အခန်း ၈၂၈

အခန်း (၈၂၈) - မိစ္ဆာ အရှင်သခင်ကြီး၊ မိစ္ဆာမျိုးနွယ်စု၏ ဝင်ရောက်တိုက်ခိုက်မှု (အပိုင်း - ၃)

တာ့ချန် ကျင့်ကြံခြင်း ကမ္ဘာတွင် မိစ္ဆာမျိုးနွယ်စု၏ ဟင်းလင်းပြင် လမ်းကြောင်း သုံးခု ထွက်ပေါ်လာခဲ့ပြီး ၎င်းမှာ တာ့ယန် အင်မော်တယ် မင်းဆက် ၏ အခြေအနေနှင့် နှိုင်းယှဉ်ပါက အနည်းငယ် သက်သာသည်ဟု ဆိုနိုင်သည်။

ခေတ္တမျှ စဉ်းစားသုံးသပ်ပြီးနောက် အခြေအနေမှာ ထိန်းချုပ်နိုင်သေးပုံပေါ်ကြောင်း သူတို့ ကောက်ချက်ချလိုက်ကြ၏။

ဟင်းလင်းပြင် လမ်းကြောင်း တစ်ခုဆိုသည်မှာ မဟာ မိစ္ဆာမျိုးနွယ်စု တစ်ခု၏ အင်အားကို ကိုယ်စားပြုသည်။

လက်ရှိ အခြေအနေအရ ကျင့်ကြံခြင်း ကမ္ဘာ အသီးသီးသည် သူတို့၏ နယ်မြေများကို ကာကွယ်နိုင်စွမ်း ရှိနေဆဲ ဖြစ်၏။

သူတို့၏ နယ်မြေများကို ကာကွယ်ထားနိုင်သရွေ့ မိစ္ဆာမျိုးနွယ်စုကို ပြန်လည်မောင်းထုတ်ရန်မှာ ခက်ခဲမည် မဟုတ်ပေ။

ချန်ကု အင်မော်တယ်မြို့တော် အတွက်ကမူ...သူတို့သည် ရှေးဟောင်း ဝိညာဉ် အပျက်အစီး နယ်မြေ၏ အခြေအနေနှင့် မိစ္ဆာမျိုးနွယ်စု၏ အုပ်စိုးရှင် အင်အားစုများထဲမှ တစ်ခုဖြစ်သော လုံမင် မျိုးနွယ်စု၏ တုံ့ပြန်မှုကို စောင့်ဆိုင်းနေဆဲ ဖြစ်သည်။ မိစ္ဆာများ၏ အရေအတွက်မှာ အလွန် များပြားသော်လည်း လူသားမျိုးနွယ်စုကသာ ဤနယ်မြေ၏ အစစ်အမှန် သခင်များ ဖြစ်ကြ၏။

....

ရှေးဟောင်း ဝိညာဉ် အပျက်အစီး နယ်မြေ။

ဤနေရာသည် ချန်းကျိုး နယ်မြေ၏ ကျင့်ကြံခြင်း ကမ္ဘာအတွင်းတွင် မရှိဘဲ တောရိုင်းဒေသအတွင်းရှိ ဝိညာဉ်ကင်းမဲ့သော မြေနှင့် တူသည့် ရှေးဟောင်း အကြွင်းအကျန် နယ်မြေတစ်ခုတွင် တည်ရှိသည်။ ကျယ်ဝန်းလှသော နယ်မြေကြီးကို လျှို့ဝှက်နယ်မြေတစ်ခု၏ အတားအဆီးမျိုးနှင့် ဆင်တူသော အလွှာတစ်ခုက ကာကွယ်ထား၏။ ဖော်ပြ၍ မရနိုင်လောက်အောင် ညစ်ညမ်းနေသော စွမ်းအင်များနှင့် ပြည့်နှက်နေ၏။ ဤညစ်ညမ်းမှုနှင့် ထိတွေ့မိသော သာမန် ကျင့်ကြံသူများနှင့် မိစ္ဆာမျိုးနွယ်စုဝင်များသည် မလွဲမသွေ ဘေးဒုက္ခနှင့် ရင်ဆိုင်ရမည် ဖြစ်သည်။

ဤအခိုက်အတန့်တွင် ရှေးဟောင်း ဝိညာဉ် အပျက်အစီး နယ်မြေအတွင်းရှိ နေရာတစ်ခု၌ လူအများက ကောင်းကင်သို့ ထိုးတက်နေသော မိစ္ဆာချီ အငွေ့အသက်များ လွှမ်းခြုံထားသည့် ပုံရိပ်တစ်ခုကို ထိတ်လန့်တုန်လှုပ်စွာ ကြည့်နေကြ၏။ ထိုသူများထဲတွင် ယင်းယို နှင့် ကုန်းစွန်းဇီယန် တို့ ပါဝင်နေ၏။ သူမတို့သည် အတိုင်းမသိ အကြောက်တရားကို ခံစားနေကြရသည်။

အထူးသဖြင့် ထိုပုံရိပ်၏ လက်ထဲတွင် လုံမင် မျိုးနွယ်စုမှ မိစ္ဆာ ပါရမီရှင်တစ်ဦး ပေါင်မုန့်တစ်လုံးလို ဖိချေခံထားရသည်ကို မြင်လိုက်ရချိန်တွင် ပို၍ပင် ထိတ်လန့်သွားကြ၏။ ထိုသူသည် နှစ်ငါးရာပင် မပြည့်သေးဘဲ အဆင့်နိမ့် ပဉ္စမအဆင့် မိစ္ဆာ သခင် ပါရမီရှင် တစ်ဦး ဖြစ်သည်။

သို့သော် ထိုကဲ့သို့သော ပါရမီရှင်ပင်လျှင် ရေကုန်ရေခမ်း ခုခံကာကွယ်မှုများ အသုံးပြုခဲ့သော်ငြား ထိုပုံရိပ်၏ အလွယ်တကူ ခြေမှုန်းခံလိုက်ရပြီး သူ၏ ခန္ဓာကိုယ်မှာ အထုံးတစ်ခုလို လိမ်ကျစ်သွားခဲ့ရ၏။

ကုန်းစွန်းဇီယန်က အသံကို နှိမ့်ကာ တုန်ရီစွာဖြင့် ရေရွတ်လိုက်သည်။

"မိစ္ဆာ ကျင့်ကြံသူ တစ်ယောက်က ဒီကို ဘယ်လိုလုပ် ရောက်လာတာလဲ..."

"ပြီးတော့ သူ့ရဲ့ ကျင့်ကြံခြင်းက..."

မိစ္ဆာ အရှင်သခင်ကြီး တစ်ပါးပါလား။

သူတို့၏ အရှေ့ရှိ မိစ္ဆာအလောင်းများနှင့် သွေးပင်လယ်ကြီးထဲတွင် ချောမောခန့်ညားသော မိစ္ဆာတစ်ဦးက နှုတ်ခမ်းထောင့်ကို တွန့်ကွေးကာ ပေါ့ပေါ့ပါးပါး ပြုံးလိုက်သည်။ သူ၏ လက်ထဲတွင်ရှိသော လုံမင် မျိုးနွယ်စု၏ မိစ္ဆာပါရမီရှင်မှာ ရုန်းကန်နိုင်စွမ်း မရှိတော့ဘဲ ခြေလက်များမှာလည်း လုံးဝ အညံ့ခံသွားခဲ့လေပြီ။ ဤမိစ္ဆာပါရမီရှင်သည် လုံမင် မျိုးနွယ်စုမှ မိစ္ဆာ အရှင်သခင်ကြီး တစ်ပါး၏ သွေးမျိုးဆက်ဖြစ်သည်ဟုလည်း ဆိုကြ၏။

ထိုသူက တိုးတိုးလေး ရေရွတ်လိုက်သည်။

" မိစ္ဆာ အရှင်သခင်ကြီး၊ လုံမင် မျိုးနွယ်စု... တော်တော်လေး အထင်ကြီးစရာပဲ မဟုတ်လား"

"ငါ့အတွက် စီးတော်ယာဉ် ဖြစ်ခွင့်ရတာ မင်းတို့ လုံမင် မျိုးနွယ်စုအတွက် ဂုဏ်ယူစရာပဲ... နားလည်လား"

"ဂရား..."

သူ၏ ခြေရင်းရှိ ဧရာမ နဂါးတစ်ပိုင်း ခွေးတစ်ပိုင်း ပုံစံရှိ သားရဲကြီးက ဒေါသတကြီး ထပ်မံ ဟိန်းဟောက်လိုက်ပြန်သည်။ ထိုလူ၏ ဖိနှိပ်မှုကို ခံထားရသော်လည်း ၎င်းက အလျှော့ပေးရန် ငြင်းဆန်နေဆဲဖြစ်ကာ သေရမည်ကို မကြောက်ရွံ့ဘဲ လူသားမျိုးနွယ်ဝင် တစ်ဦးထံ အညံ့ခံရန် လုံးဝ ဆန္ဒ ရှိပုံ မပေါ်။

သို့သော် ၎င်းက အရေးမပါတော့ပေ။

ထိုလူက လက်ကို ပေါ့ပေါ့ပါးပါး တစ်ချက် ဝေ့ယမ်းလိုက်ရာ ချည်နှောင်ခံထားရသော လုံမင် မျိုးနွယ်စုဝင်ကို သူ၏ တာအိုမျှော်စင် အတွင်းသို့ သိမ်းဆည်းလိုက်၏။ ထို့နောက် ခပ်လှမ်းလှမ်းရှိ လူသားမျိုးနွယ် ပါရမီရှင်များကို အေးစက်စက် လှောင်ပြုံးဖြင့် တစ်ချက် ကြည့်ကာ ဂရုမစိုက်သည့်ဟန်ဖြင့် ပြောလိုက်သည်။

"ထွက်သွားကြစမ်း"

"ဝုန်း..."

ရိုးရှင်းသော စကားတစ်ခွန်းသာ ဖြစ်သော်လည်း ၎င်းက ကောင်းကင်နှင့် မြေကြီးကို တုန်လှုပ်သွားစေပြီး သဘာဝတရား၏ အမျက်ဒေါသကဲ့သို့ အဟုန်ပြင်းစွာ ရိုက်ခတ်သွားတော့၏။

ယင်းယို အပါအဝင် အခြားသော လူသားမျိုးနွယ် ပါရမီရှင်များအားလုံး ချက်ချင်း ပစ်လွင့်ထွက်သွားကြပြီး သွေးများ ဒလဟော အန်ကျလာကာ သူတို့၏ စိတ်အာရုံများ လုံးဝ ဗလာကျင်းသွားတော့သည်။

သူတို့၏ ခန္ဓာကိုယ်များကို ထိန်းချုပ်ကာ ရပ်တန့်နိုင်ချိန်တွင် မိုးထိအောင် မြင့်မားလှသော မိစ္ဆာချီ အငွေ့အသက်များ လွှမ်းခြုံထားသည့် ထိုပုံရိပ်သည် ပျောက်ကွယ်သွားခဲ့လေပြီ။

ယင်းယိုနှင့် အခြားသူများမှာ မရပ်မနား တုန်ရီနေကြပြီး ရိုးတွင်းခြင်ဆီအထိ အေးခဲသွားသကဲ့သို့ ဆွံ့အသွားကြတော့၏။

"...."

ထိုအချိန်မှစ၍ မြောက်များစွာသော မိစ္ဆာမျိုးနွယ် ပါရမီရှင်များသည် ရှေးဟောင်းနယ်မြေအတွင်း၌ သေဆုံးသွားခဲ့ပြီး အားလုံးမှာ သွေးစုပ်ခံထားရသော အလောင်းခြောက်များအဖြစ်သို့ ပြောင်းလဲသွားကြောင်း ယင်းယိုနှင့် လူသားမျိုးနွယ် ပါရမီရှင်များ တွေ့ရှိခဲ့ရသည်။ သူတို့ အထူးသတိထားပြီး ရင်ဆိုင်ရမည့် မိစ္ဆာ ပါရမီရှင်များသည် ယခုအခါ ထိုပုဂ္ဂိုလ်၏ သားကောင်များ ဖြစ်လာခဲ့ပုံပေါ်လေသည်။

သို့သော် ယင်းယိုနှင့် အခြားသူများမှာ ဝမ်းသာသည့် အရိပ်အယောင်မျှ မပြဘဲ သူတို့၏ မျက်နှာအမူအရာများမှာ ပို၍ပင် လေးနက်လာခဲ့၏။

"ပြဿနာက ကြီးလာပြီ..." ယင်းယိုက သူမ၏ ရင်တွင်း၌ တိတ်တဆိတ် ရေရွတ်လိုက်သည်။

ရှေးဟောင်း ဝိညာဉ် အပျက်အစီး နယ်မြေထဲတွင် မြောက်များစွာသော မိစ္ဆာ ပါရမီရှင်များ ကျဆုံးသွားခဲ့ပြီး ဤသတင်းကိုသာ ပြင်ပရှိ မိစ္ဆာမျိုးနွယ်စု၏ အင်အားကြီး ပုဂ္ဂိုလ်များ သိသွားပါက သူတို့ သေချာပေါက် ဒေါသထွက်ကြမည် ဖြစ်သည်။

နောက်ပိုင်းတွင် ဘာဆက်ဖြစ်မလဲ ဆိုသည်ကို အသာထားဦး၊ ဤနေရာမှ ထွက်ခွာရန်ပင် အခက်အခဲများစွာ ရှိလာနိုင်ပြီး သေဆုံးနိုင်ခြေနှင့်ပင် ရင်ဆိုင်ရနိုင်သည်။

မိစ္ဆာ အရှင်သခင်ကြီး တစ်ပါးက သူတို့ကြားသို့ ခိုးဝင်လာပြီး မိစ္ဆာမျိုးနွယ်စုအပေါ် အစုလိုက်အပြုံလိုက် သတ်ဖြတ်မှု စတင်နေပြီ ဖြစ်၏။

ဒီ မိစ္ဆာ အရှင်သခင်ကြီးက ဘယ်သူလဲ... သူ့ရဲ့ ရည်ရွယ်ချက်တွေက ဘာတွေလဲ။

လူသားနှင့် မိစ္ဆာမျိုးနွယ်စု နှစ်ရပ်လုံးမှ အင်အားကြီး ပုဂ္ဂိုလ်ကြီးများ၏ စောင့်ကြည့်နေသော မျက်လုံးများကို ရှောင်ကွင်းပြီး သူ ဘယ်လိုများ ဒီရှေးဟောင်း ဝိညာဉ် အပျက်အစီး နယ်မြေထဲကို ခိုးဝင်လာနိုင်ခဲ့တာလဲ။

ရှေးဟောင်း ဝိညာဉ် အပျက်အစီး နယ်မြေ ပြန်လည် ပွင့်လာရန် သုံးနှစ် ကျန်သေး၏။

ဤသုံးနှစ်တာ ကာလအတွင်းတွင် ယင်းယိုနှင့် အခြားသူများသည် အတွင်းပိုင်းရှိ အခွင့်အရေးများကို ရှာဖွေရန် ရည်ရွယ်ချက် မရှိတော့ဘဲ နောက်ဆုံးအချိန် ရောက်လာမည့်ရက်ကိုသာ စောင့်ဆိုင်းနေကြတော့သည်။

....

ပြင်ပရှိ ချန်းကျိုး နယ်မြေ။

ထျန်းပေါင် ဈေးကွက်။

ဤနေရာသည် အဆင့် (၅) ဝိညာဉ်ကြော တစ်ခုပေါ်တွင် တည်ရှိသော ဈေးကွက်ကြီးတစ်ခု ဖြစ်သည်။ ချန်ကု အင်မော်တယ်မြို့တော် ကဲ့သို့ လေပေါ်ပျံ မြို့တော်များနှင့် နှိုင်းယှဉ်ပါက ဤနေရာသည် ကျင့်ကြံရန်အတွက် အခြေမဲ့ ကျင့်ကြံသူများ ပိုမို သင့်လျော်သည်။ အကြောင်းမူကား ဤနေရာရှိ ဂူစံအိမ်များကို ငှားရမ်းရန် ကုန်ကျစရိတ်မှာ ချန်ကု အင်မော်တယ်မြို့တော်ထက် များစွာ သက်သာသောကြောင့် ဖြစ်၏။

ဝိညာဉ်အပင်များဖြင့် ပြည့်နှက်နေသော ကျယ်ဝန်းလှသည့် စိုက်ခင်းများကို စုယွီ ဖြတ်သန်းသွားစဉ် မြောက်များစွာသော အဆင့်နိမ့် ကျင့်ကြံသူများသည် ဝိညာဉ်စိုက်ခင်းများ အတွင်းသို့ ဝင်လိုက်ထွက်လိုက် ကူးလူးနေကြသည်။ အချို့က မှော်အတတ်များကို သုံး၍ ဝိညာဉ်အပင်များကို ရိတ်သိမ်းနေကြပြီး အချို့က မြေဆီလွှာကို လှန်ကာ မျိုးစေ့များ ကြဲချနေကြ၏။ အချို့ကမူ ဝိညာဉ်မိုးရေများဖြင့် စိုက်ခင်းများကို မှော်အတတ်ဖြင့် ရေလောင်းနေကြရာ စည်ကားသိုက်မြိုက်သော မြင်ကွင်းတစ်ခုကို ဖန်တီးထားလေသည်။

စုယွီက သူတို့ကို စိတ်ဝင်တစား စောင့်ကြည့်နေမိ၏။ သူ၏ ငယ်ရွယ်စဉ်ကာလများက သူကိုယ်တိုင်လည်း မိသားစု၏ ဆေးဥယျာဉ်ထဲတွင် ဝိညာဉ်အပင်များနှင့် ဝိညာဉ်ဆေးမြစ်များကို စိုက်ပျိုးခဲ့ဖူးပြီး သူ၏ လှပသော လူငယ်ဘဝ အစိတ်အပိုင်းတစ်ခုကို ထိုနေရာတွင် ဖြတ်သန်းခဲ့ရဖူးသည်။

သို့သော် သူ၏ မိသားစု စီမံခန့်ခွဲသော ဝိညာဉ်စိုက်ခင်းများမှာ ဤစိုက်ခင်းများလောက် မကောင်းမွန်ခဲ့ချေ။

ဝိညာဉ်အပင်များကို စိုက်ပျိုးသူများမှာ အားနည်းသော ချီသန့်စင်ခြင်းအဆင့် ကျင့်ကြံသူလေးများသာ ဖြစ်ကြ၏။

သို့သော် ဤနေရာတွင်မူ အခြေခံအုတ်မြစ် တည်ဆောက်ခြင်းအဆင့် ကျင့်ကြံသူများကိုပင် ဝိညာဉ်စိုက်ခင်းများ၌ အလုပ်လုပ်နေကြသည်ကို တွေ့မြင်နိုင်သည်။

စုယွီသည် တစ်လှမ်းချင်း လျှောက်လှမ်းနေသော်လည်း သူ၏ ခြေလှမ်းများက မနှေးကွေးပါချေ။ သူသည် ထျန်းပေါင် ဈေးကွက် အတွင်းသို့ ဝင်ရောက်သွားခဲ့ရာ အံ့သြစရာကောင်းလောက်အောင် ချန်ကု အင်မော်တယ်မြို့တော်ထက်ပင် ကျင့်ကြံသူများ ပိုမို များပြားနေသည်ကို တွေ့လိုက်ရ၏။

အများစုမှာ ချီသန့်စင်ခြင်းနှင့် အခြေခံအုတ်မြစ် တည်ဆောက်ခြင်းအဆင့် ကျင့်ကြံသူလေးများသာ ဖြစ်သော်လည်း ဤနေရာသည် လူအုပ်ကြီးဖြင့် စည်ကားနေပြီး လူများ၏ အသံများဖြင့် ဆူညံနေဆဲပင်။

ထျန်းပေါင် ဈေးကွက် အတွင်း အတန်ကြာ လျှောက်လည်ပြီးနောက် စုယွီသည် ထျန်းပေါင် ကုန်သွယ်ရေးအသင်း၏ အဓိက အဆောက်အအုံဆီသို့ ချက်ချင်း ဦးတည်သွားတော့သည်။ ကုန်သွယ်ရေး တံဆိပ်ပြားဖြင့် လေလံပွဲ ကျင်းပရာနေရာသို့ ဝင်ရောက်ခဲ့ပြီး ကိုယ်ပိုင် သီးသန့် အခန်းငယ်တစ်ခုကို ရရှိခဲ့၏။

လေလံပွဲ၏ အတိုင်းအတာမှာ မကြီးမားလှသော်လည်း ပါဝင်သူများမှာ အနည်းဆုံး မူလဝိညာဉ်အဆင့် အရှင်သခင်ကြီး အဆင့်ရှိသူများသာ ဖြစ်ကြသည်။

သူ့ကဲ့သို့ပင် သီးသန့် အခန်းငယ်တစ်ခု ရရှိသူများအားလုံးမှာ ဝိညာဉ်ခွဲထွက်အဆင့် အရှင်သခင်ကြီးများ ဖြစ်ကြ၏။ သူအပါအဝင် ဤလေလံပွဲသို့ ဝိညာဉ်ခွဲထွက်အဆင့် အရှင်သခင်ကြီး (၁၁) ပါး တက်ရောက်နေကြသည်။

စုယွီက အခန်းအတွင်းကို တစ်ချက် အကဲခတ်လိုက်ရာ အောက်ဘက်တွင် မူလဝိညာဉ်အဆင့် အရှင်သခင်ကြီး ငါးဆယ်နီးပါး ရှိနေပေမည်။

ထျန်းပေါင် ကုန်သွယ်ရေးအသင်းက လေလံပွဲအတွက် ဝိညာဉ်ခွဲထွက်အဆင့် အရှင်သခင်ကြီး (၁၁) ပါးနှင့် မူလဝိညာဉ်အဆင့် အရှင်သခင်ကြီး ငါးဆယ်နီးပါးကို စုစည်းနိုင်ခဲ့ခြင်းက ဤအသင်း၏ ကြီးမားလှသော လွှမ်းမိုးနိုင်စွမ်းကို ပြသနေလေ၏။