အခန်း ၁၃၀

အခန်း။ ၁၃၀

ဇောင်ဘင်းချီ စကားဆုံးသည်နှင့် တရားခွင်တစ်ခုလုံး တိတ်ဆိတ်သွားသည်။

သူသည် ငွေလွှဲမှတ်တမ်းအားလုံးကို ကြိုတင်ခွဲခြားပြီး ဂူချန်ကို စောင့်ဆိုင်းနေခဲ့ခြင်းပင်။ လျူဂျွန်က ဝမ်ကျူးထံ ယွမ် ၆ သိန်းကျော် လွှဲပေးထားခဲ့ပြီး ဝမ်ကျူးက တစ်သိန်း ပြန်ပေးထားသော်လည်း ကျန်ငွေ ၅ သိန်း ၃ သောင်းကျော် ရှိနေသေးသည်။

ယခု ဝမ်ကျူး၏ ရှေ့နေက ငွေ ၅ ထောင်သာ ပြန်ပေးမည်ဟု ပြောလိုက်ခြင်းမှာ ပရိသတ်များအတွက် လုံးဝ လက်ခံနိုင်စရာ မရှိသည့် ကိစ္စဖြစ်သည်။

Live လွှင့်မှုကို ကြည့်ရှုသူများမှာ ဒေါသထွက်ပြီး ဝေဖန်မှုများဖြင့် ပွက်လောရိုက်သွားသည်။

[ရွံဖို့ကောင်းလိုက်တာ ပိုက်ဆံ ၅ သိန်းကျော် သုံးထားပြီးမှ ၅ ထောင်ပဲ ပြန်ပေးမယ်ပေါ့လေ]

[ဟားဟား အဲဒီ ၅ သိန်းကျော်က လျူဂျွန်ကိုယ်တိုင် စိတ်ဆန္ဒအလျောက် ပေးတာတဲ့လား]

[ဝမ်ကျူးက တောင်းတာလေ ဘယ်လိုလုပ် စိတ်ဆန္ဒအလျောက် ပေးတာ ဖြစ်မှာလဲ]

[လျူဂျွန်က တကယ့်ကို အပြစ်ကင်းတဲ့သူ၊ ကိုယ့်ဘာသာ စိတ်ဆန္ဒအလျောက် ပေးကမ်းခြင်းလို့ ရေးမှတ်လိုက်မိတာက သူ့ရဲ့ အကြီးမားဆုံး အမှားပဲ။ အခုတော့ ရှေ့နေဂူတောင် ဘာမှလုပ်လို့ မရတော့ဘူး ထင်တယ်]

ဝမ်ကျူးမှာ သူမ၏ ရှေ့နေ စကားပြောလိုက်သည့်အတွက် အနည်းငယ် ပျော်ရွှင်နေသည်။

သူမအနေဖြင့် ၅ ထောင်ပြန်ပေးရန်မှာ ပြဿနာမရှိသော်လည်း သူမကိုယ်တိုင်ကမူ လျူရှောင်နန်ထံမှ စိတ်ပိုင်းဆိုင်ရာ ထိခိုက်မှုအတွက် ယွမ် ၂ သိန်း ပြန်တောင်းချင်နေသည်။

သူမမှာ အွန်လိုင်းမှ အနိုင်ကျင့်ခံနေရသူ၊ စိတ်ကျရောဂါရှိသူဟု ခံယူထားပြီး လျူရှောင်နန်ကို ထောင်ချရန်သာ စိတ်ကူးနေသည်။

ဇောင်ဘင်းချီက "တရားသူကြီးချုပ်ခင်ဗျာ ကျွန်တော်တို့ဘက်က တရားစွဲဆိုချက် အသစ်တစ်ခု ထပ်တင်ချင်ပါတယ်" ဟု ပြောလိုက်သည်။

ဂူချန် မပြောရသေးခင်မှာပင် သူက အခွင့်အရေးယူလိုက်သည်။

"တရားသူကြီးချုပ်။ ဒါက စိတ်ကျရောဂါစစ်ဆေးခြင်းဝဘ်ဆိုက်က ရတဲ့ စိတ်ကျရောဂါ အတည်ပြုချက် လက်မှတ်ပါ။ ဝမ်ကျူးက လျူဂျွန် သေဆုံးသွားပြီးနောက်မှာ စိတ်ဓာတ်တွေ အရမ်းကျနေပါတယ်။ ဝမ်ကျူးကို သူ့ခံစားချက်ကို ပြောခွင့်ပေးပါဦး"

ဇောင်ဘင်းချီက တောင်းဆို လိုက်သည်။

တရားသူကြီး လီခန်းက "ခွင့်ပြုတယ်" ဟု ပြောလိုက်ရာ ဝမ်ကျူးမှာ စတင်ပြောဆိုတော့သည်။

"ကျွန်မ လျူဂျွန်ကို တကယ် ချစ်ခဲ့ပါတယ်။ သူက တကယ်ကို ကောင်းတဲ့သူပါ။ ကျွန်မ သူ့ကို လက်ထပ်ဖို့တောင် စိတ်ကူးခဲ့ပေမဲ့ သူက အလုပ်များလွန်းပြီး ကျွန်မ ခံစားချက်ကို ဂရုမစိုက်ဘူး။ သူက ဂိမ်းပဲဆော့နေတာ။ သူက ဂိမ်းဆော့တဲ့သူဆိုတော့ တခြားမိန်းကလေးတွေနဲ့ ဂိမ်းအတူဆော့နေတာတွေကို မြင်ရတော့ ကျွန်မ အရမ်းစိတ်တိုပြီး ငြူစူခဲ့ရတယ်။ ဒါတွေအားလုံး သူ့ကြောင့် ဖြစ်တာပါ"

"ကျွန်မ အကူအညီ လိုအပ်တဲ့အချိန်တိုင်း သူက အနားမှာ မရှိဘူး။ အလုပ်ပဲ လုပ်နေပြီး ကျွန်မကို ဂရုမစိုက်ဘူး။ ဒါကြောင့် ကျွန်မတို့ လမ်းခွဲခဲ့ကြတာပါ။ ဒါပေမဲ့ လမ်းခွဲတဲ့အချိန်မှာ သူက ကျွန်မ သက်သောင့်သက်သာ နေနိုင်ဖို့ ယွမ် ၈ သောင်း ၈ ထောင် လွှဲပေးခဲ့ပါတယ်။ သူက တကယ်ကို လူကောင်းပါ ဒါကြောင့်လည်း ကျွန်မ လက်ခံခဲ့တာပါ"

"ဒါပေမဲ့ သူ ခုန်ချပြီးသတ်သေသွားလိမ့်မယ်လို့ မထင်ထားခဲ့ဘူး။ သူ့သေဆုံးမှုအတွက် ကျွန်မလည်း အရမ်း ဝမ်းနည်းပါတယ်။ လျူဂျွန်သာ ကျွန်မကို တကယ် ချစ်ရင် ဘာလို့ သေရမှာလဲ။ သူက ကျွန်မရဲ့ ခံစားချက်ကို လုံးဝ မထည့်တွက်သွားတာပါ"

"ကျွန်မက နာကျင်နေရတဲ့ကြားက လျူရှောင်နန်က TikTok မှာ ဗီဒီယိုတွေတင်ပြီး ကျွန်မကို အွန်လိုင်းကနေ အနိုင်ကျင့်တယ်၊ အသရေဖျက်တယ်။ လျူရှောင်နန်ကြောင့် လူဘယ်နှစ်ယောက်က ကျွန်မကို အနိုင်ကျင့်နေလဲ မသိတော့ဘူး။ သူ့ဗီဒီယိုတွေကို ကြည့်ပြီး ကျွန်မ စိတ်ကျရောဂါ အကြီးအကျယ် ဖြစ်နေတာ။ နေ့တိုင်း ငိုနေရတယ်။ မခံရပ်နိုင်အောင် နာကျင်ရပြီး ကျွန်မရဲ့ စိတ်ကျန်းမာရေး အကြီးအကျယ် ထိခိုက်ခဲ့ရတယ်"

"ဒါကြောင့် လျူရှောင်နန်ကို စိတ်ပိုင်းဆိုင်ရာ ထိခိုက်မှုအတွက် ယွမ် ၂ သိန်း လျော်ကြေးပေးဖို့ တောင်းဆိုပါတယ်။ သူက ကျွန်မကို အသရေဖျက်တယ်၊ ပုဂ္ဂိုလ်ရေးအရ တိုက်ခိုက်တယ်။ လျူရှောင်နန်ကို ထောင်ဒဏ် ၃ နှစ် ချမှတ်ပေးဖို့ တောင်းဆိုပါတယ်။ သူပြောပြတဲ့ အကြောင်းအရာတွေထဲက အများစုက ကျွန်မ ဘယ်တော့မှ မလုပ်ခဲ့တဲ့ အရာတွေပါ။ သူက အင်တာနက်ပေါ်မှာ ကျွန်မအကြောင်းတွေ နေ့တိုင်း လုပ်ကြံဖန်တီးနေတာ"

"ပြီးတော့ လျူရှောင်နန်က ကျွန်မနဲ့ လျူဂျွန်ရဲ့ Chat Log တွေကို အွန်လိုင်းမှာ တင်ပြီး ကျွန်မရဲ့ ကိုယ်ရေးကိုယ်တာ လုံခြုံမှုကို ထိပါးတယ်။ ဟီး... တရားသူကြီးချုပ်ရှင့် လျူရှောင်နန်ကို ထောင်ဒဏ် ၁၀ နှစ်လောက် ချမှတ်ပေးဖို့ တောင်းဆိုပါတယ်။ သူလုပ်ခဲ့တာတွေအတွက် သူ ပြန်ပေးဆပ်ရမယ်"

"လျူရှောင်နန်က အစ်ကိုတစ်ယောက် ဆုံးရှုံးရုံပဲ ရှိတာပါ။ ကျွန်မကတော့ အွန်လိုင်းအကြမ်းဖက်မှုကို ခံနေရတာ ဒါက ကျွန်မကို အရမ်းကို ရိုက်ခတ်မှု ဖြစ်စေတယ်။ ကျွန်မက သူထက် ပိုပြီး ဝမ်းနည်းနေရတာ။ လျူရှောင်နန်ရဲ့ နာကျင်မှုက ကျွန်မရဲ့ နာကျင်မှုနဲ့ ယှဉ်လို့ရပါ့မလား"

ဝမ်ကျူး စကားပြောပြီးချိန်တွင် Live လွှင့်မှုကို ကြည့်ရှုသူအားလုံးမှာ အံ့အားသင့်သွားကြသည်။

[ဟမ် မင်းက လျူရှောင်နန်ကို ထောင်ချခိုင်းချင်တာ ဟုတ်လား။ မင်းကပဲ နစ်နာသူ ဖြစ်သွားတာပေါ့လေ]

[ဟားဟား နေ့တိုင်း ငိုနေရတယ်တဲ့လား။ တောက် အရမ်း ရွံစရာကောင်းလိုက်တာ။ ကိုယ်ရေးကိုယ်တာ ထိပါးခံရတယ်တဲ့။ လျူဂျွန်ကို သေအောင်လုပ်ပြီးမှ Chat Log တွေ တင်တာ ဘာဖြစ်လဲ]

[ဝမ်းနည်းနေတယ်တဲ့လား။ လျူဂျွန် သေပြီး ၃ ရက်မြောက်နေ့မှာပဲ ဝမ်ကျူးက တခြားယောက်ျားတစ်ယောက်နဲ့ တွဲပြီး သူ့အိမ်ကို ခေါ်သွားတဲ့ သက်သေတွေကို အင်တာနက်မှာ တင်ထားကြတယ်လေ]

[တကယ်ပါပဲ လျူဂျွန် သေပြီး နောက်နေ့မှာပဲ ဝမ်ကျူး KTV မှာ ပျော်ပါးနေတဲ့ ပုံတွေ ရိုက်ထားတာ ရှိတယ်။ ရှေ့နေဂူတောင် သက်သေပြစရာ မလိုဘူး အကုန်သိပြီးသား။ နေ့တိုင်း ငိုနေရတယ်တဲ့လား]

[ဝိုး လျူရှောင်နန်က အစ်ကို ဆုံးရှုံးတာပဲ ရှိပြီး မင်းက သူ့ထက် ပိုနာကျင်နေတာလား။ ဝမ်ကျူးဆိုတဲ့ ကောင်မက ဘာလဲဟ]

[ဟားဟား လျူဂျွန်က ဝမ်ကျူးအတွက် ပိုက်ဆံရဖို့ အလုပ်တွေ ပင်ပန်းအောင် လုပ်နေတာကို ဝမ်ကျူးက လျူဂျွန်က ဂိမ်းဆော့ဖို့ပဲ အချိန်ပေးတယ်လို့ ပြောနေတာလား။ ဝမ်ကျူးရဲ့ အတွေးအခေါ်တွေက ဒီလောက်ထိ ပုံစံပျက်နေတာလား]

ဂူချန်က ဝမ်ကျူး၏ ပြောကြားချက်ကို အစအဆုံး နားထောင်နေသည်။

၅ စက္ကန့်ခန့် တိတ်ဆိတ်သွားပြီးနောက် ဂူချန်က ဝမ်ကျူးကို ကြည့်ကာ ပြောလိုက်သည်။

"လျူဂျွန် ဆုံးသွားပြီးနောက်မှာ နေ့တိုင်း ငိုခဲ့ရတယ်။ နာကျင်ခဲ့ရတယ်လို့ ခင်ဗျား ပြောတယ်နော်"

ဝမ်ကျူးက ခေါင်းညိတ်သည်။

"ကျွန်မ သူ့ကို အရမ်းချစ်တာပါ။ ဒါပေမဲ့ သူ့ရဲ့ ပြဿနာတွေကြောင့် ကျွန်မ လမ်းခွဲခဲ့ရတာ။ သူ ဆုံးသွားတော့လည်း အရမ်း ဝမ်းနည်းပါတယ်။ ဘာလို့ ကျွန်မကို ဒီလိုလုပ်ရတာလဲ။ ဘာလို့ သူ ခုန်ချလိုက်တာလဲ။ သူ မခုန်ချသင့်ဘူး ကျွန်မ အရမ်း ဝမ်းနည်းတယ်။ နေ့တိုင်း ငိုနေရပြီး စိတ်ပိုင်းဆိုင်ရာ အကြီးအကျယ် ထိခိုက်ခဲ့ရတာ။ အခုဆို စိတ်ကျရောဂါ အပြင်းအထန် ခံစားနေရပြီ"

ဂူချန်က "တခြားကိစ္စတွေကို ခဏဖယ်ထားပြီး တစ်ခု ရှင်းပြချင်တယ်။ လျူဂျွန်က မြစ်ထဲခုန်ချပြီး ဆုံးသွားတာပါ။ အဆောက်အအုံပေါ်ကနေ ခုန်ချတာ မဟုတ်ဘူး" ဟု ပြောလိုက်သည်။

ဝမ်ကျူး - "…."

ဝမ်ကျူးက "အဲဒါနဲ့ ကျွန်မနဲ့ ဘာဆိုင်လို့လဲ။ ကျွန်မက သူ့ကို တွန်းချလိုက်တာလား။ သူက ကျွန်မကို ချစ်ရင် မခုန်ချသင့်ဘူးလေ။ သူ့မိသားစုတစ်ခုလုံး ကျွန်မကို လျော်ကြေးပေးရမယ်။ သူတို့ ရာဇဝတ်မှုဆိုင်ရာ တာဝန်ယူရမယ်" ဟု အော်ပြောလိုက်သည်။