အခန်း ၂၆၁၅
Vol. 262 Ch. 2615
အခန်း (၂၆၁၅) - သန့်စင်ခြင်း ကိုးပါးပညာရပ်များ
ဟေးဆန်း၏ စကားကြောင့် ခန်းမဆောင်အတွင်းရှိ လေထုမှာ အနည်းငယ် တိတ်ဆိတ်သွားခဲ့ရသည်။
ပါရမီ အရည်အချင်း စစ်ဆေးခြင်း ဆန်းနယဲ့ လား
ဒါက ဘာကိုဆိုလိုတာလဲ
ကျောင်းတော်အုပ်ကြီး အများအပြား၏ မျက်နှာပေါ်တွင် နားမလည်နိုင်သည့် အရိပ်အယောင်များ ပေါ်လာသည်ကို မြင်သောအခါ ဟေးဆန်းက ပြုံး၍ ဆိုလိုက်သည်။
“ဒီပါရမီ အရည်အချင်း စစ်ဆေးခြင်းကို တန်ဖိုးမဖြတ်လိုက်ပါနဲ့။ ငါတို့ ရရှိထားတဲ့ သတင်းအချက်အလက်တွေအရဆိုရင်၊ အကယ်၍ ဆန်းနယဲ့ ပါရမီ အရည်အချင်းကို ပိုင်ဆိုင်နိုင်မယ်ဆိုရင်... လင်နယဲ့ အဆင့်လောက်ပဲ ရှိရင်တောင်မှ အကျိုးကျေးဇူး အများအပြားကို ရရှိနိုင်မှာပဲ...”
“ကျောင်းတော်အုပ်ချုပ်သူ... စကားလမ်းကြောင်း မလွှဲပါနဲ့တော့၊ တကယ်တမ်းဆိုရင် ဘယ်လို အကျိုးကျေးဇူးတွေ ရရှိနိုင်မှာလဲခင်ဗျာ...”
“ကျုပ်တို့ ချင်းမင်နဲ့ လင်ယောင်တို့က ဒီလောက်တောင် နှစ်ပေါင်းများစွာ စစ်တိုက်ခဲ့ကြပြီး၊ ရှေ့တန်းမှာလည်း သူတော်စင်တွေ အများကြီး အသက်စွန့်ခဲ့ကြရတာ... ဒီပါရမီ အရည်အချင်း စစ်ဆေးမှုတစ်ခုအတွက်ပဲလား...”
“ဒီ ဆန်းနယဲ့အဆင့် ဆိုတာကလည်း ဘာကို ဆိုလိုတာလဲ...”
ယန်တန်းမျိုးနွယ်စု ကျောင်းဆောင်၏ ကျောင်းတော်အုပ်ကြီးတင်မကဘဲ၊ ကောင်းကင်စစ်သည်မျိုးနွယ်စု ကျောင်းဆောင်၏ ကျောင်းတော်အုပ်ကြီးနှင့် အခြားသော မဟာမျိုးနွယ်စု ကျောင်းဆောင်များမှ ကျောင်းတော်အုပ်ကြီးများကပါ စိတ်မရှည်စွာဖြင့် အလျင်အမြန် မေးမြန်းလိုက်ကြသည်။
ဖန့်ချန်မှာမူ အတော်လေး တည်ငြိမ်နေသည်။ သူက ဆန်းနယဲ့အဆင့်အကြောင်းကို အနည်းငယ် သိရှိပြီးဖြစ်ရာ၊ ယခုအချိန်တွင်မူ ထိုအရာ၏ နောက်ကွယ်တွင် ရရှိလာမည့် အကျိုးကျေးဇူးများကိုသာ စိတ်ဝင်စားနေမိသည်။
“ဒီလိုပြောရအောင်... အခုလက်ရှိ ကောင်းကင်ငါးပါး အတွင်းမှာ၊ ကောင်းကင်အရှင် တွေတောင်မှ အလွယ်တကူ မဝင်ရောက်နိုင်လောက်အောင် အန္တရာယ်များတဲ့ အတွင်းကမ္ဘာတားမြစ်နယ်မြေတွေ ရှိနေတယ် မဟုတ်လား...”
ဟေးဆန်းက တည်ငြိမ်စွာပင် ဆက်လက်ပြောဆိုသည်။
“ငါ လင်ယောင်မှာ ရှိနေတုန်းက သိခဲ့ရတာက၊ လင်ယောင်မှာ အဲဒီလို အတွင်းကမ္ဘာတားမြစ်နယ်မြေမျိုး အနည်းဆုံး တစ်ရာကျော် ရှိနေပြီး၊ နှစ်ပေါင်းများစွာ ဝှက်ထားခဲ့တာ၊ ဘယ်သူ့ကိုမှလည်း ထုတ်ပြလေ့မရှိဘူး...”
“ဒါဆို...”
မျိုးနွယ်စုအသီးသီးမှ ကျောင်းတော်အုပ်ကြီးများ၏ မျက်လုံးများမှာ တလက်လက် တောက်ပြောင်လာပြီးနောက် ခေါင်းညိတ်လိုက်ကြသည်။ ထိုအကြောင်းအရာများကို ၎င်းတို့မှာ အလယ်အလတ်နှင့် အထက်တန်းအဆင့် ခေါင်းဆောင်များ ဖြစ်သည့်အတွက် သိရှိခွင့်ရှိသော်လည်း၊ အသေးစိတ် အချက်အလက်များကိုမူ လုံးဝနားမလည်ကြပေ။
“ဆန်းနယဲ့အဆင့် ဆိုတာကတော့ အဲဒီအတွင်းကမ္ဘာတားမြစ်နယ်မြေတွေကို ဝင်ရောက်ဖို့အတွက် လက်မှတ်ပဲ...”
“ရှေးဟောင်းကျမ်းစာတွေရဲ့ မှတ်တမ်းတင်ချက်မှာ အမှားမပါဘူးဆိုရင်၊ ဆန်းနယဲ့အဆင့် ဘွဲ့ကို ရရှိထားတဲ့ သူတော်စင်တွေဟာ အဲဒီအတွင်းကမ္ဘာတားမြစ်နယ်မြေတွေကို အလွယ်တကူ ဝင်ရောက်နိုင်မှာ ဖြစ်တယ်...”
“ကောင်းကင်အရှင်တွေတောင် အလွယ်တကူ မချဉ်းကပ်နိုင်တဲ့ အတွင်းကမ္ဘာတားမြစ်နယ်မြေတွေထဲမှာ ဘယ်လောက်တောင် တန်ဖိုးကြီးတဲ့ အရာတွေ ရှိနေမလဲဆိုတာ... ငါ တစ်ခုချင်းစီ ရှင်းပြစရာတောင် မလိုတော့ဘူး မဟုတ်လား ”
“စင်ကြယ်သော ဗောဓိသီး တစ်ထောင်လောက် ရှာတွေ့နိုင်ရင်တောင် မဖြစ်နိုင်စရာ မရှိဘူး ”
“အတွင်းထဲမှာ စင်ကြယ်သော ဗောဓိသီးထက် ပိုမိုထိရောက်မှုရှိတဲ့ ရတနာတွေ ရှိနေဖို့လည်း ဖြစ်နိုင်သေးတယ်၊ အဲဒါတွေက ကမ္ဘာကြီး သူတော်စင်အဆင့်နဲ့ ကောင်းကင်နိမိတ် သူတော်စင်တွေအတွက်တောင် အာနိသင်ရှိနိုင်တယ်...”
“ဒါမှမဟုတ် ရှေးခေတ် နတ်ဘုရားစွမ်းရည်တွေ ဖြစ်တဲ့ မျက်လုံးကိုးပါးစွမ်းရည် ၊ ချုပ်နှောင်ခြင်းကိုးပါး စွမ်းရည် ၊ အဆောင်ကိုးပါး စွမ်းရည် ၊ လက်နက်ကိုးပါး စွမ်းရည် ...”
ဟေးဆန်းက ဥပမာအများအပြားကို ဆက်တိုက် ရေရွတ်ပြလိုက်သည်။
ခန်းမဆောင်ကြီးအတွင်းရှိ လေထုမှာ ရုတ်တရက် ပြောင်းလဲသွားသည်။ ကျောင်းတော်အုပ်ကြီးများနှင့် တွဲဖက်ကျောင်းအုပ် အသီးသီးတို့၏ အသက်ရှူသံများမှာ မြန်ဆန်လာပြီး ၎င်းတို့၏ မျက်ဝန်းများတွင် မီးတောက်သဖွယ် စိတ်အားထက်သန်မှုများ တောက်လောင်လာသည်။
‘ချုပ်နှောင်ခြင််််််််းကိုးပါး စွမ်းရည် အဆောင်ကိုးပါး စွမ်းရည်’
ဖန့်ချန်၏ စိတ်အာရုံ လှုပ်ရှားသွားသည်။ ထိုကျောင်းတော်အုပ်ချုပ်သူ ရေရွတ်ပြခဲ့သည့် ပညာရပ်များသည် ခုနစ်ပါးသတ်ဖြတ်ခြင်း သူတော်စင်မျက်လုံး ၊ ရှေးဦး နတ်ဘုရားမျက်လုံး တို့နှင့် ယှဉ်နိုင်လောက်အောင် ထူးချွန်သည်ဟု ဆိုလိုခြင်းလား။
“ဒီ သန့်စင်ခြင်းကိုးပါး ပညာရပ်တွေကိုလည်း အားလုံး ကြားဖူးကြမှာပါ၊ သူတို့ ပထမဆုံး ပေါ်ထွက်လာတာကလည်း မည်သူမှ မသိရတော့တဲ့ ရှေးခေတ်ကာလက အတွင်းကမ္ဘာတားမြစ်နယ်မြေတွေထဲမှာပဲ...”
“သဘာဝအတိုင်းပဲ၊ ဒီနတ်ဘုရားစွမ်းရည်တွေကလည်း ရှေးခေတ်က ပညာရပ်တွေပဲ...”
“အခုလက်ရှိ ကောင်းကင် ငါးပါးမှာ ပိုင်ဆိုင်ထားတဲ့ သန့်စင်ခြင်းကိုပါး ပညာရပ်က အမှန်တော့ အနည်းငယ်သာ ရှိတယ်၊ လက်ချိုးရေတွက်လို့ ရနိုင်တယ်...”
“ဒီတစ်ခေါက်မှာသာ ဆန်းနယဲ့အဆင့် ရှိတဲ့ ကျောင်းသားတွေကို အတွင်းကမ္ဘာတားမြစ်နယ်မြေတွေထဲ ဝင်ခိုင်းပြီး သန့်စင်ခြင်းကိုးပါး ပညာရပ် အနည်းငယ်လောက် ရှာခိုင်းနိုင်ခဲ့မယ်ဆိုရင်... နှစ်ပေါင်းများစွာ စစ်ပွဲတွေကြောင့် ဆုံးရှုံးခဲ့ရတဲ့ ပမာဏကို ရာချီ၊ ထောင်ချီလောက်အထိ ပြန်လည်ဖြည့်ဆည်းနိုင်မှာပဲ...”
“ဟူး...”
ကျောင်းတော်အုပ်ကြီးများနှင့် တွဲဖက်ကျောင်းအုပ်များမှာ မိမိတို့ရင်ထဲမှ သက်ပြင်းကို တိတ်တဆိတ် ရှိုက်လိုက်ကြသည်။
မဟာမျိုးနွယ်စုကြီးများမှ လာသော ကျောင်းတော်အုပ်ကြီးများနှင့် မတူဘဲ၊ အင်အားနည်းသော မျိုးနွယ်စုငယ်များမှ ကျောင်းတော်အုပ်ကြီးများအတွက်မူ ၎င်းတို့၏ မျိုးနွယ်စုကို အရှိန်အဝါဖြင့် ပြန်လည်ထူထောင်ရန် ထိုအခွင့်အရေးမှာ အလွန်ပင် တန်ဖိုးကြီးမားလှပေသည်။
‘ဒီလောက်ကောင်းတဲ့ အခွင့်အရေးမျိုးကို ငါ့အနေနဲ့ မဝင်ရောက်နိုင်တော့ဘူးလား...’
ထိုက်ဟောင်ရှန်းမှာမူ ဝမ်းနည်းပူဆွေးမှုများဖြင့် ရင်ထဲတွင် တဆစ်ဆစ်နာကျင်နေမိသည်။
ဖန့်ချန်၏ ရင်ထဲတွင်မူ ကောင်းကင်အရှင်များပင် အလွယ်တကူ မဝင်ရောက်နိုင်သော အတွင်းကမ္ဘာတားမြစ်နယ်မြေများမှာ... ဂိုဏ်းဂဏခေတ်က သူတော်စင်ဧကရာဇ်တို့၏ ခန္ဓာကိုယ်ဟောင်းများ ဖြစ်နေမည်လောဟုသာ တွေးတောနေမိသည်။
“ကျောင်းတော်အုပ်ချုပ်သူ... မေးပါရစေ၊ ဒီ ဆန်းနယဲ့အဆင့်ရဲ့ စံနှုန်းက ဘယ်လိုမျိုးလဲ..”
“မျိုးနွယ်စုအသီးသီးက ကောင်းကင်အရှင် ရာထူးဆက်ခံသူတွေဆီမှာ အခွင့်အရေး ရှိပါ့မလား...”
ကျောင်းတော်အုပ်ကြီးတစ်ဦးက မေးမြန်းလိုက်သည်။
ဟေးဆန်းက ခေါင်းညိတ်လိုက်ပြီး -
“အမေးကောင်းတယ်။ သာမန် ကောင်းကင်အရှင် ရာထူးဆက်ခံသူတွေဆိုရင်တော့ ဆန်းနယဲ့အဆင့် ဘွဲ့ကို ရရှိဖို့ အရည်အချင်း မရှိပါဘူး...”
ထိုစကားတစ်ခွန်းကြောင့် ကျောင်းတော်အုပ်ကြီးအများစု၏ မျက်နှာအမူအရာမှာ ပြောင်းလဲသွားသည်။ ယနေ့ခေတ်ကာလတွင် မျိုးနွယ်စုအသီးသီး၏ ကောင်းကင်အရှင် ရာထူးဆက်ခံသူများမှာ စွမ်းအားချင်း အလွန်ကွာခြားနေကြသည်။ အဓိကအားဖြင့် မျိုးနွယ်စုအသီးသီး၏ အရင်းအမြစ် ကွာခြားမှုကြောင့်လည်း ဖြစ်သည်။ အချို့သော ကောင်းကင်အရှင် ရာထူးဆက်ခံသူများမှာ မိမိတို့၏ နောက်ခံမျိုးရိုးနှင့် ပတ်သက်မှုများကြောင့်သာ ထိုရာထူးသို့ ရောက်ရှိလာကြခြင်း ဖြစ်သည်။ ၎င်းတို့နှင့် အရည်အချင်းချင်း တူညီသော ကျောင်းသားအများအပြားမှာမူ နောက်ကွယ်မှ တွန်းအားပေးမည့်သူသာ ရှိမည်ဆိုလျှင် ဤရာထူးကို ရယူနိုင်ကြမည်သာ ဖြစ်သည်။
“ဒါကြောင့်မို့လို့ ပြန်သွားရင် သေချာရွေးချယ်ကြပါ။ အကြည့်တွေကို ကောင်းကင်အရှင် ရာထူးဆက်ခံသူတွေဆီမှာပဲ အကုန်ပုံမချထားပါနဲ့။ အချို့မျိုးနွယ်စုတွေမှာ ကောင်းကင်အရှင် ရာထူးဆက်ခံသူ တစ်ယောက် ဒါမှမဟုတ် နှစ်ယောက်လောက်ပဲ ရှိတတ်ကြတယ်...”
“အချို့သော အဓိက ကျောင်းသားတွေကိုလည်း သေချာ အကဲခတ်ကြည့်ကြပါ...”
“နန်းတော်ကိုးခု ထဲက ကျောင်းသားတွေကိုလည်း သေချာ ရွေးချယ်ကြည့်ကြပါ။”
“မင်းတို့ကို ငါးနှစ်အချိန်ပေးမယ်။ ကျောင်းသားတွေကို စုစည်းပြီးရင် ငါကိုယ်တိုင်ပဲ နိဗ္ဗာန် အတွင်းကမ္ဘာတားမြစ်နယ်မြေကို ခေါ်သွားပေးမယ်။”
“အစည်းအဝေး ပြီးပြီ”
……
……
“ထိုက်ဟောင်ရှန်း... ရှီးမျိုးနွယ်စု ကျောင်းဆောင်ရဲ့ လူရွေးချယ်မှုကို မင်းဘာသာမင်းပဲ ဆုံးဖြတ်လိုက်ပါ။”
“ငါ လူသားမျိုးနွယ်စု ကျောင်းဆောင်ကို တစ်ချက် ပြန်သွားဦးမယ်...”
ဖန့်ချန်က စကားအနည်းငယ် မှာကြားပြီးနောက်၊ ဇောင်ဟွမ်နှင့် ဇောင်ဟွေ့တို့ကို လိုက်မီအောင် ပြေးသွားကာ လူသားမျိုးနွယ်စု ကျောင်းဆောင်သို့ အတူတူ ပြန်လာခဲ့ကြသည်။
ထိုက်ဟောင်ရှန်းမှာမူ မျက်နှာအမူအရာ မတည်ငြိမ်တော့ဘဲ နိဗ္ဗာန် အတွင်းကမ္ဘာတားမြစ်နယ်မြေကို မသွားရောက်နိုင်တော့မည့်အကြောင်းကို တွေးမိတိုင်း သက်ပြင်းရှည်ကြီး ချလိုက်မိသည်။ သို့သော်လည်း သူကိုယ်တိုင် လူရွေးချယ်ပေးခွင့် ရှိသေးသည်ကို ပြန်လည်သတိရပြီး စိတ်ဓာတ်ပြန်လည် မွေးမြူကာ ရှီးမျိုးနွယ်စု ကျောင်းဆောင်သို့ ပျံသန်းသွားလေတော့သည်။ အနည်းဆုံးတော့ လူရွေးချယ်ပေးခွင့် ရှိနေသေးသည် မဟုတ်ပါလား။
……
……
လူသားမျိုးနွယ်စု ကျောင်းဆောင်။
ဇောင်ဟွမ်နှင့် ဇောင်ဟွေ့တို့မှာ တစ်ဦးကိုတစ်ဦး ကြည့်လိုက်ကြပြီးနောက် ဖန့်ချန်ကို တစ်ပြိုင်နက်တည်း ကြည့်လိုက်ကြသည်။
ဇောင်ဟွမ်က လေးနက်သော အသံဖြင့် ဆိုလိုက်သည်။
“ဒီတစ်ခေါက် နိဗ္ဗာန် အတွင်းကမ္ဘာတားမြစ်နယ်မြေအတွက် လူရွေးချယ်တာက အတော်လေး အရေးကြီးတယ်။ လူရွေးဖို့ဆိုတာ လွယ်ကူမယ်လို့ မထင်နဲ့၊ ဖန့်ချန်... မင်း စိတ်ထဲကနေ ကြိုတင်ပြင်ဆင်ထားဖို့ လိုလိမ့်မယ်။”
ဖန့်ချန်မှာ အနည်းငယ် မှင်သက်သွားပြီး၊ ဇောင်ဟွမ်၏ သတိပေးချက်ကြောင့် ရင်ထဲတွင် တစ်စုံတစ်ခုကို သဘောပေါက်သွားသည်။
“ဇောင် ကျောင်းတော်အုပ်ကြီး... အဓိပ္ပာယ်က... အထက်မှာရှိတဲ့ ကောင်းကင်အရှင်တွေက ဝင်ရောက်စွက်ဖက်လိမ့်မယ်လို့ ဆိုလိုတာလား ”
ဖန့်ချန်က တွေးတောရင်း မေးမြန်းလိုက်သည်။
“ကျောင်းတော်အုပ်ချုပ်သူ အခုလေးတင် ပြောသွားတာကို ကြည့်ရင်... ဒီတစ်ခေါက် ခွဲတမ်းက အလွန်အရေးကြီးတယ်၊ ဘာကြောင့်လဲဆိုတော့ သူက မျိုးနွယ်စုတစ်ခုလုံးရဲ့ ကံကြမ္မာနဲ့ သက်ဆိုင်နေလို့ပဲ...”
“အခု ကျောင်းတော်အုပ်ချုပ်သူက မျိုးနွယ်စုအသီးသီးရဲ့ ကျောင်းတော်အုပ်ကြီးတွေကို ရွေးချယ်ခိုင်းထားပေမဲ့...”
“နောက်ဆုံးမှာတော့ ဘယ်သူတွေကို ရွေးချယ်မလဲဆိုတာ ခုံသမာဓိအဖွဲ့ ဘက်ကပဲ အဆုံးအဖြတ်ပေးဖို့ ဖြစ်လာနိုင်တယ်...”
ဇောင်ဟွမ်က သက်ပြင်းချကာ -
“မင်းရဲ့ လက်ရှိ ရာထူးအဆင့်အတန်းနဲ့ဆိုရင်တော့ ဒီခွဲတမ်းက မင်းအတွက် သေချာပေါက် ရရှိမှာပါ။ အချို့လူတွေက မင်းကို ဖိနှိပ်ချင်ရင်တောင်မှ အရင်က ကျောင်းတော်အုပ်ချုပ်သူကိုရော၊ စစ်ဆေးရေးဌာနချုပ်ကိုပါ မကျော်လွန်နိုင်ပါဘူး။”
“ဒါပေမဲ့ လူသားမျိုးနွယ်စုမှာတော့ အခုလက်ရှိ ဟော်ဆွေ့ဘိုးဘေး ရဲ့ စကားကသာ အဆုံးအဖြတ် ဖြစ်နေတာ။ ကရုဏာတောင်တန်း က ကျောင်းသားတွေ ဒီကိစ္စမှာ ပါဝင်ဖို့ဆိုတာ အနည်းငယ် ခက်ခဲလိမ့်မယ်လို့ ထင်တယ်...”
ဇောင်ဟွေ့ကလည်း ခေါင်းညိတ်လိုက်သည်
“ဒါက ငါတို့ရဲ့ ခန့်မှန်းချက် တစ်ခုပဲ။ နောက်ဆုံးမှာ ဘယ်လို ဖြစ်လာမလဲဆိုတာကတော့ အထက်လူကြီးတွေရဲ့ ဆုံးဖြတ်ချက်ပေါ်မှာပဲ မူတည်ပါတယ်။ အကယ်၍ ငါတို့ကိုပဲ ရွေးချယ်ခိုင်းမယ်ဆိုရင်တော့ ဒီတစ်ခေါက် လူဆယ်ယောက်ခွဲတမ်းကို ကရုဏာတောင်တန်းကိုပဲ ပေးလိုက်မှာပါ။”
ဇောင်ဟွမ်မှာ ဘာမျှ မပြောတော့ဘဲ မျက်လုံးများမှာမူ လေးနက်သွားသည်။
မျှော်လင့်ထားသည့်အတိုင်းပင်၊ ကျောင်းဆောင်အသီးသီးမှ ကျောင်းသားများကို စတင်ရွေးချယ်နေသည့်အချိန်တွင် သတင်းတစ်ခု ရောက်ရှိလာခဲ့သည်။
၎င်းမှာ ဝါရင့်အကြီးအကဲ အချို့မှတစ်ဆင့် လက်အောက်ခံ ကျောင်းဆောင်များသို့ ပေးပို့လိုက်သော သတင်းပင် ဖြစ်သည်။
၎င်းတို့၏ လက်ရှိ လူရွေးချယ်ရေး လုပ်ငန်းစဉ်များကို ခေတ္တရပ်ဆိုင်းထားရန် ဖြစ်သည်။
လူရွေးချယ်မှုအပိုင်းတွင်မူ မျိုးနွယ်စုအသီးသီးမှ ကောင်းကင်အရှင်များကိုသာ ဦးစားပေးမည်ဟု ဆိုသည်။ အကယ်၍ အချို့သော အင်အားနည်းသည့် မျိုးနွယ်စုများတွင် ကောင်းကင်အရှင်များ မရှိပါက၊ ၎င်းတို့၏ ကိုယ်စားလှယ်များကိုလည်း ခုံသမာဓိအဖွဲ့ကသာ အဆုံးအဖြတ်ပေးမည်ဟု ဆိုသည်။
ထိုဆုံးဖြတ်ချက် ပေါ်ထွက်လာမှုကြောင့် ဝေဖန်မှုများစွာ ဖြစ်ပေါ်လာခဲ့သည်။
ထို့နောက် တစ်နှစ်အတွင်းမှာပင် မျိုးနွယ်စုအသီးသီး၏ လူစာရင်းများ ထွက်ပေါ်လာခဲ့သည်။
ရွှေဟွေးကျောင်းတော်ကြီး၊ လူသားမျိုးနွယ်စု ကျောင်းဆောင်မှ မည်သူတစ်ဦးတစ်ယောက်မျှ ထိုစာရင်းထဲတွင် မပါဝင်ခဲ့ပေ။
ထိုစာရင်းထဲတွင်မူ၊ အံ့ဩစရာကောင်းစွာပင် ချင်မျိုးနွယ်စုမှ အမည်နာမပေါင်း နှစ်ဆယ်လုံးလုံး ပါဝင်နေခဲ့သည်။
၎င်းတို့အားလုံးမှာ တန်လင် ကျောင်းတော်ကြီးရှိ လူသားမျိုးနွယ်စု ကျောင်းဆောင်မှ ကျောင်းသားများသာ ဖြစ်ကြသည်။
ဤသတင်း ထွက်ပေါ်လာသည်နှင့်တစ်ပြိုင်နက် ရွှေဟွေးကျောင်းတော်ကြီး လူသားမျိုးနွယ်စု ကျောင်းဆောင်တစ်ခုလုံးမှာ ဆူညံသွားခဲ့ရပြီး၊ ဆရာအချို့ပင် မခံရပ်နိုင်တော့ဘဲ ကျိန်ဆဲလိုက်ကြသည်။
ချင်မျိုးနွယ်စု ကျောင်းသားများသာလျှင် တိတ်တဆိတ် ပြုံးလျက် ရယ်မောနေကြတော့သည်။