံး လှမ်းကြည့်လိုက်လျှင်...

ပေါင်းပင် မရှိ။

သစ်ပင် မရှိ။

တောင်ကုန်း မရှိ။

သက်ရှိဟူ၍ လုံးဝ မရှိပေ။

ဤနေရာက သက်ရှိများ နေထိုင်ခွင့် မရှိသော တားမြစ်နယ်မြေ တစ်ခုနှင့် တူနေပေသည်။ ငွေရောင် မြေကြီးပေါ်တွင် လေပြင်းများ တိုက်ခတ်နေပြီး တစ္ဆေ သရဲများ အော်ဟစ်နေသကဲ့သို့ အသံများ ထွက်ပေါ်နေလေသည်။

ကောင်းကင်ယံတွင်မူ မိုးခြိမ်းသံများ ဆူညံနေပြီး တိမ်တိုက်များကြား၌ လျှပ်စီးများ ပြေးလွှားနေကာ ကြောက်မက်ဖွယ်ကောင်းသော အသံများ ထွက်ပေါ်နေလေသည်။

'ဒီမြေကြီးက... သတ္တုတွေနဲ့ ဖွဲ့စည်းထားတာပဲ'

မုန်လဲ့က လေပြင်းများ တိုက်ခတ်ပြီး မိုးခြိမ်းသံများ ဆူညံနေသော ဤအထီးကျန် ကမ္ဘာကြီးကို ရပ်ကြည့်နေရင်း သူ၏ မျက်လုံးများထဲတွင် မျှော်လင့်ချက်များ ပြည့်နှက်နေလေသည်။

အထပ် ၃၁ တွင် သူမျှော်လင့်ထားသည့်အတိုင်း မြင့်မြတ်သောနယ်မြေ မှော်သားရဲနှင့် တွေ့ဆုံခဲ့ရလေသည်။ ရွှေရောင် ကျောပြင် နွားကင်းမြီးကောက် တစ်ကောင်တည်းသာ ဖြစ်သော်လည်း ရွှေဒင်္ဂါး ၉.၈ ဘီလီယံတောင် ရရှိခဲ့လေသည်။

မှော်အမြုတေကိုပါ ထည့်တွက်မည်ဆိုလျှင် နှစ်ဆ အမြတ်ပင် ဖြစ်လေသည်။

တကယ်ကို မိုက်လှပေသည်။

'ဒီအထပ်လည်း ငါ့ကို စိတ်ပျက်အောင် မလုပ်ဖို့ မျှော်လင့်ပါတယ်'

မုန်လဲ့က နှုတ်ခမ်းကို သပ်လိုက်ပြီး မှော်စွမ်းအင် အပြည့်နှက်ဆုံး နေရာဆီသို့ ပျံသန်းသွားလေသည်။ အထပ် ၃၁ မှစတင်၍ မှော်ကော်ဇောပျံ သုံးရန် မလိုအပ်တော့ပေ။

သူ၏ အမြန်နှုန်းက မမြန်မနှေးဖြင့် မသိမသာ ခရီးအတော်ဝေးဝေးသို့ ရောက်ရှိသွားပြီး မှော်စွမ်းအင် အပြည့်နှက်ဆုံး နေရာသို့ ရောက်သောအခါ ငွေရောင် တောင်ကြီး တစ်တောင်ကို တွေ့လိုက်ရလေသည်။

ဤခန့်ညားသော ငွေရောင် တောင်ကြီးက ပတ်ဝန်းကျင်ရှိ မြေကြီးကဲ့သို့ပင် ငွေရောင် သတ္တုများဖြင့် ဖွဲ့စည်းထားပြီး တစ်တောင်လုံး ငွေရောင် တောက်ပနေကာ မီတာ ရာချီ မြင့်မားလေသည်။

"ဝှူး"

"ဝှူး"

တောင်ခါးပန်းတွင် လိုဏ်ဂူ ၂ ခု ရှိပြီး ထိုလိုဏ်ဂူများထဲမှ ကြီးမားသော လေဆင်နှာမောင်း နှစ်ခု ထွက်ပေါ်လာကာ အဝေးရှိ မြေကြီးဆီသို့ တိုက်ခတ်သွားပြီး ညည်းတွားသံများ ထွက်ပေါ်နေလေသည်။

'မြင့်မြတ်သောနယ်မြေ မှော်သားရဲက လိုဏ်ဂူထဲမှာ ပုန်းနေတာလား'

မုန်လဲ့က လိုဏ်ဂူရှေ့သို့ ဆင်းသက်လိုက်ပြီး တစ်ပုံစံတည်း တူညီနေသော လိုဏ်ဂူ နှစ်ခုကို ကြည့်ကာ ရန်စသည့် လုပ်ရပ် တစ်ခုကို ပြုလုပ်လိုက်လေသည်။

မီးလုံး တစ်လုံးကို လိုဏ်ဂူထဲသို့ ပစ်ထည့်လိုက်ခြင်းပင် ဖြစ်လေသည်။ သူက အထဲရှိ မြင့်မြတ်သောနယ်မြေ မှော်သားရဲကို ပေါက်ကွဲပြီး ထွက်လာအောင် လုပ်ချင်ခြင်း ဖြစ်လေသည်။

"ဝုန်း"

မီးလုံး ပေါက်ကွဲသွားသောအခါ တောင်တစ်တောင်လုံး တုန်ခါသွားပြီး လိုဏ်ဂူထဲမှ မီးခိုးငွေ့များ ထွက်လာလေသည်။ နောက်တစ်စက္ကန့်တွင်တော့ မုန်လဲ့ကို အံ့အားသင့်စေမည့် အရာတစ်ခု ဖြစ်ပျက်သွားလေသည်။

"ဝုန်း ဝုန်း ဝုန်း"

တဒုန်းဒုန်း မြည်သံများနှင့်အတူ တောင်ကြီးက ရုတ်တရက် လှုပ်ခါလာပြီး မြေကြီးများလည်း တုန်ခါလာကာ တစ်ချိန်တည်းမှာပင် ဟိန်းဟောက်သံများပါ ထွက်ပေါ်လာလေသည်။

'ချီးပဲ'

မုန်လဲ့က တစ်ခုခုကို သတိထားမိသွားပြီး နောက်သို့ အမြန် ဆုတ်လိုက်ကာ ထရပ်လာသော တောင်ကြီးကို ကြည့်ရင်း အံ့ဩတုန်လှုပ်သွားလေသည်။

ခေါင်း။

လက်မောင်း။

ခြေထောက် နှစ်ဖက်။

'ဒါက ဘယ်က တောင်ဖြစ်ရမှာလဲ'

'ရှင်းရှင်းလေး သတ္တု လူစွမ်းကောင်းကြီးပဲ'

သို့သော် ဤလူစွမ်းကောင်းကြီးက အလွန် မြင့်လွန်းနေသည် မဟုတ်ပါလား။

၁၅၀၀ မီတာလား။

ဒါမှမဟုတ် ၂၀၀၀ မီတာလား။

မုန်လဲ့ ပါးစပ် အဟောင်းသား ဖြစ်သွားပြီး "ဒါ ဘာမှော်သားရဲလဲ" ဟု ရေရွတ်လိုက်လေသည်။

"ဒါက မျောက်ဝံ မှော်သားရဲတွေထဲမှာ ရှားပါးတဲ့ သံမဏိ လေမျောက်ဝံပဲ။ သတ္တုနဲ့ လေဓာတ် နှစ်မျိုးစွမ်းတဲ့ မြင့်မြတ်သောနယ်မြေ မှော်သားရဲ ဖြစ်ပြီး ခွန်အား အလွန်ကြီးမားကာ ရင်ဆိုင်ဖို့ အတော်လေး ခက်ခဲတယ်"

အဖိုးအို၏ အသံက ထွက်ပေါ်လာလေသည်။ "မင်း သတိထား တိုက်လို့ မနိုင်ရင် ထွက်ပြေး သံမဏိ လေမျောက်ဝံရဲ့ လက်ဝါးရိုက်ချက် တစ်ချက်တည်းနဲ့ သေမသွားစေနဲ့"

'သံမဏိ လေမျောက်ဝံ'

မုန်လဲ့ မျက်ခုံးပင့်လိုက်လေသည်။

သံမဏိ လေမျောက်ဝံက မုန်လဲ့ကို ဒေါသတကြီး စိုက်ကြည့်နေပြီး ဆင်အရွယ်အစားခန့် ရှိသော မျက်လုံးကြီးများထဲတွင် ဒေါသမီးများ တောက်လောင်နေလေသည်။ "သေနာကောင် လူသား ဘရက်ဒလေရဲ့ အိပ်မက်ကောင်းကို လာနှောင့်ယှက်ရဲတယ် သေချင်နေတာပဲ"

စကားဆုံးသည်နှင့် ဘတ်စ်ကား အရွယ်အစားခန့် ရှိသော ပါးစပ်ကြီးကို ဟပြီး မီတာ ဆယ်ဂဏန်းခန့် အကျယ်ရှိသော လေဆင်နှာမောင်း တစ်ခုကို မှုတ်ထုတ်လိုက်လေသည်။

"ဝှစ်"

တိုက်ခတ်လာသော လေဆင်နှာမောင်းကို ရင်ဆိုင်ရသည့်အခါ မုန်လဲ့က မလှုပ်မယှက် ရပ်နေပြီး အနည်းငယ် ကြောင်အမ်းနေသလိုပင် ဖြစ်နေလေသည်။

အဘယ်ကြောင့်ဆိုသော် သံမဏိ လေမျောက်ဝံ တိုက်ခိုက်လိုက်သော အခိုက်အတန့်မှာပင် တောက်ပသော အလင်းတန်း တချို့က ၎င်းထံမှ ပြုတ်ကျလာသောကြောင့်ပင် ဖြစ်လေသည်။

"ဒင်... ပြုတ်ကျလာသော ပစ္စည်းကို တွေ့ရှိပါသည် ကောက်ယူမည်လား"

'ဒါ မေးနေဖို့ လိုသေးလို့လား ကောက်ယူမယ်'

"ဒင်... ပေါင်းစပ်ခြင်း အောင်မြင်ပါသည် ပိုင်ရှင်၏ ခန္ဓာကိုယ်ကြံ့ခိုင်မှု +၃၀၃၈"

"ဒင်... ပေါင်းစပ်ခြင်း အောင်မြင်ပါသည် တားမြစ်မှော်ပညာ ရွှေစက်ဝန်း လည်ပတ် ပေါက်ကွဲခြင်း ကို ရရှိပါသည်"

"ဒင်... ပေါင်းစပ်ခြင်း အောင်မြင်ပါသည် တားမြစ်မှော်ပညာ လေဟာနယ်ဓား ကို ရရှိပါသည်"

"ဒင်... ပေါင်းစပ်ခြင်း အောင်မြင်ပါသည် လေဓာတ် နိယာမ အပိုင်းအစ တစ်ခု ရရှိပါသည်"

'ဘုရားရေ'

ခေါင်းထဲတွင် အဆက်မပြတ် ထွက်ပေါ်နေသော စနစ်၏ အသိပေးသံများကို နားထောင်ရင်း မုန်လဲ့ ချက်ချင်း စိတ်လှုပ်ရှားသွားလေသည်။

တားမြစ်မှော်ပညာ တစ်ခု။

လေဓာတ် နိယာမ အပိုင်းအစ တစ်ခု။

ဒီတစ်ကြိမ်တော့ တကယ်ကို ကံထူးသွားတာပဲ။ အရင်တုန်းက မြင့်မြတ်သောနယ်မြေ မှော်သားရဲတွေနဲ့ တိုက်ခိုက်ခဲ့စဉ်က ဤမျှလောက် ပစ္စည်းကောင်းတွေ အများကြီး မကျဖူးခဲ့ပေ။

"ဝုန်း"

ထိုအခိုက်အတန့်မှာပင် ကြောက်စရာကောင်းသော လေဆင်နှာမောင်းက မုန်လဲ့ကို တိုက်ရိုက် ဖုံးလွှမ်းသွားပြီး မရေမတွက်နိုင်သော ထက်ရှသည့် လေဓားများက သူ၏ ခန္ဓာကိုယ်ကို ခုတ်ထစ်နေလေသည်။ သူ့ကိုယ်ပေါ်ရှိ မှော်ဝတ်ရုံက အချိန်အကြာကြီး မခံနိုင်ဘဲ လေဓားများ၏ ခုတ်ထစ်မှုကြောင့် အမှုန့် ဖြစ်သွားလေသည်။

ပြီးတော့ အတွင်းခံ အင်္ကျီနှင့် ဘောင်းဘီ။

အဲဒါတွေလည်း မလွတ်ခဲ့ပေ။

သို့သော် အံ့ဩစရာကောင်းသည်မှာ ထက်ရှသော လေဓားများက မုန်လဲ့၏ ကိုယ်ပေါ်ကို ခုတ်ထစ်သောအခါ သံမဏိပြားပေါ်ကို ခုတ်ထစ်မိသကဲ့သို့ မီးပွားများ ထွက်လာသည်မှလွဲ၍ အရေပြားကို အနည်းငယ်မျှပင် မရှရာနိုင်ခြင်းပင် ဖြစ်လေသည်။

မုန်လဲ့ကလည်း နာကျင်မှုကို မခံစားရသလို လေဓားများ ခုတ်ထစ်နေသည်ကို လျစ်လျူရှုပြီး မလှုပ်မယှက် ရပ်နေလေသည်။

'လေရဲ့ ပေါ့ပါးမှု သွက်လက်မှု ကြမ်းတမ်းမှု'

'နူးညံ့ရင် မျက်နှာကို ပွတ်တိုက်တဲ့ လေပြေလေးလို ကြမ်းတမ်းရင်တော့ ကမ္ဘာကြီးကို ဖျက်ဆီးပစ်နိုင်တဲ့ လေဆင်နှာမောင်းလို'

'လေ'

လေဓာတ် နိယာမနှင့် ပတ်သက်သည့် နားလည်မှုနှင့် အချက်အလက်များက မုန်လဲ့၏ ခေါင်းထဲတွင် ပေါ်လာပြီး မုန်လဲ့က ရုပ်ရှင်ကြည့်နေသကဲ့သို့ မြန်မြန်ဆန်ဆန် ကြည့်ရှုနေကာ လေဓာတ် နိယာမ၏ တံခါးကို အမြန် ဖွင့်လှစ်နိုင်ခဲ့လေသည်။

'ဒါက လေ ပဲ'

အချိန်အတော်ကြာပြီးမှ မုန်လဲ့က မျက်လုံးကို ဖြည်းညင်းစွာ ဖွင့်လိုက်ပြီး မျက်လုံးထဲတွင် အလင်းတန်း တစ်ခု တောက်ပသွားလေသည်။ ထို့နောက် လေဆင်နှာမောင်းထဲမှ ပျောက်ကွယ်သွားပြီး သံမဏိ လေမျောက်ဝံ၏ အနောက်သို့ ရောက်သွားလေသည်။

"အပြန်အလှန် ပေးဆပ်ရမှာပေါ့"

"ငါ့ရဲ့ လေကိုလည်း မြည်းစမ်းကြည့်ဦး"

မုန်လဲ့က ပါးစပ်မှနေ၍ ပေါ့ပါးပြီး မြင်သာသော လေစီးကြောင်း တစ်ခုကို မှုတ်ထုတ်လိုက်ရာ ထိုလေစီးကြောင်းက လျှပ်စီးအလား သံမဏိ လေမျောက်ဝံ၏ နောက်စေ့ဆီသို့ ပြေးဝင်သွားလေသည်။

"ဝှစ်"

ပေါ့ပါးသော လေစီးကြောင်းက လေထုနှင့် ထိတွေ့လိုက်သောအခါ အမြန်နှုန်းက ရုတ်တရက် မြင့်တက်သွားပြီး မျက်စိတစ်မှိတ် အတွင်းမှာပင် အလွန် ထက်ရှသော လေဓား တစ်လက် အဖြစ် ပြောင်းလဲသွားကာ သံမဏိ လေမျောက်ဝံ၏ နောက်စေ့ကို ပြင်းပြင်းထန်ထန် ခုတ်ထစ်လိုက်လေသည်။

"ခွပ်"

သတ္တုနှင့် ရိုက်ခတ်သံ ထွက်ပေါ်လာပြီး သံမဏိ လေမျောက်ဝံ၏ နောက်စေ့တွင် အက်ကွဲကြောင်း သေးသေးလေး တစ်ခု ဖြစ်သွားကာ ထူးဆန်းသော အမည်းရောင် သွေးများ ထွက်လာလေသည်။

"ဂါး"

ဤအက်ကွဲကြောင်း သေးသေးလေးက သံမဏိ လေမျောက်ဝံ၏ ကြီးမားလှသော ခန္ဓာကိုယ်နှင့် ယှဉ်လျှင် ဘာမှ မဟုတ်သော်လည်း သံမဏိ လေမျောက်ဝံကို နာကျင်စေခဲ့လေသည်။ ၎င်းက ဒေါသတကြီး ဟိန်းဟောက်ပြီး လှည့်ကာ မုန်လဲ့ကို အမှုန့်ဖြစ်အောင် ရိုက်ပစ်တော့မည့် အတိုင်း ဧရာမ လက်ဝါးကြီးနှင့် ရိုက်ချလိုက်လေသည်။

"ဝှစ်"

မုန်လဲ့က ချက်ချင်း ပျောက်ကွယ်သွားပြီး သံမဏိ လေမျောက်ဝံ၏ ပခုံးပေါ်သို့ ထူးဆန်းစွာ ရောက်သွားလေသည်။ "ကောင်ကြီး မင်းရဲ့ ကာကွယ်မှုက မဆိုးဘူး ဒါပေမဲ့ အမြန်နှုန်းက အရမ်း နှေးလွန်းတယ်"

"ဂါး"

သံမဏိ လေမျောက်ဝံက ခေါင်းကို မြန်မြန် လှည့်ပြီး လက်ဝါးနှင့် နောက်တစ်ချက် ရိုက်ချလိုက်လေသည်။ ဤအမြန်နှုန်းက မြန်ဆန်သော်လည်း မုန်လဲ့၏ အမြင်တွင်တော့ အသက် ရှစ်ဆယ် အရွယ် အဘွားကြီး တစ်ယောက်လောက် နှေးကွေးနေလေသည်။

"အရမ်း နှေးလွန်းတယ်"

မုန်လဲ့က အနည်းငယ် ရှောင်လိုက်ပြီး သံမဏိ လေမျောက်ဝံ၏ ခေါင်းပေါ်သို့ ရောက်သွားလေသည်။ ထိုအချိန်မှသာ သံမဏိ လေမျောက်ဝံ၏ လက်ဝါးကြီးက ပခုံးကို ရိုက်မိသွားပြီး ဝုန်း ဆိုသည့် အသံနှင့်အတူ သူ့ကိုယ်သူ ရိုက်မိကာ ယိမ်းယိုင်သွားလေသည်။

"ဟားဟား တုံးလိုက်တာ"

မုန်လဲ့ ပြုံးလိုက်မိလေသည်။ "စွမ်းရည် မှတ်တွေကို ခန္ဓာကိုယ် အရွယ်အစားနဲ့ ကာကွယ်မှုမှာပဲ အကုန် သုံးထားတာလား ဒီအမြန်နှုန်းကတော့ ဘယ်သူမှ မမီဘူး"

"ဒါပေါ့ သံမဏိ လေမျောက်ဝံရဲ့ အမြန်နှုန်းသာ မြန်မယ်ဆိုရင် ဒီနေရာမှာ ဘယ်လိုလုပ် ရောက်နေမှာလဲ"

အဖိုးအိုက အေးစက်စွာ နှာခေါင်းရှုံ့လိုက်လေသည်။ "ဒါပေမဲ့ မင်းရဲ့ အမြန်နှုန်းကလည်း အရမ်း မြန်လွန်းတယ် သွက်လက်တဲ့ မြင့်မြတ်သောနယ်မြေ မှော်သားရဲတွေတောင် မင်းလောက် မမြန်ဘူး သံမဏိ လေမျောက်ဝံက မင်းကို အမီလိုက်နိုင်ဖို့ဆိုတာ လုံးဝ မဖြစ်နိုင်တဲ့ ကိစ္စပဲ"

"ဟားဟား ဒါပေါ့"

မုန်လဲ့က ဂုဏ်ယူစွာ ရယ်မောလိုက်လေသည်။ 'ငါ့အမြန်နှုန်းတင် ဘယ်ကမလဲ ငါ့ရဲ့ ကာကွယ်မှုကလည်း အလွန် အစွမ်းထက်တာပဲ၊ နတ်ဘုရားသတ် ကြွက် သွေးမျိုးဆက်ဆိုတာ အလကား နာမည်ကြီးနေတာမှ မဟုတ်ဘဲ'