အခန်း ၃၃၉

အခန်း (၃၃၉) ဇာတ်လိုက်

"တကယ်လို့ ခင်ဗျားတို့က ကျုပ်ကို ကူညီပြီး တောင်ပိုင်းယွဲ့နိုင်ငံကို ဖျက်ဆီးပေးနိုင်မယ်ဆိုရင် ဒီကိစ္စကို ဆွေးနွေးလို့ ရနိုင်သေးတယ်..."

ကျန်းချဲ့က ခပ်ဖျော့ဖျော့ ပြုံးလိုက်လေသည်။

ဤစကားကို ကြားလိုက်ရသည်နှင့် ဟွမ်ဖူပုလင်း ယွမ်ချူနှင့် အခြားသူများ၏ မျက်နှာများမှာ ချက်ချင်း မည်းမှောင်သွားလေသည်။

တောင်ပိုင်းယွဲ့ကို ဖျက်ဆီးမည် ဟုတ်လား... သူတို့တွင် ထိုသို့သော စွမ်းရည်မျိုး လုံးဝ မရှိပေ။

သူတို့သည် မိမိတို့ အင်အားကြီးမိသားစု အသီးသီး၏ သခင်လေးများ ဖြစ်ကြသော်လည်း အဆုံးတွင်တော့ မျိုးဆက်သစ် လူငယ်များသာ ဖြစ်ကြလေသည်။ အာဏာကို အပြည့်အဝ ဆုပ်ကိုင်ထားနိုင်ခြင်း မရှိသေးသဖြင့် အဆင့်အတန်း မြင့်မားသော်လည်း လက်တွေ့အာဏာမှာတော့ နိမ့်ကျနေဆဲ ပင်ဖြစ်သည်။

ဟွမ်ဖူပုလင်းက ရင်ထဲမှ မကျေနပ်မှုကို ဖိနှိပ်လိုက်ပြီး မျက်မှောင်အနည်းငယ် ကျုံ့ကာ ကျန်းချဲ့ကို စိုက်ကြည့်လိုက်လေသည်။

"အစ်ကိုကျန်းက နောက်နေတာလား..."

"မင်းတို့က အရင်စပြီး ကျုပ်ကို လာနောက်နေကြတာလေ..."

ကျန်းချဲ့က ထိုသူများကို တစ်ချက် စောင်းငဲ့ကြည့်လိုက်ပြီး ခံစားချက်ကင်းမဲ့သော မျက်နှာထားဖြင့် နောက်သို့လှည့်ကာ တိုက်ရိုက် ထွက်ခွာသွားလေတော့သည်။

စကားလေး နှစ်ခွန်းသုံးခွန်းလောက် ကတိပေးရုံဖြင့် သူ့ကို အကူအညီ လာတောင်းနေကြခြင်း ဖြစ်သည်။ ဤ မိသားစုကြီးများမှ သခင်လေးများက အလွန်အမင်း တွေးချော်နေကြခြင်း ပင်ဖြစ်သည်။ ထိပ်ဆုံးဆယ်နေရာတွင် သုံးနေရာ ဟူသည်မှာ မည်သို့သော အဓိပ္ပာယ်မျိုးနည်း။

၎င်းမှာ ကျန်းချဲ့အနေဖြင့် မိမိထက် အဆပေါင်းများစွာ များပြားသော ရန်သူများကို ရင်ဆိုင်ရမည်ဟု ဆိုလိုခြင်း ဖြစ်ပြီး ရင်းနှီးမြှုပ်နှံရမှုနှင့် ပြန်လည်ရရှိမည့် အကျိုးအမြတ်မှာ လုံးဝ အချိုးအစား ညီမျှခြင်း မရှိချေ။ ဤမိသားစုကြီးများမှ သခင်လေးများနှင့် မိတ်ဆွေဖွဲ့ရန် ဆိုသည်မှာလည်း ကျန်းချဲ့အတွက် မည်သည့် အဓိပ္ပာယ်မျှ မရှိလှပေ။

သူ့ကို အချိန်တစ်ခုသာ ထပ်ပေးလိုက်ပါ သူ၏ ကျင့်ကြံခြင်းစွမ်းအားများ နောက်တစ်ဆင့်သို့ တက်လှမ်းသွားမည့် အချိန်ရောက်လာပါက ထိုအချိန်တွင် သူ့ကို တန်းတူယှဉ်ပေါင် တိုင်းနိုင်မည့်သူ ဆိုသည်မှာ အင်အားကြီး မိသားစု အသီးသီးမှ မိသားစုခေါင်းဆောင်ကြီးများ သာလျှင် ရှိတော့မည် ဖြစ်လေသည်။

"ကျုပ်ရဲ့ ယောက်ဖက အမြဲတမ်း ဒီလိုပါပဲ ခင်ဗျားတို့ သဘောမထားကြပါနဲ့ကွာ..."

ချီရှောက်ယန်က ပြုံးစစအမူအရာဖြင့် ရှင်းပြလိုက်ပြီးနောက် သူပါ ချက်ချင်း လှည့်ထွက်သွားကာ ထိုသူများကို လုံးဝ အဖက်မလုပ်တော့ချေ။

စောစောက ဤကောင်များ ပြောဆိုခဲ့သော စကားများက သူ့ကို ရင်ထဲတွင် မကျေမနပ် ဖြစ်စေခဲ့ပြီး ဖြစ်လေသည်။ သူ့ကို ဗြောင်ကျကျ အထင်သေးနေရုံသာမက သူ၏ မျက်နှာရှေ့တွင်ပင် သူ၏လူကို လုယူရန် ကြံစည်နေကြသည် မဟုတ်ပါလား။ ဤနေရာသည် လက်ပါရန် မသင့်တော်သော နေရာမှန်း သူ သိထား၍သာ တော်တော့သည်။ မဟုတ်ပါက အစောကြီးကတည်းက စားပွဲလှန်ပစ်ခဲ့ပြီ ဖြစ်လေသည်။

မျက်နှာသာ လုံးဝမပေးဘဲ ထွက်ခွာသွားသော ကျန်းချဲ့ကို ကြည့်ရင်း ယဲ့မိသားစု သခင်လေးနှင့် အခြားသူများ၏ မျက်နှာများမှာ ချက်ချင်း အရုပ်ဆိုး အကျည်းတန်သွားကြလေသည်။

ဒေါသကြောင့် စိမ်းဖန့်နေသော မျက်နှာများဖြင့် ကျန်းချဲ့၏ ကျောပြင်ကို ကြည့်နေကြပြီး သူတို့၏ အကြည့်များမှာ အလွန် အေးစက်နေလေသည်။

"ဒီ ကျန်းချဲ့က သတင်းတွေထဲကအတိုင်းပဲ တကယ်ကို မာနထောင်လွှားလွန်းတာပဲ..."

ဟွမ်ဖူပုလင်းက ခံစားချက်ကင်းမဲ့သော မျက်နှာထားဖြင့် မှတ်ချက်ချလိုက်လေသည်။

"ဟွန့် မြောက်ပိုင်း ချီမိသားစုက ကျောထောက်နောက်ခံ ပေးထားတာကို အားကိုးပြီး ကျုပ်တို့ကို ဒီလောက်တောင် မျက်နှာသာမပေးရဲတာ တကယ့်ကို တောကြိုအုံကြားက လာတဲ့ကောင်ပီပီ မိဘဆုံးမမှု မရှိဘူးပဲ..."

ယဲ့မိသားစု သခင်လေးက အလွန် မကျေမနပ် ဖြစ်နေလေသည်။

ကျန်းချဲ့ကို ဆွဲဆောင်စည်းရုံးရန်မှာ သူတို့ ကြိုတင်တိုင်ပင်ထားသော ကိစ္စဖြစ်ပြီး ရာခိုင်နှုန်းပြည့် သေချာနေပြီဟု ထင်မှတ်ထားခဲ့ကြလေသည်။ သို့သော် တကယ်တမ်း လူချင်း တွေ့ဆုံပြီးချိန်မှသာ သူတို့အဖွဲ့မှာ တစ်ဖက်လူ၏ မျက်လုံးထဲတွင် အစအနလေးမျှပင် မရှိကြောင်းကို ကောင်းစွာ သဘောပေါက်သွားခဲ့ကြလေသည်။

ယဉ်ယဉ်ကျေးကျေး ငြင်းဆန်ခံရနိုင်သည်ဟု တွေးထားခဲ့သော်လည်း ကျန်းချဲ့၏ ငြင်းဆန်မှုက ဤမျှလောက်အထိ တောင့်တင်း ခက်ထန်နေလိမ့်မည်ဟု လုံးဝ ထင်မှတ်မထားခဲ့ကြချေ။

"ဒီလူရဲ့ စကားတွေက နည်းနည်း ရိုင်းပျနေတယ် ဆိုပေမဲ့လည်း စဉ်းစားကြည့်ရင် ယုတ္တိရှိပါတယ် ဒီတစ်ကြိမ် သိုင်းပညာပြိုင်ပွဲရဲ့ ယှဉ်ပြိုင်မှုက အရမ်းကို ပြင်းထန်လွန်းနေတော့ သူကိုယ်တိုင် နေရာတစ်ခု ရဖို့တောင် လွယ်ကူတဲ့ ကိစ္စ မဟုတ်ဘူးလေ ဒါကို ကျုပ်တို့ သုံးယောက် နေရာရအောင် ကူညီပေးဖို့ဆိုတာ ပိုပြီးတော့တောင် မဖြစ်နိုင်သေးတယ်..."

ယွမ်ချူ၏ မျက်နှာမှာလည်း အနည်းငယ် ပျက်ယွင်းနေသော်လည်း ကျန်းချဲ့၏ ရွေးချယ်မှုကိုတော့ သူ ကောင်းစွာ နားလည် သဘောပေါက်လေသည်။ မည်သို့ပင်ဆိုစေ သူတို့သုံးယောက်၏ နှုတ်ကတိများက အင်အားကို အသုံးပြု၍ ဖိအားပေးနေသည်နှင့် အနည်းငယ် တူညီနေသည် မဟုတ်ပါလား။

"အစ်ကိုဟွမ်ဖူ ဒီလူ့ကို ပညာလေး နည်းနည်းလောက် ပေးလိုက်ရမလား..."

ယဲ့မိသားစု သခင်လေး၏ မျက်လုံးများ လှုပ်ရှားသွားပြီး ရုတ်တရက် အကြံပြုလိုက်လေသည်။

ဟွမ်ဖူပုလင်းက သူ့ကို တစ်ချက်စောင်းငဲ့ ကြည့်လိုက်ပြီး နှုတ်ခမ်းထောင့်တွင် အပြုံးတစ်ခု ပေါ်လာလေသည်။

"ကောင်းပြီလေ အစ်ကိုယဲ့ ထွက်ပြီး တိုက်ခိုက်တာကို ကျုပ် အပြည့်အဝ ထောက်ခံပါတယ် ကောင်းကင်ဘယ်လောက်မြင့်ပြီး မြေကြီးဘယ်လောက်ထူသလဲ ဆိုတာကို ဒီလူ့ကို ကောင်းကောင်း သိသွားအောင် သင်ခန်းစာ ပေးလိုက်ပါ..."

"ကျုပ်လား..."

ယဲ့မိသားစု သခင်လေး၏ နှုတ်ခမ်းထောင့်များ တွန့်ကွေးသွားပြီး ချက်ချင်းပင် စကားဆက်မပြောရဲတော့ချေ။

သူ၏စွမ်းအားမှာ မဆိုးလှသော်လည်း ကျန်းချဲ့၏ ပြိုင်ဘက် လုံးဝမဟုတ်မှန်း သူ့ကိုယ်သူ ကောင်းစွာ သိရှိထားလေသည်။ အစောပိုင်းက ပွဲကြည့်လိုသည့် သဘောဖြင့် ဟွမ်ဖူပုလင်းနှင့် ကျန်းချဲ့တို့ကို ရန်တိုက်ပေးလိုခြင်း သက်သက်သာ ဖြစ်လေသည်။

သူ့ကိုယ်တိုင် ထွက်၍ တိုက်ခိုက်ရန် ဆိုသည်မှာတော့ လုံးဝ မဖြစ်နိုင်ချေ။ ဤကိစ္စကို ပွင့်ပွင့်လင်းလင်း ပြောရလျှင် မျက်နှာ အနည်းငယ် ပျက်ရုံမျှသာ ရှိလေသည်။ အကယ်၍ ဒေါသအလျောက် လက်ပါမိပြီး နောက်ဆုံးတွင် ကျန်းချဲ့ကို မယှဉ်နိုင်ဘဲ ရှုံးနိမ့်သွားပါက နောက်ပိုင်း သိုင်းပညာပြိုင်ပွဲတွင် သူ့ကို အကြီးအကျယ် ထိခိုက်သွားစေနိုင်လေသည်။

သူတို့နှစ်ယောက်၏ သွယ်ဝိုက်သော အားပြိုင်မှုကို ယွမ်ချူက သိပ်ပြီး စိတ်ဝင်စားခြင်း မရှိဘဲ လေးနက်စွာ မေးလိုက်လေသည်။

"ဒီလူက ဝင်မပါဘူးဆိုမှတော့ ကျုပ်တို့က ဆက်ပြီး ပူးပေါင်းကြဦးမလား..."

"ကျန်းချဲ့ မပါရင်ရော ကျုပ်တို့က အခွင့်အရေး မရှိတော့ဘူးလား အခုဆို တာအိုဂိုဏ်း ဗုဒ္ဓဘာသာဂိုဏ်း နဲ့ ဓားဂိုဏ်းတွေ အားလုံးက နောက်ကွယ်မှာ အချင်းချင်း စုဖွဲ့နေကြပြီ ကျန်းချဲ့ဆိုတဲ့ ကောင်လည်း တော်ဝင်နန်းတော်ဆီကနေ အကူအညီတွေ ရထားလောက်တယ် ကျုပ်တို့သာ အချင်းချင်း ပူးပေါင်း မထားဘူးဆိုရင် နေရာတစ်ခုတောင် ရဖို့ ခက်ခဲသွားလိမ့်မယ်..."

ဟွမ်ဖူပုလင်း အနေဖြင့် ထိပ်ဆုံး ဆယ်နေရာကို မဖြစ်မနေ ရယူလိုပြီး လုံးဝ အမှားခံမည် မဟုတ်ချေ။

"တကယ်လို့ နောက်ဆုံးကျမှ နေရာတစ်ခုတည်း ရခဲ့မယ်ဆိုရင် ကျုပ်တို့ထဲက ဘယ်သူက အဲ့ဒီနေရာကို ယူမှာလဲ..."

ယဲ့မိသားစု သခင်လေးက မျက်မှောင်ကျုံ့ကာ မေးလိုက်လေသည်။

သူတို့အားလုံးသည် မိမိတို့ အင်အားကြီးမိသားစု အသီးသီး၏ သခင်လေးများ ဖြစ်ကြပြီး ထိပ်တန်း အင်အားစု တစ်ခုကို ကိုယ်စားပြု နေကြသူများ ဖြစ်ရာ အခြားသူများအတွက် လုံးဝ အနစ်နာခံပေးမည် မဟုတ်ချေ။

"နေရာကို အရင်လုယူနိုင်ပြီးမှ ကျုပ်တို့ အချင်းချင်း အရှုံးအနိုင် ခွဲကြတာပေါ့ အခုအချိန်မှာ ဒီအကြောင်းတွေ ပြောနေတာက စောလွန်းသေးတယ် ဒီအခွင့်အရေးကို ယူပြီး ဂိုဏ်းမဲ့ သိုင်းပညာရှင်တွေကို အကူအညီပေးဖို့ ပိုပြီး ဆွဲဆောင်စည်းရုံးလိုက်တာက အကောင်းဆုံးပဲ..."

ဟွမ်ဖူပုလင်းက ခေါင်းယမ်းလိုက်ပြီး ဤပြဿနာနှင့် ပတ်သက်၍ အချင်းချင်း သဘောထား ကွဲလွဲကာ ဆက်ဆံရေး ပျက်ပြားသွားမည်ကို မလိုလားသဖြင့် အများကြီး ငြင်းခုံလိုခြင်း မရှိတော့ချေ။

"မင်းက တကယ်ကို အားမနာတတ်တာပဲ အဲ့ဒီကောင်တွေက အပြင်ပန်းမှာ ကြည့်ရသလောက် သဘောကောင်းတဲ့သူတွေ မဟုတ်ဘူးနော်..."

အဝေးသို့ ရောက်သွားပြီးနောက် ချီရှောက်ယန်က အဓိပ္ပာယ်ပါပါဖြင့် ရုတ်တရက် သတိပေးလိုက်လေသည်။

ထိုစကားကို ကြားသောအခါ ကျန်းချဲ့၏ မျက်နှာပေါ်တွင် မည်သည့် ကြောက်ရွံ့မှုမျှ မရှိဘဲ လှောင်ပြောင်သလို ပြုံးလိုက်လေသည်။

"အဲ့ဒီကောင်တွေက မျက်နှာပန်းလှလှလေး နေချင်တယ်ဆိုရင် ကျုပ်ကို လာမရှုပ်တာ အကောင်းဆုံးပဲ တကယ်လို့ အရှက်ကွဲချင်တယ် ဆိုရင်တော့ သူတို့ကောင်တွေ နေရာတစ်ခုတောင် မရအောင် ကျုပ် လုပ်ပစ်လိုက်မယ်..."

ချီရှောက်ယန်၏ မျက်လုံးများ ကျဉ်းမြောင်းသွားပြီး ကျန်းချဲ့ကို ဂရုတစိုက် အကဲခတ် ကြည့်ရှုလိုက်လေသည်။ သို့သော် သူ ဘာစကားမှ ဝင်ရောက် မငြင်းဆန်ခဲ့ချေ။

အဘယ်ကြောင့်ဆိုသော် ယခုလက်ရှိ ကျန်းချဲ့တွင် ဤသို့ လုပ်ဆောင်နိုင်သော စွမ်းရည်မျိုး အမှန်တကယ် ပိုင်ဆိုင်ထားသောကြောင့် ပင်ဖြစ်သည်။ နေရာအချို့ကို လုယူရန်မှာ ခက်ခဲကောင်း ခက်ခဲနိုင်သော်လည်း လူတစ်ယောက်ကို နေရာမရအောင် တားဆီးရန်ကတော့ သေချာပေါက် လုပ်ဆောင်နိုင်စွမ်း ရှိလေသည်။ ကျန်းချဲ့၏ ဤကဲ့သို့ ကြီးမားလှသော အပြောင်းအလဲများက သူ့ကို ရင်ထဲတွင် အနည်းငယ် သက်ပြင်းချမိစေလေသည်။

သူတို့နှစ်ယောက် ကြားရှိ ကွာဟမှုက တဖြည်းဖြည်း နှင့် ပိုမို ကြီးမား လာနေပြီ မဟုတ်ပါလား။

"ဒါနဲ့ အစ်ကိုကြီး သိုင်းပညာပြိုင်ပွဲ လျှို့ဝှက်နယ်မြေထဲ ဝင်သွားရင် ကြိုပြီး ပြင်ဆင်ထားလိုက် တခြားသူတွေကိုတော့ ကျုပ် မကူညီဘူး ကူညီဖို့လည်း အစီအစဉ် မရှိဘူး ဒါပေမဲ့ ခင်ဗျားက ကျုပ်ရဲ့ အစ်ကိုကြီး ဖြစ်နေတော့ ကျုပ် အစွမ်းကုန် ကူညီပြီး နေရာတစ်ခု ရအောင် လုပေးပါ့မယ် ဒီလူတွေက ထိပ်ဆုံး ဆယ်နေရာကို ဒီလောက်တောင် အလေးထားနေမှတော့ တခြား အထူးလျှို့ဝှက်ချက်တွေ သေချာပေါက် ရှိနေလောက်တယ်..."

ချီရှောက်ယန် အပေါ် ကျန်းချဲ့၏ ရင်ထဲတွင် အလွန် ကောင်းမွန်သော သဘောထားမျိုး ရှိလေသည်။ ဤယောက်ဖဖြစ်သူ ကလည်း သူ့ကို အများကြီး ကူညီပေးခဲ့ဖူးရာ သူ တတ်နိုင်သည့် ဘောင်အတွင်းမှ မြောက်ပိုင်း ချီမိသားစု၏ ကျေးဇူးကို သေချာပေါက် ပြန်လည် ဆပ်ပေးမည်သာ ဖြစ်လေသည်။ အပြန်အလှန် ပေးဆပ်မှုများ ရှိနေမှသာ သူတို့၏ ဆက်ဆံရေးက ပိုမို ရင်းနှီးလာမည် မဟုတ်ပါလား။

"ဒါက သိပ်တော့ မကောင်းပါဘူး ငါ့ကြောင့် မင်းရဲ့ အရေးကြီးတဲ့ ကိစ္စတွေ အနှောင့်အယှက် ဖြစ်သွားလိမ့်မယ်..."

ချီရှောက်ယန်က အနည်းငယ် ကြက်သေသေသွားပြီး အားနာသည့်ပုံစံဖြင့် ပြောလိုက်လေသည်။

မိမိ၏ အခြေအနေကို မိမိသာ အသိဆုံး ဖြစ်ရာ ချီရှောက်ယန် အနေဖြင့် သူ၏ စွမ်းအားကို သူ ကောင်းစွာ သိရှိထားလေသည်။ ထိပ်ဆုံး ဆယ်နေရာ ကိုတော့ သူ လုံးဝ မျှော်လင့်မထားဘဲ အစွမ်းကုန် ကြိုးစားပြသရန် သက်သက်သာ ရည်ရွယ်ထားလေသည်။ သေချာသည်ကတော့ အကယ်၍ ထိပ်ဆုံး ဆယ်နေရာကို ဝင်ရောက်နိုင်မည့် အခွင့်အရေး ရှိလာမည် ဆိုပါကလည်း သူ သေချာပေါက် ငြင်းဆန်မည် မဟုတ်ချေ။ သူ့မှာ အလွန် အစွမ်းထက်သော ယောက်ဖ တစ်ယောက် ရှိနေသည် မဟုတ်ပါလား။

"ဒီလို လုပ်ကြတာပေါ့ ဒီတစ်ကြိမ် ကျုပ် အစ်ကိုကြီးကို အစွမ်းကုန် ကူညီပေးမယ် ဒါကို အစ်ကိုကြီးက ကျုပ်ကို ကျေးဇူးတင်ရမယ့် အကြွေးတစ်ခု အနေနဲ့ မှတ်ထားလိုက် နောက်ပိုင်း ကျုပ်က အစ်ကိုကြီးကို အကူအညီ လာတောင်းရင် လုံးဝ မငြင်းရဘူးနော်..."

ကျန်းချဲ့က ပြုံးရွှင်စွာဖြင့် ပြောလိုက်လေသည်။

"ငါ့ရဲ့ လက်ရှိ စွမ်းအားနဲ့ဆိုရင် မင်းကို ဘာမှ ကူညီပေးနိုင်မှာ မဟုတ်ဘူးနော်..."

ချီရှောက်ယန်က အနည်းငယ် အံ့အားသင့်သွားလေသည်။

"ဘာပဲဖြစ်ဖြစ် အစ်ကိုကြီးက ချီမိသားစုရဲ့ သခင်လေးလေ ဘယ်လိုလုပ်ပြီး မကူညီနိုင်ဘဲ နေမှာလဲ..."

"ကောင်းပြီလေ ဒီကိစ္စ အောင်မြင်သည်ဖြစ်စေ မအောင်မြင်သည်ဖြစ်စေ မင်းရဲ့ ကျေးဇူးကို ငါ မှတ်ထားပါ့မယ်..."

ချီရှောက်ယန်က လေးနက်စွာဖြင့် ပြောလိုက်လေသည်။

ကျန်းချဲ့က အလိုအလျောက်ပင် ချီဝမ်ကျင်း ရှိရာဘက်သို့ တစ်ချက် လှမ်းကြည့်လိုက်ပြီး အပြုံးလေးဖြင့် ခေါင်းညိတ်လိုက်လေသည်။

"ဒါဆိုလည်း သဘောတူတယ်နော်..."

"အစ်ကို အစ်ကိုကျန်း မတွေ့ရတာ ကြာပြီနော်..."

စကားပြောဆိုနေစဉ် ရုတ်တရက် အသံတစ်သံက ထွက်ပေါ်လာရာ ကျန်းချဲ့ နောက်သို့ လှည့်ကြည့်လိုက်လေသည်။ ဝေ့ကျွင်းကျဲ ၏ မျက်နှာပေါ်တွင် နှိမ့်ချသော အပြုံးများဖြင့် သူ့ကို ကြည့်နေသည်ကို တွေ့လိုက်ရလေသည်။

ကျန်းချဲ့က ဝေ့ကျွင်းကျဲ ကို အထက်မှ အောက်သို့ တစ်ချက် အကဲခတ် ကြည့်ရှုလိုက်ပြီးနောက် သူ၏ အကြည့်များက ဘေးနားရှိ လူရိပ်အပေါ်သို့ ရောက်ရှိသွားကာ ခေါင်းအနည်းငယ် ညိတ်ပြလိုက်လေသည်။

"အစ်ကိုဝေ့ ပါလား တကယ်ပဲ မတွေ့ရတာ ကြာပြီနော် လတ်တလော အဆင်ပြေရဲ့လား..."

"အစ်ကိုကျန်းရဲ့ ကျေးဇူးကြောင့် ဝေ့ကျွင်းကျဲ လည်း အဆင်ပြေပါတယ်..."

ကျန်းချဲ့က သူ့ကို ပြန်လည် နှုတ်ဆက်လိုက်သည်ကို မြင်သောအခါ ဝေ့ကျွင်းကျဲ မှာ ဝမ်းသာလွန်း၍ ဘာလုပ်ရမှန်း မသိအောင် ဖြစ်သွားလေသည်။ သူကိုယ်တိုင်ပင် နားမလည်နိုင်အောင် ဖြစ်နေရသည်။ ကျန်းချဲ့က စကားတစ်ခွန်း ပြန်ပြောလိုက်ရုံဖြင့် သူက ဤမျှလောက်အထိ အသုံးမကျ ဖြစ်သွားရသလား။ သို့သော် ကျန်းချဲ့နှင့် အနီးကပ် ထိတွေ့လိုက်ရပြီးနောက် သူ၏ မျက်နှာပေါ်တွင် အပြုံးများသာ ကျန်ရှိနေတော့လေသည်။

"ဒီ မိတ်ဆွေက..."

ကျန်းချဲ့၏ အကြည့်များက ဝေ့ကျွင်းကျဲ ဘေးရှိ လူငယ်အပေါ်သို့ ရောက်ရှိသွားလေသည်။

"သူက မကြာသေးခင် နှစ်တွေကမှ နာမည်ကြီးလာတဲ့ အစ်ကိုလုကျဲယွင် ပါ..."

ဝေ့ကျွင်းကျဲက အလျင်စလို မိတ်ဆက်ပေးလိုက်လေသည်။

ကျန်းချဲ့၏ အကြည့်များက ဝေ့ကျွင်းကျဲ ၏ ကိုယ်ပေါ်တွင် မျက်တောင် တစ်ခတ်စာမျှ ရပ်တန့်သွားပြီးနောက် ခေါင်းအနည်းငယ် ညိတ်ပြလိုက်လေသည်။

"နာမည် ကြားဖူးနေတာ ကြာပါပြီ..."

လုကျဲယွင် ဟူသော နာမည်နှင့် ပတ်သက်၍ ကျန်းချဲ့ လုံးဝ စိမ်းသက်မနေခဲ့ချေ။ မည်သို့ပင်ဆိုစေ တစ်ဖက်လူမှာ အနက်ရောင် ရုံးတော်၏ သိုင်းစာအုပ်ထဲတွင် အဆင့်ဆယ် နေရာ၌ ရှိနေပြီး စောစောက ဟွမ်ဖူ မိသားစု၏ သခင်လေး ဟွမ်ဖူပုလင်း ၏ အောက်တွင် ကပ်လျက် ရှိနေလေသည်။

အရေးအကြီးဆုံးမှာ ဤလူသည် သာမန် နောက်ခံမှ ဆင်းသက်လာသူ တစ်ယောက် ဖြစ်သော်လည်း ဤနေရာအထိ ရောက်ရှိလာနိုင်ခြင်းက အမှန်တကယ်ပင် သူ့တွင် ထူးခြားသော စွမ်းရည်များ ရှိနေကြောင်း သက်သေပြနေလေသည်။

ဤလူ၏ အတိတ်မှတ်တမ်း အချို့ကို သူ ဖတ်ဖူးခဲ့လေသည်။ သေးငယ်သော မိသားစုလေးမှ ဆင်းသက်လာပြီး လူမသိသူမသိ အခြေအနေမှနေ၍ ရုတ်တရက် နာမည်ကျော်ကြားလာခဲ့သူ ဖြစ်သည်။ အကြိမ်ကြိမ် ကံကြမ္မာ အရင်းအမြစ်များကို ရရှိခဲ့ပြီး နှစ်အနည်းငယ် အတွင်းမှာပင် သိုင်းလောက၌ အကြီးအကျယ် နာမည်ကြီးလာခဲ့သူ ပင်ဖြစ်သည်။

ထို့အပြင် ဤလူသည် လူမှုဆက်ဆံရေး အလွန်ကောင်းမွန်ပြီး လောကတစ်ခွင်လုံးတွင် မိတ်ဆွေများစွာ ရှိကာ အလယ်ပိုင်းဒေသ တစ်ဝိုက်တွင် သူ၏ အဆက်အသွယ်များနှင့် ဂုဏ်သတင်းမှာ အလွန် ကြီးမားလှပေသည်။ အခြားအချက် တစ်ချက်မှာ ဤလူသည် ယနေ့အချိန်အထိ မည်သည့် အင်အားစု ကိုမျှ အညံ့ခံ ဝင်ရောက်ခြင်း မရှိခဲ့သလို မည်သည့် အင်အားကြီး မိသားစုနှင့်မျှလည်း မင်္ဂလာကိစ္စ မရှိခဲ့ချေ။ အရာအားလုံးကို သူ၏ ကိုယ်ပိုင် ကြိုးစားအားထုတ်မှု သက်သက်ဖြင့်သာ ရရှိခဲ့ခြင်း ပင်ဖြစ်သည်။

ဤအချက် တစ်ချက်တည်းကပင် လူအများကို လေးစား အထင်ကြီးသွားစေရန် လုံလောက်နေပေပြီ။ ကျန်းချဲ့ ပင်လျှင် ဤလူသည် ကံကြမ္မာ အရင်းအမြစ်များကို ပိုင်ဆိုင်ထားသော ဇာတ်လိုက် တစ်ယောက်နှင့် အတော်လေး တူညီနေသည်ဟု ခံစားမိလေသည်။

"အစ်ကိုကျန်း ကိုမှ ကျုပ်က တကယ် နာမည် ကြားဖူးနေတာပါ အရင်ကတည်းက မိတ်ဆွေဖွဲ့ချင်နေခဲ့တာ နှမြောစရာ ကောင်းတာက အစ်ကိုကျန်း က အလယ်ပိုင်းဒေသ မှာ လူလုံးထွက်ပြတာ အရမ်း ရှားလွန်းလို့လေ စောစောက အစ်ကိုကျန်း ကို မြင်လိုက်လို့ အစ်ကိုဝေ့ ကို အကူအညီတောင်းပြီး မိတ်ဆက်ခိုင်းလိုက်တာပါ..."

ကျန်းချဲ့က လုကျဲယွင် ကို ဇာတ်လိုက် တစ်ယောက်ဟု ထင်မြင်နေသော်လည်း လုကျဲယွင် ၏ အမြင်တွင်တော့ ကျန်းချဲ့ ကမှ အစစ်အမှန် ဇာတ်လိုက် တစ်ယောက် ဖြစ်ပြီး သူ၏ မှတ်ဉာဏ်ထဲမှ ခုန်ထွက်လာသော ထူးဆန်းသည့် သတ္တဝါ တစ်ကောင် ဖြစ်ကာ အလွန် လျှို့ဝှက်ဆန်းကြယ်ပြီး အစွမ်းထက် လွန်းလှပေသည်။ ကျန်းချဲ့ အပေါ် စိတ်ဝင်စားနေသည် နှင့် တစ်ချိန်တည်းမှာပင် သူ၏ ရင်ထဲတွင် လျှို့ဝှက်သော ကြောက်ရွံ့မှု တစ်ခုလည်း ရှိနေလေသည်။

"အစ်ကိုလု အရမ်း ယဉ်ကျေးနေပါပြီ..."

ကျန်းချဲ့က မျက်နှာပေါ်တွင် အပြုံးများဖြင့် ပြန်ပြောလိုက်လေသည်။

စကားအနည်းငယ် ပြောဆိုပြီးနောက် သူတို့၏ ဆက်ဆံရေးမှာ အနည်းငယ် နီးကပ်လာခဲ့ပြီး လုကျဲယွင် ၏ စကားများလည်း ပိုမို များပြားလာလေသည်။ တစ်ဖက်မှ သိုင်းလောက အကြောင်းများကို ဆွေးနွေးနေသလို အခြားတစ်ဖက်မှလည်း ကျန်းချဲ့၏ သေးငယ်သော အပြောင်းအလဲများကို အလွန် သေချာစွာ အကဲခတ် နေလေသည်။

ဤမြင်ကွင်းကို ကြည့်ရင်း ချီရှောက်ယန် နှင့် ဝေ့ကျွင်းကျဲ တို့မှာ ဝင်ရောက် စကားပြောရန် အခွင့်အရေး မရှိသဖြင့် အကြောင်းပြချက် တစ်ခုရှာကာ အဝေးသို့ ထွက်ခွာသွားကြလေသည်။ နန်းဆောင် တစ်ခုလုံး၏ လေထုမှာလည်း တဖြည်းဖြည်း နှင့် ပုံမှန် အခြေအနေသို့ ပြန်လည် ရောက်ရှိသွားခဲ့လေသည်။

ထိုအချိန်အတွင်း ထိပ်တန်း အင်အားစုများမှ အတွင်းတပည့် အချို့လည်း ရှေ့သို့ တိုးလာကာ ကျန်းချဲ့ နှင့် လုကျဲယွင် တို့ကို နှုတ်ဆက်ကြလေသည်။ သူတို့၏ ရည်ရွယ်ချက် မှာလည်း ဟွမ်ဖူပုလင်း တို့ကဲ့သို့ပင် မဟာမိတ် ဖွဲ့လိုခြင်း ပင်ဖြစ်သည်။ သို့သော် ကျန်းချဲ့ နှင့် လုကျဲယွင် တို့၏ ယဉ်ကျေးစွာ ငြင်းဆန်မှုကို ခံလိုက်ကြရလေသည်။

"ကြည့်ရတာ အစ်ကိုလု က လာမယ့် သိုင်းပညာပြိုင်ပွဲ အတွက် တော်တော်လေး ယုံကြည်ချက် ရှိနေပုံပဲ..."

မူလက လုကျဲယွင် လည်း သူ့ကို လာရောက် အကူအညီ တောင်းခံသည်ဟု ကျန်းချဲ့ ထင်မှတ်ထားခဲ့သော်လည်း စကားပြောဆို ကြည့်ပြီးနောက်မှ တစ်ဖက်လူတွင် ထိုကဲ့သို့သော ရည်ရွယ်ချက် လုံးဝ မရှိမှန်း သူ နားလည် သဘောပေါက် သွားခဲ့လေသည်။ သူ့ကို မိတ်ဆွေဖွဲ့ရန် သက်သက်သာ ရည်ရွယ်ထားပုံ ရလေသည်။ မဟာမိတ် ဖွဲ့မည့် ကိစ္စများကိုပင် လုံးဝ စိတ်မဝင်စားချေ။

"ယုံကြည်ချက် ရှိတယ်လို့တော့ မဆိုနိုင်ပါဘူး ကိုယ် တတ်နိုင်သလောက် အစွမ်းကုန် ကြိုးစားရုံ သက်သက်ပါပဲ အစ်ကိုကျန်း ကမှ ဒီတစ်ကြိမ်မှာ ထိပ်ဆုံးကို ရောက်ဖို့ အလားအလာ အများဆုံးပဲလေ..."

လုကျဲယွင်က လက်ယမ်းကာ အလွန် နှိမ့်ချသော အမူအရာဖြင့် ပြန်ပြောလိုက်လေသည်။

"လောကတစ်ခွင်က သူရဲကောင်းတွေ အားလုံး တစ်နေရာတည်းမှာ စုဝေးနေကြတာဆိုတော့ ကျုပ်အနေနဲ့ အဲ့ဒီလောက်အထိ ယုံကြည်ချက် မရှိပါဘူး..."

ကျန်းချဲ့က မျက်လုံးများကို ကျဉ်းမြောင်းကာ ပြောလိုက်လေသည်။

"တကယ်လို့ အစ်ကိုကျန်း ကတောင် ယုံကြည်ချက် မရှိဘူးဆိုရင် လောကမှာ ဘယ်သူမှ ကြီးကြီးကျယ်ကျယ် ပြောရဲမှာ မဟုတ်တော့ဘူး ဒါနဲ့ ကျုပ် အစ်ကိုကျန်း ကို သတိပေးချင်တဲ့ ကိစ္စလေး တစ်ခု ရှိတယ်..."

လုကျဲယွင် ၏ မျက်နှာထား ရုတ်တရက် တည်ကြည်သွားပြီး အနည်းငယ် လေးနက်သော အမူအရာ ပေါ်လွင်လာလေသည်။

"ဪ အစ်ကိုလု ပွင့်ပွင့်လင်းလင်း ပြောပါ..."

"ဒီတစ်ကြိမ် သိုင်းပညာပြိုင်ပွဲမှာ တော်တော်လေး ရင်ဆိုင်ရ ခက်ခဲတဲ့သူ တချို့ ပါလာတယ် အဲ့ဒီအချိန်ကျရင် အစ်ကိုကျန်း သေချာ ဂရုစိုက်ဖို့ လိုတယ် ပထမ တစ်ယောက်က တာ့လေ့ယင် ဘုန်းကြီးကျောင်းက ဆန်းကျန့် ဘုန်းကြီးပဲ ဒီလူက ချီစွမ်းအင်နဲ့ ရုပ်ခန္ဓာကို ပေါင်းစပ် ကျင့်ကြံထားပြီး တကယ်ကို ထူးခြား ပြောင်မြောက်တယ် ဒုတိယ တစ်ယောက်ကတော့ ချင်းထျန်းဂိုဏ်းက သူတော်စင်သားတော် ချူဟယ် ပဲ ဒီလူက ယန်ကိုးပါး သူတော်စင် ခန္ဓာကိုယ်ကို ပိုင်ဆိုင်ထားပြီး တိုက်ခိုက်ရေး သိုင်းပညာတွေမှာ အလွန် ကျွမ်းကျင်တယ် စွမ်းအားကလည်း ပြိုင်ဘက်ကင်းပဲ အစ်ကိုကျန်း အနေနဲ့ ဒီလူ အနီးကပ် ဝင်လာတာမျိုး လုံးဝ အဖြစ်မခံဖို့ သတိထားရမယ်..."

ကျန်းချဲ့ သည် သူနှင့် အနည်းငယ် ကင်းကွာစွာ ဆက်ဆံနေကြောင်း လုကျဲယွင် ကောင်းစွာ ခံစားမိလေသည်။ အမှန်တကယ်တော့ ဤသည်မှာ အလွန် ပုံမှန် အခြေအနေ တစ်ခု ပင်ဖြစ်သည်။ မည်သို့ပင်ဆိုစေ သူတို့မှာ ပထမဆုံး အကြိမ် တွေ့ဆုံခြင်း သာ ဖြစ်သည် မဟုတ်ပါလား။ သို့သော် ကျန်းချဲ့ နှင့် ယာယီ မိတ်ဆွေဖွဲ့နိုင်ရန် အတွက် သူ၏ မှတ်ဉာဏ်ထဲမှ သတင်း အချက်အလက် အချို့ကို ထုတ်ဖော် ပြောဆိုရန် ဆုံးဖြတ်လိုက်ခြင်း ပင်ဖြစ်သည်။

"ချင်းထျန်း သူတော်စင်သားတော် ချူဟယ် လား..."

ဆန်းကျန့် ဘုန်းကြီး ကိုတော့ ကျန်းချဲ့ သိရှိထားလေသည်။ အနက်ရောင် ရုံးတော်၏ သိုင်းစာအုပ်ထဲတွင် နံပါတ်တစ် နေရာ၌ ရေးမှတ်ထားခြင်း ခံရပြီး ဗောဓိသတ် ဝင်စားသည် ဟု ကောလာဟလ ထွက်ပေါ်နေသူ ပင်ဖြစ်သည်။ သို့သော် ချင်းထျန်း သူတော်စင်သားတော် ချူဟယ် ဆိုသည်ကတော့ သူ့ကို အနည်းငယ် သံသယ ဝင်စေခဲ့လေသည်။ အဘယ်ကြောင့်ဆိုသော် ဤနာမည်ကို သူ တစ်ခါမှ မကြားဖူး ခဲ့သောကြောင့် ပင်ဖြစ်သည်။

သို့သော် လုကျဲယွင် ၏ လေးနက်နေသော မျက်နှာထား ကို ကြည့်ရသလောက် ဤကိစ္စမှာ လုံးဝ အတုအယောင် မဖြစ်နိုင်ချေ။

လုကျဲယွင် က လေးနက်စွာ ခေါင်းညိတ် လိုက်လေသည်။

"ဒီလူက အမြဲတမ်း လျှို့ဝှက်ဆန်းကြယ် လွန်းတယ် ချင်းထျန်းဂိုဏ်း ထဲမှာတောင် သူ့အကြောင်းကို ကောင်းကောင်း သိတဲ့သူ အရမ်း နည်းတယ် ဒါပေမဲ့ သူ့ရဲ့ စွမ်းအားကတော့ တကယ်ကို မျိုးဆက်တူ တွေထဲမှာ ထိပ်တန်း အဆင့်ပဲ ဒီတစ်ကြိမ် သိုင်းပညာပြိုင်ပွဲ က နှစ်ပေါင်းများစွာ တံခါးပိတ် ကျင့်ကြံပြီးနောက်မှာ သူ ဝင်ပါမယ့် ပထမဆုံး တိုက်ပွဲ ဖြစ်လာလိမ့်မယ်လို့ ကျုပ် ထင်တယ်..."

"အစ်ကိုလု ရဲ့ သတင်း အချက်အလက် တွေက တကယ်ကို တိကျ မြန်ဆန်တာပဲ..."

ဤကိစ္စ နှင့် ပတ်သက်၍ လုကျဲယွင် က လုံးဝ ငြင်းဆန်ခြင်း မပြုခဲ့ချေ။

"သိုင်းလောကမှာ လှည့်လည် သွားလာခဲ့တာ နှစ်အတော်ကြာပြီ ဆိုတော့ ကိုယ်ပိုင် လျှို့ဝှက် သတင်းလမ်းကြောင်း လေးတွေတော့ ရှိတာပေါ့ ချူဟယ် ကလွဲရင် လီရွှမ်ကျန်း ကျန်းဖျင် ချန်ဖျင် တို့ကလည်း နာမည်မရှိတဲ့ သူတွေ မဟုတ်ကြဘူး ဒါနဲ့ ကျုပ် သိရသလောက်တော့ ဒီတစ်ကြိမ်မှာ ပိုင်ယွဲ့ နိုင်ငံတွေ က လူတွေတောင် လာပြီး ဝင်ပြိုင်ကြမယ် လို့ ကြားတယ် အစ်ကိုကျန်း ရဲ့ စွမ်းအားက သာမန် မဟုတ်ဘူး ဆိုပေမဲ့လည်း လုံးဝ ပေါ့ဆ မနေတာ အကောင်းဆုံးပဲ..."

ကျန်းချဲ့၏ မျက်လုံးများ လှုပ်ရှားသွားပြီး တော်ဝင်နန်းတော် မှ မကြာမီ ထုတ်ပြန်တော့မည့် သိုင်းအဆင့် သတ်မှတ်ချက် စာရင်း ကို တွေးတော လိုက်ကာ ရုတ်တရက် မေးလိုက်လေသည်။

"ဒီတစ်ကြိမ် သိုင်းပညာပြိုင်ပွဲ မှာ ဒီလောက် များပြားလှတဲ့ ပါရမီရှင် တွေ ဝင်ပြိုင်ကြတာ ဘာကြောင့်လဲ ဆိုတာကိုရော အစ်ကိုလု သိထားလား..."

လုကျဲယွင် က အချိန်ခဏမျှ စဉ်းစားခန်း ဝင်သွားပြီးနောက် ဆက်လက် ပြောလိုက်လေသည်။

"ကျုပ် သိရသလောက်တော့ တော်ဝင်နန်းတော် က လောက တစ်ခွင်လုံး ရဲ့ အခြေအနေ တွေနဲ့ သက်ဆိုင်တဲ့ အရေးကြီးတဲ့ ကိစ္စကြီး တစ်ခုကို လျှို့ဝှက် စီစဉ် နေတယ် ထင်တယ် ဒီတစ်ကြိမ် သိုင်းပညာပြိုင်ပွဲ က အဲ့ဒီ ကိစ္စရဲ့ အဓိက ဗဟိုချက်ပဲ နောက်ထပ် ကိစ္စ တစ်ခုလည်း ရှိသေးတယ် ဒါပေမဲ့ အဲ့ဒါက အမှန်လား အမှားလား ဆိုတာကိုတော့ ကျုပ်လည်း သေချာ မသိသေးဘူး ကြားရသလောက်တော့ ဒီတစ်ကြိမ် သိုင်းပညာပြိုင်ပွဲမှာ ထိပ်ဆုံး ဆယ်နေရာ ဝင်တဲ့ သူတွေက ကောင်းကင်နဲ့ မြေကြီး ရဲ့ ကံကြမ္မာ အရင်းအမြစ် တွေကို ရရှိလိမ့်မယ်တဲ့ အဆင့် ပိုမြင့်လေ ရရှိမယ့် ကံကြမ္မာ အရင်းအမြစ် ကလည်း ပိုများလေပဲ တဲ့..."

"ကံကြမ္မာ အရင်းအမြစ်လား အရင်က ကျင်းပခဲ့တဲ့ ပြိုင်ပွဲ တွေမှာလည်း ဒီလိုပဲ မဟုတ်လား..."

ကျန်းချဲ့က တစ်ဖက်လူကို လေးနက်စွာဖြင့် စူးစိုက်ကြည့်လိုက်လေသည်။ လုကျဲယွင် အနေဖြင့် တော်ဝင်နန်းတော် ၏ လျှို့ဝှက် အစီအစဉ် များကို သိရှိနေခြင်းက သူ့ကို အနည်းငယ် အံ့အားသင့် သွားစေခဲ့လေသည်။ အဘယ်ကြောင့်ဆိုသော် ချီရှောက်ယန် ပင်လျှင် ဤကိစ္စကို လုံးဝ မသိရှိ သောကြောင့် ပင်ဖြစ်သည်။

တော်ဝင်နန်းတော် က သတင်း များကို မည်မျှအထိ လျှို့ဝှက်စွာ ပိတ်ဆို့ ထားကြောင်းကို ကောင်းစွာ တွေ့မြင် နိုင်လေသည်။

ထိုသို့ ဆိုလျှင် နောက်ခံ အင်အား မရှိသော ရွှေအမြုတေ အဆင့် သိုင်းသခင် တစ်ယောက် ဖြစ်သည့် လုကျဲယွင် က ဘယ်ကနေများ သတင်း ရလာခဲ့တာလဲ။

"အရင်က ကျင်းပခဲ့တဲ့ ပြိုင်ပွဲတွေမှာ ကောလာဟလ တွေ ရှိခဲ့ပေမဲ့ ဒီတစ်ကြိမ် ကတော့ လုံးဝ ကွဲပြားတယ် အစ်ကိုကျန်း အနေနဲ့ တကယ် ထိပ်ဆုံး ဆယ်နေရာ ကို ရတဲ့အခါကျရင် ကောင်းကောင်း နားလည် သွားမှာပါ..."

လုကျဲယွင် က ပြုံးလိုက်ပြီး အများကြီး ပွင့်ပွင့်လင်းလင်း မပြောခဲ့ချေ။

"ဒီလိုဆိုမှတော့ အစ်ကိုလု လည်း ဒီတစ်ကြိမ်မှာ ထိပ်ဆုံး ဆယ်နေရာ ကို ဝင်လုမယ့် သဘောပေါ့..."

"ကျုပ် အစွမ်းကုန် ဝင်လုကြည့်မှာပါ အဲ့ဒီအချိန်ကျရင် အစ်ကိုကျန်း အနေနဲ့ သက်ညှာပေးဖို့ မျှော်လင့်ပါတယ်..."

"ဟဲဟဲ အစ်ကိုလု အရမ်း ယဉ်ကျေးနေပါပြီ..."

ကျန်းချဲ့ နှင့် လုကျဲယွင် တို့ နှစ်ယောက် စလုံး မှာ အလွန် နှိမ့်ချ သော အမူအရာ များကို ကိုယ်စီ ပြသ နေကြလေသည်။

သူတို့ နှစ်ယောက် အချင်းချင်း စမ်းသပ် နေကြစဉ် ရုတ်တရက် ပတ်ဝန်းကျင် တွင် အနည်းငယ် ဆူညံ ပွက်လောရိုက် သွားလေသည်။ ကျန်းချဲ့ နှင့် လုကျဲယွင် တို့ လှည့်ကြည့် လိုက်ရာ တံခါးဝ တွင် အနက်ရောင် ဝတ်ရုံရှည် ကို ဝတ်ဆင်ထားသော လူငယ် တစ်ယောက် မတ်တပ် ရပ်နေသည် ကို တွေ့လိုက်ရလေသည်။

ခံစားချက် ကင်းမဲ့သော မျက်နှာထား ဖြင့် ထိုနေရာတွင် ရှိနေသော လူတိုင်းကို လုံးဝ အားနာခြင်း မရှိဘဲ လိုက်လံ အကဲခတ် ကြည့်ရှု နေလေသည်။ သူ၏ တစ်ကိုယ်လုံး တွင်လည်း အလွန် အစွမ်းထက်သော ဖိအား ကြီး တစ်ခုကို လုံးဝ ဖုံးကွယ် ထားခြင်း မရှိဘဲ ထုတ်လွှတ် နေလေသည်။

မည်သူ့ကိုမျှ မျက်လုံးထဲ မထည့်ထားသည့် အလား မာနထောင်လွှား သော အရှိန်အဝါ မျိုး ရှိနေလေသည်။

လုကျဲယွင် က အချိန်ခဏမျှ သေချာစွာ အကဲခတ် ကြည့်ရှု လိုက်ပြီးနောက် ရုတ်တရက် ကျန်းချဲ့ ကို တိုးညှင်းစွာ ပြောလိုက်လေသည်။

"ဒီလူက ချင်းထျန်းဂိုဏ်း ရဲ့ ယခု မျိုးဆက် သူတော်စင်သားတော် ယန်ကိုးပါး သူတော်စင် ခန္ဓာကိုယ် ကို ပိုင်ဆိုင်ထားတဲ့ ချူဟယ် ပဲ..."

ကျန်းချဲ့ က ဤ သူစိမ်း လူငယ်ကို အချိန်ခဏမျှ အကဲခတ် ကြည့်ရှု လိုက်ပြီးနောက် ခေါင်းအနည်းငယ် ညိတ်လိုက်လေသည်။ လုကျဲယွင် ပြောသည်မှာ အမှန်တကယ် ပင် မှားယွင်းခြင်း မရှိချေ။

ဤလူ၏ ကိုယ်ပေါ်မှ ထွက်ပေါ် နေသော အရှိန်အဝါ ကို ကြည့်ရုံ ဖြင့် ဤ ချူဟယ် သည် သာမန် မဟုတ်ဘဲ အလွန် ရင်ဆိုင်ရ ခက်ခဲသော ပြိုင်ဘက် တစ်ယောက် ဖြစ်ကြောင်း သူ ကောင်းစွာ အာရုံခံ မိလိုက်လေတော့သည်။