အခန်း ၅၉

အခန်း (၅၉) သွေးမိစ္ဆာဂိုဏ်းချုပ်၏ ရုပ်ဖျက်စုံစမ်းစစ်ဆေးမှု

ဤကောက်ချက်က သူ့အား သက်ပြင်းချနိုင်စေခဲ့သည်။ တော်သေးသည်မှာ သူ မကိုင်တွယ်နိုင်သည့် ကျင့်ကြံသူမျိုး မဟုတ်ပေ။ အတည်ပြုပြီးနောက် ဝမ်ယွီအန်းသည် သဲလွန်စနောက်သို့ လိုက်ကာ ဆက်လက်စုံစမ်းခဲ့သည်။

မကြာမီမှာပင် သူသည် ချင်းယွင်ဈေးကွက် ကို ဖြတ်ကျော်လာခဲ့သည်။ ဝမ်ယွီအန်းသည် ရှေ့ရှိ ဈေးကွက်ကို မြင်သောအခါ သဲလွန်စနောက်သို့ ဆက်မလိုက်တော့ဘဲ ဈေးကွက်အတွင်းရှိ သတင်း အချက်အလက်အချို့ကို အရင်စုံစမ်းရန် ဆုံးဖြတ်လိုက်သည်။

အနည်းဆုံးတော့ အနီးနားတွင် မည်သည့်အင်အားစုများ ရှိသလဲနှင့် ဆေးဆရာများ ပေါ်ဖူးသလား ဆိုသည်ကို သိရန်လိုအပ်သည်။ ဆေးလုံးနှင့်ပတ်သက်သော သဲလွန်စများကို ဈေးကွက်ထဲတွင် ထပ်မံ ရှာဖွေနိုင်လျှင် ပို၍ပင် ကောင်းဦးမည်။ ယခုအချိန်တွင် သူသည် ဂိုဏ်းအကြီးအကဲအတွက် ရန်ငြိုးထက် ထိုဆေးလုံးကို ပို၍ စိတ်ဝင်စားနေမိသည်ပင်။

ဝမ်ယွီအန်းသည် သူ၏ကျင့်ကြံမှုအဆင့်ကို အခြေခံအုတ်မြစ်တည်ဆောက်ခြင်းအဆင့်သို့ နှိမ့်ချလိုက် ပြီးနောက် ဈေးကွက်ထဲသို့ ဝင်ခဲ့သည်။ ကံကောင်းသည်မှာ ဈေးကွက်သည် လူမျိုးစုံရောထွေးနေသည့် နေရာဖြစ်သဖြင့် ဝမ်ယွီအန်း၏ ဝတ်စားဆင်ယင်မှုကို မည်သူမျှ မမေးမြန်းကြပေ။

ခဏမျှ လှည့်ပတ်ကြည့်ပြီးနောက် ဆေးလုံးရောင်းသည့် ဆိုင်ခန်းတစ်ခုမျှ မမြင်ရသဖြင့် ဝမ်ယွီအန်း ဇဝေဇဝါ ဖြစ်သွားသည်။

*ငါ စုံစမ်းတာ လမ်းကြောင်းမှားနေတာလား။ ချန်မိသားစု ပျက်စီးတာက ဆေးလုံးနဲ့ မဆိုင်ဘူးလား*

ဤသံသယဖြင့် ဝမ်ယွီအန်းသည် ဈေးကွက်ထဲမှ ဈေးသည်တစ်ဦးကို မေးရန် ဆုံးဖြတ်လိုက်သည်။

"မိတ်ဆွေ... ကျွန်တော် ဒီဈေးကွက်ကို ရောက်တာ ဒါပထမဆုံးအကြိမ်မို့လို့ပါ။ ဒီမှာ ဆေးလုံးရောင်းတာ ရှိလားလို့ သိချင်ပါတယ်။ ကျွန်တော့်ရဲ့ ချီစုဆောင်းခြင်းအဆင့်က ညီလေးတွေအတွက် ချီစုဆောင်းခြင်း ဆေးလုံး ဒါမှမဟုတ် အလားတူဆေးမျိုး ဝယ်ချင်လို့ပါ…။"

ဝမ်ယွီအန်း၏ မေးခွန်းကို ကြားသောအခါ ဆိုင်ရှင်က သူ့အား မော့ကြည့်ပြီး ပြောလိုက်သည်။

"ဟင်း... မင်း ဒီကို ပထမဆုံးအကြိမ် လာတာဆိုတာ သိသာပါတယ်။ ဒီက စည်းကမ်းတွေကို မင်း ဘာမှ မသိသေးဘူးပဲ…။"

ထိုသို့ပြောပြီးနောက် သူသည် ဘာမှ ထပ်မပြောတော့ဘဲ ခေါင်းငုံ့ကာ ဝမ်ယွီအန်းကို လျစ်လျူရှုထား လိုက်သည်။ ဆိုင်ရှင်၏ အပြုအမူကို မြင်သောအခါ ဝမ်ယွီအန်း၏ နှုတ်ခမ်းများ အနည်းငယ် တွန့်သွား ပြီး တစ်ဖက်လူကို ထိုနေရာမှာတင် သတ်ပစ်ချင်သည့် စိတ်ကို မနည်း ထိန်းချုပ်လိုက်ရသည်။

'ပေါင်းစပ်ခြင်းနယ်ပယ်' အဆင့်ရှိ ကျင့်ကြံသူတစ်ဦးက 'ချီစုဆောင်းခြင်းအဆင့်' ရှိ ပုရွက်ဆိတ်တစ် ကောင်၏ လျစ်လျူရှုမှုကို မည်ကဲ့သို့ ခံနိုင်မည်နည်း။ သူ၏ ကျင့်ကြံမှုကို ဖိနှိပ်ထားသော်လည်း သူသည် အခြေခံအုတ်မြစ်တည်ဆောက်ခြင်းအဆင့်တွင် ရှိနေဆဲဖြစ်သည်။ ချီစုဆောင်းခြင်းအဆင့် ကျင့်ကြံသူ လေးက အခြေခံအုတ်မြစ်တည်ဆောက်ခြင်းအဆင့် ကျင့်ကြံသူကို ဤကဲ့သို့ ဆက်ဆံရဲသည်လား။

*ဒီဝေးလံခေါင်ဖျားတဲ့နေရာက ကျင့်ကြံသူတွေအားလုံးက ဒီလောက်အထိ ရဲတင်းနေကြတာလား*

ဒေါသကို ဖြေဖျောက်ပြီးနောက် ဝမ်ယွီအန်းသည် တစ်ဖက်လူ၏ အားနည်းချက်ကို ခေတ္တခဏ လျစ်လျူရှုရန် ဆုံးဖြတ်လိုက်သည်။ ထို့နောက် သူသည် ဝတ်ရုံထဲသို့ လက်နှိုက်ကာ တစ်ခုခုယူသလို ဟန်ဆောင်ပြီး သိုလှောင်လက်စွပ်ထဲမှ အနိမ့်စား စိတ်ဝိညာဉ်ကျောက်တုံး ဆယ်တုံးကို ထုတ်လိုက် သည်။

"မိတ်ဆွေ... ဒါက ကျွန်တော့်ရဲ့ အမှားပါ။ ဒါလေးကတော့ ကျွန်တော့်ရဲ့ စေတနာလက်ဆောင်ပါ…။"

ဝမ်ယွီအန်း ကမ်းပေးသော စိတ်ဝိညာဉ်ကျောက်တုံး ဆယ်တုံးကို မြင်လိုက်ရသည့်အခါ ဈေးသည်၏ မျက်လုံးများမှာ အရောင်တောက်သွားပြီး ဝမ်ယွီအန်းအပေါ် ထားရှိသော အကြည့်မှာ ချက်ချင်း ပြောင်း လဲသွားတော့သည်။

"မိတ်ဆွေ... မင်းက ဆေးလုံးဝယ်ချင်တာလား။ ငါတို့လို ဝေးလံတဲ့နေရာမှာ ဒါတွေက ရှားပါးကုန်စည် တွေပဲ။ ဒါပေမယ့် မကြာခင်ကပဲ ဆေးလုံးရောင်းတဲ့လူတစ်ယောက် ဒီကို ရောက်လာခဲ့တယ်။ ဟိုးမှာ ကြည့်... အဲ့ဒါ သူဆိုင်ဖွင့်ခဲ့တဲ့ နေရာပဲ…။"

ဈေးသည်က လင်းဖန် ဆိုင်ဖွင့်ခဲ့သည့် နေရာကို ညွှန်ပြပြီး ဆက်ပြောလိုက်သည်။

"ဒါပေမယ့် မိတ်ဆွေရဲ့ စေတနာကို ထောက်ပြီး ငါ အကြံပေးရဦးမယ်။ သူ့ဆီက ဆေးလုံးတွေကို မဝယ် တာ အကောင်းဆုံးပဲ။ ဘာလို့လဲဆိုတော့ သူ့ဆေးလုံးတွေက တခြားဆေးလုံးတွေထက် ဈေးနှစ်ဆ ပိုကြီး နေလို့ပဲ။ ဒါက သိသိသာသာ ဈေးတင်ရောင်းတာပဲ မဟုတ်လား…။"

"ပြီးတော့ အဲ့ဒီကောင်လေးက တကယ့် ကြွားလုံးရှင်ပဲ။ သူ့ဆေးလုံးတွေက သာမန်ဆေးလုံးတွေထက် အများကြီး ပိုအစွမ်းထက်တယ်လို့ ပြောနေတာ။ အလကား အမှိုက်တွေပါကွာ…။"

ဈေးသည်၏ စကားကို ကြားလိုက်ရချိန်တွင် ဝမ်ယွီအန်းသည် ချက်ချင်းပင် စိတ်လှုပ်ရှားသွားသည်။

*သာမန်ဆေးလုံးများထက် ပိုကောင်းတယ် ဟုတ်လား။ ဒါဆိုရင် ဆေးနန်းဆောင်မှာ သူတို့ စမ်းသပ်ခဲ့တဲ့ ဆေးလုံးတွေထဲက တစ်ခု ဖြစ်ဖို့ များနေပြီ..*

"ဆေးအာနိသင်က အရမ်းကောင်းတယ် ဟုတ်လား…။ အဲ့ဒါ အမှန်ပဲလား… သူကိုယ်တိုင် ပြောခဲ့ တာလား….။"

ဝမ်ယွီအန်း၏ သံသယမေးခွန်းကို ကြားသောအခါ ဈေးသည်က သူ၏ ရင်ဘတ်ကို ယုံကြည်ချက်ရှိရှိ ပုတ်ပြလိုက်သည်။

"အမှန်ပေါ့! သူကိုယ်တိုင် ပြောခဲ့တာတင် မကဘူး သူ့ဆိုင်မှာ ဆိုင်းဘုတ်ပါ ချိတ်ထားတာ။ ဆိုင်းဘုတ် ပေါ်မှာ အရှင်းကြီး ရေးထားတာပဲ။ မယုံရင် တခြားလူတွေကို မေးကြည့်လိုက်။ ဘေးနားက လူတိုင်း အရှင်းသား မြင်ဖူးကြတယ်….။"

ဈေးသည်၏ စကားကြောင့် ဤဆေးလုံးမှာ သူရှာနေသည့် ဆေးလုံးဖြစ်ကြောင်း ဝမ်ယွီအန်း အတည်ပြု နိုင်ခဲ့သည်။ သဲလွန်စတစ်ခု ရရှိသွားသဖြင့် ဝမ်ယွီအန်းသည် ဈေးသည်ထံမှ သတင်းအချက်အလက် များကို ဆက်လက် စုဆောင်းခဲ့သည်။

"တကယ်လို့ သူက ဆေးလုံးအာနိသင်ကို အဲ့ဒီလောက် ကြွားနေတာဆိုရင် အတုဖြစ်နေလို့ လူသိသွားမှာ မကြောက်ဘူးလား။ သူ့ဆေးလုံးတွေမှာ တကယ်ပဲ အံ့ဖွယ်အာနိသင် ရှိနေလို့ ဖြစ်မှာပါ…။"

ဝမ်ယွီအန်းက သူ၏ အထင်ကို သံသယဝင်သဖြင့် ဈေးသည်က မကျေမနပ် ဖြစ်သွားသည်။ ခဏမျှ စဉ်းစားပြီးနောက် သူ၏ အခြားခန့်မှန်းချက်ကို ဝမ်ယွီအန်းအား ပြောပြရန် ဆုံးဖြတ်လိုက်သည်။ ဈေးသည်သည် ပတ်ဝန်းကျင်ကို အကဲခတ်လိုက်သည်။

ထို့နောက် သူသည် ထရပ်ကာ ဝမ်ယွီအန်းအနားသို့ တိုးကပ်လာပြီး တိုးတိုးလေး ကပ်ပြောသည်။

"ငါ မင်းကို တစ်ခု ပြောပြမယ် ဒါပေမယ့် ဒါကို ငါပြောတယ်လို့ ဘယ်သူ့ကိုမှ လုံးဝ မပြောပါနဲ့။ အဲ့ဒီည ဆေးလုံးရောင်းတဲ့လူက အနီးနားက ချင်းယွင်ဂိုဏ်း နဲ့ ပတ်သက်မှု ရှိနေတယ်လို့ ငါ သံသယရှိတယ်။ ချင်းယွင်ဂိုဏ်းက သူ့နောက်ကွယ်မှာ ရှိနေတာဆိုတော့ ဒီချင်းယွင်ဈေးကွက်ထဲမှာ သူက ဘာကိုမှ မကြောက်တာ သဘာဝပဲလေ….။"

ဤသဲလွန်စကို ရရှိသဖြင့် ဝမ်ယွီအန်းသည် စိတ်ထဲတွင် ကျိတ်၍ ဝမ်းသာသွားသော်လည်း တည်ငြိမ်စွာ ပင် ဆက်မေးလိုက်သည်။

"ဪ... ဘာလို့ အဲ့ဒီလို ထင်ရတာလဲ…။"

ဝမ်ယွီအန်း၏ မေးခွန်းကို ဈေးသည်က လေသံနှိမ့်၍ ဆက်ပြောသည်။

"ဒီဈေးကွက်ရဲ့ တာဝန်ခံက အဲ့ဒီဆေးလုံးရောင်းတဲ့ ကောင်လေးကို နှုတ်ဆက်နေတာ ငါကိုယ်တိုင် မြင်လိုက်တာ။ ပြီးတော့ အဲ့ဒီနေ့က တတိယတန်းစား အင်အားစုဖြစ်တဲ့ ချန်မိသားစုကလူတွေနဲ့ သူ ပြဿနာတက်တာ ငါတွေ့ခဲ့တယ်။ ဒီဈေးကွက်ထဲမှာ ချန်မိသားစုရဲ့ ဝတ်စုံကို သိတဲ့လူ သိပ်မရှိပေမယ့် ငါကတော့ အဲ့ဒီထဲက တစ်ယောက်ပဲ။ အဲ့ဒီကောင်လေးက ချန်မိသားစုကို လုံးဝ မကြောက်ဘူး။ သူ့နောက်မှာ ချင်းယွင်ဂိုဏ်း ရှိမနေဘူးဆိုတာ ငါ လုံးဝ မယုံဘူး….။"

ဤစကားကို ကြားရသောအခါ ဝမ်ယွီအန်းသည် သဲလွန်စကို နောက်ဆုံးတွင် အတည်ပြုနိုင်ခဲ့ပြီ ဖြစ်လေသည်။ ဤဈေးကွက်သို့ လာရခြင်းမှာ ထိုက်တန်လှသည်။ ဆေးလုံးအကြောင်းသာမက ချန်မိသားစုအကြောင်းကိုပါ သိခဲ့ရသည်ပင်။

အမှန်အတိုင်း ပြောရလျှင် ဤဈေးကွက်ထဲမှ ဈေးသည်များသည် ကျင့်ကြံမှုအဆင့် နိမ့်သော်လည်း သတင်းအချက်အလက် အများအပြားကို ပိုင်ဆိုင်ထားကြသည်။ ဝမ်ယွီအန်းကမူ ဤကဲ့သို့သော လူမျိုး ကို အထင်သေးသည်။ သူ၏ အမြင်တွင် သူသည် အတင်းအဖျင်းစကားများပေါ်တွင် အာရုံမစိုက်ဘဲ ကျင့်ကြံခြင်းကိုသာ အာရုံစိုက်ခဲ့မည်ဆိုလျှင် ယခုအချိန်တွင် အခြေခံအုတ်မြစ်တည်ဆောက်ခြင်း အဆင့်သို့ ရောက်နေလောက်ပြီ ဖြစ်သည်။

အသုံးဝင်သော သဲလွန်စများ ရရှိသွားသဖြင့် ဝမ်ယွီအန်းသည် ဈေးကွက်ထဲတွင် ဆက်နေရန် စိတ်ကူး မရှိတော့ပေ။ သူသည် လှည့်ထွက်လာခဲ့သည်။ ဘေးနားက ဈေးသည်များသည်လည်း တစ်ဖက်လူ ရုတ်တရက် ထွက်သွားသည်ကို မြင်သောအခါ အံ့ဩသွားကြသည်။

"ဟေ့... ခင်ဗျားကလည်း ရိုင်းလှချည်လား။ နှုတ်တောင် မဆက်ဘူးလား။ ကျေးဇူးတင်စကားတောင် မပြောတော့ဘူးလား….။"

ဝမ်ယွီအန်းသည် သူ၏ ခြေလှမ်းကိုသာ အရှိန်မြှင့်လိုက်ပြီး လျစ်လျူရှုထားလိုက်သည်။ သူ အရှိန်နှေးနေ လျှင် ဒေါသထွက်ပြီး တစ်ဖက်လူကို နှစ်ပိုင်းပိုင်းဖြတ်မိမည်ကို စိုးရိမ်နေခြင်းဖြစ်သည်။ ဈေးကွက်၏ စည်းကမ်းကို ဖောက်ဖျက်ခြင်းမှာ ကိစ္စသေးသော်လည်း ရန်သူကို သတိပြုမိသွားအောင် လုပ်ခြင်းမှာ မကောင်းပေ။

ဈေးကွက်မှ ထွက်လာပြီးနောက် ဝမ်ယွီအန်းသည် ဆက်လက် ထွက်ခွာခဲ့ရာ မကြာမီမှာပင် ချင်းယွင် ဂိုဏ်း၏ ဌာနချုပ်သို့ ရောက်ရှိလာသည်။ ရှေ့ရှိ အရေးမပါသော ဂိုဏ်းငယ်လေးကို ကြည့်ရင်း ဝမ်ယွီအန်းသည် ပွင့်ပွင့်လင်းလင်း တံခါးသွားခေါက်ကာ ရှင်းပြချက် တောင်းရန် မလုပ်ခဲ့ပေ။

ကျင့်ကြံခြင်းလောကတွင် နောက်ခံကို အမြဲ သတိထားရမည်။ အကယ်၍ တစ်စုံတစ်ယောက်တွင် အစွမ်းထက်သော ပတ်သက်မှုများ ရှိနေပြီး မဆင်မခြင် သွားရောက် စော်ကားမိလျှင် ၎င်းသည် သွေးမိစ္ဆာဂိုဏ်းအတွက် ဆိုးကျိုးများ သယ်ဆောင်လာနိုင်သည်။

သူတို့၏ သွေးမိစ္ဆာဂိုဏ်းသည် သတ္တမတန်းစားဂိုဏ်း ဖြစ်သဖြင့် အစွမ်းထက်သည်ဟု ထင်ရသော်လည်း အမှန်တကယ်တွင်မူ မည်သည့် နောက်ခံမှ မရှိကြပေ။ သွေးမိစ္ဆာဂိုဏ်းကို တည်ထောင်ခဲ့သော ဘိုးဘေး မှာ မူလက နောက်ခံမရှိသည့် လေလွင့်ကျင့်ကြံသူ တစ်ဦးသာ ဖြစ်သည်။

တစ်ဖက်လူသည် တတိယတန်းစားဂိုဏ်းမျှသာ ဖြစ်သော်လည်း သူတို့၏နောက်တွင် အဋ္ဌမတန်းစား သို့မဟုတ် နဝမတန်းစားဂိုဏ်းကြီးများ ရှိနေနိုင်သည်။ ထိုသို့ဆိုလျှင် သူတို့ မစော်ကားရဲပေ။ အကြောင်း မှာ သူတို့၏ တစ်ခုတည်းသော အားကိုးမှာ သူတို့ကိုယ်တိုင် သို့မဟုတ် ဂိုဏ်းမှ အကြီးအကဲ တစ်ဦးသာ ဖြစ်သောကြောင့် ဖြစ်သည်။

ထို့ကြောင့် သူသည် အရေးမယူမီ ထိုဂိုဏ်းအတွင်းသို့ တိတ်တဆိတ် ဝင်ရောက်ကာ ၎င်း၏ နောက်ခံနှင့် အစွမ်းထက်သော အားကိုးရာများ ရှိမရှိကို အရင်ဆုံး စုံစမ်းရန် စီစဉ်လိုက်သည်။ သူ၏ 'အခြေတည်စိတ် ဝိညာဉ်အဆင့်' ကျင့်ကြံမှုနှင့် ဖုံးကွယ်ခြင်း ပညာရပ်ဖြင့်ဆိုလျှင် ထိုဂိုဏ်းထဲတွင် 'မဟာယာနအဆင့်' ကျင့်ကြံသူ ရှိမနေပါက မည်သူမျှ သူ့အား ရှာတွေ့နိုင်မည် မဟုတ်ဟု သူ ယုံကြည်ထားသည်။

ဤသို့ဖြင့် 'ပေါင်းစပ်ခြင်းနယ်ပယ်' အဆင့်ရှိ ကျင့်ကြံသူတစ်ဦးသည် ချင်းယွင်ဂိုဏ်းအတွင်းသို့ တိတ် တဆိတ်ဝင်ရောက်လာ ခဲ့ပြီး ချင်းယွင်ဂိုဏ်းမှ မည်သူမျှ ၎င်းကို သတိမပြုမိခဲ့ကြပေ။