အခန်း ၃၅၃

အခန်း ၃၅၃။ အလယ်အလတ် ရှေးဟောင်းနတ်ဘုရား၊ ပင်မနတ်ဘုရားနှင့် ယှဉ်ပြိုင်နိုင်စွမ်း

ကျန်းတစ်သန်းဆိုသည်မှာ မည်ကဲ့သို့သော သဘောတရားမျိုးဖြစ်သနည်း။

ကျန်းတစ်သန်းဆိုသည်မှာ ကီလိုမီတာ သုံးထောင်နှင့် ညီမျှပေသည်။

ဟာဘင်မှ ယူနန်သို့ တိုက်ရိုက်အကွာအဝေးမှာပင် ကီလိုမီတာ သုံးထောင်ကျော်သာ ရှိပေရာ ယခုအခါ မုန်လဲ့၏ အရပ်အမောင်းမှာ မည်မျှ ကြီးမားမြင့်မားနေကြောင်းကို ခန့်မှန်းကြည့်နိုင်ပေသည်။

၎င်းအပြင် ရွှေရောင်နှင့် အစိမ်းရောင် အလင်းတန်းနှစ်မျိုးကလည်း ကောင်းကင်ယံထက်တွင် တိမ်တိုက်များအလား ရစ်ပတ်လင်းလက်နေပြီး အလွန်တရာ ခမ်းနားထည်ဝါလှသော မြင်ကွင်းကြီးကို ဖန်တီးပေးနေလေသည်။

အဝေးမှ လှမ်းကြည့်မည်ဆိုပါက သေချာပေါက် တန်ဖိုးကြီးရတနာတစ်ခု ထွက်ပေါ်လာခြင်းကြောင့် ဖြစ်ပေါ်လာသော သဘာဝလွန် ဖြစ်စဉ်ကြီးတစ်ခုအလား ထင်မှတ်ရမည် ဖြစ်လေသည်။ ဤမြင်ကွင်းက အဆုံးအစမရှိသောလောက၏ ဒေသခံသက်ရှိများကိုသာမက အခြားသောလောကများမှ ရောက်ရှိနေကြသည့် အစွမ်းထက်သူများကိုပါ ဆွဲဆောင်နိုင်ခဲ့လေသည်။

အစွမ်းထက်သူများအားလုံး မရပ်မနားဖြင့် ဤနေရာဆီသို့ အလုအယက် ပြေးလာနေကြပြီး သူတို့၏ ခြေထောက်များ ပို၍မမြန်နိုင်တော့သည်ကိုသာ နောင်တရနေကြလေတော့သည်။

သို့သော် မုန်လဲ့ကတော့ ထိုအရာများကို သတိမထားမိပေ။ သူက သူ၏ နတ်ဘုရားခန္ဓာကိုယ်အတွင်းရှိ အပြောင်းအလဲများကိုသာ အာရုံခံနေလေသည်။ သူ၏ နတ်ဘုရားခန္ဓာကိုယ် ကြံ့ခိုင်မှုမှာ ယခင်ကထက် များစွာ ပိုမိုအားကောင်းလာကြောင်းကို သိသာထင်ရှားစွာ ခံစားနေရပြီး သက်ရှိစွမ်းအင်များကလည်း ယခင်ကထက် အဆပေါင်း ထောင်သောင်းချီ၍ ပိုမို တက်ကြွလာလေသည်။

"အရမ်းကို ကြောက်စရာကောင်းတဲ့ အရှိန်အဝါပဲ"

"သက်ရှိစွမ်းအင်တွေကလည်း အရမ်းကို ကြီးမားလှပါလား"

ဒိုဒိုလာက အချိန်ကာလမျှော်စင်ထဲမှ အံ့ဩတကြီး ပျံသန်းထွက်လာပြီး သူ၏ မျက်လုံးများထဲတွင် အံ့ဩတုန်လှုပ်မှုများကို ဖုံးကွယ်မထားနိုင်တော့ဘဲ ပြောလိုက်လေသည်။

"မင်း တကယ်ကြီး ပြီးပြည့်စုံတဲ့အဆင့်ကို ရောက်သွားတာလား... တကယ်ကို ယုံနိုင်စရာမရှိအောင်ပဲ..."

မုန်လဲ့၏ ရင်ထဲတွင် လှုပ်ရှားသွားလေသည်။

"ဒိုဒိုလာ ငါ့ရဲ့ နတ်ဘုရားခန္ဓာကိုယ်က ပြီးပြည့်စုံတဲ့အဆင့်နဲ့ ယှဉ်နိုင်သွားပြီလား..."

"ဒီအရှိန်အဝါကတော့ လုံးဝ မှားစရာအကြောင်း မရှိဘူး"

ဒိုဒိုလာက ခေါင်းကို အဆက်မပြတ် ညိတ်ပြလိုက်လေသည်။

"မင်းရဲ့ နားလည်ရခက်တဲ့ စွမ်းအားမြှင့်တင်နိုင်စွမ်းကို အရင်ကတည်းက မြင်ဖူးထားပေမယ့် မင်း အခုလိုမျိုး တစ်ဆင့်ပြီးတစ်ဆင့် ကြီးထွားလာတာကို မျက်စိရှေ့မှာတင် မြင်တွေ့နေရတော့လည်း ငါ တကယ် အံ့ဩနေမိတုန်းပဲ..."

"ဟားဟား မင်း အခုထိ အကျင့်မဖြစ်သေးဘူးလား..."

မုန်လဲ့က ကိုယ်ရေးအချက်အလက်ပြဘုတ်ကို လှမ်းကြည့်လိုက်လေသည်။

အသုံးပြုသူ- မုန်လဲ့

မျိုးနွယ်စု- လူသား (မူလသွေးမျိုးဆက်- ရှေးဟောင်းလူသား သွေးမျိုးဆက် (၃၆ %) ၊ ပေါင်းစပ်သွေးမျိုးဆက်- နတ်ဘုရားသတ်ကြွက် သွေးမျိုးဆက် (လူငယ်)၊ ငရဲမီးလျှံဖီးနစ် သွေးမျိုးဆက်(လူငယ်) ၊ လက်တစ်ရာတိုက်တန် သွေးမျိုးဆက် (လူငယ်) ၊ သက်တမ်းရင့်အသက်သစ်ပင် သွေးမျိုးဆက် (ကလေး) ၊ အေးခဲနေသောနတ်ဘုရားမျိုးနွယ်စု သွေးမျိုးဆက် (ကလေး) ၊ သေမင်းတမန် သွေးမျိုးဆက် (ကလေး)

ကြွယ်ဝချမ်းသာမှု- နတ်ဘုရားသလင်းကျောက် ၂၂.၅ ဘီလီယံ

ခန္ဓာကိုယ်ဖွဲ့စည်းပုံ- ရွှေရောင်မူလနတ်ဘုရားခန္ဓာကိုယ် (အပြည့်အဝ ပြီးပြည့်စုံခြင်း)၊ သစ်သားမူလနတ်ဘုရားခန္ဓာကိုယ် (အပြည့်အဝ ပြီးပြည့်စုံခြင်း)

စိတ်စွမ်းအား- အဆင့်မြင့်နတ်ဘုရား (အလယ်အလတ်အဆင့်)

နတ်ဘုရားစွမ်းအား- နတ်ဘုရားသလင်းကျောက် ၂၀၀

နိယာမတရား နားလည်သဘောပေါက်မှု-

သုံးမျိုးပေါင်းစပ်- လေ၊ အလင်း၊ အမှောင် (၀.၁ %)၊ သတ္တု၊ သစ်သား၊ မြေ (၀.၁ %)၊ မြေ၊ သစ်သား၊ လျှပ်စီး (၀.၁ %)၊ သတ္တု၊ အမှောင်၊ ရေခဲ (၀.၁ %)၊ မြေ၊ ရေ၊ သတ္တု (၀.၁ %)

လေးမျိုးပေါင်းစပ်- ရေခဲ၊ သတ္တု၊ အမှောင်၊ မီး (၀.၁ %)၊ မြေ၊ ရေ၊ မီး၊ အလင်း (၀.၁ %)

မွေးရာပါစွမ်းရည်- နေရာရွှေ့ပြောင်းခြင်း၊ အမှောင် (လျှပ်စီး) ဒြပ်စင်အဖြစ် ပြောင်းလဲခြင်း၊ ပို့ဆောင်ခြင်း၊ အကြွင်းမဲ့ သုညဒီဂရီ၊ ပြန်လည်မွေးဖွားခြင်း၊ ငရဲရေခဲနက်၊ သေမင်းတမန်၏ မျက်လုံး (အမြင့်ဆုံး)၊ ငရဲမီးလျှံ (အမြင့်ဆုံး)

"ငါ့ရဲ့ အခုလက်ရှိ ကိုယ်ရေးအချက်အလက်က တကယ်ကို ကြွယ်ဝခမ်းနားနေပြီလို့ ပြောလို့ရတယ်"

"ရှေးဟောင်းနတ်ဘုရားအဆင့်ရှိတဲ့ ရှေးဟောင်းလူသား သွေးမျိုးဆက်၊ သက်တမ်းရင့်အသက်သစ်ပင် သွေးမျိုးဆက်နဲ့ တခြားသွေးမျိုးဆက်တွေ အများကြီး"

"ရွှေရောင်မူလနတ်ဘုရားခန္ဓာကိုယ်နဲ့ သစ်သားမူလနတ်ဘုရားခန္ဓာကိုယ်"

"ပြီးပြည့်စုံတဲ့အဆင့်နဲ့ ယှဉ်နိုင်တဲ့ ခိုင်မာတောင့်တင်းတဲ့ ရုပ်ပိုင်းဆိုင်ရာ ခန္ဓာကိုယ်"

"ပြီးတော့ နတ်ဘုရားသလင်းကျောက် ၂၂.၅ ဘီလီယံ ဆိုတဲ့ ကြီးမားတဲ့ ကြွယ်ဝချမ်းသာမှု၊ မြင့်မားတဲ့ နိယာမတရား နားလည်သဘောပေါက်မှုနဲ့ မွေးရာပါစွမ်းရည် အများကြီး..."

"ငါ ပိုပြီး အစွမ်းထက်လာပြီ..."

မုန်လဲ့က စနစ်ကို စတင်ရရှိခဲ့ချိန်က သူ၏ အလွန်စုတ်ပြတ်သတ်နေသော ကိုယ်ရေးအချက်အလက်လေးကို ပြန်လည်သတိရမိသွားလေသည်။

အသုံးပြုသူ- မုန်လဲ့

မျိုးနွယ်စု- လူသား

ကြွယ်ဝချမ်းသာမှု- ၀

ခန္ဓာကိုယ်ဖွဲ့စည်းပုံ- သာမန်လူ (၀.၅/၁၀)

စိတ်စွမ်းအား- သာမန်လူ (၁/၁၀)

အခြား- မရှိ

အခုအခြေအနေနှင့် ထိုအချိန်က အခြေအနေ နှစ်ခုကို နှိုင်းယှဉ်ကြည့်လိုက်မည်ဆိုပါက တစ်ခုက ကောင်းကင်ယံတွင်ရှိနေပြီး အခြားတစ်ခုကတော့ မြေအောက်ထဲတွင် ရှိနေသကဲ့သို့ လုံးဝ နှိုင်းယှဉ်၍မရနိုင်အောင်ပင် ကွာခြားလွန်းလှပေသည်။

"အဲဒီအချိန်က ငါဟာ တကယ့်ကို အမှိုက်တစ်စပါပဲ..."

"ဒါပေမဲ့ ဆယ်နှစ်တောင် မပြည့်သေးတဲ့ အချိန်အတွင်းမှာ..."

"ငါက နတ်ဘုရားတွေအားလုံးရဲ့ အထွတ်အထိပ်မှာ ရပ်တည်နေနိုင်ခဲ့ပြီ... ပြီးပြည့်စုံတဲ့ အဆင့်မြင့်နတ်ဘုရားကို ယှဉ်ပြိုင်နိုင်တဲ့ စွမ်းအားကိုလည်း ပိုင်ဆိုင်နေခဲ့ပြီ..."

"ဒီလို ဖြတ်သန်းလာခဲ့ရတဲ့ လမ်းခရီးက အိပ်မက်တစ်ခုမက်နေရသလိုပဲ..."

"ဒါပေမဲ့ မလုံလောက်သေးဘူး အများကြီး လိုသေးတယ်..."

"ငါက ဒီစကြဝဠာတစ်ခုလုံးမှာ အစွမ်းအထက်ဆုံးသူ ဖြစ်လာရမယ်..."

ကိုယ်ရေးအချက်အလက်ပြဘုတ်ကို ထပ်မံကြည့်ရှုလိုက်သောအခါ ငွေကုန်စရာ နေရာများက အများအပြား ရှိနေသေးကြောင်း တွေ့လိုက်ရလေသည်။ ယခုအချိန်၌ အချက်တစ်ခုစီကို အဆင့်မြှင့်တင်ရန်အတွက်ပင် နတ်ဘုရားသလင်းကျောက် ဘီလီယံနှင့်ချီ၍ လိုအပ်နေပေပြီ။

ဥပမာအားဖြင့် သွေးမျိုးဆက်အချို့ကို အဆင့်မြှင့်တင်ရာတွင် တစ်မျိုးစီအတွက် နတ်ဘုရားသလင်းကျောက် ၁၀ ဘီလီယံ လိုအပ်လေသည်။ လက်ရှိ သူပိုင်ဆိုင်ထားသော နတ်ဘုရားသလင်းကျောက် ၂၂.၅ ဘီလီယံမှာ သွေးမျိုးဆက် နှစ်ခုကိုသာ အဆင့်မြှင့်တင်ရန် လုံလောက်ပေသည်။ ထို့အပြင် ခန္ဓာကိုယ်ဖွဲ့စည်းပုံကို အဆင့်မြှင့်တင်ရန်လည်း ရှိသေးသည်။

"စနစ် ငါ့ရဲ့ ရုပ်ပိုင်းဆိုင်ရာ ခန္ဓာကိုယ်ကို အဆင့်မြှင့်တင်ဖို့ နတ်ဘုရားသလင်းကျောက် ဘယ်လောက် လိုအပ်မလဲ..."

မုန်လဲ့က သိချင်စိတ်ဖြင့် မေးလိုက်လေသည်။

"အသိပေးချက်... လက်ရှိတွင် အသုံးပြုသူ၏ ခန္ဓာကိုယ်ဖွဲ့စည်းပုံသည် အဆင့်နိမ့် အဆင့် ရှေးဟောင်းနတ်ဘုရားအဆင့်နှင့် ညီမျှပြီး အဆင့်မြှင့်တင်ပြီးပါက အလယ်အလတ် ရှေးဟောင်းနတ်ဘုရားအဆင့်နှင့် ညီမျှသွားမည်ဖြစ်ပါသည် ခန့်မှန်းခြေ အဆင့်မြှင့်တင်ရန် ကုန်ကျစရိတ်မှာ နတ်ဘုရားသလင်းကျောက် ထရီလီယံ ၁၀၀၀ ဖြစ်ပါသည်..."

"ထရီလီယံ... ၁၀၀၀..."

မုန်လဲ့က လေပြင်းတစ်ချက် ရှူသွင်းလိုက်မိလေသည်။

"တကယ်ကို လွန်လွန်းနေပြီပဲ ဒါပေမဲ့ နားလည်ပေးလို့တော့ ရပါတယ်လေ အလယ်အလတ် ရှေးဟောင်းနတ်ဘုရား ဆိုတာ ပင်မနတ်ဘုရားကိုတောင် ယှဉ်နိုင်တဲ့ တည်ရှိမှုမျိုးကိုး..."

ပြီးပြည့်စုံသော အဆင့်ကို ရှေးဟောင်းနတ်ဘုရားဟုလည်း ခေါ်ဆိုကြလေသည်။ ၎င်းမှာ အလွန် အံ့ဩဖွယ်ကောင်းသော အဆင့်တစ်ခု ဖြစ်လေသည်။ အကြောင်းမှာ အစွမ်းထက်သော ရှေးဟောင်းနတ်ဘုရားများက ပင်မနတ်ဘုရားများကိုပင် ယှဉ်ပြိုင်နိုင်စွမ်း ရှိသောကြောင့်တည်း။

ရိုးရိုးသာမန် ရှေးဟောင်းနတ်ဘုရားတစ်ပါးကတော့ ပင်မနတ်ဘုရား၏ ပြိုင်ဘက် မဟုတ်သည်မှာ သေချာလှသည်။ သို့သော် အမြင့်ဆုံးနိယာမတရားကို နားလည်သဘောပေါက်ထားသော ရှေးဟောင်းနတ်ဘုရားကတော့ လုံးဝ ကွာခြားသွားလေပြီ။ သူတို့က ပင်မနတ်ဘုရားကို အပြည့်အဝ ယှဉ်ပြိုင်နိုင်စွမ်း ရှိလေသည်။

ဥပမာအားဖြင့် အချိန်ကာလ ပင်မနတ်ဘုရားကို ဆိုရမည်ဆိုလျှင်...

အချိန်ကာလ ပင်မနတ်ဘုရားသည် အချိန်ကာလ နိယာမတရား၏ အနည်းငယ်သော အစိတ်အပိုင်းကိုသာ နားလည်သဘောပေါက်ထားသော်လည်း အားအနည်းဆုံး ပင်မနတ်ဘုရားနှင့် ယှဉ်ပြိုင်နိုင်စွမ်း ရှိလေသည်။ ထိုအားအနည်းဆုံး ဆိုသည်မှာ အဆင့်နိမ့် အဆင့် ပင်မနတ်ဘုရားကို ဆိုလိုခြင်း ဖြစ်လေသည်။

အကယ်၍ အချိန်ကာလ ပင်မနတ်ဘုရားအနေဖြင့် အချိန်ကာလ နိယာမတရားအပေါ် နားလည်သဘောပေါက်မှု ပိုမိုနက်ရှိုင်းလာမည်ဆိုပါက သူ၏ စွမ်းအားများကလည်း ပိုမို ကြီးမားလာမည်ဖြစ်ပြီး အလယ်အလတ် ပင်မနတ်ဘုရားကိုပင် ယှဉ်ပြိုင်နိုင်စွမ်း ရှိလာမည် ဖြစ်လေသည်။ အဆင့်မြင့် ပင်မနတ်ဘုရားကိုပင် ယှဉ်ပြိုင်နိုင်ကောင်း ယှဉ်ပြိုင်နိုင်ပေလိမ့်မည်။

တိတိကျကျ ဆိုရမည်ဆိုလျှင် ရှေးဟောင်းနတ်ဘုရားနှင့် ပင်မနတ်ဘုရားတို့ကြားရှိ စွမ်းအားနှိုင်းယှဉ်ချက်မှာ အောက်ပါအတိုင်း ဖြစ်လေသည်။

အဆင့်နိမ့် အဆင့် ရှေးဟောင်းနတ်ဘုရား (၀) < ပင်မနတ်ဘုရား

အလယ်အလတ် ရှေးဟောင်းနတ်ဘုရား (အနည်းငယ်) = အဆင့်နိမ့် အဆင့် ပင်မနတ်ဘုရား

အဆင့်မြင့် ရှေးဟောင်းနတ်ဘုရား (တစ်ဝက်) = အလယ်အလတ် ပင်မနတ်ဘုရား

အမြင့်ဆုံး ရှေးဟောင်းနတ်ဘုရား (အပြည့်အဝ) = အဆင့်မြင့် ပင်မနတ်ဘုရား

ထိုအထဲရှိ ၀၊ အနည်းငယ်၊ တစ်ဝက်၊ အပြည့်အဝ ဆိုသည်မှာ ရှေးဟောင်းနတ်ဘုရားတစ်ပါး၏ အမြင့်ဆုံးနိယာမတရားအပေါ် နားလည်သဘောပေါက်မှု အတိုင်းအတာကို ဖော်ပြခြင်း ဖြစ်လေသည်။ < က အားနည်းသည် ဟူသော အဓိပ္ပာယ်ကို ဆောင်ပြီး = က တန်းတူညီမျှသည် ဟူသော အဓိပ္ပာယ်ကို ဆောင်လေသည်။

တိတိကျကျ ပြောရမည်ဆိုလျှင် ရှေးဟောင်းနတ်ဘုရား ဆိုသည်မှာမှ လေဟာနယ်ကမ္ဘာရှိ နတ်ဘုရားများအားလုံး မဖြစ်မနေ ဖြတ်သန်းရမည့် ကျင့်ကြံခြင်းအဆင့်တစ်ခု ဖြစ်လေသည်။ အနိမ့်မှ အမြင့်သို့ အစဉ်လိုက်ဆိုရလျှင်...

သာမန်လူ၊ မြင့်မြတ်သော နယ်မြေ၊ နတ်ဘုရားတစ်ဝက်၊ အစစ်အမှန်နတ်ဘုရား၊ အဆင့်နိမ့် အဆင့်နတ်ဘုရား၊ အလယ်အလတ်နတ်ဘုရား၊ အဆင့်မြင့်နတ်ဘုရား၊ အဆင့်နိမ့် အဆင့် ရှေးဟောင်းနတ်ဘုရား၊ အလယ်အလတ် ရှေးဟောင်းနတ်ဘုရား၊ အဆင့်မြင့် ရှေးဟောင်းနတ်ဘုရား၊ အမြင့်ဆုံး ရှေးဟောင်းနတ်ဘုရား...

ပင်မနတ်ဘုရား ဆိုသည်ကတော့...

'ဟားဟား... သူတို့က ပင်မနတ်ဘုရားအမြုတေကို ကံကောင်းထောက်မစွာ ရရှိသွားခဲ့တဲ့ ကံကောင်းသူ တစ်စုလောက်သာ ဖြစ်ပါတယ်… ပင်မနတ်ဘုရားအမြုတေနဲ့ ပေါင်းစပ်လိုက်တာကြောင့် ပင်မနတ်ဘုရားဆိုတာ ချက်ချင်းပဲ တခြားနတ်ဘုရားတွေအားလုံးရဲ့ အထက်ကို ရောက်သွားပြီးတော့ လေဟာနယ်ကမ္ဘာက နတ်ဘုရားတွေရဲ့ အထက်မှာ ပင်မနတ်ဘုရား ဆိုတဲ့ အဆင့်တစ်ခု အတင်းအဓမ္မ ဖန်တီးလိုက်သလို ဖြစ်သွားတာပါ’

ဒါပေမဲ့ တကယ့်လက်တွေ့မှာတော့ ပင်မနတ်ဘုရားဆိုတာ ကျင့်ကြံပြီး ရလာတာ မဟုတ်ပါဘူး။ နတ်ဘုရားတွေ ဘယ်လောက်ပဲ ကျင့်ကြံကျင့်ကြံ ရှေးဟောင်းနတ်ဘုရားအဆင့်ကိုပဲ ရောက်နိုင်ပြီး ပင်မနတ်ဘုရားတော့ ဖြစ်မလာနိုင်ပါဘူး။ ပင်မနတ်ဘုရားအမြုတေနဲ့ ပေါင်းစပ်မှသာ ပင်မနတ်ဘုရား ဖြစ်လာနိုင်တာပါ။

"ငါ့ရဲ့ အခုလက်ရှိ ရုပ်ပိုင်းဆိုင်ရာ ခန္ဓာကိုယ်က အဆင့်နိမ့် အဆင့် ရှေးဟောင်းနတ်ဘုရားနဲ့ ညီမျှတယ် ဆိုလိုတာက သာမန် ပြီးပြည့်စုံတဲ့ အဆင့်မြင့်နတ်ဘုရားပေါ့ နောက်တစ်ခါ ထပ်ပြီး အဆင့်မြှင့်တင်လိုက်ရင် အလယ်အလတ် ရှေးဟောင်းနတ်ဘုရား ဖြစ်သွားပြီ..."

မုန်လဲ့က တီးတိုးရေရွတ်လိုက်လေသည်။

"အလယ်အလတ် ရှေးဟောင်းနတ်ဘုရားက အဆင့်နိမ့် အဆင့် ပင်မနတ်ဘုရားနဲ့ ယှဉ်နိုင်တယ်... ကျွတ်... ကျွတ်... အဆင့်နိမ့် အဆင့် ပင်မနတ်ဘုရားနော်... အဲဒါမှ တကယ်ကို နတ်ဘုရားတွေ အားလုံးရဲ့ အထွတ်အထိပ်မှာ ရပ်တည်နေတဲ့ တည်ရှိမှုမျိုးပဲ..."

ဒါကြောင့် နတ်ဘုရားသလင်းကျောက် ထရီလီယံ ၁၀၀၀ ဆိုတဲ့ ဈေးနှုန်းက လွန်လွန်းတယ်ဆိုပေမယ့် လုံးဝ နားလည်ပေးလို့ ရလေသည်။

ပင်မနတ်ဘုရားအဆင့်ကိုး သေချာတာပေါ့ နားလည်ပေးနိုင်တယ်ဆိုတာက မုန်လဲ့အနေနဲ့ အဲဒီလောက်များတဲ့ ပိုက်ဆံတွေကို ပေးချင်တယ်လို့ ဆိုလိုတာ မဟုတ်ပါဘူး။

အမြင့်ဆုံးနိယာမတရားကို နားလည်သဘောပေါက်ခြင်းကနေတစ်ဆင့် သွားမယ်ဆိုရင်တော့ အများကြီး ပိုပြီး ဈေးသက်သာနိုင်သည်။

"ဒိုဒိုလာ ဒီကျယ်ပြောလှတဲ့ စကြဝဠာကြီးထဲမှာ ပြီးပြည့်စုံတဲ့အဆင့် ရောက်နေတဲ့သူ စုစုပေါင်း ဘယ်လောက်ရှိလဲ..."

မုန်လဲ့က ရုတ်တရက် မေးလိုက်လေသည်။

"မများဘူး..."

ဒိုဒိုလာက ခေါင်းအနည်းငယ် ခါလိုက်လေသည်။

"ဒီကျယ်ပြောလှတဲ့ စကြဝဠာကြီးထဲမှာ အစစ်အမှန် ပြီးပြည့်စုံတဲ့အဆင့် ရောက်နေတဲ့သူဆိုတာ ၁၀၀ ထက် မပိုဘူး ပင်မနတ်ဘုရားထက်တောင် ပိုပြီး ရှားပါးသေးတယ်..."

"အစစ်အမှန် ပြီးပြည့်စုံတဲ့အဆင့်..."

မုန်လဲ့က သံသယဖြစ်စွာ မေးလိုက်လေသည်။

"အစစ်အမှန် ပြီးပြည့်စုံတဲ့အဆင့် ဆိုတာက အခြေခံ နိယာမတရား ၅ မျိုးကို နားလည်သဘောပေါက်ပြီးတော့ အဲဒီ အခြေခံ နိယာမတရား ၅ မျိုးကို လုံးဝ တစ်သားတည်းဖြစ်အောင် ပေါင်းစပ်ထားနိုင်တဲ့ အဆင့်မြင့်နတ်ဘုရားတွေကို ဆိုလိုတာပဲ..."

ဒိုဒိုလာက အလေးအနက်ထား၍ ရှင်းပြလိုက်လေသည်။

"ဒီလို ပြီးပြည့်စုံတဲ့အဆင့် ရောက်နေတဲ့သူတွေက ၁၀၀ ထက် မပိုပါဘူး သေချာတာပေါ့ မင်းလိုမျိုး ပြီးပြည့်စုံတဲ့အဆင့် အတုအယောင်တွေကတော့ အများကြီး ရှိတာပေါ့..."

"ပြီးပြည့်စုံတဲ့အဆင့် အတုအယောင် ဟုတ်လား..."

မုန်လဲ့၏ မျက်နှာတွင် အမည်းစက်များ ပေါ်လာလေသည်။

"ပြီးပြည့်စုံတဲ့အဆင့် အတုအယောင် ဆိုတာက ပြီးပြည့်စုံတဲ့ တိုက်ခိုက်ရေးစွမ်းအားကို ပိုင်ဆိုင်ထားပေမယ့် ပြီးပြည့်စုံတဲ့အဆင့်ကို မရောက်သေးတဲ့ အဆင့်မြင့်နတ်ဘုရားတွေကို ခေါ်တာ..."

ဒိုဒိုလာက ရယ်မော၍ ရှင်းပြလေသည်။

"ဥပမာ ရုပ်ပိုင်းဆိုင်ရာ ခန္ဓာကိုယ်က ပြီးပြည့်စုံတဲ့အဆင့်ကို ရောက်နေတဲ့သူတွေ၊ ပင်မနတ်ဘုရားလက်နက် အစုံလိုက်ကို ပိုင်ဆိုင်ထားတဲ့သူတွေ၊ ဒါမှမဟုတ် တခြားနည်းလမ်းတွေနဲ့ ပြီးပြည့်စုံတဲ့ တိုက်ခိုက်ရေးစွမ်းအားကို ပိုင်ဆိုင်ထားတဲ့ တည်ရှိမှုတွေပေါ့..."

"အချုပ်အားဖြင့် ပြောရရင် လေဟာနယ်ကမ္ဘာထဲမှာ ပြီးပြည့်စုံတဲ့အဆင့် အတုအယောင်တွေ အများကြီး ရှိတယ် သူတို့က ပြီးပြည့်စုံတဲ့ အဆင့်အတန်းတော့ မရှိပေမယ့် ပြီးပြည့်စုံတဲ့အဆင့်နဲ့ ယှဉ်နိုင်တဲ့ တိုက်ခိုက်ရေးစွမ်းအားကိုတော့ ပိုင်ဆိုင်ထားကြတယ်လေ..."

"ဒီလိုကိုး..."

မုန်လဲ့က ညင်သာစွာ ခေါင်းညိတ်လိုက်ပြီး ထပ်မေးလိုက်လေသည်။

"ဒါဆို အမြင့်ဆုံးနိယာမတရားကို နားလည်သဘောပေါက်ထားတဲ့ ပြီးပြည့်စုံတဲ့အဆင့် ရောက်နေတဲ့သူတွေရော ဘယ်လောက်ရှိလဲ..."

"ဒါကတော့ အရမ်းကို ရှားပါးသွားပြီ..."

ဒိုဒိုလာက ခေါင်းခါကာ ဖြေလိုက်လေသည်။

"ငါ ခုနက ပြောခဲ့သလိုပဲ အစစ်အမှန် ပြီးပြည့်စုံတဲ့အဆင့် ရောက်နေတဲ့သူဆိုတာ ၁၀၀ ထက် မပိုပါဘူး အဲဒီအထဲမှာ အမြင့်ဆုံးနိယာမတရားကို နားလည်သဘောပေါက်ထားတဲ့သူက ပိုပြီးတောင် နည်းပါသေးတယ်..."

"အမြင့်ဆုံးနိယာမတရားကို နားလည်သဘောပေါက်ဖို့ အရမ်းခက်ခဲတာအပြင် သူတို့ရဲ့ ပါရမီအရ သူတို့ နားလည်သဘောပေါက်ထားတဲ့ အခြေခံ နိယာမတရား ၅ မျိုးက မှားယွင်းနေတာကလည်း အရေးကြီးတဲ့ အကြောင်းအရင်း တစ်ခုပါပဲ..."

မုန်လဲ့ တစ်ယောက် တိတ်ဆိတ်သွားလေသည်။ အခြေခံ နိယာမတရား ၁၀ မျိုးထဲကနေ ၅ မျိုးကို ရွေးချယ်ပြီး ပေါင်းစပ်ရတာဆိုတော့ စုစုပေါင်း ပေါင်းစပ်နိုင်တဲ့ နည်းလမ်းက ၂၅၂ မျိုးတောင် ရှိသည်။

ဆိုလိုတာက သီအိုရီအရ ပြီးပြည့်စုံတဲ့အဆင့် ၂၅၂ မျိုး ရှိနိုင်တာပေါ့။ ဒါပေမဲ့ အမြင့်ဆုံးနိယာမတရားကို ဖန်တီးနိုင်တဲ့ ပေါင်းစပ်နည်းလမ်းကတော့ အခုလောလောဆယ် ၅ မျိုးပဲ ရှိပါသေးတယ်။

အချိန်ကာလ နိယာမတရား- လျှပ်စီး၊ မီး၊ လေ၊ အလင်း၊ အမှောင်။

လေဟာနယ် နိယာမတရား- သတ္တု၊ သစ်သား၊ မြေ၊ ရေ၊ မီး။

သက်ရှိ နိယာမတရား- မြေ၊ သစ်သား၊ လျှပ်စီး၊ အလင်း၊ ရေ။

ပျက်စီးခြင်း နိယာမတရား- လျှပ်စီး၊ ရေခဲ၊ သတ္တု၊ အမှောင်၊ မီး။

သေဆုံးခြင်း နိယာမတရား- သတ္တု၊ အမှောင်၊ ရေခဲ၊ လေ၊ မြေ။

တခြား ပေါင်းစပ်နည်းလမ်းတွေကနေရော အမြင့်ဆုံးနိယာမတရားတွေ ထွက်ပေါ်လာနိုင်ဦးမလား ဆိုတာကိုတော့ အခုထိ မသိရသေးပါဘူး။

ဘာလို့လဲဆိုတော့ ဘယ်သူမှ စမ်းသပ်မကြည့်ဖူးသေးလို့ပါ။ တကယ့် အစစ်အမှန် ပြီးပြည့်စုံတဲ့အဆင့် ရောက်နေတဲ့သူဆိုတာ အယောက် ၁၀၀ တောင် မပြည့်သေးဘူးလေ။

ဒါပေမဲ့ စဉ်းစားကြည့်လို့တော့ ရသည်။

ပေါင်းစပ်နည်းလမ်း အများစုကနေ အမြင့်ဆုံးနိယာမတရားကို နားလည်သဘောပေါက်နိုင်မှာ မဟုတ်ဘူးဆိုတာ သေချာလေသည်။

တကယ်လို့ နားလည်သဘောပေါက်နိုင်တယ်ဆိုရင် အစောကြီးကတည်းက နားလည်သဘောပေါက်ပြီးလောက်ပါပြီ။

ဒါကြောင့်မို့လို့ ပြီးပြည့်စုံတဲ့အဆင့် ရောက်နေတဲ့သူ တော်တော်များများက အမြင့်ဆုံးနိယာမတရားကို လုံးဝ နားလည်သဘောပေါက်နိုင်မှာ မဟုတ်ပါဘူး။

ဘာလို့လဲဆိုတော့ သူတို့ ပေါင်းစပ်ထားတဲ့ အခြေခံ နိယာမတရား ၅ မျိုးက အစကတည်းက မှားယွင်းနေလို့ပါပဲ။

သတိပြုရမည့်အချက်မှာ နတ်ဘုရားများအနေဖြင့် နိယာမတရားများကို နားလည်သဘောပေါက်ရန်အတွက် ပါရမီ လိုအပ်လေသည်။

သက်ဆိုင်ရာ နိယာမတရား ပါရမီမရှိဘဲ မည်မျှပင် နားလည်သဘောပေါက်ရန် ကြိုးစားနေပါစေ အလကားပင် ဖြစ်လေသည်။

ကိုယ် နားလည်သဘောပေါက်ချင်သော နိယာမတရားတိုင်းကို နားလည်သဘောပေါက်နိုင်သည် မဟုတ်ပေ။

ဤအချက်ကို ထောက်ရှုခြင်းအားဖြင့် ပြီးပြည့်စုံသောအဆင့်သို့ ရောက်ရှိရန် မည်မျှခက်ခဲကြောင်း၊ အမြင့်ဆုံးနိယာမတရားကို နားလည်သဘောပေါက်ရန် မည်မျှပို၍ ခက်ခဲကြောင်းကို သိမြင်နိုင်လေသည်။

ကြိုးစားအားထုတ်မှု လိုအပ်ရုံသာမက ပါရမီလည်း လိုအပ်လေသည်။ သို့မဟုတ် ကံကောင်းခြင်းလည်း လိုအပ်ပေလိမ့်မည်။

ဤအကြောင်းအရင်းများ ဆက်တိုက်ဆိုသလို ဖြစ်ပေါ်နေခြင်းကြောင့် အမြင့်ဆုံးနိယာမတရားကို နားလည်သဘောပေါက်ထားသော ပြီးပြည့်စုံသောအဆင့် ရောက်ရှိသူများမှာ လက်ချိုးရေတွက်၍ ရလောက်အောင် နည်းပါးလှပေသည်။

အချိန်ကာလနတ်ဘုရားကဲ့သို့ လျှပ်စီး၊ မီး၊ လေ၊ အလင်း၊ အမှောင် ဟူသော နိယာမတရား ၅ မျိုးလုံး၏ ပါရမီကို ပိုင်ဆိုင်ထားရုံသာမက ထိုနိယာမတရားများကို အပြည့်အဝ နားလည်သဘောပေါက်ပြီး ပေါင်းစပ်နိုင်စွမ်းရှိသော ထူးချွန်ထက်မြက်သူမျိုးမှာ အလွန်တရာ ရှားပါးလွန်းလှပေသည်။