အခန်း ၃၇၂

အခန်း ၃၇၂ နတ်ဘုရားလောကသို့ ရောက်ရှိခြင်းနှင့် သေဒဏ်ပေးခြင်း

ကမ္ဘာမြေနတ်ဘုရားလောကကြီး လောကနှစ်ခုတောင်တန်း။

လောကနှစ်ခုတောင်တန်းမှာ အဆက်မပြတ် သွယ်တန်းနေပြီး အလင်းနှစ် အနည်းငယ်မျှ ရှည်လျားသည်။ တောင်တန်းများပေါ်တွင် သစ်ပင်ကြီးများ ထူထပ်စွာ ပေါက်ရောက်နေပြီး တောင်တန်း တစ်ခုလုံးမှာ ကြီးမားလှသော သစ်တောအုပ်ကြီး တစ်ခုအလား ဖြစ်နေသည်။

ထို့အပြင် သိပ်သည်းလှသော မှော်ဒြပ်စင်များနှင့် ရှင်းလင်းလှသော လောကနိယာမတရားများကြောင့် လောကနှစ်ခုတောင်တန်းမှာ မှော်သားရဲများနှင့် ကျင့်ကြံသူများအတွက် အကောင်းဆုံး ကျင့်ကြံရာ နေရာတစ်ခု ဖြစ်နေသည်။

သို့သော် ဤကဲ့သို့ ပြီးပြည့်စုံသော ကျင့်ကြံရာ နေရာကြီးကို ဓားပြအုပ်စု တစ်စုက သိမ်းပိုက်ထားခဲ့သည်။ သူတို့က တောင်ပေါ်တွင် အခြေချကာ ခရီးသွားလာနေသော နတ်ဘုရားများနှင့် ကုန်သည်များကို လုယက်ခြင်း မီးရှို့သတ်ဖြတ်ခြင်း အစရှိသည့် မကောင်းမှုများကို လွတ်လပ်စွာ လုပ်ဆောင်နေကြသည်။

ကီလိုမီတာ သန်းပေါင်းများစွာအတွင်း နေထိုင်ကြသော နတ်ဘုရားလောကသားများမှာ သူတို့ကြောင့် အလွန် ဒုက္ခရောက်နေကြရသော်လည်း မည်သူကမျှ အသံမထွက်ရဲကြပေ။

ထိုနေ့တွင် လောကနှစ်ခုတောင်တန်းမှ ဓားပြများက ထုံးစံအတိုင်း သူတို့၏ စခန်းထဲတွင် အရက်သောက်ကာ ပျော်ရွှင်နေကြသည်။ ပတ်ဝန်းကျင်မှ လုယက်လာသော အဆိုတော်များနှင့် အကမယ်များကို ကြည့်ရင်း သူတို့၏ နေ့ရက်များကို ပျော်ရွှင်စွာ ဖြတ်သန်းနေကြသည်။

"လာ... သောက်..."

"ညီအစ်ကိုတို့... ကုန်အောင် သောက်လိုက်..."

"ခေါင်းဆောင်ကြီး... သောက်ပါဦး..."

"သတင်းပို့ပါတယ်..."

စူးရှသော အော်ဟစ်သံတစ်ခု ထွက်ပေါ်လာပြီးနောက် ဓားကြီးကို ကိုင်ဆောင်ထားသော ဓားပြတစ်ယောက် အလျင်အမြန် ဝင်လာသည်။

"ခေါင်းဆောင်ကြီး... မကြာသေးခင်က ညီအစ်ကိုတွေ အကြောင်းမဲ့ ပျောက်ဆုံးသွားတဲ့ အကြောင်းရင်းကို ရှာတွေ့ပါပြီ..."

ခေါင်းဆောင် ထိုင်ခုံပေါ်တွင် ထိုင်နေသော ဓားပြခေါင်းဆောင်က လက်ယမ်းကာ အဆိုတော်များနှင့် အကမယ်များကို ထွက်သွားရန် အချက်ပြလိုက်ပြီးနောက် မေးလိုက်သည်။

"ပြောစမ်း... ညီအစ်ကိုတွေ ဘာလို့ ပျောက်သွားတာလဲ..."

"ခေါင်းဆောင်ကြီး... ညီအစ်ကိုတွေက အူပြတ်ချောက်ကမ်းပါး အောက်ခြေမှာ လေဟာနယ် အက်ကြောင်းကြီး တစ်ခုကို ရှာတွေ့ခဲ့ပါတယ်... ပျောက်သွားတဲ့ ညီအစ်ကိုတွေက အဲဒီ လေဟာနယ် အက်ကြောင်းကြီးထဲကို ဝင်သွားတာ ဖြစ်ရမယ်..."

ဓားပြက ရိုသေစွာ ပြန်ဖြေသည်။

"လေဟာနယ် အက်ကြောင်း..."

ဓားပြခေါင်းဆောင်၏ မျက်လုံးများ တောက်ပသွားပြီး မျက်လုံးထဲတွင် ထက်မြက်သော အလင်းတန်း တစ်ခု ဖြတ်ပြေးသွားသည်။

"အဲဒီ လေဟာနယ် အက်ကြောင်းက ဘယ်ကို သွားတာလဲ ဆိုတာကိုကော စုံစမ်းပြီးပြီလား..."

အခြား ဓားပြများ အားလုံးလည်း ထိုဓားပြကို စိတ်လှုပ်ရှားစွာ ကြည့်နေကြသည်။ လေဟာနယ် အက်ကြောင်း တဲ့လား။ နတ်ဘုရားလောကကြီး၏ လေဟာနယ်မှာ အလွန် ခိုင်မာလွန်းလှရာ လေဟာနယ် အက်ကြောင်း ဆိုသည်မှာ ပုံမှန်အားဖြင့် လုံးဝ ဖြစ်ပေါ်လာလေ့ မရှိပေ။

ဤသည်မှာ နတ်ဘုရားလောကကြီးထဲသို့ ဝင်ရောက်လာပြီးပါက ပြန်လည် ထွက်ခွာရန်မှာ လုံးဝ မဖြစ်နိုင်သလောက် ပင် ဖြစ်သည်ဆိုသည့် သဘောဖြစ်သည်။

ယခုအခါတွင် လေဟာနယ် အက်ကြောင်းကြီး တစ်ခု ပေါ်လာပြီဖြစ်ရာ ဓားပြများ အားလုံး အလွန်အမင်း စိတ်ဝင်စားသွားကြသည်။ အကယ်၍ ထို လေဟာနယ် အက်ကြောင်းကြီးက အခြားသော လောက တစ်ခုခုဆီသို့ သွားနေမည်ဆိုပါက...

"ခေါင်းဆောင်ကြီး... အဲဒီထဲကို ဝင်သွားတဲ့ ညီအစ်ကိုတွေ ပြန်ထွက်မလာကြတော့ သတင်းအစအနတောင် မရပါဘူး..."

ဓားပြက ခေါင်းခါလိုက်သည်။

"ဒါပေမဲ့ တစ်ခု သေချာတာကတော့ တစ်ဖက်မှာ ရှိနေတာက အဆင့်နိမ့်လောက တစ်ခုပါ... ပြီးတော့ အဲဒီလောကက အတော်လေး အန္တရာယ် များပါတယ်... အနည်းဆုံးတော့ အလယ်အလတ်နတ်ဘုရား တစ်ပါးလောက် ရှိနေနိုင်ပါတယ်..."

"အဆင့်နိမ့်လောက..."

ဓားပြများ အားလုံး အံ့ဩတကြီး ရေရွတ်လိုက်ကြသည်။ နတ်ဘုရားလောကကြီးက လှပသည်ဟု အားလုံးက ပြောကြသော်လည်း အလွန် အန္တရာယ် များလှပေသည်။ အထူးသဖြင့် သူတို့ကဲ့သို့သော ဓားပြများအတွက် ပို၍ပင် အန္တရာယ် များလှသည်။ အကယ်၍ သူတို့ ပုန်းခိုရန်အတွက် အဆင့်နိမ့်လောက တစ်ခုကိုသာ ရှာတွေ့မည်ဆိုပါက တကယ်ကို အတိုင်းထက်အလွန် ပင် ဖြစ်လေသည်။

ဓားပြခေါင်းဆောင် မတ်တပ်ရပ်လိုက်သည်။

"လာကြ... လူတွေ စုလိုက်... အဲဒီ အဆင့်နိမ့်လောက က ဘယ်လို နေရာမျိုးလဲဆိုတာကို ငါ ကိုယ်တိုင် သွားကြည့်မယ်..."

"ဟုတ်ကဲ့ပါ ခေါင်းဆောင်ကြီး..."

အမိန့်ပေးလိုက်သည်နှင့် ဓားပြစခန်း တစ်ခုလုံး ရုတ်ရုတ်သဲသဲ ဖြစ်သွားပြီး အချိန်ခဏလေးအတွင်းမှာပင် ဓားပြခေါင်းဆောင်က လူအုပ်ကြီးကို ခေါ်ဆောင်ကာ အူပြတ်ချောက်ကမ်းပါး အောက်ခြေသို့ ရောက်ရှိလာသည်။

အလွန် အင်အားကြီးမားပြီး ကြီးမားလှသော လူအုပ်ကြီး ဖြစ်သည်။

များပြားလွန်းလှသဖြင့် ကောင်းကင်ကိုပင် ဖုံးလွှမ်းသွားသကဲ့သို့ ဖြစ်နေသည်။

လောကနှစ်ခုတောင်တန်း ဓားပြအုပ်စု၏ အင်အားမှာ အမှန်တကယ်ပင် အလွန် ကြီးမားလှကြောင်း ဝန်ခံရမည် ဖြစ်သည်။ အဖွဲ့ဝင် အရေအတွက်က သန်းချီရှိပြီး အားအနည်းဆုံး အဖွဲ့ဝင်ကပင် အဆင့်နိမ့်အဆင့် နတ်ဘုရားအဆင့်တွင် ရှိလေသည်။

ဤကဲ့သို့သော အင်အားဖြင့် မည်သည့် အဆင့်နိမ့်လောကကိုမဆို အလွယ်တကူ တိုက်ခိုက် သိမ်းပိုက်နိုင်စွမ်း ရှိလေသည်။

"ဒါက အဲဒီ လေဟာနယ် အက်ကြောင်းလား..."

ဓားပြခေါင်းဆောင်က အူပြတ်ချောက်ကမ်းပါး အောက်ခြေတွင် ပေါ်နေသော လေဟာနယ် အက်ကြောင်းကြီးကို ကြည့်ရင်း အနည်းငယ် စိတ်လှုပ်ရှားစွာဖြင့် မေးလိုက်သည်။

"ဟုတ်ပါတယ် ခေါင်းဆောင်ကြီး..."

"နံပါတ် ၃... မင်း လူနည်းနည်း ခေါ်ပြီး သွားကြည့်လိုက်..."

ဓားပြခေါင်းဆောင်က မြွေခေါင်းနှင့် လူကိုယ် ပိုင်ဆိုင်ထားသော ဓားပြတစ်ယောက်ကို ကြည့်ကာ ပြောလိုက်သည်။ သူက ဓားပြအုပ်စု၏ ခေါင်းဆောင် ၃ ဖြစ်ပြီး အလယ်အလတ်နတ်ဘုရား အထွတ်အထိပ်အဆင့် စွမ်းအားကို ပိုင်ဆိုင်ထားသူ ဖြစ်သည်။

"ဟုတ်ကဲ့ပါ အစ်ကိုကြီး..."

မြွေခေါင်းနှင့် လူကိုယ် ပိုင်ဆိုင်ထားသော ခေါင်းဆောင် ၃ က လုံးဝ တွေဝေမနေဘဲ လူအချို့ကို ခေါ်ဆောင်ကာ ဝင်ရောက်ရန် ပြင်လိုက်သည်။

သို့သော် ထိုအချိန်မှာပင် လေဟာနယ် အက်ကြောင်းထဲမှ လူတစ်ယောက် ထွက်ပေါ်လာပြီးနောက် ပျားအုံကို တုတ်နှင့်ထိုးလိုက်သကဲ့သို့ လူများ တစ်ယောက်ပြီးတစ်ယောက် ဆက်တိုက် ထွက်ပေါ်လာကြသည်။

"ဒါက..."

ဓားပြခေါင်းဆောင်နှင့် ဓားပြများ အားလုံးက လေဟာနယ် အက်ကြောင်းထဲမှ ထွက်လာသော လူအုပ်ကြီးကို ကြည့်ရင်း အံ့ဩသွားကြသည်။ သူတို့တောင် မဝင်ရသေးခင် တစ်ဖက်ကနေ အရင် ထွက်လာကြသည်မို့ သူတို့ သေရမှာ မကြောက်ဘူးလားဟု တွေးလိုက်မိကြသည်။

"ဒီနေရာက ကမ္ဘာမြေနတ်ဘုရားလောကကြီးလား..."

လေဟာနယ် အက်ကြောင်းထဲမှ ထွက်လာသူများမှာ မုန်လဲ့တို့ အုပ်စုပင် ဖြစ်သည်။ သူတို့က ကောင်းကင်ယံတွင် ရပ်ကာ ပတ်ဝန်းကျင်ကို ကြည့်ရင်း သူတို့၏ မျက်လုံးများထဲတွင် သိချင်စိတ်များနှင့် အံ့ဩမှုများ ပြည့်နှက်နေသည်။ မှန်ပါသည်။ သူတို့အားလုံး အဆင့်မြင့်လောက တစ်ခုသို့ တစ်ခါမျှ မရောက်ဖူးကြသေးပေ။

"သိပ်သည်းလိုက်တဲ့ မှော်ဒြပ်စင်တွေပဲ..."

"ကောင်းကင်ယံတိုက်ကြီးထက် အဆပေါင်း သောင်းချီ ပိုများတယ်..."

"ပြီးတော့ လောကနိယာမတရားတွေ..."

"အရမ်းကို ရှင်းလင်းလွန်းတယ်..."

"ကမ္ဘာမြေနတ်ဘုရားလောကကြီး ဆိုတဲ့ နာမည်နဲ့ တကယ်ကို လိုက်ဖက်တာပဲ... ဒီနေရာမှာဆိုရင် ဝက်တစ်ကောင်တောင် နတ်ဘုရားတစ်ဝက် အဆင့်ကို ရောက်နိုင်လောက်တယ်..."

လူတိုင်း အလွန်အမင်း အံ့ဩတုန်လှုပ်သွားကြသည်။

မုန်လဲ့လည်း အံ့ဩသွားသည်။ ဤသည်မှာ သူကိုယ်တိုင် အဆင့်မြင့်လောက တစ်ခုသို့ ပထမဆုံးအကြိမ် ရောက်ရှိလာခြင်း ဖြစ်သည်။

ကမ္ဘာမြေနတ်ဘုရားလောကကြီး၏ မှော်ဒြပ်စင်များနှင့် လောကနိယာမတရားများက အဆုံးအစမရှိသောလောက ငရဲပြည်တိုက်ကြီး အစရှိသည့် အလယ်အလတ်လောကများနှင့် လုံးဝ နှိုင်းယှဉ်၍ မရနိုင်ကြောင်း သူ ဝန်ခံရမည် ဖြစ်သည်။ ကောင်းကင်ယံတိုက်ကြီး ကဲ့သို့သော အဆင့်နိမ့်လောက ဆိုလျှင်ကား ပြောနေစရာပင် မလိုတော့ပေ။

မိုးနှင့်မြေလို ကွာခြားလွန်းသည်။

လုံးဝကို ယှဉ်လို့မရပေ။

"ဟေ့ကောင်တွေ... ဘယ်ကရောက်လာတဲ့ အဆင့်နိမ့်တဲ့ တောသားတွေလဲ..."

လူတိုင်း ပတ်ဝန်းကျင်ကို ကြည့်ကာ အံ့ဩနေကြစဉ် ဒေါသတကြီး အော်ဟစ်သံတစ်ခု ရုတ်တရက် ထွက်ပေါ်လာပြီးနောက် လူအုပ်ကြီးက ကောင်းကင်သို့ ပျံတက်လာကာ သူတို့ကို အထပ်ထပ် ဝိုင်းရံလိုက်ကြသည်။

"ဟင်..."

မုန်လဲ့မှလွဲ၍ ကျန်လူများ အားလုံး မျက်နှာပျက်သွားကြပြီး လောကနှစ်ခုတောင်တန်း ဓားပြအုပ်စုကို သတိထားကာ ကြည့်လိုက်ကြသည်။ သူတို့ အားလုံးမှာ နတ်ဘုရားများ ဖြစ်ကြပြီး အလယ်အလတ်နတ်ဘုရားများပင် အများအပြား ပါဝင်သည်။ အဆင့်မြင့်နတ်ဘုရား ဆိုလျှင်တော့...

'အဆင့်မြင့်နတ်ဘုရားတွေကော...'

လူတိုင်းက တစ်ချက် ဝေ့ကြည့်လိုက်ရာ အဆင့်မြင့်နတ်ဘုရား ဆို၍ တစ်ယောက်သာ ရှိကြောင်း တွေ့လိုက်ရသည်။

"အဆင့်မြင့်နတ်ဘုရား တစ်ယောက်တည်းလား..."

ကျောင်းအုပ်ကြီး ပူဟာမန် ဘာဘရူးစ် နှင့် အခြားသူများ အားလုံး တစ်ယောက်ကို တစ်ယောက် ကြည့်ကာ ရယ်ရခက် ငိုရခက် ဖြစ်သွားကြသည်။ သူတို့ကို ဝိုင်းရံထားသူများမှာ အလွန် အစွမ်းထက်သူများ ဖြစ်မည်ဟု ထင်မှတ်ထားခဲ့သော်လည်း တကယ်တမ်းကျတော့ အဆင့်မမီသော အမှိုက်များသာ ဖြစ်နေလေသည်။

အလကား လန့်သွားတာပဲ...

"အဆင့်နိမ့်တဲ့ တောသားတွေ မင်းတို့ သတ္တိတွေက တော်တော် ကောင်းနေပါလား... ငါတို့ မင်းတို့ကို လာမရှာခင် မင်းတို့က အရင် ရောက်လာတာကိုး... တကယ်ကို ကိုယ့်သေတွင်း ကိုယ်တူးနေတာပဲ..."

ခေါင်းဆောင် ၃ က သူ၏ လက်ထဲရှိ ဓားကြီးဖြင့် မုန်လဲ့တို့ကို ညွှန်ပြကာ ဒေါသတကြီး အော်ဟစ်လိုက်သည်။

"ကောင်လေးတို့... ဒီအရူး တောသားတွေကို ဖမ်းလိုက်စမ်း..."

"ဟုတ်ကဲ့ပါ ခေါင်းဆောင် ၃..."

ဓားပြများ အားလုံး အော်ဟစ်လိုက်ကြပြီးနောက် မုန်လဲ့တို့ဆီသို့ ပြေးဝင်လာကြသည်။ ထိုမြင်ကွင်းကို မြင်လိုက်ရသောအခါ ပူဟာမန် က အေးစက်စက် နှာခေါင်းရှုံ့လိုက်ပြီး သူ၏ အရှိန်အဝါများကို ထုတ်လွှတ်လိုက်သည်။

"ဝုန်း..."

ကြီးမားလှသော အရှိန်အဝါကြီးက ပင်လယ်လှိုင်းလုံးကြီးအလား လွှမ်းခြုံလာပြီး ဓားပြခေါင်းဆောင် ခေါင်းဆောင် ၃ နှင့် ဓားပြများ အားလုံး၏ ရင်ဘတ်ပေါ်သို့ ချက်ချင်း ဖိချလိုက်ရာ ဓားပြခေါင်းဆောင်မှလွဲ၍ ကျန်ဓားပြများ အားလုံး မည်သို့မျှ မခုခံနိုင်ဘဲ... ဒူးထောက်ကျသွားကြလေတော့သည်။

"ဘုန်း ဘုန်း ဘုန်း..."

ဓားပြများ အားလုံး တစ်ကိုယ်လုံး တုန်ရီသွားကြပြီး အလွန်အမင်း ထိတ်လန့်သွားကြသည်။

"အဆင့်... အဆင့်မြင့်နတ်ဘုရား... ဒါ အဆင့်မြင့်နတ်ဘုရားပဲ... ဘုရားရေ... ဘယ်လိုလုပ်ပြီး အဆင့်မြင့်နတ်ဘုရား ဖြစ်နေရတာလဲ..."

သူတို့က ကျောက်တုံးကို ကန်မိသွားပြီ ဖြစ်ကြောင်း ဓားပြများ အားလုံး သဘောပေါက်လိုက်ကြသည်။ သို့သော် ဤမျှနှင့် မပြီးသေးပေ။ ဘာဘရူးစ် နှင့် အခြားသူများ အားလုံးလည်း သူတို့၏ အရှိန်အဝါများကို ထုတ်လွှတ်လိုက်ကြသည်။

"ဝုန်း..."

"ဒူးထောက်..."

"ဒူးထောက်..."

"ဒူးထောက်..."

ကောင်းကင်ယံအထိ ထိုးဖောက်သွားသော အရှိန်အဝါကြီးက ပေါင်းစပ်သွားပြီး ဓားပြများ၏ အားနည်းသော စိတ်နှလုံးများကို ရက်စက်စွာ ဖိနှိပ်လိုက်ရာ အားနည်းသူများက ချက်ချင်း သတိလစ်သွားကြပြီး အနည်းငယ် အားကောင်းသူများမှာမူ ထိတ်လန့်မှုများနှင့်အတူ မျှော်လင့်ချက် ကင်းမဲ့သွားကြလေသည်။

"အဆင့်... အဆင့်မြင့်နတ်ဘုရားတွေ..."

"အကုန်လုံးက အဆင့်မြင့်နတ်ဘုရားတွေချည်းပဲ..."

"ဘုရားရေ... အကုန်လုံးက အဆင့်မြင့်နတ်ဘုရားတွေချည်းပဲ... ဒီလိုဆိုရင် ဘယ်လိုလုပ် ယှဉ်နိုင်တော့မှာလဲ..."

ဓားပြများ အားလုံး မျှော်လင့်ချက် ကင်းမဲ့သွားကြသည်။ အစကတည်းက စကားတစ်ခွန်းမျှ မပြောရသေးသော ဓားပြခေါင်းဆောင်လည်း ဤအချိန်၌ အရာအားလုံးကို သဘောပေါက်သွားလေသည်။ သူက မုန်လဲ့တို့ကို စတင် မြင်တွေ့လိုက်ရကတည်းက သူတို့၏ စွမ်းအားကို လုံးဝ မခန့်မှန်းနိုင်ခဲ့သဖြင့် အနည်းငယ် သံသယ ဖြစ်နေခဲ့ခြင်း ဖြစ်သည်။

တကယ်တမ်းကျတော့... အကုန်လုံးက အဆင့်မြင့်နတ်ဘုရားတွေ ဖြစ်နေတာကိုး...

သူ သဘောပေါက်သွားပြီ...

ဒါပေမဲ့ မျှော်လင့်ချက်လည်း ကင်းမဲ့သွားပြီ...

လောကနှစ်ခုတောင်တန်း ဓားပြအုပ်စု၏ စွမ်းအားဖြင့်ဆိုလျှင် ဤမျှ များပြားလှသော အဆင့်မြင့်နတ်ဘုရားများကို ရင်ဆိုင်ရန်မှာ လုံးဝ မဖြစ်နိုင်ကြောင်းကို ဓားပြခေါင်းဆောင် ကောင်းစွာ သိရှိထားသည်။

"သခင်... ဒီလူတွေကို ဘယ်လို လုပ်လိုက်ရမလဲ..."

ပူဟာမန် က ရိုသေစွာ မေးလိုက်သည်။

"အားနည်းတဲ့ သူတွေကို သတ်လိုက် ပြီးတော့ အားကောင်းတဲ့ သူတွေကို လက်အောက်ခံ အဖြစ် သိမ်းလိုက်..."

မုန်လဲ့၏ စကားတစ်ခွန်းတည်းဖြင့် လောကနှစ်ခုတောင်တန်း ဓားပြအုပ်စုကို သေဒဏ် ပေးလိုက်လေသည်။

"ဟုတ်ကဲ့ပါ သခင်…”