အခန်း ၁၆၆

အခန်း ၁၆၆။ နတ်ဘုရား တစ်ဝက် ခြိမ်းခြောက်မှု၊ လက်များစွာ ဘီမွန်

"ရှေးဦး ကိုးကွယ်မှုက ယုံကြည်မှုကို ဖြစ်ပေါ်စေတယ်"

"ယုံကြည်မှုက နတ်ဘုရားကို ဖန်တီးပေးနိုင်တယ်"

"အဲဒါက ယုံကြည်ကိုးကွယ်မှုဖြင့် နတ်ဘုရား ဖြစ်လာခြင်းပဲ"

အဖိုးအိုက သက်ပြင်းချလိုက်ပြီး "အဆုံးမရှိတဲ့ စကြဝဠာကြီးထဲမှာ အချိန်တိုင်း ကမ္ဘာနယ်မြေ အသစ်တွေ မွေးဖွားလာသလို အချိန်တိုင်း ကမ္ဘာနယ်မြေ အဟောင်းတွေ ပျက်စီးသွားတတ်တယ်" လို့ ပြောလိုက်လေသည်။

"ဒါကြောင့် ရှေးဦး ကိုးကွယ်မှု ဆိုတာ အချိန်တိုင်း ဖြစ်ပေါ်နေတာပဲ တကယ်တော့ ငါတို့ရဲ့ ကောင်းကင်ယံ တိုက်ကြီး အစောပိုင်း ကာလမှာလည်း အဲဒီလိုမျိုး အခြေအနေတွေ ဖြစ်ခဲ့ဖူးပြီး နတ်ဘုရား အတော်များများ ထွက်ပေါ်လာခဲ့တယ်"

"ဒါပေမဲ့ ဝမ်းနည်းစရာက"

"ယဉ်ကျေးမှုတွေ တိုးတက်လာတာနဲ့အမျှ ကောင်းကင်ယံ တိုက်ကြီးက ယုံကြည်မှု အရင်းအမြစ်တွေ အားလုံး ခွဲဝေယူခံလိုက်ရပြီး ယုံကြည်ကိုးကွယ်မှုဖြင့် နတ်ဘုရား ဖြစ်လာနိုင်တဲ့ မြေဆီလွှာ မရှိတော့ဘူး"

"အဲဒီလိုကိုး"

မုန်လဲ့က ခေါင်းညိတ်လိုက်ပြီး "ဒါဆို ကျောင်းအုပ်ကြီးက ဒီ အသက်စွမ်းအင် မိခင်သစ်ပင် ကလည်း တိုက်ကြီးပေါ်က သက်ရှိတွေရဲ့ ယုံကြည်မှုကြောင့် နတ်ဘုရား ဖြစ်လာနိုင်တယ်လို့ စိုးရိမ်နေတာလား" ဟု မေးလိုက်လေသည်။

"နတ်ဘုရား ဖြစ်လာဖို့တော့ မလွယ်လောက်ဘူး"

အဖိုးအိုက ဖြည်းညင်းစွာ ခေါင်းခါလိုက်ပြီး "ကောင်းကင်ယံ တိုက်ကြီးမှာ နတ်ဘုရား မပေါ်ထွက်တာ နှစ်ပေါင်း သောင်းချီ ရှိနေပြီ အသက်စွမ်းအင် မိခင်သစ်ပင် ကလည်း နတ်ဘုရား ဖြစ်လာမှာ မဟုတ်ဘူး" ဟု ပြောလိုက်လေသည်။

"ဒါဆို ခင်ဗျား ဘာကို စိုးရိမ်နေတာလဲ"

မုန်လဲ့က မျက်မှောင်ကြုတ်လိုက်လေသည်။

"နတ်ဘုရား မဖြစ်နိုင်ပေမဲ့ နတ်ဘုရား တစ်ဝက်တော့ ဖြစ်နိုင်တယ်" အဖိုးအို၏ မျက်နှာက လေးနက်သွားပြီး "နတ်ဘုရား တစ်ဝက် ဆိုတာ နတ်ဘုရား မဟုတ်ပေမဲ့ အလွန် အစွမ်းထက်တယ်"

"တကယ်လို့ ဒီ အသက်စွမ်းအင် မိခင်သစ်ပင် ကသာ အဆုံးမရှိတဲ့ ယုံကြည်မှုတွေရဲ့ အထောက်အပံ့နဲ့ နတ်ဘုရား တစ်ဝက် ဖြစ်လာမယ် ဆိုရင် မင်း ရင်ဆိုင်နိုင်ပါ့မလား"

"ဒါက..."

မုန်လဲ့ အသက်ရှူအောင့်သွားလေသည်။ နတ်ဘုရား တစ်ဝက် ဆိုတာ မြင့်မြတ်သောနယ်မြေ အထွတ်အထိပ် ထက် အဆပေါင်းများစွာ ပိုအစွမ်းထက်တဲ့ သူပဲ သူက ဘယ်လိုလုပ် ယှဉ်နိုင်မှာလဲ။

"ကျောင်းအုပ်ကြီး ဒါဆို ဘယ်လို လုပ်မလဲ"

မုန်လဲ့က အလျင်စလို မေးလိုက်လေသည်။

"မလန့်ပါနဲ့ မကြောက်ပါနဲ့"

အဖိုးအိုက တွေးတောရင်း "အသက်စွမ်းအင် မိခင်သစ်ပင် က နတ်ဘုရား တစ်ဝက် ဟုတ်မဟုတ် ဆိုတာက ငါတို့ရဲ့ ခန့်မှန်းချက် သက်သက်ပဲ"

"အခု မင်း လုပ်ရမှာက အသက်စွမ်းအင် မိခင်သစ်ပင် အကြောင်း အချက်အလက်တွေကို တတ်နိုင်သမျှ များများ စုဆောင်းဖို့ပဲ ဒါမှ ငါတို့ ပိုပြီး တိကျတဲ့ ဆုံးဖြတ်ချက် ချနိုင်မှာ သူများ အကြောင်းရော ကိုယ့်အကြောင်းပါ သိထားမှ တိုက်ပွဲတိုင်း အောင်နိုင်မှာ"

"ကျွန်တော် နားလည်ပါပြီ"

မုန်လဲ့က အလေးအနက် ခေါင်းညိတ်လိုက်ပြီး နှင်းဆီ ဦးချို စပါးအုံးမြွေ ကို ပုတ်ကာ "ကလာရာ အသက်စွမ်းအင် မိခင်သစ်ပင် အကြောင်း မင်း ဘယ်လောက် သိလဲ" ဟု မေးလိုက်လေသည်။

"လူကြီးမင်း..."

ကလာရာ၏ ရှင်းပြချက်ကို နားထောင်ပြီးနောက် မုန်လဲ့က အသက်စွမ်းအင် မိခင်သစ်ပင် အကြောင်းကို ပိုမို နားလည်လာလေသည်။ နှင်းဆီ ဦးချို စပါးအုံးမြွေ ပြောပြချက်အရ ဆိုလျှင်...

အသက်စွမ်းအင် မိခင်သစ်ပင် က သစ်ပင် တစ်ပင် ဖြစ်သော်လည်း တခြား သစ်ပင်များနှင့် မတူညီဘဲ တိကျသော ပုံသဏ္ဌာန် မရှိသလို တိကျသော နေရာလည်း မရှိပေ။

၎င်းက တိုက်ကြီး၏ မည်သည့် နေရာတွင်မဆို ပေါ်လာနိုင်ပြီး မည်သည့် ပုံသဏ္ဌာန်ဖြင့်မဆို ပေါ်လာနိုင်လေသည်။ ၎င်းက သစ်ပင် ဖြစ်သော်လည်း သစ်ပင် မဟုတ်ပေ။

အမှန်တကယ် ဘယ်လို ပုံစံလဲ ဆိုတာကိုတော့ ဘယ်သူမှ မမြင်ဖူးကြပေ။

သေချာတာ တစ်ခုကတော့...

နှစ်တစ်ရာ ကြာတိုင်း အသက်စွမ်းအင် မိခင်သစ်ပင် ၏ အသံက တိုက်ကြီးပေါ်ရှိ သက်ရှိများ၏ ခေါင်းထဲတွင် ပေါ်လာပြီး အသီးများ မှည့်ပြီ ဖြစ်ကြောင်း အသိပေးလေ့ ရှိလေသည်။

ဒါ့အပြင် သက်ရှိများက အသက်စွမ်းအင် မိခင်သစ်ပင် အကြောင်း ဘာမှ မသိကြပေ။

ဒါတွေကို နားထောင်ပြီးနောက် အဖိုးအိုက ချက်ချင်း ပြောလိုက်လေသည်။ "ဒီ အသက်စွမ်းအင် မိခင်သစ်ပင် က ယုံကြည်မှု စွမ်းအင်တွေကို သေချာပေါက် စုဆောင်းနေတာပဲ အသီးတွေ ဆိုတာက ယုံကြည်မှုကို ဖြန့်ဝေတဲ့ နည်းလမ်း တစ်ခု သက်သက်ပဲ"

"ယုံကြည်မှုကို တမင်တကာ စုဆောင်းတာ သာမန် သက်ရှိတွေ လုပ်နိုင်တဲ့ ကိစ္စ မဟုတ်ဘူး သေနာကောင် နောက်ထပ် လုပ်မယ့် လှုပ်ရှားမှုတွေကို သတိထားပြီး လုပ် မသင်္ကာစရာ တစ်ခုခု တွေ့တာနဲ့ ချက်ချင်း ထွက်ပြေး"

"ကျွန်တော် နားလည်ပါပြီ ကျောင်းအုပ်ကြီး"

မုန်လဲ့က အလေးအနက် ခေါင်းညိတ်လိုက်ပြီး သူ၏ ရင်ထဲတွင် အနည်းငယ် စိုးရိမ်မှုများ ဖြစ်ပေါ်လာလေသည်။

ပျောက်ဆုံးနေသော တိုက်ကြီးတွင် ခန့်မှန်းရ ခက်ခဲသော နတ်သစ်ပင် တစ်ပင် ပုန်းအောင်းနေပြီး တိုက်ကြီးပေါ်ရှိ သက်ရှိများ အားလုံးက နတ်သစ်ပင်၏ နောက်လိုက်များ ဖြစ်ကြလေသည်။

သူက ဘာလုပ်နေတာလဲ။

နတ်သစ်ပင်ရဲ့ နောက်လိုက်တွေကို လိုက်သတ်နေတာ။

သူတင် မကဘဲ တခြား ပြိုင်ပွဲဝင် ၇၈၄၇ ယောက်ကလည်း နတ်သစ်ပင်ရဲ့ နောက်လိုက်တွေကို လိုက်သတ်နေကြတာပဲ။

နတ်သစ်ပင်က ခွင့်ပြုပါ့မလား။

အဖြေကတော့ မခွင့်ပြုဘူး ဆိုတာ သေချာပါတယ်။

"ဧကရာဇ်က တိုက်ကြီးရဲ့ အခြေအနေကို သေချာ မစုံစမ်းဘဲ ငါတို့ကို ဒီကို လာပြီး မှော်သားရဲ သတ်ခိုင်းတာ အသက်ကြီးပြီး သတိမေ့နေပြီလား"

နောက်ပိုင်း အချိန်များတွင် မုန်လဲ့၏ ရင်ထဲတွင် အမြဲတမ်း စိုးရိမ်မှုများ ရှိနေပြီး အနည်းငယ်မျှပင် ပေါ့ဆမှု မရှိရဲဘဲ နတ်သစ်ပင်၏ တိုက်ခိုက်မှုကို ခံရမည်ကို ကြောက်ရွံ့နေလေသည်။

သို့သော်လည်း။

အချိန်တွေ ကုန်လွန်လာတာနဲ့အမျှ သစ္စာဖောက် နှင်းဆီ ဦးချို စပါးအုံးမြွေ ၏ လမ်းပြမှုဖြင့် မြင့်မြတ်သောနယ်မြေ မှော်သားရဲ ၄ ကောင်က မုန်လဲ့၏ လက်ချက်ဖြင့် သေဆုံးသွားခဲ့သော်လည်း နတ်သစ်ပင်ကတော့... ဘာလှုပ်ရှားမှုမှ မရှိသေးပေ။

လွှတ်ထားသလိုမျိုး ဖြစ်နေလေသည်။

တဖြည်းဖြည်းနှင့် မုန်လဲ့လည်း စိတ်သက်သာရာ ရသွားလေသည်။

'မင်းက ဂရုမစိုက်ဘူး ဆိုမှတော့ ငါလည်း အားနာမနေတော့ဘူး'

"လူကြီးမင်း ရှေ့က ချိုင့်ဝှမ်းက လက်များစွာ ဘီမွန် ဆာကက်စ် ရဲ့ နယ်မြေပါ" ကလာရာက ချိုင့်ဝှမ်း တစ်ခု အရှေ့သို့ ပျံသန်းလာပြီး ပြောလိုက်လေသည်။

"လက်များစွာ ဘီမွန်"

မုန်လဲ့ အနည်းငယ် သံသယဖြစ်သွားလေသည်။ ဘီမွန် ဆိုတာကိုတော့ သူ သိလေသည်။

သားရဲလူသား အင်ပါယာ၏ ဧကရာဇ် မိသားစုက ဘီမွန် မျိုးနွယ်စု ဖြစ်ပြီး ဘီမွန်များထဲတွင် ရွှေရောင် ဘီမွန်က ရွှေနဂါးကြီးများ၊ မိုးကြိုး တိုက်တန်များနှင့် ယှဉ်နိုင်လေသည်။

ဒါ့အပြင် ငွေရောင် ဘီမွန်၊ ကြေးရောင် ဘီမွန် ဆိုတဲ့ အဆင့်နိမ့် ဘီမွန် နှစ်မျိုးလည်း ရှိသေးတယ်။ ဒါပေမဲ့ လက်များစွာ ဘီမွန် ဆိုတာ ဘာကြီးလဲ။

"လူငယ်လေး အားနေရင် စာလေး ဘာလေး ဖတ်ဦး"

အဖိုးအိုက နှာခေါင်းရှုံ့လိုက်ပြီး "လက်များစွာ ဘီမွန် ဆိုတာ ဘီမွန် ဧရာမ သားရဲတွေထဲက မျိုးဗီဇ ပြောင်းလဲသွားတဲ့ အကောင်ပဲ သာမန် ဘီမွန် ဧရာမ သားရဲတွေထက် လက် ၄ ဖက် ပိုပါတယ် ဒါကြောင့် သူ့ကို လက် ၆ ဖက် ဘီမွန် လို့လည်း ခေါ်တယ်"

"ဘီမွန် ဧရာမ သားရဲ တွေကို ကုန်းမြေ တိုက်ပွဲ ဘုရင် လို့ ခေါ်တယ် ခွန်အား သက်သက် ဆိုရင် ငါတို့ နဂါးမျိုးနွယ်စုတောင် ဘီမွန် ဧရာမ သားရဲကို မနိုင်ဘူး"

"ပြီးတော့ ဘီမွန်တွေရဲ့ ကာကွယ်မှုက အရမ်း အစွမ်းထက်တယ် တားမြစ်မှော်ပညာ ကလွဲရင် ကျန်တဲ့ မှော်ပညာ အားလုံးကို ခုခံနိုင်တယ် အသားချင်း ယှဉ်တိုက်မယ်ဆိုရင် အဆင့်တူ ဧရာမနဂါးတွေက ဘီမွန်ရဲ့ ပြိုင်ဘက် မဟုတ်ဘူး"

"ကျွတ်ကျွတ် အစွမ်းထက်တာပဲ"

မုန်လဲ့က မနေနိုင်ဘဲ ချီးကျူးလိုက်လေသည်။ အဖိုးအိုက မီးနဂါး လူသား တစ်ယောက် ဖြစ်ပြီး အလွန် အစွမ်းထက်သော်လည်း အဆင့်တူ ဘီမွန် ဧရာမ သားရဲက ဧရာမနဂါးများထက် ပိုမို အစွမ်းထက်ကြောင်း ဝန်ခံထားလေသည်။

ဒါက ဘီမွန် ဧရာမ သားရဲတွေ ဘယ်လောက် အစွမ်းထက်လဲ ဆိုတာ ပြသနေတာပဲ။

"လက်များစွာ ဘီမွန်က သာမန် ဘီမွန်ထက် လက် ၄ ဖက် ပိုပါတဲ့ အတွက် အသားချင်း ယှဉ်တိုက်တဲ့ နေရာမှာ ပိုအစွမ်းထက်ပြီး ရင်ဆိုင်ရ ပိုခက်တယ် မင်း သတိထားပြီး တိုက်နော်"

အဖိုးအိုက သတိပေးလိုက်လေသည်။

"ကျွန်တော် နားလည်ပါပြီ"

မကြာမီမှာပင် မုန်လဲ့က ချိုင့်ဝှမ်း အရှေ့သို့ ရောက်ရှိသွားလေသည်။ ချိုင့်ဝှမ်းက အောက်သို့ ခွက်ဝင်နေသော ပန်းကန်လုံး တစ်လုံးနှင့် တူပြီး ပင်လယ်ရေမျက်နှာပြင်ထက် ကီလိုမီတာ တစ်ထောင်ခန့် နိမ့်ကျနေလေသည်။

ချိုင့်ဝှမ်းထဲတွင် ကျောက်တိုင်များ ပြည့်နှက်နေပြီး မျက်စိတစ်ဆုံး လှမ်းကြည့်လိုက်လျှင် တောင်ပေါ်မှ မျှစ်များအလား ကျောက်တိုင်များကို အပြည့် တွေ့မြင်ရလေသည်။

ဟူး...

ဟူး...

ကျောက်တိုင်တောထဲသို့ ဝင်ရောက်သွားပြီး မကြာမီမှာပင် မိုးခြိမ်းသံအလား ကျယ်လောင်သော ဟောက်သံများ ထွက်ပေါ်လာပြီး တစ်ချိန်တည်းမှာပင် ကြောက်မက်ဖွယ်ကောင်းသော အရှိန်အဝါ တစ်ခုက လွှမ်းခြုံလာကာ လူကို အသက်ရှူကျပ်သွားစေလေသည်။

"လူကြီးမင်း အဲဒါက လက်များစွာ ဘီမွန် ဆာကက်စ် ပါပဲ"

နှင်းဆီ ဦးချို စပါးအုံးမြွေက ကျောက်တိုင်များကြားတွင် အိပ်ပျော်နေသော မီးခိုးရောင် သတ္တဝါကြီး တစ်ကောင်ကို လက်ညှိုးထိုးပြကာ တုန်ရီစွာ ပြောလိုက်လေသည်။ ၎င်း၏ မျက်လုံးများထဲတွင် ကြောက်ရွံ့မှုများ အထင်အရှား ပေါ်လွင်နေလေသည်။

၎င်းက မြွေ မှော်သားရဲ ဖြစ်ပြီး ခွန်အားကြီးမားသော မှော်သားရဲများကို အကြောက်ဆုံး ဖြစ်လေသည်။ လက်များ ပိုများနေသော ခွန်အားကြီး သတ္တဝါ လက်များစွာ ဘီမွန် ကိုတော့ ပြောစရာပင် မလိုတော့ပေ၊ ၎င်း၏ သေမင်းတမန် ရန်သူပင် ဖြစ်လေသည်။

"သူ့ကို နှိုးလိုက်"

မုန်လဲ့က အိပ်မောကျနေသော ဧရာမ သတ္တဝါကြီးကို စိုက်ကြည့်ရင်း ပြောလိုက်လေသည်။

"ဟုတ်... ဟုတ်ကဲ့ပါ လူကြီးမင်း"

နှင်းဆီ ဦးချို စပါးအုံးမြွေက မျက်နှာမဲ့ကာ ပျံသန်းသွားလေသည်။ မုန်လဲ့နှင့် အတူ နေလာသည်မှာ အချိန်အတော်ကြာပြီ ဖြစ်ရာ မုန်လဲ့၏ အကျင့်စရိုက်ကို ၎င်း ကောင်းကောင်း သိထားလေသည်။ တကယ်လို့ သူ သွားမနှိုးဘူး ဆိုရင် သူ့အဖြစ်က သေချာပေါက် အရမ်း ဆိုးရွားသွားလိမ့်မည်။

"ဆာကက်စ် ငါ့ရဲ့ သူငယ်ချင်းဟောင်း"

နှင်းဆီ ဦးချို စပါးအုံးမြွေက အနီးကပ် မသွားရဲဘဲ အဝေးကနေ အော်ဟစ်လိုက်လေသည်။

"ဝုန်း"

အိပ်ပျော်နေသော ဘီမွန်က လန့်နိုးသွားပြီး ဒေါသတကြီး ဟိန်းဟောက်လိုက်လေသည်။ "ဘယ်သူလဲ ဆာကက်စ် ရဲ့ အိပ်မက်ကို လာနှောင့်ယှက်ရဲတာ သေချင်နေတာလား"

လက်များစွာ ဘီမွန် ၏ အသံက အလွန် ကျယ်လောင်လွန်းပြီး မိုးခြိမ်းသံများအလား ပဲ့တင်ထပ်သွားကာ ပတ်ဝန်းကျင်ရှိ ကျောက်တိုင်များ တုန်ခါသွားပြီး ကျောက်တုံးများ ပြုတ်ကျလာလေသည်။

မုန်လဲ့ပင် နားအူသွားသလို ခံစားလိုက်ရပြီး အလွန် အံ့အားသင့်သွားလေသည်။ "ချီးပဲ အသံ အရမ်း ကျယ်တာပဲ"

ဒေါသတကြီး မတ်တတ်ရပ်လိုက်သော ဘီမွန်က မီတာ ၅၀ ခန့် မြင့်မားပြီး တစ်ကိုယ်လုံး မီးခိုးရောင် အမွေးကြမ်းများ ဖုံးလွှမ်းနေကာ အမွေးများ အောက်ရှိ ကြွက်သားများက အလွန် ကြီးမားထွားကျိုင်းလှပေသည်။

ရေမြင်း ပါးစပ်၊ ခြင်္သေ့ ခြေထောက်။

မိကျောင်း ကျောပြင်၊ မျောက်ဝံ ခန္ဓာကိုယ်။

ပြီးတော့... မြေပျင်း လက်သည်း။

၎င်း၏ အလွန် တုတ်ခိုင်သန်မာသော လက်မောင်း ၆ ဖက်က ဒူးခေါင်း အထိ တွဲလောင်းကျနေပြီး အလွန် ကြောက်မက်ဖွယ်ကောင်းသော ခွန်အားများ ပါဝင်နေကြောင်း မည်သူမျှ သံသယဖြစ်မည် မဟုတ်ပေ။

ထို့အပြင် နှစ်မီတာခန့် ရှည်လျားပြီး ချွန်ထက်သော လက်သည်းများက လူကို ကြောက်လန့်သွားစေနိုင်လေသည်။

ဒါက လက်များစွာ ဘီမွန် ဧရာမ သားရဲလား။