အခန်း ၂၆၂၉
Vol. 263 Ch. 2629
အခန်း (၂၆၂၉) - ခွေး၊ ကြက် အဆင့်လောက်ပဲရှိတာ
“ဖန့်ချန်၊ တကယ်လို့ နင်က သူတော်စင်ဧကရာဇ် စီမံကိန်းထဲ မပါဝင်ဘူးဆိုရင် နောက်ဆက်တွဲ စာမေးပွဲတွေကို ဆက်ဖြေဖို့ ဘယ်တော့မှ အရည်အချင်း ပြည့်မီတော့မှာ မဟုတ်ဘူး။”
“အကယ်၍ အတင်းအကျပ် ဆက်ဖြေမယ်ဆိုရင် ဒါဟာ ငါတို့ ပြင်ဆင်ထားတာတွေကို ဖျက်ဆီးရာရောက်တယ်။ အပြင်ကို ပြန်ရောက်ရင် အပြစ်ပေးခြင်း ခံရလိမ့်မယ်။”
ထိုက်ဟောင် ဟွမ်းယောင်က တစ်ဖန်ပြန်၍ ပြောဆိုလိုက်သည်။ သူမ၏ အမူအရာမှာ လေးနက်လှသည်။
“ငါက နင့်ကို အပြစ်မပေးရင်တောင် သူတော်စင်ဧကရာဇ် စီမံကိန်းရဲ့ တခြားအဖွဲ့ဝင်တွေက နင့်ကို အပြစ်ပေးလိမ့်မယ်။ သူတို့က ဒီကိစ္စမှာ ဘယ်လို ထူးခြားတဲ့ အပြောင်းအလဲမျိုးကိုမှ လက်ခံမှာ မဟုတ်ဘူး။”
“ငါက ထူးခြားတဲ့သူ ဆိုတာ နင်ပြောတာလား ”
ဖန့်ချန်က ရယ်မောလိုက်သည်။
ထိုက်ဟောင် ဟွမ်းယောင်မှာ ခဏတာ တိတ်ဆိတ်သွားပြီးနောက် ခေါင်းကို အသာအယာ ငြိမ့်လိုက်သည်။
“နင်က ထူးခြားတဲ့သူပဲ။ လူသားမျိုးနွယ်စုထဲမှာ ဒီခေတ်ကာလမှာ နင်လိုမျိုး ထူးချွန်တဲ့သူ ပေါ်လာမယ်လို့ မထင်ထားခဲ့မိဘူး။”
“ငါတို့ရဲ့ စည်းမျဉ်းအတိုင်းဆိုရင် နင့်ကို သူတော်စင်ဧကရာဇ် စီမံကိန်းရဲ့ အဖွဲ့ဝင်အဖြစ် သွတ်သွင်းပေးသင့်တယ်။”
“နင် ငါတို့နဲ့ ပူးပေါင်းဖို့ ဆန္ဒရှိလား ”
“နင်သာ သူတော်စင်ဧကရာဇ် စီမံကိန်းမှာ ပါဝင်မယ်ဆိုရင် နောက်ထပ် စာမေးပွဲတွေကို ဆက်ဖြေခွင့် ရလိမ့်မယ်။”
“ငါက ထူးခြားတဲ့သူ ဖြစ်နေမှတော့ မင်းတို့ရဲ့ သူတော်စင်ဧကရာဇ် စီမံကိန်းထဲကို ပိုပြီးတော့တောင် မဝင်သင့်တော့ဘူး မဟုတ်လား။”
ဖန့်ချန်က ရယ်မောလျက် -
“ငါက နှစ်ပေါင်းများစွာ အိပ်ပျော်နေဖို့ စိတ်မဝင်စားဘူး။”
“သူတော်စင်ဧကရာဇ် စီမံကိန်းမှာ ထပ်ပြီး အိပ်ပျော်နေစရာ မလိုတော့ဘူး။ အခု ဒီနိဗ္ဗာန်အတွင်းကမ္ဘာ တားမြစ်နယ်မြေဟာ ငါတို့ စီမံကိန်းရဲ့ နောက်တစ်ဆင့်ကို တက်လှမ်းဖို့ အစပျိုးရာပဲ ”
ထိုက်ဟောင် ဟွမ်းယောင်က မျက်မှောင်ကြုတ်လျက် ပြောသည်။
“မင်းတို့နဲ့ ပူးပေါင်းရင် ဘာအကျိုးကျေးဇူးတွေ ရှိမှာလဲ ”
ဖန့်ချန်က ခဏစဉ်းစားပြီး မေးလိုက်သည်။
နေရာရှိ ကျောင်းသားများ၏ အမူအရာမှာ တစ်ချက်ချင်း ပြောင်းလဲသွားပြီး မျက်ဝန်းထဲတွင် လေးနက်မှုတို့ ပေါ်လာသည်။
ဖန့်ချန်က တကယ်ပဲ ဒီသူတော်စင်ဧကရာဇ် စီမံကိန်းထဲ ဝင်တော့မလို့လား။
အကယ်၍သာ ထိုသို့ဖြစ်ခဲ့လျှင် နောက်ပိုင်း ဖန့်ချန်၏ အဆင့်အတန်းမှာ သူတို့နှင့် လုံးဝ ကွာခြားသွားတော့မည် ဖြစ်သည်။
ထိုချီထျန်း မျိုးနွယ်စုမှ ကျောင်းသားအချို့၏ မျက်နှာမှာ ပြောင်းလဲသွားကြသည်။
“အရင်းအမြစ်တွေကို ဦးစားပေး ခွဲဝေပေးတယ်။”
ထိုက်ဟောင် ဟွမ်းယောင်က နေရာရှိ ကျောင်းသားအုပ်စုကို လက်ညှိုးထိုးပြလျက် -
“တကယ်ဆိုရင် သူတို့ဆီ ရောက်ရမယ့် အရင်းအမြစ်တွေကို ငါတို့ဆီ ဦးစားပေး ခွဲဝေပေးလိမ့်မယ်။ ဒီနှစ်တွေအတွင်းမှာ အမြဲတမ်း ဒီအတိုင်းပဲ။”
“...”
ကျောင်းသား အသီးသီးတို့မှာ စိတ်ထဲမှ တိတ်တိတ်ကလေး ကျိန်ဆဲလိုက်ကြသည်။
ထိုက်ဟောင် ဟွမ်းယောင်ကို ကြည့်သည့် အကြည့်များမှာ ရန်လိုမှုတို့ ပါဝင်နေပြီ ဖြစ်သည်။ ထိုက်ဟောင် ဟွမ်းယောင်မှာမူ ဂရုမစိုက်။ ထိုအရာများသည် ဖြစ်သင့်ဖြစ်ထိုက်သော ကိစ္စများပင် ဖြစ်သည်ဟု ယူဆထားဟန် ရှိသည်။
“ဒါဆိုရင် သူတော်စင်ဧကရာဇ် စီမံကိန်းဝင်တွေရဲ့ အရင်းအမြစ်တွေကို ဘယ်လို ခွဲဝေပေးတာလဲ ”
ဖန့်ချန်က ဆက်လက် မေးမြန်းသည်။
“ဒါကို အထက်ကနေပဲ ခွဲဝေပေးတာ။ နင်အခုမှ ဝင်လာတာဆိုတော့ အရင်းအမြစ်က နည်းနည်းတော့ လျော့နည်းမှာပေါ့။”
ထိုက်ဟောင် ဟွမ်းယောင်က ပြောသည်။
“ဒါဆို ငါ ဒီစီမံကိန်းထဲ ဝင်လိုက်ရင် ဘယ်သူ့ရဲ့ အမိန့်ကို နာခံရမှာလဲ ”
“ဒီစီမံကိန်းကို စတင်သူတွေရဲ့ အမိန့်ပဲ။”
ထိုက်ဟောင် ဟွမ်းယောင်၏ မျက်ဝန်းထဲတွင် လေးနက်မှုတို့ ဖြတ်ပြေးသွားသည်။
“စီမံကိန်းကို စတင်သူ စုစုပေါင်း ငါးဦး ရှိတယ်။ ချင်းမင်၊ ရှန်းချုံး၊ လင်ချုံး၊ ပိလော့၊ လင်ယောင်.. ကောင်းကင်နယ်မြေ ငါးခုမှာ တစ်ခုစီ ရှိကြတယ်။”
“သူတို့ရဲ့ အမိန့်ကို နာခံရင် ရပြီ။”
ကောင်းကင်နယ်မြေ ငါးခုမှာ တစ်ဦးစီ ရှိတယ်
ကျောင်းသားများ၏ စိတ်ထဲတွင် အနည်းငယ် သက်သာရာ ရသွားကြသည်။
“သူတို့ရဲ့ လက်ရှိ ကျင့်ကြံစွမ်းအားက ဘယ်လောက်လဲ”
“ကမ္ဘာတည်ဆောက်ခြင်း အဆင့် နောက်ပိုင်းပဲ။”
ထိုက်ဟောင် ဟွမ်းယောင်က စဉ်းစားဟန်ဖြင့် -
“ဒါပေမဲ့ ဒီတစ်ခါ နိဗ္ဗာန်အတွင်းကမ္ဘာ တားမြစ်နယ်မြေ ပြီးသွားရင်တော့ ငါတို့ရဲ့ ကျင့်ကြံစွမ်းအားကို ဖိနှိပ်ထားစရာ မလိုတော့ဘူး။”
“ဆိုလိုတာက သူတော်စင်ဧကရာဇ် စီမံကိန်းဝင်တွေက အတော်လေး များသားပဲ။”
ဖန့်ချန်မှာ အတွေးနက်စွာဖြင့် နေရာရှိ ကျောင်းသားများကို တစ်ချက် ဝေ့ကြည့်လိုက်သည်။
“ဒီထဲမှာ မင်းတစ်ယောက်တည်း သူတော်စင်ဧကရာဇ် စီမံကိန်းဝင် ဖြစ်မှာ မဟုတ်ဘူးနော်။”
“နင် ခုနက ကိုးဦးပဲ နိုးထလာတယ်လို့ ပြောတာ၊ အဲဒါ လိမ်ပြောနေတာ ဖြစ်ရမယ်။”
“...”
ကျောင်းသားများမှာ တစ်ယောက်မျက်နှာ တစ်ယောက် ကြည့်လိုက်ကြသည်။ သူတို့၏ မျက်ဝန်းထဲတွင် သံသယများ ပြည့်နှက်နေသည်။
ထိုက်ဟောင် ဟွမ်းယောင်မှာ ခဏတာ တုံ့ဆိုင်းသွားပြီးနောက် အေးစက်စွာ ရယ်မောလိုက်သည်။
“ဟုတ်တယ်။ ငါတို့ ဒီတစ်ခါ အကုန်လုံး နိုးထလာကြတာ ဒီနိဗ္ဗာန်အတွင်းကမ္ဘာ တားမြစ်နယ်မြေထဲ ဝင်ဖို့ပဲ။”
နေရာရှိ ကျောင်းသားများ၏ မျက်ဝန်းထဲတွင် အံ့ဩတကြီး ဖြစ်သွားကြသည်။
အားလုံး နိုးထလာကြတာ ထိုက်ဟောင် ဟွမ်းယောင်လောက် စွမ်းအားရှိကြတာလား။
“ကြည့်ရတာ နေမင်းခုနစ်ပါးခန်းမ... ကောင်းကင်ပြောင်းလဲခြင်းနဲ့ ကြုံရတော့မှာပဲ။”
နေမင်းခုနစ်ပါး ကျောင်းသားတစ်ဦးက ရေရွတ်လိုက်သည်။ တစ်ချိန်တည်းမှာပင် ကျန်ရှိနေသေးသော သူတော်စင်ဧကရာဇ် စီမံကိန်းဝင်များကို ရှာဖွေရန် မျက်လုံးများဖြင့် ဝေ့ကြည့်နေကြသည်။
“ဒါဆိုရင် ငါသာ ဒီစီမံကိန်းထဲ ဝင်လိုက်ရင် စီမံကိန်းကို စတင်သူ ခြောက်ဦးမြောက် ဖြစ်လာပြီး မင်းတို့ကို အမိန့်ပေးလို့ ရမလား ”
ဖန့်ချန်၏ စကားကြောင့် ထိုက်ဟောင် ဟွမ်းယောင်မှာ တိတ်ဆိတ်သွားသည်။
“ကြည့်ရသလောက်တော့ မရဘူးပေါ့။ ဒါဆိုရင် မင်းတို့ စီမံကိန်းထဲ ဝင်တာက ဘာအဓိပ္ပာယ် ရှိလို့လဲ အဲဒီ ငါးဦးရဲ့ အမိန့်ကို နာခံဖို့ သက်သက်လား ”
ဖန့်ချန်က စဉ်းစားဟန်ဖြင့် -
“ငါ ကမ္ဘာတည်ဆောက်ခြင်းအဆင့် နောက်ပိုင်းကို ရောက်သွားတဲ့အခါ ဘယ်သူက ပိုသန်မာသလဲဆိုတာ မပြောနိုင်တော့ဘူးလေ။”
“ရိုင်းစိုင်းလှချည်လား”
အေးစက်သော အော်သံတစ်ခု ထွက်ပေါ်လာသည်။
“ချီထျန်းမျိုးနွယ်စုကလား”
ကျောင်းသားများ၏ အကြည့်များမှာ ထိုကျောင်းသားထံသို့ စုပြုံကျရောက်သွားသည်။ သူတို့၏ အကြည့်တွင် လေးနက်မှု၊ ကြောက်ရွံ့မှုတို့နှင့်အတူ သိလိုစိတ်တို့ ရောပြွမ်းနေသည်။
တန်လင် ကျောင်းတော်မှ ရောက်လာသည့် ချီထျန်းမျိုးနွယ်စုဝင်များပင် အံ့အားသင့်နေကြသည်။
ဘာကြောင့်ဆိုသော် ဤကျောင်းသားမှာ အလွန်စိမ်းသက်နေပြီး သူတို့ မည်သည့်အခါကမှ မမြင်ဖူးသောကြောင့် ဖြစ်သည်။ အစကတည်းက သူက အလွန်ပင် တိတ်ဆိတ်နေသဖြင့် သူတို့အပြင် တခြားချီထျန်း ကျောင်းသားများ ရှိနေသေးသည်ကိုပင် မသိလိုက်ကြပေ။
ထိုချီထျန်း ကျောင်းသားမှာ ထိုက်ဟောင် ဟွမ်းယောင်၏ ရှေ့သို့ ဖြည်းညှင်းစွာ လျှောက်သွားပြီး ဖန့်ချန်ကို အေးစက်သော မျက်ဝန်းဖြင့် စိုက်ကြည့်လိုက်သည်။
“ကောင်စုတ်လေး၊ မင်းက အကြီးအကဲငါးဦးကို ယှဉ်ပြိုင်ချင်တာလား ”
“အကြီးအကဲငါးဦး မင်းတို့က စီမံကိန်း စတင်သူတွေကို ဒီလို ခေါ်တာလား ”
ဖန့်ချန်က စိတ်ဝင်တစား မေးလိုက်သည်။
သို့သော် ထိုသူက ဖန့်ချန်၏ မေးခွန်းကို မဖြေဘဲ ထိုက်ဟောင် ဟွမ်းယောင်ကိုသာ ကြည့်လိုက်သည်။
“ထိုက်ဟောင် ဟွမ်းယောင်၊ နင် အိပ်ပျော်နေတာ ကြာလွန်းလို့ ဦးနှောက်ပါ လည်ပတ်မှု မကောင်းတော့တာပဲ။”
“သူက သူတော်စင်ဧကရာဇ် စီမံကိန်းထဲ ဝင်ဖို့ လုံးဝ စိတ်မရှိဘူးဆိုတာ နင် မမြင်ဘူးလား ”
“နင်ကပဲ သူ့ကို စကားတွေ အကုန် ထုတ်ပြောမိနေတာ။”
ထိုက်ဟောင် ဟွမ်းယောင်၏ မျက်နှာမှာ တစ်ခဏချင်း ပြောင်းလဲသွားပြီး ဖန့်ချန်ကို လှည့်ကြည့်လိုက်သည်။
“နင် ငါ့ကို စကားတွေ ထုတ်ဖော်ခိုင်းနေတာလား ”
“ဘာကို စကားထုတ်ဖော်တာလဲ နင်က ငါ့ကို စီမံကိန်းထဲ ဝင်ခိုင်းတာလေ၊ ငါ့အနေနဲ့ ဒီစီမံကိန်းကို သေချာ မသိရဘဲ ဘယ်လို ရွေးချယ်မှုမျိုး လုပ်ရမှာလဲ ”
ဖန့်ချန်က ခေါင်းခါလိုက်သည်။
ထိုက်ဟောင် ဟွမ်းယောင်၏ မျက်နှာမှာ မည်းမှောင်သွားသည်။
“ဒါဆိုရင် နင် ရွေးချယ်မှု လုပ်ရတော့မယ်။ ငါတို့နဲ့ ပူးပေါင်းမလား၊ နင့်ရဲ့ စွမ်းအားက အတော်လေး သန်မာပေမယ့်... ငါတို့လည်း အားနည်းတာ မဟုတ်ဘူး ”
“ငါ့ရဲ့ စာမေးပွဲ အောင်မြင်ပြီးမှ ဆုံးဖြတ်ချက် ချပါ့မယ်။”
ဖန့်ချန်က ရယ်မောလျက် -
“ငါ့ရဲ့ စာမေးပွဲစစ်ဆေးသူ ရောက်လာတော့မယ်။ ဒီတစ်ခါ ရွှမ်နယဲ့ အဆင့်မြင့် စာမေးပွဲ ဖြစ်လိမ့်မယ်။ ငါ အောင်နိုင်မလား မသေချာဘူး၊ အာရုံလွှဲလို့ မဖြစ်ဘူး။”
စာမေးပွဲစစ်ဆေးသူသစ်မှာ ဖန့်ချန်၏ ရှေ့သို့ ရောက်ခါနီးပြီ ဖြစ်သည်။
ထိုက်ဟောင် ဟွမ်းယောင်မှာ တွေဝေသွားသော်လည်း ဘေးနားရှိ ချီထျန်း ကျောင်းသားကမူ အေးစက်စွာ ပြောလိုက်သည်။
“မင်းရဲ့ လက်ရှိအခြေအနေက ငါတို့ စီမံကိန်းအပြင်ဘက် ရောက်နေပြီ။ မင်းကို ဒီအတိုင်း လွှတ်ထားရင် သူတော်စင်ဧကရာဇ် စီမံကိန်းက ရယ်စရာ အဖြစ်ဆုံး ဖြစ်သွားလိမ့်မယ်။”
“စီမံကိန်းထဲမှာ ပါဝင်တဲ့သူတွေသာ ဆန်းနယဲ့အဆင့် ခေါင်းစဉ်ကို ယှဉ်ပြိုင်ဖို့ အရည်အချင်း ရှိတယ်။”
“ခွေးကောင်”
“မောက်မာလိုက်တာ”
“ဖန်ရုကန်၊ နင့်ရဲ့ ဘွဲ့တံဆိပ်လည်း အလုခံရတော့မှာပဲ၊ ဟုတ်လား”
“သူတို့က အစကတည်းက ငါတို့ကို ဒီနေရာမှာ အကျိုးအမြတ် ခံစားခွင့် မပေးဖို့ ကြံရွယ်ထားတာပဲ။ ငါတို့ကို လမ်းပြ သူရဲကောင်းတွေလို့ပဲ သဘောထားနေတာ ”
“ဖန့်ချန်သာ စာမေးပွဲကို သူတို့ ထိန်းချုပ်နိုင်တဲ့ အတိုင်းအတာထက် ကျော်လွန်အောင် မလုပ်ခဲ့ရင် ငါတို့ကို လမ်းပြခိုင်းပြီး သူတို့က ပုန်းနေကြဦးမှာပဲ။”
ကျောင်းသားအားလုံးမှာ ဒေါသထွက်နေကြသည်။ ခုနကအထိ သူတို့တစ်ခုကို သေချာ မြင်လိုက်ရသည်။
သူတော်စင်ဧကရာဇ် စီမံကိန်းဝင်များသည် အလွန်မြင့်မားသော အဆင့်အတန်း ရှိသည်။ ကောင်းကင်နယ်မြေ ငါးခုလုံး၏ အကျိုးအမြတ်များသည် သူတို့အတွက်သာ ဖြစ်သည်။
ဒီကျောင်းသားတွေကို နိဗ္ဗာန်အတွင်းကမ္ဘာ တားမြစ်နယ်မြေမှာ ဘာအကျိုးအမြတ်မှ မရစေရဘူးလို့ စည်းကမ်းချက် ထုတ်ထားသလိုပင်။
“မင်းက ချီထျန်းမျိုးနွယ်စုကပေါ့၊ ဘယ်သူလို့ ခေါ်တာလဲ"
ဖန့်ချန်က ရုတ်တရက် မေးလိုက်သည်။
“စီကု ငါ့နာမည်က စီကုဂျူ။”
စီကုဂျူက အေးစက်စွာ ပြောသည်။
“အိုး... စီကု ၊ ငါ မှတ်မိပြီ။ ငါ့ရဲ့ စာမေးပွဲ ပြီးမှ မင်းကို ပြန်ပြောပြမယ်။”
ဖန့်ချန်က ပြောပြီးနောက် စာမေးပွဲစစ်ဆေးသူထံသို့ လျှောက်သွားလိုက်သည်။
စီကုဂျူမှာ ဒေါသထွက်သွားပြီး အော်ဟစ်လိုက်သည်။
“တိုက်ခိုက်”
တစ်ခဏချင်းမှာပင် မသိမသာ ဝှက်ထားသော အရှိန်အဝါများမှာ ရုတ်တရက် ပေါက်ကွဲထွက်လာသည်။
ဖန့်ချန်၏ မျက်ဝန်းထဲတွင် အထင်သေးသည့် အပြုံးတို့ ပေါ်လာသည်။
သူတို့၏ စိတ်ထဲရှိ သတ်ဖြတ်လိုစိတ်များသည် ဖန့်ချန်၏ ခုနစ်ပါးသတ်ဖြတ်ခြင်း သူတော်စင်မျက်လုံးအောက်တွင် မည်သို့မျှ မဖုံးကွယ်နိုင်ပေ။
ထိုသတ်ဖြတ်လိုစိတ်များသည် နိဗ္ဗာန်အတွင်းကမ္ဘာ တားမြစ်နယ်မြေထဲ မဝင်ခင်ကတည်းက ရှိနေခဲ့သည်။
သူက အမြဲတမ်း သတိထားနေခဲ့သည်။
“အသက်ကြီးလို့၊ လူများလို့ ငါ့ကို ဖိနှိပ်လို့ ရမယ် မထင်နဲ့။”
“သူတော်စင်ဧကရာဇ် စီမံကိန်း”
“ခွေး၊ ကြက် အဆင့်လောက်ပဲ ရှိတာပါ”
ဖန့်ချန်သည် ရုတ်တရက် လှည့်ကြည့်လိုက်ပြီး ထိုသတ်ဖြတ်ရန် ချဉ်းကပ်လာသော သူတော်စင်ဧကရာဇ် စီမံကိန်းဝင်များကို ကြည့်လိုက်သည်။ သူ၏ မျက်ဝန်းထဲတွင် မီးခိုးရောင် အငွေ့အသက်တို့ လွှမ်းခြုံသွားသည်။
ခုနစ်ပါးသတ်ဖြတ်ခြင်း သူတော်စင်မျက်လုံး
တစ်ခဏချင်းပင် ထိုက်ဟောင် ဟွမ်းယောင်ထက် မညံ့သော ထိုသူတို့မှာ ပိုမိုပြင်းထန်သော သတ်ဖြတ်လိုစိတ်တို့၏ ဝါးမြိုခြင်းကို ခံလိုက်ရပြီး မြေပြင်ပေါ်သို့ လဲကျကာ သွေးအန်တော့သည်။
သူတို့ သတိဝင်လာချိန်တွင် ဖန့်ချန်မှာ စာမေးပွဲနယ်မြေထဲသို့ ဝင်ရောက်သွားခဲ့ပြီ ဖြစ်သည်။