အခန်း ၂၀၃

အခန်း ၂၀၃။ လောက မျိုးစေ့၊ နတ်ဘုရား လောက ဆယ်ခု

"ဂုဏ်ပြုပါတယ်... သာမန် လူသား... အချိန်ကာလ မျှော်စင် ရဲ့ ပိုင်ရှင်သစ် ဖြစ်သွားတဲ့ အတွက် ဂုဏ်ပြုပါတယ်"

ကောင်းကင်ယံရှိ ဧရာမ မျက်နှာကြီး က ရုတ်တရက် ပျောက်ကွယ်သွားပြီး ရွှေရောင် ဘောလုံး ပုံစံ သတ္တဝါလေး တစ်ကောင် ထွက်ပေါ်လာလေသည်။

နှာခေါင်း၊ မျက်လုံး၊ နားရွက်၊ ပါးစပ် ပါရှိပြီး လက်မလောက်သာ ရှိသည့် မိစ္ဆာ တောင်ပံလေး နှစ်ဖက် နှင့် အရှည်ကြီး ဖြစ်နေသော မိစ္ဆာ အမြီး တစ်ချောင်း လည်း ရှိလေသည်။ သို့သော် လက်နဲ့ ခြေထောက်တော့ မပါပေ။

မိစ္ဆာလေး တစ်ကောင်လား။

"မင်းက..."

မုန်လဲ့ က ရုတ်တရက် ထွက်ပေါ်လာသော ထူးဆန်းသည့် ဘောလုံး ပုံစံ သတ္တဝါလေး ကို ကြည့်ကာ သံသယဖြစ်စွာဖြင့် မေးလိုက်လေသည်။

"ငါက အချိန်ကာလ မျှော်စင် ရဲ့ မျှော်စင် စောင့်... ဒိုဒိုလာ"

ဘောလုံး ပုံစံ သတ္တဝါလေး က ပြုံးကာ သူ့ကိုယ်သူ မိတ်ဆက်လိုက်လေသည်။ "ငါ့ကို ဒိုဒိုလာ ကြီး လို့ ခေါ်လို့ ရတယ်"

"ဒိုဒိုလာ... ကြီး"

မုန်လဲ့ အနည်းငယ် ဆွံ့အသွားလေသည်။ "မင်းက မျှော်စင် စောင့်... ငါက အချိန်ကာလ မျှော်စင် ရဲ့ ပိုင်ရှင်သစ်... ဆိုတော့ကာ မင်းက ငါ့ကို သခင် လို့ ခေါ်ရမှာ မဟုတ်ဘူးလား"

"အာ..."

ဒိုဒိုလာ အနည်းငယ် ကြောင်အမ်းသွားပြီးနောက် ဒေါသတကြီး ပြောလိုက်လေသည်။ "မင်း အဆင့်မြင့် နတ်ဘုရား မဖြစ်သေးသရွေ့... ငါ မင်းကို အသိအမှတ် မပြုနိုင်ဘူး... သခင် ဟုတ်လား... မင်း အဆင့်မြင့် နတ်ဘုရား ဖြစ်လာမှ ပြော"

"တကယ်ကို မာနကြီးတဲ့ ကောင်လေး ပဲ"

မုန်လဲ့ က ရယ်မောလိုက်ပြီး ဒီလို အဓိပ္ပာယ် မရှိတဲ့ ကိစ္စတွေ အပေါ် ဆက်ပြီး ငြင်းခုံမနေတော့ပေ။ "ဒိုဒိုလာ... ငါ အချိန်ကာလ မျှော်စင် ကို သန့်စင်ဖို့ ဘာလုပ်ရမလဲ"

"အရမ်း လွယ်ပါတယ်... စာချုပ် ချုပ်လိုက်ရုံပဲ"

ဒိုဒိုလာ က လက်မလောက်သာ ရှိသည့် မိစ္ဆာ တောင်ပံလေး များကို ခတ်ကာ "ငါက အချိန်ကာလ မျှော်စင် ရဲ့ မျှော်စင် စောင့် ပဲ... ငါနဲ့ စာချုပ် ချုပ်လိုက်တာ နဲ့ အချိန်ကာလ မျှော်စင် ကို သန့်စင်လိုက်တာ နဲ့ အတူတူပဲ"

"ချုပ်မယ်"

"ကောင်းပြီ"

ဒိုဒိုလာ က လှည့်လိုက်ရာ သူ၏ အနောက်တွင် မျက်စိကျိန်းမတတ် တောက်ပသော ရွှေရောင် အလင်းတန်း များ ထွက်ပေါ်လာပြီး အလင်းတန်း များ စုစည်းသွားကာ ရှုပ်ထွေး လျှို့ဝှက်ဆန်းကြယ်လှသော မှော်အစီအရင် တစ်ခု ဖြစ်ပေါ်လာလေသည်။

"သွေးတစ်စက် ချလိုက်"

ဒိုဒိုလာ က သတိပေးလိုက်လေသည်။

"အင်း"

မုန်လဲ့ က လက်ချောင်းများကို ညင်သာစွာ ခေါက်လိုက်ရာ သွေးတစ်စက် က မှော်အစီအရင် ထဲသို့ ဝင်ရောက်သွားပြီး စိမ့်ဝင်သွားလေသည်။

"ဝုန်း..."

ဒိုဒိုလာ ၏ အနောက်ရှိ မှော်အစီအရင် က သွေးကို စုပ်ယူလိုက်ရာ ရွှေရောင် မှ သွေးအရောင် သို့ ပြောင်းလဲသွားလေသည်။

သွေးအရောင် မှော်အစီအရင် က မြင့်တက်လာပြီးနောက် ကျုံ့ဝင်သွားကာ နောက်ဆုံးတွင် မုန်လဲ့ ၏ နဖူး ထဲသို့ ဝင်ရောက်သွားလေသည်။

ချက်ချင်းဆိုသလိုပင် ကြီးမားလှသော အချက်အလက် များ က ဦးနှောက်ထဲသို့ ဝင်ရောက်လာပြီး မုန်လဲ့ နှင့် အချိန်ကာလ မျှော်စင် ကြားတွင် လျှို့ဝှက်ဆန်းကြယ်သော အဆက်အသွယ် တစ်ခု ဖြစ်ပေါ်သွားသည်ကို သူ ခံစားလိုက်ရလေသည်။

သူသာ ဆန္ဒရှိလျှင် အချိန်ကာလ မျှော်စင် ၏ မည်သည့် အထပ် ကိုမဆို အချိန်မရွေး သွားရောက်နိုင်လေသည်။

သူသာ ဆန္ဒရှိလျှင် အချိန်ကာလ မျှော်စင် ၏ မည်သည့် အထပ် ကိုမဆို အချိန်မရွေး စစ်ဆေးနိုင်လေသည်။

သူသာ ဆန္ဒရှိလျှင် အချိန်ကာလ မျှော်စင် အတွင်းရှိ မည်သည့် မှော်သားရဲ ကိုမဆို အလွယ်တကူ သတ်ဖြတ်နိုင်လေသည်။

သူသာ ဆန္ဒရှိလျှင် မည်သည့် အထပ် ၏ ပတ်ဝန်းကျင် ကိုမဆို ပြောင်းလဲနိုင်ပြီး... တောင်တွေကို ရွှေ့တာ၊ ပင်လယ် ကို ဖို့တာ၊ သစ်တော တွေ ဖန်တီးတာ၊ ကမ္ဘာကြီး ကို ပြောင်းလဲတာ... အားလုံး က သူ ဆန္ဒရှိရင် ရပြီ။

ဒီအခိုက်အတန့် ကစပြီး အချိန်ကာလ မျှော်စင် က လုံးဝ သူ့ရဲ့ ကိုယ်ပိုင် ပစ္စည်း ဖြစ်သွားပြီ၊ သူ့ရဲ့ အမိန့်ကို နာခံရတော့မယ်။

"အထပ် ၁၀၀ ရှိတဲ့ အချိန်ကာလ မျှော်စင်"

"ပထမ ၉၉ ထပ် က တစ်ဝက်တစ်ပျက် လောက တွေချည်းပဲ"

မုန်လဲ့ က အချိန်ကာလ မျှော်စင် ကို သေချာ ခံစားနေလေသည်။ "တစ်ဝက်တစ်ပျက် လောက တိုင်းက အရမ်း ကျယ်ဝန်းတယ်... ပျောက်ဆုံးနေသော တိုက်ကြီး အများကြီး နဲ့ ညီမျှတယ်"

"ဒါက ဘာမှ မဟုတ်သေးဘူး... တစ်ဝက်တစ်ပျက် လောက တွေကို ပစ္စည်း တွေ ထဲမှာ ချိတ်ပိတ်ထားတာ... သာမန် နတ်ဘုရား တွေတောင် လုပ်နိုင်တယ်... နတ်ဘုရားတစ်ဝက် တွေတောင် လုပ်နိုင်သေးတာ"

"အချိန်ကာလ မျှော်စင် ရဲ့ တကယ့် အစွမ်းထက်တဲ့ အချက် က လောက ၉၉ ခု ကို လွှမ်းခြုံထားတဲ့ အချိန်ကာလ နိယာမ တွေပဲ"

ဒိုဒိုလာ က တည်ငြိမ်စွာ ပြုံးလိုက်လေသည်။ "မင်း သိထားရမှာ က... တစ်ဝက်တစ်ပျက် လောက တစ်ခု ကို ပစ္စည်း တစ်ခု ထဲမှာ ချိတ်ပိတ်လိုက်တာ နဲ့ အပြင်ကမ္ဘာ နဲ့ အဆက်အသွယ် ပြတ်သွားပြီး အချိန် ရပ်တန့်သွားတယ်... သက်မဲ့ ပစ္စည်း တွေကိုပဲ သိမ်းလို့ ရပြီး အသက်ရှင်နေတဲ့ သက်ရှိ တွေကို သိမ်းလို့ မရဘူး"

"ဒါပေမဲ့ အချိန်ကာလ မျှော်စင် ကတော့ မတူဘူး... တစ်ဝက်တစ်ပျက် လောက တိုင်းမှာ သက်ရှိ တွေကို သိမ်းလို့ ရတယ်... သာမန် ရုပ်ဝတ္ထု လောက တွေ နဲ့ ဘာမှ မကွာခြားဘူး... ဒါတွေ အားလုံး က အချိန်ကာလ နိယာမ ကြောင့်ပဲ"

"အချိန်ကာလ မျှော်စင် ထဲက အချိန် နိယာမ တွေကို ကြီးမြတ်တဲ့ အချိန်ကာလ နတ်ဘုရား က ချန်ထားခဲ့တာ"

"ငါက အချိန်ကာလ မျှော်စင် ထဲက အချိန် နိယာမ တွေကို ထိန်းချုပ်ပြီး သေသွားတဲ့ မှော်သားရဲ တွေကိုတောင် ပြန်လည် အသက်ရှင်လာအောင် လုပ်ပေးလို့ ရသေးတယ်"

"အရမ်း အစွမ်းထက်တာပဲ"

မုန်လဲ့ က ချီးကျူးလိုက်လေသည်။

အရင်က ကောလာဟလ တွေ အရ ဆိုရင် အချိန်ကာလ မျှော်စင် က အချိန်ကို နောက်ပြန် ဆုတ်နိုင်ပြီး သေသွားတဲ့ မှော်သားရဲ တွေကို ပြန်လည် အသက်ရှင်လာအောင် လုပ်ပေးနိုင်တယ် တဲ့... အခုတော့ ကောလာဟလ က တကယ် မှန်နေတာပဲ။

"အချိန်ကို ထိန်းချုပ်တာ က အချိန်ကာလ နတ်ဘုရား လက်နက် ဖြစ်တဲ့ အချိန်ကာလ မျှော်စင် ရဲ့ အစွမ်းထက်တဲ့ အချက်ပဲ"

ဒိုဒိုလာ က မာနတကြီး ပြုံးလိုက်လေသည်။ "ဒါတောင်မှ... ဒါက အချိန်ကာလ မျှော်စင် ရဲ့ အဖိုးတန်ဆုံး အရာ မဟုတ်သေးဘူး"

"ဒါက အဖိုးတန်ဆုံး မဟုတ်ဘူး... ဒါဆို ဘာလဲ"

မုန်လဲ့ အနည်းငယ် ကြောင်အမ်းသွားလေသည်။ "အချိန်ကာလ နတ်ဘုရား ချန်ထားခဲ့တဲ့ အမွေ လား... ဒါမှမဟုတ် အချိန်ကာလ နတ်ဘုရား ရဲ့ ပိုင်ဆိုင်မှု တွေလား... ဒါမှမဟုတ် အချိန်ကာလ နိယာမ လေ့ကျင့်တဲ့ နည်းလမ်း လား"

"ငါတို့ ပြောနေတာ က အချိန်ကာလ မျှော်စင် ဆိုတဲ့ နတ်ဘုရား လက်နက် အကြောင်း... အပြင် က ပစ္စည်း တွေ အကြောင်း မဟုတ်ဘူး"

ဒိုဒိုလာ လုံးဝ ဆွံ့အသွားလေသည်။ "အချိန်ကာလ မျှော်စင် ရဲ့ အဖိုးတန်ဆုံး အရာ က အထပ် ၁၀၀ မှာ ရှိတာ"

"အထပ် ၁၀၀ လား"

မုန်လဲ့ က ပတ်ဝန်းကျင် ကို ကြည့်လိုက်ရာ ခြေအောက်ရှိ လွင့်မျောနေသော ကျွန်းငယ်လေး မှလွဲ၍ ကျန်သည့် နေရာများ အားလုံး အဆုံးအစမရှိသော ဖြူဖွေးသည့် မြူခိုးများဖြင့် ဖုံးလွှမ်းနေလေသည်။

ထို့အပြင် ဘာမှ မရှိတော့ပေ။

လောက နိယာမ များ...

လုံးဝ နီးပါး မရှိပေ။

မှော် စွမ်းအင်...

အရမ်းကို နည်းပါးလွန်းလှပေသည်။

ဒီအထပ် က အဖိုးတန်ဆုံး လား။

တကယ်ကို မမြင်ရဘူး။

"မမြင်ရဘူး မဟုတ်လား"

ဒိုဒိုလာ က မာနတကြီး ပြုံးလိုက်လေသည်။

"မမြင်ရဘူး"

မုန်လဲ့ က ခေါင်းခါလိုက်လေသည်။

"မမြင်ရတာ မှန်တာပေါ့"

ဒိုဒိုလာ က သက်ပြင်းချလိုက်လေသည်။ "အချိန်ကာလ နတ်ဘုရား သေဆုံးရတဲ့ အကြောင်းရင်း က ဒီအထပ် ကြောင့်ပဲ"

"ဒီအထပ် မှာ တကယ် ဘာလျှို့ဝှက်ချက် တွေ ရှိနေလို့လဲ"

မုန်လဲ့ အနည်းငယ် ကြောင်အမ်းသွားလေသည်။ "အချိန်ကာလ နတ်ဘုရား လိုမျိုး အစွမ်းထက်တဲ့ သူတောင် ဒီအထပ် ကြောင့် သေဆုံးသွားရတယ် ဟုတ်လား"

"ဒီအထပ် က အရင် ၉၉ ထပ် နဲ့ မတူဘူး... ဘာလို့လဲဆိုတော့ သူက အခုမှ စပြီး သန္ဓေတည်မယ့် မျိုးစေ့ လေး တစ်ခု ပဲ ရှိသေးလို့ပဲ"

ဒိုဒိုလာ က ဖြည်းညင်းစွာ ပြောလိုက်လေသည်။ "သူ သန္ဓေတည် ပြီးသွားရင်... အရင်က အထပ် တွေ အားလုံးကို ကျော်လွန်သွားမယ်... သာမန် လောက တွေကိုတောင် ကျော်လွန်သွားမယ်"

"ဒီလောက်တောင် လွန်လွန်းနေတာလား"

မုန်လဲ့ သိပ်မယုံချင်ပေ။ "ဆိုတော့ ဒီအထပ် မှာ တကယ် ဘာလျှို့ဝှက်ချက် တွေ ရှိနေတာလဲ"

"ဒီအထပ် က လောက မျိုးစေ့ လေ"

ဒိုဒိုလာ က စကားလုံး တစ်လုံးချင်းစီ ကို သေချာ ဖြည်းညင်းစွာ ပြောလိုက်လေသည်။ "ပြီးတော့ အဆင့်မြင့် လောက မျိုးစေ့"

"အဆင့်မြင့် လောက မျိုးစေ့ ဟုတ်လား"

မုန်လဲ့ အနည်းငယ် ခေါင်းရှုပ်သွားလေသည်။ ဘာကြီးလဲ။

"ကျယ်ဝန်းလှတဲ့ စကြဝဠာ ကြီး၊ အဆုံးအစမရှိတဲ့ လေဟာနယ် ထဲမှာ အချိန်တိုင်း လောက အသစ် တွေ မွေးဖွားလာသလို၊ လောက ဟောင်း တွေ သေဆုံးသွားကြတယ်"

"အသစ် နဲ့ အဟောင်း အစားထိုးတာ၊ ပျက်စီးတာ နဲ့ အသစ် ပြန်ဖြစ်တာ၊ ဖျက်ဆီးတာ နဲ့ သန္ဓေတည်တာ၊ သေဆုံးတာ နဲ့ မွေးဖွားတာ... ဒါတွေ အားလုံးက အမြင့်ဆုံး စည်းမျဉ်း တွေပဲ"

ဒိုဒိုလာ က သက်ပြင်းချလိုက်လေသည်။ "လောကကြီး ထဲက အရာအားလုံး လိုပဲ... လောက တွေ မှာလည်း သက်တမ်း ရှိတယ်... သက်တမ်း ကုန်သွားရင် လောက တွေ လည်း သေဆုံးပြီး ပျက်စီးသွားကြတာပဲ"

"ဒါပေမဲ့ အဆင့်မြင့် လောက ကတော့ ချွင်းချက် ပဲ"

ဒိုဒိုလာ က မုန်လဲ့ ကို ကြည့်လိုက်လေသည်။ "အဆင့်မြင့် လောက က ထာဝရ တည်တံ့တယ်၊ မပျက်စီးနိုင်ဘူး၊ သက်တမ်း ကန့်သတ်ချက် မရှိဘူး၊ ဘယ်တော့မှ မသေဆုံးဘူး၊ ပြီးတော့ ဘယ်တော့မှ မပျက်စီးဘူး"

"ထာဝရ တည်ရှိတယ်... မပျက်စီးနိုင်ဘူး... သာမန် လောက တွေ နဲ့ မတူလို့ သူ့ကို ထာဝရ လောက လို့လည်း ခေါ်ကြတယ်"

"အဆင့်မြင့် လောက တွေက... မသေဆုံးဘူး လား"

မုန်လဲ့ မျက်တောင်လေးများ ခတ်လိုက်လေသည်။

"ဟုတ်တယ်... မသေဆုံးဘူး"

ဒိုဒိုလာ က လေးနက်စွာ ခေါင်းညိတ်လိုက်လေသည်။ "ဘာလို့လဲဆိုတော့ အခု အချိန်ထိ အဆင့်မြင့် လောက တွေ တစ်ခါမှ သေဆုံးတာ မရှိခဲ့ဖူးလို့ပဲ"

"ကောင်းပြီလေ"

မုန်လဲ့ က အနည်းငယ် ခေါင်းညိတ်လိုက်လေသည်။ "ဆိုလိုတာက... အထပ် ၁၀၀ က နောက်ဆုံးကျရင် အဆင့်မြင့် လောက တစ်ခု အဖြစ် ပြောင်းလဲသွားမယ် ပေါ့"

"ဟုတ်တယ်"

ဒိုဒိုလာ ခေါင်းညိတ်လိုက်လေသည်။

"အဆင့်မြင့် လောက နဲ့ ကောင်းကင်ယံ တိုက်ကြီး လိုမျိုး သာမန် လောက တွေ ယှဉ်ရင်... ဘာတွေ ကွာခြားလဲ"

မုန်လဲ့ က သံသယဖြစ်စွာဖြင့် မေးလိုက်လေသည်။ "အချိန်ကာလ နတ်ဘုရား က အဆင့်မြင့် လောက မျိုးစေ့ လေး တစ်ခု အတွက် နဲ့ သေဆုံးသွားရတာလား"

ဒိုဒိုလာ က တည်ငြိမ်စွာ ပြန်ဖြေလိုက်လေသည်။ "ကွာခြားချက် တွေက အရမ်း များတယ်... ဥပမာ- အဆင့်မြင့် လောက တွေရဲ့ လောက နိယာမ တွေက ပိုပြီး ရှင်းလင်းတယ်၊ စွမ်းအင် တွေက ပိုပြီး ပြည့်ဝတယ်၊ နေရာ က ပိုပြီး ကျယ်ဝန်းတယ်၊ သန္ဓေတည်တဲ့ သက်ရှိ တွေက ပိုပြီး အဆင့်မြင့်တယ်"

"နတ်ဘုရား လောက ၁၀ ခု အကြောင်း မင်း ကြားဖူးလား... အဲဒါတွေ က နာမည် အကြီးဆုံး အဆင့်မြင့် လောက ၁၀ ခု ပဲ"

"နတ်ဘုရား လောက ၁၀ ခု လား"

မုန်လဲ့ တစ်ယောက် ထပ်ပြီး ကြောင်အမ်းသွားလေသည်။

"ဒါတောင် မသိဘူးလား"

ဒိုဒိုလာ လုံးဝ ဆွံ့အသွားလေသည်။ "မင်းက ငါ မြင်ဖူးသမျှ ထဲမှာ အသိဉာဏ် အနည်းဆုံး နတ်ဘုရားတစ်ဝက် ပဲ... ဒါပေမဲ့ မင်းရဲ့ အသက် ကို ထောက်ပြီးတော့ ငါ ခွင့်လွှတ်ပေးလိုက်မယ်"

"နတ်ဘုရား လောက ၁၀ ခု ဆိုတာ... မြေကြီး နတ်ဘုရား လောက၊ သမုဒ္ဒရာ နတ်ဘုရား လောက၊ မုန်တိုင်း နတ်ဘုရား လောက၊ မီးတောက် နတ်ဘုရား လောက၊ သစ်တော နတ်ဘုရား လောက၊ သတ္တု နတ်ဘုရား လောက၊ မိုးကြိုး နတ်ဘုရား လောက၊ အလင်း နတ်ဘုရား လောက၊ အမှောင် နတ်ဘုရား လောက နဲ့ ရေခဲ နတ်ဘုရား လောက တို့ပဲ"

"ဒီ အဆင့်မြင့် လောက ၁၀ ခု က အရမ်းကို ကျယ်ဝန်းတယ်... အဆုံးအစမရှိ လောက်အောင် ကျယ်ဝန်းတယ်... တစ်ခုချင်းစီတိုင်း က မင်းတို့ရဲ့ ကောင်းကင်ယံ တိုက်ကြီး ထက် ဘယ်နှစ်ဆ တောင် ကျယ်လဲ ဆိုတာ တွက်လို့တောင် မရဘူး"

"ပြီးတော့ နတ်ဘုရား လောက ၁၀ ခု ရဲ့ လောက နိယာမ တွေက အရမ်းကို ရှင်းလင်းတယ်... နတ်ဘုရား စွမ်းအား တွေ ကမ္ဘာ တစ်ခုလုံး မှာ ပြည့်နှက်နေတယ်"

"မြင့်မြတ်သောနယ်မြေ တွေ ဆိုတာ နေရာတိုင်းမှာ ရှိတယ်... နတ်ဘုရားတစ်ဝက် တွေ ဆိုတာ ခွေး လောက်တောင် တန်ဖိုး မရှိဘူး... နတ်ဘုရား လောက က သက်ရှိ တစ်ကောင် က မင်းတို့ ကောင်းကင်ယံ တိုက်ကြီး ကို ရောက်လာရင်... တိုက်ကြီး တစ်ခုလုံး ကို လွှမ်းမိုးနိုင်တဲ့ စွမ်းအား ရှိတယ်"

"ဒီလောက်တောင် လွန်လွန်းနေတာလား"

မုန်လဲ့ တံတွေး မြိုချလိုက်မိသည်။

"လွန်တယ် ဟုတ်လား... နည်းနည်းလေး မှ မလွန်ဘူး"

ဒိုဒိုလာ က ခေါင်းခါလိုက်လေသည်။ "ဒါကြောင့်မို့လို့ သာမန် လောက တွေ ကနေ လာတဲ့ နတ်ဘုရား တွေ က နတ်ဘုရား လောက ၁၀ ခု ကို သွားပြီး လေ့ကျင့်ဖို့ ဆန္ဒရှိကြတာ... လေ့ကျင့်ရတာ ပိုပြီး မြန်လို့လေ"

"မင်း နောက်ပိုင်း နတ်ဘုရား ဖြစ်လာရင်လည်း နတ်ဘုရား လောက ၁၀ ခု ကို သွားဖို့ စဉ်းစားလို့ ရတယ်... ဒါပေမဲ့ ငါကတော့ မင်းကို အဲဒီလို မလုပ်စေချင်ဘူး... ဘာလို့လဲဆိုတော့ အရမ်း အန္တရာယ် များလို့ပဲ"

"နတ်ဘုရား လောက ကို သွားမယ်..."

မုန်လဲ့ က နှုတ်ခမ်းကို သပ်လိုက်လေသည်။

"ကောလာဟလ တွေ အရ ဆိုရင် အဆင့်မြင့် လောက မှာ နောက်ထပ် အားသာချက် တစ်ခု ရှိသေးတယ်... အခုချိန်ထိ အမှန် လား အမှား လား ဆိုတာ ဘယ်သူမှ မအတည်ပြုနိုင်သေးဘူး"

ဒိုဒိုလာ က သက်ပြင်းချလိုက်လေသည်။ "ငါ့ရဲ့ သခင်ဟောင်း အချိန်ကာလ နတ်ဘုရား က ဒီ ကောလာဟလ ကြောင့် သူ့ရဲ့ အသက် ကို ပေးဆပ်ခဲ့ရပြီး နောက်ဆုံးတော့ သေဆုံးသွားရတာပဲ"

"ဘာ ကောလာဟလ လဲ"

မုန်လဲ့ က အလျင်စလို မေးလိုက်လေသည်။

"ကောလာဟလ တွေ အရ ဆိုရင် အဆင့်မြင့် လောက က ပင်မနတ်ဘုရား အမြုတေ ကို သန္ဓေတည် နိုင်တယ် တဲ့... ပင်မနတ်ဘုရား အမြုတေ ကို သိလား"

ဒိုဒိုလာ က တုန်ရီစွာ ပြောလိုက်လေသည်။ "သာမန် လူ တစ်ယောက် ကို ချက်ချင်း ကြီးမြတ်တဲ့ ပင်မနတ်ဘုရား ဖြစ်သွားအောင် လုပ်ပေးနိုင်တဲ့ နတ်ဘုရား အမြုတေ လေ"

"ပင်မနတ်ဘုရား အမြုတေ"

မုန်လဲ့ တစ်ကိုယ်လုံး တုန်ခါသွားလေသည်။

"သခင်ဟောင်း ပြောဖူးတယ်... ပြီးပြည့်စုံတဲ့ အဆင့်မြင့် နတ်ဘုရား ဆိုတာ နတ်ဘုရား တွေရဲ့ အဆုံးစွန်ဆုံး အဆင့် ပဲ... ဒီအဆင့် ကို ရောက်သွားရင် နောက်ထပ် တစ်လှမ်း ဆက်တက်လို့ မရတော့ဘူး... ပင်မနတ်ဘုရား ဖြစ်ဖို့ ဆိုတာ ပိုလို့တောင် မဖြစ်နိုင်သေးဘူး တဲ့"

ဒိုဒိုလာ က သက်ပြင်းချကာ ပြောလိုက်လေသည်။ "ပင်မနတ်ဘုရား အမြုတေ ကို ပေါင်းစပ်မှပဲ ပင်မနတ်ဘုရား ဖြစ်နိုင်တာ... ဒါမှလွဲရင် တခြား ဘာနည်းလမ်းမှ မရှိဘူး"

"ဒီ ကောလာဟလ ကို ယုံကြည်ပြီးတော့ သခင်ဟောင်း က ကြီးမြတ်တဲ့ ပုဂ္ဂိုလ်ကြီး တစ်ယောက် ရဲ့ အဆင့်မြင့် လောက မျိုးစေ့ ကို ခိုးယူခဲ့တာ... နောက်ဆုံးတော့ ကံဆိုးစွာနဲ့ သေဆုံးသွားရတာပဲ"

"နတ်ဘုရား တွေက... ပင်မနတ်ဘုရား ဖြစ်အောင် လေ့ကျင့်လို့ မရဘူးလား"

မုန်လဲ့ တိုးတိုးလေး ရေရွတ်လိုက်လေသည်။ "ပင်မနတ်ဘုရား အမြုတေ ကို ပေါင်းစပ်မှပဲ ဖြစ်နိုင်တာလား... ဒါက အရမ်းကို တရားမျှတမှု မရှိဘူး မဟုတ်လား"

"တရားမျှတမှု မရှိဘူး ဆိုပေမဲ့လည်း ဘာမှ မတတ်နိုင်ဘူးလေ" ဒိုဒိုလာ က ခေါင်းခါလိုက်လေသည်။ "ဒါက အမြင့်ဆုံး စည်းမျဉ်း ပဲ"

မုန်လဲ့ သက်ပြင်းချလိုက်လေသည်။ "ဆိုလိုတာက ဒီ အဆင့်မြင့် လောက မျိုးစေ့ ကို ရင့်ကျက်အောင် သန္ဓေတည် နိုင်ရင်... ပင်မနတ်ဘုရား အမြုတေ ထွက်လာနိုင်ချေ ရှိတာပေါ့"

"ကောလာဟလ ကတော့ အဲဒီလိုပဲ... တကယ် ဟုတ်လား မဟုတ်ဘူးလား ဆိုတာကိုတော့ ငါလည်း မသိဘူး... ကြီးမြတ်တဲ့ ပင်မနတ်ဘုရား တွေပဲ သိလောက်မှာပါ"

ဒိုဒိုလာ က ခေါင်းခါလိုက်လေသည်။

"ဒီအရာ ကို ဘယ်လို သန္ဓေတည် ရမလဲ"

မုန်လဲ့ က ပတ်ဝန်းကျင် ကို လှည့်ကြည့်လိုက်လေသည်။

"မင်းက ဒီ အဆင့်မြင့် လောက မျိုးစေ့ ကို သန္ဓေတည် ချင်တာလား... အိပ်ရာဝင်ပြီး အိပ်မက် မက်လိုက်ပါလား"

ဒိုဒိုလာ က မုန်လဲ့ ကို တစ်ချက် ကြည့်လိုက်လေသည်။ "မင်းက ဒီလောက် အားနည်းနေတာ... သူ့ကို သန္ဓေတည် လိုက်ရင်တောင် ထိန်းသိမ်းထားနိုင်မှာ မဟုတ်ဘူး"

"..."

မုန်လဲ့ မျက်လုံး လှန်လိုက်သော်လည်း စဉ်းစားကြည့်လျှင် မှန်နေလေသည်။ သူ၏ စွမ်းအား က မဆိုးဘူး ဆိုသော်လည်း ကျယ်ဝန်းလှသော စကြဝဠာကြီး ထဲမှာ ဆိုရင်တော့ သူက အားနည်းလွန်းနေလေသည်။

အခြား အရာတွေကို မပြောနဲ့ဦး... နဂါးနတ်ဘုရား တစ်ယောက်တည်း ကိုတောင် သူ မယှဉ်နိုင်သေးဘူး... တခြား အစွမ်းထက်တဲ့ သူတွေ ဆိုရင်တော့ ပြောနေစရာတောင် မလိုတော့ဘူး။

ဒါကြောင့်... စွမ်းအား ကို အဆင့်မြှင့်ဖို့ နည်းလမ်း ရှာရမယ်။ စွမ်းအား ကို အဆင့်မြှင့်မယ်...

"ဒိုဒိုလာ... ငါက အချိန်ကာလ မျှော်စင် ရဲ့ ပိုင်ရှင်သစ် ဖြစ်သွားပြီ ဆိုတော့ အချိန်ကာလ နတ်ဘုရား ရဲ့ ပိုင်ဆိုင်မှု တွေ၊ အမွေ တွေ နဲ့ အချိန်ကာလ နိယာမ လေ့ကျင့်တဲ့ နည်းလမ်း တွေကို ရနိုင်ပြီ မဟုတ်လား"

မုန်လဲ့ ၏ မျက်လုံးများ တောက်ပလာပြီး အနည်းငယ် စိတ်လှုပ်ရှားစွာဖြင့် ဒိုဒိုလာ ကို ကြည့်လိုက်လေသည်။ အဆင့်မြင့် နတ်ဘုရား တစ်ပါး ၏ ပိုင်ဆိုင်မှု တွေလေ။

နတ်ဘုရား ကျောက်သလင်း ဘယ်လောက် ရှိမလဲ။ နတ်ဘုရားစွမ်းအား ဘယ်လောက် ရှိမလဲ။ နိယာမ အရင်းအမြစ် ကျောက်သလင်း ဘယ်လောက် ရှိမလဲ။ ရွှေဒင်္ဂါး ဘယ်လောက် ရှိမလဲ။

တစ်ခါတည်း နဲ့ ချမ်းသာသွားမယ့် အခြေအနေ ပဲ။

"သီအိုရီ အရတော့ ဟုတ်ပါတယ်"

ဒိုဒိုလာ က စကားကို လှည့်လိုက်လေသည်။ "ဒါပေမဲ့ သခင်ဟောင်း က အမိန့် တစ်ခု ထားခဲ့တယ်... စမ်းသပ်မှု ကို အောင်မြင်မှ သက်ဆိုင်ရာ ဆုလာဘ် တွေကို ရနိုင်မယ် တဲ့"

"မဟုတ်ရင်တော့... စိတ်ကူးတောင် မယဉ်နဲ့"

"စမ်းသပ်မှု... စမ်းသပ်မှု ရှိသေးတာလား"

မုန်လဲ့ မျက်လုံး လှန်လိုက်လေသည်။ "ပြောပါဦး... အချိန်ကာလ နတ်ဘုရား က ဘာ စမ်းသပ်မှု တွေ ချန်ထားခဲ့တာလဲ"

"စမ်းသပ်မှု မလုပ်ခင်... မင်းရဲ့ လေ့ကျင့်မှု အခြေအနေ ကို အရင် လေ့လာခွင့် ပြုပါဦး"

ဒိုဒိုလာ က မုန်လဲ့ ကို ကြည့်လိုက်လေသည်။ "မင်းရဲ့ နတ်ဘုရား ခန္ဓာကိုယ် က တော်တော် အစွမ်းထက်တယ်... ခန္ဓာကိုယ် ထဲမှာ နတ်ဘုရား သားရဲ သွေးမျိုးဆက် တစ်ခုခု ပါမယ် ထင်တယ်... ငါ့ကို ပြပါဦး၊ မင်းက တကယ် ဘာ နတ်ဘုရား သားရဲ ရဲ့ မျိုးဆက် လဲ ဆိုတာ"

မုန်လဲ့ က ခေါင်းညိတ်လိုက်ပြီး နတ်ဘုရားသတ်ကြွက် အဖြစ် ချက်ချင်း ပြောင်းလဲလိုက်လေသည်။

"အမည်းရောင် ဝက်ဝံ ဟမ်းစတား လား... မဟုတ်ဘူး ဒီအရှိန်အဝါ က မတူဘူး"

"ကျောက်တုံးနက် ကြွက် လား... မတူဘူး... အမြီး က မတူဘူး"

"ကျောက်စားကြွက် လား... မဟုတ်ဘူး ကျောက်စားကြွက် က မီးခိုးရောင် လေ"

ဒိုဒိုလာ က မုန်လဲ့ ၏ ပတ်လည်တွင် လှည့်ပတ်ကာ ကြည့်ရှုနေပြီး ရုတ်တရက် အံ့ဩစွာ အော်ဟစ်လိုက်လေသည်။ "ငါ သိပြီ... နတ်ဘုရားသတ်ကြွက်... ဒါ နတ်ဘုရားသတ်ကြွက် ရဲ့ အရှိန်အဝါ ပဲ"

"ဘုရားရေ... တကယ်ပဲ နတ်ဘုရားသတ်ကြွက် ဖြစ်နေတာလား"

"မင်းက ဘယ်လိုလုပ် နတ်ဘုရားသတ်ကြွက် ရဲ့ မျိုးဆက် ဖြစ်နေရတာလဲ”