အခန်း ၂၅၄

အခန်း ၂၅၄။ အလင်းမိုး ရွာသွန်းခြင်း၊ မုန်လဲ့ အင်ပါယာ

"ရှေးဟောင်းလူသား သွေးမျိုးဆက်... နိုးထမှု ၁ ရာခိုင်နှုန်း မြှင့်တင်ဖို့ကို နတ်ဘုရားသလင်းကျောက် ၁ ဘီလီယံတောင် လိုတယ်... ငါ့ဆီမှာ ရှိတဲ့ ပိုက်ဆံက သွားကြားညှပ်ဖို့တောင် မလောက်ဘူး... ဒါကို ချန်ထားလိုက်"

"ရွှေရောင်မူလ နတ်ဘုရားခန္ဓာကိုယ်... ၁ ရာခိုင်နှုန်းကို နတ်ဘုရားသလင်းကျောက် ၁ သန်း... စျေးနှုန်းက မတန်တဆ များလွန်းတယ်... ဒါကိုလည်း ချန်ထားလိုက်"

"နတ်ဘုရားစွမ်းအား... ဒါကတော့ သုံးလို့ ရတယ်... စနစ်... အရင်ဆုံး နတ်ဘုရားသလင်းကျောက် ၁ သောင်းဖိုး နတ်ဘုရားစွမ်းအား ထည့်ပေး"

ရွှမ်း...

ကြွယ်ဝမှုထဲမှ နိယာမမူလသလင်းကျောက် သန်း ၁၀၀ ချက်ချင်း လျော့ကျသွားပြီး တစ်ချိန်တည်းမှာပင် နတ်ဘုရားစွမ်းအား ပမာဏမှာလည်း နတ်ဘုရားသလင်းကျောက် ၁ သောင်း အထိ ရောက်ရှိသွားလေသည်။

"နိယာမ နားလည်မှု ကတော့ အခု လောလောဆယ် ငွေသုံးပြီး မြှင့်တင်ဖို့ အလျင်မလိုသေးဘူး... နတ်ဘုရားဝိညာဉ် ပိုအားကောင်းလာမှ မြှင့်တင်လည်း နောက်မကျသေးဘူး... အဲဒီအချိန်ကျရင် စျေးနှုန်းက သေချာပေါက် ထပ်ကျလာမှာပဲ"

မုန်လဲ့သည် ဤတစ်ကြိမ် ငွေသုံးစွဲခြင်းကို မြန်မြန်ဆန်ဆန်ပင် အဆုံးသတ်လိုက်သည်။ "စနစ်... အရင်ဆုံး အကြိမ် ၁ သောင်း အကန့်အသတ်မရှိ ကောက်ယူခြင်း လုပ်ပေး"

"..."

"ကောက်ယူခြင်း အောင်မြင်ပါတယ်... နတ်ဘုရားအမြုတေ တစ်ခု ရရှိပါတယ်... ပေါင်းစပ်မလား"

"..."

"ကောက်ယူခြင်း အောင်မြင်ပါတယ်... နိယာမ အပိုင်းအစ တစ်ခု ရရှိပါတယ်... ပေါင်းစပ်မလား"

"..."

နောက်ထပ် ၂ ရက်တာ ကာလအတွင်းတွင် မုန်လဲ့သည် ဘယ်မှ မသွားဘဲ နန်းတော်ထဲတွင်သာ နေကာ အကန့်အသတ်မရှိ ကောက်ယူခြင်းကိုသာ ပြုလုပ်နေခဲ့သည်။ အစအဆုံး စုစုပေါင်း အကြိမ် ၂ သိန်းကျော် ကောက်ယူခဲ့လေသည်။

ကောက်ယူသည့် အကြိမ်အရေအတွက် များလွန်း၍လားတော့ မသိ... မုန်လဲ့၏ ကံက သိပ်မကောင်းလှပေ။ ကောက်ယူရရှိသည့် အရာများမှာ သာမန်မျှသာ ဖြစ်နေသည်။

သို့သော် ကောက်ယူသည့် အကြိမ်အရေအတွက် များလွန်းသဖြင့် ပစ္စည်းကောင်း အချို့ကိုတော့ ရရှိခဲ့သည်။

ပထမဆုံးအနေဖြင့် နတ်ဘုရားအမြုတေ ၂၆ ခု။

အားလုံးက အဆင့်နိမ့်နတ်ဘုရား အမြုတေများ ဖြစ်သော်လည်း အရေအတွက် များပြားသဖြင့် လက်အောက်ငယ်သားများကို ဆုချရန်အတွက် အသုံးဝင်ပေသည်။

ဒုတိယအနေဖြင့် နိယာမ အပိုင်းအစများ။

အများစုမှာ သဘာဝကျစွာပင် နိယာမ အပိုင်းအစ တစ်ခုတည်းသာ ဖြစ်ပြီး ပေါင်းစပ် နိယာမ အပိုင်းအစများမှာ လက်ချိုးရေတွက်၍ပင် ရနိုင်သည်။

နှစ်ခုပေါင်းစပ် နိယာမ အပိုင်းအစ ၁၉ ခု။

သုံးခုပေါင်းစပ် နိယာမ အပိုင်းအစ ၄ ခု။

ဤအရာများက ပုံမှန်သာ ဖြစ်သော်လည်း အလွန်အမင်း အံ့ဩစရာ ကောင်းသည်မှာ လေးခုပေါင်းစပ် နိယာမ အပိုင်းအစ တစ်ခုကို ကောက်ရခဲ့ခြင်းပင် ဖြစ်သည်။

ရေခဲ၊ ရွှေ၊ အမှောင်၊ မီး... နိယာမ လေးမျိုး။

ပေါင်းစပ်မှုမှာ ၀.၁ ရာခိုင်နှုန်းသာ ရှိသော်လည်း ၎င်းသည် မုန်လဲ့အတွက် လေးခုပေါင်းစပ် နိယာမ၏ တံခါးပေါက်ကို ဖွင့်လှစ်ပေးလိုက်ခြင်းပင် ဖြစ်သည်။

ဆိုလိုသည်မှာ ၎င်းကို ၁၀၀ ရာခိုင်နှုန်းအထိ မြှင့်တင်နိုင်မည်ဆိုပါက မုန်လဲ့သည် နိယာမ လေးမျိုး ပေါင်းစပ်ထားသော အဆင့်မြင့်နတ်ဘုရား တစ်ပါးနှင့် ညီမျှသွားမည်ဖြစ်ပြီး နိယာမ ငါးမျိုး ပေါင်းစပ်ထားသော အထွတ်အထိပ် အဆင့်မြင့်နတ်ဘုရား ဖြစ်လာရန်အတွက် တစ်မျိုးတည်းသာ လိုအပ်တော့မည် ဖြစ်သည်။

ဆိုလိုသည်မှာ ၎င်းကို ၁၀၀ ရာခိုင်နှုန်းအထိ မြှင့်တင်လိုက်ရုံဖြင့် မုန်လဲ့သည် နတ်ဘုရားအမြုတေကို ဖွဲ့စည်းကာ နိယာမ လေးမျိုး ပေါင်းစပ်ထားသော အဆင့်မြင့်နတ်ဘုရားအဖြစ် တိုက်ရိုက် ပြောင်းလဲသွားနိုင်ခြင်းပင် ဖြစ်သည်။

ဝမ်းနည်းစရာ ကောင်းသည်မှာ လေးခုပေါင်းစပ် နိယာမကို ငွေသုံးပြီး မြှင့်တင်ရန်မှာ အလွန်စျေးကြီးလွန်းလှသဖြင့် လက်ရှိတွင် မုန်လဲ့မှာ ငွေမတတ်နိုင်သေးပေ။

တတိယအနေဖြင့် စစ်မှန်သော နတ်ဘုရား အလောင်း ၁၁ လောင်း။ ထိုအထဲတွင် နတ်ဘုရားသားရဲ အလောင်း ၆ လောင်းနှင့် စစ်မှန်သော နတ်ဘုရား အလောင်း ၅ လောင်း ပါဝင်သည်။

ဤအလောင်းများ၏ စွမ်းအားများမှာ သာမန်မျှသာ ဖြစ်ပြီး မုန်လဲ့အတွက် သိပ်အသုံးမဝင်လှသော်လည်း ထိုအထဲမှ အလောင်းတစ်ခုက မုန်လဲ့အတွက် အလွန်ထူးဆန်းသော စွမ်းရည်တစ်ခုကို ယူဆောင်လာပေးခဲ့သည်။

အသွင်ပြောင်းခြင်း။

ဟုတ်သည်။ အသွင်ပြောင်းခြင်း။ X-Men ဇာတ်ကားထဲမှ Mystique ကဲ့သို့ ပုံစံအမျိုးမျိုး ပြောင်းလဲနိုင်သော စွမ်းရည်မျိုး ဖြစ်သည်။

တိုက်ခိုက်ရေးစွမ်းရည်ကို ဘာမျှ မြှင့်တင်မပေးနိုင်သော်လည်း အလွန် အသုံးဝင်သော စွမ်းရည်တစ်ခု ဖြစ်သည်။

မုန်လဲ့ အလွန် သဘောကျလေသည်။

နောက်ဆုံးအနေဖြင့် အသုံးမဝင်သော ပစ္စည်းတို ပစ္စည်းမွှားများ ဖြစ်ပြီး မုန်လဲ့က ကြည့်ရန်ပင် ပျင်းနေလေသည်။

ကောက်ယူခြင်းများ ပြီးစီးသွားသောအခါ မုန်လဲ့သည် နန်းတော်ထဲမှ ထွက်လာခဲ့သည်။ နန်းတော်အပြင်ဘက်တွင် စောင့်ဆိုင်းနေသော ဘာဘရူးစ်တို့ ၃ ယောက်က ရိုသေစွာဖြင့် အရိုအသေပေးလိုက်ကြသည်။

"သွားရအောင်... လမ်းထွက်လျှောက်ကြရအောင်"

မုန်လဲ့သည် နတ်ဘုရားတစ်ဝက် ၃ ပါးကို ခေါ်ကာ လမ်းလျှောက် ထွက်လာခဲ့သည်။

"ဧကရာဇ်မင်းမြတ်"

"ဧကရာဇ်မင်းမြတ်"

လမ်းတစ်လျှောက်တွင် တွေ့ရသမျှသော နန်းတွင်းသူများ... မိန်းမစိုးများ သို့မဟုတ် နန်းစောင့်တပ်သားများ အားလုံးက ရိုသေစွာဖြင့် အရိုအသေပေးကြရာ သူတို့၏ မျက်နှာများပေါ်တွင် အလွန် ကြောက်ရွံ့ ရိုသေမှုများ အထင်းသား ပေါ်လွင်နေလေသည်။

"ပူဟာမန် မထွက်လာသေးဘူးလား"

မုန်လဲ့က လမ်းလျှောက်ရင်း မေးလိုက်သည်။

"သခင်... မထွက်လာသေးပါဘူး"

ဘာဘရူးစ်က အသံကျယ်ကျယ်ဖြင့် ပြန်ဖြေလိုက်သည်။ "နတ်ဘုရားအမြုတေ ပေါင်းစပ်ဖို့က အချိန်လိုတယ်လေ... အဲဒီလောက် မမြန်နိုင်ဘူး"

မုန်လဲ့က ဖြည်းညင်းစွာ ခေါင်းညိတ်လိုက်သည်။ နတ်ဘုရားအမြုတေ ပေါင်းစပ်ခြင်းသည် နတ်ဘုရားလက်နက်ကို သွေးစက်ချပြီး အသိအမှတ်ပြုခိုင်းသကဲ့သို့ မလွယ်ကူလှပေ။

နတ်ဘုရားအမြုတေအတွင်းရှိ နိယာမများကို နားလည်သဘောပေါက်ရုံသာမက နတ်ဘုရားစွမ်းအားကိုပါ သန့်စင်ရမည်ဖြစ်ရာ အလွန် ရှုပ်ထွေးလှပေသည်။

"ပူဟာမန် အမတ်ကြီးကို တွေ့ချင်လို့ပါ... အရေးကြီး ကိစ္စလေး တစ်ခု ရှိလို့ပါ"

အရှေ့ဘက်မှ ရုတ်တရက် ဆူညံသံများ ထွက်ပေါ်လာပြီး နန်းစောင့်တပ်သားများက အရာရှိ အချို့ကို တားဆီးထားသည်ကို တွေ့လိုက်ရသည်။

"သွားကြည့်ရအောင်" မုန်လဲ့က အားလုံးကို ခေါ်ကာ သွားကြည့်လိုက်သည်။ "မင်းတို့ ဘာဖြစ်နေကြတာလဲ"

"ဧကရာဇ်မင်းမြတ်ကို ဂါရဝပြုပါတယ်"

နန်းစောင့်တပ်သားများက အလျင်အမြန် ဒူးထောက်လိုက်ကြပြီး အရာရှိများကလည်း ချက်ချင်း ဒူးထောက်ကာ အရိုအသေပေးလိုက်ကြသည်။

"ထကြပါ" မုန်လဲ့က လက်ကာပြလိုက်သည်။ "ဒီမှာ ဘာတွေ အော်ဟစ်နေကြတာလဲ"

"ဧကရာဇ်မင်းမြတ်"

အရာရှိတစ်ဦးက ရွှေရောင် စာရွက်တစ်ရွက်ကို အလျင်အမြန် ထုတ်ယူကာ ကြောက်လန့်တကြားဖြင့် ပြောလိုက်သည်။ "ဧကရာဇ်မင်းမြတ်... ဒီနေ့ မနက်စောစောက မြို့တော် ကောင်းကင်ယံကနေ ရုတ်တရက် အလင်းမိုးတွေ ရွာချလာပါတယ်"

"အဲဒီ အလင်းမိုးတွေက မြေပြင်ပေါ်ကို ကျလာတော့ ရွှေရောင် စာရွက်တွေ ဖြစ်သွားတယ်... အဲဒီစာရွက်တွေပေါ်မှာ ရေးထားတာက... ရေးထားတာက..."

အဲဒီအထိ ရောက်သောအခါ ထိုအရာရှိမှာ စကားမဆက်ရဲတော့ဘဲ တွန့်ဆုတ်သွားလေသည်။

မုန်လဲ့ မျက်ခုံးပင့်လိုက်ပြီး "ဘာတွေ ရေးထားလို့လဲ" ဟု မေးလိုက်သည်။

"ဧကရာဇ်မင်းမြတ်... ကျွန်တော်... ကျွန်တော် မပြောရဲပါဘူး"

အရာရှိမှာ အလွန် ကြောက်လန့်နေလေသည်။

"မပြောရဲဘူးလား"

မုန်လဲ့ ပို၍ပင် နားမလည်ဖြစ်သွားပြီး ရွှေရောင် စာရွက်ကို လှမ်းယူကာ ဖတ်ကြည့်လိုက်သည်။ စာရွက်ပေါ်တွင် ကောင်းကင်ယံတိုက်ကြီး၏ ဘုံသုံးစာလုံးများဖြင့် စာတစ်ပုဒ် ရေးသားထားပြီး အဓိပ္ပာယ်မှာ တစ်ခုတည်းသာ ဖြစ်သည်။

မုန်လဲ့။

နဂါးနတ်ဘုရား အင်ပါယာက ယုံကြည်ကိုးကွယ်နေတဲ့ ကြီးမြတ်တဲ့ နတ်ဘုရားဆိုတာ တကယ်တော့ မိစ္ဆာလောကက မိစ္ဆာကြီး တစ်ကောင် လူဝင်စားလာတာ ဖြစ်တယ်။ သူက ကောင်းကင်ယံတိုက်ကြီးကို သိမ်းပိုက်ပြီး ပြည်သူတွေကို ဒုက္ခပေးဖို့အတွက် နဂါးနတ်ဘုရား အင်ပါယာ ဧကရာဇ်ကို သတ်ဖြတ်... နဂါးမှူးမတ်တွေကို အကုန်သတ်... နဂါးနတ်ဘုရား ယုံကြည်မှုကို တားမြစ်ခဲ့တာ ဖြစ်တယ်...

ရှည်လျားလှသော စာတစ်ပုဒ်တွင် မုန်လဲ့အား ရူးသွပ်သော... ခွင့်လွှတ်၍ မရနိုင်သော... ကလေးငယ်များ၏ ဦးနှောက်ကို အစိမ်းစားကာ နေ့စဉ် လူသားအသားကို စားသောက်နေသည့် မိစ္ဆာကြီး တစ်ကောင်အဖြစ် ဖော်ပြထားလေသည်။

"တကယ်ကို မိုက်ရိုင်းတာပဲ"

ဘာဘရူးစ် ဒေါသထွက်သွားပြီး "ဘယ်ကောင်ကများ သခင့်ကို အပုပ်ချရဲတာလဲ... အဲဒီကောင်ကိုသာ ငါ ရှာတွေ့ရင် အပိုင်းပိုင်း ဆွဲဖြဲပစ်မယ်" ဟု အော်ဟစ်လိုက်သည်။

"မင်း ရှာစရာ မလိုပါဘူး... သူက သူ့ဘာသာသူ ရောက်လာလိမ့်မယ်"

မုန်လဲ့က ပြုံး၍ ခေါင်းခါလိုက်သည်။ "ဒီရွှေရောင် စာရွက်ရဲ့ နောက်ဆုံးမှာ စိန်ခေါ်စာ တစ်စောင် ပါတယ်... သူက နောက်တစ်လ နေရင် နဂါးနတ်ဘုရား အင်ပါယာ မြို့တော်ကို လာပြီး ငါ့လို မိစ္ဆာကြီးကို သတ်ဖြတ်ကာ ပြည်သူတွေအတွက် အန္တရာယ် ရှင်းလင်းပေးမယ်တဲ့"

"သခင်... ဘယ်သူက ဒီလောက်တောင် ရဲတင်းနေတာလဲ" ဘာဘရူးစ်က မျက်လုံးပြူးပြီး "နာမည်ရော ပါလား" ဟု မေးလိုက်သည်။

"ပါတယ်"

မုန်လဲ့က ဖြည်းညင်းစွာ ပြုံးလိုက်ပြီး စာရွက်ကို ဘာဘရူးစ်ထံ ကမ်းပေးလိုက်သည်။

ဘာဘရူးစ်က အလျင်အမြန် ယူကြည့်လိုက်ပြီးနောက် အံ့ဩတကြီးဖြင့် အော်ဟစ်လိုက်သည်။ "ဟာရက်စ်·သီအိုဒို... သူ ဖြစ်နေတာလား... ဒါ ဘယ်လိုလုပ် ဖြစ်နိုင်မှာလဲ"

"ဘာဘရူးစ်... မင်း သူ့ကို သိလို့လား"

မုန်လဲ့ အနည်းငယ် အံ့အားသင့်သွားသည်။

"သေချာပေါက် သိတာပေါ့... ကျွန်တော်က သူ့ရဲ့ ဒဏ္ဍာရီတွေကို နားထောင်ရင်း ကြီးပြင်းလာတာ... ဘယ်လိုလုပ် မသိဘဲ နေမလဲ"

ဘာဘရူးစ်က ခေါင်းညိတ်လိုက်သော်လည်း မျက်နှာပေါ်တွင် အလွန် လေးနက်သော အရိပ်အယောင်များ ပေါ်လွင်နေသည်။ "သခင်... ဟာရက်စ် ဆိုတာ တိုက်တန်အင်ပါယာ သမိုင်းတစ်လျှောက်မှာ အတော်ဆုံး ပါရမီရှင် တစ်ယောက်ပဲ"

"အသက် ၆ နှစ်မှာ စတင် လေ့ကျင့်ပြီး ၁၅ နှစ်မှာ မြင့်မြတ်သော နယ်မြေအဆင့်ကို ရောက်တယ်... ၅၇ နှစ်မှာတော့ နတ်ဘုရားတစ်ဝက် အဆင့်ကို ရောက်ရှိသွားပြီး ကောင်းကင်ယံတိုက်ကြီး သမိုင်းတစ်လျှောက်မှာ အသက်အငယ်ဆုံး နတ်ဘုရားတစ်ဝက် ဖြစ်လာခဲ့တယ်"

"အသက် ၅၇ နှစ်နဲ့ နတ်ဘုရားတစ်ဝက် ဖြစ်လာတာလား"

"တကယ်ကို ထူးခြားတဲ့ ပါရမီရှင်ပဲ"

"ကြောက်စရာကောင်းလိုက်တာ"

နာဂျီယာနှင့် ဆယ်စီယာတို့ တစ်ကိုယ်လုံး တုန်ခါသွားပြီး အလွန်အမင်း အံ့အားသင့်သွားကြသည်။ ၅၇ နှစ်ဆိုသည်မှာ အသက်ကြီးသည်ဟု ထင်ရသော်လည်း သူတို့ကဲ့သို့ နတ်ဘုရားတစ်ဝက်များအတွက်မူ တကယ်ကို ငယ်ရွယ်လွန်းလှပေသည်။

ထိုအသက်အရွယ်တွင် သာမန်လူတစ်ယောက် မြင့်မြတ်သော နယ်မြေအဆင့်သို့ ရောက်ရှိရန်ပင် အလွန် ခက်ခဲလှသည်။ နိယာမ တစ်မျိုးကို အပြည့်အဝ နားလည်သဘောပေါက်ပြီး နတ်ဘုရားတစ်ဝက် ဖြစ်လာရန်ဆိုသည်မှာ သာမန်လူများအတွက် လုံးဝ မဖြစ်နိုင်သော ကိစ္စတစ်ခုပင် ဖြစ်သည်။

"နာဂျီယာ... မင်းတို့က အသက် ဘယ်လောက်မှာ နတ်ဘုရားတစ်ဝက် ဖြစ်ခဲ့တာလဲ" မုန်လဲ့က သိချင်စိတ်ဖြင့် မေးလိုက်သည်။

"သခင်... ကျွန်မက ပါရမီ သိပ်မပါတော့ အသက် ၁၂,၉၅၈ နှစ် ကျမှ နတ်ဘုရားတစ်ဝက် ဖြစ်လာတာပါ" နာဂျီယာ၏ မျက်နှာလေး နီရဲသွားပြီး အနည်းငယ် ရှက်ရွံ့စွာ ဖြေလိုက်သည်။

"ကျွန်မက နာဂျီယာထက် အနှစ် ၄,၀၀၀ စောတယ်... ၈,၉၇၆ နှစ်မှာ နတ်ဘုရားတစ်ဝက် ဖြစ်လာတာ"

ဆယ်စီယာက အနည်းငယ် ဂုဏ်ယူစွာ ပြောလိုက်သည်။

"ဘာဘရူးစ်... မင်းကော"

မုန်လဲ့က ထပ်မေးလိုက်သည်။

"ကျွန်တော်က သူတို့ထက် ပိုစောတယ်... ၃,၂၃၈ နှစ်မှာ နတ်ဘုရားတစ်ဝက် ဖြစ်လာတာ" ဘာဘရူးစ်က နာဂျီယာနှင့် ဆယ်စီယာကို ဂုဏ်ယူစွာ ကြည့်လိုက်သည်။

"မင်းဟာက မရီုးသားဘူး"

နာဂျီယာနှင့် ဆယ်စီယာတို့က ဘာဘရူးစ်ကို ကြည့်ကာ နှာခေါင်းရှုံ့လိုက်ကြသည်။ "မင်းက မိစ္ဆာလောကရဲ့ နိယာမတွေကို နားလည်သဘောပေါက်ပြီး နတ်ဘုရားတစ်ဝက် ဖြစ်လာတာ... သက်သက် လှည့်စားတာပဲ"

"မိစ္ဆာလောကရဲ့ နိယာမတွေကို နားလည်သဘောပေါက်တာ ဘာဖြစ်လို့လဲ... ငါက ကောင်းကင်ယံတိုက်ကြီးမှာ နေတာလေ" ဘာဘရူးစ်က မျက်လုံးပြူးပြီး "ငါက ကောင်းကင်ယံတိုက်ကြီးရဲ့ နတ်ဘုရားတစ်ဝက် မဟုတ်ဘူးလား" ဟု ပြန်မေးလိုက်သည်။

"မင်းက ဘာလို့ ကောင်းကင်ယံတိုက်ကြီးရဲ့ နတ်ဘုရားတစ်ဝက် ဖြစ်ရမှာလဲ... မင်းက မိစ္ဆာလောကရဲ့ နိယာမတွေကို နားလည်သဘောပေါက်တာလို့ ပြောပြီးသားပဲလေ"

အမျိုးသမီး နတ်ဘုရားတစ်ဝက် နှစ်ပါးက လုံးဝ အလျှော့မပေးဘဲ ဆက်ပြောကြသည်။ "မိစ္ဆာလောကရဲ့ နိယာမတွေက ကောင်းကင်ယံတိုက်ကြီးထက် အများကြီး ပိုထင်ရှားတယ်... နတ်ဘုရားတစ်ဝက် ဖြစ်ဖို့လည်း အများကြီး ပိုလွယ်တယ်... မင်းက ကောင်းကင်ယံတိုက်ကြီးရဲ့ အစစ်အမှန် နတ်ဘုရားတစ်ဝက် မဟုတ်ဘူး"

"သတ္တိရှိရင် မင်းတို့လည်း မိစ္ဆာလောကကို အာရုံခံကြည့်လေ" ဘာဘရူးစ်က အေးစက်စက် ပြုံးလိုက်သည်။ "ငါက မိစ္ဆာလောကကို အာရုံခံနိုင်တာ ငါ့ရဲ့ စွမ်းရည်ပဲ"

"တော်ကြတော့... တော်ကြတော့... စကားကို လျှော့ပြောကြပါ"

သူတို့ သုံးယောက် အကြီးအကျယ် ငြင်းခုန်နေကြသည်ကို မြင်သောအခါ မုန်လဲ့က ဝင်ရောက် ဟန့်တားလိုက်သည်။ "ဘာဘရူးစ်... မင်းက ယောကျ်ားကြီး ဖြစ်ပြီး မိန်းမတွေနဲ့ ဘာလို့ လိုက်ငြင်းနေတာလဲ... ဆက်ပြောစမ်းပါ"

"ဟွန့်"

ဘာဘရူးစ်က အမျိုးသမီး နှစ်ယောက်ကို ဒေါသတကြီး ကြည့်လိုက်ပြီးနောက်... "နတ်ဘုရားတစ်ဝက် ဖြစ်လာပြီးတဲ့နောက်မှာ ဟာရက်စ်လည်း ကျွန်တော်တို့လို ပြဿနာမျိုး ကြုံတွေ့ခဲ့ရတယ်... ယုံကြည်သူ မရှိတာပဲ" ဟု ဆက်ပြောသည်။

"သခင်လည်း သိတဲ့အတိုင်းပဲ... နတ်ဘုရားတစ်ဝက် အဆင့်ကို ရောက်သွားရင် ပါရမီ... ကြိုးစားအားထုတ်မှုနဲ့ ကံကြမ္မာတွေက သိပ်အရေးမကြီးတော့ဘူး... သေချာပေါက် ယုံကြည်သူ ရှိမှ ဖြစ်မှာ"

ဘာဘရူးစ်က ခေါင်းခါရင်း "ယုံကြည်သူ မရှိရင် ယုံကြည်မှု စွမ်းအား မရှိဘူး... ယုံကြည်မှု စွမ်းအား မရှိရင် နတ်ဘုရား စွမ်းအားလည်း မရှိဘူး... နတ်ဘုရား ဝိညာဉ်လည်း အားကောင်းလာမှာ မဟုတ်ဘူး"

"ဟုတ်တယ်... ပါရမီ ဘယ်လောက်ပဲ ကောင်းကောင်း အလကားပဲ" မုန်လဲ့က ဖြည်းညင်းစွာ ခေါင်းညိတ်လိုက်သည်။

"ဒါကြောင့် ဟာရက်စ်က လေဟာနယ်ကို ဖောက်ထွင်းပြီး ကောင်းကင်ယံတိုက်ကြီးကနေ ထွက်သွားခဲ့တယ်... ဘယ်ကို ရောက်သွားလဲဆိုတာ ဘယ်သူမှ မသိဘူး... သူ ထာဝရ ထွက်သွားပြီ ဆိုတာလောက်ပဲ သိကြတယ်"

ဘာဘရူးစ် မျက်မှောင်ကြုတ်သွားသည်။ "အဲဒီနောက်ပိုင်း နှစ်ပေါင်း သုံးသောင်းကျော် ကြာတဲ့အထိ သူ့သတင်း ဘာမှ မကြားရတော့ဘူး... သူ ပြန်ပေါ်လာလိမ့်မယ်လို့ လုံးဝ မထင်ထားဘူး"

"နှစ်ပေါင်း သုံးသောင်းလောက် ပျောက်နေတဲ့ လူတစ်ယောက်က ရုတ်တရက် ပြန်ပေါ်လာပြီး ဒီလောက်ကြီးတဲ့ ပြဿနာကို ဖန်တီးတယ်ဆိုတော့... ဟာရက်စ်က သူ ပြန်လာပြီဆိုတာ အားလုံးကို အသိပေးချင်နေတာလား"

မုန်လဲ့က မျက်လုံးမှေးကာ ပြုံး၍ ပြောလိုက်သည်။

"ဒီလောက် ရိုးရှင်းမှာ မဟုတ်ဘူး"

နာဂျီယာက စာရွက်ကို သေချာ ကြည့်ရင်း "ဟာရက်စ် အသုံးပြုသွားတဲ့ နည်းလမ်းတွေက ကျွန်မတို့ မြေအောက်ကမ္ဘာက နတ်ဘုရားတစ်ဝက်တွေ ယုံကြည်မှု လုယူတဲ့အခါ သုံးလေ့ရှိတဲ့ နည်းလမ်းတွေပဲ" ဟု ပြောလိုက်သည်။

"အရင်ဆုံး တစ်ဖက်လူကို အပုပ်ချတယ်... ပြီးတော့ တစ်ဖက်လူရဲ့ ယုံကြည်သူတွေ ရှေ့မှာတင် သူ့ကို သတ်ပစ်တယ်... ဒါက ယုံကြည်သူတွေရဲ့ ယုံကြည်မှုကို ဖျက်ဆီးဖို့ အမြန်ဆုံး နည်းလမ်းပဲ"

"မင်း ဆိုလိုတာက..."

မုန်လဲ့ မျက်ခုံးပင့်လိုက်သည်။

"ဟာရက်စ် ဒီလိုလုပ်တာက ယုံကြည်မှု ဖြန့်ဝေဖို့အတွက် ဖြစ်ရမယ်"

ဆယ်စီယာက ခေါင်းညိတ်ကာ "အရင်ဆုံး သခင့်ကို မိစ္ဆာကြီး အဖြစ် စွပ်စွဲမယ်... ပြီးတော့ လူတွေရှေ့မှာ သခင့်ကို သတ်ပစ်မယ်... အဲဒီလိုလုပ်ရင် အင်ပါယာ ပြည်သူတွေ သခင့်အပေါ် ထားတဲ့ ယုံကြည်မှုတွေ ပျက်စီးသွားပြီး နောက်ဆုံးမှာ သူက သခင့်နေရာကို အစားထိုး ဝင်ယူလိမ့်မယ်" လို့ ရှင်းပြလိုက်တယ်။

"ဒီကောင်ရဲ့ အကြံအစည်က တော်တော် နက်ရှိုင်းတာပဲ"

မုန်လဲ့က ပြုံး၍ ခေါင်းခါလိုက်သည်။ "ဒါပေမဲ့ ငါ့ကို သတ်ချင်ရင်တော့ သူ့မှာ အဲဒီလောက် စွမ်းရည် ရှိမရှိ အရင် ကြည့်ရဦးမယ်... မဟုတ်ရင်တော့ ကိုယ့်သေတွင်း ကိုယ်တူးသလို ဖြစ်သွားလိမ့်မယ်"

"သခင် ပြောတာ မှန်ပါတယ်"

နာဂျီယာက ပြုံးကာ "သခင်သာ သူ့ကို သတ်ပစ်နိုင်ရင် သူ အရင်က ဖြန့်ထားတဲ့ ကောလာဟလတွေ အားလုံးက အလိုလို ပျောက်ကွယ်သွားလိမ့်မယ်... ပြီးတော့ သခင်က ဘယ်တော့မှ အနိုင်မခံ အရှုံးမပေးဘူးဆိုတဲ့ ပုံရိပ်ကို ချန်ထားနိုင်ပြီး ယုံကြည်သူတွေရဲ့ သခင့်အပေါ် ထားတဲ့ ယုံကြည်မှုကို ပိုပြီး နက်ရှိုင်းသွားစေလိမ့်မယ်" ဟု ပြောလိုက်သည်။

"ဒီအတိုင်းပဲ ဖြစ်ရမယ်"

မုန်လဲ့က ဖြည်းညင်းစွာ ခေါင်းညိတ်လိုက်သည်။ "ဒီလိုဆိုမှတော့ သေချာ ပြင်ဆင်ကြတာပေါ့... ဧည့်သည်တွေ အဝေးကြီးကနေ လာတာကို ငါတို့က သေချာ မကြိုဆိုရင် ဘယ်ကောင်းမလဲ"

"သခင့်ရဲ့ ဆိုလိုရင်းက..."

သုံးယောက်လုံးက မုန်လဲ့ကို အလျင်အမြန် ကြည့်လိုက်ကြသည်။

"အမိန့်ပေးလိုက်... နောက်တစ်လ နေရင် ငါ နဂါးနတ်ဘုရား တောင်ထိပ်မှာ ဧကရာဇ်အဖြစ် နန်းတက်မယ်... ဒီအင်ပါယာရဲ့ သခင်သစ် ဖြစ်လာမယ်"

"နိုင်ငံအမည်ကို... မုန်လဲ့ အင်ပါယာ လို့ ပြောင်းမယ်"

"အမိန့်နာခံပါတယ် သခင်”