အခန်း ၂၀၉

အခန်း ၂၀၉။ ပေါင်းစပ်နိယာမ၊ ကျဆင်းနေသော ကောင်းကင်တမန်

တစ်ဝက်တစ်ပျက် လောက ဟူသည်မှာ နာမည်နှင့်လိုက်အောင် မပြည့်စုံသော လောကများပင် ဖြစ်လေသည်။

မရင့်ကျက်သေးသော လောကသည် တစ်ဝက်တစ်ပျက် လောက ဖြစ်နိုင်သည်။ ပြီးပြည့်စုံသော လောကတစ်ခု ပျက်စီးသွားပြီးနောက် ကျန်ရစ်ခဲ့သော အပိုင်းအစသည်လည်း တစ်ဝက်တစ်ပျက် လောက ဖြစ်နိုင်သည်။ သန္ဓေတည်ခြင်း မအောင်မြင်ဘဲ ပုံပျက်ပန်းပျက် ဖြစ်နေသော လောကသည်လည်း တစ်ဝက်တစ်ပျက် လောက ဖြစ်နိုင်လေသည်။

အချုပ်အားဖြင့်ဆိုရသော် မည်သည့်လောကမျိုးပင်ဖြစ်စေ၊ မပြည့်စုံသရွေ့ တစ်ဝက်တစ်ပျက် လောကဟု ခေါ်ဆိုနိုင်လေသည်။

နဂါးနတ်ဘုရား အင်ပါယာ၏ ဘဏ္ဍာတိုက်နှင့် နဂါးမျိုးနွယ်စုတို့၏ အဓိက အခြေစိုက်ရာ နဂါးကျွန်းတို့သည် ဤသို့သော တစ်ဝက်တစ်ပျက် လောက နှစ်ခုအတွင်းတွင် တည်ရှိနေခြင်း ဖြစ်သည်။ အလွန် လျှို့ဝှက်ကျစ်လစ်လှပြီး အင်ပါယာ၏ အထက်တန်း အရာရှိများမှလွဲ၍ မည်သူမျှ မသိရှိနိုင်ပေ။

"အရင်ဆုံး အင်ပါယာ ဘဏ္ဍာတိုက်ကို သွားရမယ်"

မုန်လဲ့သည် အချိန်မဖြုန်းတော့ဘဲ အကြောက်လွန်ကာ သေးထွက်ကျနေသော မိဖုရားခေါင်ကြီး၏ လမ်းညွှန်ချက်အတိုင်း လျှို့ဝှက် မြေအောက်နန်းတော်တစ်ခုသို့ ရောက်ရှိလာပြီး ဘဏ္ဍာတိုက် တစ်ဝက်တစ်ပျက် လောကသို့ သွားရာ မှော်အစီအရင်ကို ရှာတွေ့သွားလေသည်။

"ဝုန်း..."

မှော်အစီအရင်ကို အသက်သွင်းလိုက်သည်နှင့် ကမ္ဘာကြီး လည်ထွက်သွားသကဲ့သို့ ခံစားရပြီးနောက် မုန်လဲ့သည် အခြားသော ကမ္ဘာတစ်ခုသို့ ရောက်ရှိသွားလေသည်။

မီးခိုးရောင် ကောင်းကင်။

မီးခိုးရောင် မြေပြင်။

မှော်စွမ်းအင် လုံးဝ မရှိပေ။

လောကနိယာမများ မပြည့်စုံချေ။

လေထုဆိုသည်မှာလည်း လုံးဝနီးပါး မရှိပေ။

ဤကဲ့သို့သော တစ်ဝက်တစ်ပျက် လောကမျိုးသည် သက်ရှိများ နေထိုင်ရန် လုံးဝ မသင့်လျော်သော်လည်း ရတနာများ သိမ်းဆည်းရန်အတွက်မူ အကောင်းဆုံး နေရာတစ်ခု ဖြစ်လေသည်။

ပထမအချက် မှိုတက်မည်ကို စိုးရိမ်စရာ မလို၊ ဒုတိယအချက် ပျက်စီးသွားမည်ကို ပူစရာမလို၊ တတိယအချက် ကြွက်များ၊ ပိုးမွှားများ ကိုက်ဖြတ်မည်ကို ကြောက်စရာမလိုပေ။ တကယ့်ကို အကောင်းဆုံး ရွေးချယ်မှုပင် ဖြစ်သည်။

"ဟိုဟာက..."

မုန်လဲ့သည် ညီညာပြန့်ပြူးသော မြေပြင်ပေါ်တွင် မတ်မတ်ရပ်နေသော နန်းတော်ကြီးများကို ချက်ချင်း မြင်လိုက်ရလေသည်။

ရွှေရောင် တောက်ပနေပြီး ကြီးမားခမ်းနားလှကာ ရွှေတောင်ကြီးများအလား မျက်စိကျိန်းမတတ် အလင်းရောင်များ ထုတ်လွှတ်နေလေသည်။

မုန်လဲ့သည် ပထမဆုံး နန်းတော်ကြီးဆီသို့ လျင်မြန်စွာ ပျံသန်းသွားလိုက်သည်။ ပေသုံးဆယ်ခန့် မြင့်မားသော ရွှေစင်တံခါးကြီးမှာ တင်းကျပ်စွာ ပိတ်ထားပြီး တံခါးပေါ်တွင် 'လက်နက်များ နန်းတော်' ဟူသော ရွှေစာလုံး လေးလုံးကို ရေးထိုးထားလေသည်။ တံခါးပေါ်တွင် မှော်စွမ်းအင်များ စီးဆင်းနေသည်ကို ကြည့်ခြင်းအားဖြင့် မှော်အစီအရင်တစ်ခု ရေးဆွဲထားကြောင်း သိသာလှပေသည်။

"လက်နက်များ နန်းတော်..."

မုန်လဲ့က လေဟာနယ်ကို ဆုပ်ကိုင်လိုက်ရာ ပေသုံးဆယ်ခန့် မြင့်မားသော ရွှေစင်တံခါးကြီးမှာ ချက်ချင်း ပျက်စီးသွားပြီး လေထဲတွင် ရွှေမှုန့်များအဖြစ် ပြောင်းလဲသွားကာ စနစ်၏ သိမ်းဆည်းခြင်းကို ခံလိုက်ရလေသည်။

"ဘုရားရေ... တံခါး နှစ်ချပ်တည်းနဲ့တင် ရွှေဒင်္ဂါး သန်း ၃၀၀၀ လောက် တန်ဖိုးရှိနေပြီ... မလွယ်ဘူး၊ တကယ် မလွယ်ဘူး"

မုန်လဲ့က အရည်အချင်း မှတ်တမ်းကို တစ်ချက်ကြည့်လိုက်ပြီး အသက်ပြင်းပြင်း ရှူလိုက်မိသည်။ တံခါးကတောင် ဒီလောက် ဇိမ်ကျနေတာ၊ အထဲမှာဆို ဘယ်လောက်တောင် ရှိနေမလဲ။

လက်နက်များ နန်းတော်ထဲသို့ ဝင်လိုက်ရာ အတွင်းတွင် မြင့်မြတ်သော မှော်လက်နက်များ ခန်းမနှင့် နတ်ဘုရားတစ်ဝက် လက်နက်များ ခန်းမဟူ၍ နှစ်ပိုင်း ထပ်မံခွဲခြားထားသည်ကို တွေ့ရလေသည်။

မြင့်မြတ်သော မှော်လက်နက်များ ခန်းမထဲသို့ ဝင်လိုက်ရာ ဓား၊ လှံ၊ လေး၊ မြှား၊ ပုဆိန်၊ တုတ်၊ တောင်ဝှေး စသည့် လက်နက်မျိုးစုံကို တွေ့ရလေသည်။

မှော်စွမ်းအင်များ အပြည့်အဝ စီးဆင်းနေပြီး အားလုံးမှာ မြင့်မြတ်သော မှော်လက်နက်များသာ ဖြစ်ကြသည်။

ထို့အပြင် နေရာလွတ် လက်စွပ် ဒါဇင်ပေါင်းများစွာလည်း ရှိနေသေးသည်။ တစ်ကွင်းကို ကောက်ကြည့်လိုက်ရာ ကုဗမီတာ တစ်ထောင်ကျော် ဆံ့သည့် အလွန်ကြီးမားသော နေရာလွတ် လက်စွပ် ဖြစ်နေလေသည်။

"ဒါတွေကို အပြင်မှာ လေလံတင်ရောင်းရင် အနည်းဆုံး သန်းထောင်ချီ ရနိုင်တယ် မဟုတ်လား"

မုန်လဲ့က ချီးကျူးလိုက်လေသည်။ "နှမြောစရာပဲ... ဒီမှာတော့ အလှပြပစ္စည်းတွေ အဖြစ် ထားထားရတယ်"

"သိမ်းမယ်"

"သိမ်းမယ်"

"သိမ်းမယ်"

ဒီလောက် ကောင်းတဲ့ ပစ္စည်းတွေကို လွှတ်ထားခဲ့စရာ အကြောင်းမရှိပေ။ မုန်လဲ့ မြင့်မြတ်သော မှော်လက်နက်များ ခန်းမထဲမှ ထွက်လာချိန်တွင် ခန်းမကြီး တစ်ခုလုံး ပြောင်သလင်းခါနေပြီ ဖြစ်သည်။

မှော်လက်နက် တစ်ခုမျှမက ဖုန်ခါသည့် ကြက်မွေးတံမြက်စည်းလေးပင် ကျန်မနေခဲ့ချေ။

ဘာပြောစရာရှိသေးလဲ။

ကြက်မွေးတံမြက်စည်းရဲ့ လက်ကိုင်က ရွှေစင်နဲ့ လုပ်ထားတာလေ။ တန်ဖိုးကြီးတာပေါ့၊ ဘယ်သူက လွှင့်ပစ်ရက်မှာလဲ။

"နတ်ဘုရားတစ်ဝက် လက်နက်များ ခန်းမ"

လက်နက်ပေါင်းစုံရှိသည့် မြင့်မြတ်သော မှော်လက်နက်များထက်စာလျှင် နတ်ဘုရားတစ်ဝက် လက်နက်များက အလွန်နည်းပါးပြီး ဆယ်ခုကျော်မျှသာ ရှိကာ အများစုမှာ မှော်တောင်ဝှေးများ ဖြစ်ကြသည်။

"ကောင်းကင်ပြာ တောင်ဝှေး"

မုန်လဲ့က မှော်တောင်ဝှေး တစ်ချောင်းကို ယူကြည့်လိုက်ရာ အပြာရောင် တောင်ဝှေး မျက်နှာပြင်ပေါ်တွင် လေဓာတ် နတ်ဘုရားစွမ်းအားများ လှုပ်ရှားနေသည်ကို တွေ့ရလေသည်။

"လေဓာတ် နတ်ဘုရားတစ်ဝက် မှော်သားရဲရဲ့ နံရိုးနဲ့ မှော်အမြုတေကို သုံးပြီး ဖန်တီးထားတာ ဖြစ်ရမယ်... ကုန်ကြမ်းကတင် အရမ်း ရှားပါးနေပြီပဲ"

"မဆိုးဘူး... ကောင်းတဲ့ နတ်ဘုရားတစ်ဝက် လက်နက်ပဲ... သိမ်းလိုက်ပြီ"

အခြား နတ်ဘုရားတစ်ဝက် လက်နက်များ အားလုံးလိုလိုမှာလည်း နတ်ဘုရားတစ်ဝက် ကုန်ကြမ်းများဖြင့် ပြုလုပ်ထားခြင်း ဖြစ်ပြီး အကယ်၍ အပြင်တွင် လေလံတင်ရောင်းချပါက လူများ လန့်သေသွားလောက်သည့် ဈေးနှုန်းမျိုး ရရှိနိုင်မည်မှာ သေချာလှပေသည်။

"သိမ်းမယ်"

လက်နက်များ နန်းတော်ထဲမှ ထွက်လာပြီးနောက် မုန်လဲ့သည် ဤရွှေစင်ဖြင့် တည်ဆောက်ထားသော နန်းတော်ကြီးကိုပါ အလွတ်မပေးတော့ချေ။ လက်ဖျစ်တစ်ချက် တီးလိုက်သည်နှင့် နန်းတော်ကြီး ပျက်စီးသွားပြီး ရွှေမှုန့်များအဖြစ် ပြောင်းလဲကာ စနစ်၏ သိမ်းဆည်းခြင်းကို ခံလိုက်ရလေသည်။

"နန်းတော် တစ်လုံးတည်းနဲ့တင် ရွှေဒင်္ဂါး ၁၀၀၀ ဘီလီယံ တန်နေပြီ... နဂါးမျိုးနွယ်တွေ... တကယ်ကို စည်းစိမ်ယစ်လွန်းတယ်"

ဒုတိယ နန်းတော်။

"နိယာမ အရင်းအမြစ် ကျောက်သလင်း နန်းတော်..."

မုန်လဲ့၏ အသက်ရှူနှုန်း ချက်ချင်း မြန်ဆန်လာလေသည်။ မြင့်မြတ်သော မှော်လက်နက်များ၊ နတ်ဘုရားတစ်ဝက် လက်နက်များနှင့် မတူဘဲ နိယာမ အရင်းအမြစ် ကျောက်သလင်းများနှင့် ရွှေများကို စနစ်က တိုက်ရိုက် သိမ်းဆည်းနိုင်လေသည်။

မုန်လဲ့ ဘယ်လိုလုပ် စိတ်မလှုပ်ရှားဘဲ နေနိုင်မည်နည်း။

"ရွှစ်..."

တံခါးကြီး ပျောက်ကွယ်သွားသည်နှင့် မျက်စိကျိန်းမတတ် တောက်ပလှသော ရောင်စုံ အလင်းတန်းများက တံခါးပေါက်မှတစ်ဆင့် ထွက်ပေါ်လာပြီး လှပသော သက်တံကြီးတစ်ခုအလား ထင်မှတ်ရလေသည်။

"အရမ်းကို ပြင်းထန်တဲ့ နိယာမ စွမ်းအင်တွေပဲ"

မုန်လဲ့ အသက်ပြင်းပြင်း ရှူလိုက်မိပြီး ရောင်စုံ ကျောက်မျက်ရတနာများအလား တစ်ပုံတစ်ပင်ကြီး စုပုံနေသော နိယာမ အရင်းအမြစ် ကျောက်သလင်းများကို ချက်ချင်း မြင်လိုက်ရလေသည်။

"နိယာမ အရင်းအမြစ် ကျောက်သလင်းတွေ အများကြီးပဲ"

မုန်လဲ့၏ မျက်လုံးများ အရောင်လက်သွားလေသည်။

"စနစ်... သိမ်းမယ်"

ရွှစ်... ရွှစ်... ရွှစ်...

ခန်းမထဲရှိ နိယာမ အရင်းအမြစ် ကျောက်သလင်းများ အားလုံး ပျောက်ကွယ်သွားပြီးနောက် ပိုင်ဆိုင်မှု ပမာဏမှာ အလွန်တရာ များပြားသွားလေသည်။

၇၈၆၉၃၄ နိယာမ အရင်းအမြစ် ကျောက်သလင်း။

"ချမ်းသာပြီ... ဒီတစ်ခါတော့ တကယ် ချမ်းသာပြီ"

မုန်လဲ့က ကောင်းကင်ကို မော့ကြည့်ကာ ရယ်မောလိုက်လေသည်။ "ဟားဟား... တစ်ခါတည်းနဲ့ သူဌေးဖြစ်သွားပြီပဲ... နှမြောစရာက ဒီလောက်များတဲ့ ပိုက်ဆံတွေရှိနေတာတောင် အဆင့်မြှင့်လို့ မရတော့တာပဲ"

ခြင်ဆီကတောင် အသားထုတ်ယူတတ်သည့် မုန်လဲ့၏ အကျင့်အတိုင်း ရွှေစင်ဖြင့် တည်ဆောက်ထားသော ဤနန်းတော်ကြီးကိုလည်း ချန်မထားခဲ့ဘဲ ထပ်မံ အမြတ်ထုတ်လိုက်ပြန်သည်။

တတိယမြောက် နန်းတော်မှာ ဒြပ်စင် ကျောက်သလင်း နန်းတော် ဖြစ်လေသည်။

ဒြပ်စင် ကျောက်သလင်း ဆိုသည်မှာ မှော်စွမ်းအင်များ ခဲသွားပြီး ဖြစ်ပေါ်လာသော အရာများ ဖြစ်သည်။ နိယာမ အရင်းအမြစ် ကျောက်သလင်းများလောက် မရှားပါးသော်လည်း မှော်ဆရာများ၏ မှော်စွမ်းအင်ကို လျင်မြန်စွာ မြှင့်တင်ပေးနိုင်သော ရတနာများ ဖြစ်ကြသည်။

တန်ဖိုး ကြီးမားပြီး အလွန် ရှားပါးလှသည်။

အရေးအကြီးဆုံးအချက်မှာ ဒြပ်စင် ကျောက်သလင်း အရေအတွက်မှာ သဲပုံကြီးတစ်ခုအလား နန်းတော်ထဲတွင် အလွန်များပြားစွာ စုပုံနေခြင်းပင် ဖြစ်သည်။ တန်ချိန် သောင်းချီမက ရှိနိုင်လေသည်။

တစ်ခုတည်းသော အားနည်းချက်မှာ စနစ်က ဒြပ်စင် ကျောက်သလင်းများကို အသိအမှတ်မပြုသဖြင့် တိုက်ရိုက် သိမ်းဆည်း၍ မရခြင်းပင် ဖြစ်သည်။ တကယ်ကို ခေါင်းကိုက်စရာပင်။

ဒြပ်စင် ကျောက်သလင်းများကို သိမ်းဆည်းပြီးနောက် မုန်လဲ့သည် စတုတ္ထမြောက် နန်းတော် ဖြစ်သော ရှားပါး မှော်ကုန်ကြမ်းများ နန်းတော်သို့ သွားရောက်ခဲ့လေသည်။

မှော်ကုန်ကြမ်းများနှင့် ပတ်သက်၍ မုန်လဲ့ သိပ်မရင်းနှီးသော်လည်း အခြားသော မှော်ဆရာများအတွက်မူ မှော်ကုန်ကြမ်းများ လိုအပ်သည့်နေရာ အလွန်များပြားလှပေသည်။

မှော်တောင်ဝှေး ပြုလုပ်ခြင်း၊ မှော်ဆေးရည် ဖော်စပ်ခြင်း၊ မှော်အစီအရင် ရေးဆွဲခြင်း၊ မှော်စမ်းသပ်မှုများ ပြုလုပ်ခြင်း...

ဤအရာများကြောင့် မှော်ကုန်ကြမ်း လုပ်ငန်းသည် နဂါးနတ်ဘုရား အင်ပါယာ၏ အဓိက စီးပွားရေး လုပ်ငန်းကြီးများထဲမှ တစ်ခု ဖြစ်လာပြီး နှစ်စဉ် နဂါးနတ်ဘုရား အင်ပါယာအတွက် အခွန်ငွေ ထရီလီယံချီ ရှာဖွေပေးနေခြင်း ဖြစ်သည်။

ဤနန်းတော်ထဲတွင် တန်ဖိုးကြီးမားလှသော ရှားပါး ကုန်ကြမ်းများ အပြည့်ရှိနေပြီး တစ်ခုချင်းစီကို အပြင်သို့ ယူသွားပါက လေလံပွဲတွင် အလွန်မြင့်မားသော ဈေးနှုန်းများဖြင့် ရောင်းချနိုင်မည် ဖြစ်သည်။

"ပိုက်ဆံအဖြစ် ချက်ချင်း ပြောင်းလို့မရသေးဘူး... ဒါပေမဲ့ တချို့ဟာတွေကိုတော့ သရေစာအဖြစ် စားလို့ရတယ်..."

အားလုံးကို ထုပ်ပိုး သိမ်းဆည်းလိုက်လေသည်။

နောက်ဆုံး နန်းတော်မှာ အထူးပစ္စည်းများ သိမ်းဆည်းထားသော နေရာ ဖြစ်သည်။ မုန်လဲ့ ဝင်ရောက်သွားပြီးနောက် ပထမဆုံး မြင်လိုက်ရသည်မှာ ရွှေဝါရောင် ခြေသလုံးလေး တစ်ခု ဖြစ်သည်။

ဤခြေသလုံးလေးမှာ ရွှေနှင့်တူသော်လည်း ရွှေစစ်စစ် မဟုတ်ဘဲ ၎င်းပေါ်တွင် နတ်ဘုရား အမှတ်အသားများ စီးဆင်းနေကာ ကြောက်မက်ဖွယ်ကောင်းသော ဖိအားများကို ထုတ်လွှတ်နေလေသည်။ မုန်လဲ့မှာ သမိုင်းမတင်မီခေတ်က သားရဲကြီးတစ်ကောင်နှင့် ရင်ဆိုင်နေရသကဲ့သို့ ခံစားလိုက်ရလေသည်။

"အသိပေးချက်... ကျလာတဲ့ ပစ္စည်း တွေ့ရှိပါတယ်... ကောက်ယူမလား" စနစ်၏ အသံ ထွက်ပေါ်လာလေသည်။

"ကောက်ယူမယ်"

"အသိပေးချက်... ပေါင်းစပ်နိယာမ အပိုင်းအစ တစ်ခု တွေ့ရှိပါတယ်... ပေါင်းစပ်မလား"

"ပေါင်းစပ်နိယာမ အပိုင်းအစ"

မုန်လဲ့ အနည်းငယ် ကြောင်အမ်းသွားလေသည်။ "နိယာမ အချို့ ပေါင်းစပ်ပြီး ဖြစ်လာတဲ့ နိယာမ အပိုင်းအစ လား"

"ပေါင်းစပ်မယ်"

"ဝုန်း..."

ကြီးမားလှသော အချက်အလက်များ ဦးနှောက်ထဲသို့ ဝင်ရောက်လာလေသည်။ ၎င်းတို့မှာ လုံးဝ ကွဲပြားခြားနားသော နိယာမ နှစ်ခု ပြီးပြည့်စုံစွာ ပေါင်းစပ်သွားသည့် 'နိယာမ အသစ် အချက်အလက်များ' ပင် ဖြစ်လေသည်။

တစ်ခုက အသက်စွမ်းအင်ကို ကိုယ်စားပြုပြီး ရှင်သန်ကြီးထွားမှုကို ဖြစ်ပေါ်စေသည်။ ၎င်းမှာ သစ်ဓာတ် နိယာမ ဖြစ်သည်။

အခြားတစ်ခုက တည်ငြိမ်လေးလံမှုကို ကိုယ်စားပြုပြီး အရာအားလုံးကို ထမ်းပိုးထားသည်။ ၎င်းမှာ မြေဓာတ် နိယာမ ဖြစ်သည်။

"သစ်ဓာတ် နိယာမနဲ့ မြေဓာတ် နိယာမ ပေါင်းစပ်ပြီး ဖြစ်လာတဲ့ နိယာမ အသစ်ရဲ့... အပိုင်းအစ လား"

မုန်လဲ့ တိုးတိုးလေး ရေရွတ်လိုက်ပြီး အရည်အချင်း မှတ်တမ်းကို အလျင်စလို ကြည့်လိုက်ရာ သူငယ်အိမ်များ ကျုံ့ဝင်သွားပြီး အော်ပင် အော်မိမတတ် ဖြစ်သွားလေသည်။

ပိုင်ရှင် - မုန်လဲ့

မျိုးနွယ် - လူသား (နတ်ဘုရားသတ်ကြွက် သွေးမျိုးဆက်)

ပိုင်ဆိုင်မှု - ၇၈၇၈၆၉ နိယာမ အရင်းအမြစ် ကျောက်သလင်း

ခန္ဓာကိုယ်ကြံ့ခိုင်မှု - နတ်ဘုရားတစ်ဝက် ခန္ဓာကိုယ် (အဆင့်မြင့်)

စိတ်စွမ်းအင် - နတ်ဘုရား ဝိညာဉ် (အဆင့်နိမ့်)

နတ်ဘုရားစွမ်းအား - ဝ.၁ နတ်ဘုရား ကျောက်သလင်း

နိယာမ နားလည်မှု - သစ်-မြေ ပေါင်းစပ် နိယာမ (ဝ.၁%)

"ဝ.၁%..."

"နိယာမ နားလည်မှု... ထပ်ပြီး ငွေကြေးသုံးပြီး အဆင့်မြှင့်လို့ ရပြီ"

"ပြီးတော့ သစ်-မြေ ပေါင်းစပ် နိယာမ တဲ့"

"ဘုရားရေ... ဒီလိုလုပ်လို့ ရတယ်လား"

နှလုံးခုန်သံများ မြန်ဆန်လာပြီး မုန်လဲ့၏ ခေါင်းထဲတွင် ရဲတင်းသော အကြံအစည်တစ်ခု ရုတ်တရက် ပေါ်ထွက်လာလေသည်။

နတ်ဘုရား ဝိညာဉ်ကို ခွဲထုတ်၊ နတ်ဘုရား မီးတောက်ကို လင်း၊ နတ်ဘုရား အမြုတေကို ဖွဲ့စည်းပြီး အဆင့်အလယ်အလတ် နတ်ဘုရား ဖြစ်လာမှသာ နိယာမတွေကို ပေါင်းစပ်လို့ ရမှာလား။

နတ်ဘုရား မီးတောက်ကို မလင်းခင်မှာ နိယာမ ၁၀ မျိုးကို တစ်ခုတည်းအဖြစ် ပေါင်းစပ်နိုင်ကောင်း ပေါင်းစပ်နိုင်မှာပဲ...

"ဖြစ်နိုင်တယ်"

"လုံးဝ ဖြစ်နိုင်ခြေ ရှိတယ်"

"ဒါပေမဲ့ အဓိက အချက်ကတော့... ငါ ပေါင်းစပ်နိယာမ အပိုင်းအစတွေ ပိုပြီး လိုအပ်တယ်... ဒါမှ တခြား ပေါင်းစပ်နိယာမတွေကိုလည်း ငွေကြေးသုံးပြီး အဆင့်မြှင့်လို့ ရမှာ"

မုန်လဲ့ အသက်ပြင်းပြင်း ရှူထုတ်လိုက်ပြီး သူ၏ အကြည့်များက ခြေသလုံးလေးပေါ်သို့ ရောက်ရှိသွားလေသည်။

"ပေါင်းစပ်နိယာမ အပိုင်းအစ ကျလာနိုင်တယ်ဆိုတော့ အနည်းဆုံး အဆင့်အလယ်အလတ် နတ်ဘုရား ဖြစ်ရမယ်"

"အဆင့်အလယ်အလတ် နတ်ဘုရားရဲ့ ခြေသလုံး ဆိုတော့မှ ဖိအားတွေက ဒီလောက်တောင် ကြီးမားနေတာကိုး"

ဒုတိယမြောက် ပစ္စည်းမှာ ရွှေရောင် ဦးခေါင်းခွံတစ်ခု ဖြစ်ပြီး ခြေသလုံးလေးကဲ့သို့ပင် နတ်ဘုရား အမှတ်အသားများ စီးဆင်းနေကာ နတ်ဘုရားစွမ်းအားများ လှုပ်ရှားနေလေသည်။ တကယ့် နတ်ဘုရား ဦးခေါင်းခွံ ဖြစ်ရမည်။

သို့သော် ဝမ်းနည်းစရာမှာ ဤတစ်ကြိမ်တွင် မည်သည့် ပစ္စည်းမျှ ကျမလာခဲ့ချေ။

တတိယမြောက် ပစ္စည်းမှာ တောင်ပံတစ်စုံ ဖြစ်ပြီး လိပ်ပြာတောင်ပံနှင့် တူကာ ကြည်လင်တောက်ပပြီး ပိုးဟပ်တောင်ပံကဲ့သို့ ပါးလွှာလေသည်။ သို့သော် အလွန် ပျော့ပျောင်းခိုင်ခံ့လှပြီး မုန်လဲ့ပင် ဆွဲဆုတ်၍ မရခဲ့ပေ။ အမှန်တကယ်ပင် နတ်ဘုရားများ၏ ပစ္စည်း ဖြစ်လေသည်။

စတုတ္ထမြောက် ပစ္စည်းမှာ ဘတ်စကက်ဘောလုံး အရွယ်အစားရှိသော ကျောက်တုံးတစ်တုံး ဖြစ်ပြီး နတ်ဘုရားစွမ်းအား လှုပ်ရှားမှုလည်း မရှိသလို နိယာမ လှုပ်ရှားမှုလည်း မရှိပေ။ အပြင်ပန်းကို ကြည့်ရုံဖြင့် သာမန် ကျောက်တုံးများနှင့် တစ်ပုံစံတည်း တူညီနေပြီး မည်သည့် ထူးခြားချက်မျှ မရှိပေ။

သာမန် ကျောက်တုံးတစ်တုံးကို ဒီနေရာမှာ ထားထားမလား။

မုန်လဲ့ သံသယဖြစ်သွားပြီး ကျောက်တုံးကို ကောက်ကိုင်ကာ သေချာ ကြည့်ရှုရန် ပြင်လိုက်လေသည်။

သို့သော် ထိုအချိန်တွင် စနစ်၏ အေးစက်စက် အသံက ရုတ်တရက် ထွက်ပေါ်လာပြန်သည်။

"အသိပေးချက်... ကျလာတဲ့ ပစ္စည်း တွေ့ရှိပါတယ်... ကောက်ယူမလား"

"ကောက်ယူမယ်"

"အသိပေးချက်... ကျဆင်းနေသော ကောင်းကင်တမန် သွေးမျိုးဆက် ရရှိပါတယ်... ပေါင်းစပ်မလား"

"ဘာ... ကျဆင်းနေတဲ့ ကောင်းကင်တမန် သွေးမျိုးဆက် ဟုတ်လား"

မုန်လဲ့ လုံးဝ ဆွံ့အသွားလေသည်။ "ဘယ်ကနေ ကျဆင်းနေတဲ့ ကောင်းကင်တမန် သွေးမျိုးဆက် ရလာတာလဲ... ဖြစ်နိုင်တာက..."

မုန်လဲ့၏ အကြည့်များက ရုပ်ဆိုးဆိုး ကျောက်တုံးလေးပေါ်သို့ အလိုအလျောက် ရောက်ရှိသွားလေသည်။ စနစ်က ကျဆင်းနေသော ကောင်းကင်တမန် သွေးမျိုးဆက်ကို အကြောင်းပြချက်မရှိ ကောက်ယူနိုင်မည် မဟုတ်ပေ။

တစ်ခုတည်းသော ဖြစ်နိုင်ခြေကတော့...

ထိုသို့ တွေးမိသည်နှင့် မုန်လဲ့သည် နတ်ဘုရား အာရုံများကို ထုတ်လွှတ်ကာ ကျောက်တုံးလေးကို လွှမ်းခြုံလိုက်ပြီး အထဲတွင် ဘာရှိသလဲဆိုတာကို စူးစမ်းရန် ကြိုးစားလိုက်လေသည်။

သို့သော် ထူးဆန်းသည်မှာ နတ်ဘုရား အာရုံများက ကျောက်တုံးလေးနှင့် ထိတွေ့လိုက်သည်နှင့် ထူးခြားသော စွမ်းအင်တစ်ခုက ပြန်ကန်ထုတ်လိုက်သဖြင့် အတွင်းသို့ လုံးဝ ဝင်ရောက်၍ မရခဲ့ပေ။

"တကယ်ကို ထူးဆန်းတာပဲ"

မုန်လဲ့သည် အချိန်ကာလ မျှော်စင်ထဲသို့ ချက်ချင်း ပြန်ဝင်သွားလိုက်လေသည်။

"ဒိုဒိုလာ... မြန်မြန် ထစမ်း"

"ခူး... ခူး... ခူး..."

ဒိုဒိုလာမှာ နူးညံ့သော မြက်ခင်းပြင်ပေါ်တွင် အိပ်မောကျနေပြီး ပါးစပ်မှ သွားရည်များပင် ကျနေလေသည်။ မုန်လဲ့ လာနှိုးသောအခါမှသာ အိပ်မှုန်စုံမွှားဖြင့် မျက်လုံးများကို ဖွင့်ကြည့်လိုက်လေသည်။

"ဘာဖြစ်လို့လဲ"

"မင်း ဒီအရာကို သိလား"

မုန်လဲ့က ကျောက်တုံးလေးကို ပစ်ပေးလိုက်ရာ ဒိုဒိုလာ၏ အာရုံစိုက်မှုကို ချက်ချင်း ရရှိသွားလေသည်။

"မိစ္ဆာ အရှိန်အဝါ တွေပဲ"

"ဒါတောင် အဆင့်မြင့် မိစ္ဆာ အရှိန်အဝါ တွေ"

ဒိုဒိုလာက ကျောက်တုံးလေးကို ခွေးတစ်ကောင်လို အနံ့ခံရင်း စူးစိုက်ကြည့်နေလေသည်။ "မင်း ဒါကို ဘယ်ကနေ ရလာတာလဲ"

"မင်း အရင်ဆုံး ပြောပြပါ... ဒါက ဘာကြီးလဲ" မုန်လဲ့က ပြန်မေးလိုက်လေသည်။

"မိစ္ဆာ ဥ... ဒါ မိစ္ဆာ ဥ ပဲ"

ဒိုဒိုလာက ပြတ်ပြတ်သားသား ပြောလိုက်လေသည်။

"မိစ္ဆာ ဥ ဟုတ်လား... မင်း သေချာလို့လား"

မုန်လဲ့က အလျင်အမြန် မေးလိုက်လေသည်။

"အလကား စကားတွေ... အရင်တုန်းက ကြီးမြတ်တဲ့ အချိန်ကာလ နတ်ဘုရားနဲ့ အတူ ငါ သတ်ခဲ့တဲ့ မိစ္ဆာတွေက တစ်သန်း မရှိရင်တောင် တစ်သိန်းလောက်တော့ ရှိတယ်... ဘယ်လိုလုပ် မှားနိုင်မှာလဲ"

ဒိုဒိုလာက မာနတကြီး ပြောလိုက်လေသည်။ "ဒါက မိစ္ဆာ ဥ အစစ်ပဲ... ပြီးတော့ အဆင့်မြင့် မိစ္ဆာ ဥ ဆိုတာ သေချာတယ်... ငါ လုံးဝ အကြည့်မမှားဘူး"

"မိစ္ဆာ ဥ ဟုတ်လား... အဲဒါကြောင့်ကိုး"

မုန်လဲ့ သဘောပေါက်သွားလေသည်။ "မင်းက ဒီလောက်တောင် စွမ်းနေမှတော့... ဒါက ဘာ မိစ္ဆာ ဥ လဲ ဆိုတာ ပြောပြပါဦး"

"ဒါက... ငါ ကြည့်ရဦးမယ်"

ဒိုဒိုလာက အကဲခတ်လိုက်လေသည်။ "ဒါက ချိတ်ပိတ်ခံထားရတယ် ထင်တယ်... ငါ ခွဲခြားလို့ မရဘူး"

"ဟီးဟီး... မသိဘူး မဟုတ်လား"

မုန်လဲ့က ဂုဏ်ယူစွာ ရယ်မောလိုက်လေသည်။

"မင်းပုံစံ ကြည့်ရတာ မင်း သိနေတဲ့ အတိုင်းပဲ" ဒိုဒိုလာက မျက်လုံး လှန်လိုက်လေသည်။

"ငါ ခန့်မှန်းတာ မမှားဘူးဆိုရင် ဒါက ကျဆင်းနေတဲ့ ကောင်းကင်တမန်ရဲ့ ဥ ပဲ ဖြစ်ရမယ်"

"ဘာ... ကျဆင်းနေတဲ့ ကောင်းကင်တမန် ဟုတ်လား”