အခန်း ၂၄၈

အခန်း (၂၄၈) ဤကဲ့သို့သော နတ်ဘုရားမျိုး ကမ္ဘာလောက အားလုံး၌ မရှိပါချေ

"ဟင်..."

လီယွဲ့သည် ညင်သာစွာ တုန်ခါနေသော အထပ် (၃၃) ထပ် မျှော်စင် ကို အံ့သြစွာ စိုက်ကြည့်လိုက်၏။

ရှစ်ပါးကန္တာရ လူသားမျိုးနွယ်၏ ရေတွက်၍မရနိုင်သော နှစ်ကာလများစွာ ကိုးကွယ်ဆည်းကပ်မှုသည် အမှန်တကယ် အကျိုးသက်ရောက်မှု ရှိခဲ့ပေသည်။

ဤအချက်က သူ့ကို အလွန် ဝမ်းမြောက်စေခဲ့သည်။

သူသည် လက်တစ်ဖက်ကို ဆန့်ထုတ်လိုက်ပြီး အထပ် (၃၃) ထပ် မျှော်စင် ပေါ်သို့ ရုတ်တရက် ဖိချလိုက်၏။

ချက်ချင်းပင် သူသည် ကန္တာရဆန်ခြင်း၊ ကျယ်ပြောခြင်း၊ ရှေးဟောင်းဆန်ခြင်းနှင့် ခမ်းနားကြီးကျယ်ခြင်း စသည့် ခံစားချက်များကို ခံစားလိုက်ရသည်။

၎င်းသည် အဆုံးမရှိသော ကြယ်ပင်လယ်ကြီး သို့မဟုတ် အကန့်အသတ်မရှိသော စကြာဝဠာကြီးနှင့် တူလှပေ၏။

ဤ အထပ် (၃၃) ထပ် မျှော်စင် ရှေ့တွင် ရပ်ကာ ကမ္ဘာလောကအားလုံးကို လွှမ်းခြုံထားပုံရသော ၎င်း၏အငွေ့အသက်ကို ခံစားရင်း သူသည် အလွန်အမင်း တုန်လှုပ်သွားခဲ့သည်။

ဤစွမ်းအားသည် ကြောက်မက်ဖွယ် ကောင်းလှပေသည်။

အကယ်၍ ၎င်းသာ ပေါက်ကွဲထွက်လာပါက ကမ္ဘာလောကတစ်ခုလုံးသည် မျက်တောင်တစ်ခတ်အတွင်း ပြာအဖြစ်သို့ ပြောင်းလဲသွားနိုင်ဖွယ် ရှိ၏။

"ဒါက လူသားဧကရာဇ် ဒါမှမဟုတ် မဟာဧကရာဇ်ရဲ့ စွမ်းအားလား..."

"နတ်ဘုရားတရားရုံးရဲ့ အမြင့်မြတ်ဆုံး ရတနာက အမြင့်မြတ်ဆုံး ဧကရာဇ်ရဲ့ လက်နက်နဲ့ မဟာဧကရာဇ်ရဲ့ လက်နက်တွေနဲ့ ယှဉ်နိုင်တယ်... ဒါမှမဟုတ် ပိုတောင် အစွမ်းထက်သေးတယ်..."

"ငါက အဲ့ဒီအဆင့်နဲ့ အရမ်း ကွာဝေးနေသေးတာပဲ..."

"ဒါက တကယ်ကို စိတ်ကူးနဲ့တောင် မှန်းဆလို့မရဘူး..."

"ဒီလောက် ကြီးမားတဲ့ စွမ်းအားရှိတဲ့ နတ်ဘုရားတရားရုံးတောင်မှ ကျဆုံးသွားခဲ့တာပဲ..."

"နတ်ဘုရားတွေရဲ့ အဲ့ဒီ ကြောက်မက်ဖွယ် ရန်သူတွေက..."

"ဘယ်လောက်တောင် ကြောက်စရာကောင်းလိုက်မလဲ..."

လီယွဲ့က သူ့ဘာသာ တီးတိုးရေရွတ်လိုက်၏။

အတိတ်တုန်းက။

လူသားဧကရာဇ်အဆင့်ရှိ တည်ရှိမှုများသည် အနိုင်ယူ၍မရနိုင်ဘဲ စစ်မှန်သော အထွတ်အထိပ်တွင် ရပ်တည်ကာ သေတတ်သော လောကကို ငုံ့ကြည့်နေကြသည်ဟုသာ သူ သိခဲ့သည်။

သို့သော် ဤအရာအားလုံးကို ရှေးဟောင်းစာအုပ်များရှိ အချက်အလက် အတိုအထွာများမှသာ ရရှိခဲ့ခြင်း ဖြစ်သည်။

သူသည် လူသားဧကရာဇ်တစ်ဦး၏ စွမ်းအားကို ဤမျှ ရှင်းလင်းစွာ တစ်ခါမှ မခံစားခဲ့ရဖူးချေ။

ယခုမူ ဤ အထပ် (၃၃) ထပ် မျှော်စင် က လူသားဧကရာဇ်တစ်ဦး၏ ပြိုင်ဘက်ကင်းသော စွမ်းအားကို သူ့အား အမှန်တကယ် ခံစားရစေခဲ့သည်။

ဤအချက်က သူ့ကို ပို၍ပင် နားလည်သွားစေခဲ့၏။

နတ်ဘုရားများ၊ လူသားတို့၏ ရန်သူများသည် မည်မျှ ကြောက်မက်ဖွယ် ကောင်းကြောင်းကိုပင်။

"ရှေ့ဆက်ရမယ့် လမ်းက ရှည်လျားပြီး ခက်ခဲကြမ်းတမ်းတယ်..."

"ငါ အမှန်တရားကို နေရာအနှံ့ ရှာဖွေရလိမ့်မယ်..."

"ငါ ဒီကို ရောက်နေတာ နှစ်နှစ်ခွဲတောင် မပြည့်သေးဘူး..."

"ငါ့ကို နောက်ထပ် နှစ်နှစ်ခွဲ အချိန်ပေးရင် ငါ့ရဲ့စွမ်းရည်တွေက သေချာပေါက် နောက်တစ်ကြိမ် ကွဲပြားသွားလိမ့်မယ်..."

"တကယ်လို့ ငါ့မှာ နှစ်နှစ်ခွဲကာလ နောက်ထပ် ဆယ်ခုလောက် ရှိမယ်ဆိုရင် ငါ အထွတ်အထိပ်မှာ တကယ် ရပ်တည်နိုင်ကောင်း ရပ်တည်နိုင်မှာပဲ..."

လီယွဲ့က သူ့ဘာသာ တီးတိုးရေရွတ်လိုက်သည်။

သူ့တွင် ပြင်းထန်သော မိမိကိုယ်ကို ယုံကြည်မှု ရှိပေ၏။

မည်သို့ပင်ဆိုစေ သူသည် ယခုအခါ ဤနတ်ဘုရားခေတ်၏ ပထမဆုံး နတ်ဘုရားထက်ပင် ပို၍ အစွမ်းထက်နေပြီ ဖြစ်သည်။

ဒုတိယနေရာရှိ နံပါတ်တစ် နတ်ဘုရားထက် အများကြီး သာလွန်နေဆဲပင် ဖြစ်၏။

ဝုန်း -

အချိန်ကြာလာသည်နှင့်အမျှ ရှစ်ပါးကန္တာရ လူသားမျိုးနွယ်၏ အသံများသည် ပို၍ ပို၍ ကျယ်လောင်လာခဲ့သည်။

ခမ်းနားကြီးကျယ်ပြီး ဘုန်းအာနုဘော်ရှိသော အထပ် (၃၃) ထပ် မျှော်စင်သည် သိသိသာသာ ပို၍ တုန်ခါလာပြီး ရွှမ်ဟွမ်အလင်းတန်းများကို ထုတ်လွှတ်လာခဲ့သည်။

ဝှစ် -

လီယွဲ့၏ အမြင်အာရုံများ ဝေဝါးသွားပြီး လဟာပြင်တစ်ခုတွင် ရုတ်တရက် ရောက်ရှိနေကြောင်း တွေ့လိုက်ရ၏။

ဤသည်ကား သူကဲ့သို့ အစွမ်းထက်သောသူပင်လျှင် မိုင်တစ်ရာခန့်သာ မြင်နိုင်ပြီး ထိုအလွန်တွင် အရာအားလုံး မှောင်မည်းနေသော နေရာတစ်ခုပင် ဖြစ်သည်။

"ဒါက..."

"အထပ် (၃၃) ထပ် မျှော်စင်ရဲ့ အတွင်းပိုင်းလား..."

"ငါ အထဲ ဝင်လာတာလား..."

"မဟုတ်သေးဘူး..."

"ငါ့ရဲ့ နတ်ဘုရားခန္ဓာကိုယ်က အပြင်မှာ ရှိနေသေးတာ ရှင်းနေတာပဲ..."

"ဒါပေမဲ့ ငါ့ရဲ့ လက်ရှိ အခြေအနေက..."

"နတ်ဘုရားခန္ဓာကိုယ် ပိုင်ဆိုင်ထားတဲ့ အချိန်နဲ့ လုံးဝကို အတူတူပဲ..."

"ငါ ယူလာတဲ့ ကောင်းကင်အရှင်သခင်အိုးကြီး တောင်မှ လုံးဝကို အတူတူပဲ..."

လီယွဲ့ အနည်းငယ် အံ့အားသင့်သွားသော်လည်း လျင်မြန်စွာပင် ပြန်လည် တည်ငြိမ်သွားခဲ့သည်။

ဝှစ် -

တောက်ပသော အဝါရောင် အလင်းတန်းတစ်ခုသည် အရပ်မျက်နှာ အသီးသီးမှ စုစည်းလာပြီး ရုတ်တရက် သူ့ရှေ့တွင် အဝါရောင် ဂါဝန်ရှည်ကို ဝတ်ဆင်ထားကာ ကျက်သရေရှိလှသော အမျိုးသမီးတစ်ဦးအဖြစ် ပေါ်လာ၏။ သူမ၏ ဆံပင်မည်းများကို ဆံထုံး ထုံးထားပြီး သပ်ရပ်လှပမှုကို ထုတ်ဖော်ပြသနေသည်။

ထိုအမျိုးသမီးသည် အလွန် လှပလွန်းသဖြင့် လောကရှိ တောက်ပမှု အားလုံးသည် သူမအပေါ်တွင် စုစည်းနေသည့်အလား ထင်မှတ်ရပေ၏။

ထိုအလှတရားသည် ဤကမ္ဘာလောကနှင့် မသက်ဆိုင်ချေ။ အကယ်၍ ကောင်းကင်ဘုံတွင် နတ်သမီးများ အမှန်တကယ် ရှိခဲ့လျှင်ပင် သူမလောက် လှပနိုင်မည် မဟုတ်ပေ။

"ကျွန်မ နာမည်က ရှီး ပါ..."

"အထပ် (၃၃) ထပ် မျှော်စင် ပထမအလွှာရဲ့ ဝိညာဉ်ပါ..."

"ရှင့်အနေနဲ့ ရှစ်ပါးကန္တာရ လူသားမျိုးနွယ်ရဲ့ ယုံကြည်မှုကို ရရှိထားပြီး ရှစ်ပါးကန္တာရ ကောင်းကင်မျှော်စင်ရဲ့ အရှင်သခင် ဖြစ်တဲ့အတွက် စမ်းသပ်ခံဖို့ အခွင့်အရေး ရရှိထားပါတယ်..."

"တကယ်လို့ ရှင် စမ်းသပ်မှုကို အောင်မြင်ရင် အထပ် (၃၃) ထပ် မျှော်စင် ကို ယူဆောင်သွားနိုင်ပါတယ်..."

ကျက်သရေရှိလှသော အမျိုးသမီးက ညင်သာစွာ ပြောဆိုလိုက်သည်။

သူမ၏အသံသည် အလွန် ထူးခြားပြီး သာမန်လူ မည်သူ့ကိုမဆို သူမရှေ့တွင် ဒူးထောက်သွားစေလောက်မည့် အလွန် သိမ်မွေ့ကာ တော်ဝင်ဆန်သော အရည်အသွေးတစ်ခု ပိုင်ဆိုင်ထား၏။

"ပထမကောင်းကင်ဘုံရဲ့ ဝိညာဉ်..."

"စမ်းသပ်မှု..."

လီယွဲ့၏ မျက်လုံးများ တောက်ပသွားသည်။

ဤကဲ့သို့သော နတ်ဘုရားရတနာမျိုးသည် ၎င်း၏အရှင်သခင်ကို ရွေးချယ်ခြင်းမှာ လုံးလုံးလျားလျား သဘာဝကျပေ၏။

"ဘယ်လို စမ်းသပ်မှာလဲ..."

သူက သိချင်စိတ်ဖြင့် မေးမြန်းလိုက်သည်။

သူ့ရှေ့ရှိ အမျိုးသမီးသည် အလွန် လှပလွန်းလှသော်လည်း သူသည် သူမကို အကြိမ်အနည်းငယ်သာ ကြည့်ပြီးနောက် သူမပြောနေသည့် စမ်းသပ်မှုအပေါ်သို့သာ အာရုံစိုက်လိုက်၏။

မည်သို့ပင်ဆိုစေ ဤနတ်ဘုရားရတနာကို ရရှိသရွေ့။

သူသည် ဤပထမအလွှာ ဝိညာဉ်ကို သူ ကြည့်ချင်သလို ကြည့်နိုင်ပေမည်။

"ရှင်က သတ္ထမအဆင့် နတ်ဘုရားတစ်ပါးပဲ..."

"စမ်းသပ်မှု တစ်ခုစီကို အောင်မြင်ဖို့အတွက် သတ္တမအဆင့် နတ်ဘုရားတစ်ပါးရဲ့ စွမ်းအားထက် သာလွန်တဲ့ တိုက်ခိုက်ရေးစွမ်းအားကို ပိုင်ဆိုင်ဖို့ လိုအပ်တယ်..."

"စမ်းသပ်မှုတွေကို ပိုအောင်မြင်လေ အထပ် (၃၃) ထပ် မျှော်စင် ကို ယူဆောင်သွားနိုင်ဖို့ အခွင့်အလမ်း ပိုကောင်းလေပဲ..."

"တကယ်လို့ ရှင်က စမ်းသပ်မှုအားလုံးကို အောင်မြင်ပြီး လူငယ် လူသားဧကရာဇ်ရဲ့ အောင်မြင်မှုတွေထက် သာလွန်နိုင်မယ်ဆိုရင် အထပ် (၃၃) ထပ် မျှော်စင် က ရှင့်ကို သူ့ရဲ့ အရှင်သခင်အဖြစ် အမှန်တကယ် အသိအမှတ်ပြုကောင်း ပြုလိမ့်မယ်..."

ကျက်သရေရှိလှသော အမျိုးသမီး၏အသံသည် ညင်သာနေဆဲပင် ဖြစ်၏။

သူမ၏ မျက်လုံးများသည် ရေကဲ့သို့ နူးညံ့စွာဖြင့် လီယွဲ့အား တိတ်ဆိတ်စွာ စိုက်ကြည့်နေသည်။

"ပိုမြင့်တဲ့ အဆင့်က ပြိုင်ဘက်တွေကို တိုက်ခိုက်နိုင်တဲ့ စွမ်းရည်လား..."

"လူငယ် လူသားဧကရာဇ်ရဲ့ အောင်မြင်မှုတွေထက် အများကြီး သာလွန်တဲ့ အောင်မြင်မှုတွေ..."

လီယွဲ့ ချက်ချင်းပင် စိတ်သက်သာရာ ရသွားပေ၏။

အစပိုင်းတွင် ရှစ်ပါးကန္တာရ ကောင်းကင်မျှော်စင် ပေါ်၌ လူငယ် လူသားဧကရာဇ်များ တိုက်ခိုက်ခဲ့သညိ။

လူငယ် လူသားဧကရာဇ် တစ်ဦးသည် အသက် (၁၃) နှစ်အရွယ်တွင် အဆင့် (၇) အဆင့်နိမ့် ကျင့်ကြံမှုအဆင့်ကို ပိုင်ဆိုင်ထားပြီး အဆင့် (၈) အဆင့်နိမ့် တိုက်ခိုက်ရေးစွမ်းအားကို ထုတ်လွှတ်နိုင်ခဲ့၏။

နောက်တစ်ဦးမှာ အသက် (၁၃) နှစ်အရွယ်တွင် အဆင့် (၇) အလယ်အလတ် ကျင့်ကြံမှုကို ပိုင်ဆိုင်ထားပြီး အဆင့် (၈) အထက်တန်း တိုက်ခိုက်ရေးစွမ်းအားနှင့် နီးစပ်သော စွမ်းအားကို ထုတ်လွှတ်နိုင်ခဲ့သည်။

ပြီးတော့ ဤသည်မှာ အမှန်တကယ်တွင် ကောင်းကင်နှင့်မြေကြီးက သူတို့၏ လူငယ်ဘဝတွင် ချန်ထားခဲ့သော အမှတ်အသားတစ်ခုမျှသာ ဖြစ်သည်။

စစ်မှန်သော သူတို့သည် ဤထက်ပင် ပို၍ အစွမ်းထက်သင့်ပေ၏။

သို့သော် မည်မျှပင် အစွမ်းထက်စေကာမူ ပိုမြင့်သော အဆင့်ရှိ ပြိုင်ဘက်များကို တိုက်ခိုက်နိုင်သည့် သူ၏စွမ်းရည်က သူတို့ထက် ပို၍ သာလွန်နေဆဲပင် ဖြစ်သည်။

နောက်ဆုံးတစ်ဦးပင်လျှင် သူနှင့် ယှဉ်လျှင် အများကြီး နိမ့်ကျနေဆဲ ဖြစ်၏။

အကယ်၍ အခြားအရာတစ်ခုခုကို စမ်းသပ်မည်ဆိုပါက သူ ဤမျှ ယုံကြည်မှု ရှိမည် မဟုတ်ချေ။

သို့သော် ပိုမြင့်သော အဆင့်ရှိ ပြိုင်ဘက်များကို တိုက်ခိုက်နိုင်သည့် စွမ်းရည်ကို စမ်းသပ်မည်လား။

သမိုင်းတစ်လျှောက်ရှိ လူသားဧကရာဇ် အားလုံးသည် သူ့အတွက် ပြိုင်ဘက် မဟုတ်ကြချေ။

"စမ်းသပ်ချင်လို့လား..."

ကျက်သရေရှိသော အမျိုးသမီးက မေးမြန်းလိုက်သည်။

"သဘာဝကျကျပဲလေ..."

လီယွဲ့က ခေါင်းညိတ်လိုက်၏။

ဤနတ်ဘုရားရတနာကို ရရှိရန် မျှော်လင့်ချက် အလွန်နည်းပါးသည်ဟု သူ မူလက ထင်ခဲ့သည်။

နောက်ပိုင်းတွင် ရှစ်ပါးကန္တာရ လူသားမျိုးနွယ်၏ အကူအညီဖြင့်ပင် သူသည် မျှော်လင့်ချက် အနည်းငယ်မျှသာ ရှိသည်ဟု ခံစားခဲ့ရ၏။

နတ်ဘုရားတရားရုံး၏ နတ်ဘုရားရတနာများသည် အလွန် အစွမ်းထက်လွန်းပြီး အဆင့်အတန်း မြင့်မားလွန်းလှသည်။

သို့သော် ယခု ကြည့်ရသည်မှာ သူသည် ဤနတ်ဘုရားရတနာ အထပ် (၃၃) ထပ် မျှော်စင် ကို အမှန်တကယ် ပြန်လည် ယူဆောင်သွားနိုင်ပေမည်။

ဝှစ် -

ကျက်သရေရှိသော အမျိုးသမီးသည် သူမ၏လက်ကို ညင်သာစွာ ဝှေ့ယမ်းလိုက်၏။

ချက်ချင်းပင် အဆင့် (၁၀) အဆင့်နိမ့် ရေခဲနဂါးတစ်ကောင် ပေါ်လာပြီး ၎င်း၏ အေးစက်သော မျက်လုံးများက လီယွဲ့အား စိုက်ကြည့်နေသည်။

ဟိန်းဟောက်သံနှင့်အတူ ပေငါးရာကျော် ရှည်လျားသော ရေခဲနဂါးကြီးသည် လီယွဲ့ဆီသို့ ချက်ချင်းပင် ထိုးဆင်းလာ၏။

"အဆင့် (၁၀) အဆင့်နိမ့်..."

လီယွဲ့သည် တည်ငြိမ်နေဆဲပင် ဖြစ်သည်။

သူသည် သူ၏ မျက်ခုံးနှစ်ခုကြားရှိ တတိယမျက်လုံးကို ဖွင့်လိုက်ရာ ၎င်းမှ အလင်းတန်းတစ်ခု ပစ်ထွက်လာပြီး ထိုးဆင်းလာသော ရေခဲနဂါးကို ချက်ချင်းပင် ချေမှုန်းပစ်လိုက်၏။

အဆင့် (၁၀) အဆင့်နိမ့်သည် သူ့အတွက် ဘာမှ မဟုတ်ချေ။

"ဟင်..."

ကျက်သရေရှိသော အမျိုးသမီးသည် အံ့အားသင့်စွာ ရေရွတ်လိုက်သည်။

"ရှင်က စစ်မှန်သော နတ်ဘုရား၏ ကောင်းကင်မျက်လုံး ကို အမြဲတမ်း တပ်ဆင်ထားတာပဲ..."

"ထူးခြားတဲ့ စွမ်းအားပဲ..."

ထို့နောက် သူမသည် သူမ၏လက်ကို ထပ်မံ ဝှေ့ယမ်းလိုက်ပြီး အဆင့် (၁၀) အလယ်အလတ်အဆင့် နတ်ဆိုးတစ်ကောင်ကို လွှတ်ပေးလိုက်၏။

သို့သော် ၎င်းသည်လည်း လီယွဲ့၏ မျက်ခုံးနှစ်ခုကြားရှိ နတ်ဘုရားမျက်လုံးကြောင့် ချေမှုန်းခံလိုက်ရပြန်သည်။

ထို့နောက် ချက်ချင်းပင် ၎င်းသည် အဆင့် (၁၀) အထက်တန်းအဆင့်၊ အဆင့် (၁၀) အထွတ်အထိပ် ဖြစ်လာ၏။

သို့သော် မည်သူမျှ စစ်မှန်သော နတ်ဘုရား၏ ကောင်းကင်မျက်လုံး ကို မတားဆီးနိုင်ခဲ့ချေ။

"နောက်တစ်ခုက ပဉ္စမမြောက် စမ်းသပ်မှုပဲ..."

"ရှင့်ရဲ့ နတ်ဘုရားမျက်လုံး က အဆင့် (၁၁) အလယ်အလတ်အဆင့် နတ်ဘုရားမျက်လုံးတစ်ခုရဲ့ စွမ်းအားကို ပိုင်ဆိုင်ထားပေမဲ့ ဒီစမ်းသပ်မှုကို အောင်မြင်ဖို့တော့ မလုံလောက်ဘူး..."

"ပြီးတော့ ပဉ္စမမြောက် စမ်းသပ်မှု ပြီးရင် နောက်ထပ် စမ်းသပ်မှု လေးခု ရှိသေးတယ်..."

"ရှင် အောင်မြင်နိုင်မယ်လို့ ထင်လား..."

ကျက်သရေရှိသော အမျိုးသမီးက ပြောဆိုလိုက်၏။

သူမ အလွန် နှမြောမိသည်။

ဤနတ်ဘုရားသည် သူမကို အံ့အားသင့်စေရန် လုံလောက်နေပြီ ဖြစ်၏။

စစ်မှန်သော နတ်ဘုရားမျက်လုံး ၊ သတ္တမအဆင့် နတ်ဘုရားတစ်ပါးသည် အဆင့် (၁၁) အလယ်အလတ်အဆင့် နတ်ဘုရားတစ်ပါး၏ စွမ်းအားကို ပိုင်ဆိုင်ထားသည်။

မိမိအဆင့်ထက် ကျော်လွန်၍ တိုက်ခိုက်နိုင်စွမ်းသည် လူငယ် လူသားဧကရာဇ်ထက်ပင် ပို၍ အစွမ်းထက်နေပြီ ဖြစ်၏။

သို့သော် အထပ် (၃၃) ထပ် မျှော်စင် သည် အလွန် ထူးခြားလှပေသည်။

အမှန်တကယ် ကျော်လွန်နိုင်သော နတ်ဘုရားတစ်ပါးသာလျှင် အသိအမှတ်ပြုမှုကို ရရှိနိုင်မည် ဖြစ်သည်။

တကယ် နှမြောစရာကောင်းလိုက်တာ…

သူမ ခံစားမိသည်မှာ...

နှစ်ပေါင်း မရေမတွက်နိုင်အောင် ကြာသွားလျှင်ပင် မည်သည့် နတ်ဘုရားကမျှ ဤစမ်းသပ်မှုကို အောင်မြင်နိုင်လိမ့်မည် မဟုတ်ချေ။

စမ်းသပ်မှု (၉) ခုကို အောင်မြင်ရမည် ဖြစ်သည်။

၎င်းသည် အဆင့်ငယ် (၁၀) ခုနှင့် အဆင့်ကြီး (၃) ခုကို ကျော်လွန်သော တိုက်ခိုက်ရေးစွမ်းအား လိုအပ်ပေ၏။

ဤကဲ့သို့သော နတ်ဘုရားမျိုး ကမ္ဘာလောက အားလုံး၌ မရှိပါချေ။

ရှေးခေတ်မှ ယနေ့တိုင်အောင် ဤကဲ့သို့သော နတ်ဘုရားမျိုး တစ်ခါမျှ မပေါ်ပေါက်ခဲ့ဖူးချေ။