အခန်း ၂၁၄

အခန်း (၂၁၄) ငါ ဒီမှာပဲ ရှိနေပါတယ်

လင်းဖန်၏ ခေါင်းထဲတွင် အတွေးတစ်ခု ပေါ်လာသည်နှင့် သူသည် တွေဝေသွားလေတော့သည်။ သူ၏ သိုလှောင်လက်စွပ်က မည်ကဲ့သို့သော ထူးဆန်းသည့် ဘေးထွက်ဆိုးကျိုးများ ရှိနေနိုင်သည်ကို ကောင်းကင်ဘုံကသာ သိနိုင်ပေလိမ့်မည်။

သို့သော် ဘေးထွက်ဆိုးကျိုးများနှင့် ယှဉ်လျှင် သူတို့ကိုယ်တိုင် ဖန်တီးထားသော မှော်ပစ္စည်းများသည် အဆများစွာ ပိုမိုကြီးမားသော စွမ်းအားများကို ပိုင်ဆိုင်ထားပေသည်။ မည်သို့ပင်ဆိုစေကာမူ သိုလှောင် လက်စွပ်များကို ပစ္စည်းများ သိမ်းဆည်းရန်အတွက် အဓိက အသုံးပြုလေ့ရှိပြီး အခြားစွမ်းရည်များ ရှိရန် မလိုအပ်သလိုပင်။

"နေပါဦး...၊ တကယ်လို့ သိုလှောင်လက်စွပ်ထဲက ပစ္စည်းတွေ ပျောက်ဆုံးသွားတယ်ဆိုတဲ့ သတင်းကို သာ ငါတို့ ဖြန့်လိုက်မယ်ဆိုရင် ဒါက သေချာပေါက် ထိတ်လန့်မှုတွေ ဖြစ်လာစေလိမ့်မယ်...။"

"ဒါ့အပြင် သိုလှောင်လက်စွပ်တွေက ကျင့်ကြံသူတွေကြား တိုက်ပွဲတွေဖြစ်တဲ့အခါ မကြာခဏ ပျက်စီးလေ့ရှိတယ်...။ ဒါတွေ ပျက်စီးသွားတဲ့အခါ အထဲက ပစ္စည်းတွေလည်း ပျောက်ဆုံးသွား တတ်တယ်...။ ဒါက လုံခြုံရေး ပြဿနာတစ်ခုလည်း ဖြစ်တယ်...။"

"ဒီရောင်းကွက်နှစ်ခုကို ပေါင်းစပ်လိုက်မယ်ဆိုရင်...၊ တကယ်လို့များ ပစ္စည်းတွေရဲ့ လုံခြုံမှုကို အာမခံ ပေးနိုင်တဲ့ သိုလှောင်လက်စွပ် တစ်ကွင်းကိုသာ ငါတို့ ထုတ်လုပ်နိုင်မယ်ဆိုရင် ဒါက သေချာပေါက် လူကြိုက်များလာလိမ့်မယ်...။"

"ဒါပေမဲ့ ဘယ်လို လုပ်ဆောင်ချက်မျိုးက သူတို့ကို လုံခြုံတယ်လို့ ခံစားရစေမှာလဲ...။"

မျက်မှောင်ကြုတ်ကာ ခဏကြာ စဉ်းစားပြီးနောက် လင်းဖန်သည် "ငွေလဲဌာန" ဆိုသည့် စကားလုံးကို ရုတ်တရက် သတိရသွားခဲ့လေသည်။

"ကျစ်...၊ ငွေလဲဌာန...။ ဒါက အရမ်းကောင်းတဲ့ အကြံဉာဏ်ပဲ...။"

"တကယ်လို့ ကျင့်ကြံသူတွေကို သူတို့ရဲ့ စိတ်ဝိညာဉ်ကျောက်တုံးတွေ သိမ်းဆည်းရာမှာ ကူညီပေးနိုင်ဖို့ လက်စွပ်တစ်ခုကို ဖန်တီးနိုင်မယ်ဆိုရင် လုံခြုံရေးပြဿနာက သဘာဝကျကျ ပြေလည်သွားလိမ့် မယ်...။"

"တစ်ချိန်တည်းမှာပဲ...၊ ငါက အခြေအနေကို အခွင့်ကောင်းယူပြီး စိတ်ဝိညာဉ်ကျောက်တုံးတွေကို အပ်နှံ တာတွေ ထုတ်ယူတာတွေ လုပ်ပေးနိုင်တဲ့ ငွေလဲဌာန လုပ်ငန်းတစ်ခုကိုလည်း တည်ထောင်လိုက်နိုင် တယ်လေ...။"

ဤအကြံဉာဏ်ဖြင့် လင်းဖန်သည် ဟင်းလင်းပြင်မြင့်မြတ်နယ်မြေထဲသို့ ဝင်ရောက်ကာ သိုလှောင် လက်စွပ် အမျိုးအစားသစ်ကို စတင် လေ့လာနေတော့သည်။

အကယ်၍ သူ့ခေါင်းထဲမှ အကြံဉာဏ်ကိုသာ အကောင်အထည် ဖော်နိုင်ပါက ၎င်းသည် ထျန်းယွမ်တိုက် ကြီးတွင် သေချာပေါက် တော်လှန်ရေးတစ်ခုကို ဖြစ်ပေါ်လာစေမည်သာ ဖြစ်သည်။ ထုတ်လုပ်ရေး အဖွဲ့ဆေးမီးဖိုရှေ့တွင် လင်းဖန်သည် ဟင်းလင်းပြင်တိုကင်ပြား တစ်ခုကို ထုတ်ယူကာ ဆေးမီးဖိုထဲသို့ မဆိုင်းမတွ ပစ်ထည့်လိုက်လေသည်။

ဟင်းလင်းပြင်တိုကင်ပြားကို ရွေးချယ်ရသည့် အကြောင်းရင်းမှာ ၎င်း၏ ထူးခြားသော ဝိသေသ လက္ခဏာများကြောင့် ဖြစ်ကြောင်း ထင်ရှားလှပေ၏။ ငွေလဲဌာန လုပ်ငန်းကို အကောင်အထည် ဖော်ရန် အတွက် ငွေလဲဌာန၏ ရုံးချုပ်သည် မိမိ၏ ဟင်းလင်းပြင်မြင့်မြတ်နယ်မြေသာ ဖြစ်ရပေမည်။

ဟင်းလင်းပြင်တိုကင်ပြား ကိုယ်တိုင်က ဟင်းလင်းပြင်မြင့်မြတ်နယ်မြေသို့ ဝင်ရောက်နိုင်သော လုပ်ဆောင်ချက် ရှိပေသည်။ ဤကုန်ကြမ်းဖြင့် ဖန်တီးထားသော သိုလှောင်လက်စွပ်များသည် ဟင်းလင်းပြင်မြင့်မြတ်နယ်မြေထဲသို့ ပစ္စည်းများကို လွှဲပြောင်းပေးနိုင်သည့် လုပ်ဆောင်ချက်များ ရှိလာနိုင်ခြေ များပေသည်။

လင်းဖန်သည် သိုလှောင်အိတ်ကို ပြန်လည် ဖန်တီးစဉ်က ဤအချက်ကို စမ်းသပ်အတည်ပြုပြီး ဖြစ် သည်။ သိုလှောင်အိတ်အား ဟင်းလင်းပြင်တိုကင်ပြားနှင့် ပေါင်းစပ်ကာ ပြန်လည် ဖန်တီးပြီးနောက် ဖျင်ကြမ်းအိတ်ကို ရရှိခဲ့လေသည်။ ထို့နောက် ၎င်းတို့သည် အိတ်ထဲရှိ လူများကို ဟင်းလင်းပြင်မြင့်မြတ် နယ်မြေထဲတွင် သိမ်းဆည်းထားနိုင်သည့် စွမ်းရည်ကို ရရှိခဲ့ကြလေသည်။

ဟင်းလင်းပြင်တိုကင်ပြားကို ထည့်ပြီးနောက် လင်းဖန်သည် စိတ်ဝိညာဉ်ကျောက်တုံးများကို ဆေးဖို ထဲသို့ ထည့်ကာ သိုလှောင်လက်စွပ်အတွက် လိုအပ်သော ကုန်ကြမ်းပစ္စည်းများအဖြစ် ပြောင်းလဲလိုက် လေသည်။

ထို့နောက် သိုလှောင်လက်စွပ် အမျိုးအစားသစ် ထွက်ပေါ်လာမည့် အချိန်ကို စောင့်ဆိုင်းနေရုံသာ။

လင်းဖန်သည် အချိန်အကြာကြီး စောင့်ဆိုင်းနေစရာ မလိုခဲ့ပေ။ "ဒင်" ခနဲ အသံနှင့်အတူ သိုလှောင် လက်စွပ်ကို အောင်မြင်စွာ ဖန်တီးနိုင်ခဲ့လေသည်။

အသံကို ကြားသည်နှင့် လင်းဖန်သည် ဆေးမီးဖိုကို စိတ်အားထက်သန်စွာ ဖွင့်လိုက်ပြီး အချက်အလက် များကို စစ်ဆေးရန် စစ်ဆေးခြင်း လုပ်ဆောင်ချက်ကို ချက်ချင်း အသုံးပြုလိုက်တော့သည်။

[ဟင်းလင်းပြင်လက်စွပ် (မြည်းတံဆိပ်) - အထူး မှော်ပစ္စည်းတစ်ခု။

လုပ်ဆောင်ချက် (၁) - သိမ်းဆည်းထားသော ပစ္စည်းများကို စုဆောင်းခြင်း။

လုပ်ဆောင်ချက် (၂) - ပစ္စည်းများ လွှဲပြောင်းခြင်း။ ဤလုပ်ဆောင်ချက်က လက်စွပ်ထဲမှ ပစ္စည်းများကို ဟင်းလင်းပြင်မြင့်မြတ်နယ်မြေသို့ လွှဲပြောင်းရန် ခွင့်ပြုသည်။

ဘေးထွက်ဆိုးကျိုး - ၎င်းက တစ်ဖက်သတ်သာ လွှဲပြောင်းနိုင်မည်။]

အသစ်ဖန်တီးထားသော သိုလှောင်လက်စွပ်ကို ကြည့်ရင်း လင်းဖန်သည် မျက်မှောင်ကြုတ်သွားခဲ့သည်။ ဤအရာက သူ ကျေနပ်လောက်သည့် ရလဒ်မျိုးတော့ မဟုတ်ပေ။

အကယ်၍ ၎င်းတွင် ဟင်းလင်းပြင်မြင့်မြတ်နယ်မြေဆီသို့ ပစ္စည်းများ လွှဲပြောင်းပေးနိုင်သည့် လုပ်ဆောင်ချက်သာ ရှိနေပါက ၎င်းက မည်သို့ ငွေလဲဌာနတစ်ခု ဖြစ်လာနိုင်ပါမည်နည်း။

လူတိုင်းက သူတို့ သိမ်းဆည်းထားသည့် စိတ်ဝိညာဉ်ကျောက်တုံး အရေအတွက်ကို မှတ်သားထားရမည် လော။ ၎င်းကို မှတ်တမ်းတင်ရန်အတွက် ဟင်းလင်းပြင်မြင့်မြတ်နယ်မြေမှ အခြား တပည့်များထံ လွှဲပြောင်းပေးမည် ဆိုလျှင်ပင် အလွန် ဒုက္ခများလှပေမည်။

ဤကမ္ဘာတွင် ကွန်ပျူတာဟူသော အရာမျိုး မရှိပေ။ ကွန်ပျူတာဟူသော စကားလုံး ခေါင်းထဲရောက် လာချိန်တွင် လင်းဖန်သည် ရုတ်တရက် အကြံတစ်ခု ရသွားခဲ့လေသည်။

"ကွန်ပျူတာလား...၊ ငါ့မှာ ကွန်ပျူတာတော့ မရှိဘူး...။ ဒါပေမဲ့ စိတ်ဝိညာဉ် တစ်ခုတော့ ရှိတယ်...။"

"ထုတ်လုပ်ရေးအဖွဲ့ဆေးမီးဖိုက ငါ့ကို စီမံခန့်ခွဲရာမှာ ကူညီပေးနိုင်တဲ့ စိတ်ဝိညာဉ်တစ်ခု နိုးထလာခဲ့ တယ်လေ...။"

"ဟင်းလင်းပြင်သားရဲတဲကနေ နိုးထလာတဲ့ စိတ်ဝိညာဉ်ကလည်း ဟင်းလင်းပြင်မြင့်မြတ်နယ်မြေကို စီမံခန့်ခွဲရာမှာ ငါ့ကို သေချာပေါက် ကူညီပေးနိုင်မှာပဲ...။"

"ဒါဆိုရင် ဖောက်သည်တွေရဲ့ အပ်နှံငွေတွေကို မှတ်တမ်းတင်ဖို့နဲ့ စီမံခန့်ခွဲဖို့ သူ့ကို အကူအညီ တောင်း လိုက်ရင် ပြဿနာ မရှိနိုင်တော့ဘူး မဟုတ်လား...။"

ထိုအကြံဉာဏ်ဖြင့် လင်းဖန်သည် ထပ်မံ မစမ်းသပ်မီ ဟင်းလင်းပြင်သားရဲတဲ၏ စိတ်ဝိညာဉ် နိုးထလာ မည့် အချိန်အထိ စောင့်ဆိုင်းရန် ဆုံးဖြတ်လိုက်လေသည်။

ဒုတိယမြောက် စိတ်ဝိညာဉ်ကြောသည် စွမ်းအင်များကို စုပ်ယူနေခဲ့သည်မှာ ရက်အနည်းငယ် ကြာမြင့် နေပြီဖြစ်ပြီး လုံးဝ စုပ်ယူပြီးစီးလုနီးပါး ဖြစ်နေပြီ ဖြစ်သည်။ သူ တတိယမြောက် အတိဒုက္ခအဆင့်သို့ တက်လှမ်းချိန်တွင် ဟင်းလင်းပြင်သားရဲ စိတ်ဝိညာဉ်ကို နိုးထစေနိုင်မည်ဟု သူ မျှော်လင့်နေမိသည်။

​စိတ်မအေးနိုင်သေးသဖြင့် လင်းဖန်သည် စနစ်ကို ဆက်သွယ်ရန် ဆုံးဖြတ်လိုက်လေသည်။ စနစ်က လမ်းစ​တစ်ခု ဖွင့်ပေးမည်ဟု သူ မျှော်လင့်နေမိခြင်းဖြစ်ပေ၏။

"ဟေ့... ငတုံးကောင် ရှိလား...။ ငါ မင်းနဲ့ အရေးတကြီး စကားပြောစရာ ရှိတယ်...။ သေချင်ယောင် မဆောင်နေနဲ့တော့...။"

[ရှိပါတယ်...၊ ကျွန်တော် အမြဲတမ်း ဤနေရာမှာ ရှိနေခဲ့တာပါ...။]

"..."

စနစ်၏ ရုတ်တရက် စကားများကြောင့် လင်းဖန်မှာ ဆွံ့အသွားခဲ့သည်။

"မင်းက ဒီလိုစကားမျိုး ပြောရဲတယ်ပေါ့...။ ကံကြမ္မာ အညှိုးတေးတွေ ကျရောက်လာမှာကို မကြောက် ဘူးလား...။"

[...]

[ပိုင်ရှင်...၊ ငါ့ဆီက ဘာများ လိုချင်လို့ပါလဲ...။]

စနစ်က လိုရင်းကိုသာ တိုက်ရိုက် ပြောလာသည်ကို မြင်သောအခါ လင်းဖန်သည် အချိန်ထပ်မဖြုန်း တော့ဘဲ သူ၏ တောင်းဆိုချက်ကို ချက်ချင်း အရိပ်အမြွက် ပြလိုက်လေသည်။

"ဟေ့ ငတုံးကောင်...၊ ငါ အဆင့် (၃) အတိဒုက္ခအဆင့်ကို တက်လှမ်းတော့မယ်...။ အဲ့ဒီအချိန်ကျရင် ဘယ်လုပ်ဆောင်ချက်တွေ ပွင့်လာမယ်လို့ မင်း ထင်လဲ...။"

"ပြီးခဲ့တဲ့ အဆင့်တက်ချိန်တုန်းက ထုတ်လုပ်ရေးအဖွဲ့ဆေးမီးဖိုက စိတ်ဝိညာဉ်တစ်ခု နိုးထလာခဲ့တယ် လေ...။"

"ဒီအကြိမ် အဆင့်တက်ချိန်မှာ ဟင်းလင်းပြင်သားရဲတဲရဲ့ စိတ်ဝိညာဉ် နိုးထဖို့ အလှည့်ကျသင့်ပြီ မဟုတ် ဘူးလား...။"

[ပိုင်ရှင်...၊ ဤလုပ်ဆောင်ချက်တွေ ပွင့်လာတာက ကျပန်းပါ...။ ၎င်းတို့ကို နိုးထနိုင်ခြင်း ရှိမရှိက ပိုင်ရှင် ရဲ့ ကံအပေါ်မှာပဲ မူတည်ပါတယ်...။]

စနစ်၏ အဖြေကို ကြားသောအခါ လင်းဖန်က နှုတ်ခမ်းမဲ့လိုက်လေ၏။

"ကျပန်း ဟုတ်လား...၊ မင်းပြောတာကို ငါ တစ်စက်လေးမှ မယုံဘူး...။"

"ငါ မင်းကို နောက်နေတာ မဟုတ်ဘူး...၊ ငါ့မှာ ဟင်းလင်းပြင်သားရဲတဲရဲ့ စိတ်ဝိညာဉ် နိုးထလာဖို့ အလွန် အမင်း လိုအပ်နေတဲ့ အစီအစဉ်ကြီး တစ်ခု ရှိနေတယ်...။"

"နောက်ကွယ်ကနေ တစ်ခုခု လုပ်ပေးလို့ မရဘူးလား...။"

[ရပါတယ်...။ ဒါပေမဲ့ ပိုက်ဆံတော့ ကုန်ပါလိမ့်မယ်...။ ပိုင်ရှင် ပေးချင်လို့လား...။]

လင်းဖန်သည် သဘာဝကျကျပင် ပိုက်ဆံမဖြုန်းချင်ပေ။ သူ့တွင် အခမဲ့ ရရှိနိုင်မည့် ကိုယ်ပိုင် နည်းလမ်း များ ရှိပေသည်။

"ဟားဟား...၊ အသုံးမကျတဲ့ကောင်...။ ပိုက်ဆံအကြောင်း ပြောတာက ခံစားချက်တွေကို ထိခိုက်စေ တယ် မဟုတ်ဘူးလား...။"

"တကယ်လို့ ငါ့ရဲ့ အစီအစဉ်သာ အောင်မြင်သွားမယ်ဆိုရင် အကြီးမားဆုံး အကျိုးအမြတ် ရမယ့်သူက ငါမဟုတ်ဘူး...။ မင်းပဲ ဖြစ်မှာ...။"

"ငါက မင်းကို အမြဲတမ်း ပထမဆုံး စဉ်းစားပေးခဲ့တာ...။ ဒါပေမဲ့ ငါ ဘာပြန်ရခဲ့လဲ...၊ မင်းက ပိုက်ဆံ အကြောင်းပဲ အမြဲတမ်း တွေးနေခဲ့တာ...။"

[ပိုင်ရှင် ပြောတာကို ငါ တစ်စက်လေးမှ မယုံပါဘူး...။ အရင် အရောင်းအဝယ်တွေမှာ ပိုင်ရှင် ငါ့ကို လိမ်စားခဲ့တာတွေက မလုံလောက်သေးဘူးလား...။]

ကြည့်စမ်း။ စနစ်က တစ်ကြိမ် အကိုက်ခံရပြီးနောက် ကြိုးတွေကိုပင် မည်မျှ ကြောက်လန့်နေပြီနည်း။

သူ ရှင်းရှင်းလင်းလင်း မရှင်းပြသရွေ့ စနစ်က လိုက်လျောမည် မဟုတ်ကြောင်း လင်းဖန် သိနေခဲ့သည်။

"အသုံးမကျတဲ့ကောင်...၊ ငါ ဘယ်လိုအစီအစဉ်ကြီး လုပ်ဖို့ စီစဉ်နေလဲဆိုတာ မင်း သိရဲ့လား...။"

"ငါ လုပ်မယ့် အစီအစဉ်ကြီးက ထျန်းယွမ်တိုက်ကြီးမှာရှိတဲ့ စိတ်ဝိညာဉ်ကျောက်တုံးတွေနဲ့ ရတနာတွေ အားလုံးကို ငါတို့ရဲ့ ဟင်းလင်းပြင်မြင့်မြတ်နယ်မြေထဲကို လွှဲပြောင်းဖို့ပဲ...။"

"ဒါက အင်မော်တယ်ဘုံမှာတောင် ဆက်လုပ်လို့ ရနိုင်သေးတယ်...။"

"ငါ့ကို ပြောစမ်း...၊ တကယ်လို့ ဒီကိစ္စသာ အောင်မြင်သွားမယ်ဆိုရင် မင်းအတွက် အကျိုးရှိမလား မရှိဘူးလား...။"

"..."

လင်းဖန် ဆက်လက် ရှင်းပြနေစဉ်မှာပင် စနစ်က တိတ်ဆိတ်နေခဲ့ပြီး အတွေးနက်နေပုံ ရလေသည်။ ခဏအကြာ စဉ်းစားပြီးနောက် စနစ်က နောက်ဆုံးတွင် အဖြေပေးလာခဲ့လေသည်။

[အဟမ်း...၊ ဘယ်လုပ်ဆောင်ချက် ပွင့်လာမလဲဆိုတာက ကံအပေါ်မှာပဲ မူတည်ပါတယ်...။ ပိုင်ရှင်က ကံကောင်းပုံရပါတယ်...။ ပိုင်ရှင် လိုချင်တာကို ရသင့်ပါတယ်...။]

စနစ်၏ စကားကို ကြားသောအခါ လင်းဖန် ပြုံးလိုက်လေ၏။

စနစ်က တိုက်ရိုက် အဖြေမပေးခဲ့သော်လည်း ဤစကားက အရာအားလုံး ပြေလည်သွားပြီ ဖြစ်ကြောင်း အရိပ်အမြွက် ပြနေခြင်းပင်။

ထို့နောက်တွင်တော့ ဒုတိယမြောက် စိတ်ဝိညာဉ်ကြောကို လုံးဝ စုပ်ယူပြီးစီးမည့် အချိန်အထိ စောင့်ဆိုင်းရန်သာ လိုတော့သည်။ ဤစောင့်ဆိုင်းနေသည့် အချိန်အတွင်း လင်းဖန်သည် အလုပ်မရှိဘဲ မနေခဲ့ချေ။

သူသည် သူ၏ ငွေလဲဌာန အစီအစဉ်ကို အဆက်မပြတ် တွေးတောကာ တိုးတက်အောင် ပြုလုပ်နေခဲ့ လေသည်။ ငွေလဲဌာနများကို စိတ်ဝိညာဉ်ကျောက်တုံးများ သိမ်းဆည်းရန်အတွက်သာ မဟုတ်ဘဲ သိုလှောင်မှုကဲ့သို့သော အခြား ဝန်ဆောင်မှုများကိုလည်း လုပ်ဆောင်ပေးနိုင်ပေသည်။

*အာမခံနဲ့ အခြား ဆက်စပ်လုပ်ငန်းတွေကိုရော ငါတို့ တည်ထောင်နိုင်မလား...။*

ထိုအကြံဉာဏ် ပေါ်လာသည်နှင့် လင်းဖန်က ချက်ချင်း ပယ်ချလိုက်၏။

"မဖြစ်ဘူး... မဖြစ်ဘူး...။ ကျင့်ကြံခြင်းလောကမှာ မတော်တဆမှုတွေက အရမ်းများတယ်...။ လူတွေက အချိန်မရွေး သေဆုံးနိုင်ပြီး ပျောက်ကွယ်သွားနိုင်တယ်...။"

"တကယ်လို့ ငါသာ ကိုယ်ရေးကိုယ်တာ အာမခံ လုပ်ငန်းတစ်ခုကို စတင်လိုက်မယ်ဆိုရင် ဆုံးရှုံးမှုတွေ ကြောင့် ငါ ဒေဝါလီ ခံရမှာပဲ...။"

သို့သော် အမွေဆက်ခံခြင်း လုပ်ငန်းကတော့ စမ်းသပ်ကြည့်သင့်ပေသည်။ ကျင့်ကြံသူ တစ်ဦးသည် ငွေလဲဌာနရှိ ၎င်း၏ ပိုင်ဆိုင်မှုများအတွက် အမွေခံ တစ်ဦး သို့မဟုတ် ထို့ထက်မက သတ်မှတ်ပေးထား နိုင်လေသည်။

အကယ်၍ ကျင့်ကြံသူက မထင်မှတ်ဘဲ သေဆုံးသွားခဲ့ပါက သူ၏ ပိုင်ဆိုင်မှုများကို ငွေလဲဌာနက သူ၏ အမွေခံထံသို့ လွှဲပြောင်းပေးနိုင်ပေသည်။

သေချာသည်မှာ အားလုံးကို ပေးမည်မဟုတ်ပေ။ ငွေလဲဌာနက ဝန်ဆောင်ခအဖြစ် တစ်စိတ်တစ်ပိုင်းကို သေချာပေါက် သိမ်းဆည်းထားမည်သာ ဖြစ်လေသည်။

ဤသို့ တွေးလိုက်မိသောအခါ လင်းဖန်သည် တစ်ဖန် မျက်မှောင်ကြုတ်သွားပြီး သူ့ဘာသာ တီးတိုး ရေရွတ်လိုက်လေသည်။

“ဟင်… ငါက ဘာလို့ ဒီလုပ်ငန်းကို စတင်ရမှာလဲ…။”

“ကျင့်ကြံသူက သေသွားပြီလေ…၊ သူ ငါ့ရဲ့ ဘဏ်မှာ ထားခဲ့တဲ့ စိတ်ဝိညာဉ်ကျောက်တုံးတွေနဲ့ ရတနာ တွေ အားလုံးက ငါ့ဟာတွေ ဖြစ်သွားပြီ မဟုတ်ဘူးလား…။”