အခန်း ၂၆၈

အခန်း ၂၆၈။ အမှောင် မိစ္ဆာနဂါး... မှော်အစီအရင် တည်ဆောက်ခြင်း*

"သူ့ကို သတ်ဖို့ နည်းလမ်း ရှိတယ် ဆိုရင်ရော"

နဂါးနတ်ဘုရားက ရုတ်တရက် မေးလိုက်သည်။

"အဲဒီ သူပုန်ကောင်ကို သတ်ဖို့ နည်းလမ်း ရှိတယ်ဆိုရင်... မျှော်လင့်ချက် တစ်စက်လေး ရှိရင်တောင် ဘယ်လို တန်ဖိုးမျိုး ပေးဆပ်ရပါစေ သူ့ကို အပိုင်းပိုင်း ခုတ်ထစ်ပစ်ချင်ပါတယ်"

လေဆင်နှာမောင်း နဂါး၏ မျက်လုံးများထဲတွင် အမုန်းတရားများ ပြည့်နှက်နေလေသည်။

"ဒါဆို အရမ်း ကောင်းတာပေါ့"

နဂါးနတ်ဘုရား အနည်းငယ် ကျေနပ်သွားပြီး သိုးရေစာရွက် တစ်ရွက်ကို ထုတ်ယူကာ "ဒီဟာကို လက်မှတ်ထိုးလိုက်... မင်းမှာ မုန်လဲ့ကို သတ်ပြီး ငါတို့ နဂါးမျိုးနွယ်စုအတွက် လက်စားချေဖို့ နည်းလမ်း ရှိသွားလိမ့်မယ်" ဟု ပြောလိုက်သည်။

"နဂါးနတ်ဘုရား... ဒါက ဘာလဲ"

လေဆင်နှာမောင်း နဂါးက မိစ္ဆာ စာချုပ်ကို ကြည့်လိုက်သည်။ ထိုစာရွက်ပေါ်တွင် မသိသော စာလုံးများ အပြည့် ရေးသားထားပြီး အလွန် ဆိုးယုတ်သော အငွေ့အသက်များကို ခံစားရစေသည်။

"မုန်လဲ့ကို သတ်မယ့် နည်းလမ်းပဲ" နဂါးနတ်ဘုရား၏ အသံက နိမ့်ကျပြီး လေးနက်နေလေသည်။ "တစ်ခုတည်းသော နည်းလမ်းပဲ"

"နဂါးနတ်ဘုရား... ဒါက ဘာပစ္စည်းလဲဆိုတာ ပြောပြလို့ ရမလား" လေဆင်နှာမောင်း နဂါးက တိုးတိုးလေး မေးလိုက်သည်။

"ဒါက မိစ္ဆာ စာချုပ် တစ်ခု... ဒီစာချုပ်ရဲ့ ပိုင်ရှင်က မိစ္ဆာနတ်ဘုရား တစ်ပါးပဲ... ဒီစာချုပ်ကို လက်မှတ်ထိုးလိုက်တာနဲ့ အဲဒီ မိစ္ဆာနတ်ဘုရားရဲ့ စွမ်းအားကို ငှားရမ်း အသုံးပြုနိုင်လိမ့်မယ်"

နဂါးနတ်ဘုရားက အေးစက်စက် ပြောလိုက်သည်။ "အဲဒီ စွမ်းအားရဲ့ ဆယ်ပုံတစ်ပုံ... မဟုတ်ဘူး... ရာခိုင်နှုန်း တစ်ရာမှာ တစ်ရာခိုင်နှုန်းလောက် ငှားသုံးနိုင်ရင်တောင် အဲဒီ သူပုန်ကောင်ကို သတ်ဖို့ လုံလောက်တယ်"

"မိစ္ဆာ စာချုပ်"

လေဆင်နှာမောင်း နဂါး တစ်ကိုယ်လုံး တုန်ခါသွားပြီး ခေါင်းကို ပတ်လည်ရမ်းကာ... "နဂါးနတ်ဘုရား... ကျွန်တော် ကြားဖူးတာတော့ မိစ္ဆာ စာချုပ်ကို လက်မှတ်ထိုးလိုက်ရင် ကိုယ့်ရဲ့ ဝိညာဉ်ကို မိစ္ဆာဆီ ရောင်းစားလိုက်တာနဲ့ အတူတူပဲတဲ့" ဟု ပြောလိုက်သည်။

"အဲဒီအချိန်ကစပြီး အသက်ရှင်ခြင်း သေဆုံးခြင်း... လွတ်လပ်ခွင့်နဲ့ ဂုဏ်သိက္ခာတွေ အားလုံးက မိစ္ဆာရဲ့ လက်ထဲ ရောက်သွားပြီး မိစ္ဆာရဲ့ ကျွန်နဲ့ ရုပ်သေးရုပ် လုံးဝ ဖြစ်သွားကာ သေရတာထက် ပိုဆိုးတဲ့ ဘဝကို ရောက်သွားလိမ့်မယ်တဲ့"

"အဲဒီလို ပြောလို့ ရပါတယ်"

နဂါးနတ်ဘုရားက အေးဆေးစွာ ဖြေလိုက်သည်။

"ဟင့်အင်း... လုံးဝ မဖြစ်ဘူး"

လေဆင်နှာမောင်း နဂါးက အလျင်အမြန် ခေါင်းရမ်းလိုက်ပြီး "ဒီလို ဆိုးယုတ်တဲ့ စာချုပ်မျိုးကို ကျွန်တော် လက်မှတ် မထိုးနိုင်ဘူး... လက်စားချေဖို့အတွက် ကျွန်တော့်ရဲ့ အသက်နဲ့ လွတ်လပ်ခွင့်ကို လုံးဝ အဆုံးရှုံး မခံနိုင်ဘူး" ဟု ပြောလိုက်သည်။

"တစ်ကိုယ်ကောင်းဆန်တဲ့ သတ္တိကြောင်ကောင်"

နဂါးနတ်ဘုရား၏ မျက်လုံးများထဲတွင် ဒေါသမီးများ တောက်လောင်သွားလေသည်။ "ငါတို့ နဂါးမျိုးနွယ်စုရဲ့ နတ်ဘုရားတစ်ဝက် တစ်ပါး အနေနဲ့ မင်းရဲ့ ကိုယ်ပေါ်မှာ နဂါးမျိုးနွယ်စုရဲ့ ရန်ငြိုးတွေနဲ့ နဂါးမျိုးနွယ်စုရဲ့ ဂုဏ်ကျက်သရေကို ပြန်လည်ရယူဖို့ တာဝန်တွေ ရှိနေတာကို... ကိုယ်ကျိုးအတွက်နဲ့ ဒါတွေကို လျစ်လျူရှုထားရက်တယ်ပေါ့"

"နဂါးနတ်ဘုရား... ဒီစာချုပ်ကို လက်မှတ်ထိုးလိုက်တာနဲ့ ကျွန်တော် လုံးဝ ရုပ်သေးရုပ် ဖြစ်သွားတော့မှာ"

လေဆင်နှာမောင်း နဂါးက အလျင်အမြန် ခေါင်းရမ်းကာ "ဒီကိစ္စကို ကျွန်တော် လက်မခံနိုင်ဘူး... တခြားလူကိုပဲ ရှာလိုက်ပါ" ဟု ပြောလိုက်သည်။

နဂါးမျိုးနွယ်စု၏ ရန်ငြိုးက အရေးကြီးသည် မှန်သော်လည်း သူ့အသက်နှင့် နှိုင်းယှဉ်လျှင် ဘာမှ မဟုတ်ပေ။

လေဆင်နှာမောင်း နဂါးက လက်စားချေရန်အတွက် သူ၏ ဝိညာဉ်ကို မိစ္ဆာဆီသို့ မရောင်းစားချင်ပေ... ၎င်းမှာ လုံးဝ မဖြစ်နိုင်ပေ။

လုံးဝ မဖြစ်နိုင်ဘူး။

နဂါးနတ်ဘုရား၏ အမိန့် ဖြစ်နေလျှင်တောင် လုံးဝ လက်မခံနိုင်ပေ။

"အာလော့... မင်းက ငါ့ရဲ့ ဆန္ဒကို ဆန့်ကျင်ချင်တာလား" နဂါးနတ်ဘုရား၏ မျက်နှာမှာ အေးစက်သွားလေသည်။

"နဂါးနတ်ဘုရား... ကျွန်တော်က အရှင့်ရဲ့ ဆန္ဒကို ဆန့်ကျင်ဖို့ ဘယ်ဝံ့ရဲပါ့မလဲ... ဒါပေမဲ့ နတ်ဘုရားတစ်ဝက် တစ်ပါး အနေနဲ့ ကျွန်တော့်မှာလည်း ကိုယ်ပိုင် ဂုဏ်သိက္ခာ ရှိတယ်... အရှင်က ကျွန်တော့်ကို အတင်းအကျပ် ခိုင်းလို့ မရဘူး"

လေဆင်နှာမောင်း နဂါးက ယခင်က ကြောက်ရွံ့နေသည့် ပုံစံမှ အလွန် ခက်ထန်သော ပုံစံသို့ ပြောင်းလဲသွားလေသည်။

နတ်ဘုရားတစ်ဝက် ဆိုသည်မှာ စစ်မှန်သော နတ်ဘုရားနှင့် မိုင်တစ်သိန်းလောက် ကွာခြားနေသည် မှန်သော်လည်း နတ်ဘုရားဆိုသည့် စကားလုံး ပါရှိပေသည်။

နတ်ဘုရားတစ်ဝက် အဆင့်သို့ ရောက်ရှိလာသူတိုင်းသည် မာနကြီးပြီး ဇွဲကောင်းသူများချည်းသာ ဖြစ်ကြသည်။

နဂါးနတ်ဘုရား၏ စကား အနည်းငယ်ကြောင့် သူတို့၏ အသက်ကို စွန့်လွှတ်ကာ ဝိညာဉ်ကို မိစ္ဆာဆီသို့ ရောင်းစားလိမ့်မည်လား။

အိပ်မက်မက်နေတာပဲ။

"မင်းက ငါ့ရဲ့ ဆန္ဒကို ဆန့်ကျင်ရဲတယ်ပေါ့"

နဂါးနတ်ဘုရား ဒေါသထွက်သွားပြီး ကြောက်မက်ဖွယ်ကောင်းသော နတ်ဘုရား အရှိန်အဝါများ ကောင်းကင်သို့ ထိုးတက်သွားကာ လေဆင်နှာမောင်း နဂါး၏ ကိုယ်ပေါ်သို့ အကုန် ဖိချလိုက်လေသည်။

"နဂါးနတ်ဘုရား... ကျွန်တော်က အသက်ရှင်ချင်ရုံ သက်သက်ပါ... ကျွန်တော့်ကို အခက်မတွေ့စေပါနဲ့... ကျွန်တော်တို့ ဒီနေရာကနေပဲ လမ်းခွဲကြရအောင်"

လေဆင်နှာမောင်း နဂါးက အနည်းငယ် ဦးညွှတ်လိုက်ပြီး အလင်းတန်းတစ်ခုအဖြစ် ပြောင်းလဲကာ အဝေးသို့ ထွက်ပြေးရန် ပြင်ဆင်လိုက်လေသည်။

နဂါးနတ်ဘုရားသည် နတ်ဘုရား စွမ်းအား ကိုယ်ပွား တစ်ခုသာ ဖြစ်သော်လည်း နတ်ဘုရားတစ်ဝက် စွမ်းအားကို အပြည့်အဝ အသုံးချနိုင်သေးရာ လေဆင်နှာမောင်း နဂါးက သူ့ကို မယှဉ်ရဲပေ... ထွက်ပြေးတာ အကောင်းဆုံးပင် ဖြစ်သည်။

"တစ်ကိုယ်ကောင်းဆန်တဲ့ အရူးကောင်... မင်း ပြေးလို့ လွတ်မယ် ထင်နေတာလား"

နဂါးနတ်ဘုရားက နှာခေါင်းရှုံ့လိုက်ပြီး စိတ်ထဲမှ တွေးလိုက်ရာ ဝုန်းခနဲ အသံကြီး ထွက်ပေါ်လာပြီး လေဆင်နှာမောင်း နဂါးမှာ ရုတ်တရက် နာကျင်စွာ အော်ဟစ်လိုက်ကာ ဥက္ကာပျံ တစ်ခုအလား မြေပြင်ပေါ်သို့ တည့်တည့် ပြုတ်ကျသွားလေတော့သည်။

နဂါးနတ်ဘုရားက နှာခေါင်းရှုံ့ကာ ပျံသန်းသွားလေသည်။

"ဘာ... ဘာဖြစ်တာလဲ"

လေဆင်နှာမောင်း နဂါး တစ်ကိုယ်လုံး တုန်ခါနေပြီး ခန္ဓာကိုယ် နေရာအနှံ့မှ ပြင်းထန်သော နာကျင်မှုများ ထွက်ပေါ်လာကာ ပုရွက်ဆိတ် ထောင်သောင်းချီက အသားများကို ကိုက်ဖြတ်နေသကဲ့သို့ ခံစားရပြီး အလွန်အမင်း နာကျင်နေလေသည်။

"ဘာဖြစ်တာလဲ"

"ငါ ဘာဖြစ်သွားတာလဲ"

လေဆင်နှာမောင်း နဂါး အလွန်အမင်း ကြောက်လန့်သွားလေသည်။

"တစ်ကိုယ်ကောင်းဆန်တဲ့ သတ္တိကြောင်ကောင်... မင်းက ငါတို့ နဂါးမျိုးနွယ်စုရဲ့ အရှက်ပဲ" နဂါးနတ်ဘုရားက နာကျင်နေသော လေဆင်နှာမောင်း နဂါးကို ကြည့်ကာ... "မင်း သေသွားရင်တောင် နှမြောစရာ မရှိဘူး" ဟု ပြောလိုက်သည်။

"မင်း ငါ့ကို ဘာလုပ်လိုက်တာလဲ"

လေဆင်နှာမောင်း နဂါးက ကြောက်လန့် ဒေါသထွက်စွာဖြင့် မေးလိုက်သည်။

"မင်း ဘယ်လိုလုပ် နတ်ဘုရားတစ်ဝက် အဆင့်ကို ရောက်ခဲ့တယ်ဆိုတာ မှတ်မိသေးလား" နဂါးနတ်ဘုရားက အေးဆေးစွာ မေးလိုက်သည်။

"ရှေးဟောင်း ဧရာမ နဂါးရဲ့ သွေးကို ပေါင်းစပ်ပြီး သွေးမျိုးဆက် သံကြိုးတွေကို ချိုးဖျက်ခဲ့တာလေ..." လေဆင်နှာမောင်း နဂါး ရုတ်တရက် မျက်လုံးပြူးသွားပြီး... "မင်း... မင်းက ရှေးဟောင်း ဧရာမ နဂါးရဲ့ သွေးထဲမှာ တစ်ခုခု လုပ်ထားခဲ့တာလား" ဟု မေးလိုက်သည်။

"မဆိုးဘူး... တော်တော်လေး ဉာဏ်ကောင်းသားပဲ"

နဂါးနတ်ဘုရားက အေးဆေးစွာ ပြောလိုက်သည်။ "ရှေးဟောင်း ဧရာမ နဂါးရဲ့ သွေး ဆိုတာက တကယ်တော့ ငါ့ရဲ့ နတ်ဘုရား သွေးပဲ... သေချာတာကတော့ ငါ အဲဒီထဲမှာ ပစ္စည်းတချို့ ထည့်ထားခဲ့တယ်"

"ဘာဖြစ်လို့ ဒီလို လုပ်ရတာလဲ"

လေဆင်နှာမောင်း နဂါး၏ မျက်နှာမှာ တွန့်လိမ်သွားပြီး "ငါတို့ အားလုံးက နဂါးမျိုးနွယ်စုတွေပဲ... ပြီးတော့ ငါတို့က မင်းရဲ့ ယုံကြည်သူတွေလေ... မင်းက ဘာဖြစ်လို့ ငါတို့ကို ဒုက္ခပေးရတာလဲ" ဟု မေးလိုက်သည်။

"ဘာဖြစ်လို့လဲ ဟုတ်လား... သေချာတာကတော့ မင်းတို့ကို ကာကွယ်ဖို့အတွက်ပေါ့... နဂါးမျိုးနွယ်စုမှာ နဂါးနတ်ဘုရား တစ်ပါးတည်း ရှိရင် လုံလောက်ပြီလေ"

နဂါးနတ်ဘုရားက ဖြည်းညင်းစွာ ခေါင်းခါလိုက်ပြီး "နောက်ထပ် နဂါးနတ်ဘုရား တစ်ပါး ထပ်ထွက်လာပြီး ငါ့ဆီကနေ ယုံကြည်မှုတွေကို လာလုယူမှာကို လက်မခံနိုင်ဘူး" ဟု ပြောလိုက်သည်။

"လူယုတ်မာ... တစ်ကိုယ်ကောင်းဆန်တယ်... အရှက်မရှိဘူး"

လေဆင်နှာမောင်း နဂါး၏ မျက်နှာမှာ ကြောက်မက်ဖွယ်ကောင်းအောင် ပြောင်းလဲသွားပြီး "ဟယ်ရီဘတ်စ်... မင်းက ဘာနဂါးနတ်ဘုရားလဲ... မင်းက နဂါးနတ်ဘုရား ဆိုတဲ့ နာမည်နဲ့တောင် မတန်ဘူး" ဟု ဆဲဆိုလိုက်သည်။

"စကား အရမ်း မများနဲ့"

နဂါးနတ်ဘုရားက နှာခေါင်းရှုံ့လိုက်ပြီး မိစ္ဆာ စာချုပ်ကို ပစ်ချပေးလိုက်သည်။ "မိစ္ဆာ စာချုပ်ကို လက်မှတ်ထိုးလိုက်ရင် အသက်ရှင်ခွင့် ရမယ်... မဟုတ်ရင်... မင်းကို သွေးတွေ ပေါက်ကွဲပြီး ချက်ချင်း သေသွားအောင် လုပ်ပစ်မယ်"

"မင်း... လူယုတ်မာ"

လေဆင်နှာမောင်း နဂါး၏ ရင်ထဲတွင် အမုန်းတရားများ ပြည့်နှက်နေပြီး ဖြစ်နိုင်မည်ဆိုပါက နဂါးနတ်ဘုရားကို အတူတကွ သေဆုံးအောင် လုပ်ပစ်ချင်နေလေသည်။

သို့သော် သူ မရဲပေ... မလုပ်ချင်ပေ... သူ အသက်ရှင်ချင်သေးသည်... သေချင်သေးဘူး။

ထို့အပြင် အတူတကွ သေရင်ရော ဘာဖြစ်လဲ။

အရှေ့မှာ ရှိနေတာက နဂါးနတ်ဘုရားရဲ့ နတ်ဘုရား စွမ်းအား ကိုယ်ပွားလေးပဲ... နဂါးနတ်ဘုရား အစစ် မဟုတ်ဘူး... သူ့ကို သတ်လိုက်ရင်ရော ဘာထူးမှာလဲ။

"နဂါးနတ်ဘုရား... မင်း နိုင်သွားပြီ"

နောက်ဆုံးတွင် ဉာဏ်ကောင်းသော လေဆင်နှာမောင်း နဂါးသည် အရှုံးပေးလိုက်ရပြီး အမုန်းတရားများဖြင့် မိစ္ဆာ စာချုပ်ကို လက်မှတ်ထိုးလိုက်လေတော့သည်။

"ဝုန်း..."

စာချုပ် အသက်ဝင်သွားသည့် အခိုက်အတန့်လေးမှာပင် ကောင်းကင်ယံတွင် ဧရာမ လေဟာနယ် လှိုင်းဝဲကြီး တစ်ခု ထွက်ပေါ်လာပြီး ကြောက်မက်ဖွယ်ကောင်းသော ဆိုးယုတ်သည့် အငွေ့အသက်များ ထိုထဲမှ ထွက်ပေါ်လာလေသည်။

"ဂလု..."

လေဆင်နှာမောင်း နဂါးက တံတွေးများကို မျိုချလိုက်ပြီး သူ၏ မျက်လုံးများထဲတွင် ကြောက်လန့်မှုများ ပြည့်နှက်နေလေသည်။ ဖြစ်နိုင်မည်ဆိုပါက မျက်နှာကို ဖုံးကွယ်ပြီး ချက်ချင်း ထွက်ပြေးချင်နေလေသည်။

သွေးရောင် တောက်ပနေသော အလင်းတန်း နှစ်ခုက လှိုင်းဝဲထဲမှ ထွက်ပေါ်လာပြီး ညဉ့်နက်ထက် ပိုမို မည်းမှောင်ကာ နက်ရှိုင်းလှသော ခေါင်းကြီး တစ်ခု လှိုင်းဝဲထဲမှ တဖြည်းဖြည်း ထွက်ပေါ်လာလေသည်။

"ဝုန်း..."

ကျယ်ပြန့်ပြီး ဆိုးယုတ်လှသော အငွေ့အသက်များက ချက်ချင်း ပြန့်နှံ့သွားရာ လေထုပင် အေးခဲသွားသကဲ့သို့ ဖြစ်သွားပြီး လေဆင်နှာမောင်း နဂါးမှာ တစ်ကိုယ်လုံး တုန်ရီနေကာ အလွန်အမင်း ကြောက်လန့်နေလေသည်။

"ဒါက..."

နဂါးနတ်ဘုရား မျက်လုံးမှေးသွားပြီး အလယ်အလတ် နတ်ဘုရား အဆင့်နှင့် ညီမျှသော ဤမိစ္ဆာနတ်ဘုရား၏ အမည်ကို ချက်ချင်း မှတ်မိသွားလေသည်။

တုတ်ခိုင်လှသော ဆိတ်ဦးချိုများ။

သွေးရောင် တောက်ပနေသော မျက်လုံးများ။

သံမဏိအလား မာကျောသော အကြေးခွံများ။

အေးစက်စက် အလင်းတန်းများ တောက်ပနေသော အစွယ်များ... ကြောက်မက်ဖွယ်ကောင်းပြီး ဖိနှိပ်မှု ရှိသော ဆိုးယုတ်သည့် အငွေ့အသက်များ...

"အမှောင် မိစ္ဆာနဂါး"

နဂါးနတ်ဘုရားက တိုးတိုးလေး ရေရွတ်လိုက်ပြီး သူ၏ မျက်လုံးများထဲတွင် စိုးရိမ်မှုများ ဖြတ်ပြေးသွားလေသည်။ ဤမိစ္ဆာနတ်ဘုရား၏ စွမ်းအားက သူ၏ မူလ ခန္ဓာကိုယ် အစစ်နှင့် လုံးဝ မကွာခြားပေ။

ဟုတ်ပေသည်။ ယခုအချိန်တွင် လေဟာနယ် လှိုင်းဝဲထဲမှ ထွက်ပေါ်လာသော ခေါင်းကြီးမှာ နဂါးခေါင်း တစ်ခုပင် ဖြစ်သည်။

သို့သော် ထိုနဂါးခေါင်းမှာ အလွန် ကြီးမားလှပေသည်။

နဂါးဦးချို တစ်ခုတည်းကပင် ပေတစ်သောင်း ရှည်လျားပြီး မျက်လုံး တစ်စုံက ဘတ်စ်ကားကြီး တစ်စီးထက် ကြီးမားကာ နဂါးအကြေးခွံ တစ်ခုချင်းစီက ဘတ်စကက်ဘော ကွင်း တစ်ကွင်းအလား ဖြစ်နေပြီး အေးစက်စက် အမည်းရောင် အလင်းတန်းများ တောက်ပနေလေသည်။

ဒါကို ကြည့်ရုံဖြင့် ၎င်း၏ ခန္ဓာကိုယ်က မည်မျှ ကြီးမားမည်ကို ခန့်မှန်းနိုင်လေသည်။

"အဝေးကနေ ငါ့ကို နှိုးလိုက်တဲ့ သနားစရာ ကျွန်လေးက မင်းလား"

အမှောင် မိစ္ဆာနဂါးက နှုတ်ခမ်းကို လှုပ်ရှားကာ နိမ့်ကျပြီး လူကို ကြောက်လန့်စေသော အသံကြီးဖြင့် မေးလိုက်လေသည်။

"ဟုတ်... ဟုတ်ပါတယ် ကြီးမြတ်တဲ့ သခင်"

လေဆင်နှာမောင်း နဂါး၏ ခန္ဓာကိုယ်မှာ ဆန်ခါလည်နေသကဲ့သို့ တုန်ရီနေလေသည်။ နတ်ဘုရားတစ်ဝက် တစ်ပါး အနေဖြင့် သူ၏ နဂါးခန္ဓာကိုယ်က ကြီးမားသည်ဟု ဆိုနိုင်ပြီး ပေတစ်ထောင်ခန့် ရှိလေသည်။

သို့သော် အမှောင် မိစ္ဆာနဂါး၏ ခေါင်း တစ်ဆယ်ပုံ တစ်ပုံလောက်တောင် မရှိပေ။ အမှောင် မိစ္ဆာနဂါး၏ ခန္ဓာကိုယ်နှင့် နှိုင်းယှဉ်ရန်ဆိုလျှင် ပို၍ပင် ဝေးကွာလှပေသည်။

နှစ်ခုလုံးက လုံးဝ တစ်တန်းတည်း မဟုတ်ပေ။

"မုန်းစရာကောင်းတဲ့ အငွေ့အသက်ပဲ"

အမှောင် မိစ္ဆာနဂါးက မျက်ခွံကို ပင့်လိုက်ပြီး နဂါးနတ်ဘုရားကို ကြည့်ကာ... "သနားစရာကောင်းပြီး ညစ်ပတ်တဲ့ ပိုးကောင်လေး... ငါ့အနားကနေ ထွက်သွားစမ်း... ဂါး..."

ကြောက်မက်ဖွယ်ကောင်းသော နဂါးဟိန်းဟောက်သံကြီး ထွက်ပေါ်လာပြီး နဂါးနတ်ဘုရား၏ နတ်ဘုရား စွမ်းအား ကိုယ်ပွားမှာ ချက်ချင်း ပေါက်ကွဲသွားကာ ပတ်ဝန်းကျင်ရှိ လေဟာနယ်များပင် အမည်းရောင် တွင်းပေါက်ကြီး တစ်ခုအဖြစ် ပြောင်းလဲသွားလေတော့သည်။

ထိုမြင်ကွင်းကို မြင်လိုက်ရသောအခါ လေဆင်နှာမောင်း နဂါး၏ ရင်ထဲတွင် အနည်းငယ် ကျေနပ်သွားသော်လည်း ခေါင်းကို ပိုမို ငုံ့ချထားလိုက်လေသည်။

နဂါးမျိုးနွယ်စုနှင့် အရင်းအမြစ် တူညီသော်လည်း မိစ္ဆာအဖြစ် ပြောင်းလဲသွားသော အမှောင် မိစ္ဆာနဂါးသည် ဧရာမ နဂါးမျိုးနွယ်စု၏ အဓိက ရန်သူပင် ဖြစ်လေသည်။

နှစ်ဖက်လုံးက ရေနှင့် မီးအလား လုံးဝ မတည့်ကြပေ။

အမှောင် မိစ္ဆာနဂါးက သူ့ကို ကြည့်မရဘဲ တိုက်ရိုက် မျိုချလိုက်မည်ကို လေဆင်နှာမောင်း နဂါး အလွန် ကြောက်လန့်နေလေသည်။ ထိုသို့ဆိုလျှင် သူ သေရတာ အရမ်း နှမြောစရာ ကောင်းပေလိမ့်မည်။

နဂါးနတ်ဘုရား၏ ကိုယ်ပွားကို ဖျက်ဆီးပြီးနောက် အမှောင် မိစ္ဆာနဂါး၏ သွေးရောင် တောက်ပနေသော မျက်လုံးများက လေဆင်နှာမောင်း နဂါးပေါ်သို့ ကျရောက်လာလေသည်။ "သနားစရာ ပိုးကောင်လေး... မင်းက ငါ့ရဲ့ စာချုပ်ကို လက်မှတ်ထိုးခဲ့တာလား"

"ဟုတ်... ကြီးမြတ်တဲ့ သခင်"

လေဆင်နှာမောင်း နဂါး၏ အသံများ တုန်ရီနေလေသည်။

"မင်းဆီက အငွေ့အသက်က အရမ်း မုန်းစရာ ကောင်းတယ်"

အမှောင် မိစ္ဆာနဂါးက အသံနိမ့်ဖြင့် ဟိန်းဟောက်လိုက်ပြီး "ဒါပေမဲ့... မင်းက မိစ္ဆာ စာချုပ်ကို လက်မှတ်ထိုးပြီး ငါ့ကို အဆင့်နိမ့် ရုပ်ဝတ္ထုလောက တစ်ခု အလကား ရအောင် လုပ်ပေးတဲ့အတွက် မင်းကို ငါ မသတ်ဘူး" ဟု ပြောလိုက်သည်။

"ကြီးမြတ်တဲ့ သခင်ရဲ့ ကျေးဇူးတော်ကို ကျေးဇူးတင်ပါတယ်"

လေဆင်နှာမောင်း နဂါးက အလျင်အမြန် ဦးညွှတ်လိုက်ပြီး ချွေးစေးများပင် ထွက်လာလေသည်။ သူ အမှန်တကယ် စိုးရိမ်ခဲ့သည်မှာ အမှောင် မိစ္ဆာနဂါးက သူ့ကို နေရာမှာတင် မျိုချလိုက်မည်ကိုပင် ဖြစ်သည်။

"ဒါပေမဲ့... စာချုပ်ကို လက်မှတ်ထိုးပြီး ငါ့ရဲ့ ကျွန် ဖြစ်လာပြီဆိုမှတော့ ငါ့ရဲ့ အမိန့်ကို လိုက်နာရမယ်... မဟုတ်ရင် မင်းကို အချိန်မရွေး ငါ ဖျက်ဆီးပစ်နိုင်တယ်"

အမှောင် မိစ္ဆာနဂါး၏ အသံမှာ အေးစက်နေလေသည်။

"အရာအားလုံး သခင့်ရဲ့ အမိန့်အတိုင်းပါပဲ"

လေဆင်နှာမောင်း နဂါးက အလျင်အမြန် ပြန်ပြောလိုက်သည်။

"အရမ်း ကောင်းတယ်... တကယ် ကောင်းတယ်"

အမှောင် မိစ္ဆာနဂါး အနည်းငယ် ကျေနပ်သွားပြီး "ပထမဆုံး အမိန့်... မှော်အစီအရင်ကို ချက်ချင်း တည်ဆောက်ပြီး ငါ့ရဲ့ ကျွန်တွေကို ဆင့်ခေါ်... ငါ ဒီလောက တစ်ခုလုံးကို သိမ်းပိုက်မယ်" ဟု အမိန့်ပေးလိုက်သည်။

"ဒီလောကကို သိမ်းပိုက်မယ်" လေဆင်နှာမောင်း နဂါး တစ်ကိုယ်လုံး တုန်ခါသွားပြီး... "ကြီးမြတ်တဲ့ သခင်... အရှင်က..."

"ငါ ရောက်သွားတဲ့ နေရာတိုင်းက ငါ့ရဲ့ နယ်မြေ ဖြစ်ရမယ်"

အမှောင် မိစ္ဆာနဂါး၏ အသံမှာ အေးစက်နေလေသည်။ "ငါ့ရဲ့ မိစ္ဆာ အလင်းတန်းတွေကို လေဟာနယ် တစ်ခုလုံး ပျံ့နှံ့သွားအောင် လုပ်ပြီး လောကကြီး တစ်ခုလုံးကို ငါ့ရဲ့ မိစ္ဆာ အရှိန်အဝါ အောက်မှာ အညံ့ခံအောင် လုပ်မယ်"

"သခင်... အရှင့်ရဲ့ ဆန္ဒကို ကျွန်တော် လိုက်နာပါ့မယ်"

လေဆင်နှာမောင်း နဂါးက အလျင်အမြန် ဦးညွှတ်လိုက်ပြီး "ဒါပေမဲ့ သခင် ဒီလောကကို သိမ်းပိုက်ဖို့အတွက် လူတစ်ယောက်ကို အရင် ရှင်းလင်းရပါမယ်... အဲဒီလူက သခင့်ရဲ့ အစီအစဉ်တွေကို နှောင့်ယှက်ပါလိမ့်မယ်" ဟု ပြောလိုက်သည်။

"ငါ့ရဲ့ တပ်မတော်ကြီး ရောက်လာရင်... ဒီလောကထဲက သက်ရှိတွေ အားလုံးက တပ်မတော်ကြီးရဲ့ အစားအစာတွေ ဖြစ်သွားလိမ့်မယ်"

အမှောင် မိစ္ဆာနဂါးက အမည်းရောင် အကြေးခွံ တစ်ခုကို ပစ်ချပေးလိုက်ပြီး "ဒီအပေါ်က နည်းလမ်းအတိုင်း မှော်အစီအရင်ကို တည်ဆောက်လိုက်... နောက်လဝက် နေရင် မှော်အစီအရင် တည်ဆောက်ပြီးပြီလို့ ငါ မျှော်လင့်တယ်" ဟု ပြောလိုက်သည်။

"ကြီးမြတ်တဲ့ သခင်... ဒါပေမဲ့ အဲဒီလူက..."

လေဆင်နှာမောင်း နဂါးက ဆက်ပြောချင်သော်လည်း အမှောင် မိစ္ဆာနဂါးက လုံးဝ အခွင့်အရေး မပေးဘဲ ခေါင်းကို လေဟာနယ် လှိုင်းဝဲထဲ ပြန်သွင်းကာ ပျောက်ကွယ်သွားလေတော့သည်။

တစ်ခဏအတွင်းမှာပင် ကြောက်မက်ဖွယ်ကောင်းသော ဆိုးယုတ်သည့် မိစ္ဆာ အရှိန်အဝါများ ပျောက်ကွယ်သွားပြီး ကျယ်ပြန့်လှသော မြောက်ပိုင်း ရေခဲပြင်ကြီး အထက်တွင် လေဆင်နှာမောင်း နဂါး တစ်ကောင်တည်းသာ အထီးကျန်စွာ ကျန်ရစ်ခဲ့လေတော့သည်။

"သေနာကောင်... သေနာကောင်... သေနာကောင်"

"သေနာကောင် ဟယ်ရီဘတ်စ်... သေနာကောင် အမှောင် မိစ္ဆာနဂါး... အကုန် သေသင့်တယ်... အကုန် သေသင့်တယ်"

လေဆင်နှာမောင်း နဂါး၏ မျက်နှာမှာ တွန့်လိမ်နေပြီး သွားများကို ကိုက်ထားရာ ကျိုးပဲ့လုမတတ် ဖြစ်နေလေသည်။ သူ အလွန် မုန်းတီးနေလေပြီ…