အခန်း ၄၂၂

အခန်း ၄၂၂ ပင်မနတ်ဘုရား အမြုတေ လေးဆယ့်သုံးခုလုံး ပေါင်းစပ်ခြင်း

အသက်ပန်းခြံဆိုသည်မှာ ကောင်းကင်ယံတွင် မြင့်မားစွာ ချိတ်ဆွဲထားသော ပန်းခင်းကြီးတစ်ခုဖြစ်သည်။ မရေမတွက်နိုင်သော အစိမ်းရောင် အပင်များ အချင်းချင်း ရစ်နွယ်နေကာ ပန်းများ ဝေဆာနေသည့် ကောင်းကင်တိုင်လုံးကြီး တစ်ခုအဖြစ် ဖန်တီးထားပြီး အသက်ပန်းခြံကို ကောင်းကင်ယံတွင် လွင့်မျောနေသကဲ့သို့ ဖြစ်အောင် ပင့်မထားလေသည်။

အသက်ပန်းခြံ၏ အကျယ်အဝန်းမှာ မကြီးမားလှပေ။ ပတ်ပတ်လည်တွင် မရေမတွက်နိုင်သော တန်ဖိုးကြီး ပန်းမန်များ ပေါက်ရောက်နေပြီး မွှေးကြိုင်လှသော ရနံ့များကို ထုတ်လွှတ်နေသည်။

ပန်းခင်း၏ အလယ်ဗဟိုတွင် နတ်ဘုရားကျောင်းတော် တစ်ခု ခန့်ညားထည်ဝါစွာ ရပ်တည်နေသည်။ ထိုကျောင်းတော်မှာ ကောင်းကင်ဘုံ အုပ်စိုးသူ လေးပါးထဲမှ တစ်ပါးဖြစ်သော အသက်အုပ်စိုးသူ၏ နတ်ဘုရားကျောင်းတော် အသက် နတ်ဘုရားကျောင်းတော်ပင် ဖြစ်လေသည်။

ကမ္ဘာမြေနတ်ဘုရားလောက တိုက်ပွဲက အသက်အုပ်စိုးသူကို ထိတ်လန့်ကျောချမ်းသွားစေခဲ့သည်။ အသက် နတ်ဘုရားကျောင်းတော်သို့ ပြန်ရောက်ပြီးနောက် သူမက အနည်းငယ် မှာကြားပြီးသည်နှင့် ချက်ချင်း တံခါးပိတ် ကျင့်ကြံတော့သည်။

သူမက အထွတ်အထိပ် နိယာမတရားများကို နားလည်သဘောပေါက်ပြီး စွမ်းအားကို ဆက်လက်မြှင့်တင်ကာ မုန်လဲ့၏ လက်စားချေမှုအတွက် အချိန်မရွေး အဆင်သင့် ဖြစ်နေစေရန် ပြင်ဆင်ထားချင်သည်။ မုန်လဲ့က ဤကိစ္စကို ဒီအတိုင်း အဆုံးသတ်သွားလိမ့်မည် မဟုတ်ကြောင်း သူမ ယုံကြည်ထားလေသည်။

'ဝုန်း ဝုန်း ဝုန်း'

ထိုအချိန်တွင် ကောင်းကင်ယံမှ ကျယ်လောင်လှသော ပေါက်ကွဲသံကြီးများ ဆက်တိုက် ထွက်ပေါ်လာပြီး အသက်အုပ်စိုးသူကို လန့်နိုးသွားစေသည်။

သူမက အံ့ဩစွာ မော့ကြည့်လိုက်ရာ အဝေးဆီမှ ကောင်းကင်ယံတွင် တွင်းနက်ကြီးတစ်ခု ထွက်ပေါ်လာသည်ကို မြင်လိုက်ရသည်။ ထိုတွင်းနက်ကြီးမှာ လျင်မြန်စွာ ပြန့်နှံ့ကြီးထွားလာနေသော ဧရာမ တွင်းနက်ကြီး တစ်ခု ဖြစ်လေသည်။

'ဟိုဘက်မှာ ဘာတွေ ဖြစ်နေတာလဲ'

အသက်အုပ်စိုးသူ၏ မျက်နှာမှာ ပြင်းထန်စွာ ပျက်ယွင်းသွားပြီး နတ်ဘုရားကျောင်းတော်ထဲမှ အလျင်အမြန် ပျံသန်းထွက်ခွာလာကာ ကောင်းကင်ဘုံ စွမ်းအားကို အသုံးပြု၍ အဝေးသို့ ကြည့်ရှုလိုက်သည်။

အထွတ်အထိပ် ကောင်းကင်ဘုံကြီးသည် ပြင်းထန်သော တိုက်ခိုက်မှုများကို ခံနေရကြောင်း မြင်လိုက်ရသည်။ ဤတိုက်ခိုက်မှုများက အထွတ်အထိပ် ကောင်းကင်ဘုံ လောကအကာအကွယ်၏ ခံနိုင်ရည်အားထက်ပင် ကျော်လွန်နေသဖြင့် လောကအကာအကွယ်မှာ လျင်မြန်စွာ ပျက်စီးသွားရလေသည်။

အသက်အုပ်စိုးသူမှာ အလွန်အမင်း အံ့ဩထိတ်လန့်သွားရသည်။

အထွတ်အထိပ် ကောင်းကင်ဘုံသည် အဆင့်မြင့် လောကများထက် သာလွန်သော အထွတ်အထိပ် လောက တစ်ခုဖြစ်ရာ အာကာသ တည်ငြိမ်မှုနှင့် လောကအကာအကွယ်၏ ခိုင်မာမှုမှာ ပြိုင်ဘက်ကင်းလှသည်။

သူတို့ အုပ်စိုးသူများ ကိုယ်တိုင်ပင် အထွတ်အထိပ် ကောင်းကင်ဘုံ စွမ်းအားကို အသုံးပြု၍ တိုက်ခိုက်လျှင်တောင် လောကအကာအကွယ်ကို အကြီးအကျယ် ပျက်စီးအောင် လုပ်နိုင်ရန် အလွန် ခက်ခဲလှပေသည်။

သို့သော် ယခုအချိန်တွင်မူကား လောကအကာအကွယ်များ တစ်စစီ ပျက်စီးပျောက်ကွယ်သွားကာ ဗလာနတ္ထိအဖြစ် ပြောင်းလဲသွားလေသည်။ အထွတ်အထိပ် ကောင်းကင်ဘုံသည် မည်မျှလောက် ပြင်းထန်သော တိုက်ခိုက်မှုမျိုးကို ခံနေရသဖြင့် ဤမျှလောက်အထိ ပျက်စီးနေရသနည်း ဆိုသည်ကို အသက်အုပ်စိုးသူ စိတ်ကူးပင် မယဉ်နိုင်အောင် ဖြစ်နေလေသည်။

'ဘယ်သူလဲ ကောင်းကင်ဘုံ အကာအကွယ်ကို တိုက်ခိုက်နေတာ ဘယ်သူလဲ မုန်လဲ့များလား ဟင့်အင်း မဖြစ်နိုင်ဘူး သူ့မှာ ဒီလောက် စွမ်းအား မရှိဘူး အဲဒါဆို တကယ် ဘယ်သူများလဲ'

အသက်အုပ်စိုးသူ၏ မျက်နှာမှာ တစ်ခါဖြူလိုက် တစ်ခါနီလိုက် ဖြစ်နေသည်။ သာမန်အချိန်များတွင် ဆိုလျှင် အထွတ်အထိပ် ကောင်းကင်ဘုံတွင် လာရောက် ရမ်းကားဝံ့သူ မည်သူ့ကိုမဆို သူမက အပြေးအလွှား သွားရောက် ချေမှုန်းပစ်မည် ဖြစ်သော်လည်း ယခုအကြိမ်တွင်တော့ သူမ တွန့်ဆုတ်နေမိသည်။

တစ်ဖက်လူ၏ စွမ်းအားမှာ စိတ်ကူးမယဉ်နိုင်လောက်အောင် ကြီးမားနေသဖြင့် သူမ၏ အသက်ကို စတေးပြီး သွားရောက် မရင်ဆိုင်ရဲချေ။

'ရွှတ် ရွှတ် ရွှတ်'

ထိုအချိန်တွင် ပုံရိပ်ဆယ်ခု ဆက်တိုက် ထွက်ပေါ်လာသည်။ သူတို့မှာ အသက်အုပ်စိုးသူ၏ လက်အောက်ခံ ပင်မနတ်ဘုရား ဆယ်ပါးပင် ဖြစ်လေသည်။

အထွတ်အထိပ် ကောင်းကင်ဘုံတွင် ပင်မနတ်ဘုရား စုစုပေါင်း လေးဆယ့်လေးပါး ရှိပြီး အုပ်စိုးသူ လေးပါး၏ လက်အောက်တွင် ဆယ်ပါးစီ အသီးသီး ရှိကာ ကျန်လေးပါးမှာ အမှီအခိုကင်းသော ပင်မနတ်ဘုရားများ ဖြစ်ကြသည်။

"အရှင်အုပ်စိုးသူ..."

ပင်မနတ်ဘုရား ဆယ်ပါးလုံး၏ မျက်ဝန်းများထဲတွင် စိုးရိမ်ပူပန်မှုများနှင့် ထိတ်လန့်ကြောက်ရွံ့မှုများ အပြည့်အဝ ရှိနေကြသည်။ ကမ္ဘာမြေနတ်ဘုရားလောက တိုက်ပွဲကြောင့် သူတို့ အားလုံးမှာ လေးကြောက်ငှက်များအလား ဖြစ်နေကြပြီး ယခု ကောင်းကင်ဘုံ အကာအကွယ်ကို တစ်စုံတစ်ယောက်က ဤကဲ့သို့ တိုက်ခိုက်နေချိန်တွင် သူတို့ မည်သို့ မစိုးရိမ်ဘဲ နေနိုင်မည်နည်း။

"အရှင်အုပ်စိုးသူ မုန်လဲ့ သေချာပေါက် မုန်လဲ့က ကောင်းကင်ဘုံ အကာအကွယ်ကို တိုက်ခိုက်နေတာပဲ ဖြစ်ရမယ် သူက အထွတ်အထိပ် ကောင်းကင်ဘုံကို ဖျက်ဆီးပစ်ချင်နေတာ ကျွန်တော်တို့ ဘယ်လို လုပ်ကြမလဲ..."

"အရှင်အုပ်စိုးသူ အမြန်ဆုံး အကြံဉာဏ် တစ်ခုခု စဉ်းစားပေးပါဦး တကယ်လို့ အထွတ်အထိပ် ကောင်းကင်ဘုံသာ အဖျက်ဆီးခံလိုက်ရရင် နောက်ဆက်တွဲ ပြဿနာတွေက စိတ်ကူးတောင် ယဉ်ကြည့်လို့ မရနိုင်ဘူး..."

"အရှင်အုပ်စိုးသူ..."

"အားလုံး ပါးစပ်ပိတ်ထား..."

အသက်အုပ်စိုးသူ၏ မျက်နှာမှာ ရုပ်ဆိုးလွန်းနေပြီး လေးနက်သော အသံဖြင့် အော်ဟစ်လိုက်သည်။

"ဖျက်ဆီးခြင်းအုပ်စိုးသူနဲ့ သေခြင်းအုပ်စိုးသူဆီကို အရင်သွားကြမယ် ပြီးမှ ရန်သူကို အတူတူ ရင်ဆိုင်ကြမယ်..."

'ရွှတ်'

ထိုအချိန်တွင် လူတစ်ယောက် နေရာရွှေ့ပြောင်း ရောက်ရှိလာသဖြင့် ပင်မနတ်ဘုရားများက အလျင်အမြန် လှည့်ကြည့်လိုက်ရာ သူတို့၏ မျက်နှာပေါ်တွင် ဝမ်းသာအားရ ဖြစ်သွားကြသည်။

"သေခြင်းအုပ်စိုးသူကို ဂါရဝပြုပါတယ် ခင်ဗျာ..."

ရောက်ရှိလာသူကို မြင်သောအခါ အသက်အုပ်စိုးသူလည်း သက်ပြင်းချလိုက်မိသည်။

"ဟာဒီးစ် မင်း ရောက်လာပြီကိုး..."

"အင်း..."

ရောက်ရှိလာသူမှာ ခြောက်ကပ်နေသော မျက်နှာနှင့် ဖြူဖျော့နေသော အသားအရေ ရှိပြီး တစ်ကိုယ်လုံးတွင် သေခြင်းစွမ်းအင်များ ရစ်ပတ်နေသော အုပ်စိုးသူ သုံးပါးထဲမှ တစ်ပါးဖြစ်သည့် သေခြင်းအုပ်စိုးသူပင် ဖြစ်သည်။ သူက ပင်မနတ်ဘုရား ဆယ်ပါးကို တစ်ချက် ဝေ့ကြည့်လိုက်ပြီးနောက် အသက်အုပ်စိုးသူကို ကြည့်ကာ အက်ကွဲစူးရှသော အသံဖြင့် မေးလိုက်သည်။

"ဒီဆာရေး မရောက်လာသေးဘူးလား..."

"မရောက်သေးဘူး..."

အသက်အုပ်စိုးသူက ခေါင်းခါလိုက်သည်။

"အင်း..."

သေခြင်းအုပ်စိုးသူက ညင်သာစွာ ခေါင်းညိတ်လိုက်သည်။

အသက်အုပ်စိုးသူက ညင်သာစွာ ခေါင်းညိတ်ပြလိုက်ပြီးနောက် သံသယဖြင့် မေးလိုက်သည်။

"ဟာဒီးစ် မင်း တစ်ယောက်တည်း ဘာလို့ ရောက်လာတာလဲ မင်းရဲ့ လက်အောက်က ပင်မနတ်ဘုရား ဆယ်ပါးကော..."

"သူတို့လား သေကုန်ကြပြီ..."

သေခြင်းအုပ်စိုးသူက အေးစက်စွာ ပြောလိုက်သည်။

အသက်အုပ်စိုးသူနှင့် ပင်မနတ်ဘုရား ဆယ်ပါးလုံးမှာ ပြင်းထန်စွာ တုန်လှုပ်သွားကြပြီး မျက်ဝန်းများထဲတွင် ယုံကြည်နိုင်စွမ်း မရှိမှုများ ပြည့်နှက်နေလေသည်။

"ဟာဒီးစ် မင်း ဘာပြောလိုက်တာလဲ မင်း လက်အောက်က ပင်မနတ်ဘုရား ဆယ်ပါးလုံး သေကုန်ပြီ ဟုတ်လား ဒါ ဘယ်လိုလုပ် ဖြစ်နိုင်မှာလဲ သူတို့ ဘယ်လို သေသွားတာလဲ မုန်လဲ့ သတ်လိုက်တာလား..."

"ဟင့်အင်း မုန်လဲ့ သတ်တာ မဟုတ်ဘူး..."

သေခြင်းအုပ်စိုးသူက ညင်သာစွာ ခေါင်းခါလိုက်သည်။

"သူတို့ကို ငါ သတ်လိုက်တာ..."

"မင်း မင်း သတ်လိုက်တာ..."

အသက်အုပ်စိုးသူနှင့် ပင်မနတ်ဘုရား ဆယ်ပါးလုံး၏ မျက်နှာများမှာ ပြင်းထန်စွာ ပျက်ယွင်းသွားပြီး အသက်အုပ်စိုးသူက ဒေါသတကြီး အော်ဟစ်လိုက်သည်။

"ဟာဒီးစ် မင်း ဘာလို့ အဲဒီလို လုပ်ရတာလဲ..."

"သူတို့ မသေရင် ငါ သေရလိမ့်မယ်..."

သေခြင်းအုပ်စိုးသူ၏ အသံမှာ အရေးမပါသော ကိစ္စတစ်ခုကို ပြောနေသည့်အလား အေးစက်လွန်းလှသည်။

"စကြဝဠာကြီးထဲမှာ မုန်လဲ့လို ထူးကဲလွန်းတဲ့ လူတစ်ယောက် ထွက်ပေါ်လာပြီ ငါတို့ အုပ်စိုးသူ သုံးပါးက သူ့ကို လုံးဝ မယှဉ်နိုင်ဘူး သူ့ကို ရင်ဆိုင်နိုင်ဖို့ ငါ့ရဲ့ စွမ်းအားကို အစွမ်းကုန် မြှင့်တင်မှ ရမယ်..."

"ဒါကြောင့် မင်းရဲ့ လက်အောက်က ပင်မနတ်ဘုရား ဆယ်ပါးလုံးကို မင်း သတ်ပစ်လိုက်တာပေါ့..."

အသက်အုပ်စိုးသူ၏ မျက်နှာမှာ အလွန် ရုပ်ဆိုးလွန်းနေသည်။ ဟာဒီးစ် အဘယ်ကြောင့် ဤသို့ လုပ်ရသည်ကို သူမ ကောင်းစွာ သိရှိထားလေသည်။ ဟာဒီးစ်သည် သူ၏ လက်အောက်ခံ ပင်မနတ်ဘုရား ဆယ်ပါးကို သတ်ဖြတ်ပြီး သူတို့၏ ပင်မနတ်ဘုရား အမြုတေများကို လုယူကာ ပေါင်းစပ်ပြီး သူ၏ စွမ်းအားကို မြှင့်တင်ရန် သေချာပေါက် ကြိုးစားနေခြင်းပင် ဖြစ်သည်။

မှန်ပေသည်။

ဤသည်မှာ စွမ်းအားကို လျင်မြန်စွာ မြှင့်တင်နိုင်သည့် ဖြတ်လမ်းတစ်ခု ဖြစ်သည်။ အကြောင်းမှာ ပင်မနတ်ဘုရား အမြုတေများကို ပိုမို ပေါင်းစပ်နိုင်လေ ဟာဒီးစ် အနေဖြင့် အထွတ်အထိပ် ကောင်းကင်ဘုံကို ပိုမို ထိန်းချုပ်နိုင်လေ ဖြစ်သောကြောင့်ပင်။ အထွတ်အထိပ် ကောင်းကင်ဘုံ စွမ်းအားကို အသုံးပြု၍ ဟာဒီးစ်၏ စွမ်းအားများမှာ အလွန် လျင်မြန်စွာ တိုးတက်လာမည်မှာ သံသယဖြစ်ဖွယ် မရှိချေ။

သို့သော် ဟာဒီးစ်က မည်သို့ ရက်စက်ရဲရသနည်း။

ထိုပင်မနတ်ဘုရား ဆယ်ပါးမှာ မရေမတွက်နိုင်သော နှစ်များစွာ ကတည်းက ဟာဒီးစ်၏ နောက်သို့ လိုက်ပါခဲ့ကြသူများ ဖြစ်ပြီး သူ၏ ယုံကြည်ရဆုံး လက်အောက်ငယ်သားများ ဖြစ်ကြသည်။ သူ မည်သို့ ရက်စက်ရဲရသနည်း။

"ဟာဒီးစ် မင်း တကယ်ကို ရူးသွပ်နေပြီပဲ..."

အသက်အုပ်စိုးသူက အံကိုကြိတ်ကာ ပြောလိုက်သည်။

"အရာအားလုံးက မုန်လဲ့ကို ရင်ဆိုင်ဖို့အတွက်ပဲ..."

သေခြင်းအုပ်စိုးသူက အေးစက်စွာ ပြောသည်။

"တကယ်လို့ ငါတို့က မုန်လဲ့ကို မယှဉ်နိုင်ဘူးဆိုရင် သူက ငါတို့ အားလုံးကို သေချာပေါက် သတ်ပစ်လိမ့်မယ် ဘယ်လိုပဲဖြစ်ဖြစ် သေရမယ့်အတူတူ ငါ့ရဲ့ စွမ်းအား မြှင့်တင်ဖို့အတွက် သူတို့ကို ငါ သတ်လိုက်တာ ပိုမကောင်းဘူးလား..."

"မင်း..."

အသက်အုပ်စိုးသူမှာ စကားပြန်ပြောရန်ပင် မတတ်နိုင်တော့ချေ။ အဓိပ္ပာယ် ရှိလွန်းသဖြင့် သူမ ဘာမျှ ပြန်ပြောစရာ မရှိတော့အောင် ဖြစ်သွားရလေသည်။

"မင်း မြင်တဲ့အတိုင်းပဲ အခြေအနေတွေက ငါ တွေးထားတဲ့အတိုင်း ဖြစ်လာပြီ မုန်လဲ့ တကယ် ရောက်လာပြီလေ ပြီးတော့ သူက အရင်ကထက် အများကြီး ပိုပြီး အစွမ်းထက်နေသေးတယ်..."

သေခြင်းအုပ်စိုးသူက ပြန့်နှံ့ကြီးထွားလာနေသော တွင်းနက်ကြီးကို အဝေးမှ ကြည့်ရင်း ဆက်ပြောသည်။

"သူ့ကို ငါတို့ သေချာပေါက် တားဆီးရမယ် ဒါကြောင့် ငါ့မှာ ပိုပြီး အစွမ်းထက်တဲ့ စွမ်းအားတွေ လိုအပ်တယ်..."

အသက်အုပ်စိုးသူ၏ ရင်ထဲတွင် မကောင်းသော ကြိုတင်ခံစားမှု တစ်ခု ရုတ်တရက် ဖြစ်ပေါ်လာသည်။

"ဟာဒီးစ် မင်း ဘာလုပ်ချင်တာလဲ..."

"ဘာမှ မလုပ်ပါဘူး သူတို့ရဲ့ ပင်မနတ်ဘုရား အမြုတေတွေကို ခဏ ငှားသုံးမလို့ပါ..."

သေခြင်းအုပ်စိုးသူက ပင်မနတ်ဘုရား ဆယ်ပါးဘက်သို့ လှည့်ကြည့်လိုက်ရာ ဖြူရော်နေသော မျက်နှာပေါ်တွင် လုံးဝ အေးစက်နေလေသည်။ ထို့နောက် ညာလက်ကို မြှောက်ကာ ညင်သာစွာ ဆုပ်ကိုင်လိုက်သည်။

'ဝုန်း'

ဧရာမ အရိုးလက်ဝါးကြီး တစ်ခု ရုတ်တရက် ထွက်ပေါ်လာပြီး ပင်မနတ်ဘုရား ဆယ်ပါးဆီသို့ တိုက်ရိုက် ဦးတည်သွားတော့သည်။

"မလုပ်နဲ့..."

"ကျစ်..."

"အရှင်အုပ်စိုးသူ ကယ်ပါဦး..."

"ထွက်ပြေးကြ..."

သေခြင်းအုပ်စိုးသူ၏ စကားကို ကြားပြီးနောက် ရုတ်တရက် ဝင်ရောက်လာသော အရိုးလက်ဝါးကြီးကို မြင်လိုက်ရသောအခါ အသက်အုပ်စိုးသူ၏ လက်အောက်ခံ ပင်မနတ်ဘုရား ဆယ်ပါးမှာ အလွန်အမင်း ထိတ်လန့်သွားကြပြီး အလျင်အမြန် ထွက်ပြေးရန် ပြင်လိုက်ကြသည်။ သို့သော် နောက်တစ်စက္ကန့်တွင် သူတို့၏ ခန္ဓာကိုယ်များ လုံးဝ ချုပ်နှောင်ခံလိုက်ရကြောင်း ထိတ်လန့်စွာ တွေ့ရှိလိုက်ကြရသည်။

"ကောင်းကင်ဘုံ စွမ်းအား..."

"ဒါ ကောင်းကင်ဘုံ စွမ်းအားပဲ..."

ပင်မနတ်ဘုရား ဆယ်ပါးက သူတို့ကို ချုပ်နှောင်ထားသည့် စွမ်းအားမှာ အဘယ်အရာဖြစ်ကြောင်း သိရှိသွားကြသဖြင့် ပင်မနတ်ဘုရား အမြုတေများကို အလျင်အမြန် လှုံ့ဆော်ကာ ကောင်းကင်ဘုံ စွမ်းအားကို ထုတ်ယူ၍ လွတ်မြောက်ရန် ကြိုးစားကြသည်။ သို့သော် သူတို့ကို လက်ခံနိုင်စွမ်း မရှိအောင် ဖြစ်သွားစေသည်မှာ သူတို့ကို ချုပ်နှောင်ထားသော ကောင်းကင်ဘုံ စွမ်းအားက သူတို့ ထုတ်ယူနိုင်သည့် စွမ်းအားထက် အများကြီး ပိုမို အစွမ်းထက်နေခြင်းပင် ဖြစ်သည်။

သူတို့ အနည်းငယ်မျှပင် လှုပ်ရှား၍ မရနိုင်သေးချေ။

"အလကား အပင်ပန်းမခံကြပါနဲ့တော့..."

သေခြင်းအုပ်စိုးသူက အေးစက်စွာ ပြောလိုက်သည်။

"မင်းတို့ ထွက်ပြေးလို့ မလွတ်ပါဘူး..."

"ကယ်ပါဦး..."

"အရှင်အုပ်စိုးသူ ကယ်ပါဦး..."

ပင်မနတ်ဘုရား ဆယ်ပါးမှာ အသည်းနှလုံးများ ကွဲကြေမတတ် ထိတ်လန့်နေကြပြီး အသက်အုပ်စိုးသူကို အကူအညီ တောင်းကြလေသည်။ ယခုအချိန်တွင် သူတို့သည် အသက်အုပ်စိုးသူကိုသာ မျှော်လင့်နိုင်တော့သည်။ သူမသာလျှင် သူတို့ကို ကယ်တင်နိုင်မည် ဖြစ်သည်။

"ဟာဒီးစ် ရပ်လိုက်စမ်း..."

အသက်အုပ်စိုးသူက ဒေါသတကြီး အော်ဟစ်လိုက်ပြီး ပင်မနတ်ဘုရား ဆယ်ပါးကို ချုပ်နှောင်ထားသော ကောင်းကင်ဘုံ စွမ်းအားကို ဖြိုခွဲရန် ကြိုးစားလိုက်သည်။ သို့သော် သူမကို အံ့ဩသွားစေသည်မှာ လုံးဝ ကျရှုံးသွားခြင်းပင် ဖြစ်သည်။

"ဘယ်လိုလုပ် ဖြစ်နိုင်မှာလဲ..."

အသက်အုပ်စိုးသူက နောက်တစ်ကြိမ် ထပ်မံ ကြိုးစားကြည့်သော်လည်း ကျရှုံးသွားပြန်သည်။

"မင်းကို ပြောပြဖို့ မေ့သွားတယ် ငါက ကိုယ့်လက်အောက်က ပင်မနတ်ဘုရား ဆယ်ပါးတင် သတ်ခဲ့တာ မဟုတ်ဘူး အာကာသအုပ်စိုးသူနဲ့ ဖျက်ဆီးခြင်းအုပ်စိုးသူ လက်အောက်က ပင်မနတ်ဘုရား နှစ်ဆယ်ရယ် အမှီအခိုကင်းတဲ့ ပင်မနတ်ဘုရား သုံးပါးကိုပါ သတ်ခဲ့တာ..."

သေခြင်းအုပ်စိုးသူက တည်ငြိမ်စွာ ပြောလိုက်သည်။

"ဆိုလိုတာက ငါဟာ ပင်မနတ်ဘုရား အမြုတေ သုံးဆယ့်သုံးခုကို ပေါင်းစပ်ထားပြီးပြီ ကောင်းကင်ဘုံကို ထိန်းချုပ်နိုင်စွမ်းက အရင်ကထက် အများကြီး ပိုမို မြင့်မားနေပြီ..."

"သုံး သုံးဆယ့်သုံးခု ဟုတ်လား..."

အသက်အုပ်စိုးသူမှာ ထိုစကားကို ကြားသောအခါ သေးထွက်ကျမတတ် လန့်သွားတော့သည်။ ပင်မနတ်ဘုရား အမြုတေ သုံးဆယ့်သုံးခု ဆိုတာနော်။

ဒါ ဘယ်လို အဓိပ္ပာယ်မျိုးလဲ။

ဒဏ္ဍာရီများအရ အဆင့်မြင့် လောကတစ်ခု၏ ပင်မနတ်ဘုရား အမြုတေ ဆယ်ခုကို ပေါင်းစပ်နိုင်ပါက အထွတ်အထိပ် နတ်ဘုရား တစ်ပါးနှင့် ယှဉ်ပြိုင်နိုင်စွမ်း ရှိသည်ဟု ဆိုကြသည်။ သေခြင်းအုပ်စိုးသူက အထွတ်အထိပ် ကောင်းကင်ဘုံ၏ အမြုတေ သုံးဆယ့်သုံးခုကို ပေါင်းစပ်ထားသည်ဆိုတော့ သူ၏ စွမ်းအား မည်မျှအထိ ကြောက်စရာ ကောင်းနေမည်နည်း။

'ဝုန်း'

အရိုးလက်ဝါးကြီးက ပင်မနတ်ဘုရား ဆယ်ပါးကို မျက်စိတစ်မှိတ်အတွင်း လွှမ်းခြုံသွားပြီး သူတို့ကို အမှုန့်ဖြစ်သွားအောင် တိုက်ရိုက် ကြိတ်ခြေပစ်လိုက်ရာ နေရာတွင် ပင်မနတ်ဘုရား အမြုတေ ဆယ်ခုသာ ကျန်ရစ်ခဲ့တော့၏။

ထိုမြင်ကွင်းကို မြင်သောအခါ သေခြင်းအုပ်စိုးသူ၏ မျက်နှာပေါ်တွင် အပြုံးတစ်ခု ထွက်ပေါ်လာသည်။ ဤပင်မနတ်ဘုရား အမြုတေ ဆယ်ခုကိုပါ ပေါင်းစပ်လိုက်ပါက သူသည် စုစုပေါင်း ပင်မနတ်ဘုရား အမြုတေ လေးဆယ့်သုံးခုကို ပေါင်းစပ်ပြီး ဖြစ်သွားမည် ဖြစ်သည်။ ထိုအချိန်ရောက်လျှင် သူ၏ စွမ်းအားမှာ စိတ်ကူးမယဉ်နိုင်လောက်သော အဆင့်တစ်ခုသို့ ရောက်ရှိသွားမည် ဖြစ်ရာ မုန်လဲ့ကို မည်သို့ ကြောက်ရွံ့နေစရာ လိုတော့မည်နည်း။

'ရွှတ်'

သေခြင်းအုပ်စိုးသူက ပင်မနတ်ဘုရား အမြုတေ ဆယ်ခုဆီသို့ လက်လှမ်းလိုက်ချိန်တွင် အသက်အုပ်စိုးသူက အရင် လှုပ်ရှားလိုက်သည်။ သူမက နေရာရွှေ့ပြောင်းခြင်း တစ်ချက်ဖြင့် ပင်မနတ်ဘုရား အမြုတေ ဆယ်ခုရှေ့သို့ ရောက်ရှိသွားပြီး

"မိန်းမယုတ် ရပ်လိုက်စမ်း..."

သေခြင်းအုပ်စိုးသူ၏ မျက်နှာမှာ ပြင်းထန်စွာ ပျက်ယွင်းသွားပြီး လှိုင်းလုံးကြီးများအလား ကောင်းကင်ဘုံ စွမ်းအားများကို ထုတ်ယူကာ အသက်အုပ်စိုးသူဆီသို့ အဟုန်ပြင်းစွာ ဖိချလိုက်သည်။ ဤပင်မနတ်ဘုရား အမြုတေ ဆယ်ခုကို သူ မရမက ယူရမည် ဖြစ်ရာ အသက်အုပ်စိုးသူကို မည်သို့ အယူခံနိုင်မည်နည်း။

'ဝုန်း'

လှိုင်းလုံးကြီးများအလား ကောင်းကင်ဘုံ စွမ်းအားများက မျက်စိတစ်မှိတ်အတွင်း ဝင်ရောက်လာပြီး အသက်အုပ်စိုးသူ၏ ကိုယ်ပေါ်သို့ အဟုန်ပြင်းစွာ ရိုက်ခတ်သွားတော့၏။ အသက်အုပ်စိုးသူမှာ နာကျင်စွာ အော်ဟစ်လိုက်ပြီး ပါးစပ်မှ သွေးများ ပန်းထွက်လာကာ နေရာ၌ပင် ချုပ်နှောင်ခံလိုက်ရပြီး မျက်နှာမှာလည်း ဖြူရော်သွားတော့သည်။

"ဟက်..."

သေခြင်းအုပ်စိုးသူက ပင်မနတ်ဘုရား အမြုတေ ဆယ်ခုကို လှမ်းယူလိုက်ပြီး အသက်အုပ်စိုးသူကို အေးစက်စွာ စိုက်ကြည့်လိုက်သည်။

"မိန်းမယုတ် မင်း စဉ်းစားတာတော့ ကောင်းပါတယ် ဒါပေမဲ့ မင်းရဲ့ စွမ်းအားက အားနည်းလွန်းနေတယ်..."

"ဟာဒီးစ်..."

အသက်အုပ်စိုးသူ၏ မျက်နှာမှာ ရုပ်ဆိုးလွန်းနေပြီး သေခြင်းအုပ်စိုးသူကို ဒေါသတကြီး စိုက်ကြည့်နေလေသည်။

"အုပ်စိုးသူ တစ်ပါး ဖြစ်နေပြီး မင်းက အရမ်း အသိဉာဏ် နည်းလွန်းတယ်..."

သေခြင်းအုပ်စိုးသူက ပင်မနတ်ဘုရား အမြုတေ ဆယ်ခုထဲရှိ ပင်မနတ်ဘုရား ဝိညာဉ်များကို ဖျက်ဆီးပစ်ရင်း အေးစက်စွာ ပြောလိုက်သည်။

"ဒီလို အန္တရာယ်များတဲ့ အချိန်မှာ ကိုယ့်ရဲ့ စွမ်းအားကို မြှင့်တင်ဖို့ မကြိုးစားဘဲ လက်အောက်ခံ ပင်မနတ်ဘုရားတွေကို ကာကွယ်ဖို့ ကြိုးစားနေတာက မင်းလောက် အသိဉာဏ်နည်းတဲ့ အုပ်စိုးသူ မရှိတော့ဘူး..."

"ဟာဒီးစ် မင်း ဘာလုပ်ချင်တာလဲ..."

အသက်အုပ်စိုးသူက တိုးတိတ်စွာ ဟိန်းဟောက်လိုက်သည်။

"မင်း ရင်ထဲမှာ သိနေရက်သားနဲ့ ဘာလို့ ထပ်မေးနေရတာလဲ..."

သေခြင်းအုပ်စိုးသူက အေးစက်စွာ နှာခေါင်းရှုံ့လိုက်ပြီး ပင်မနတ်ဘုရား အမြုတေ ဆယ်ခုကို စတင် ပေါင်းစပ်တော့သည်။ သာမန် နတ်ဘုရားများအတွက် ပင်မနတ်ဘုရား အမြုတေကို ပေါင်းစပ်ရန်မှာ အလွန် ခက်ခဲပြီး အချိန်အကြာကြီး လိုအပ်လေသည်။ ဥပမာ ပူဟာမန်တို့ ကဲ့သို့ပင်။

သို့သော် သေခြင်းအုပ်စိုးသူ အတွက်တော့ ပင်မနတ်ဘုရား အမြုတေ ပေါင်းစပ်ရန်မှာ အလွန် လွယ်ကူလှသည်။ သွေးစက်ချ၍ ပိုင်ရှင်အဖြစ် သတ်မှတ်ပြီးနောက် ပင်မနတ်ဘုရား အမြုတေ တစ်ခုပြီးတစ်ခုကို အသိစိတ်ပင်လယ်ထဲသို့ သွင်းယူကာ အောင်မြင်စွာ ပေါင်းစပ်လိုက်လေသည်။

'ဝုန်း'

ပင်မနတ်ဘုရား အမြုတေ ဆယ်ခု အောင်မြင်စွာ ပေါင်းစပ်သွားသည့် အချိန်မှာပင် သေခြင်းအုပ်စိုးသူ၏ ကိုယ်ပေါ်မှ ထွက်ပေါ်နေသော ဖိအားမှာ တိုးပွားလာခြင်း မရှိဘဲ ပျောက်ကွယ်လုနီးပါး ဖြစ်သွားပြီး လုံးဝ မရှိတော့သကဲ့သို့ ဖြစ်သွားလေသည်။

သို့သော် အသက်အုပ်စိုးသူ၏ မျက်နှာမှာမူ ပိုမို ဖြူရော်သွားတော့၏။ ဤအချိန်တွင် သူမ၏ ရှေ့ရှိ ဟာဒီးစ်သည် အထွတ်အထိပ် ကောင်းကင်ဘုံကြီး တစ်ခုလုံးနှင့် တစ်သားတည်း ပေါင်းစပ်သွားသကဲ့သို့ ခံစားလိုက်ရသည်။ ဟာဒီးစ်သည်ပင် အထွတ်အထိပ် ကောင်းကင်ဘုံ ဖြစ်ပြီး

အထွတ်အထိပ် ကောင်းကင်ဘုံသည်ပင် ဟာဒီးစ် ဖြစ်လေသည်။

ဟာဒီးစ်သည် ပင်မနတ်ဘုရား အမြုတေ အများအပြားကို ပေါင်းစပ်လိုက်သဖြင့် အထွတ်အထိပ် ကောင်းကင်ဘုံကို လုံးဝ ပေါင်းစပ်လုနီးပါး ဖြစ်သွားခြင်းကြောင့် ဤသို့ ဖြစ်ရခြင်းဖြစ်ကြောင်း အသက်အုပ်စိုးသူ ကောင်းစွာ သိရှိထားလေသည်။

"ဒီလို ခံစားချက်မျိုးပဲ..."

ဟာဒီးစ်က နေရာတိုင်းတွင် ရှိနေသော ကောင်းကင်ဘုံ စွမ်းအားများကို ခံစားရင်း မျက်နှာပေါ်တွင် သာယာယစ်မူးနေသော အမူအရာများ ထွက်ပေါ်လာသည်။

"အခု ငါက အထွတ်အထိပ် ကောင်းကင်ဘုံနဲ့ တစ်သားတည်း ပေါင်းစပ်တော့မယ်လို့ ပိုပြီး ခံစားလာရပြီ ဒါပေမဲ့ တကယ် တစ်သားတည်း ပေါင်းစပ်ဖို့အတွက်တော့ နောက်ဆုံး ကျန်နေတဲ့ ပင်မနတ်ဘုရား အမြုတေ လေးခု လိုအပ်သေးတယ်..."

ဟာဒီးစ်က အသက်အုပ်စိုးသူကို ကြည့်လိုက်သည်။

"ငါတို့ အုပ်စိုးသူ အချင်းချင်း ဖြစ်ခဲ့ဖူးတာကို ထောက်ထားပြီး မင်းရဲ့ ပင်မနတ်ဘုရား အမြုတေကို ကိုယ့်သဘောနဲ့ကိုယ် ပေးအပ်လိုက်ပါ မင်းကို အသက်ရှင်ခွင့် ပေးမယ်..."

"ဟာဒီးစ် သတ္တိရှိရင် ငါ့ကို သတ်လိုက်စမ်း..."

အသက်အုပ်စိုးသူ၏ အသံမှာ စူးရှနေသည်။

"ဟားဟားဟား မင်း ငါ့ကို သတ်လို့ မရပါဘူး ငါ့ရဲ့ နတ်ဘုရားဝိညာဉ်က ထာဝရစွမ်းအင်ရဲ့ ပြုပြင်ပြောင်းလဲမှုကို ခံထားရပြီးသား မသေမပျောက်နိုင်ဘူး ထာဝရ တည်တံ့တယ် မင်း ငါ့ကို ဘယ်လိုမှ သတ်လို့ မရဘူး..."

"ငါ မင်းကို မသတ်နိုင်ပေမယ့် ထာဝရ ချိတ်ပိတ်ထားလို့ ရတယ်..."

သေခြင်းအုပ်စိုးသူက အေးစက်စွာ နှာခေါင်းရှုံ့လိုက်ပြီး အသက်အုပ်စိုးသူ၏ ပင်မနတ်ဘုရား အမြုတေကို နှိုက်ယူရန် ပြင်လိုက်သည်။

ထိုအချိန်တွင် လက်ခုပ်တီးသံများ ရုတ်တရက် ထွက်ပေါ်လာသည်။

"ကျွတ် ကျွတ် ကိုယ့်အချင်းချင်း ပြန်သတ်နေကြတဲ့ ဇာတ်လမ်းကောင်း တစ်ပုဒ်ကို မြင်ရဖို့ အမီရောက်လာလိမ့်မယ်လို့ မထင်ထားခဲ့ဘူး ကြည့်ရတာ ငါ ရောက်လာတာ မနောက်ကျသေးဘူးပဲ…”