အခန်း ၄၀၂

အခန်း ၄၀၂ ပင်မနတ်ဘုရား သွေးမျိုးဆက်နှင့် အမြင့်ဆုံး နတ်ဘုရားသလင်းကျောက်

မိုလော့နှင့် အနက်ရောင်ဖီးနစ် ဘိုးဘေးတို့မှာ မအံ့ဩဘဲ မနေနိုင်လောက်အောင် ဖြစ်သွားကြလေသည်။ မုန်လဲ့က အခြားအရာတစ်ခုခုအဖြစ် ပြောင်းလဲသွားလျှင်ပင် ထားလိုက်မည်ဖြစ်သော်လည်း ယခု သူတို့မျက်စိရှေ့မှ အရာကြီးက မီးကြယ် ဟင်းလင်းပြင် သားရဲကြီး အစစ်အမှန်ပင် ဖြစ်နေသောကြောင့်ပင်။

ဤမီးကြယ် ဟင်းလင်းပြင် သားရဲကြီး၏ အရောင်အဆင်းမှာ အနည်းငယ် ကွဲလွဲနေသော်လည်း ပုံပန်းသဏ္ဌာန်နှင့် လက္ခဏာရပ်များမှာမူ လုံးဝ တစ်ထပ်တည်း ကျနေပေသည်။

"သူ... သူက မီးကြယ် ဟင်းလင်းပြင် သားရဲကြီးလား..."

အနက်ရောင်ဖီးနစ် ဘိုးဘေး၏ အသံမှာ တုန်ယင်နေပြီး မျက်လုံးများတွင် ကြောက်ရွံ့မှုများ အထင်းသား ပေါ်လွင်နေ၏။

"အဲဒီ စွမ်းရည်ကြောင့် ဖြစ်ရမယ်..."

မိုလော့၏ စိတ်ထဲတွင် နောက်ထပ် ဖြစ်နိုင်ချေတစ်ခု ဝင်ရောက်လာခဲ့ရာ ၎င်းမှာ မုန်လဲ့၏ လုယူခြင်း စွမ်းရည်ပင် ဖြစ်လေသည်။

ပြီးခဲ့သော အကြိမ်က မုန်လဲ့သည် ပြီးပြည့်စုံသောအဆင့် နှစ်ဦး နားလည်ထားသော အမြင့်ဆုံး နိယာမတရားများကို လုယူခဲ့သည်ကို သူ ကိုယ်တိုင် မျက်မြင်ကိုယ်တွေ့ ကြုံခဲ့ရပေသည်။

နိယာမတရားများကိုပင် လုယူနိုင်မှတော့ သွေးမျိုးဆက်ကို လုယူခြင်းက မဖြစ်နိုင်စရာ အကြောင်းမရှိပေ။

"ဒီစွမ်းရည်က တကယ်ကို ကြောက်စရာကောင်းလွန်းတယ်... နိယာမတရားကိုလည်း လုယူနိုင်တယ်... သွေးမျိုးဆက်ကိုလည်း လုယူနိုင်တယ်... သူ မလုယူနိုင်တဲ့အရာ ဘာများရှိဦးမလဲ ဆိုတာကို ငါ တကယ် သိချင်လာပြီ..."

မိုလော့မှာ ဆက်တိုက် ညည်းတွားနေမိ၏။ ထိုသူနှစ်ဦး အံ့ဩမှင်တက်နေချိန်မှာပင် မုန်လဲ့၏ ပုံစံပြောင်းလဲခြင်းမှာ အဆုံးသတ်သွားခဲ့လေပြီ။

ယခုအခါတွင် သူသည် အရောင် ၃ မျိုး ကွန့်မြူးနေသော အကြေးခွံများ ဖုံးလွှမ်းနေပြီး ခေါင်းပေါ်တွင် လိမ်ယှက်နေသော ချွန်ထက်သည့် ချို ၃ ချောင်း ပါရှိကာ ကျောဘက်တွင် တောင်ပံတစ်စုံနှင့် တင်ပါးတွင် အမြီးရှည်ကြီး ပါရှိသော ကြွက်သားများ အချိုးကျစွာ ဖွဲ့စည်းထားသည့် ကြောက်မက်ဖွယ် သားရဲကြီးတစ်ကောင်အဖြစ်သို့ ပြောင်းလဲသွားခဲ့ပြီ ဖြစ်သည်။

မာကျောလှသော အကြေးခွံများနှင့် ကျစ်လျစ်သိပ်သည်းသော ကြွက်သားများက ကြောက်မက်ဖွယ်ကောင်းလှသလို ထက်မြက်လှသော လက်သည်းခွံများနှင့် စူးရှလှသော အကြည့်များကလည်း ရိုင်းစိုင်းကြမ်းတမ်းလှသော ခန္ဓာကိုယ် အရွယ်အစားနှင့် ပေါင်းစပ်သွားကာ လှိုင်းလုံးကြီးများအလား ရိုက်ခတ်နေသော အရှိန်အဝါများကို ဖြစ်ပေါ်စေသည်။

ဤအရာအားလုံးက မုန်လဲ့၏ အစွမ်းထက်မြက်မှုကို သက်သေပြနေလေသည်။

"ဒါက မီးကြယ် ဟင်းလင်းပြင် သားရဲကြီးရဲ့ သွေးမျိုးဆက်လား... တကယ်ကို သာမန်မဟုတ်ဘူးပဲ..."

ကိုယ်ရေးအချက်အလက်များကို မကြည့်လျှင်ပင် မုန်လဲ့သည် သူ၏ နတ်ဘုရားခန္ဓာကိုယ် ပြောင်းလဲသွားမှုကို ရှင်းလင်းစွာ ခံစားနေရ၏။

အဆုံးအစမရှိသော ခွန်အားများက သူ၏ ခန္ဓာကိုယ် အတွင်းမှ စိမ့်ထွက်လာနေပြီး လက်သီးတစ်ချက် ထိုးချလိုက်ရုံဖြင့် နိဟော့ခ် ကုန်းမြေတိုက်ကြီးတစ်ခုလုံး ပေါက်ကွဲထွက်သွားနိုင်သည်ဟုပင် မုန်လဲ့ ခံစားနေရကာ အလွန်တရာ အစွမ်းထက်လွန်းလှပေသည်။

သိထားရမည်မှာ အစွမ်းထက်သော သွေးမျိုးဆက်များကို အဆက်မပြတ် ပေါင်းစပ်လာသည်နှင့်အမျှ မုန်လဲ့၏ နတ်ဘုရားခန္ဓာကိုယ်မှာလည်း အဆက်မပြတ် သန်မာလာခဲ့သော်လည်း နောက်ပိုင်းတွင် ပေါင်းစပ်ရသော သွေးမျိုးဆက်များက နတ်ဘုရားခန္ဓာကိုယ်ကို မြှင့်တင်ပေးနိုင်စွမ်း အလွန်နည်းပါးသွားခဲ့၏။

ဤမျှလောက် ကြီးမားသော တိုးတက်မှုကို မခံစားရသည်မှာ အလွန်ကြာမြင့်ခဲ့လေပြီဖြစ်ရာ ဤသည်ကို ကြည့်ခြင်းအားဖြင့် မီးကြယ် ဟင်းလင်းပြင် သားရဲကြီး၏ သွေးမျိုးဆက်က မည်မျှတောင် ကြောက်စရာကောင်းကြောင်းကို သိရှိနိုင်ပေသည်။ ထို့နောက် မုန်လဲ့က သူ၏ ကိုယ်ရေးအချက်အလက်များကို ထပ်မံ ကြည့်ရှုလိုက်သည်။

အမည် - မုန်လဲ့

မျိုးနွယ် - ရှေးဟောင်း လူသားမျိုးနွယ် (ပေါင်းစပ်ထားသော သွေးမျိုးဆက်များ - ရှေးဟောင်း နတ်ဘုရားသတ်ဖြတ်သူ ကြွက် သွေးမျိုးဆက် (အရွယ်ရောက်ပြီး)၊ ငရဲပြည် ဖီးနစ်ဘိုးဘေး သွေးမျိုးဆက် (အရွယ်ရောက်ပြီး)၊ လက် ၁၀၀ တိုက်တန်ဘုရင် သွေးမျိုးဆက် (အရွယ်ရောက်ပြီး)၊ အသက် သစ်ပင် သွေးမျိုးဆက် (အရွယ်ရောက်ပြီး)၊ ရေခဲဘုရင် သွေးမျိုးဆက် (အရွယ်ရောက်ပြီး)၊ သေမင်းဘုရင် သွေးမျိုးဆက် (အရွယ်ရောက်ပြီး)၊ မီးကြယ် ဟင်းလင်းပြင် သားရဲကြီး သွေးမျိုးဆက် (၃၈ ရာခိုင်နှုန်း))

ကြွယ်ဝချမ်းသာမှု - ၁၂၇၀၉ ထရီလီယံ နတ်ဘုရားသလင်းကျောက်

ရုပ်ပိုင်းဆိုင်ရာ - ရွှေနှင့်သစ်သား နတ်ဘုရားခန္ဓာကိုယ်၊ သစ်သား မူလခန္ဓာကိုယ်၊ မိုးကြိုး မူလခန္ဓာကိုယ်

ဝိညာဉ်စွမ်းအား - အဆင့်နိမ့် ပင်မနတ်ဘုရား (အလယ်အလတ်အဆင့် ရှေးဟောင်းနတ်ဘုရား)

နတ်ဘုရားစွမ်းအား - နတ်ဘုရားသလင်းကျောက် ၂၀၀

နိယာမတရား နားလည်မှု - အချိန်ကာလ နိယာမတရား (၁၀၀ ရာခိုင်နှုန်း)၊ ဖျက်ဆီးခြင်း နိယာမတရား (၀.၁ ရာခိုင်နှုန်း)၊ အသက် နိယာမတရား (၀.၁ ရာခိုင်နှုန်း)၊ အာကာသ နိယာမတရား (၁၀၀ ရာခိုင်နှုန်း)၊ သေမင်း နိယာမတရား (၀.၁ ရာခိုင်နှုန်း)

"စနစ်... ငါ့ရဲ့ နတ်ဘုရားခန္ဓာကိုယ်ကို အဆင့်မြှင့်တင်ဖို့ ဘယ်လောက် ကုန်ကျမလဲ..."

မုန်လဲ့က သူ၏ နတ်ဘုရားခန္ဓာကိုယ် ကြံ့ခိုင်မှုအဆင့်ကို သိချင်နေသဖြင့် မေးလိုက်၏။

"ပိုင်ရှင်ရဲ့ လက်ရှိ ရုပ်ပိုင်းဆိုင်ရာက အဆင့်နိမ့် ပင်မနတ်ဘုရား အထွတ်အထိပ်အဆင့်နဲ့ ညီမျှပါတယ်... အဆင့်မြှင့်တင်ပြီးရင် အလယ်အလတ်အဆင့် ပင်မနတ်ဘုရားနဲ့ ညီမျှသွားပါမယ်... ခန့်မှန်း ကုန်ကျစရိတ်က နတ်ဘုရားသလင်းကျောက် ၁၀၀ ထရီလီယံ ဖြစ်ပါတယ်... အဆင့်မြှင့်တင်မှာလား လို့ မေးပါရစေ..."

စနစ်၏ အသံက အေးစက်စွာ ထွက်ပေါ်လာ၏။

"နတ်ဘုရားသလင်းကျောက် ၁၀၀ ထရီလီယံ... ဒီဈေးက မနည်းလှဘူးပဲ... မီးကြယ် ဟင်းလင်းပြင် သားရဲကြီး သွေးမျိုးဆက်ကို ၁၀၀ ရာခိုင်နှုန်းအထိ ဖြည့်တင်းဖို့ဆိုရင် နတ်ဘုရားသလင်းကျောက် ဘယ်လောက် လိုအပ်မလဲ..."

မုန်လဲ့က ခေါင်းခါလိုက်ပြီး ထပ်မေးလိုက်သည်။

"မီးကြယ် ဟင်းလင်းပြင် သားရဲကြီး သွေးမျိုးဆက် ပေါင်းစပ်မှု ၁ ရာခိုင်နှုန်း တိုးမြှင့်ဖို့အတွက် နတ်ဘုရားသလင်းကျောက် ၁ ထရီလီယံ လိုအပ်ပါတယ်... ၁၀၀ ရာခိုင်နှုန်းအထိ တိုးမြှင့်ဖို့အတွက် ၆၂ ထရီလီယံ လိုအပ်ပါတယ်..."

စနစ်က အေးစက်စွာ ပြန်ဖြေလေသည်။

"မီးကြယ် ဟင်းလင်းပြင် သားရဲကြီး သွေးမျိုးဆက်ကို ​မြှင့်တင်မယ်..."

မုန်လဲ့က မဆိုင်းမတွ ရွေးချယ်မှု ပြုလုပ်လိုက်၏။

ကြွယ်ဝချမ်းသာမှုထဲမှ နတ်ဘုရားသလင်းကျောက် ၆၂ ထရီလီယံမှာ မျက်စိတစ်မှိတ်အတွင်း ပျောက်ကွယ်သွားလေသည်။ ထိုအချိန်မှာပင် အလွန်တရာ ကြမ်းတမ်းလှသော အပူလှိုင်းတစ်ခုက သူ၏ ခန္ဓာကိုယ်ထဲသို့ စီးဝင်လာပြီး သွေးကြောနက်ရှိုင်းရာ နေရာမှ မီးကြယ် ဟင်းလင်းပြင် သားရဲကြီး၏ သွေးမျိုးဆက်မှာ ရူးသွပ်စွာ ကြီးထွားသန်မာလာတော့၏။

အပြင်ပန်းတွင်မူ မုန်လဲ့၏ ခန္ဓာကိုယ်မှာ အဆက်မပြတ် သန်မာလာပြီး အကြေးခွံများမှာ ပိုမို တောက်ပလာကာ ခန္ဓာကိုယ် အရွယ်အစားမှာလည်း အဆက်မပြတ် ကြီးထွားလာတော့သည်။

ပေ ၁ သန်း၊ ပေ ၂ သန်း။

"ဘုန်း..."

လောကငယ်လေးက မုန်လဲ့ကို ဆက်လက် ဆံ့နိုင်စွမ်း မရှိတော့ချေ။ ကျယ်လောင်သော ပေါက်ကွဲသံကြီးနှင့်အတူ လောကငယ်လေးမှာ မုန်လဲ့၏ ကြီးထွားလာမှုကို မခံနိုင်တော့ဘဲ ပေါက်ကွဲထွက်သွားလေတော့သည်။

မုန်လဲ့သည် အဆုံးအစမရှိသော ဟင်းလင်းပြင်ကြီးထဲသို့ တိုက်ရိုက် ထွက်ပေါ်လာခဲ့သော်လည်း သူ၏ ခန္ဓာကိုယ်မှာ ဆက်လက် ကြီးထွားနေဆဲ ဖြစ်ကာ ပေ ၃ သန်း၊ ပေ ၄ သန်း၊ ပေ ၅ သန်းနှင့် ပေ ၆ သန်း အထိ ရောက်ရှိသွားခဲ့သည်။

နောက်ဆုံးတွင် မုန်လဲ့၏ ခန္ဓာကိုယ် ကြီးထွားမှု ရပ်တန့်သွားချိန်၌ သူ၏ အရွယ်အစားမှာ ပေ ၆ သန်း ၆ သိန်း ၆ သောင်းအထိ ရောက်ရှိသွားခဲ့လေပြီ။

တကယ့်ကို ဧရာမ သတ္တဝါကြီးပင် ဖြစ်၏။ မီတာအားဖြင့် ၁၉၉၈၀၀၀၀ ရှိလေပြီး ကီလိုမီတာအားဖြင့် ၁၉၉၈၀ ခန့် ရှိကာ ခန့်မှန်းခြေ ကီလိုမီတာ ၂ သောင်းခန့် ရှိပေသည်။

ဆိုလိုသည်မှာ ယခုအချိန်တွင် မုန်လဲ့သည် ကမ္ဘာမြေကြီးထက်ပင် ကြီးမားနေပြီး ဧဝရက်တောင် ၁၀၀၀ စာခန့် ပိုမို မြင့်မားနေကြောင်း ပြသနေ၏။ သူ၏ လက်ရှိ ခန္ဓာကိုယ် အရွယ်အစားမှာ မည်မျှတောင် ကြီးမားခမ်းနားနေမည်ကို စဉ်းစားကြည့်နိုင်ပေသည်။

"ဝုန်း..."

မုန်လဲ့က မော့ကြည့်ကာ ဟိန်းဟောက်လိုက်လေသည်။ ကြောက်မက်ဖွယ်ကောင်းသော အသံလှိုင်းကြီးများ ပေါက်ကွဲထွက်လာပြီး အနီးနားရှိ ဥက္ကာခဲများနှင့် လွင့်မျောနေသော ကုန်းမြေတိုက်များမှာ ကြက်ဥများအလား တစ်ပြိုင်နက်တည်း ပေါက်ကွဲထွက်သွားကြတော့၏။

ဟိန်းဟောက်သံ တစ်ချက်၏ အစွမ်းမှာ မည်မျှတောင် ကြောက်စရာကောင်းကြောင်းကို သိသာထင်ရှားလှပေသည်။

"ဒါ... ဒါ... ဒါ..."

မိုလော့နှင့် အနက်ရောင်ဖီးနစ် ဘိုးဘေးတို့မှာ လုံးဝ ကြောင်အမ်းသွားကြလေပြီ။

အစပိုင်းက မုန်လဲ့မှာ စွမ်းအားနည်းပါးသော အရွယ်မရောက်သေးသည့် မီးကြယ် ဟင်းလင်းပြင် သားရဲကြီး တစ်ကောင်အဖြစ်သာ ရှိနေခဲ့လျှင် ယခုအချိန်တွင်တော့ သူသည် အစွမ်းအစများ စတင်ထက်မြက်လာပြီဖြစ်သော လူငယ်အရွယ် မီးကြယ် ဟင်းလင်းပြင် သားရဲကြီး တစ်ကောင်အဖြစ်သို့ ရောက်ရှိသွားခဲ့ပြီ ဖြစ်၏။

မိနစ်အနည်းငယ်အတွင်းမှာပင် ကလေးအရွယ်မှ လူငယ်အရွယ်သို့ ခုန်တက်သွားခြင်းမှာ တကယ်ကို မယုံကြည်နိုင်လောက်အောင် လျင်မြန်လွန်းလှပေသည်။

"သူက တကယ်တော့ ဘယ်လို သတ္တဝါဆန်းကြီးလဲ..."

အနက်ရောင်ဖီးနစ် ဘိုးဘေးမှာ တိုးတိတ်စွာ ရေရွတ်လိုက်မိပြီး သူ၏ အရှင်သခင် အသစ်ကို လုံးဝ နားမလည်နိုင်အောင် ဖြစ်သွားရလေသည်။

"သတ္တဝါဆန်း... ဟုတ်တယ်... သူက တကယ့် သတ္တဝါဆန်းကြီးပဲ..."

မိုလော့လည်း အလွန်အမင်း တုန်လှုပ်နေခဲ့၏။

"တကယ်ကို ကြောက်စရာကောင်းတဲ့ ခန္ဓာကိုယ်ပဲ..."

မုန်လဲ့သည် ခြေလက်များနှင့် ထက်မြက်သော လက်သည်းများကို ဆန့်တန်းလိုက်ပြီး ခေါင်းနှင့် တောင်ပံများကို လှုပ်ခါကြည့်လိုက်သည်။ ပိုမို အစွမ်းထက်လာသော ခန္ဓာကိုယ်ကို ခံစားရင်း ကျေနပ်အားရစွာ ပြုံးလိုက်မိ၏။

သူ မျှော်လင့်ထားသည့်အတိုင်းပင် မီးကြယ် ဟင်းလင်းပြင် သားရဲကြီး၏ သွေးမျိုးဆက် ပေါင်းစပ်မှု ၁၀၀ ရာခိုင်နှုန်းအထိ ပြည့်သွားပြီးနောက် သူ၏ နတ်ဘုရားခန္ဓာကိုယ်မှာ အလယ်အလတ်အဆင့် ပင်မနတ်ဘုရား တစ်ပါးနှင့် ယှဉ်နိုင်လောက်အောင် အစွမ်းထက်လာခဲ့လေပြီ။

အဆင့်နိမ့် ပင်မနတ်ဘုရားအဆင့်မှ အလယ်အလတ်အဆင့် ပင်မနတ်ဘုရားအဆင့်သို့ တက်လှမ်းရန် သွေးမျိုးဆက် တစ်ခုတည်းကိုသာ ပေါင်းစပ်လိုက်ရခြင်း ဖြစ်ရာ မီးကြယ် ဟင်းလင်းပြင် သားရဲကြီး၏ သွေးမျိုးဆက်မှာ မည်မျှတောင် အစွမ်းထက်ကြောင်းကို သိသာထင်ရှားလှပေသည်။

"စနစ်... မီးကြယ် ဟင်းလင်းပြင် သားရဲကြီးရဲ့ သွေးမျိုးဆက်က ဘယ်အဆင့်ရှိတဲ့ သွေးမျိုးဆက်လဲ..."

မုန်လဲ့က စပ်စုချင်စိတ်ဖြင့် မေးလိုက်သော်လည်း မည်သည့် တုံ့ပြန်မှုမျှ မရရှိခဲ့ချေ။

"ဒီစက်ရုပ် စနစ်ကြီး... စနစ်... မီးကြယ် ဟင်းလင်းပြင် သားရဲကြီးရဲ့ သွေးမျိုးဆက်ကို အဆင့်မြှင့်တင်ဖို့ နတ်ဘုရားသလင်းကျောက် ဘယ်လောက် ကုန်ကျမလဲ..."

မုန်လဲ့က အမေးပုံစံ ပြောင်းလိုက်ရာ ဤတစ်ကြိမ်တွင်တော့ စနစ်က လျင်မြန်စွာ ပြန်လည် ဖြေကြားလာခဲ့၏။

"မီးကြယ် ဟင်းလင်းပြင် သားရဲကြီးရဲ့ သွေးမျိုးဆက်ဟာ ပင်မနတ်ဘုရား သွေးမျိုးဆက် ဖြစ်ပါတယ်... အဆင့်မြှင့်တင်ပြီးရင်တော့ အမြင့်ဆုံး သွေးမျိုးဆက် ဖြစ်လာပါမယ်... ခန့်မှန်း ကုန်ကျစရိတ်က အမြင့်ဆုံး နတ်ဘုရားသလင်းကျောက် ၅၀၀ ဖြစ်ပါတယ်..."

စနစ်က ဖြေဆိုလိုက်သည်။

"အမြင့်ဆုံး နတ်ဘုရားသလင်းကျောက် ၅၀၀..."

မုန်လဲ့က မျက်တောင်များ ပုတ်ခတ်ပုတ်ခတ် လုပ်လိုက်၏။

"အမြင့်ဆုံး နတ်ဘုရားသလင်းကျောက် ဆိုတာ အတိုင်းအတာ ယူနစ် အသစ်လား... သာမန် နတ်ဘုရားသလင်းကျောက် ဘယ်လောက်နဲ့ ညီမျှလဲ..."

မုန်လဲ့က မေးလိုက်သည်။

"အမြင့်ဆုံး နတ်ဘုရားသလင်းကျောက် ဆိုတာ အမြင့်ဆုံး နတ်ဘုရားစွမ်းအားတွေ စုစည်းပြီး ဖြစ်ပေါ်လာတဲ့ စွမ်းအင် သလင်းကျောက် ဖြစ်ပါတယ်... အမြင့်ဆုံး နတ်ဘုရားသလင်းကျောက် ၁ ခုဟာ သာမန် နတ်ဘုရားသလင်းကျောက် ၁၀ ကွာဒရီလီယံနဲ့ ညီမျှပါတယ်..."

စနစ်က အေးစက်စွာ ပြန်ဖြေလေသည်။

"ဆိုလိုတာက အမြင့်ဆုံး နတ်ဘုရားသလင်းကျောက် ၅၀၀ ဆိုတာ သာမန် နတ်ဘုရားသလင်းကျောက် ၅၀၀၀ ကွာဒရီလီယံနဲ့ ညီမျှတာပေါ့..."

မုန်လဲ့မှာ လေအေးများကို ရှူသွင်းလိုက်မိ၏။

"ဒီဈေးက အရမ်းကို များလွန်းတယ်... ငါ တတ်နိုင်မှာ မဟုတ်ဘူး... တတ်နိုင်မှာ မဟုတ်ဘူး..."

ကြောက်မက်ဖွယ်ကောင်းသော ဈေးနှုန်းကြောင့် အလွန်အမင်း လန့်သွားခဲ့ရသော်လည်း မုန်လဲ့သည် မီးကြယ် ဟင်းလင်းပြင် သားရဲကြီး သွေးမျိုးဆက်၏ အဆင့်ကို သိရှိသွားခဲ့ပြီ ဖြစ်သည်။ ၎င်းမှာ ပင်မနတ်ဘုရား သွေးမျိုးဆက် ဖြစ်၏။

သို့သော် မုန်လဲ့၏ အမြင်တွင် ပင်မနတ်ဘုရားများ၌ အားနည်းသူနှင့် အားကြီးသူ ရှိသကဲ့သို့ ပင်မနတ်ဘုရား သွေးမျိုးဆက်များတွင်လည်း အဆင့်အတန်း ခွဲခြားမှုများ ရှိမည်ဟု ယူဆထားလေသည်။ စစ်မှန်သော နတ်ဘုရား သွေးမျိုးဆက်များကဲ့သို့ပင် ဖြစ်၏။

စစ်မှန်သော နတ်ဘုရားများတွင် အဆင့်နိမ့်၊ အလယ်အလတ်၊ အဆင့်မြင့် ဟူ၍ ရှိသကဲ့သို့ စစ်မှန်သော နတ်ဘုရား သွေးမျိုးဆက်များတွင်လည်း ထိုကဲ့သို့ ကွာခြားချက်များ ရှိလေသည်။ ပင်မနတ်ဘုရား သွေးမျိုးဆက်များတွင်လည်း ထိုအတိုင်းပင် ဖြစ်မည်မှာ သေချာလှပေသည်။

မီးကြယ် ဟင်းလင်းပြင် သားရဲကြီးသည် အရွယ်ရောက်ပြီးပါက အုပ်စိုးသူ တစ်ပါးနှင့် ယှဉ်နိုင်စွမ်း ရှိရာ ၎င်း၏ သွေးမျိုးဆက်မှာ အစွမ်းအထက်ဆုံး ပင်မနတ်ဘုရား သွေးမျိုးဆက် အမျိုးအစားထဲတွင် ပါဝင်မည်မှာ သေချာလှပေသည်။

ထို့နောက် မုန်လဲ့သည် မီးကြယ် ဟင်းလင်းပြင် သားရဲကြီး၏ ပုံစံဖြင့် အတန်ကြာ လေ့ကျင့်နေပြီးနောက် လူသားပုံစံသို့ ပြန်လည် ပြောင်းလဲကာ အနက်ရောင်ဖီးနစ် ဘိုးဘေးနှင့် မိုလော့တို့၏ ရှေ့သို့ ပြန်လာခဲ့သည်။

ထိုသူနှစ်ဦးမှာ မုန်လဲ့ကို သတ္တဝါဆန်းကြီး တစ်ကောင်ကို ကြည့်နေသည့်အလား အံ့ဩမှင်တက်ခြင်းနှင့် မယုံကြည်နိုင်ခြင်းများ ပြည့်နှက်နေသော မျက်လုံးများဖြင့် ကြည့်နေကြ၏။

"မင်း... ထပ်ပြီး အစွမ်းထက်လာပြန်ပြီပဲ..."

မိုလော့က အံ့ဩတကြီးဖြင့် ချီးကျူးလိုက်လေသည်။

"အလယ်အလတ်အဆင့် ပင်မနတ်ဘုရားနဲ့ ယှဉ်နိုင်တဲ့ ကြောက်စရာကောင်းတဲ့ ခန္ဓာကိုယ်... ပြီးတော့ အမြင့်ဆုံး နိယာမတရား ၂ ခုကိုလည်း နားလည်ထားသေးတယ်... လက်ရှိ မင်းက ဘယ်လောက်တောင် အစွမ်းထက်နေပြီလဲ ဆိုတာကို ငါတောင် ခန့်မှန်းလို့ မရတော့ဘူး..."

တကယ်ကို ခန့်မှန်းရန် ခက်ခဲလှပေသည်။ အဆင့်နိမ့် ပင်မနတ်ဘုရား တစ်ပါးသည် အမြင့်ဆုံး နိယာမတရား တစ်ခု၏ တစ်ဝက်ကို နားလည်လိုက်သည်နှင့် အဆင့်မြင့် ပင်မနတ်ဘုရား တစ်ပါးနှင့် ယှဉ်နိုင်စွမ်း ရှိသွားပြီ ဖြစ်၏။

အဆင့်နိမ့် ပင်မနတ်ဘုရား တစ်ပါးသည် အမြင့်ဆုံး နိယာမတရား တစ်ခုလုံးကို နားလည်သွားပါက အမြင့်ဆုံး အုပ်စိုးသူ တစ်ပါးနှင့်ပင် ယှဉ်နိုင်စွမ်း ရှိလေသည်။

မုန်လဲ့မှာမူ မည်သို့ ရှိမည်နည်း။ သူသည် အလယ်အလတ်အဆင့် ပင်မနတ်ဘုရား တစ်ပါးနှင့် ယှဉ်နိုင်သော ခန္ဓာကိုယ်ကို ပိုင်ဆိုင်ထားပြီး အမြင့်ဆုံး နိယာမတရား ၂ ခုကိုလည်း နားလည်ထားလေသည်။

လက်ရှိ အချိန်တွင် သူသည် မည်မျှတောင် အစွမ်းထက်နေမည်နည်း။ အဆင့်မြင့် ပင်မနတ်ဘုရား အဆင့်လား။

အဆင့်မြင့် ပင်မနတ်ဘုရားထက် ပိုမို အစွမ်းထက်နေမည်မှာတော့ သေချာလှပေသည်။ ဤအချက်မှာ ယုံမှားသံသယဖြစ်ဖွယ် လုံးဝ မရှိချေ။ အုပ်စိုးသူနဲ့ ယှဉ်နိုင်မလား။ အဲဒီလောက်ထိ အစွမ်းထက်ပါ့မလား။ မိုလော့က အနည်းငယ် သံသယ ဝင်နေမိ၏။

"မဟုတ်ဘူး... ၂ ခုတည်း မဟုတ်ဘူး..."

မုန်လဲ့က ခပ်ဟဟ ရယ်မောလိုက်လေသည်။

"ငါက အချိန်မရွေး နောက်ထပ် အမြင့်ဆုံး နိယာမတရား ၂ ခုကို နားလည်နိုင်သေးတယ်..."

ထိုစကားကြောင့် မိုလော့မှာ လုံးဝ ကြောင်အမ်းသွားခဲ့ရ၏။

အနက်ရောင်ဖီးနစ် ဘိုးဘေးမှာမူ ယခုအချိန်တွင် မည်သို့ တုံ့ပြန်ရမည်ကိုပင် မသိတော့ဘဲ မျက်လုံးကြီးများ ပြူးကျယ်ကာ ပါးစပ်အဟောင်းသား ဖြစ်နေတော့သည်။