အခန်း (၁၁၅-၁၁၆)

အခန်း ၁၁၅

လူငယ်လေး ရှီသည် ထွက်ခွာရန် ပြင်ဆင်လိုက်ပြီး "ရပါတယ်။ ကျွန်တော့်ညီမကို ဂူချန်နဲ့ ခဏလောက် အလုပ်သင်လုပ်ခိုင်းထားလိုက်ပါဦးမယ်။ လူငယ်တွေဆိုတာ တစ်ခါတစ်ရံ အပြင်လောကကို ထွက်ပြီး စူးစမ်းလေ့လာဖို့ လိုပါတယ်။ ဒါပေမဲ့ ဂူချန်က အမှုကောင်းအချို့ကို နိုင်ခဲ့တာလောက်ပါပဲ။ ထိပ်တန်းရှေ့နေဖြစ်ဖို့တော့ အများကြီး လိုပါသေးတယ်။ ကျွန်တော်တို့ ရုံးမှာ သူလိုမျိုး အရည်အချင်းရှိတဲ့သူတွေ အများကြီးပါပဲ" ဟု ပြောသည်။

ဂေါယုံက ရယ်မောလျက် "သခင်လေးရှီ ဆက်မကြည့်တော့ဘူးလား" ဟု မေးသည်။

သခင်လေးရှီက "ဆက်ကြည့်စရာ မလိုတော့ပါဘူး။ ဒီအမှုက ပြီးသွားပါပြီ။ ဂူချန်က အမှုမှာ လှပအောင် တိုက်ခိုက်ပြနိုင်ခဲ့ပြီး အနိုင်ရဖို့ သေချာနေပါပြီ။ ကန်ဂွေကျုံးနဲ့ ယန်ခိုင်လုံတို့တော့ ထောင်ကျမှာ သေချာပါတယ်။ မန်းဒယ်လျန်အတွက်တော့ အပြစ်ပေးခံရရင်တောင် ပေါ့ပါးလိမ့်မယ်။ သူက စောင့်ကြည့်မှတ်တမ်းကို ဖျက်ဆီးရုံသက်သက်ပဲ လုပ်ခဲ့တာဆိုတော့ ထောင်ကျဖို့တောင် သိပ်မဖြစ်နိုင်ဘူး။ အများဆုံး ၁ နှစ်၊ ၂ နှစ်လောက်ပဲ ဖြစ်ပါလိမ့်မယ်" ဟု ပြောသည်။

ဂေါယုံက ခေါင်းခါလျက် "အခြေအနေက ဒီလောက်နဲ့ ရိုးရှင်းမယ်လို့ ကျွန်တော် မထင်ဘူး။ တရားခံတွေ အများကြီးကို ဂူချန်က တစ်ပြိုင်နက်တည်း တရားစွဲထားတာဆိုတော့ တစ်ခုခု ရည်ရွယ်ချက် ရှိနေမှာပါ" ဟု ပြန်ပြောသည်။

သခင်လေးရှီလည်း နောက်တစ်ကြိမ် ပြန်ကြည့်လိုက်ပြီး ဆက်လက် စောင့်ကြည့်ရန် ဆုံးဖြတ်လိုက်သည်။

သူ့တွင်လည်း အလုပ်များများစားစား မရှိသည်မို့ ဂူချန် နောက်ထပ် ဘယ်လို အံ့အားသင့်စရာတွေ လုပ်ပြဦးမလဲဆိုတာ စောင့်ကြည့်ချင်မိသည်။

ဂူချန်က အရည်အချင်းရှိသည်မှာ မှန်သော်လည်း သူ့ဘာသာ ရုံးခန်းဖွင့်ပြီး အောင်မြင်ဖို့ဆိုတာ လွယ်ကူသော ကိစ္စမဟုတ်ပေ။

တစ်နိုင်ငံလုံးတွင် ရှေ့နေရုံးပေါင်း မြောက်မြားစွာ ရှိနေသည့်အထဲမှ တရုတ်နိုင်ငံရှိထိပ်တန်းရှေ့နေလိုမျိုး ထိပ်တန်းရုံးကြီးများအထိ ရောက်အောင် တက်လှမ်းဖို့ဆိုသည်မှာ မလွယ်ကူလှပေ။ ဂူချန်တစ်ယောက် အရာရာကို လွယ်လွယ်လေး ထင်နေပုံပင်။

....

ဂူချန်က "မန်းဒယ်လျန် အခု ခင်ဗျားကို မေးမြန်းမယ့် အလှည့်ရောက်ပြီ" ဟု ပြောလိုက်သည်။

မန်းဒယ်လျန်က ဂူချန်ကို ကြည့်လိုက်ပြီး ကြောက်ရွံ့စိတ်တို့ ဝင်လာသည်။

သူက "ခင်ဗျား ဘာတွေ ပြောနေမှန်း ကျွန်တော် နားမလည်သလို ဘာကို ဆိုလိုတာလဲဆိုတာလည်း မသိဘူး" ဟု ပြန်ဖြေသည်။

ဂူချန်က "ဒါက ယန်ခိုင်လုံနဲ့ ကန်ဂွေကျုံးတို့ ခုနက ပြောသွားတဲ့ စကားတွေအတိုင်းပဲ" ဟု ပြောလိုက်သည်။

မန်းဒယ်လျန်က "ဒီအမှုက ကျွန်တော်နဲ့ လုံးဝ မသက်ဆိုင်ပါဘူး" ဟု ငြင်းဆို လိုက်သည်။

မန်းဒယ်လျန်၏ မျက်နှာမှာ ပြာနှမ်းသွားသည်။

သူ အမှန်တကယ် ကြောက်နေပြီ ဖြစ်သည်။ ဂူချန်၏ စွမ်းဆောင်ရည်မှာ တကယ်ကို ကြောက်ခမန်းလိလိပင်။ သူ၏ ရှေ့နေမှာလည်း ထွက်ပြေးသွားပြီ ဖြစ်၍ သူတစ်ယောက်တည်း ရင်ဆိုင်ရတော့မည်ပင်။

တကယ်တမ်းတွင် မန်းဒယ်လျန်သည် သူ ဘာမှ အဓိက မလုပ်ခဲ့ဘူးဟု ယုံကြည်နေသည်။

တန်ရှင်းရန်နှင့် သူဆိုလျှင် တစ်ခွန်းတောင် စကားမပြောဖူးသောကြောင့် လူသတ်မှုနှင့် သူနှင့် ဘာဆိုင်လို့လဲဟု သူ ထင်နေသည်။

သူသည် စောင့်ကြည့်မှတ်တမ်းကို ဖျက်ဆီးရုံသာ ဖျက်ဆီးခဲ့ခြင်းဖြစ်ပြီး ၁၂၀ ကို ဖုန်းခေါ်ရန် အချိန်မရခဲ့ကြောင်း မန်းဒယ်လျန်က ငြင်းဆို လိုက်သည်။

ဂူချန်က "ဟုတ်လို့လား" ဟု မေးလိုက်သည်။

ဂူချန်၏ အကြည့်ကြောင့် မန်းဒယ်လျန်မှာ ကြောက်လန့်သွားပြီး "မဟုတ်ပါဘူး ကျွန်တော် အကုန်ပြောပြပါ့မယ် အကုန်လုံး ဝန်ခံပါ့မယ် အဆင်ပြေမလား" ဟု ပြောသည်။

အွန်လိုင်းကြည့်ရှုသူများမှာ ဂူချန်၏ စွမ်းဆောင်ရည်ကို ချီးကျူးနေကြသည်။

သို့သော် မန်းဒယ်လျန်၏ အပြစ်မှာ အနည်းငယ်သာ ရှိသည်ဟု ယူဆသူများလည်း ရှိသည်။ [မန်းဒယ်လျန်ကတော့ တစ်နှစ်၊ နှစ်နှစ်လောက်ပဲ ထောင်ကျမှာပါ။ သူက စောင့်ကြည့်

မှတ်တမ်း ဖျက်ရုံသက်သက်ပဲ လုပ်ခဲ့တာလေ။ တန်ရှင်းရန် သေဆုံးမှုနဲ့ ဘာမှမဆိုင်ဘူး။ သေချာတာကတော့ သူ အပြစ်ပေးခံရလိမ့်မယ်။ ဒါပေမဲ့ သုံးနှစ်ထက် ကျော်လွန်ဖို့ဆိုတာ မဖြစ်နိုင်ဘူး] ဟူ၍ မှတ်ချက်များ ပေးနေကြသည်။

မန်းဒယ်လျန်က ဆက်ပြောသည်။

"အမှန်အတိုင်း ပြောရရင် ကျွန်တော်တို့ ကျောင်းရဲ့ အောင်ချက်ရာခိုင်နှုန်းကို ကျွန်တော် ထည့်တွက်ခဲ့မိတာ အမှန်ပါပဲ။ ဒါက ကျွန်တော့်အနာဂတ်အတွက် ကောင်းမွန်စေမယ်လို့ တွေးခဲ့မိလို့ပါ။ ဒါကြောင့်လည်း ကျောင်းသားတွေရော၊ ကျွန်တော်ကိုယ်တိုင်ရော တင်းတင်းကျပ်ကျပ် လုပ်ခဲ့တာပါ။ အောင်ချက် မြင့်မားစေဖို့အတွက် အမှတ်နည်းတဲ့ ကျောင်းသားအချို့ကို ကျောင်းထုတ်ခဲ့တာ ရှိပေမဲ့ သူတို့မှာလည်း စည်းကမ်းဖောက်ဖျက်တာမျိုးတွေ ရှိလို့ပါ။ တကယ်လို့ အတန်းထဲမှာ တကယ် ဆိုးဝါးတဲ့ အပြုအမူတွေ ရှိခဲ့ရင် ကြိုတင် တိုင်ကြားစာတွေ ရောက်နေမှာပေါ့။ စာသင်ချိန် ဖိအားများတာ၊ အိမ်စာများတာကလည်း သူတို့ အနာဂတ်အတွက် မဖြစ်မနေ လုပ်ရတာပါ"

ဂူချန်က "အဓိက အချက်ကိုပဲ ပြောပါ" ဟု ပြောလိုက်ရာ မန်းဒယ်လျန်မှာ ကြောက်လန့်သွားပြီး ဆက်ပြောသည်။

"တန်ရှင်းရန် ဖြစ်ရပ်မှာ ကျွန်တော့် ပေါ့ဆမှု ရှိတာ ဝန်ခံပါတယ်။ တန်ရှင်းရန် ခုန်ချတဲ့အချိန်မှာ ယန်ခိုင်လုံဆီက ဖုန်းဝင်လာပြီး သူ ၁၂၀ ကို ခေါ်လိမ့်မယ်လို့ ထင်ခဲ့မိတယ်။ အဲဒါကြောင့် ကျွန်တော် မခေါ်ခဲ့မိတာပါ။ အဲဒီအတွက် ကျွန်တော် နောင်တရပြီး တာဝန်ယူဖို့ ဆန္ဒရှိပါတယ်။ စောင့်ကြည့်မှတ်တမ်း ဖျက်ဆီးခဲ့တာက ကျွန်တော့်အမှားပါ။ ဒါပေမဲ့ သတ်သေစာအကြောင်း ကျွန်တော် လုံးဝ မသိခဲ့ပါဘူး။ သူတို့က ကျွန်တော့်ကို မပြောပြခဲ့ဘူး။ ကျွန်တော်က ကျောင်းရဲ့ ဂုဏ်သိက္ခာ ထိခိုက်မှာ စိုးရိမ်လို့သာ ရှင်းလင်းခဲ့တာပါ"

"တန်ရှင်းရန် သေဆုံးမှုကတော့ ကျွန်တော်နဲ့ ဘာမှ မဆိုင်ပါဘူး။ ကျွန်တော် သူမနဲ့ တစ်ခွန်းမှ စကားမပြောခဲ့ပါဘူး။ ကျွန်တော် လုပ်ခဲ့တာတွေအတွက်တော့ ဝန်ခံပြီး အပြစ်ပေးတာကို ခံယူပါ့မယ်။ ဒါပေမဲ့ မလုပ်ခဲ့တဲ့ အမှုတွေအတွက်တော့ စွပ်စွဲတာ မခံနိုင်ပါဘူး။ ဒါကတော့ ကျွန်တော် အကုန်လုံး ဝန်ခံတာပါပဲ။ တန်ရှင်းရန် ခုန်ချတာက ကျွန်တော့်အတွက်လည်း ဆိုးကျိုးပဲ ရှိတာလေ။ ယန်ခိုင်လုံနဲ့ ကန်ဂွေကျုံးကိုသာ ပြင်းပြင်းထန်ထန် အပြစ်ပေးကြပါ။ ကျွန်တော်နဲ့ တကယ် မဆိုင်ပါဘူး" ဟု မန်းဒယ်လျန်က တောင်းပန်သည်။

ကြည့်ရှုသူ အတော်များများက မန်းဒယ်လျန်၏ ဝန်ခံသည့် သဘောထားကို လက်ခံသော်လည်း ဂူချန်ကမူ ကျေနပ်ခြင်း မရှိသေးပေ။

အခန်း ၁၁၆

အင်တာနက်အသုံးပြုသူများစွာက မှတ်ချက်ပေးကာ ပြောဆိုလာကြသည်။

[မန်းဒယ်လျန်ကတော့ အကုန်လုံး ဝန်ခံသွားပုံပဲ]

[ဒါက ဥပဒေအတိုင်းပဲ ဆုံးဖြတ်ရမှာပါ။ မန်းဒယ်လျန်က ဒီပြစ်မှုတစ်ခုပဲ ကျူးလွန်ထားတာဆိုရင် အများဆုံး ၃ နှစ်၊ ဒါမှမဟုတ် ၃ နှစ်အောက်ပဲ ကျခံရမှာပါ]

[မန်းဒယ်လျန်ရဲ့ အပြစ်ဝန်ခံတဲ့ သဘောထားက လက်ခံနိုင်ပေမဲ့ တန်ရှင်းရန် ဖြစ်ရပ်အတွက် သူ့ကို အပြစ်တင်ဖို့ ခက်ပါတယ်။ ယန်ခိုင်လုံက ၁၂၀ ကို ဖုန်းမခေါ်လိမ့်မယ်လို့ ဘယ်သူကများ ထင်မှာလဲ။ တကယ်ကို လူမဆန်လိုက်တာ]

[မဟုတ်ဘူး။ ကျွန်တော်ကတော့ မန်းဒယ်လျန်လည်း တာဝန်ရှိတယ်လို့ ထင်တယ်။ အနည်းဆုံးတော့ ၁၂၀ ခေါ်၊ မခေါ်ကို သူ အတည်ပြုပေးခဲ့သင့်တယ်။ အခုလိုမျိုး ဖြစ်သွားတာ တကယ်ကို နှမြောစရာပါ]

တရားလိုခုံတန်းလျားတွင် ထိုင်နေသော တန်ရှင်းရန်၏ဖခင်ကတော့ တိတ်ဆိတ်နေသည်။

တန်ရှင်းရန်သည် သူ၏ သမီးဖြစ်သည်။

"ငါ့ရဲ့ အချစ်ဆုံး သမီးလေး... အခုတော့ မရှိတော့ဘူး...

သမီးလေးကို ပျော်ပျော်ရွှင်ရွှင်နဲ့ပဲ အသက်ရှင်စေချင်ခဲ့တာ။

စာမေးပွဲအမှတ်တွေက အရေးမကြီးပါဘူး...

သမီးလေး ပျော်နေရင် ပြီးတာပဲလို့ ငါတို့ ဇနီးမောင်နှံ တွေးခဲ့ကြတာ။

ဒါပေမဲ့ အခုတော့... ဒီလူယုတ်မာတွေကြောင့် ငါ့သမီးလေး အသက်ဆုံးရှုံးခဲ့ရပြီ။

အရေးပေါ်ကား ၁၂၀ ကိုတောင် ဖုန်းမခေါ်ပေးခဲ့ကြတဲ့ လူယုတ်မာကောင်တွေ...

ဆရာဝန်ကတောင် အချိန်မီရင် အသက်ရှင်နိုင်ခြေ ရှိသေးတယ်လို့ ပြောခဲ့တာ...

ဒါပေမဲ့ နောက်ဆုံးတော့... သမီးလေးခမျာ မရှင်နိုင်ခဲ့ရှာဘူး..."

"ဘာဖြစ်လို့လဲ... ဒီလူတွေကြောင့်ပဲ တာဝန်မဲ့လွန်းတဲ့ ဒီလူတွေကြောင့်"

"ဒါတင်မကသေးဘူး...

ငါ သမီးလေးရဲ့ ရုပ်အလောင်းကိုတောင် မတွေ့လိုက်ရဘူး။

ပြာပုံတစ်ပုံအဖြစ်ပဲ မြင်လိုက်ရတာ...

ဒါကို ငါ ဘယ်လိုလုပ် လက်ခံနိုင်မှာလဲ...

ငါ့သမီးလေးကို ဆုံးရှုံးလိုက်ရသလို... ငါ့ဇနီးကိုလည်း ဆုံးရှုံးလိုက်ရပြီ။

အခုလို ဘဝပျက်သွားတဲ့အချိန်မှာ... ဒီငွေကြေးတွေက ငါ့အတွက် ဘာအသုံးဝင်တော့မှာလဲ..."

တန်းကျန်းကောသည် သမီးလေးကို သတိရကာ မျက်ရည်များ ကျဆင်းလာသည်။

ဖြစ်စဉ်ဖြစ်သည့်နေ့ မနက်ကပင် တန်ရှင်းရန်က သူ့ကို "ဖေဖေ" ဟု ခေါ်ကာ နံနက်စာစားဖို့၊ နေ့လယ်စာ သေချာစားဖို့၊ ဗိုက်အောင့်မနေဖို့ မှာကြားခဲ့သေးသည်။

ထိုအချိန်က မိသားစုဘဝလေးက အလွန်နွေးထွေးခဲ့သည်။

အလုပ်က ပြန်လာလျှင် ဇနီးနှင့် သမီးကို မြင်ရပြီး ပူပူနွေးနွေး အစားအစာတွေ ရှိနေတတ်သည်။ အခုတော့ ဘာမှ မရှိတော့ပေ။

တန်းကျန်းကောသည် အိမ်သို့ ပြန်ရန်ပင် မဝံ့ရဲတော့ပေ။

အိမ်ပြန်ရောက်လျှင် နာကျင်မှုများသာ ရရှိမည်ပင်။

တစ်သက်လုံး မေ့နိုင်မည်မဟုတ်သော အမှတ်တရများကြောင့် အေးစက်စက်ဖြစ်နေသောအိမ်ကို ကြည့်ရန်ပင် ကြောက်ရွံ့နေသည်။ သူသည် ယခုလောကတွင် မိသားစု ဟူ၍ မကျန်ရှိတော့ပေ။ မိဘများ၊ သမီးနှင့် ဇနီး အားလုံး မရှိတော့ပေ။

သူသည် အစွန်းရောက်သည့် အတွေးမျိုးတောင် တွေးမိခဲ့သည်။

သို့သော် သူသည် ဘယ်သူ့ကို သွားရှာရမှန်း မသိခဲ့ပေ။

သူ အမှန်တရားကို သိချင်ခဲ့သည်။

နောက်ဆုံးတွင် ဂူချန်ကို တွေ့ခဲ့သည်။

ဂူချန်က အမှုအတွက် စိတ်ရှည်ရှည် စောင့်ဆိုင်းပေးရန် ပြောခဲ့၍ သူ ဒီနေ့အထိ စောင့်ဆိုင်းခဲ့ခြင်းပင်။

တန်းကျန်းကောသည် ထိုလူများ၏ မျက်နှာများကို ကြည့်ကာ အလွန်ဒေါသထွက်နေသည်။ အစပိုင်းတွင် သူ စကားအနည်းငယ် ပြန်လည် ငြင်းခုံခဲ့သော်လည်း ယခုအခါတွင်မူ ဘာမှ မပြောတော့ပေ။

သူ့စိတ်ထဲတွင် တစ်စုံတစ်ရာကို ဆုံးဖြတ်ချက် ချထားပုံပင်။

ထိုအခိုက်အတန့်တွင် ဂူချန်က "ဒါပဲလား" ဟု မေးလိုက်သည်။

မန်းဒယ်လျန်က ခေါင်းခါရင်း "ဟုတ်ပါတယ်။ တန်ရှင်းရန်အမှုနဲ့ ပတ်သက်ပြီး ကျွန်တော် ပြောချင်တာ အကုန်ပြောပြီးပါပြီ" ဟု ပြောလိုက်သည်။

တရားခွင်ရှိ လူတိုင်းမှာ ဂူချန်ကို စူးစမ်းလိုသော အကြည့်များဖြင့် ကြည့်နေကြသည်။ ဇာတ်လမ်းက ဒီမှာတင် ပြီးသွားပြီလား။

နောက်ထပ် အလှည့်အပြောင်းကော မရှိတော့ဘူးလား။

ဂူချန်က "ဒါဆိုရင်... လန်ရှောင်ချူးရဲ့ အမှုကိုကော ခင်ဗျား သိသလား" ဟု မေးသည်။

လန်ရှောင်ချူးဟူသော အမည်ကို ကြားလိုက်ရသည့်အခါ မန်းဒယ်လျန်၏ မျက်နှာမှာ ချက်ချင်း ပြောင်းလဲသွားသည်။

သို့သော် သူ အမြန်ပင် စိတ်ကို ပြန်ထိန်းလိုက်ပြီး "အဲဒီအမှုက ကျွန်တော်နဲ့ ဘာဆိုင်လို့လဲ ကျွန်တော် မသိဘူး" ဟု ငြင်းဆို လိုက်သည်။

ဂူချန်က "လန်ရှောင်ချူး ကိုယ့်ကိုကိုယ် သတ်သေသွားခဲ့တယ်လေ" ဟု ပြောသည်။

မန်းဒယ်လျန်က ဘာအမူအရာမှ မပြဘဲ "အင်း အဲဒါ ဘာဖြစ်လဲ လန်ရှောင်ချူး သေဆုံးမှုအတွက် ကျွန်တော် စိတ်မကောင်းဖြစ်ရပါတယ်။ ဒါပေမဲ့ အဲဒါနဲ့ ကျွန်တော်နဲ့ ဘာဆိုင်လို့လဲ" ဟု ပြန်ပြောသည်။

တိုက်ရိုက်ထုတ်လွှင့်မှုကို ကြည့်ရှုသူများမှာ ကျောချမ်းစရာ ကောင်းလောက်အောင် တုန်လှုပ်သွားကြသည်။

လန်ရှောင်ချူး သေဆုံးမှုကလည်း မန်းဒယ်လျန်နဲ့ ဆက်စပ်နေတာလား။

တန်းကျန်းကောကလည်း မန်းဒယ်လျန်ကို အေးစက်စက် အကြည့်များဖြင့် စိုက်ကြည့်နေသည်။

ဂူချန်က "နောက်ဆုံး အခွင့်အရေး တစ်ကြိမ်ပေးမယ်။ ဝန်ခံရင် တရားရုံးက သက်ညှာကောင်း သက်ညှာလိမ့်မယ်။ မဝန်ခံရင်တော့ ဘာတွေဖြစ်လာမလဲဆိုတာ ကျွန်တော် မပြောတတ်တော့ဘူး" ဟု သတိပေးသည်။

မန်းဒယ်လျန်၏ မျက်နှာမှာ ပြာနှမ်းသွားပြီး လက်သီးကို တင်းတင်းဆုပ်လိုက်သည်။

ဂူချန် ဘယ်လိုလုပ်ပြီး ဒီအကြောင်း သိသွားတာလဲ။ မဖြစ်နိုင်ဘူး။

"ရှေ့နေဂူ ခင်ဗျား ဘာတွေ ပြောနေမှန်း ကျွန်တော် နားမလည်ဘူး။ လန်ရှောင်ချူးဆိုတာ ဘယ်သူမှန်းတောင် မသိသလို သူ့နဲ့ အဆက်အသွယ်လည်း မရှိဘူး"

သူက ငြင်းဆိုနေဆဲပင်။

ဂူချန်က တရားသူကြီး ရှန်းကျားရွေ့ကို ကြည့်လိုက်သည်။ အားလုံးက ဂူချန်၏ နောက်ထပ် စကားကို စောင့်ဆိုင်းနေကြသည်။

ဂူချန်က "တရားသူကြီးမင်း ကျွန်တော့်ဆီမှာ အထောက်အထားအသစ် ရှိပါတယ်။ လူတိုင်းက လန်ရှောင်ချူးက တန်ရှင်းရန် သေဆုံးမှုကြောင့် ဝမ်းနည်းပြီး အွန်လိုင်းအကြမ်းဖက်မှုတွေကြောင့် သတ်သေတယ်လို့ ထင်ခဲ့ကြတာ။ လန်ရှောင်ချူးကို သေစေချင်တဲ့သူတွေ၊ ကောလာဟလ ဖြန့်နေသူတွေ အများကြီးရှိတယ်။ အလုပ်ခွင်မှာလည်း လန်ရှောင်ချူးက တန်ရှင်းရန်ကို မကောင်းဆက်ဆံတယ်ဆိုပြီး ပုံဖျက်ခဲ့ကြတယ်။ တချို့က လန်ရှောင်ချူးရဲ့ လစာတိုးတာကို အလုပ်ရှင်နဲ့ ပတ်သက်ပြီးမှ ရတာလို့ အပုပ်ချခဲ့ကြတယ်။ တချို့ကလည်း ငွေမက်တယ်၊ ၃ သောင်းလျော်ပြီးတာတောင် မကျေနပ်ဘူးလို့ စွပ်စွဲခဲ့ကြတယ်။ ဒါတွေက သာမန်အွန်လိုင်း အကြမ်းဖက်မှုမဟုတ်ဘဲ စနစ်တကျ ကြိုတင်ကြံစည်ထားတဲ့ အွန်လိုင်းအကြမ်းဖက်မှုတွေပါ" ဟု ရှင်းပြသည်။

"အဲဒီအွန်လိုင်းအကြမ်းဖက်မှုတွေ လုပ်ခဲ့တဲ့ IP လိပ်စာတွေကို ကျွန်တော် ရှာတွေ့ခဲ့တယ်။ အဲဒီ IP တွေကနေတစ်ဆင့် လူ ၈ ယောက်ဆီကို လမ်းကြောင်းဆွဲလို့ ရခဲ့တယ်။ အဲဒီ ၈ ယောက်က တရားခံခုံတန်းလျားမှာ ထိုင်နေတဲ့ သူတွေပါပဲ။ ရာဇသတ်ကြီး ပုဒ်မ ၂၄၆ အရ သူတို့က လူတွေကို အများပြည်သူရှေ့မှာ စော်ကားခြင်း၊ အပုပ်ချခြင်းတွေ လုပ်ခဲ့ကြတာပါ။ ကျွန်တော် သူတို့ကို ထောင်ဒဏ် ၃ နှစ်စီ ချမှတ်ပေးဖို့နဲ့ တန်းကျန်းကော မိသားစုကို လျော်ကြေးငွေ ၆ သိန်းခွဲကျော် ပေးလျော်စေဖို့ တောင်းဆိုပါတယ်" ဟု ပြောလိုက်သည်။

ထိုအခါမှ လူတိုင်း နားလည်သွားကြသည်။ ဂူချန်က ဘာကြောင့် လူအများကြီးကို တရားစွဲထားရသလဲဆိုတာ အခုမှ ပေါ်လွင်သွားသည်။

အွန်လိုင်းကြည့်ရှုသူများမှာလည်း "ဂူချန်က တကယ့်ကို ထူးချွန်တာပဲ။ ဒီလူတွေကို အကုန် ထောင်ချပစ်လိုက်" ဟု ဝိုင်းအော်နေကြသည်။

ဂူချန်က ဆက်ပြောသည်။

"ဒီ ၈ ယောက်လုံးက တစ်စုံတစ်ယောက်ရဲ့ ခိုင်းစေချက်နဲ့ လုပ်ခဲ့တာပါ။ အဲဒီလူကတော့... မန်းဒယ်လျန်ပဲ"