အခန်း ၃၁၇

အခန်း ၃၁၇။ ဟိုင်ပါ နတ်ဘုရား မျိုးနွယ်စုနှင့် အကျိုးအမြတ် များပြားခြင်း

"မင်းက လောကအရှင်သခင် ပဲ"

ချောက်နက် အရိုးနဂါး မျက်နှာ အလွန် ပျက်သွားပြီး လုံးဝ အန္တရာယ် ရှိသွားပြီ ဖြစ်ကြောင်း ခံစားလိုက်ရလေသည်။ သူကိုယ်တိုင်လည်း လောကအရှင်သခင် တစ်ပါး ဖြစ်သဖြင့် လောကအရှင်သခင် ၏ အစွမ်းအထက်မှုကို ကောင်းစွာ သိရှိထားလေသည်။

ချဲ့ကား ပြောရမည် ဆိုလျှင် အဆင့်မြင့် နတ်ဘုရား + လောကအရှင်သခင် + ကိုယ်ပိုင် လောက = ပြိုင်ဘက်ကင်း။

ဤပြိုင်ဘက်ကင်း ဆိုသည်မှာ နောက်ပြောင်နေခြင်း မဟုတ်ပေ။ အဆင့်မြင့် အထွတ်အထိပ် နတ်ဘုရားနှင့် ပြီးပြည့်စုံသော နတ်ဘုရားများ မလာသရွေ့ လောကအရှင်သခင် ဆိုသည်မှာ မိမိ၏ လောကတွင် လုံးဝ ပြိုင်ဘက်ကင်းသော တည်ရှိမှု ဖြစ်လေသည်။

"ဒါကြောင့် မင်း ကောင်းကင်ယံတိုက်ကြီး ကို ခြေချလိုက်တဲ့ အချိန်ကစပြီး... မင်းရဲ့ ကံကြမ္မာ က အဆုံးအဖြတ် ပေးပြီးသား ဖြစ်သွားပြီ" မုန်လဲ့က လက်နောက်ပစ်ကာ "အဲဒါကတော့... သေဖို့ပဲ" ဟု ပြောလိုက်သည်။

"ငါ့ကို သတ်ဖို့ ဆိုတာ... အဲဒီလောက်လည်း မလွယ်ပါဘူး"

ချောက်နက် အရိုးနဂါး က ဒေါသတကြီး ဟိန်းဟောက်လိုက်ပြီး နဂါး ခန္ဓာကိုယ် တစ်ချက် တုန်ခါသွားရာ လောကစွမ်းအား၏ ဖိနှိပ်မှုကို ချက်ချင်း ရုန်းထွက်သွားလေသည်။

အဆင့်မြင့် နတ်ဘုရားနှင့် ညီမျှသော ကြီးမားလှသည့် မိစ္ဆာနတ်ဘုရားကြီး တစ်ပါး အနေဖြင့် လောကစွမ်းအားက သူ့ကို အချိန်ကြာမြင့်စွာ ဖိနှိပ်ထားနိုင်စွမ်း မရှိဘဲ အသက်ရှူကြိမ် နှစ်ကြိမ် သုံးကြိမ်ခန့်သာ ဖိနှိပ်ထားနိုင်ပြီး ချက်ချင်း ရုန်းထွက်သွားနိုင်လေသည်။

"လူသား နတ်ဘုရား... ငါ မင်းကို မှတ်ထားမယ်"

ချောက်နက် အရိုးနဂါး က မုန်လဲ့ကို မျက်တောင်မခတ်ဘဲ စိုက်ကြည့်လိုက်ပြီး နဂါးလက်သည်းဖြင့် ဖြည်းညင်းစွာ ရိုက်ချလိုက်ရာ လေဟာနယ်တွင် အမည်းရောင် အပေါက်ကြီး တစ်ခု ဖြစ်ပေါ်လာပြီး ထိုအမည်းရောင် အပေါက်ကြီးထဲသို့ ဝင်ရောက်သွားလေသည်။

"ပြေးချင်လို့လား"

မုန်လဲ့က ခေါင်းခါလိုက်ပြီး "လာချင်တိုင်း လာ... သွားချင်တိုင်း သွားရအောင် ဒီနေရာကို မင်း ဘာများ မှတ်နေလို့လဲ... ဈေးဝယ်စင်တာ လို့များ ထင်နေလား" ဟု ပြောလိုက်သည်။

စကားဆုံးသည်နှင့် မုန်လဲ့က အမည်းရောင် အပေါက်ကြီး အရှေ့သို့ နေရာရွှေ့ပြောင်းသွားပြီး ချောက်နက် အရိုးနဂါး ၏ အမြီးကို လှမ်းဆွဲကာ အမည်းရောင် အပေါက်ကြီးထဲမှ ပြန်လည် ဆွဲထုတ်လာလေသည်။

"သေနာကောင်"

ချောက်နက် အရိုးနဂါး ၏ ခေါင်းရိုး အတွင်းရှိ ရွှေရောင် နတ်ဘုရား မီးတောက်မှာ ပြင်းထန်စွာ တုန်ခါသွားပြီး ဒေါသတကြီး နတ်ဘုရားဝိညာဉ် လှိုင်းများ ပျံ့နှံ့လာကာ "လူသား နတ်ဘုရား... မင်း လွန်လွန်းနေပြီ" ဟု အော်ဟစ်လိုက်သည်။

"အပို စကားတွေ မပြောချင်တော့ဘူး"

မုန်လဲ့က အေးစက်စက် နှာခေါင်းရှုံ့လိုက်ပြီး လက်ဝှေ့ယမ်းကာ "မင်းကို အခွင့်အရေး တစ်ခု ပေးမယ်... နတ်ဘုရားဝိညာဉ် အရင်းအမြစ် ကို ပေးပြီး ငါ့ကို အညံ့ခံရင်... ရှင်မယ်... အဲဒီလိုမှ မဟုတ်ရင်... သေမယ်" ဟု ပြောလိုက်သည်။

"ဝုန်း..."

ချောက်နက် အရိုးနဂါး က ဒေါသတကြီး ဟိန်းဟောက်လိုက်ပြီး "ငါက ကြီးမြတ်တဲ့ ဧရာမ နဂါး နတ်ဘုရား မျိုးနွယ်စု ကွ... အဆင့်နိမ့်ကျတဲ့၊ ယုတ်မာတဲ့ ဒေသခံ ပိုးကောင် တစ်ကောင်ကို ဘယ်လိုလုပ် အညံ့ခံမှာလဲ... အိပ်မက် မက်နေလိုက်" ဟု ပြန်ပြောလိုက်သည်။

"ဒါဆိုရင်လည်း သေလိုက်စမ်း"

မုန်လဲ့က စကား တစ်ခွန်းမှ ထပ်မပြောချင်တော့ဘဲ ချောက်နက် အရိုးနဂါး အရှေ့သို့ နေရာရွှေ့ပြောင်းသွားပြီး ညာလက်သီးတွင် ကြမ်းတမ်းလှသော စွမ်းအားများကို စုစည်းကာ ပြင်းထန်စွာ ထိုးချလိုက်လေသည်။

"ခွပ်..."

ချောက်နက် အရိုးနဂါး က ရှောင်တိမ်းရန် ကြိုးစားသော်လည်း လောကစွမ်းအားက အချိန်မီ ရောက်ရှိလာပြီး သူ့ကို နေရာမှာတင် ချက်ချင်း ဖိနှိပ်ထားလိုက်လေသည်။

ထိုသို့ ဖိနှိပ်ခံလိုက်ရသည့် အချိန်လေး အတွင်းမှာပင် မုန်လဲ့၏ လက်သီးက ၎င်း၏ ခေါင်းရိုးပေါ်သို့ တည့်တည့် ကျရောက်သွားလေသည်။

"ခွပ်..."

ရွှေရောင် ခေါင်းရိုးကြီးမှာ ချက်ချင်း ကွဲအက်သွားပြီး မျက်နှာပြင်တွင် အက်ကွဲကြောင်းများ အမြောက်အမြား ဖြစ်ပေါ်လာကာ... နောက်ဆုံးတွင် 'ဘုန်း' ဆိုသော အသံနှင့်အတူ ပေါက်ကွဲထွက်သွားပြီး လက်သီး တစ်ချက်တည်းဖြင့် ဖောက်ခွဲခံလိုက်ရလေသည်။

ခေါင်းရိုး မရှိတော့သဖြင့် ချောက်နက် အရိုးနဂါး ၏ နတ်ဘုရား မီးတောက်မှာ နေစရာ နေရာ မရှိတော့ဘဲ ကြီးမားလှသော နဂါး ခန္ဓာကိုယ်နှင့် ကွဲကွာသွားကာ နဂါး ခန္ဓာကိုယ်ကြီးမှာ မြေပြင်ဆီသို့ တည့်တည့် ကျဆင်းသွားလေသည်။

အရှည် ကျန်း ခြောက်သိန်း ရှိသော အရိုးနဂါး ခန္ဓာကိုယ်ကြီးသာ မြေပြင်ပေါ်သို့ ပြုတ်ကျသွားမည် ဆိုပါက ၎င်းဖြစ်ပေါ်စေမည့် ပျက်စီးဆုံးရှုံးမှုမှာ လကမ္ဘာကြီး ကမ္ဘာမြေပေါ်သို့ ပြုတ်ကျလာခြင်းထက်ပင် ပိုမို ကြီးမားမည်မှာ သေချာလှပေသည်။

"သိမ်းလိုက်"

မုန်လဲ့က ထိုသို့ ဖြစ်လာမည်ကို သေချာပေါက် ခွင့်ပြုမည် မဟုတ်ဘဲ လက်ဝှေ့ယမ်းကာ ကြီးမားလှသော အရိုးနဂါး ခန္ဓာကိုယ်ကြီးကို အချိန်ကာလ မျှော်စင်ထဲသို့ ချက်ချင်း သိမ်းဆည်းလိုက်ပြီး ကမ္ဘာပျက်မည့် ဘေးအန္တရာယ်ကြီး တစ်ခုကို ကာကွယ်လိုက်လေသည်။

ယခုအချိန်တွင် လေထဲ၌ ရွှေရောင် နတ်ဘုရား မီးတောက် တစ်ခုသာ ကျန်ရှိတော့ပြီး အလွန် ဒေါသထွက်နေကာ "အဆင့်နိမ့်ကျတဲ့ ဒေသခံ ပိုးကောင်... ငါ့ရဲ့ ကိုယ်ပွားကို မင်းက ဖျက်ဆီးရဲတယ်ပေါ့... မင်းနဲ့ ငါနဲ့ကတော့ ဘယ်တော့မှ မပြီးဆုံးတဲ့ ရန်သူတွေ ဖြစ်သွားပြီ" ဟု ရူးသွပ်စွာ အော်ဟစ်နေလေသည်။

"ဟီးဟီး... မင်း လာသေမယ့် အချိန်ကို အမြဲတမ်း စောင့်ကြိုနေပါတယ်" မုန်လဲ့က လှောင်ပြောင်လိုက်ပြီး လေဟာနယ်ကို လက်ညှိုးတစ်ချောင်းဖြင့် ဖြည်းညင်းစွာ ထိုးလိုက်ကာ "ရပ်" ဟု ပြောလိုက်သည်။

လောကစွမ်းအား ရောက်ရှိလာပြီး ချောက်နက် အရိုးနဂါး ၏ ရွှေရောင် နတ်ဘုရား မီးတောက်ကို နေရာမှာတင် ချက်ချင်း ဖိနှိပ်ထားလိုက်ရာ မုန်လဲ့က လက်တစ်ချက် ဝှေ့ယမ်းပြီး ရွှေရောင် နတ်ဘုရား မီးတောက်ကို ချက်ချင်း ဖမ်းဆုပ်လိုက်လေသည်။

ထို့နောက် ဖြစ်လာမည့် အရာများကို ပြောနေစရာပင် မလိုတော့ပေ။

မုန်လဲ့က နတ်ဘုရားဝိညာဉ် စွမ်းအားများကို ထုတ်လွှတ်လိုက်ပြီး ချောက်နက် အရိုးနဂါး ၏ နာကျင်စွာ အော်ဟစ်သံများ ကြားတွင် ရွှေရောင် နတ်ဘုရား မီးတောက်ကို ရူးသွပ်စွာ ဖျက်ဆီးပစ်လိုက်ကာ ၎င်း၏ မှတ်ဉာဏ်များကို ဖတ်ရှုလိုက်လေသည်။

"အမ်ဘရို့စ် ဟိုင်ပါ တဲ့လား... မိုးကြိုး နတ်ဘုရားလောက က ဟိုင်ပါ ဧရာမ နဂါး နတ်ဘုရား မျိုးနွယ်စု ရဲ့ အကြီးအကဲ တစ်ယောက် တဲ့လား"

မှတ်ဉာဏ်များကို အဆက်မပြတ် ဖတ်ရှုပြီးနောက် အမည်းရောင် ဝတ်ရုံနှင့် လူလတ်ပိုင်းနှင့် ပတ်သက်သော အချက်အလက်များကို မုန်လဲ့ တဖြည်းဖြည်း သိရှိလာလေသည်။

အမည်းရောင် ဝတ်ရုံနှင့် လူလတ်ပိုင်းသည် မိုးကြိုး နတ်ဘုရားလောက ရှိ ဟိုင်ပါ ဧရာမ နဂါး နတ်ဘုရား မျိုးနွယ်စု ၏ အကြီးအကဲ တစ်ယောက် ဖြစ်နေလေသည်။

ဧရာမ နဂါး နတ်ဘုရား မျိုးနွယ်စု ဆိုသည်မှာ အစွမ်းအထက်ဆုံး နတ်ဘုရား မျိုးနွယ်စုများ အနက် တစ်ခု အပါအဝင် ဖြစ်ပြီး လောကပေါင်း သန်းနှင့်ချီတွင် ပျံ့နှံ့နေထိုင်ကာ အမြင့်ဆုံး ကောင်းကင်ဘုံ နှင့် လောကပေါင်း သန်းနှင့်ချီတွင် မျိုးဆက်များ ရှိကြလေသည်။

ဟိုင်ပါ ဧရာမ နဂါး နတ်ဘုရား မျိုးနွယ်စု ဆိုသည်မှာ မိုးကြိုး နတ်ဘုရားလောက ရှိ ဧရာမ နဂါး နတ်ဘုရား မျိုးနွယ်စု ၏ အခွဲ တစ်ခု ဖြစ်ပြီး စွမ်းအားကို ကြည့်မည် ဆိုပါက မိုးကြိုး နတ်ဘုရားလောက ရှိ သီအိုဒို မိသားစု ထက် လုံးဝ မနိမ့်ကျပေ။

ဟိုင်ပါ နတ်ဘုရား မျိုးနွယ်စု တွင် ပြီးပြည့်စုံသော နတ်ဘုရား များ ရှိရုံသာမက အထွတ်အထိပ်သို့ ရောက်ရှိနေသော ပင်မနတ်ဘုရား တစ်ပါးပင် ရှိသေးရာ မိုးကြိုး နတ်ဘုရားလောက ၏ အစွမ်းအထက်ဆုံး အင်အားစုများ အနက် တစ်ခု အပါအဝင် ဖြစ်လေသည်။

အမည်းရောင် ဝတ်ရုံနှင့် လူလတ်ပိုင်း၊ တစ်နည်းအားဖြင့် အမ်ဘရို့စ် ၏ အစစ်အမှန် ကိုယ်ခန္ဓာမှာ အခြေခံ နိယာမ ၄ မျိုးကို ပေါင်းစပ်ထားပြီး ဟိုင်ပါ နတ်ဘုရား မျိုးနွယ်စု ၏ အကြီးအကဲ တစ်ယောက် ဖြစ်လေသည်။

ဤချောက်နက် အရိုးနဂါး မှာ သူ ဖန်တီးထားသော မိစ္ဆာ ကိုယ်ပွား တစ်ခုသာ ဖြစ်ပြီး အဆင့်နိမ့် လောက များသို့ သွားရောက်ကာ အရေးပေါ် ကိစ္စများကို ဖြေရှင်းရန် အရန် အနေဖြင့် အသုံးပြုခြင်း ဖြစ်လေသည်။

"ဟိုင်ပါ နတ်ဘုရား မျိုးနွယ်စု က ဒီလောက်တောင် အစွမ်းထက်နေတာပဲ"

မုန်လဲ့ လေပူတစ်ချက် မှုတ်ထုတ်လိုက်သည်။ အမည်းရောင် ဝတ်ရုံနှင့် လူလတ်ပိုင်း ဆိုသည့် အမ်ဘရို့စ် ကို သူ အနည်းငယ်မျှ မကြောက်ရွံ့ပေ။ သူက အခြေခံ နိယာမ ၄ မျိုးကို ပေါင်းစပ်ထားသော အဆင့်မြင့် နတ်ဘုရား တစ်ပါးသာ ဖြစ်လေသည်။

မုန်လဲ့ ကြောက်ရွံ့သည်မှာ ကြီးမားလှသော ဟိုင်ပါ နတ်ဘုရား မျိုးနွယ်စု ကြီးကိုပင် ဖြစ်လေသည်။

ပင်မနတ်ဘုရား ရှိတယ် ဟုတ်လား။

ပင်မနတ်ဘုရား ဆိုတဲ့ စကားလုံး နှစ်လုံးကတင် မုန်လဲ့ကို ကြောက်လန့်သွားစေဖို့ လုံလောက်နေပြီ။

"ကြည့်ရတာ... ပင်မနတ်ဘုရား တွေကို ရင်ဆိုင်နိုင်တဲ့ စွမ်းအား မရှိသေးသရွေ့... မိုးကြိုး နတ်ဘုရားလောက ကို သိပ်မသွားတာ ကောင်းမယ် ထင်တယ်"

မုန်လဲ့ တိုးတိုးလေး ရေရွတ်လိုက်သည်။ ဤတစ်ကြိမ်တွင်တော့ အမည်းရောင် ဝတ်ရုံနှင့် လူလတ်ပိုင်း ဆိုသည့် အမ်ဘရို့စ် ကို သူ လုံးဝ အသေသတ်ပစ်လိုက်ပြီ ဖြစ်သည်။

သေချာသည်မှာ အရေးအကြီးဆုံးကတော့ အချိန်ကာလ မျှော်စင်ပင် ဖြစ်လေသည်။ ဤအရာက ပင်မနတ်ဘုရား များပင် သွားရည်ကျစေနိုင်သည့် ရတနာ တစ်ခု ဖြစ်ရာ လုယူခြင်းများ ကြုံတွေ့ရမည်မှာ သေချာလှပေသည်။

မှတ်ဉာဏ်များကို ဖတ်ရှုပြီးနောက် မုန်လဲ့သည် အမည်းရောင် ဝတ်ရုံနှင့် လူလတ်ပိုင်း၏ လေဟာနယ် လက်စွပ်ကို ထုတ်ယူလိုက်လေသည်။ မိစ္ဆာ ကိုယ်ပွား တစ်ခုသာ ဖြစ်သော်လည်း သယ်ဆောင်လာသော ရတနာများမှာ အလွန် များပြားလှပေသည်။

လေဟာနယ် လက်စွပ် အတွင်းရှိ နေရာမှာ အလွန် ကျယ်ပြောလှပြီး အဆုံးကိုပင် မမြင်ရပေ။ ၎င်းအတွင်းတွင် လောက အပိုင်းအစ တစ်ခုကို ပိတ်လှောင်ထားသဖြင့် ဤမျှ ကြီးမားသော ဧရိယာ ရှိနေခြင်း ဖြစ်ကြောင်း သိသာလှသည်။

ကျယ်ပြောလှသော လေဟာနယ် အတွင်းတွင် ရတနာများ အမြောက်အမြား အပြည့်အနှက် ရှိနေလေသည်။

တောင်ကြီးများအလား ပုံနေသော နိယာမ မူလသလင်းကျောက် များ။

တောင်ကြီးများအလား ပုံနေသော သဘာဝစွမ်းအင် သလင်းကျောက် များ။

တောင်ကြီးများအလား ပုံနေသော နတ်ဘုရား မိစ္ဆာ အလောင်း များ။

ထို့အပြင် တန်ဖိုး မဖြတ်နိုင်သော ဆေးပင်များ၊ မှော်ပစ္စည်းများ၊ နတ်ဘုရား လက်နက်များ၊ မှော်ကျောက်တုံးများ အစရှိသည်တို့ လည်း ပါဝင်လေသည်။

ဤရတနာများ အားလုံးက ပြင်းထန်လှသော နတ်ဘုရား စွမ်းအား လှိုင်းများကို ထုတ်လွှတ်နေပြီး တစ်ခုချင်းစီတိုင်းက တန်ဖိုး မဖြတ်နိုင်သော အရာများ ဖြစ်ကြရာ မုန်လဲ့ တစ်ချက် ကြည့်လိုက်ရုံဖြင့် မျက်လုံးများ ပြူးကျယ်သွားလေသည်။

"အမြတ်ကြီးပဲ... ဒီတစ်ခါတော့ တကယ်ကို အမြတ်ကြီးပဲ" မုန်လဲ့ သွားရည်များပင် ကျလာလေသည်။ "စနစ်... နတ်ဘုရား သလင်းကျောက် တွေနဲ့ နိယာမ မူလသလင်းကျောက် တွေကို အရင် သိမ်းလိုက်... သိမ်းလို့ ရတာ အကုန် သိမ်းလိုက်"

ရွှမ်း... ရွှမ်း... ရွှမ်း...

ကြွယ်ဝမှုက ရူးသွပ်စွာ တိုးတက်လာလေသည်။

နတ်ဘုရား သလင်းကျောက် ၉.၂ သန်း၊ နတ်ဘုရား သလင်းကျောက် ၉.၃ သန်း...

နတ်ဘုရား သလင်းကျောက် ၁၀ သန်း၊ နတ်ဘုရား သလင်းကျောက် ၁၁ သန်း...

စက္ကန့် ဆယ်ဂဏန်းလောက် အတွင်းမှာတင် ကြွယ်ဝမှုက ၂၃.၃ သန်း အထိ ရောက်ရှိသွားပြီး ၁၄.၂ သန်း တောင် တိုးလာကာ အရင်က သုံးခဲ့တဲ့ ၃ သန်း ကို ပြန်ရရုံသာမက နောက်ထပ် ၉ သန်း ကျော်တောင် အမြတ်ထွက်သွားပါသေးတယ်။

သေချာပေါက် အမြတ်ကြီးပဲ။

"သူများ ပစ္စည်းကို လုယူတာက ချမ်းသာဖို့ အတွက် အကောင်းဆုံး လမ်းကြောင်းပဲ" မုန်လဲ့က အလွန် သက်ပြင်းချလိုက်ပြီး လေဟာနယ် လက်စွပ် အတွင်းရှိ ရတနာများကို ဆက်လက် စစ်ဆေးနေလေသည်။

နိယာမ မူလသလင်းကျောက် များနှင့် နတ်ဘုရား သလင်းကျောက် များကို သိမ်းဆည်းလိုက်ပြီးနောက် လေဟာနယ် လက်စွပ် အတွင်းတွင် နေရာ တော်တော်လေး ကျယ်သွားလေသည်။

မုန်လဲ့သည် လက်စွပ် အတွင်းရှိ သဘာဝစွမ်းအင် သလင်းကျောက် များကိုလည်း အချိန်ကာလ မျှော်စင်ထဲသို့ ပြောင်းရွှေ့လိုက်ရာ နေရာ ပိုမို ကျယ်ဝန်းလာလေသည်။

"အခု တစ်လှည့်ကတော့ နတ်ဘုရား မိစ္ဆာ အလောင်း တွေပဲ"

မုန်လဲ့သည် အလယ်အလတ် နတ်ဘုရား အဆင့် အထက်ရှိ အလောင်းများကို သူ ကိုယ်တိုင် အသုံးပြုရန် ရွေးထုတ်လိုက်ပြီး စစ်မှန်သော နတ်ဘုရား နှင့် အဆင့်နိမ့် အဆင့် နတ်ဘုရား အဆင့်ရှိ နတ်ဘုရား မိစ္ဆာ အလောင်းများ အားလုံးကိုတော့ ရွှေရောင် သစ်ပင်ငယ်လေးဆီသို့ ပေးလိုက်လေသည်။

အင်း... ကောင်းတာ ငါ သုံးမယ်၊ ဆိုးတာ မင်း စား... အားလုံး အဆင်ပြေတယ်။

ထို့နောက်တွင်တော့ ဆေးပင်များနှင့် မှော်ပစ္စည်းများ အမြောက်အမြား ရှိနေသေးပြီး ဤအရာများက မုန်လဲ့ အတွက် အသုံးမဝင်သဖြင့် ရွှေရောင် သစ်ပင်ငယ်လေးဆီသို့ ပေးပြီး စားသုံးစေလိုက်လေသည်။

နိယာမ မူလသလင်းကျောက် တွေ၊ နတ်ဘုရား သလင်းကျောက် တွေ မရှိတော့ဘူး။

နတ်ဘုရား မိစ္ဆာ အလောင်းတွေ၊ အကြွင်းအကျန်တွေ မရှိတော့ဘူး။

ဆေးပင်တွေ၊ မှော်ပစ္စည်းတွေ မရှိတော့ဘူး။

လက်စွပ် အတွင်းရှိ နေရာမှာ ပိုမို ကျယ်ဝန်းလာပြီး မုန်လဲ့ကလည်း ပိုမို ရှင်းလင်းစွာ မြင်တွေ့လာရလေသည်။ ကျန်ရှိနေသော ရတနာ အနည်းငယ် ထဲတွင် အထင်ရှားဆုံး အရာမှာ အရောင်စုံလင်စွာ တောက်ပနေသော နတ်ဘုရားအမြုတေ အပုံကြီး တစ်ပုံ ဖြစ်ပြီး အရေအတွက် အများကြီး မဟုတ်သော်လည်း သောင်းနှင့်ချီ ရှိနေလေသည်။