အခန်း ၃၃၄

အခန်း (၃၃၄) နတ်ဘုရားဂိုဏ်းကြီး ငါးဂိုဏ်း... အင်အားကြီး မိသားစု ခြောက်ခု

လွန်ခဲ့သော ခုနစ်နှစ်က လုကျဲယွင်သည် အိပ်မက်တစ်ခု မက်ခဲ့လေသည်။ သူ၏ တစ်သက်တာ ဖြတ်သန်းခဲ့ရမှုများကို အိပ်မက်မက်ခဲ့ပြီး လောကကြီး၏ လေပြင်းမုန်တိုင်း အပြောင်းအလဲများနှင့် သူရဲကောင်းအသီးသီးတို့၏ အားပြိုင်မှုများကို မြင်တွေ့ခဲ့ရရာ သူ၏ အမြင်အာရုံများကို အများကြီး ကျယ်ပြန့်သွားစေခဲ့လေသည်။

အိပ်ရာမှ နိုးထလာသောအခါတွင်တော့ သူသည် ပြန်လည်ဝင်စားလာခြင်းလား သို့မဟုတ် အိပ်မက်မက်ခဲ့ခြင်းလား ဆိုသည်ကို သေချာ မခွဲခြားတတ်တော့ချေ။ ထို့ကြောင့် အစပိုင်းတွင် သူ အလွန် ထိတ်လန့်ကြောက်ရွံ့ နေခဲ့မိသည်။ သို့သော် မကြာမီမှာပင် မှတ်ဉာဏ်ထဲရှိ အဖြစ်အပျက်များမှာ တကယ်အစစ်အမှန်များ ဖြစ်ကြောင်းကို သူ တွေ့ရှိသွားခဲ့လေသည်။

ဤတွေ့ရှိချက်က လုကျဲယွင်ကို အလွန် ဝမ်းသာပျော်ရွှင်သွားစေခဲ့လေသည်။ သူသည် မှတ်ဉာဏ်ထဲရှိ အဖြစ်အပျက်များကို အသုံးပြုကာ အခြားသူများ၏ ကံကြမ္မာ အရင်းအမြစ်များကို အဆက်မပြတ် လုယူခဲ့ပြီး ကျင့်ကြံခြင်းအဆင့်ကို မြှင့်တင်ခဲ့လေသည်။ နောက်ဆုံးတွင် မိသားစုအတွင်း လူမသိသူမသိ အဆင့်မှနေ၍ အထူးချွန်ဆုံး ပါရမီရှင်တစ်ယောက် အဖြစ်သို့ ရောက်ရှိလာခဲ့လေသည်။

ထို့အပြင် သူ၏ နာမည်ကိုပင် အသစ် ပြောင်းလဲခဲ့သေးလေသည်။

လုကျဲယွင်...

မူလက သူသည် လုကျဲယွင် (ကံကြမ္မာကို ဖြတ်တောက်မည်ဟု အဓိပ္ပာယ်ရသော စာလုံး) ဟု နာမည်ပေးရန် စဉ်းစားခဲ့သော်လည်း မသင့်တော်ဟု ထင်မြင်သဖြင့် လုကျဲယွင် (တိမ်တိုက်များကို ဖြတ်တောက်မည်ဟု အဓိပ္ပာယ်ရသော စာလုံး) ဟုသာ ပြောင်းလဲခဲ့လေသည်။

ခုနစ်နှစ်ဟူသော အချိန်ကာလမှာ မျက်တောင်တစ်ခတ်အတွင်း ကုန်လွန်သွားခဲ့ပြီ ဖြစ်သည်။

လုကျဲယွင်သည် များပြားလှသော ကံကြမ္မာ အရင်းအမြစ်များကို အသုံးပြုကာ ကျင့်ကြံခြင်းအဆင့်ကို ရွှေအမြုတေအဆင့်သို့ တက်လှမ်းနိုင်ခဲ့ပြီ ဖြစ်သည်။ သူကိုယ်တိုင်တွင်လည်း အလွန် အစွမ်းထက်သော အမွေအနှစ်များစွာကို ပိုင်ဆိုင်ထားပြီး နည်းလမ်းမျိုးစုံ ရှိနေလေရာ ထိပ်တန်း မိသားစုကြီးများမှ သခင်လေးများ ပင်လျှင် သူ့ကို မယှဉ်ပြိုင်နိုင်ကြချေ။

သိုင်းလောကတွင် သူ၏ နာမည်က ရုတ်တရက် ထွက်ပေါ်လာပြီး ဂုဏ်သတင်း အလွန် ကြီးမားနေခဲ့ပြီ ဖြစ်လေသည်။

သို့သော် လုကျဲယွင်၏ အရှိန်အဟုန်နှင့် တိုးတက်လာမှုနှင့်အတူ သူ၏ ရင်ထဲတွင်လည်း တစ်နေ့တခြား ပိုမို ထိတ်လန့်ကြောက်ရွံ့ လာခဲ့ရလေသည်။ အဘယ်ကြောင့်ဆိုသော် သူ၏ မှတ်ဉာဏ်ထဲရှိ အဖြစ်အပျက်များမှာ တဖြည်းဖြည်း ပြောင်းလဲလာနေကြောင်းကို သူ သတိထားမိလာသောကြောင့် ပင်ဖြစ်သည်။

မူလက သူသည် သာမန်လူများထက် ဆယ်စုနှစ်များစွာစာ ပိုမို သိရှိနေသော မှတ်ဉာဏ်များကို အသုံးပြုပြီးမှသာ လူအုပ်ကြီးထဲမှ ထူးချွန်စွာ ထွက်ပေါ်လာနိုင်ခဲ့ခြင်း ဖြစ်သည်။ ၎င်းမှာ တတိယမျက်လုံး တစ်လုံး ပွင့်နေသကဲ့သို့ ဖြစ်ပြီး ရန်သူများကို အမြဲတမ်း ကြိုတင် ခန့်မှန်းနိုင်စွမ်း ရှိခဲ့လေသည်။

ထိုသို့ ဖြစ်သောကြောင့်ပင် သူသည် ထိုမှတ်ဉာဏ်များကို ပိုမို အားကိုးလာခဲ့မိလေသည်။

ယခုအခါ လောကကြီးတွင် သူ၏ မှတ်ဉာဏ်ထဲ၌ မပါဝင်သော အပြောင်းအလဲများ တဖြည်းဖြည်း ဖြစ်ပေါ်လာနေပြီဖြစ်ရာ သူ့ကို ဘယ်လိုလုပ် မထိတ်လန့်စေဘဲ နေမည်နည်း။

သွေးပင်လယ် မိစ္ဆာနဂါး ကျန်းချဲ့သည်လည်း အလွန် ကြီးမားသော အပြောင်းအလဲကြီး တစ်ခု ပင်ဖြစ်သည်။

အဘယ်ကြောင့်ဆိုသော် သူ၏ မူလမှတ်ဉာဏ်ထဲတွင် ကျန်းချဲ့ဟူသော သူ လုံးဝ မရှိခဲ့သောကြောင့် ပင်ဖြစ်သည်။ ၎င်းက ကျန်းချဲ့သည် ယခင်က အမည်မသိ အညတရတစ်ယောက် သာ ဖြစ်ခဲ့ကြောင်း သက်သေပြနေလေသည်။ သို့သော် ယခုအခါတွင်တော့ တစ်ဖက်လူသည် လောကတစ်ခွင်လုံးတွင် နာမည်ကျော်ကြား နေလေပြီ။

အစပိုင်းတွင်တော့ သူ သိပ်ပြီး ဂရုမစိုက်ခဲ့ချေ။ သို့သော် ကျန်းချဲ့၏ နာမည်က တစ်နေ့တခြား ပိုမို ကြီးမားလာပြီး လောက၏ နံပါတ်တစ် အဖြစ် သတ်မှတ်ခံလာရသော အခါတွင်တော့ သူ ထိုသို့ မတွေးနိုင်တော့ချေ။ အရာအားလုံးက သူ၏ ခန့်မှန်းချက်များကို အပြတ်အသတ် ကျော်လွန်သွားပြီ ဟုသာ ခံစားနေရလေသည်။

ထို့ကြောင့် ကျန်းချဲ့၏ လုပ်ရပ်များကို အလွန် ဂရုစိုက်နေမိခြင်း ပင်ဖြစ်သည်။

ကျန်းချဲ့၏ လုပ်ရပ်များကို လေ့လာပြီးနောက်မှသာ ကျန်းချဲ့သည် သူ၏ မှတ်ဉာဏ်ထဲတွင် လုံးဝ မရှိခဲ့သော သူတစ်ယောက် ဖြစ်ကြောင်းကို သူ ကောင်းစွာ သဘောပေါက်သွားခဲ့လေသည်။ အဘယ်ကြောင့်ဆိုသော် သူ၏ မူလမှတ်ဉာဏ်ထဲတွင် ချီမိသားစုနှင့် မင်္ဂလာဆောင်ရမည့် သူမှာ ကျန်းချဲ့ မဟုတ်သောကြောင့် ပင်ဖြစ်သည်။

တောင်ပိုင်းယွဲ့ကလည်း အလယ်ပိုင်းဒေသနှင့် စစ်ပွဲ ဆင်နွှဲခဲ့ခြင်း မရှိချေ။

နဂါးကျား တာအိုဂိုဏ်းကလည်း လုံးဝ ဖျက်ဆီးမခံခဲ့ရပေ။

အရာအားလုံးသည် သူ လုံးဝ နားမလည်နိုင်သော လမ်းကြောင်းတစ်ခုအတိုင်း ဦးတည်သွားနေလေပြီ။

ထို့ကြောင့်ပင် ဝေ့ကျွင်းကျဲကို မြင်တွေ့လိုက်ရသောအခါ ကျန်းချဲ့၏ အဖြစ်အပျက်များကို မေးမြန်းခဲ့ခြင်း ဖြစ်ပြီး အသေးစိတ် အချက်အလက်များကိုပါ စုံစမ်းခဲ့ခြင်း ပင်ဖြစ်သည်။ သို့သော် ဘယ်လိုပဲ ကြည့်ကြည့် ကျန်းချဲ့သည် သူ့လိုမျိုး ဆယ်စုနှစ်များစွာ အိပ်မက်မက်ခဲ့သူ တစ်ယောက်နှင့် လုံးဝ မတူညီချေ။

ထူးဆန်းသော သတ္တဝါတစ်ကောင်နှင့် ပိုမို တူညီနေလေသည်။

"အစ်ကိုလု ဘာဖြစ်သွားတာလဲ..."

ဝေ့ကျွင်းကျဲက အတွေးလွန်နေသော လုကျဲယွင်ကို ကြည့်ရင်း မျက်မှောင်ကျုံ့ကာ မေးလိုက်လေသည်။ သူ၏ ရင်ထဲတွင်လည်း သံသယအချို့ ဖြစ်ပေါ်လာခဲ့လေသည်။

လုကျဲယွင်သည် ကျန်းချဲ့၏ အဖြစ်အပျက်များကို နားထောင်ပြီးနောက် အဘယ်ကြောင့် ဤမျှလောက်အထိ အမူအရာ ပျက်သွားရသနည်း ဆိုသည်ကို သူ နားမလည်နိုင်အောင် ဖြစ်နေမိလေသည်။ ပုံမှန်အားဖြင့် ဆိုလျှင် သူနှင့် ကျန်းချဲ့တို့ ကြားတွင် မည်သည့် ပတ်သက်မှုမျှ ရှိသင့်သည် မဟုတ်ချေ။

'ဒါက ဘယ်လို အခြေအနေလဲ...'

ဝေ့ကျွင်းကျဲ၏ စကားကို ကြားသောအခါ လုကျဲယွင် ချက်ချင်း သတိဝင်လာပြီး မျက်လုံးများ လှုပ်ရှားကာ အတင်းအကျပ် ပြုံး၍ ပြောလိုက်လေသည်။

"ခုလေးတင် အတွေးလွန်သွားလို့ပါ အစ်ကိုဝေ့ ခွင့်လွှတ်ပါ..."

"ဟဲဟဲ အစ်ကိုလု အရမ်း ယဉ်ကျေးနေပါပြီ..."

လုကျဲယွင်၏ ယဉ်ကျေးမှုကြောင့် ဝေ့ကျွင်းကျဲမှာ အလွန် သဘောကျသွားလေသည်။

သူသည် ထိပ်တန်း မိသားစုကြီး တစ်ခုမှ ဆင်းသက်လာသူ ဖြစ်သော်လည်း လုကျဲယွင်က ပို၍ပင် ထူးခြားလေသည်။ မိမိ၏ ကိုယ်ပိုင် စွမ်းအား သက်သက်ဖြင့် လောကတစ်ခွင်လုံး နာမည်ကျော်ကြားအောင် စွမ်းဆောင်နိုင်ခဲ့ပြီး ပါရမီမှာလည်း အလွန် မြင့်မားလှပေသည်။ နောင်တစ်ချိန်တွင် သေချာပေါက် ရှန်ရှန်းအဆင့် မဟာသိုင်းသခင်ကြီး ဖြစ်လာမည်မှာ အသေအချာ ပင်ဖြစ်သည်။

တော်ဝင်နန်းတော် အပါအဝင် အင်အားစု အများအပြားက သူ့ကို ဆွဲဆောင်စည်းရုံး နေကြလေသည်။

သူနှင့် ကွာဟမှုမှာ အလွန် ကြီးမားလွန်းလှပေသည်။

"အစ်ကိုဝေ့ ပြောပုံအရဆိုရင် အဲ့ဒီ ကျန်းချဲ့ဆိုတဲ့ သိုင်းမိတ်ဆွေက တကယ်ကို ထူးခြားတဲ့ ပါရမီရှင်ပဲ နောက်ပိုင်း အရှေ့ပင်လယ်မှာ ဆုံကြရင် အစ်ကိုဝေ့အနေနဲ့ ကျွန်တော်တို့ နှစ်ယောက်ကို မိတ်ဆက်ပေးလို့ ရမလား..."

လုကျဲယွင်သည် ကျန်းချဲ့၏ အနီးသို့ ချဉ်းကပ်ကာ အခြေအနေများကို စမ်းသပ်လိုလေသည်။

သူ၏ မှတ်ဉာဏ်များ လွဲချော်နေခြင်းလား ဒါမှမဟုတ် ကျန်းချဲ့ကပဲ အပြောင်းအလဲကြီး တစ်ခု ဖြစ်နေတာလား ဆိုသည်ကို သူ သေချာ သိရှိလိုလေသည်။

ဤကိစ္စမှာ အလွန် အရေးကြီးပြီး သူ၏ နောင်တစ်ချိန် ကံကြမ္မာ အရင်းအမြစ်များနှင့် တိုက်ရိုက် သက်ဆိုင်နေလေသည်။

"ဒါက..."

ဝေ့ကျွင်းကျဲ၏ မျက်ဝန်းထဲတွင် တွေဝေမှုများ ဖြတ်ပြေးသွားလေသည်။ ချက်ချင်း လက်ခံလိုက်ရန် အနည်းငယ် ခက်ခဲနေလေသည်။ မည်သို့ပင်ဆိုစေ သူနှင့် ကျန်းချဲ့ ကြားရှိ ပတ်သက်မှုမှာ အလွန် သာမန်သာ ဖြစ်ပြီး တစ်ဖက်လူနှင့် ရင်းနှီးစွာ စကားပြောဆိုရန် သူ့တွင် လုံလောက်သော အရည်အချင်း မရှိချေ။

အကယ်၍ ထိုအချိန်ကျမှ တစ်ဖက်လူက သူ့ကို အဖက်မလုပ်ခဲ့လျှင် သူ၏ မျက်နှာ အကြီးအကျယ် ပျက်သွားမည်မှာ အသေအချာ ပင်ဖြစ်သည်။

"တကယ်လို့ အဆင်မပြေဘူးဆိုရင်လည်း ထားလိုက်ပါတော့..."

"ရပါတယ် ကျန်းချဲ့က ခင်မင်ဖို့ ကောင်းပါတယ် အဲ့ဒီအချိန်ကျရင် အစ်ကိုလုအတွက် ကျွန်တော် မိတ်ဆက်ပေးပါ့မယ်..."

လုကျဲယွင် စိတ်ပျက်သွားသည်ကို မြင်သောအခါ ဝေ့ကျွင်းကျဲက သွားကို တင်းကျပ်စွာ ကြိတ်ပြီး အလျင်စလို ပြန်ဖြေလိုက်လေသည်။

"ဒါဆိုရင်လည်း ကျေးဇူးတင်ပါတယ်..."

"အစ်ကိုလု အားနာစရာ မလိုပါဘူး..."

"ရှင် တကယ်ကို အားမနာတတ်တာပဲ..."

ချီမိသားစု ဝမ်ပင်းလသာဆောင် ပေါ်တွင် ချီဝမ်ကျင်း၏ မျက်နှာမှာ အလွန် မသက်မသာ ဖြစ်နေပြီး ကျန်းချဲ့၏ လက်ကို အလျင်စလို ခါချလိုက်လေသည်။ အစောပိုင်းက ကျန်းချဲ့က သူမ၏ ခါးကို ဖက်ထားခြင်းကို သူမ လက်ခံပေးခဲ့သော်လည်း တစ်ဖက်လူက လုံးဝ အားမနာဘဲ ပိုမို အဆင့်တက်လာကာ အထက်သို့ ဆက်လက် တက်လှမ်းလာသဖြင့်...

သူမ အနေဖြင့် သေချာပေါက် သဘောတူနိုင်မည် မဟုတ်ချေ။

သေချာရေရာသော အခြေအနေ တစ်ခု မရှိသေးမီ အချိန်အထိ ချီဝမ်ကျင်းအနေဖြင့် ကျန်းချဲ့နှင့် အလွန်အကျွံ ရင်းနှီးစွာ နေထိုင်လိုခြင်း မရှိချေ။

"မင်းက ကိုယ့်ရဲ့ စေ့စပ်ထားတဲ့ မိန်းမလေ ဘာလို့ အားနာနေစရာ လိုမှာလဲ..."

ကျန်းချဲ့၏ မျက်နှာပေါ်တွင် အပြုံးများ ပေါ်လွင်နေလေသည်။

ချီမိသားစုတွင် နေထိုင်ခဲ့သော ရက်များအတွင်း ချီဝမ်ကျင်းနှင့် ပိုမို ရင်းနှီးလာစေရန်အတွက် သူသည် နေ့တိုင်းလိုလို သူမနှင့် အတူတူ အချိန်ဖြုန်းနေခဲ့ပြီး သူတို့နှစ်ယောက် ကြားရှိ သံယောဇဉ်များကို ပိုမို နက်ရှိုင်းလာစေခဲ့လေသည်။

သူ၏ အဆက်မပြတ် တိုက်ခိုက်မှုများအောက်တွင် ချီဝမ်ကျင်း၏ ကာကွယ်ရေး စည်းများလည်း အများကြီး လျော့ကျသွားခဲ့ပြီ ဖြစ်လေသည်။

အရေးကြီးသော နေရာသုံးခုမှလွဲ၍ ကျန်ရှိသော နေရာအားလုံးကို သူ၏ လက်များဖြင့် အပြည့်အဝ တိုင်းတာ ပြီးစီးသွားခဲ့ပြီ ဖြစ်လေသည်။

ဤနေရာမှာ ချီမိသားစု၏ နယ်မြေသာ မဟုတ်ခဲ့ပါက ကျန်းချဲ့သည် အဆုံးစွန်အထိ ဆက်လက် တက်လှမ်းလိုက်မည်မှာ အသေအချာ ပင်ဖြစ်သည်။

သို့သော် အလွန် နှမြောစရာ ကောင်းသည်မှာ ချီဝမ်ကျင်းက အချို့သော နေရာများနှင့် ပတ်သက်၍ အလွန် အပြင်းအထန် ငြင်းဆန်နေခြင်း ပင်ဖြစ်သည်။

အကယ်၍ သူ အတင်းအကျပ် အင်အားသုံးမည် ဆိုလျှင်မှလွဲ၍ ဘယ်လိုမှ သဘောတူမည် မဟုတ်ချေ။

"ရှင်လည်း ပြောသေးတယ် စေ့စပ်ထားတာလို့ အခုထိ လင်မယား မဖြစ်သေးဘူးလေ ရှင်က ဒီလို လုပ်ရဲတယ် ဟွန့် အရင်တုန်းက နင်ပင်းကိုလည်း ရှင် ဒီလိုမျိုး အပိုင်သိမ်းခဲ့တာ မဟုတ်လား..."

ချီဝမ်ကျင်းက မကျေမနပ် မျက်နှာထားဖြင့် ကျန်းချဲ့ကို စူးစိုက်ကြည့်ကာ မေးလိုက်လေသည်။

"ဝမ်ကျင်း မင်း အထင်လွဲနေပြီ ကိုယ်နဲ့ နင်ပင်းနဲ့က နှစ်ဦးသဘောတူ ချစ်ကြတာပါ..."

"ဟွန့်..."

ချီဝမ်ကျင်းက လှောင်ပြောင်သလို ပြုံးလိုက်လေသည်။

'ဟုတ်တာပေါ့ ခဲအိုနဲ့ ခယ်မလေးက နှစ်ဦးသဘောတူ ချစ်နေကြတာ ဒါဆိုရင် ငါက ဘယ်နေရာမှာ သွားနေရမလဲ...'

"ဝမ်ကျင်း မင်းလည်း သိပါတယ် ကိုယ်က ပုံမှန်ဆိုရင် ဘာမကောင်းတဲ့ စိတ်ကူးမှ မရှိပါဘူး အခုက နောင်တစ်ချိန် ကိုယ့်ကလေးတွေအတွက် စားစရာ ရိက္ခာ လုံလောက်မှု ရှိမရှိ ဆိုတာကို စမ်းသပ်ကြည့်ရုံ သက်သက်ပါ..."

"တောက် ရှင် အရှက်မရှိဘူးလား..."

ချီဝမ်ကျင်း၏ မျက်နှာလေး နီရဲသွားပြီး ဒေါသတကြီး အော်ဟစ်လိုက်လေသည်။

"အရှက်က ဘာလုပ်ရမှာလဲ ကိုယ်က မင်းကိုပဲ လိုချင်တာ..."

"ရှင်..."

ချီဝမ်ကျင်း ချက်ချင်း စကား ဆက်မပြောနိုင်အောင် ဖြစ်သွားပြီး ရုတ်တရက် ညီမဖြစ်သူ ချီနင်ပင်း ပြောခဲ့သော စကားကို သတိရသွားလေသည်။

'ကျွန်မ အရှက် မလိုချင်ဘူး အစ်ကို့ကိုပဲ လိုချင်တာ...'

'သူတို့နှစ်ယောက် ဘာလို့များ ငြိစွန်းသွားကြတာလဲဆိုတာ မဆန်းပါဘူး တကယ်တော့ အမှားတွေ အားလုံးက လူတစ်ယောက်တည်းဆီမှာပဲ ရှိတာ မဟုတ်ဘူးပဲ...'

"အဟမ်း..."

ရုတ်တရက် တိုးညှင်းသော ချောင်းဟန့်သံတစ်ခု ထွက်ပေါ်လာရာ ချီဝမ်ကျင်း၏ မျက်နှာထား ချက်ချင်း ပြောင်းလဲသွားပြီး ကျန်းချဲ့နှင့် ဝေးရာသို့ အလျင်စလို ဆုတ်ခွာလိုက်လေသည်။ ထို့နောက် ကျန်းချဲ့ကို ဒေါသတကြီး မျက်စောင်းထိုး ကြည့်လိုက်လေသည်။

သို့သော် ထိုအချိန်မှသာ ကျန်းချဲ့၏ မျက်နှာပေါ်တွင် အစောပိုင်းက ကာမဂုဏ်စိတ်များ လုံးဝ မရှိတော့ဘဲ အလွန် တည်ငြိမ် လေးနက်နေကြောင်းကို သူမ တွေ့ရှိလိုက်ရလေသည်။ ဖခင်ဖြစ်သူ လာနေကြောင်းကို ကျန်းချဲ့ အစောကြီးကတည်းက သိရှိနေခဲ့ကြောင်း ထင်ရှားလှပေသည်။

"ဦးလေး ရောက်လာတာလား..."

ကျန်းချဲ့က အံ့အားသင့်သွားသည့် ပုံစံဖြင့် ပြောလိုက်လေသည်။

"အဖေ ဘယ်လိုလုပ် ရောက်လာတာလဲ..."

ချီဝမ်ကျင်းက ဖခင်ဖြစ်သူကို မသက်မသာ တစ်ချက် ကြည့်လိုက်ပြီး ဝဲကျနေသော ဆံပင်လေးများကို အလိုအလျောက် သပ်တင်လိုက်လေသည်။

ချီကျန်းနန်က ကျန်းချဲ့ကို အချိန်အနည်းငယ် ကြာအောင် စူးစိုက်ကြည့်နေပြီးနောက် ခေါင်းအနည်းငယ် ညိတ်ပြလိုက်လေသည်။ အစောပိုင်းက သူတို့၏ စကားများကို သူ တမင် နားထောင်ခဲ့ခြင်း မရှိသော်လည်း အနီးသို့ ရောက်လာချိန်တွင် စကားအချို့ကို ကြားလိုက်ရလေသည်။ ကျန်းချဲ့က သူ၏ သမီးကို နောက်ပြောင်နေခြင်း ဖြစ်ကြောင်း ထင်ရှားလှပေသည်။

အနည်းငယ်တော့ နေရခက်သလို ခံစားရလေသည်။

"ခရီးထွက်ရမယ့် အချိန်ကျပြီလေ ဒီတစ်ခေါက် အရှေ့ပင်လယ်ကို အကြီးအကဲချုပ် ကိုယ်တိုင် လိုက်ပို့ပေးလိမ့်မယ် တကယ်လို့ အန္တရာယ် တစ်ခုခု ကြုံလာရင် အကြီးအကဲချုပ်ရဲ့ အမိန့်ကို သေချာ နားထောင်ကြနော်..."

ချီကျန်းနန်က သမီးနှင့် သမက်ကို အလွန် လေးနက်သော အမူအရာဖြင့် သတိပေးလိုက်လေသည်။

"နားလည်ပါပြီ..."

ကောင်းကင်ထက်တွင်။

ချီမိသားစု၏ မိစ္ဆာဘုရင်အဆင့် ရှိသော ကောင်းကင်လင်းယုန်ကြီးသည် အတောင်ပံများကို ဖြန့်ကြက်ကာ ကောင်းကင်ယံတွင် ပျံသန်းနေပြီး လင်းယုန် အော်သံကြီးကလည်း မိုးကောင်းကင် အထိ ပဲ့တင်ထပ်နေလေသည်။ လင်းယုန်ကြီး၏ ကျောပေါ်တွင် လူရိပ်အချို့ မတ်တပ် ရပ်နေကြပြီး ကျန်းချဲ့၊ ချီရှောက်ယန်၊ ချီဝမ်ကျင်း နှင့် ချီထျန်းကျုံးတို့ အားလုံး ပါဝင်လေသည်။

အရှေ့ပင်လယ် သိုင်းပညာပြိုင်ပွဲသည် မျိုးဆက်သစ် လူငယ်များ၏ ယှဉ်ပြိုင်မှု သက်သက်သာ ဖြစ်သော်လည်း ပုံမှန်အားဖြင့် နောက်ကွယ်မှ ကာကွယ် စောင့်ရှောက်ပေးမည့် အစွမ်းထက်သူများကိုပါ အမြဲတမ်း စေလွှတ်လေ့ရှိကြလေသည်။ ထိုသို့မှသာ ပဋိပက္ခ တစ်ခုခု ဖြစ်ပွားပါက မိမိတို့၏ ပါရမီရှင်များကို လုပ်ကြံသတ်ဖြတ်ခြင်းမှ ကာကွယ်နိုင်မည် ဖြစ်လေသည်။

ယခင်ကလည်း ဤကဲ့သို့သော အဖြစ်အပျက်မျိုး ရှိခဲ့ဖူးလေသည်။ ရန်သူဖြစ်နေသော အင်အားစု နှစ်ခုသည် သူတို့၏ ထိပ်တန်း ပါရမီရှင်များကို ကိုယ်စီ စေလွှတ်၍ ဝင်ပြိုင်ခိုင်းခဲ့ကြသည်။ ထိုတိုက်ပွဲတွင် အင်အားစု တစ်ခုမှ ပါရမီရှင်သည် အလွန် ထူးချွန်ပြောင်မြောက်စွာ စွမ်းဆောင်နိုင်ခဲ့ပြီး ထိပ်ဆုံးဆယ်ယောက် စာရင်းဝင်သည်အထိ ဖြစ်ခဲ့လေသည်။

ထိုအခါ အခြားအင်အားစု တစ်ခုက ထိုပါရမီရှင်အား ဖိနှိပ်ရန်အတွက် လူကြီးများ ကိုယ်တိုင် ဝင်ပါကာ ခိုးကြောင်ခိုးဝှက် လုပ်ကြံသတ်ဖြတ်ရန် ရွေးချယ်ခဲ့ကြသည်။ အရှေ့ပင်လယ်တွင်ပင် ထိုပါရမီရှင်အား ရက်စက်စွာ သတ်ဖြတ်ပစ်ခဲ့ကြလေသည်။ လုပ်ကြံသော အင်အားစုမှာ ထိုကိစ္စကြောင့် ဂုဏ်သတင်း အကြီးအကျယ် ကျဆင်းသွားခဲ့သော်လည်း အနာဂတ်၏ ကြီးမားသော အန္တရာယ်ကြီး တစ်ခုကိုတော့ အောင်မြင်စွာ ဖြေရှင်းနိုင်ခဲ့လေသည်။

ထို့ကြောင့်ပင် နောက်ပိုင်းတွင် အင်အားစုများ အားလုံးက ဤကဲ့သို့သော ကိစ္စမျိုးကို သေချာစွာ ကြိုတင် ကာကွယ်လာခဲ့ကြခြင်း ပင်ဖြစ်သည်။

နောက်ခံအင်အား မရှိသော ဂိုဏ်းမဲ့ သိုင်းပညာရှင် အချို့မှလွဲ၍ ကျန်ရှိသော သူများ အားလုံးနီးပါးမှာ မိသားစု သို့မဟုတ် ဂိုဏ်းတော်မှ အစွမ်းထက်သူများ၏ လျှို့ဝှက် ကာကွယ်စောင့်ရှောက်မှုများ ပါလာကြသည်ချည်းသာ ဖြစ်လေသည်။

"ဒီတစ်ခေါက် မင်းတို့ ဝင်ပြိုင်တဲ့အခါ လုံးဝ ပေါ့ဆနေလို့ မရဘူး ချီမိသားစုက ရထားတဲ့ သတင်းတွေအရဆိုရင် ဒီတစ်ကြိမ် သိုင်းပညာပြိုင်ပွဲက လွန်ခဲ့တဲ့ နှစ်တစ်ရာအတွင်းမှာ အန္တရာယ် အများဆုံးပဲ နတ်ဘုရားဂိုဏ်းကြီးတွေနဲ့ အင်အားကြီး မိသားစုတွေက သူတို့ရဲ့ ပါရမီရှင်တွေကို သေချာပေါက် စေလွှတ်ကြလိမ့်မယ်..."

"အဲ့ဒီအထဲမှာ တာ့လေ့ယင် ဘုန်းကြီးကျောင်းက ဗုဒ္ဓသားတော်ကို မင်းတို့ သေချာ သတိထားရမယ် ကြားရသလောက်တော့ ဒီလူက ဗောဓိသတ် ဝင်စားတယ်လို့ ဆိုတယ် လေ့ယင် ဘုန်းကြီးကျောင်းထဲမှာပဲ အမြဲတမ်း တံခါးပိတ် ကျင့်ကြံနေတာ ဒါပေမဲ့ စွမ်းအားက အလွန် ကြောက်စရာ ကောင်းတယ် ဗုဒ္ဓဘာသာ တရားတော်တွေမှာ ကျွမ်းကျင်ရုံသာမက ရုပ်ခန္ဓာကလည်း အလွန် အစွမ်းထက်တယ် ပြီးတော့ ရွှမ်ထျန်း ဝူကျီ နန်းတော်က တာအိုသားတော်လည်း ရှိသေးတယ် သူက မွေးရာပါ တာအို ခန္ဓာကိုယ်ကို ပိုင်ဆိုင်ထားတာ..."

ချီထျန်းကျုံးက ကျန်းချဲ့တို့ကို လောကရှိ ပါရမီရှင်များ အကြောင်း လေးနက်စွာ ရှင်းပြနေလေသည်။

တစ်ဖက်လူ၏ ရှင်းပြချက်များအောက်တွင် ကျန်းချဲ့၏ ဗဟုသုတများလည်း အများကြီး ကျယ်ပြန့်လာခဲ့ရလေသည်။

ဥပမာအားဖြင့် နတ်ဘုရားဂိုဏ်းကြီး ငါးဂိုဏ်း ဟူသော အခေါ်အဝေါ်နှင့် သူတို့၏ ကြောက်မက်ဖွယ် ကောင်းသော အင်အားများကို ပင်ဖြစ်သည်။

'ဗုဒ္ဓတစ်ပါးက တရားစစ်ကို ဟောကြားတယ် တာအိုနှစ်ပါးက အသက်ရှည်ခြင်းကို ရှာဖွေတယ် ဓားဂိုဏ်းက မိစ္ဆာတွေကို ဖိနှိပ်တယ် ကွန်ဖြူးရှပ်ဂိုဏ်းက ဖြောင့်မတ်ခြင်းကို ပြုစုပျိုးထောင်တယ်'

သိုင်းလောကတွင် လူသိများ ကျော်ကြားသော ဤကဗျာ စာကြောင်းများက နတ်ဘုရားဂိုဏ်းကြီး ငါးဂိုဏ်းကို ရည်ညွှန်းနေခြင်း ပင်ဖြစ်သည်။

ထိုအထဲတွင် ဗုဒ္ဓတစ်ပါး ဟူသည်မှာ တာ့လေ့ယင် ဘုန်းကြီးကျောင်းကို ဆိုလိုခြင်း ဖြစ်ပြီး နှစ်ထောင်ချီ သက်တမ်းရှိကာ အခြေခံ အုတ်မြစ် အလွန် ခိုင်မာလေသည်။ ဗောဓိသတ် တစ်ပါးမက ရှိနေပြီး တာ့လေ့ယင် ဘုန်းကြီးကျောင်း အတွင်းတွင် ဗုဒ္ဓတစ်ပါး တံခါးပိတ် ကျင့်ကြံနေသည် ဟုပင် လူအများက ခန့်မှန်းနေကြလေသည်။

တာအိုနှစ်ပါး ဟူသည်မှာ တာအိုဂိုဏ်း၏ အဓိက ခွဲထွက်ဂိုဏ်း နှစ်ခု ဖြစ်ပြီး ကောင်းကင်နှင့် မြေကြီး နန်းတော် နှစ်ခုဟု လူသိများလေသည်။ တစ်ခုမှာ ထျန်းကုန်း ထိုက်ရှန်း ပတ်ကျင့်နန်းတော် ဖြစ်ပြီး နောက်တစ်ခုမှာ တီကုန်း ရွှမ်ထျန်း ဝူကျီနန်းတော် ပင်ဖြစ်သည်။

ထိုအထဲတွင် ထိုက်ရှန်း တာအိုဂိုဏ်းသည် လောကီရေးရာများကို လုံးဝ ဝင်ရောက်စွက်ဖက်ခြင်း မရှိဘဲ နှစ်ထောင်ချီ ကြာသည့်တိုင်အောင် မည်သည့် လှုပ်ရှားမှုမျှ မရှိခဲ့ချေ။ ဂိုဏ်းသား တပည့်များသည်လည်း လောကတွင် လှည့်လည်သွားလာခြင်း အလွန် ရှားပါးပြီး အလွန် လျှို့ဝှက်ဆန်းကြယ် လှပေသည်။

သို့သော် ရွှမ်ထျန်း ဝူကျီနန်းတော် ကတော့ ကွာခြားလေသည်။ ထိုက်ရှန်း တာအိုဂိုဏ်းကဲ့သို့ လောကနှင့် အဆက်အသွယ် ဖြတ်ထားခြင်း မဟုတ်ဘဲ ဝူကျီ တာအိုဂိုဏ်း၏ ရည်ရွယ်ချက်မှာ လောကီထဲသို့ ဝင်ရောက်ရန် ပင်ဖြစ်သည်။ တာ့လေ့ယင် ဘုန်းကြီးကျောင်းနှင့် အတူ တာ့ကျိုး နိုင်ငံတော်၏ အဓိက ဘာသာရေး ဂိုဏ်းကြီး နှစ်ခု အဖြစ် ရပ်တည်နေလေသည်။

နဂါးကျား တာအိုဂိုဏ်း ကဲ့သို့သော တာအိုဂိုဏ်းခွဲများ ရှိနေသော်လည်း အမှန်တကယ်တွင် ကောင်းကင်နှင့် မြေကြီး နန်းတော် နှစ်ခုစလုံးက ၎င်းတို့ကို လုံးဝ အသိအမှတ် မပြုကြဘဲ အဆင့်မမီသော အင်အားစုများ အဖြစ်သာ သတ်မှတ်ထားကြလေသည်။

ဓားဂိုဏ်း ဟူသည်မှာ ထျန်းကျန့်တောင်ကို ဆိုလိုခြင်း ဖြစ်ပြီး ယွဲ့ပြည်နယ်ရှိ ဓားစံအိမ်သည် ထျန်းကျန့်တောင်၏ ခွဲထွက် အဖွဲ့အစည်း တစ်ခု ပင်ဖြစ်သည်။ ဤနတ်ဘုရားဂိုဏ်း သည်လည်း အလွန် အစွမ်းထက်ပြီး လျှို့ဝှက်ဆန်းကြယ် သော်လည်း ဂိုဏ်းသား တပည့်များ ကတော့ လောကတွင် မကြာခဏ လှည့်လည် သွားလာလေ့ ရှိကြလေသည်။

ယခင်က ကျင်းပခဲ့သော အရှေ့ပင်လယ် သိုင်းပညာပြိုင်ပွဲ တိုင်းတွင် ထျန်းကျန့်တောင်မှ ဂိုဏ်းသား တပည့်များ အမြဲတမ်း ဝင်ရောက် ယှဉ်ပြိုင်လေ့ ရှိကြလေသည်။

ကွန်ဖြူးရှပ်ဂိုဏ်း ဟူသည်မှာ ကျုံးကျိုးမှ ပိုင်လု စာသင်ကျောင်းတော်ကို ရည်ညွှန်းခြင်း ဖြစ်သော်လည်း ယခုအခါတွင်တော့ အစောကြီးကတည်းက အင်အား ဆုတ်ယုတ်နေခဲ့ပြီ ဖြစ်ပြီး သိုင်းလောကတွင် နာမည်ထွက်ပေါ်ခြင်း အလွန် ရှားပါးနေပြီ ဖြစ်လေသည်။ ထို့ကြောင့် လွန်ခဲ့သော နှစ်တစ်ရာ အတွင်း...

သိုင်းလောကတွင် ပိုင်လု စာသင်ကျောင်းတော်သည် အလယ်ပိုင်းဒေသ၏ နတ်ဘုရားဂိုဏ်း အဖြစ် သတ်မှတ်ခံရရန် အရည်အချင်း မရှိတော့ဘူးဟု ဝေဖန်ပြောဆိုမှုများ အများအပြား ထွက်ပေါ်နေခဲ့လေသည်။

ချင်းထျန်းဂိုဏ်းက ထိုနေရာကို အစားထိုး ယူသင့်သည် ဟုပင် ပြောဆိုနေကြလေသည်။

ကဗျာ စာကြောင်းများကိုပင် ပြောင်းလဲ ပစ်ခဲ့ကြသေးလေသည်။

'ဗုဒ္ဓတစ်ပါးက တရားစစ်ကို ဟောကြားတယ် တာအိုနှစ်ပါးက အသက်ရှည်ခြင်းကို ရှာဖွေတယ် ဓားဂိုဏ်းက မိစ္ဆာတွေကို ဖိနှိပ်တယ် ချင်းထျန်းက နေနဲ့လကို ပြောင်းလဲပစ်မယ်'

သို့သော် ဤကိစ္စနှင့် ပတ်သက်၍ သိုင်းလောကတွင် အမြင်မျိုးစုံ ရှိနေကြပြီး လက်ခံသူများ ရှိသလို လက်မခံသူများလည်း ရှိနေကြလေသည်။ တော်ဝင်နန်းတော်ကတော့ ဤကိစ္စတွင် ချင်းထျန်းဂိုဏ်း၏ ဂုဏ်သတင်းကို အစွမ်းကုန် ဖိနှိပ်ချေမှုန်းနေလေသည်။

အလယ်ပိုင်းဒေသ နတ်ဘုရားဂိုဏ်းကြီး ငါးဂိုဏ်းအပြင် ချီထျန်းကျုံးသည် အခြားသော အင်အားစုများ အကြောင်းကိုလည်း အများကြီး ရှင်းပြခဲ့သေးလေသည်။

ဥပမာအားဖြင့် အင်အားကြီး မိသားစု ခြောက်ခု အကြောင်း ပင်ဖြစ်သည်။ ထိုအထဲတွင် မြောက်ပိုင်း ချီမိသားစု သည်လည်း အပါအဝင် ဖြစ်သော်လည်း အလယ်အလတ် အဆင့်တွင်သာ ရှိပြီး အရမ်းကြီး ထင်ရှားကျော်ကြားခြင်း မရှိချေ။ ယွင်ပြည်နယ် လင်းမိသားစု ပင်လျှင် ချီမိသားစုကို ဆန့်ကျင်ရဲကြလေသည်။

ထို့အပြင် ဂိုဏ်းခုနစ်ဂိုဏ်းနှင့် အဖွဲ့ရှစ်ဖွဲ့ အကြောင်းကိုလည်း ရှင်းပြခဲ့သေးလေသည်။

မကောင်းဆိုးဝါး လမ်းစဉ်များနှင့် မိစ္ဆာတောင်တန်းများကိုပါ ထည့်သွင်း ရှင်းပြခဲ့ရာ ဤကဲ့သို့ ရှင်းပြမှုများက ကျန်းချဲ့၏ ဗဟုသုတကို အများကြီး ကျယ်ပြန့်လာစေခဲ့လေသည်။ အလယ်ပိုင်းဒေသရှိ အင်အားစု အသီးသီး၏ လျှို့ဝှက်ချက်များကို ပထမဆုံးအကြိမ် အဖြစ် ကြားသိလိုက်ရခြင်း ပင်ဖြစ်သည်။

ချီထျန်းကျုံးက ကျန်းချဲ့ အတွေးလွန်နေသည်ကို မြင်သောအခါ ပြုံး၍ ပြောလိုက်လေသည်။

"မင်းက အင်အားကြီး မိသားစု ခြောက်ခုနဲ့ နတ်ဘုရားဂိုဏ်းကြီး ငါးဂိုဏ်းကိုပဲ အဓိက ဂရုစိုက်ဖို့ လိုတယ် တခြား ဂိုဏ်းခုနစ်ဂိုဏ်းနဲ့ အဖွဲ့ရှစ်ဖွဲ့ဆိုတာက ကိုယ့်ကိုယ်ကိုယ် အထင်ကြီးပြီး ကြွားလုံးထုတ်ထားတာ သိုင်းလောကက သိပ်ပြီး အသိအမှတ် မပြုကြဘူး ထူးချွန်တဲ့ ပါရမီရှင်တွေလည်း သိပ်မရှိပါဘူး..."

"အကြီးအကဲချုပ်ရဲ့ သင်ပြမှုတွေအတွက် တပည့်တော် အများကြီး ဗဟုသုတ ရသွားပါပြီ..."

"ဟဲဟဲ ဒီကိစ္စတွေက လျှို့ဝှက်ချက်တွေ မဟုတ်ပါဘူး နောက်ပိုင်းကျရင် မင်းလည်း သေချာပေါက် သိလာမှာပါ အခုက မင်း ကျော်ကြားလာတဲ့အချိန် အရမ်း တိုတောင်းလွန်းတော့ သေချာ လေ့လာဖို့ အချိန်မရသေးလို့ပါ..."

"အကြီးအကဲချုပ်ရဲ့ စကားတွေအရဆိုရင် ကျွန်တော်တို့ အလယ်ပိုင်းဒေသရဲ့ အင်အားက တကယ်ကို ကြောက်စရာကောင်းတာပဲ ပိုင်ယွဲ့ နိုင်ငံတွေထက် အများကြီး သာလွန်တယ်..."

ကျန်းချဲ့က ရုတ်တရက် သက်ပြင်းချကာ ပြောလိုက်လေသည်။

"ဒါပေါ့ အလယ်ပိုင်းဒေသရဲ့ အင်အားက အတောင့်တင်းဆုံး ဖြစ်ရမှာပေါ့ မဟုတ်ရင် လောကရဲ့ ဗဟိုချက်နေရာကို ဘယ်လိုလုပ် ရယူထားနိုင်မှာလဲ နှမြောစရာ ကောင်းတာက အလယ်ပိုင်းဒေသက အင်အားစုတွေ အကုန်လုံး ပြန့်ကျဲနေပြီး တော်ဝင်နန်းတော်ကလည်း တစ်စုတစ်စည်းတည်း ဖြစ်အောင် မလုပ်နိုင်တော့ မြောက်ပိုင်းက လူရိုင်းတွေ ခဏခဏ လာပြီး ကျူးကျော်နေကြတာ မဟုတ်ရင် တခြားကိစ္စတွေ မပြောနဲ့ဦး နတ်ဘုရားဂိုဏ်းကြီးတွေနဲ့ အင်အားကြီး မိသားစု ခြောက်ခုသာ ပူးပေါင်းပြီး မြောက်ပိုင်း လူရိုင်းတွေကို တိုက်ထုတ်မယ် ပိုင်ယွဲ့ကို ဖိနှိပ်မယ်ဆိုရင် ဒါတွေက ကြီးမားတဲ့ ကိစ္စတွေ လုံးဝ မဟုတ်ဘူး..."

ချီရှောက်ယန်သည်လည်း တော်ဝင် အရာရှိတစ်ယောက်အနေဖြင့် အလွန် ထောက်ခံသော အမူအရာဖြင့် ခေါင်းညိတ်ကာ ပြောလိုက်လေသည်။

"အခု တော်ဝင်နန်းတော်ရဲ့ အခြေအနေတွေက ပိုပိုပြီး ခက်ခဲလာတယ် ကြားရသလောက်တော့ မြောက်ပိုင်း ဒေသဘက်မှာ အကြီးအကျယ် ဆုံးရှုံးမှုတွေ ဖြစ်နေပြီတဲ့ တကယ်လို့ မြောက်ပိုင်းက လူရိုင်းတွေသာ အလယ်ပိုင်းဒေသရဲ့ အတွင်းပိုင်းအထိ ဝင်လာနိုင်ခဲ့ရင် အဲ့ဒီအခါကျရင် လောကတစ်ခွင်လုံး ပရမ်းပတာ ဖြစ်သွားတော့မှာပဲ..."

ချီထျန်းကျုံး၏ မျက်ဝန်းအောက်ခြေတွင် ထူးဆန်းသော အလင်းတန်းများ ဖြတ်ပြေးသွားပြီး ပြုံး၍ ပြောလိုက်လေသည်။

"ပရမ်းပတာ ဖြစ်လာတဲ့ ခေတ်ကာလကမှ သူရဲကောင်းတွေ ထွက်ပေါ်လာမယ့် အချိန်ပဲ ကျန်းချဲ့ ငါတို့ ချီမိသားစုက မင်းအပေါ် အများကြီး မျှော်လင့်ချက် ထားတယ်နော်..."

"အကြီးအကဲချုပ်ရဲ့ မျှော်လင့်ချက်တွေအတွက် အများကြီး ကျေးဇူးတင်ပါတယ်..."

ကျန်းချဲ့က အလျင်စလို လက်ယှက်ကာ ကျေးဇူးတင်စကား ပြောလိုက်လေသည်။

ချီမိသားစုအပေါ် ကျန်းချဲ့ အမှန်တကယ်ပင် ကျေးဇူးတင်နေမိလေသည်။

အကယ်၍ ဤကျောထောက်နောက်ခံ အင်အားစုကြီးသာ မရှိခဲ့ပါက သူ၏ လမ်းခရီးမှာ အများကြီး ပိုမို ခက်ခဲကြမ်းတမ်းမည်မှာ အသေအချာ ပင်ဖြစ်သည်။

"မိသားစုတွေပဲ ကျေးဇူးတင်စကား ပြောနေစရာ မလိုပါဘူး..."

ချီထျန်းကျုံးက လက်ယမ်းကာ ဂရုမစိုက်သလို ပြန်ပြောလိုက်လေသည်။ ကျန်းချဲ့ကို သူ အလွန် အလေးထားသော်လည်း ကျန်းချဲ့က ဤမျှလောက်အထိ အားနာနေပြီး သိပ်ပြီး ရင်းနှီးမှု မရှိသည့် ပုံစံမျိုးကိုတော့ သူ လုံးဝ သဘောမကျချေ။ ၎င်းက ကျန်းချဲ့၏ ရင်ထဲတွင် လျှို့ဝှက်ချက် တစ်ခုခု ရှိနေသလိုမျိုး ခံစားရစေလေသည်။

မိသားစုဟူသော စကားလုံးကို ကြားလိုက်ရသောအခါ ချီဝမ်ကျင်းက အလိုအလျောက်ပင် ကျန်းချဲ့ကို တစ်ချက် လှမ်းကြည့်လိုက်လေသည်။ အလွန် တိုက်ဆိုင်စွာဖြင့်ပင် ကျန်းချဲ့ကလည်း သူမကို လှမ်းကြည့်လိုက်ရာ သူတို့ နှစ်ယောက်၏ အကြည့်များ ချက်ချင်း ဆုံတွေ့သွားခဲ့ကြလေသည်။

ထို့နောက် အလွန် အချိတ်အဆက် မိမိဖြင့် လျင်မြန်စွာ အကြည့် လွှဲသွားကြလေသည်။

"ဒါနဲ့ အကြီးအကဲချုပ် အရှေ့ပင်လယ်ရဲ့ အကြောင်းလေး နည်းနည်းလောက် ရှင်းပြပေးလို့ ရမလား ကျွန်တော် အဲ့ဒီအကြောင်းကို တော်တော်လေး သိချင်နေလို့ပါ..."

ကျန်းချဲ့က ချက်ချင်း စကားလမ်းကြောင်း လွှဲလိုက်လေသည်။