အခန်း ၂၇၇

အခန်း ၂၇၇။ တစ်ညတွင်းချင်း မွဲပြာကျသွားခြင်းနှင့် နတ်ဘုရား ခန္ဓာကိုယ်ကို ပြန်လည် ပုံဖော်ခြင်း

"ဒီကောင်... ဒီလောက်တောင် မစဥ်းစားမဆင်ခြင် လုပ်ရလား"

အချိန်ကာလ မျှော်စင်ထဲတွင် ဒိိုဒိုလာက မီးပိုးအိမ်ကြီးဖြင့် ဖုံးအုပ်ခံထားရသော မုန်လဲ့ကို ကြည့်ကာ မကျေမနပ် ဆဲဆိုနေလေသည်။ မုန်လဲ့၏ လုပ်ရပ်အပေါ် အလွန် မကျေနပ်ဖြစ်နေပုံရသည်။

"မီးထဲကနေ ပြန်လည် မွေးဖွားတယ် ဆိုတာ အလွန် အန္တရာယ် များတယ်... နည်းနည်းလေး မှားသွားတာနဲ့ ပြာဖြစ်သွားပြီး ဝိညာဉ်ပါ ပျက်စီးသွားမှာပဲ"

"တခြား ငရဲမီးလျှံ ဖီးနစ်တွေကတော့ အရာအားလုံး ပြင်ဆင်ပြီးမှ လုပ်ကြတာကို... သူကတော့ ဒီလို အခြေအနေမျိုးမှာတောင် ပြန်လည် မွေးဖွားဖို့ ကြိုးစားရဲတယ်... သေချင်နေတာလား"

ပါးစပ်မှ ဆဲဆိုနေသော်လည်း ဒိိုဒိုလာ၏ မျက်လုံးများထဲတွင် စိုးရိမ်ပူပန်မှုများကို ဖုံးကွယ်၍ မရပေ။ အမှောင် မိစ္ဆာနဂါးကို သူ ဂရုမစိုက်ပေ။ လက်တစ်ချက်တည်းဖြင့် ရိုက်သတ်နိုင်လေသည်။

သူ စိုးရိမ်နေသည်မှာ မုန်လဲ့ကိုသာ ဖြစ်သည်။

"အလျင်စလို ပြန်လည် မွေးဖွားတာ... အောင်မြင်နိုင်ပါ့မလား"

"ထားလိုက်ပါတော့... ဒီလို အရူးအမူး လုပ်တာ... အောင်မြင်နိုင်ခြေက အရမ်း နည်းလွန်းတယ်... အဆင်မပြေရင် သူ့ကို ကူညီပေးရမှာပဲ... သူ သေလို့ မဖြစ်ဘူး... သေသွားရင် အရှုံးကြီး ရှုံးမှာပဲ"

အောင်မြင်နိုင်ပါ့မလား။

မုန်လဲ့လည်း မသိပေ။

သူ သိသည်မှာ ယခုအချိန်တွင် သူ၏ ခန္ဓာကိုယ်ထဲရှိ နတ်ဘုရား စွမ်းအားများက ကြောက်မက်ဖွယ်ကောင်းသော အမြန်နှုန်းဖြင့် ကုန်ဆုံးနေပြီး တစ်စက္ကန့်လျှင် နတ်ဘုရား စွမ်းအား အစက် တစ်ရာ ကုန်ဆုံးနေခြင်းပင် ဖြစ်သည်။

တစ်စက္ကန့်ကို အစက် တစ်ရာ။

ဒါက ဘယ်လောက်တောင် ကြောက်စရာကောင်းတဲ့ အမြန်နှုန်းလဲ။

နတ်ဘုရားတစ်ဝက် တော်တော်များများက နှစ်ပေါင်း သောင်းချီ စုဆောင်းထားမှ ဒီလောက် နတ်ဘုရား စွမ်းအား ပမာဏလေး ရတာကို စဉ်းစားကြည့်ပါက ယခုအချိန်တွင် မုန်လဲ့၏ စွမ်းအား ကုန်ဆုံးမှုက မည်မျှ ကြောက်စရာကောင်းကြောင်း ခန့်မှန်းနိုင်လေသည်။

သို့သော် မီးထဲမှ ပြန်လည် မွေးဖွားခြင်းဆိုသည်မှာ ဤကဲ့သို့ပင် ဖြစ်သည်။ ဆဲလ် တစ်ခုစီ... အရိုး တစ်ချောင်းစီ... ကြွက်သား တစ်စစီ... ကိုယ်တွင်းအင်္ဂါ တစ်ခုစီကို အကုန်လုံး လောင်ကျွမ်းပစ်ရမည် ဖြစ်သည်။

မုန်လဲ့ တစ်ကိုယ်လုံးကို ပြာအဖြစ် ပြောင်းလဲသွားသည်အထိ လောင်ကျွမ်းပစ်ပြီးနောက် နတ်ဘုရားဝိညာဉ်နှင့် အသန့်စင်ဆုံး သွေးစက်များသာ ကျန်ရှိရမည် ဖြစ်သည်။

ထို့နောက်... ထိုအရာများကို အခြေခံ၍ နတ်ဘုရား ခန္ဓာကိုယ်ကို ပြန်လည် ပုံဖော်ရမည် ဖြစ်သည်။ တစ်ခွန်းတည်း ပြောရလျှင်... ဖျက်ဆီးပြီးမှ ပြန်လည် တည်ဆောက်ခြင်း ဖြစ်သည်။

လုပ်ငန်းစဉ် တစ်ခုလုံးက ကြီးမားလှသော နတ်ဘုရား စွမ်းအားများကို ကုန်ဆုံးစေမည်မှာ သေချာလှသည်။ နတ်ဘုရား ခန္ဓာကိုယ်ကို ဖျက်ဆီးရသည်မှာ ခက်ခဲသလို ပြန်လည် တည်ဆောက်ရန်က ပို၍ပင် ခက်ခဲလေသည်။

ထို့အပြင် ကြီးမားသော နာကျင်မှုများလည်း ပါဝင်နေသည်။ အဘယ်ကြောင့်ဆိုသော် နတ်ဘုရား ခန္ဓာကိုယ်ကို လောင်ကျွမ်းပစ်ရုံသာမက ပြာအဖြစ်ပါ ပြောင်းလဲပစ်ရမည် ဖြစ်ရာ ထိုနာကျင်မှုက မည်မျှ ကြီးမားမည်ကို ခန့်မှန်းကြည့်နိုင်လေသည်။

မုန်လဲ့သည် နာကျင်မှုကို မကြောက်ပေ။ ဒီအခြေအနေအထိ ရောက်လာဖို့ သူ ဘယ်လောက်တောင် နာကျင်မှုတွေနဲ့ ဆင်းရဲဒုက္ခတွေကို ကျော်ဖြတ်ခဲ့ရလဲ သူပဲ သိသည်။ နာကျင်မှုက ကြောက်စရာမလိုဘူး။

မုန်လဲ့သည် နတ်ဘုရား စွမ်းအား ကုန်ဆုံးမှုကိုလည်း မကြောက်ပေ။ သူ့တွင် နိယာမ မူလသလင်းကျောက် သန်း ၈၈၀ ကျော် (၈၈၈၈၈၀၀၀၀) ၏ ကြွယ်ဝမှု ရှိနေသဖြင့် နတ်ဘုရား စွမ်းအား အနည်းငယ် ကုန်ဆုံးမည်ကို ဘာကြောက်စရာ ရှိမည်နည်း။

သို့သော် နောက်ဆက်တွဲ အဖြစ်အပျက်များက မုန်လဲ့ကို သူ၏ နတ်ဘုရား စွမ်းအား ကုန်ဆုံးမှုကို အထင်သေးခဲ့ကြောင်း သက်သေပြနေလေသည်။

နှစ်နာရီခန့်သာ ကြာပြီးနောက် မုန်လဲ့ ကြိုတင် စုဆောင်းထားသော နတ်ဘုရား သလင်းကျောက် တစ်သောင်း၏ စွမ်းအားများမှာ အကုန် ကုန်ဆုံးသွားလေပြီ။

ဘာမှ မတတ်နိုင်သဖြင့် ဆက်လက် လဲလှယ်ရတော့သည်။

"စနစ်... နတ်ဘုရား သလင်းကျောက် တစ်သောင်းစာ နတ်ဘုရား စွမ်းအားတွေ လဲလှယ်လိုက်"

"ရွှမ်း..."

ကြွယ်ဝမှုများ ချက်ချင်းပင် နိယာမ မူလသလင်းကျောက် သန်း ၁၀၀ လျော့ကျသွားပြီး တစ်ချိန်တည်းမှာပင် နတ်ဘုရား သလင်းကျောက် တစ်သောင်းစာ နတ်ဘုရား စွမ်းအားများ ရောက်ရှိလာလေသည်။

ဆက်လက် လောင်ကျွမ်းသည်။

ဆက်လက် ကုန်ဆုံးသည်။

နောက်ထပ် နှစ်နာရီခန့် အကြာတွင် ယခုလေးတင် လဲလှယ်ထားသော နတ်ဘုရား သလင်းကျောက် တစ်သောင်းစာ စွမ်းအားများ ထပ်မံ ကုန်ဆုံးသွားပြန်သည်။

မုန်လဲ့လည်း ဘာမှ မတတ်နိုင်သဖြင့် နိယာမ မူလသလင်းကျောက် သန်း ၁၀၀ ထပ်မံ အသုံးပြုကာ နတ်ဘုရား သလင်းကျောက် တစ်သောင်းစာ စွမ်းအားများကို ထပ်မံ ဖြည့်တင်းလိုက်လေသည်။

လေးနာရီခန့် လောင်ကျွမ်းပြီးနောက် မုန်လဲ့သည် သူ၏ ရုပ်ပိုင်းဆိုင်ရာ ခန္ဓာကိုယ်မှာ အကုန်လုံး လောင်ကျွမ်းသွားပြီး အရိုးများ၊ ကြွက်သားများ... အားလုံး ပြာအဖြစ် ပြောင်းလဲသွားကြောင်း ခံစားလိုက်ရသည်။

လေဟာနယ်တွင် နတ်ဘုရားဝိညာဉ် မီးတောက် တစ်ခုနှင့် သွေးစက် တစ်စုသာ လွင့်မျောနေတော့သည်။

နတ်ဘုရားဝိညာဉ် မီးတောက်မှာ လုံးဝ ရွှေရောင် မီးတောက် ဖြစ်ပြီး ပြင်းထန်သော နတ်ဘုရားဝိညာဉ် စွမ်းအားများ ထွက်ပေါ်နေလေသည်။

သွေးစက်မှာ ရွှေရောင် ဖျော့ဖျော့ အလင်းတန်းများ တောက်ပနေပြီး အားကောင်းလှသော အသက်စွမ်းအင်များ ပြည့်နှက်နေကာ မုန်လဲ့ တစ်ကိုယ်လုံး၏ သွေးကြောများနှင့် အသက်စွမ်းအင်များ စုစည်းထားသော အနှစ်သာရပင် ဖြစ်လေသည်။

"ရုပ်ပိုင်းဆိုင်ရာ ခန္ဓာကိုယ်က အကုန် လောင်ကျွမ်းသွားပြီ... နတ်ဘုရား ခန္ဓာကိုယ်ကို ပြန်လည် ပုံဖော်ရမယ့် အချိန် ရောက်ပြီ"

ရှည်လျားသော သက်ပြင်းချသံနှင့်အတူ နတ်ဘုရား စွမ်းအား တစ်ခုက သွေးစက်ထဲသို့ ဝင်ရောက်သွားရာ သွေးစက်မှာ ရူးသွပ်စွာ ပုံတူပွားခြင်း၊ တိုးပွားလာခြင်းများ စတင် ဖြစ်ပေါ်လာလေသည်။

တစ်ခဏအတွင်းမှာပင် သွေးစက်မှာ လေမှုတ်သွင်းထားသော ပူဖောင်းတစ်ခုအလား လျင်မြန်စွာ ကြီးမားလာပြီး အသက်ရှူကြိမ် အနည်းငယ် အတွင်းမှာပင် သွေးစက်မှာ အဆများစွာ ကြီးမားလာကာ ဘတ်စကက်ဘော တစ်လုံးခန့် အရွယ်အစား ဖြစ်သွားလေသည်။

သွေးစက် ဤမျှ မြန်ဆန်စွာ ကြီးမားလာခြင်းမှာ ကြောက်မက်ဖွယ်ကောင်းသော နတ်ဘုရား စွမ်းအား ကုန်ဆုံးမှုနှင့် ယှဉ်တွဲနေပြီး ကုန်ဆုံးမှု အမြန်နှုန်းမှာ ယခင်ကထက် အဆပေါင်းများစွာ ပိုမို မြန်ဆန်နေကာ တစ်စက္ကန့်လျှင် နတ်ဘုရား စွမ်းအား အစက် ထောင်ချီ ကုန်ဆုံးနေလေသည်။

မူလက နတ်ဘုရား သလင်းကျောက် တစ်သောင်းစာ စွမ်းအားမှာ နှစ်နာရီခန့် ခံနိုင်သော်လည်း ယခုအခါတွင်မူ နာရီဝက်ပင် မခံနိုင်တော့ပေ။ ဤကုန်ဆုံးမှု အမြန်နှုန်းမှာ အလွန် ကြောက်စရာကောင်းလှသဖြင့် မုန်လဲ့မှာ ရင်တထိတ်ထိတ် ဖြစ်နေလေသည်။

"နိယာမ မူလသလင်းကျောက် သန်း ၆၈၀ လောက်ပဲ ကျန်တော့တယ်... ငါ့ရဲ့ နတ်ဘုရား ခန္ဓာကိုယ်ကို ပြန်လည် ပုံဖော်ဖို့ လုံလောက်ပါ့မလား"

မုန်လဲ့ ရင်ထဲတွင် စိုးရိမ်နေလေသည်။ ဖျက်ဆီးရတာက လွယ်ကူပေမယ့် ပြန်လည် တည်ဆောက်ရတာက ခက်ခဲတယ် ဆိုတဲ့ စကားလိုပဲ... နတ်ဘုရား ခန္ဓာကိုယ်ကို လောင်ကျွမ်းဖို့တောင် နတ်ဘုရား သလင်းကျောက် နှစ်သောင်းစာ စွမ်းအားတွေ ကုန်ဆုံးခဲ့တယ် ဆိုတော့ ပြန်လည် တည်ဆောက်ဖို့က ဘယ်လောက်တောင် လိုအပ်မလဲ။

မုန်လဲ့ ရင်ထဲတွင် လုံးဝ သေချာမှု မရှိပေ။ သို့သော် ဤအခြေအနေသို့ ရောက်လာပြီးမှတော့ ရပ်တန့်၍ မရတော့ပေ။ တစ်ဟုန်ထိုး ကြိုးစားပြီး နတ်ဘုရား ခန္ဓာကိုယ်ကို အောင်မြင်စွာ ပြန်လည် ပုံဖော်နိုင်ရန် လိုအပ်ပေသည်။

ဆယ်မိနစ်။

မိနစ်နှစ်ဆယ်။

နာရီဝက်။

"စနစ်... နတ်ဘုရား သလင်းကျောက် သုံးသောင်းစာ နတ်ဘုရား စွမ်းအားတွေ လဲလှယ်လိုက်"

သွေးစက်မှာ ဆက်လက် ကြီးမားလာပြီး လူတစ်ရပ်ခန့်အထိ ကြီးမားလာကာ သွေးကြောများ၊ ကိုယ်တွင်းအင်္ဂါများ၊ အရိုးများ၊ ကြွက်သားများနှင့် ခြင်ဆီများ စသည်တို့ကို စတင် မွေးဖွားလာလေသည်။

ပထမဆုံး သွေးကြောများ။

ထို့နောက် ကိုယ်တွင်းအင်္ဂါများနှင့် အရိုးများ။

နောက်ဆုံးတွင် ကြွက်သားများ၊ ခြင်ဆီများ၊ အရေပြားနှင့် ဆံပင်များ။

အရာအားလုံး အပြည့်အဝ မွေးဖွားပြီးနောက်မှသာ နတ်ဘုရား စွမ်းအား ကုန်ဆုံးမှုမှာ တဖြည်းဖြည်း ရပ်တန့်သွားလေသည်။

ထိုအချိန်တွင် မုန်လဲ့ အံ့ဩတကြီး တွေ့ရှိလိုက်ရသည်မှာ သူ၏ ကြွယ်ဝမှုမှာ နိယာမ မူလသလင်းကျောက် ၈၈၀,၀၀၀ ခန့်သာ ကျန်ရှိတော့ပြီး နတ်ဘုရား စွမ်းအားမှာလည်း နတ်ဘုရား သလင်းကျောက် ၂၀၀ စာသာ ကျန်ရှိတော့ကြောင်း ဖြစ်သည်။

ဆိုလိုသည်မှာ ဤမီးထဲမှ ပြန်လည် မွေးဖွားခြင်း တစ်ခေါက်သည် အစအဆုံး နိယာမ မူလသလင်းကျောက် သန်း ၈၈၀ ကျော် ခန့် ကုန်ဆုံးသွားပြီး အကြွင်းအကျန် အနည်းငယ်သာ ချန်ရစ်ပေးခဲ့ခြင်း ဖြစ်သည်။

ဆိုလိုသည်မှာ သူ တစ်ညတွင်းချင်း မွဲပြာကျသွားပြီး မုန်လဲ့က သူတောင်းစား တစ်ယောက် ပြန်ဖြစ်သွားပြီ ဆိုတဲ့ အဓိပ္ပာယ်ပဲ။

"ဒါပေမဲ့... အောင်မြင်သွားပြီပဲ"

မုန်လဲ့ သက်ပြင်းချလိုက်မိသည်။ တကယ်လို့ ကြွယ်ဝမှုသာ နည်းနည်းလေး ထပ်နည်းနေရင် ဒီမီးထဲက ပြန်လည် မွေးဖွားခြင်းက တကယ်ပဲ အရာအားလုံး အလဟဿ ဖြစ်သွားပြီး ပျက်စီးသွားမှာ သေချာသည်။

အဲဒီလိုသာ ဖြစ်သွားရင် သူ သေချာပေါက် သေရမှာပဲ။

မုန်လဲ့က လက်သီးကို ဆုပ်လိုက်ပြီး လုံးဝ ကွဲပြားခြားနားသော ခန္ဓာကိုယ်နှင့် သွေးကြောများ၏ နက်ရှိုင်းသော နေရာမှ အဆက်မပြတ် ထွက်ပေါ်လာသော ပြင်းထန်သည့် ခွန်အားများကို ခံစားလိုက်ရသည်။

"အရမ်း အစွမ်းထက်တဲ့ ခံစားချက်ပဲ... အရင်ကထက် အများကြီး ပိုအားကောင်းလာတယ်... အခု ငါက အရွယ်ရောက်ခါစ ငရဲမီးလျှံ ဖီးနစ် တစ်ကောင် ဖြစ်လာပြီလို့ ဆိုနိုင်တယ်"

"နတ်ဘုရား ခန္ဓာကိုယ် ပြီးပြီဆိုတော့ အပြင်ထွက်ရမယ့် အချိန် ရောက်ပြီ"

မုန်လဲ့ စိတ်ထဲမှ တွေးလိုက်ရာ 'ဝုန်း' ဆိုသော အသံကြီးနှင့်အတူ သူ့ကို ဖုံးအုပ်ထားသော အမည်းရောင် မီးပိုးအိမ်ကြီးမှာ ချက်ချင်း ပေါက်ကွဲသွားပြီး မုန်လဲ့ ပြန်လည် ထွက်ပေါ်လာလေသည်။

"ထွက်လာပြီ"

ဒိိုဒိုလာ၊ အမှောင် မိစ္ဆာနဂါး စဲလ်လပ်စ်၊ မိစ္ဆာဘုရင် ၄၅ ကောင်နှင့် ဖမ်းဆီးခံထားရသော ဘာဘရူးစ်တို့ အားလုံးက ကြည့်လိုက်ကြသည်။

"ဒီကောင်က တကယ်ပဲ အောင်မြင်သွားတာလား"

ဒိိုဒိုလာ အလွန် အံ့အားသင့်သွားပြီး မျက်လုံးများပင် ပြူးကျယ်သွားလေသည်။ သူက ကူညီပေးရန် အဆင်သင့် ဖြစ်နေသော်လည်း မုန်လဲ့က တကယ်ပဲ အောင်မြင်သွားခဲ့လေသည်။

"သူ ဘယ်လိုများ လုပ်လိုက်တာလဲ"

ဒိိုဒိုလာမှာ ဘဝကိုပင် သံသယဝင်သွားလေသည်။

အမှောင် မိစ္ဆာနဂါးလည်း ထိုနည်းတူပင် သံသယဝင်နေလေသည်။ မုန်လဲ့လိုမျိုး အလျင်စလို မီးထဲမှ ပြန်လည် မွေးဖွားခြင်းမျိုးကို လုပ်ဆောင်ပြီး အောင်မြင်သွားသည်ကို သူ လုံးဝ နားမလည်နိုင်အောင် ဖြစ်နေလေသည်။

လောကကြီးမှာ တရားမျှတမှု မရှိတော့ဘူးလား။

ဘယ်သွားပြီး တိုင်ရမလဲ။

သို့သော် ယခုအချိန်တွင် ဘယ်လောက်ပဲ မကျေနပ်နေပါစေ အကျိုးမရှိတော့ပေ။ အမှောင် မိစ္ဆာနဂါး ကောင်းစွာ သိရှိထားသည်မှာ မုန်လဲ့က မီးထဲမှ ပြန်လည် မွေးဖွားခြင်း အောင်မြင်သွားပြီးနောက် သူ ရင်ဆိုင်ရမည်မှာ ပိုမို အစွမ်းထက်သော မုန်လဲ့ပင် ဖြစ်သည်။

အရင်က မုန်လဲ့၏ ရုပ်ပိုင်းဆိုင်ရာ ခန္ဓာကိုယ်မှာ သာမန် အလယ်အလတ် နတ်ဘုရား တစ်ပါးနှင့် ညီမျှပြီး ယခုအခါ ပိုမို အစွမ်းထက်လာမည်မှာ သေချာလှရာ သူက ပြိုင်ဘက် ဖြစ်နိုင်ပါဦးမည်လား။

ပြီးတော့ သူ၏ နောက်ကွယ်ရှိ အဆင့်မြင့် နတ်ဘုရားကရော။

ဒိိုဒိုလာကို တွေးမိသောအခါ အမှောင် မိစ္ဆာနဂါးမှာ ရူးသွပ်လုနီးပါး ဖြစ်သွားလေသည်။ မုန်လဲ့၏ နောက်ကွယ်တွင် ဤကဲ့သို့ အဆင့်မြင့် နတ်ဘုရား တစ်ပါး ရှိနေရာ သူ ဘယ်လို ဆက်တိုက်ရမည်နည်း။

မုန်လဲ့ကို သတ်လိုက်ပြီးနောက် ဒိိုဒိုလာ၏ သတ်ဖြတ်ခြင်းကို ခံရမည်လား။ ကိုယ့်သဘောနဲ့ကိုယ် အညံ့ခံပြီး မုန်လဲ့၏ အနိုင်ကျင့်ခြင်းကို ခံရမည်လား။

ဘယ်လိုပဲ ရွေးရွေး အဆုံးသတ်ကတော့ အဖြစ်ဆိုးတွေချည်းပဲ။

"စဲလ်လပ်စ်... မင်းကို အကြာကြီး စောင့်ခိုင်းလိုက်ရပြီ"

မုန်လဲ့က လေဟာနယ်တွင် ရပ်နေရင်း အေးဆေးစွာ ပြောလိုက်သည်။

သူ၏ မျက်လုံးများမှာ ကလေးငယ် တစ်ဦး၏ မျက်လုံးများအလား မည်းနက်ပြီး ကြည်လင်နေကာ မျက်လုံးများ၏ နက်ရှိုင်းသော နေရာတွင် သေးငယ်သော မီးတောက်လေး နှစ်ခု တောက်ပနေလေသည်။

"လူသား နတ်ဘုရား"

အမှောင် မိစ္ဆာနဂါးက မုန်လဲ့ကို မျက်တောင်မခတ်ဘဲ စိုက်ကြည့်နေလေသည်။

အပြင်ပန်းကြည့်လျှင် မုန်လဲ့သည် ယခင်ကနှင့် ကြီးမားသော အပြောင်းအလဲ မရှိသော်လည်း အမှောင် မိစ္ဆာနဂါးသည် မမြင်ရသော ဖိအား တစ်ခုကို ခံစားနေရလေသည်။

ဤဖိအားက သူ့ကို ကြောက်ရွံ့မှုနှင့် အသက်ရှူကြပ်မှုများကို ဖြစ်ပေါ်စေပြီး လူသား နတ်ဘုရား တစ်ပါးကို ရင်ဆိုင်နေရခြင်း မဟုတ်ဘဲ ရှေးဟောင်း သားရဲကြီး တစ်ကောင်ကို ရင်ဆိုင်နေရသကဲ့သို့ ခံစားရစေသည်။

"အကြီးမြတ်ဆုံး မိစ္ဆာနတ်ဘုရား အဆင့်ကို မရောက်သေးပေမယ့် သာမန် မိစ္ဆာနတ်ဘုရားတွေထက် အများကြီး သာလွန်နေပြီ"

အမှောင် မိစ္ဆာနဂါး ရင်ထဲတွင် တိတ်တဆိတ် အံ့အားသင့်နေလေသည်။ "ဒီသေနာကောင် လူသား နတ်ဘုရား... တစ်ခါ ပြန်လည် မွေးဖွားပြီးတာနဲ့ ဒီလောက်တောင် အစွမ်းထက်လာတယ်လို့... မယုံနိုင်စရာပဲ"

"စဲလ်လပ်စ်... ငါတို့ရဲ့ တိုက်ပွဲကို ဆက်ကြရအောင်" မုန်လဲ့၏ အကြည့်များက ကြည်လင်နေပြီး မျက်လုံးများထဲတွင် တိုက်ခိုက်လိုစိတ်များ ပြည့်နှက်နေကာ အလွန် စိတ်အားထက်သန်နေလေသည်။

"လူသား နတ်ဘုရား... မင်းရဲ့ လက်အောက်ငယ်သားတွေကို ခေါ်ပြီး မိစ္ဆာနဂါး တိုက်ကြီးကနေ ချက်ချင်း ထွက်သွား... ဘာမှ မဖြစ်ခဲ့ဘူးလို့ ငါ သဘောထားပေးမယ်"

အမှောင် မိစ္ဆာနဂါးက ဟိန်းဟောက်လိုက်သည်။ "အဲဒီအချိန်ကစပြီး ငါတို့ တစ်ယောက်နဲ့ တစ်ယောက် ရန်မရှာကြေး... ဘယ်လိုလဲ"

"အကြံကောင်းပဲ"

မုန်လဲ့က ဖြည်းညင်းစွာ ခေါင်းခါလိုက်သည်။ "မင်းက ငါ့ရဲ့ နယ်မြေကို တပ်မတော် လွှတ်ပြီး ကျူးကျော်ခဲ့တယ်... အခုကျတော့ ငါ့ကို လွယ်လွယ်လေးနဲ့ ပြန်လွှတ်ချင်နေတာ... နည်းနည်းတော့ စိတ်ကူးယဉ်ဆန်လွန်းနေပြီ"

"လူသား နတ်ဘုရား... မင်း ဘာလိုချင်တာလဲ"

အမှောင် မိစ္ဆာနဂါးက တိုးတိုးလေး ဟိန်းဟောက်လိုက်သည်။

"အမှားလုပ်မိရင် အကျိုးဆက်ကို ခံယူရမယ်"

မုန်လဲ့၏ အသံက တဖြည်းဖြည်း အေးစက်လာသည်။ "မင်း ရန်သူကနေ မိတ်ဆွေ ဖြစ်ချင်တယ် ဆိုရင်လည်း ရပါတယ်... မင်းရဲ့ နတ်ဘုရားဝိညာဉ် အရင်းအမြစ်ကို ပေးပြီး ငါ့ကို အညံ့ခံလိုက်... အရာအားလုံး အဆင်ပြေသွားလိမ့်မယ်"

"လူသား နတ်ဘုရား... မင်းက နဂါးကို အနိုင်ကျင့်လွန်းနေပြီ" အမှောင် မိစ္ဆာနဂါး အလွန်အမင်း ဒေါသထွက်သွားလေသည်။