အခန်း (၁၀၉-၁၁၀)

အခန်း ၁၀၉

ဤအချိန်တွင် တရားသူကြီး ရှန်းကျားရွေ့က "တရားရုံးအနေနဲ့ အမှုခေတ္တရပ်ဆိုင်းခွင့် မပေးနိုင်ပါဘူး။ တရားခံတို့ စကားပြောဆိုရာမှာ သတိပြုပါ။ တရားရုံးရဲ့ စည်းကမ်းကို မဖျက်ဆီးပါနဲ့။ ရှေ့နေကို ကြိုတင်ရှာဖွေထားသင့်တာပါ။ ရှေ့နေက ထွက်ပြေးသွားလို့ အခုမှ အချိန်ဆိုင်းခိုင်းလို့ မရဘူး။ တရားရုံးဆိုတာ ခင်ဗျားတို့ အိမ် မဟုတ်ဘူး။ စိတ်ကူးပေါက်တိုင်း ရပ်ဆိုင်းခိုင်းလို့ ရတာ မဟုတ်ဘူး" ဟု ပြတ်သားစွာ ပြောလိုက်သည်။

ကန်ဂွေကျုံး၊ ယန်ခိုင်လုံနှင့် မန်းဒယ်လျန်တို့မှာ မျက်နှာပျက်သွားကြသည်။

ရှေ့နေ မရှိတော့သော်လည်း ဂူချန်တွင် ခိုင်လုံသော အထောက်အထား မရှိသေးဘူးဟု သူတို့ ယုံကြည်နေဆဲပင်။

ဂူချန် ဘယ်လောက်ပဲ တိုက်ခိုက်ပါစေ သူတို့အပေါ် ဘာမှ အရေးယူနိုင်မည် မဟုတ်ဟု သူတို့ ထင်နေကြသည်။

ဂူချန်က တရားသူကြီး ရှန်းကျားရွေ့ကို ကြည့်လိုက်သည်။

သူသည် အားလုံးကို တစ်ချက်ဝေ့ကြည့်ပြီး "ကျွန်တော့်မှာ အထောက်အထား ရှိပါတယ်။ ခင်ဗျားတို့ မဝန်ခံချင်ရင်တောင် ကျွန်တော့်လက်ထဲက အထောက်အထားက အရာအားလုံးကို သက်သေပြနိုင်ပါတယ်" ဟု ပြောသည်။

"ခင်ဗျားတို့ သိလား တန်ရှင်းရန် မခုန်ချခင်မှာ သူမက ကိုယ့်ကိုကိုယ် သတ်သေစာတစ်စောင် ရေးခဲ့တယ်။ အဲဒီစာက တန်ရှင်းရန်ရဲ့ စားပွဲခုံထဲမှာ ရှိနေတာပါ။ တန်ရှင်းရန် ခုန်ချပြီးတဲ့အခါ ဘာလို့ ၁၂၀ ကိုဖြစ်စေ၊ ၁၁၀ ကိုဖြစ်စေ ချက်ချင်း မခေါ်ခဲ့တာလဲ အဲဒါက အထောက်အထားတွေကို ဖျက်ဆီးချင်လို့ပဲ"

"စောင့်ကြည့်မှတ်တမ်းကို ဘာလို့ ဖျက်တာလဲ အကျိုးသက်ရောက်မှု မပျံ့နှံ့အောင်လို့ဆိုတဲ့ မန်းဒယ်လျန်ရဲ့ အကြောင်းပြချက်က လုံးဝမှားပါတယ်။ စောင့်ကြည့်မှတ်တမ်းကို ရဲတွေနဲ့ ခင်ဗျားတို့ပဲ ကြည့်လို့ရတာ၊ ဘယ်သူမှ အလွယ်တကူ ဖြန့်လို့ မရဘူး။ ဒါကြောင့် ခင်ဗျားတို့ ဖျက်လိုက်တာက အထောက်အထား ဖျက်ဆီးဖို့ သက်သက်ပဲ။ မှတ်တမ်းထဲမှာ တန်ရှင်းရန် မခုန်ချခင် ယန်ခိုင်လုံရဲ့ လုပ်ရပ်တွေကို ရှင်းရှင်းလင်းလင်း မြင်နိုင်ပါတယ်။ သူ ဘာတွေပြောလဲဆိုတာ မကြားရပေမဲ့ တန်ရှင်းရန် ဘယ်လောက်တောင် ကြောက်လန့်နေလဲဆိုတာ မြင်နိုင်တယ်"

"အဲဒီ သတ်သေစာထဲမှာ တကယ်တမ်း ဘာတွေဖြစ်ပျက်ခဲ့လဲဆိုတာ အကုန်ပါနေတယ်။ ဒါပေမဲ့ ဖြစ်ပြီးတဲ့နောက်မှာ အဲဒီစာ ပျောက်သွားတယ်။ တန်ရှင်းရန်ရဲ့ စာအုပ်တွေ၊ ကျောပိုးအိတ်နဲ့ စားပွဲခုံပါ အကုန်ပျောက်သွားတယ်။ ခင်ဗျားတို့ ပေးတဲ့ အကြောင်းပြချက်က ကျောင်းသားတွေ ကြောက်မှာစိုးလို့တဲ့။ စာအုပ်အနည်းငယ်နဲ့ စားပွဲခုံလေး တစ်လုံးကို ကြောက်နေမယ့်သူက ဘယ်သူလဲ"

"ခင်ဗျားတို့က တန်ရှင်းရန် တခြားအထောက်အထားတွေ ချန်ထားခဲ့မှာကို ကြောက်လို့ အကုန်ဖျက်ဆီးပစ်တာပါ။ စာအုပ်တိုင်းကို စစ်ဆေးဖို့ အချိန်မရှိတော့လို့ အကုန် ဖျက်ဆီးပစ်လိုက်တာပါ။ ခင်ဗျားတို့က အရာအားလုံးကို စုံလင်နေတယ်လို့ ထင်ခဲ့ပေမဲ့ တကယ်တမ်းတော့ အမှားတွေနဲ့ ပြည့်နှက်နေခဲ့တာပဲ"

ဂူချန်က အမှန်တရားကို တစ်ဆင့်ချင်း ဖော်ထုတ်နေသည်။

ယန်ခိုင်လုံ၏ မျက်နှာမှာ ပြာနှမ်းသွားသည်။

ဂူချန်က သတ်သေစာအကြောင်းကို ဘယ်လို သိနေတာလဲ။

ယန်ခိုင်လုံက အေးစက်စက် အသံဖြင့် "ခင်ဗျား ပုတ်ခတ်နေတာပဲ ကျွန်တော် အဲဒီစာကို ဖျက်ဆီးခဲ့တယ်ဆိုတဲ့ အထောက်အထားက ဘာလဲ ကျွန်တော် ဘာမှ မသိဘူး။ တန်ရှင်းရန်ရဲ့ သတ်သေစာဆိုတာ ဘာလဲ ကျွန်တော်တို့က အတန်းထဲမှာ နေရာလွတ်အောင်လို့ သူမရဲ့ ပစ္စည်းတွေကို ရှင်းလင်းပေးခဲ့တာပဲ" ဟု ငြင်းဆို လိုက်သည်။

"ကျန်တာတွေကတော့ ခင်ဗျားရဲ့ ခန့်မှန်းချက်တွေသက်သက်ပါပဲ။ ခင်ဗျားမှာ အထောက်အထား ရှိလို့လား"

ယန်ခိုင်လုံက ဂူချန်တစ်ယောက် ပုံပြင်တွေ ဖန်တီးနေသည်ဟု တွေးလိုက်သည်။

သို့သော် မမျှော်လင့်ဘဲ နောက်တစ်စက္ကန့်မှာပင် ဂူချန်က စကားပြောလာသည်။

"ကျွန်တော့်မှာ အထောက်အထား ရှိပါတယ်"

ဂူချန်က ဆက်ပြောသည်။

"တန်ရှင်းရန်က သတ်သေစာတစ်စောင်ပဲ ချန်ခဲ့တယ်လို့ ခင်ဗျား ထင်နေတာလား ကျွန်တော် ပြောပြမယ်။ တန်ရှင်းရန်က သတ်သေစာ ၃ စောင် ရေးခဲ့တာ ပထမတစ်စောင်က သူမရဲ့ QQ space မှာ လျှို့ဝှက်ကုဒ်နဲ့ ရေးထားတာ။ နောက်တစ်စောင်က အိမ်က စာအုပ်တစ်အုပ်ထဲ ထည့်ထားခဲ့တာ။ တတိယတစ်စောင်က ကျောင်းမှာ ထားခဲ့တာ"

"အိမ်မှာ ထားခဲ့တဲ့စာက မိသားစုကို နှုတ်ဆက်ဖို့၊ ကျောင်းမှာ ထားခဲ့တဲ့စာက သူငယ်ချင်းတွေကို နှုတ်ဆက်ဖို့ပါ။ အွန်လိုင်းပေါ်ကစာတွေကော အားလုံးရှိနေပါတယ်"

ဂူချန်က တန်ရှင်းရန် အိမ်မှာ ရေးထားခဲ့တဲ့ သတ်သေစာကို တိုက်ရိုက် ထုတ်ပြလိုက်သည်။

ဂူချန်က "သူမရဲ့ မိဘတွေက တစ်နှစ်ပြည့်တဲ့အထိ ဒီသတ်သေစာကို မတွေ့ခဲ့ကြဘူး။ သူတို့သမီးရဲ့ အခန်းကို ဘယ်သူမှ မထိရဲခဲ့ကြဘူး။ သမီးလေး ပြန်လာလိမ့်မယ်လို့ အမြဲ မျှော်လင့်နေခဲ့ကြတာ... ဒါတွေအားလုံး အိပ်မက်တစ်ခုပဲ ဖြစ်ပါစေလို့ ဆုတောင်းနေခဲ့ကြတာလေ။ သူတို့သမီးရဲ့ အခန်းကို ထိဖို့တောင် မဝံ့မရဲ ဖြစ်နေခဲ့ကြတာ"

"နောက်တော့ ကျွန်တော် တန်ရှင်းရန်ရဲ့ အခန်းကို သွားပြီး စာအုပ်တစ်အုပ်ထဲမှာ ဒီသတ်သေစာကို တွေ့ခဲ့တာပါ"

ဒီအချိန်မှာ ယန်ခိုင်လုံက ခေါင်းမာစွာဖြင့် "အတု ဒါ အတုဖြစ်ရမယ် ခင်ဗျား ကျွန်တော့်ကို ပုတ်ခတ်ဖို့ ဖန်တီးထားတာ မဟုတ်ဘူးလို့ ဘယ်သူ အာမခံနိုင်မလဲ စာရွက်တစ်ရွက်ကို ကိုင်ပြီး တန်ရှင်းရန်ရဲ့ သတ်သေစာပါလို့ ပြောရုံနဲ့လား ကျွန်တော့်ကို စွပ်စွဲချင်တာပေါ့ ကျွန်တော် အပြစ်ကင်းတယ် ကျွန်တော့်နာမည် ပျက်စီးမယ့်အစား တစ်စစီ ဖြစ်သွားပါစေ။ ကျွန်တော် အသက်မရှိတာ ပိုကောင်းတယ်" ဟု အော်ပြောသည်။

ဂူချန်က "တရားသူကြီးမင်း ကန့်ကွက်ပါတယ်။ တရားခံက ကျွန်တော့်ရဲ့ တင်ပြမှုကို အနှောင့်အယှက် ပေးနေပါတယ်" ဟု ပြောသည်။

တရားသူကြီး ရှန်းကျားရွေ့က "ကျွန်တော့် ခွင့်ပြုချက်မရှိဘဲ တရားခံ စကားပြောခွင့် မရှိဘူး။ ထပ်လုပ်ရင် တရားရုံးရဲ့ စည်းကမ်းကို ဖျက်ဆီးမှုနဲ့ စွဲချက်တင်ပါမယ်" ဟု အမိန့်ပေးသည်။

ယန်ခိုင်လုံမှာ တိတ်ဆိတ်သွားရသည်။

သူ တကယ် စိုးရိမ်နေမိသည်။

ဘာလို့လဲဆိုတော့ ကျောင်းမှာ တန်ရှင်းရန် ထားခဲ့တဲ့ သတ်သေစာ တကယ်ရှိတယ်ဆိုတာကို သူ သိထားလို့ပင်။

ယန်ခိုင်လုံကိုယ်တိုင်လည်း ထိုစာကို မြင်ဖူးခဲ့သည်။

ဂူချန်က "ဒီစာက အတုလို့ ခင်ဗျား ထင်ရင် သက်ဆိုင်ရာ အေဂျင်စီမှာ လက်ရေးစစ်ဆေးနိုင်ပါတယ်။ လက်ရေးအတုလုပ်ဖို့ဆိုတာ အရမ်း ခက်ခဲတဲ့အလုပ်မို့ပါ။ နောက်ပြီး တန်ရှင်းရန်ရဲ့ QQ အကောင့်ကလည်း သူမရဲ့ ကိုယ်ပိုင်အကောင့် ဖြစ်သလို သူမရဲ့ ဒိုင်ယာရီကလည်း တစ်နှစ်လောက်ကတည်းက ရေးထားခဲ့တာပါ" ဟု ပြောသည်။

"ဒီသတ်သေစာရဲ့ အကြောင်းအရာကတော့ ဒီအတိုင်းပါပဲ"

ဂူချန်က စာကို တရားခွင်သို့ တင်ပြလိုက်သည်။

သတ်သေစာတင်မကဘဲ ကျွမ်းကျင်အဖွဲ့အစည်းတစ်ခု၏ စစ်ဆေးချက်လက်မှတ်ပါ ပါဝင်သည်။

"ဒါက သတ်သေစာပါ။ ဒါကတော့ အဖွဲ့အစည်းရဲ့ စစ်ဆေးချက်ပါ။ အရာအားလုံး အဆင်သင့် ဖြစ်နေပါပြီ"

"သက်ဆိုင်ရာ အေဂျင်စီရဲ့ လက်ရေးစစ်ဆေးချက်အရ ဒီစာထဲက လက်ရေးက တန်ရှင်းရန်ရဲ့ လက်ရေးအစစ် ဖြစ်ကြောင်း အတည်ပြုပြီးပါပြီ"

ဂူချန် တင်ပြလိုက်သည့် အချက်အလက်များကို တရားသူကြီးနှင့် ကြည့်ရှုသူများအားလုံး မြင်တွေ့လိုက်ရသည်။

[အမေနဲ့ အဖေ ဒီစာကို ဖတ်တဲ့အချိန်မှာ သမီး ဒီလောကကြီးကနေ ထွက်သွားခဲ့ပါပြီ]

[သမီး တောင်းပန်ပါတယ်။ အမေနဲ့ အဖေရယ်။ ဒီလောကမှာ ဆက်ရှင်သန်ချင်ခဲ့ပေမဲ့... သမီး တကယ် မခံနိုင်တော့ဘူး]

[တောင်းပန်ပါတယ် တောင်းပန်ပါတယ် တောင်းပန်ပါတယ်....]

[သမီးရဲ့ ဒိုင်ယာရီနဲ့ ကျောင်းမှာ သတ်သေစာတွေ ချန်ခဲ့ပါတယ်.... ကျေးဇူးပြုပြီး မဝမ်းနည်းကြပါနဲ့]

[ယူန်စီးတီး အမှတ် ၃ အလယ်တန်းကျောင်းမှာ ဖိအားတွေက အသက်ရှုကြပ်လောက်အောင် များပါတယ်]

[ဒီပတ်ဝန်းကျင်က သမီးအတွက် တကယ်ကို ကြောက်စရာကောင်းပါတယ်။ ဆက်ပြီး ဘယ်လိုနေရမလဲ မသိတော့ဘူး]

[ပထမဆုံး စာမေးပွဲမှာ အမှတ်မကောင်းတုန်းက ယန်ခိုင်လုံက သမီးရဲ့ စာရွက်ကို ဆွဲဖြဲပြီး ပြောခဲ့တာ သမီး မှတ်မိနေသေးတယ်။ အမှတ် ၆၀ နဲ့ ဘယ်လိုလုပ်ပြီး ဒီမှာ ဆက်နေနိုင်မှာလဲတဲ့။ ပြီးတော့ အမှတ်နည်းတဲ့ အတန်းကို ပြောင်းရမယ်လို့ ခြိမ်းခြောက်ပြီး နောက်ဆုံး အခွင့်အရေး တစ်ခါပဲ ပေးခဲ့တာပါ]

[ဒုတိယအကြိမ် သင်္ချာစာမေးပွဲမှာ ၇၈ မှတ် ရတုန်းကလည်း ယန်ခိုင်လုံက ငါနောက်တစ်ခါ သင်္ချာမှာ ၇၈ မှတ် မရတော့ပါလို့ ရေးထားတဲ့ ဆိုင်းဘုတ်ကို ကိုင်ပြီး အတန်းပြင်မှာ ရပ်ခိုင်းခဲ့တာ သမီး မှတ်မိနေသေးတယ်]

အခန်း ၁၁၀

[ဒါပေမဲ့ အိမ်စာတွေက တကယ်ကို များလွန်းတယ်။ ညတိုင်း တစ်နာရီ ဒါမှမဟုတ် နှစ်နာရီအထိ ရေးပြီး မနက်ငါးနာရီမှာ ထပြီး စာကျက်ရတယ်။ ကျွန်မ အိပ်ရေး လုံးဝ မဝဘူး]

[သမီး တကယ်ပဲ အိပ်ချင်တယ်]

[တစ်ခါတုန်းက အတန်းထဲမှာ အိပ်ပျော်သွားမိလို့...]

[ယန်ခိုင်လုံက သမီးကို ခေါ်ထုတ်ပြီး လူတွေအားလုံးရှေ့မှာ ပါးရိုက်ခဲ့တယ်]

[သမီး ဘာမှ ပြန်မပြောရဲခဲ့သလို အမေတို့ဆီကိုလည်း မပြောရဲခဲ့ဘူး...]

[တစ်ခါတုန်းက အိမ်စာ မပြီးလို့ ယန်ခိုင်လုံက သမီးကို ထွက်သွားခိုင်းတယ်။ အိမ်စာ မပြီးနိုင်ရင် ဒီမှာ ရှိနေပြီး အရှက်မခွဲနဲ့တဲ့]

[စာမေးပွဲမှာ အမှတ်မကောင်းတဲ့အခါ ယန်ခိုင်လုံက ကျောင်းတစ်ခုလုံးရှေ့မှာ လူသိရှင်ကြား ဝန်ခံခိုင်းခဲ့တာ သမီး မှတ်မိနေသေးတယ်။ နောက်တစ်ခါ ဒီလို မဖြစ်ရအောင် ကတိပေးခိုင်းခဲ့တယ်]

[ယန်ခိုင်လုံက ဒီအတိုင်း ဆက်ဖြစ်နေရင် ကျောင်းထုတ်ပစ်မယ်လို့လည်း ပြောခဲ့တယ်]

[ယန်ခိုင်လုံက တကယ်ကို ကြောက်စရာကောင်းတယ်]

[သူက အမြဲတမ်း ဆဲဆိုတယ်၊ ရိုက်နှက်တယ်၊ လူတွေကို သိက္ခာချတယ်]

[အမေ၊ အဖေ၊ သမီး တောင်းပန်ပါတယ်]

[သမီး အရမ်း အရှက်ရမိတယ်]

[တစ်ခါတုန်းက အပြစ်ပေးခံရပြီး ရပ်နေတုန်း အိမ်သာသွားချင်ပေမဲ့ ယန်ခိုင်လုံက လုံးဝ ခွင့်မပြုခဲ့ဘူး]

[သူက သမီးအမှတ်နဲ့ဆိုရင် အိမ်သာတောင် သွားဖို့ အခွင့်အရေးရှိလို့လားတဲ့]

[အဲဒီတုန်းက လူတွေအများကြီးရှေ့မှာ သမီး အောင့်မထားနိုင်တော့ဘူး]

[ဒီစာမေးပွဲမှာလည်း သမီး အမှတ်မကောင်းခဲ့ဘူး သင်္ချာမှာ ၈၈ ပဲ ရခဲ့တယ်]

[အမေ၊ အဖေ၊ သမီး ကြောက်တယ်]

[သမီး တကယ်ပဲ အနားယူချင်ပြီ]

[....]

စာက ဒီနေရာမှာပဲ အဆုံးသတ်သွားသည်။

ထိုအချက်ကို ရောက်သွားသည့်အခါ တရားခွင်တစ်ခုလုံး တိတ်ဆိတ်သွားပြီး အားလုံး ငြိမ်သက်သွားကြသည်။

ဂူချန်က ယန်ခိုင်လုံကို ကြည့်ကာ "ဒါဆိုရင် ခင်ဗျား ခုထိ ဘေးမှာပဲ ရပ်နေပြီး ဘာမှ မဆိုင်သလို နေနိုင်ဦးမှာလား ဒါက ခင်ဗျားနဲ့ ဘာမှ မသက်ဆိုင်ဘူးလို့ ပြောဦးမှာလား"

ယန်ခိုင်လုံက "ဒါက ကျွန်တော်နဲ့ မဆိုင်ဘူး ကျွန်တော်လုပ်တာ သူမအတွက် ကောင်းစေချင်လို့ပဲ ကျွန်တော် လုပ်သမျှ အရာအားလုံးက သူမအတွက်ပဲ သူမရဲ့ အနာဂတ်နဲ့ အလားအလာ ပိုကောင်းစေချင်လို့ လုပ်ပေးတာ။ ကျွန်တော် မှားလို့လား သူမရဲ့ အနာဂတ်က ကျွန်တော်နဲ့ ဘာဆိုင်လို့လဲ ကျွန်တော် သူမအပေါ် ဒီလောက်တောင် ကောင်းခဲ့တာကို သူမက ကျွန်တော့်ရဲ့ စေတနာကို အလွဲသုံးစားလုပ်သွားတာ။ တန်ရှင်းရန်မှာ စိတ်ရောဂါ ရှိနေတာပဲ ဖြစ်ရမယ် ဒီဖြစ်ရပ်က ကျွန်တော်နဲ့ လုံးဝ မဆိုင်ဘူး"

ယန်ခိုင်လုံက ဆက်လက် ငြင်းဆိုနေဆဲပင်။

တိုက်ရိုက်ထုတ်လွှင့်မှုကို ကြည့်ရှုသူများမှာ ဒေါသထွက်လွန်း၍ မခံမရပ်နိုင် ဖြစ်ကြသည်။

[သောက်ကျိုးနည်း အဲဒီ ယုတ်မာတဲ့ ယန်ခိုင်လုံ]

[ဒါက လူနေဖို့ နေရာတောင် ဟုတ်ရဲ့လား]

[ဒီလောက် ဖိအားတွေကို ဘယ်သူက ခံနိုင်မှာလဲ ကျွန်တော်တော့ လုံးဝ မခံနိုင်ဘူး]

[တစ်နေ့ကို သုံးနာရီပဲ အိပ်ရတာ ဘယ်သူက ခံနိုင်မှာလဲ]

[ဒါက မင်းရဲ့ စေတနာတဲ့လား သူမအပေါ် ဖိအားတွေက အရမ်းများနေတာပါ]

[သောက်ကျိုးနည်း လူတွေကို သိက္ခာချ၊ ရိုက်နှက်၊ ယန်ခိုင်လုံ မင်း သေသင့်တယ်]

[ယန်ခိုင်လုံကို ထောင်ချမှ ရမယ် ထောင်ချလိုက်ကြစမ်း]

ယန်ခိုင်လုံက ဆက်လက် ငြင်းဆိုနေသည်ကို မြင်သောအခါ ဂူချန်က "ဒါဆိုရင် ခင်ဗျားကော ကန်ဂွေကျုံး ခင်ဗျား ဝန်ခံမှာလား" ဟု မေးလိုက်သည်။

ကန်ဂွေကျုံး၏ မျက်နှာမှာ ပြာနှမ်းသွားပြီး "ခင်ဗျား ဘာတွေ ပြောနေမှန်း ကျွန်တော် မသိဘူး" ဟု ပြန်ပြောသည်။

ဂူချန်က ကန်ဂွေကျုံးကို ကြည့်ကာ "ဘာတွေ ပြောနေမှန်း မသိဘူး ဟုတ်လား ဒါဆိုရင် ကျွန်တော် မေးမယ်။ ဖြစ်ရပ် မဖြစ်ခင် တစ်ရက်နေ့ နေ့လယ်ပိုင်းက တန်ရှင်းရန်ကို ရုံးခန်းထဲ ခေါ်လိုက်တဲ့အခါ ခင်ဗျား ဘာတွေ ပြောခဲ့လဲ ကျောင်းသားတွေ အများကြီးရှေ့မှာ တန်ရှင်းရန်ကို အသုံးမကျတဲ့သူ၊ အသက်ရှင်တာထက် သေတာက ပိုကောင်းကြောင်း၊ သူမ အသက်ရှင်နေတာက အစားအသောက်တွေ ဖြုန်းတီးတာ၊ ဘဝကို အလကားဖြုန်းတီးနေတာလို့ ခင်ဗျား ပြောခဲ့တယ် မဟုတ်လား"

"ဒါတွေဟာ ခင်ဗျားပြောခဲ့တဲ့ စကားတွေ မဟုတ်ဘူးလား"

"ခင်ဗျားတို့က ဖိအားပေးတာနဲ့ ဆဲဆိုတာအပြင် တခြားဘာများ လုပ်တတ်သေးလို့လဲ"

"ခင်ဗျားတောင် တန်ရှင်းရန်ကို ကိုယ့်သဘောနဲ့ကိုယ် ကျောင်းထွက်ဖို့ အတင်းတိုက်တွန်းခဲ့သေးတယ် မဟုတ်လား"

ကန်ဂွေကျုံးက "ခင်ဗျား ဘာတွေ ပြောနေမှန်း ကျွန်တော် မသိဘူး။ ကျွန်တော် ဘယ်တုန်းကမှ အဲဒီလို မပြောခဲ့ဘူး။ ခင်ဗျားက ကျွန်တော့်ကို ပုတ်ခတ်ဖို့ တော်တော်လေး ကျွမ်းကျင်တာပဲ။ ဒီအမှုပြီးရင် ခင်ဗျားကို ကျွန်တော် တရားပြန်စွဲမယ်" ဟု ပြန်လည် ငြင်းဆို လိုက်သည်။

ဂူချန်က ဆက်ပြောသည်။

"ကျွန်တော် မေးမယ်။ တန်ရှင်းရန်ရဲ့ စားပွဲခုံကို ဘယ်သူ ဖျက်ဆီးခဲ့တာလဲ စောင့်ကြည့်မှတ်တမ်းမှာ ခင်ဗျားနဲ့ ယန်ခိုင်လုံတို့ စားပွဲခုံနဲ့ ကုလားထိုင်၊ နောက်ပြီး ကျောပိုးအိတ်ကို အမှိုက်ကားပေါ် တင်နေတာကို အထင်အရှား တွေ့ရတယ်။ ဖြစ်စဉ်ဖြစ်တဲ့နေ့က အထောက်အထားမှန်သမျှကို ခင်ဗျားတို့ ဖျက်ဆီးပစ်ခဲ့တာပဲ"

"ခင်ဗျားတို့ ဖျက်ဆီးပြီးပြီလို့ ထင်ခဲ့ပေမဲ့ မဟုတ်ဘူး တန်ရှင်းရန် အိမ်မှာ ချန်ခဲ့တဲ့ သတ်သေစာနဲ့ အွန်လိုင်းက စာတွေ၊ နောက်ပြီး စောင့်ကြည့်မှတ်တမ်းတွေက အရာအားလုံးကို ရှင်းရှင်းလင်းလင်း သက်သေပြနေတယ်"

ကန်ဂွေကျုံးက "ကျွန်တော် ဘာမှ မသိဘူး" ဟုသာ တုံ့ပြန်သည်။

ဂူချန်က စောင့်ကြည့်မှတ်တမ်းကို ကန်ဂွေကျုံး မျက်နှာရှေ့ တည့်တည့်တွင် ချပြလိုက်သည်။

"ဒါက စောင့်ကြည့်မှတ်တမ်း၊ ဒါက တန်ရှင်းရန်ရဲ့ သတ်သေစာ။ ခင်ဗျား ဘာမှ မသိဘူးလို့ ပြောနေတုန်းလား ငြင်းဆန်နေရုံနဲ့ အမှန်တရားက ပြောင်းလဲသွားမှာ မဟုတ်ဘူး"

"ခင်ဗျားတို့ အတန်းထဲမှာ လုပ်ခဲ့သမျှကို ဆရာတစ်ယောက်က မှတ်တမ်းတင်ထားခဲ့တယ်။ တန်ရှင်းရန်ကို ဘယ်လို ဆက်ဆံခဲ့လဲဆိုတာ တစ်နိုင်ငံလုံး ကြားသိရအောင် လုပ်ပေးရမလား"

ထို့နောက် ဂူချန်က အသံဖိုင်များကို ဖွင့်ပြလိုက်သည်။

အသံဖိုင်ထဲတွင် ဆဲဆိုသံများ၊ ငိုကြွေးသံများနှင့် လှောင်ပြောင်သံများ ထွက်ပေါ်လာသည်။

ဤအရာအားလုံးက တန်ရှင်းရန်ကို စိတ်ဓာတ်ပိုင်းဆိုင်ရာ အရွယ်ရောက်ပြီးသား လူတစ်ယောက်ပင် ခံနိုင်ရည်မရှိလောက်အောင် ဖိနှိပ်ထားခဲ့ခြင်းပင်။

ဂူချန်က သက်သေအထောက်အထားများ တစ်ခုပြီးတစ်ခု တင်ပြပြီးနောက် ကန်ဂွေကျုံးက "ကျွန်တော် ဘာမှ မသိဘူး ခင်ဗျား သက်သေတွေ အကုန် အတုတွေပဲ" ဟု အော်ပြောသည်။

ဂူချန်က "ခင်ဗျား ငြင်းလို့ရပါတယ်။ ဒါပေမဲ့ အထောက်အထားတွေကတော့ သူ့အလိုလို သက်သေပြနေလိမ့်မယ်။ ခင်ဗျားတို့ လုပ်ခဲ့သမျှ အကုန်လုံးကို ဆရာသစ်က မှတ်တမ်းတင်ထားတယ်။ USB ထဲမှာ ဗီဒီယိုနဲ့ အသံဖိုင် GB ၅၀ ပြည့် ရှိတယ်။ အခု ဒါကို တရားရုံးကို တင်သွင်းလိုက်ပြီ" ဟု ပြောလိုက်သည်။

ကန်ဂွေကျုံးမှာ "ကျွန်တော် ဘာမှ မသိဘူး။ ဒါတွေက ကျွန်တော် ပြောတာ မဟုတ်ဘူး။ ခင်ဗျားကို တရားစွဲမယ်" ဟုသာ ထပ်ခါတလဲလဲ ပြောနေသည်။

ဂူချန်က ကန်ဂွေကျုံးကို လုံးဝ ဂရုမစိုက်တော့ဘဲ "ရာဇသတ်ကြီး ပုဒ်မ ၂၃၄ အရ ခင်ဗျားရဲ့ လုပ်ရပ်ဟာ ပေါ့ဆမှုကြောင့် လူသေဆုံးစေမှု မြောက်ပါတယ်။ ထောင်ဒဏ် ၃ နှစ်မှ ၁၀ နှစ်အထိ ကျခံရနိုင်ပါတယ်။ ပုဒ်မ ၃၀၆ အရ အထောက်အထား ဖျက်ဆီးမှုအတွက် ၃ နှစ်မှ ၇ နှစ်အထိ ကျခံရပါမယ်။ ခင်ဗျားရဲ့ လုပ်ရပ်နဲ့ တရားရုံးကို လိမ်ညာနေတဲ့ သဘောထားကို ကြည့်ရင် စုစုပေါင်း ထောင်ဒဏ် ၁၇ နှစ် ချမှတ်ပေးဖို့ တရားသူကြီးမင်းကို တောင်းဆိုပါတယ်။ ပြီးတော့ တန်းကျန်းကောကို လျော်ကြေးငွေ ၁၅၀,၀၀၀ ပေးလျော်စေဖို့ တောင်းဆိုပါတယ်" ဟု ကြေညာလိုက်သည်။

ဂူချန်၏ စကားကြောင့် ကန်ဂွေကျုံး၏ သဘောထားမှာ ရုတ်တရက် ပြောင်းလဲသွားသည်။

၁၇ နှစ်ဆိုသည့် စကားလုံးကြောင့် သူ ကြောက်လန့်သွားသည်။

၁၇ နှစ်ဆိုသည်မှာ သူ၏ ဘဝ ကျန်အချိန်များကို ထောင်ထဲတွင် ကုန်ဆုံးရမည့် ပမာဏဖြစ်သည်။

ကန်ဂွေကျုံးမှာ မျက်နှာပျက်လျက် "ကျွန်တော် ပြောပါမယ်။ အကုန် ပြောပြပါမယ် ကျွန်တော် အကုန်လုံး ဝန်ခံပါ့မယ်။ ကျွန်တော့်ကို သက်ညှာပေးပါ။ ဟုတ်ပြီလား ကျွန်တော် အကုန်လုံး ဝန်ခံပါတယ်" ဟု အော်ဟစ်ကာ တောင်းပန်သည်။

ဂူချန်က "နောက်ကျသွားပါပြီ။ အထောက်အထားတွေ အကုန် ရနေပြီ။ အခုမှ ဝန်ခံပြီး ဘာလုပ်တော့မလဲ တရားသူကြီးမင်းခင်ဗျား ကန်ဂွေကျုံးကို ပြင်းပြင်းထန်ထန် အပြစ်ပေးဖို့ တောင်းဆိုပါတယ် သက်ညှာပေးစရာ မလိုပါဘူး" ဟု ပြတ်သားစွာ ပြောလိုက်သည်။