အခန်း ၂၆၀၃
Vol. 261 Ch. 2603
အခန်း (၂၆၀၃) - မျိုးဆက်တစ်ခုမှတစ်ခုသို့ လက်ဆင့်ကမ်းခြင်း
“မင်းတို့ ခန့်မှန်းတာလည်း မမှားဘူး၊ ငါတို့ ခုနစ်ပါးသတ်ဖြတ်ခြင်း သူတော်စင်မြေထဲကို ဝင်ချင်ရင်... တစ်မိသားစုလုံး သေဆုံးသွားရခြင်းက ပထမဆုံး လိုအပ်တဲ့ အကြိုအခြေအနေပဲ။”
“ကလဲ့စားချေချင်တယ်ဆိုရင်တော့... ခုနစ်ပါးသတ်ဖြတ်ခြင်း သူတော်စင်မြေထဲမှာ ကောင်းကောင်းမွန်မွန် ကျင့်ကြံကြပေါ့။”
“ငါကတော့ မင်းတို့ကို အချိန်မရွေး ကြိုဆိုစောင့်ဆိုင်းနေမှာပါ။”
ဂုယဲ့က စကားဆုံးသည်နှင့်တစ်ပြိုင်နက်... ပါးစပ်ကို ဖြဲလျက် ပြုံးရင်း ခုနစ်ပါးသတ်ဖြတ်ခြင်း သူတော်စင်မြေထဲသို့ ဝင်ရောက်သွားခဲ့ပြီး၊ လူတိုင်း၏ မျက်စိရှေ့မှောက်ကနေ ပျောက်ကွယ်သွားခဲ့တော့သည်။
ထျန်ခန်းကမူ သူ၏ နောက်ကျောပုံရိပ်ကို ကြည့်ရင်း... ကြောင်အမ်းအမ်း ဖြစ်နေခဲ့ရသည်။
လူတစ်ဦးက မအောင့်အီးနိုင်တော့ဘဲ ဒေါသတကြီးဖြင့် အော်ဟစ်လိုက်သည်။
“မင်းတို့ ခုနစ်ပါးသတ်ဖြတ်ခြင်း သူတော်စင်မြေက... လူရူးတွေလား ငါ့ရဲ့ မိသားစုတစ်ခုလုံးကို သတ်ပစ်ခဲ့ပြီးတော့မှ... ငါ့ကို ဒီနေရာမှာ ကျင့်ကြံခိုင်းရတယ်လို့လား ”
ရုပ်ရည်ရူပကာ အလွန်လှပလှသည့် အမျိုးသမီး၏ မျက်နှာအမူအရာက အေးစက်တည်တင်းနေခဲ့သည်။
“ဒါဆိုရင်... မင်းက ဒီနေရာမှာ ကျင့်ကြံမလား၊ မကျင့်ကြံဘူးလား။”
တစ်ဖက်လူက စက္ကန့်ပိုင်းခန့် တွေးတောလိုက်ပြီးနောက်... ခေါင်းကို ပြတ်ပြတ်သားသား ညိတ်လိုက်ရင်း -
“ကျင့်ကြံမယ်၊ ငါ ကလဲ့စားချေရမယ်”
“ဒါဆိုရင်လည်း... ငါ့နောက်ကို လိုက်ခဲ့ကြတော့။”
လှပလွန်းလှသည့် အမျိုးသမီးက လှည့်ထွက်လိုက်ရင်း သူတော်စင်မြေထဲသို့ ဝင်ရောက်သွားခဲ့သည်။
ထျန်ခန်းနှင့် အခြားလူများကမူ အချင်းချင်း လှည့်ပတ်ကြည့်ရှုလိုက်ကြရင်း... လေးနက်တည်ကြည်လှသော မျက်နှာအမူအရာများဖြင့် နောက်ကနေ လိုက်ပါသွားကြတော့သည်။
ထိုအချိန်တွင်... ဖန့်ချန်သည် ဂုယဲ့၏ စိတ်အာရုံမြင်ကွင်းနှင့်အတူ လိုက်ပါရင်း၊ ခုနစ်ပါးသတ်ဖြတ်ခြင်း သူတော်စင်မြေ၏ အနက်ရှိုင်းဆုံးနေရာရှိ... အိမ်ရာဝင်းတစ်ခုဆီသို့ ရောက်ရှိလာခဲ့ပြီ ဖြစ်သည်။
သက်လတ်ပိုင်းအရွယ် အမျိုးသားတစ်ဦးက... ဤနေရာတွင် ရေနွေးကြမ်းသောက်ရင်း ပန်းမန်များကို ကြည့်ရှုခံစားနေခဲ့ကာ၊ ဂုယဲ့ ရောက်ရှိလာသည်ကို မြင်တွေ့သည့်အခါ... ပြုံးလျက် ဆိုလိုက်သည်။
“ဒီတစ်ကြိမ် တပည့် အယောက် ၃၀ ကို... ရွေးချယ်ပြီးပြီလား။”
“ရွေးချယ်ပြီးပါပြီ။”
“သူတို့ရဲ့ မိသားစုတစ်ခုလုံးကိုလည်း... မင်းကိုယ်တိုင် လက်စဖျောက်ခဲ့တာလား။”
“ဟုတ်ပါတယ်။”
“ကောင်းပြီ... အရင်တုန်းက ငါက မင်းရဲ့ မိသားစုတစ်ခုလုံးကို သတ်ပစ်ခဲ့သလိုမျိုးပေါ့၊ သူတို့ ရှိနေမှတော့... မင်းအနေနဲ့ ခုနစ်ပါးသတ်ဖြတ်ခြင်း သူတော်စင်မျက်လုံးကို နားလည်သဘောပေါက်ဖို့က ပြဿနာအကြီးအကျယ် မရှိတော့ဘူး။”
သက်လတ်ပိုင်းအရွယ် အမျိုးသားက... ပြုံးရွှင်လျက် ခေါင်းညိတ်လိုက်သည်။
ဂုယဲ့၏ မျက်ဝန်းထဲတွင်မူ... သတ်ဖြတ်ခြင်း အငွေ့အသက်တစ်ခုက လျှပ်တပြက် ဖြတ်သန်းသွားခဲ့ပုံရသည်။
သို့သော်လည်း သက်လတ်ပိုင်းအရွယ် အမျိုးသားကမူ... ထိုအချက်ကို စိတ်ထဲထားပုံမရချေ။
စက္ကန့်ပိုင်းခန့် တိတ်ဆိတ်သွားခဲ့ပြီးနောက်... ဂုယဲ့က တည်ငြိမ်အေးဆေးစွာဖြင့်ပင် ဆိုလိုက်သည်။
“ဆရာ... ကျွန်တော်က သူတို့ အယောက် ၃၀ ရဲ့ မိသားစုတစ်ခုလုံးကို သတ်ပစ်ခဲ့တာမို့၊ သူတို့က အချိန်တိုင်း စက္ကန့်တိုင်းမှာ ကျွန်တော့်ကို သတ်ပစ်ဖို့ပဲ စဉ်းစားနေကြလိမ့်မယ်။”
“ဒီလောက်တင်ရှိတဲ့ သတ်ဖြတ်ခြင်း အငွေ့အသက်က... ဘာများ အသုံးဝင်မှာမို့လို့လဲ၊ တကယ်လို့သာ ခုနစ်ပါးသတ်ဖြတ်ခြင်း သူတော်စင်မျက်လုံးကို ကျင့်ကြံဖို့အတွက်... အခုလိုမျိုး သတ်ဖြတ်ခြင်း အငွေ့အသက်တွေကို အမှီပြုရမယ်ဆိုရင်...”
“ကျွန်တော် အပြင်ဘက်ကို သွားပြီးတော့... ရမ်းသန်းသတ်ဖြတ်လိုက်တာက၊ ပိုပြီးတော့ အကျိုးသက်ရောက်မှု ရှိမနေဘူးလား။”
“မင်းက ဘာကို နားလည်လို့လဲ။”
သက်လတ်ပိုင်းအရွယ် အမျိုးသား၏ မျက်နှာက စိတ်ကျေနပ်နှစ်သိမ့်မှုများဖြင့် ပြည့်နှက်နေခဲ့သည်။
“ကိုယ့်ရဲ့ ဘေးနားမှာ အချိန်တိုင်း စက္ကန့်တိုင်း တည်ရှိနေတဲ့ သတ်ဖြတ်ခြင်း အငွေ့အသက်မျိုးကမှ... မင်းရဲ့ ခုနစ်ပါးသတ်ဖြတ်ခြင်း သူတော်စင်မျက်လုံးကို မွေးမြူပေးနိုင်မှာ။”
“ငါတို့ ခုနစ်ပါးသတ်ဖြတ်ခြင်း သူတော်စင်မြေရဲ့ ရိုးရာအစဉ်အလာက... ဒီလိုမျိုးပဲ ဖြစ်တည်လာခဲ့တာ၊ ဘိုးဘွားဘီဘင်တွေ ချမှတ်ခဲ့တဲ့ စည်းကမ်းကို... ဖောက်ဖျက်လို့ ရမလား။”
“ဒါဆိုရင်... ဆရာက ဘယ်အချိန်ကျရင် ဂိုဏ်းသခင်ကြီးကို သတ်ပစ်ဖို့ ပြင်ဆင်ထားတာလဲ။”
ဂုယဲ့က တည်ငြိမ်အေးဆေးစွာဖြင့်ပင် မေးမြန်းလိုက်သည်။
“ဆရာ့ရဲ့ မိသားစုတစ်ခုလုံးကိုလည်း... ဂိုဏ်းသခင်ကြီးက သတ်ပစ်ခဲ့တာ မဟုတ်ဘူးလား။”
“ဘာလို့ စိတ်လောနေရတာလဲ၊ ငါ့ရဲ့ ကျင့်စဉ်အဆင့်အတန်းက အခုထိ မလုံလောက်သေးဘူး၊ ငါ့ရဲ့ ကျင့်စဉ်အဆင့်အတန်း လုံလောက်သွားတဲ့နေ့ကျရင်... အဲဒီအဖိုးကြီးရဲ့ ခေါင်းကို လိမ်ချိုးပစ်ပြီးတော့၊ သူ့ရဲ့ ခုနစ်ပါးသတ်ဖြတ်ခြင်း သူတော်စင်မျက်လုံးကို ဝါးမြိုပစ်မယ် ”
“ဒီလို လုပ်ဆောင်မှသာ...”
သက်လတ်ပိုင်းအရွယ် အမျိုးသားက ဂုယဲ့ကို တစ်ချက် လှမ်းကြည့်လိုက်သည်။
“ခုနစ်ပါးသတ်ဖြတ်ခြင်း သူတော်စင်မျက်လုံးက... သူရဲ့ စစ်မှန်တဲ့ စွမ်းအားကို ထုတ်ဖော်ပြသနိုင်မှာ။”
“ဟုတ်လား... ဒါဆိုရင် ဂိုဏ်းသခင်ကြီးကကော...”
“မင်းရဲ့ ဂိုဏ်းသခင်ကြီးကလည်း... သူ့ရဲ့ ဆရာဖြစ်သူရဲ့ ခုနစ်ပါးသတ်ဖြတ်ခြင်း သူတော်စင်မျက်လုံးကို ဝါးမြိုခဲ့ပြီးသားပဲ။”
သက်လတ်ပိုင်းအရွယ် အမျိုးသား၏ မျက်နှာထက်တွင်... အားကျအတုယူဖွယ်ရာ အရိပ်အယောင်တစ်ခု ထွက်ပေါ်လာခဲ့သည်။
“တကယ့်ကိုပဲ... အားကျစရာ ကောင်းတာပဲ။”
“ကြည့်ရတာ... ကျွန်တော် အရင်တုန်းက ခန့်မှန်းခဲ့တာက၊ မှန်ကန်နေခဲ့တာပဲ။”
ဂုယဲ့က သက်ပြင်းတစ်ချက် ချလိုက်မိသည်
“နောင်တစ်ချိန်ကျရင် ဆရာက ဂိုဏ်းသခင်ကြီးရဲ့ ခုနစ်ပါးသတ်ဖြတ်ခြင်း သူတော်စင်မျက်လုံးကို ဝါးမြိုမယ်၊ ပြီးရင် ကျွန်တော်က ဆရာ့ရဲ့ ခုနစ်ပါးသတ်ဖြတ်ခြင်း သူတော်စင်မျက်လုံးကို ထပ်ပြီးတော့ ဝါးမြိုမယ်...”
“ဒါက တကယ်တမ်းကျတော့... ခုနစ်ပါးသတ်ဖြတ်ခြင်း သူတော်စင်မျက်လုံးကို၊ တစ်ကိုယ်တည်းကနေ မျိုးဆက်တစ်ခုပြီးတစ်ခု လက်ဆင့်ကမ်း သယ်ဆောင်လာခဲ့တာနဲ့ အတူတူပဲပေါ့၊ ဂိုဏ်းသခင်ကြီးရဲ့ ခုနစ်ပါးသတ်ဖြတ်ခြင်း သူတော်စင်မျက်လုံး အစုံက... အစောဆုံး မူလပထမဆုံး မျက်လုံးအစုံပေါ့။”
သက်လတ်ပိုင်းအရွယ် အမျိုးသားက အသာအယာ ခေါင်းညိတ်လိုက်သည်။
“သွန်သင်ရလွယ်တဲ့ ကောင်လေးပဲ၊ မင်းရဲ့ ဂိုဏ်းသခင်ကြီးရဲ့ ခုနစ်ပါးသတ်ဖြတ်ခြင်း သူတော်စင်မျက်လုံး အစုံက... တကယ့်ကိုပဲ မျိုးဆက်တစ်ခုကနေ တစ်ခုကို လက်ဆင့်ကမ်းလာခဲ့တာ။”
“ဒါကလည်း... ငါတို့ရဲ့ ဒီအနွယ်အဆက်က၊ ခုနစ်ပါးသတ်ဖြတ်ခြင်း သူတော်စင်မြေကို အစဉ်အမြဲ ထိန်းချုပ်ထားနိုင်ရခြင်းရဲ့ အကြောင်းအရင်းပဲ။”
“မင်းက စီနီယာအစ်ကိုကြီး ဖြစ်နေပေမဲ့လည်း... မင်းရဲ့ ဂျူနီယာညီလေးတွေ၊ ညီမလေးတွေက နောင်တစ်ချိန်ကျရင် လက်ဦးမှုရယူပြီးတော့၊ ငါ့ရဲ့ ခုနစ်ပါးသတ်ဖြတ်ခြင်း သူတော်စင်မျက်လုံးကို ဝါးမြိုမသွားနိုင်ဘူးလို့... ပြောလို့မရဘူး။”
“မင်းဘက်ကလည်း... ကြိုးစားအားထုတ်ရလိမ့်မယ်။”
“ဝါးမြိုမယ်ဆိုရင်တောင်မှ... ဆရာက ဂိုဏ်းသခင်ကြီးရဲ့ ခုနစ်ပါးသတ်ဖြတ်ခြင်း သူတော်စင်မျက်လုံးကို အရင်ဝါးမြိုပြီးတဲ့အထိ... စောင့်ရဦးမှာပေါ့။”
ဂုယဲ့က ပြုံးလိုက်ရင်း -
“တခြား ထူးထူးခြားခြား ကိစ္စမရှိရင်... တပည့် ခွင့်ပြုပါဦး။”
“သွားတော့။”
ဂုယဲ့က လှည့်ထွက်သွားခဲ့တော့သည်။
နောက်ဆက်တွဲအနေဖြင့်... အချိန်စီးဆင်းမှုနှုန်းက၊ အလွန်တရာ မြန်ဆန်သွားခဲ့ပုံရသည်။
ဖန့်ချန်သည် ရုပ်ရှင်တစ်ခုကို အရှိန်မြှင့်၍ ကြည့်ရှုနေရသကဲ့သို့ ခံစားလိုက်ရပေသည်။
ဂုယဲ့၏ ကျင့်စဉ်အဆင့်အတန်းက... ရက်ပေါင်းများစွာ ကြာမြင့်လာသည်နှင့်အမျှ တိုးတက်လာခဲ့သည်။
ကမ္ဘာကြီးအဆင့်၊ ကောင်းကင်နိမိတ်ဖြစ်စဉ်အဆင့်၊ အထွတ်အထိပ်တာအိုအဆင့်၊ ကောင်းကင်အရှင်သခင်အဆင့်...
ဂုယဲ့က အဆင့်ဆင့် စနစ်တကျ ကျင့်ကြံလာခဲ့ပြီး... ထိုအတောအတွင်းမှာပင် ခုနစ်ပါးသတ်ဖြတ်ခြင်း သူတော်စင်မျက်လုံးကိုလည်း နားလည်သဘောပေါက်သွားခဲ့ရသည်။
တစ်ချိန်တည်းမှာပင် ခုနစ်ပါးသတ်ဖြတ်ခြင်း သူတော်စင်မြေအတွက်... နေရာအနှံ့အပြားသို့ သွားရောက်တိုက်ခိုက်ချေမှုန်းပေးခဲ့ရာ၊ သူ၏ လက်ထဲတွင်... မရေမတွက်နိုင်သော အသက်ပေါင်းများစွာ သေကျေပျက်စီးခဲ့ရသည်။
ထိုအတောအတွင်းမှာပင်... ဂုယဲ့အနေဖြင့် ထျန်ခန်းနှင့် အခြားလူများ၏ ကလဲ့စားချေရန် ကြိုးပမ်းမှုများကိုလည်း... အမြဲမပြတ် ကာကွယ်တားဆီးနေခဲ့ရသေးသည်။
ထို့အပြင် သူကိုယ်တိုင်လည်း... သူ၏ ဆရာဖြစ်သူကို လုပ်ကြံသတ်ဖြတ်ရန် အကြိမ်အနည်းငယ်မျှ ကြိုးပမ်းခဲ့ဖူးသည်။
နှမြောစရာကောင်းလှသည်ကတော့... အားလုံးက ကျရှုံးမှုဖြင့်သာ ပြီးဆုံးခဲ့ရခြင်း ဖြစ်ပေသည်။
တစ်နေ့သောအချိန်သို့ ရောက်ရှိလာခဲ့သည့်တိုင်အောင်... သူ၏ ဆရာဖြစ်သူက ဂုယဲ့၏ ဂိုဏ်းသခင်ကြီး၏ ခုနစ်ပါးသတ်ဖြတ်ခြင်း သူတော်စင်မျက်လုံးကို အောင်မြင်စွာ ဝါးမြိုနိုင်ခဲ့သည်။
ထိုနောက်ပိုင်းတွင်... ဂုယဲ့၏ ဆရာဖြစ်သူက ခုနစ်ပါးသတ်ဖြတ်ခြင်း သူတော်စင်မြေ၏ အရှင်သခင်ကြီး ဖြစ်လာခဲ့တော့သည်။
ဂုယဲ့၏ ဂျူနီယာညီလေးများနှင့် ညီမလေးများကလည်း... နည်းလမ်းပေါင်းစုံကို အသုံးပြု၍၊ သူတို့ဆရာ၏ ခုနစ်ပါးသတ်ဖြတ်ခြင်း သူတော်စင်မျက်လုံးကို ဝါးမြိုပစ်ရန် ကြံစည်ကြတော့သည်။
အဆိပ်ခတ်ခြင်း၊ လုပ်ကြံခြင်း... ထို့အပြင် ပြင်ပအင်အားစုများနှင့် ပူးပေါင်းကြံစည်ခြင်းများအထိ လုပ်ဆောင်ခဲ့ကြသည်။
တစ်ကြိမ်တွင်မူ... ကောင်းကင်အရှင်သခင်ထက်ပင် ပိုမိုစွမ်းအားကြီးမားလှသည့် ကြောက်မက်ဖွယ်ကောင်းသော တည်ရှိမှုတစ်ခုကိုပင်... ဖိတ်ခေါ်ခဲ့ကြသေးသည်။
ဖန့်ချန် သိရှိသည်ကတော့ ထိုပုဂ္ဂိုလ်သည်... သူတော်စင်ဧကရာဇ်အဆင့် ဖြစ်ရပေမည်။
နှမြောစရာကောင်းလှသည်ကတော့ ရလဒ်က စိတ်တိုင်းကျ ဖြစ်မလာခဲ့ဘဲ... ထိုသူတော်စင်ဧကရာဇ်ကြီးသည် အကြီးအကျယ် ရှုံးနိမ့်ကာ ထွက်ပြေးတိမ်းရှောင်သွားခဲ့ရပြီး၊ ခုနစ်ပါးသတ်ဖြတ်ခြင်း သူတော်စင်မြေ၏ အရှင်သခင်ကြီးကို... လုံးဝ ယှဉ်ပြိုင်နိုင်ခြင်း မရှိခဲ့ချေ။
ထို့အပြင် ထိုသူတော်စင်ဧကရာဇ်၏ မိသားစုမျိုးနွယ်စုတစ်ခုလုံးလည်း... ခုနစ်ပါးသတ်ဖြတ်ခြင်း သူတော်စင်မြေ၏ အရှင်သခင်ကြီး၏ သတ်ဖြတ်ခြင်းကို ခံလိုက်ရပြီး အကုန်အစင် ပျက်စီးသွားခဲ့ကာ၊ နောက်ဆုံး မျိုးဆက်သွေးသားတစ်ဦးတည်းကိုသာ ချန်ထားခဲ့ရင်း... ခုနစ်ပါးသတ်ဖြတ်ခြင်း သူတော်စင်မြေထဲသို့ ခေါ်ဆောင်လာကာ မွေးမြူစောင့်ရှောက်ခဲ့သည်။
အချိန်ကာလများစွာ ကုန်ဆုံးသွားခဲ့ပြန်သည်။
ထျန်ခန်းနှင့် အခြားလူများကလည်း ဂုယဲ့အပေါ်ကို... အကြိမ်ပေါင်းများစွာ တိုက်ခိုက်မှုများ ပြုလုပ်ခဲ့ကြသော်လည်း၊ အားလုံးက အရာထင်ခြင်းမရှိဘဲ လက်ဗလာဖြင့်သာ ပြန်လှည့်ခဲ့ကြရသည်။
ဂုယဲ့ကမူ... သူ၏ ဆရာဖြစ်သူနှင့် ကြားထဲက ရန်ငြိုးရန်စများကို... မေ့လျော့သွားခဲ့ပုံရသည်။
သူ၏ ဂျူနီယာညီလေးများနှင့် ညီမလေးများက... ဆရာဖြစ်သူကို သတ်ပစ်ပြီး သူ၏ ခုနစ်ပါးသတ်ဖြတ်ခြင်း သူတော်စင်မျက်လုံးကို ဝါးမြိုရန် နည်းလမ်းပေါင်းစုံ ရှာကြံနေခဲ့ကြချိန်တွင်၊ ဂုယဲ့ကတော့... ဘာမှမလုပ်ဆောင်ဘဲ နေခဲ့ပေသည်။
တစ်နေ့သောအချိန်သို့ ရောက်ရှိလာသည့်တိုင်အောင်... ခုနစ်ပါးသတ်ဖြတ်ခြင်း သူတော်စင်မြေတွင် အောင်ပွဲခံစားပွဲကြီးတစ်ခုကို ကျင်းပခဲ့ကြသည်။
အကြောင်းအရင်းမှာ ဂုယဲ့၏ ဆရာဖြစ်သူက... မိမိကိုယ်တိုင် ထွက်ခွာ၍ သူတော်စင်ဧကရာဇ်အဆင့် တည်ရှိမှု သုံးဦးကို သတ်ဖြတ်ပစ်ခဲ့ပြီး၊ ပါရမီအလွန်ကောင်းလှသည့် တပည့်သစ် သုံးဦးကို... ခေါ်ဆောင်လာခဲ့ခြင်းကြောင့် ဖြစ်ပေသည်။
ထိုအောင်ပွဲခံစားပွဲကြီးပေါ်တွင်... ဂုယဲ့က သူစိမ်းတစ်ဦးကို ဖိတ်ခေါ်လာခဲ့သည်။
ဖန့်ချန်သည်လည်း ထိုပုဂ္ဂိုလ်ကို မသိရှိချေ... သို့သော်လည်း ထိုပုဂ္ဂိုလ်၏ ခန္ဓာကိုယ်ပေါ်က အငွေ့အသက်များက၊ အနည်းငယ် ထူးဆန်းနေခဲ့သည်။
အဓိကနေရာတွင် ထိုင်နေသော ခုနစ်ပါးသတ်ဖြတ်ခြင်း အရှင်သခင်ကြီးက... ဂုယဲ့နှင့် သူဖိတ်ခေါ်လာသော ဧည့်သည်တော်ကို ပြုံးရွှင်လျက် ကြည့်လိုက်သည်။
“ဂုယဲ့... မင်း ဖိတ်ခေါ်လာတဲ့ ဧည့်သည်တော်က သူတော်စင်ဧကရာဇ်တစ်ဦးပဲ မဟုတ်လား၊ မင်းလည်း သိထားသင့်တယ်... သူတော်စင်ဧကရာဇ်က ဆရာ့ကို မသတ်နိုင်ဘူးဆိုတာ၊ မင်းနဲ့ မင်းရဲ့ ဂျူနီယာညီလေးတွေ၊ ညီမလေးတွေကတော့... ဆက်ပြီးတော့ ကြိုးစားရဦးမယ် ထင်တယ်နော်။”
ဂုယဲ့၏ ဂျူနီယာညီလေးများနှင့် ညီမလေးများက... ခက်ထန်မည်းမှောင်လှသော မျက်ဝန်းများဖြင့် ထိုဧည့်သည်တော်ကို တစ်ချက် လှမ်းကြည့်လိုက်ကြပြီးနောက်၊ ဂုယဲ့ကိုလည်း ပြန်ကြည့်လိုက်ရင်း... တိတ်ဆိတ်ငြိမ်သက်သွားကြပြန်သည်။
ထျန်ခန်းနှင့် အခြားလူများလည်း ဤနေရာတွင် ရှိနေခဲ့ကြပြီး... သူတို့က ဂုယဲ့ကို ကြည့်လိုက်ရင်း၊ အချင်းချင်းလည်း ပြန်လည်ကြည့်ရှုလိုက်ကြရာ... မျက်ဝန်းထဲတွင် ပြင်းထန်လှသော သတ်ဖြတ်ခြင်း အငွေ့အသက်များဖြင့် ပြည့်နှက်နေခဲ့ကြသည်။
“ဆရာကြီး... ကျေးဇူးပြုပြီး လှုပ်ရှားပေးပါတော့။”
ဂုယဲ့က ခုနစ်ပါးသတ်ဖြတ်ခြင်း အရှင်သခင်ကြီးကို ဂရုမစိုက်တော့ဘဲ... ရောက်ရှိလာသော ဧည့်သည်တော်ဆီသို့ လက်ဦးညွှတ်၍ ဆိုလိုက်သည်။
“မင်းက... မင်းကိုယ်တိုင်အတွက်နဲ့ ငါ့ကို ဒီခုနစ်ပါးသတ်ဖြတ်ခြင်း သူတော်စင်မြေကို အကုန်အစင် ဖျက်ဆီးခိုင်းဖို့... သေချာပြီလား။”
ရောက်ရှိလာသော ဧည့်သည်တော်က ခပ်ဖွဖွ ပြုံးလိုက်သည်။
“ငါသာ လှုပ်ရှားလိုက်မယ်ဆိုရင်... နောက်ပြန်လှည့်ဖို့ လမ်းမရှိတော့ဘူးနော်။”
ခုနစ်ပါးသတ်ဖြတ်ခြင်း သူတော်စင်မြေ၏ အရှင်သခင်ကြီးကမူ... အမူအရာက မူလအတိုင်း တည်ငြိမ်နေဆဲပင် ဖြစ်သည်။
ဂုယဲ့ကမူ ခေါင်းကို ညိတ်လိုက်ရင်း -
“ခုနစ်ပါးသတ်ဖြတ်ခြင်း သူတော်စင်မြေလိုမျိုး နေရာက... စောစောစီးစီးကတည်းက ပျက်စီးသွားသင့်တာ၊ သူက တည်ရှိမနေသင့်ဘူး။”
“ကျွန်တော် ဆရာ့ရဲ့ ခုနစ်ပါးသတ်ဖြတ်ခြင်း သူတော်စင်မျက်လုံးကို ဝါးမြိုပြီးသွားတာနဲ့... ဒီနေရာကနေ ထွက်ခွာသွားပါ့မယ်။”
“နောင်တစ်ချိန်ကျရင်... ဒီခုနစ်ပါးသတ်ဖြတ်ခြင်း သူတော်စင်မျက်လုံး အစုံကို၊ ကျွန်တော် ခင်ဗျားတို့ရဲ့ သံသရာမသေမျိုးဂိုဏ်း ဆီကို ချန်ထားပေးခဲ့ပါ့မယ်။”
ခုနစ်ပါးသတ်ဖြတ်ခြင်း သူတော်စင်မြေ၏ အရှင်သခင်ကြီး၏ မျက်နှာထက်က အပြုံးများက... တဖြည်းဖြည်းနှင့် တောင့်တင်းသွားခဲ့ရသည်။
သို့သော်လည်း နောက်ကျသွားခဲ့ပြီ ဖြစ်သည်... ပတ်ပတ်လည်က အရာအားလုံးသည် ထိုဧည့်သည်တော်၏ လက်ဖျောက်တစ်ချက်တီးလိုက်မှုနှင့်အတူ... ပြာမှုန်အဖြစ် ပြောင်းလဲကာ ပျက်စီးပျောက်ကွယ်သွားခဲ့ရတော့သည်။
ထိုအရာထဲတွင်... ခုနစ်ပါးသတ်ဖြတ်ခြင်း သူတော်စင်မြေ၏ အရှင်သခင်ကြီး ကိုယ်တိုင်လည်း ပါဝင်ပေသည်။
သူ သေဆုံးသွားခဲ့သည့် အချိန်အထိ... သူ၏ မျက်ဝန်းထဲတွင် မည်သို့သော နာကျည်းမှု၊ မကျေနပ်မှုမျိုးမျှ မရှိခဲ့ဘဲ၊ ဆန့်ကျင်ဘက်အနေဖြင့်... အလွန်တရာ စိတ်အေးချမ်းသာယာသွားသည့် အမူအရာမျိုးဖြင့် ဂုယဲ့ကို တစ်ချက် လှမ်းကြည့်သွားခဲ့သေးသည်။
ဖန့်ချန်၏ စိတ်အာရုံက အနည်းငယ် တောင့်တင်းသွားခဲ့ရပြီး... ထိုသူစိမ်းဧည့်သည်တော်ကိုသာ မမှိတ်မသုန် အသေအချာ စိုက်ကြည့်နေမိတော့သည်။
ဒီတစ်ယောက်ကလည်း... သံသရာမသမျိုးဂိုဏ်း က လူတစ်ယောက်လား။
ဒါပေမဲ့ သူက ထိုပုဂ္ဂိုလ်ကို... တစ်ခါမှ မမြင်ဖူးခဲ့ချေ။
ဤနေရာ၏ ခေတ်ကာလက... သူ အကန့်အသတ်ချိုးဖျက်ခြင်းတောင်တန်း တုန်းက ဖီထူနှင့် တွေ့ဆုံခဲ့ရသည့် အချိန်ထက်ပင်... နှစ်ပေါင်းများစွာ ပိုမိုစောစီးနေခဲ့ခြင်းကြောင့်များလား။
ထိုအချိန်တွင်... ခုနစ်ပါးသတ်ဖြတ်ခြင်း သူတော်စင်မြေ၏ အရှင်သခင်ကြီးက လုံးဝ ကွယ်ပျောက်သွားခဲ့ပြီ ဖြစ်သော်လည်း၊ သူ၏ ရှေ့မှောက်က စားပွဲခုံထက်တွင်မူ... မျက်လုံးတစ်စုံ ကျန်ရစ်နေခဲ့သည်။
ထိုမျက်လုံးအစုံက... မိမိကိုယ်ပိုင် စိတ်အာရုံ ရှိနေခဲ့ပုံရပြီး၊ မျက်ဝန်းများက လှုပ်ရှားနေခဲ့ကြသည်။
ရောက်ရှိလာသော ဧည့်သည်တော်က ထိုအခြေအနေကို မြင်သည့်အခါ... ရုတ်တရက် ရယ်မောလိုက်သည်။
“ခုနစ်ပါးသတ်ဖြတ်ခြင်း သူတော်စင်မျက်လုံး... မင်းနဲ့ ငါတို့ သံသရာမသေမျိုးဂိုဏ်း ကြားထဲက လောင်းကြေးထပ်ပွဲမှာ၊ မင်း ရှုံးနိမ့်သွားခဲ့ပြီ။”
“မင်းရဲ့ ကျွန်ပြုခြင်းကို ခံထားရတဲ့ ခုနစ်ပါးသတ်ဖြတ်ခြင်း သူတော်စင်မြေကလည်း... ဂုယဲ့က ငါ့ကို ဒီနေရာကို လာဖို့ ဖိတ်ခေါ်ခဲ့တာကြောင့် လုံးဝကို ပျက်စီးသွားခဲ့ရပြီ။”
“ဂုယဲ့ သေဆုံးသွားခဲ့ပြီးတဲ့နောက်ပိုင်းကျရင်... မင်းက ငါတို့ သံသရာမသေမျိုးဂိုဏ်း ရဲ့ ကျွန်ပြုခြင်းခံ နတ်ဘုရားစွမ်းအင်ကျင့်စဉ်တစ်ခု ဖြစ်လာရလိမ့်မယ်။”
ထိုမျက်လုံးအစုံ၏ မျက်ဝန်းထဲတွင်... မကျေမနပ်ဖြစ်မှုများ ပြည့်နှက်နေခဲ့ပုံရပြီး၊ စူးရှလှသော အော်ဟစ်သံကြီးတစ်ခု ထွက်ပေါ်လာခဲ့သည်။
“သံသရာမသေမျိုးဂိုဏ်း... မင်းတို့ အမေကို ယိုးလိုက်စမ်း ”