အခန်း (၃၅၅-၃၅၆)

အခန်း (၃၅၅) စိတ်နှလုံးမိစ္ဆာ ကမ္ဘာတစ်ခုအဖြစ် ပြောင်းလဲခြင်း။ နေရာတွင်ပင် ချက်ချင်း အဆင့်တက်လှမ်းခြင်း။

ဤအချိန်တွင်။

လေဟာနယ်ထက်ရှိ မြင်ကွင်းကို ကြည့်ရင်း ချီရှောက်ယန်၏ မျက်ဝန်းများထဲတွင် အလွန်အမင်း တုန်လှုပ်မှုများ ပြည့်နှက်နေပြီး လုံးဝ မယုံကြည်နိုင်သော အမူအရာများလည်း ပါဝင်နေလေသည်။

ရွှေအမြုတေအဆင့်မှ ရှန်ရှန်းအဆင့်သို့ တက်လှမ်းရန် မည်မျှခက်ခဲကြောင်းကို သူ ကောင်းစွာ သိရှိထားလေသည်။

ချီမိသားစုကဲ့သို့ နှစ်ပေါင်းထောင်ချီ သက်တမ်းရှိသော အင်အားကြီးမိသားစုမှ သိုင်းပညာရှင်များပင်လျှင် အချိန်အတော်ကြာ စုဆောင်းကျင့်ကြံပြီးမှသာ တက်လှမ်းနိုင်ကြခြင်း ဖြစ်သည်။

သာမန် သိုင်းသခင်များအတွက် ဆိုလျှင် ဆယ်ယောက်တွင် ရှစ်ယောက်ခန့်က ဤရှန်ရှန်းအဆင့် ဆိုသော အတားအဆီးကြီးကို လုံးဝ ကျော်ဖြတ်နိုင်စွမ်း မရှိကြချေ။

သို့သော် ကျန်းချဲ့ကရော။

'ငါ အခု ရှန်ရှန်းအဆင့်ကို တက်လှမ်းလိုက်မယ်' ဟူသော စကားတစ်ခွန်းတည်းဖြင့် မိမိ၏ အရှိန်အဝါများကို လုံးဝ ဖုံးကွယ်ထားခြင်း မရှိဘဲ တိုက်ရိုက် ထုတ်လွှတ်လိုက်လေသည်။

အကယ်၍ ဤမြင်ကွင်းကို သူ ကိုယ်တိုင် မျက်မြင်ကိုယ်တွေ့ မမြင်တွေ့ခဲ့ရပါက သူ လုံးဝ ယုံကြည်မည် မဟုတ်ချေ။

သို့သော် ပြဿနာမှာ ဤမြင်ကွင်းကြီးက တကယ့် အစစ်အမှန် ပင်ဖြစ်သည်။

ကျန်းချဲ့၏ ကိုယ်ပေါ်မှ ထွက်ပေါ်လာသော အရှိန်အဝါများကလည်း တကယ့် အစစ်အမှန်ဖြစ်ပြီး ပတ်ဝန်းကျင် ပေသောင်းချီ အတွင်းရှိ လေထုကို တိုက်ရိုက် မွှေနှောက်လိုက်ကာ ကောင်းကင်နှင့် မြေကြီး၏ မူလစွမ်းအင်များကို ရူးသွပ်ကြမ်းတမ်းစွာ စုဝေးလာစေခဲ့လေသည်။

ဤသည်မှာ အဆင့်တက်လှမ်းမည့် လက္ခဏာ သေချာပေါက် ပင်ဖြစ်သည်။

ချီရှောက်ယန်သည် နေရာတွင်ပင် မှင်သက်သွားပြီး အချိန်အတော်ကြာအောင် စကားတစ်ခွန်းမျှ မပြောနိုင်တော့ချေ။

သူ၏ စိတ်ထဲတွင် တွေးတောနေမိသည်မှာ ကျန်းချဲ့သာ ရှန်ရှန်းအဆင့်သို့ အမှန်တကယ် တက်လှမ်းသွားပြီး မဟာသိုင်းသခင်ကြီး တစ်ယောက် ဖြစ်လာမည် ဆိုပါက သူ၏ အဆင့်အတန်းနှင့် စွမ်းအားများမှာ အဆပေါင်းများစွာ တိုးတက်လာမည် ဖြစ်လေသည်။

ထိုအရာအပြင် သိုင်းအဆင့် သတ်မှတ်ချက် စာရင်း၏ နံပါတ်တစ် သိုင်းလျှို့ဝှက်နယ်မြေ၏ နံပါတ်တစ် ဆိုသော ဂုဏ်ပုဒ်များလည်း ရှိနေသေးသည် မဟုတ်ပါလား။

ဖခင်ဖြစ်သူ အနေဖြင့်လည်း တကယ်ပဲ သဘောတူ လက်ခံသွားနိုင်ချေ ရှိလေသည်။

ချီနင်ပင်း၏ အစ်ကိုတစ်ယောက် အနေဖြင့် ယခုအချိန်တွင် သူ၏ ရင်ထဲ၌ ဆုတောင်းမှုများဖြင့်သာ ပြည့်နှက်နေလေသည်။

ကျန်းချဲ့ အောင်မြင်ပါစေ ဟု အဆက်မပြတ် ဆုတောင်းနေမိလေသည်။

ထိုသို့မှသာ နင်ပင်း၏ အနာဂတ်အတွက် လေလွင့်နေသော အမြစ်မရှိသည့် သစ်ပင်လေး တစ်ပင်အလား ဖြစ်မနေတော့မည် ဖြစ်လေသည်။

သူမ အမှန်တကယ် ပျော်ရွှင်ရမည်လား ဆိုသည်ကိုတော့ ချီရှောက်ယန် ကိုယ်တိုင်လည်း တိကျစွာ မဆုံးဖြတ်နိုင်ချေ။

သို့သော် ဤလမ်းကို သူမ ကိုယ်တိုင် ရွေးချယ်ခဲ့သည် မဟုတ်ပါလား။

ခါးသည်ဖြစ်စေ ချိုသည်ဖြစ်စေ သူမ ကိုယ်တိုင် မြည်းစမ်းရမည် သာ ဖြစ်လေသည်။

တစ်ချိန်တည်းမှာပင်။

မြောက်ပိုင်း ချီမိသားစု တစ်ခုလုံးရှိ အစွမ်းထက်သူများ အားလုံး အကြီးအကျယ် တုန်လှုပ်သွားကြပြီး လေဟာနယ်ထက်သို့ တပြိုင်နက်တည်း မော့ကြည့်လိုက်ကြလေသည်။

မည်သူက ဤမျှလောက် စိတ်မြန်လက်မြန် ရှိနေသနည်း ဟု တွေးတောကာ မျက်ဝန်းများထဲတွင် သံသယများ ပြည့်နှက်နေကြလေသည်။

ဤကဲ့သို့ ကမူးရှူးထိုး အဆင့်တက်လှမ်းခြင်းမျိုးကို သူတို့ လုံးဝ နားမလည်နိုင်အောင် ဖြစ်နေရလေသည်။

ဝမ်ပင်း အိမ်တော်ထက်တွင်။

ချီဝမ်ကျင်းနှင့် ချီနင်ပင်းတို့လည်း အကြီးအကျယ် တုန်လှုပ်သွားကြပြီး အိမ်ခေါင်မိုးပေါ်သို့ အတူတကွ တက်လာကြလေသည်။

လေဟာနယ်ထက်တွင် တင်ပျဉ်ခွေ ထိုင်နေသော ထိုလူရိပ်ကို ကြည့်ရင်း သူမတို့ နှစ်ယောက်စလုံး၏ မျက်ဝန်းများထဲတွင် အလွန်အမင်း အံ့အားသင့် ထိတ်လန့်မှုများ ပေါ်လွင်နေလေသည်။

မူလက ကျန်းချဲ့သည် အချိန်အနည်းငယ်မျှ တံခါးပိတ် ကျင့်ကြံပြီးမှသာ အဆင့်တက်လှမ်း လိမ့်မည်ဟု သူတို့ ထင်မှတ်ထားခဲ့ကြလေသည်။

သို့သော် သူ ဤမျှလောက် မြန်ဆန်လိမ့်မည် ဟု လုံးဝ ထင်မှတ်မထားခဲ့ကြချေ။

'အစ်မ... သူ ဒီလောက်မြန်မြန် အဆင့်တက်တာ ဘာပြဿနာမှ မရှိလောက်ဘူး မဟုတ်လား...'

ချီနင်ပင်းမှာ စိတ်လှုပ်ရှား ဂနာမငြိမ် ဖြစ်နေပြီး မျက်ဝန်းများထဲတွင် အလွန် စိုးရိမ်ထိတ်လန့်နေသော အမူအရာများ ပေါ်လွင်နေလေသည်။

ဘာလုပ်ရမှန်း မသိဖြစ်နေပြီး အစ်မဖြစ်သူထံမှ အဖြေတစ်ခုကို အလျင်အမြန် လိုချင်နေလေသည်။

ချီဝမ်ကျင်းက ညီမဖြစ်သူ၏ လက်ကို ပြန်လည် ဆုပ်ကိုင်လိုက်ပြီး အလွန် တည်ကြည် လေးနက်သော မျက်နှာထားဖြင့် ပြန်ပြောလိုက်သည်။

"သူက ဒီလို လုပ်ရဲတယ် ဆိုမှတော့ သေချာပေါက် ယုံကြည်ချက် ရှိလို့ပဲ ဖြစ်ရမယ်... သူ့ကို ယုံကြည်လိုက်ပါ..."

"ယောကျ်ား သေချာပေါက် ဘာမှ မဖြစ်စေရဘူးနော်... ညီမက ရှင်နဲ့ လက်ထပ်ဖို့ စောင့်နေတာ..."

ချီနင်ပင်း နှုတ်ခမ်းကို တင်းတင်းစေ့ထားပြီး ခေါင်းမော့ကြည့်နေသော မျက်ဝန်းများထဲတွင် စိုးရိမ်ပူပန်မှုများ အပြည့်အဝ ပေါ်လွင်နေလေသည်။

ချီမိသားစု၏ နေရာတစ်နေရာတွင်။

ရွှေအမြုတေအဆင့် သိုင်းသခင် ဆယ်ဂဏန်းခန့်နှင့် လက်တစ်ဖက်စာမျှ ရှိသော ရှန်ရှန်းအဆင့် မဟာသိုင်းသခင်ကြီးများ အားလုံး ထိုနေရာသို့ အလျင်အမြန် စုဝေးရောက်ရှိ လာကြလေသည်။

ချီမိသားစု အကြီးအကဲချုပ် ချီထျန်းကျုံး ဒုတိယ အကြီးအကဲ ချီထျန်းဟယ် နှင့် အိမ်တော်သခင် ချီကျန်းနန် တို့လည်း ထိုနေရာသို့ လျင်မြန်စွာ ရောက်ရှိလာကြလေသည်။

လေဟာနယ်ထက်ရှိ ထိုလူရိပ်ကို ကြည့်ရင်း အံ့အားသင့်မှုနှင့် စိုးရိမ်ပူပန်မှုများ ရောယှက်နေကြလေသည်။

ကျန်းချဲ့၏ ကျင့်ကြံခြင်း မြန်ဆန်လွန်းလှသဖြင့် ဤမျှလောက် အချိန်တိုအတွင်း ရွှေအမြုတေကို ခွဲဖြာ၍ သန္ဓေသား တည်ဆောက်ရန် စတင်နေပြီ ဖြစ်ကြောင်းကို အံ့အားသင့်နေကြသည်။

ဤမျှလောက် ကမူးရှူးထိုး အဆင့်တက်လှမ်းခြင်းအတွက် အမှန်တကယ်ပင် ကျရှုံးမည်ကို မကြောက်ဘူးလား ဟု စိုးရိမ်ပူပန် နေကြခြင်း ပင်ဖြစ်သည်။

သူတို့အားလုံးသည် ဤအတားအဆီးကို ကျော်ဖြတ်လာခဲ့ကြသော သိုင်းပညာရှင်များ ဖြစ်ကြရာ ဤအဆင့်က မည်မျှ ခက်ခဲကြောင်းကို ကောင်းစွာ သိရှိထားကြလေသည်။

အကယ်၍ အောင်မြင်သွားလျှင်တော့ ကောင်းပါသည် သို့သော် ကျရှုံးသွားမည် ဆိုပါက အသက်မသေလျှင်တောင်မှ အခြေခံအုတ်မြစ်များ အားလုံး ပျက်စီးသွားမည့် အခြေအနေသို့ ရောက်ရှိသွားမည်သာ ဖြစ်လေသည်။

ဤသည်မှာ သူတို့ လုံးဝ မမြင်တွေ့လိုသော အရာ ပင်ဖြစ်သည်။

သူတို့ အမှန်တကယ် မျှော်လင့်ထားသည်မှာ ကျန်းချဲ့သည် သိုင်းသူတော်စင် ဖြစ်လာပြီး သိုင်းလောက၏ အထွတ်အထိပ် နေရာတွင် ရပ်တည်နိုင်ရန် ပင်ဖြစ်သည်။

"ဒီကောင်လေး အရမ်း စိတ်မြန်လက်မြန် နိုင်လွန်းတယ်ကွာ..."

ချီထျန်းကျုံး မျက်မှောင်ကို တင်းတင်းကျုံ့ထားပြီး မျက်နှာပေါ်တွင် မကျေနပ်သော အမူအရာများ ပေါ်လွင်နေလေသည်။

ဤသည်မှာ ကျန်းချဲ့ကို မနှစ်မြို့၍ မဟုတ်ဘဲ သူ၏ ကမူးရှူးထိုး လုပ်ရပ်ကို သဘောမကျခြင်း ပင်ဖြစ်သည်။

ချီမိသားစုတွင် လျှို့ဝှက်နယ်မြေများ သီးသန့် လျှို့ဝှက်ခန်းများ ရှိနေပြီး ရှန်ရှန်း နောက်ပိုင်းအဆင့် ရှိသော အရှင်သခင် ကိုယ်တိုင် သူ့အတွက် အစောင့်အရှောက် ပေးနိုင်သည် မဟုတ်ပါလား။

သို့သော် အခုတော့ သူက ဤမျှလောက် ကမူးရှူးထိုး လုပ်ဆောင်နေလေသည်။ နောက်ဆက်တွဲ အကျိုးဆက်များကို လုံးဝ ထည့်မစဉ်းစားတော့ဘူးလား။

ချီထျန်းဟယ်၏ မျက်လုံးများက တစ်စုံတစ်ရာကို စဉ်းစားနေသည့်အလား လှုပ်ရှားနေလေသည်။

ကျန်းချဲ့၏ အဆင့်တက်လှမ်းမှု နောက်ကွယ်ရှိ အဓိပ္ပာယ်မှာ သူက ချီရှောက်ယန်ကို အသုံးချ၍ ပြဿနာကို ဖော်ထုတ်ခိုင်းလိုက်ခြင်း ကြောင့်လား ဟု တွေးတောနေမိလေသည်။

အကြီးအကဲချုပ်၏ စကားကို ကြားသောအခါ နှစ်သိမ့်ပေးလိုက်သည်။

"ကျုပ် ကျန်းချဲ့နဲ့ အချိန်အတိုင်းအတာ တစ်ခုအထိ ဆက်ဆံဖူးပါတယ်... ဒီကောင်လေးရဲ့ လုပ်ရပ်တွေက အမြဲတမ်း ဒီလိုပါပဲ... အပြင်ပန်းကြည့်ရင် ကမူးရှူးထိုး နိုင်တယ်လို့ ထင်ရပေမဲ့ တကယ်တမ်းကျတော့ အရမ်း တည်ငြိမ်တဲ့ သူပါ... သူ အခုလို အဆင့်တက်ဖို့ ရဲတယ် ဆိုကတည်းက သေချာပေါက် ယုံကြည်ချက် တစ်ခုခု ရှိလို့ပဲ ဖြစ်ရမယ်..."

"ဒါမှမဟုတ် ကံကြမ္မာ အခွင့်အရေး ရောက်လာလို့ မတက်လို့ မရတော့တာမျိုးလည်း ဖြစ်နိုင်တယ်..."

ချီကျန်းနန်က အသက်ပြင်းပြင်း တစ်ချက် ရှူသွင်းလိုက်ပြီး ကျန်းချဲ့ကို အချိန်အနည်းငယ်မျှ စူးစိုက်ကြည့်ကာ လေးနက်သော လေသံဖြင့် ပြောလိုက်လေသည်။

"အခုက ဒါတွေ ပြောနေရမယ့် အချိန် မဟုတ်တော့ဘူး..."

ပြောပြီးသည်နှင့် သူ၏ အနောက်ဘက်ရှိ ရွှေအမြုတေ အဆင့် အကြီးအကဲများကို လှည့်ကြည့်ကာ အမိန့်ပေးလိုက်လေသည်။

"ငါ့ အမိန့်ကို နားထောင်... ချီမိသားစုရဲ့ ကာကွယ်ရေး အစီအရင်ကို ဖွင့်လိုက်... မျိုးနွယ်စု အတွင်းက မူလစွမ်းအင် စုဆောင်းရေး အစီအရင်ကို ဖွင့်လိုက်... တောင်တန်း အပြင်ဘက်က တောင်စောင့် အစီအရင် ကိုပါ တစ်ခါတည်း ဖွင့်လိုက်... မျိုးနွယ်စု အတွင်းမှာ ရှိတဲ့ သိုင်းသခင်တွေ အားလုံး အစီအရင် နေရာ အသီးသီးကို လူခွဲပြီး နေရာယူကြ..."

"ရန်သူတွေ လာရောက် ခိုးကြောင်ခိုးဝှက် တိုက်ခိုက်မှာကို ကာကွယ်ရမယ်... ငါနဲ့ အကြီးအကဲတွေက ဒီနေရာမှာပဲ နေပြီး ကျန်းချဲ့ အတွက် အစောင့်အရှောက် လုပ်ပေးမယ်..."

ချီကျန်းနန်၏ စကားသံများက အလွန် ပြတ်သားပြီး ဩဇာတိက္ကမ ရှိလှပေသည်။

ချီမိသားစု၏ သိုင်းသခင်များ အားလုံး အမိန့်ကို နာခံလိုက်ကြပြီး အလျင်အမြန် လှုပ်ရှားလိုက်ကြလေသည်။

ချီထျန်းကျုံးနှင့် အခြားသော မဟာသိုင်းသခင်ကြီးများ ကတော့ မူလနေရာတွင်သာ ရပ်နေကြပြီး ကျန်းချဲ့ အတွက် အစောင့်အရှောက် ပေးနေကြလေသည်။

အကယ်၍ ကျန်းချဲ့သာ ရွှေအမြုတေကို ခွဲဖြာ၍ သန္ဓေသား တည်ဆောက်ခြင်း အမှန်တကယ် ကျရှုံးသွားမည် ဆိုလျှင်တောင် သူတို့ အနေဖြင့် တစ်ဖက်လူ၏ အခြေခံ အုတ်မြစ်ကို တတ်နိုင်သမျှ ကာကွယ်ပေးနိုင်မည့် နည်းလမ်းများ ရှိနေလေသည်။

ဤအရာများ အားလုံးကို အမိန့်ပေး ညွှန်ကြားပြီးနောက်မှသာ ချီကျန်းနန်သည် ကျန်းချဲ့ ထံသို့ အကြည့်များ ပြန်လည် ရောက်ရှိသွားပြီး မျက်နှာထား အလွန် လေးနက်စွာဖြင့် ရင်ထဲတွင် တိတ်တဆိတ် တွေးတော နေမိလေသည်။

'မင်း စိတ်နှလုံး မိစ္ဆာ ကပ်ဘေးကို ချောချောမွေ့မွေ့ ကျော်ဖြတ်နိုင်ပါစေလို့ မျှော်လင့်ပါတယ်ကွာ...'

စိတ်နှလုံး မိစ္ဆာ ကပ်ဘေး ဆိုသည်မှာ ရွှေအမြုတေကို ခွဲဖြာ၍ သန္ဓေသား တည်ဆောက်ရန် အတွက် ပထမဆုံး အဆင့် ဖြစ်ပြီး အရေးအကြီးဆုံးသော အဆင့်လည်း ဖြစ်လေသည်။

သိုင်းပညာရှင်များသည် ရွှေအမြုတေ တည်ဆောက်ချိန်တွင် စိတ်နှလုံး မိစ္ဆာများနှင့် ရင်ဆိုင်ရလေ့ ရှိသော်လည်း ၎င်းမှာ သေးငယ်သော စမ်းသပ်မှု သက်သက်သာ ဖြစ်ပြီး သိုင်းပညာရှင် အများစုမှာ ကြိုတင် ပြင်ဆင်ထားပါက အေးအေးဆေးဆေး ကျော်ဖြတ်နိုင်ကြလေသည်။

သို့သော် ရှန်ရှန်းအဆင့်၏ စိတ်နှလုံး မိစ္ဆာ ကပ်ဘေး ကတော့ လုံးဝ မတူညီချေ။ ထို နှစ်ခုကို လုံးဝ နှိုင်းယှဉ်၍ မရနိုင်ကြောင်း ပင် ဆိုနိုင်လေသည်။

သိုင်းသခင် အများအပြား သည် စိတ်နှလုံး မိစ္ဆာ၏ စိတ်ကူးယဉ် ကမ္ဘာထဲတွင် နစ်မြုပ်သွားကြပြီး နောက်ဆုံးတွင် ကျရှုံးသွားခဲ့ရသည့် သာဓက များကို သူ အများအပြား ကြားဖူးခဲ့လေသည်။ သူ ကိုယ်တိုင်လည်း တစ်ဖက်လူကို ကူညီပေးနိုင်စွမ်း မရှိချေ။

အရာအားလုံး သည် ကျန်းချဲ့၏ တာအို နှလုံးသား မည်မျှ ခိုင်မာ တောင့်တင်း သနည်း ဆိုသည့် အချက် အပေါ်တွင်သာ အပြည့်အဝ မူတည်နေလေသည်။

ကျန်းချဲ့ အပေါ် အလွန် ယုံကြည်ချက် ရှိသော်လည်း သူ၏ ရင်ထဲတွင် စိုးရိမ်ပူပန်မှု များကိုတော့ လုံးဝ ရှောင်လွှဲ၍ မရနိုင်ချေ။ သို့သော် ကျန်းချဲ့ ဤမျှလောက် မြန်ဆန်စွာ အဆင့်တက်လှမ်း ရခြင်းမှာ ဟန်ရေးပြ ရန် သက်သက် အတွက် မဟုတ်ချေ။

ကောင်းကင် အချိန်အခါ မြေကြီး အနေအထား နှင့် ပြင်ပ အင်အားစုများ အားလုံး အသင့် ဖြစ်နေသောကြောင့် ပင်ဖြစ်သည်။

ချီရှောက်ယန်က သူ့ထံသို့ လာရောက် ရှာဖွေ ကတည်းက သူနှင့် ချီနင်ပင်းတို့ ကြားရှိ ကိစ္စမှာ လျှို့ဝှက်ချက် တစ်ခု မဟုတ်တော့ကြောင်း သူ ကောင်းစွာ သိရှိထားလေသည်။

ထို့ကြောင့် ဤကိစ္စကို ဖြေရှင်းရန် အတွက် အလျင်အမြန် ဆုံးဖြတ်ချက် ချရမည် သာ ဖြစ်လေသည်။

ဤနေရာတွင် အဆင့်တက်လှမ်းရန် ရွေးချယ်ရခြင်းမှာ ဤနေရာသည် ချီမိသားစု၏ နယ်မြေ ဖြစ်သောကြောင့် ပင်ဖြစ်သည်။

အင်အားကြီး မိသားစု ခြောက်ခု ထဲမှ တစ်ခု ဖြစ်သော မြောက်ပိုင်း ချီမိသားစုတွင် သိုင်းသခင် ဆယ်ဂဏန်းခန့် နှင့် မဟာသိုင်းသခင်ကြီးများက လက်တစ်ဖက်စာမျှ ရှိနေပြီး သိုင်းသူတော်စင် ကြီး တစ်ပါးပင် ရှိနေနိုင်ချေ ရှိလေသည်။

ဤနေရာတွင် အဆင့်တက်လှမ်းခြင်းက အပြင်ဘက်ထက် အများကြီး ပိုမို လုံခြုံမှု ရှိလေသည်။ မည်သူကမျှ လာရောက် နှောင့်ယှက်ရဲမည် မဟုတ်ချေ။ ဤနေရာသည် တကယ့် အဖိုးတန် မြေမြတ် မဟာ ပင်ဖြစ်သည်။

ထို့အပြင် သူ အဆင့်တက်လှမ်းပြီးနောက် ချီကျန်းနန် နှင့် ပွင့်ပွင့်လင်းလင်း ပြောဆို ဆွေးနွေးရမည် ဖြစ်ရာ သူ၏ စွမ်းအားများကို ဆက်လက် ဖုံးကွယ်ထားရန် လုံးဝ မလိုအပ်တော့ချေ။

အခွင့်ကောင်းကို ယူ၍ မြောက်ပိုင်း ချီမိသားစု ကို တုန်လှုပ်သွားစေမည့် ကျင့်ကြံခြင်း မျိုးကို ပြသလိုက်ခြင်း က ပို၍ပင် ကောင်းမွန်သေးသည်။

ယခုအချိန်တွင်။

ကျန်းချဲ့၏ စိတ်ကူးများ ပေါ်ထွက်လာသည့် မျက်တောင်တစ်ခတ် အတွင်းမှာပင် ယခင်က အကြိမ်ကြိမ် ကြုံတွေ့ဖူးသော ရင်းနှီးသည့် ခံစားချက်များ နောက်တစ်ကြိမ် ထပ်မံ ထွက်ပေါ်လာလေသည်။

ရှေးဟောင်း လျှို့ဝှက်ဆန်းကြယ်သော ကောင်းကင်ယဇ်ပလ္လင် ကျောက်တိုင် အပေါ်ရှိ မရေမတွက်နိုင်သော နတ်ဘုရား ကျောက်စာများ အဆက်မပြတ် လင်းလက် တောက်ပလာလေသည်။

အသက်ရှူ အကြိမ်ရေ အနည်းငယ် အကြာတွင် ကျောက်တိုင် တစ်ခုလုံး အပြည့်အဝ လင်းလက် သွားခဲ့လေပြီ။

ထို့နောက်။

ကောင်းကင်ယဇ်ပလ္လင် ကျောက်တိုင် ထံမှ မီးခိုးရောင် အလင်းတန်း တစ်ခု ရုတ်တရက် ပန်းထွက်လာပြီး ထိုက်ယင် ရွှမ်ယွမ် ဝိညာဉ်စွမ်းအင်၊ နှစ်ပေါင်း နှစ်ထောင် သက်တမ်းရှိ ဝိညာဉ်ဖြည့်စွက် ဂျင်ဆင်း၊ ကျောက်စိမ်း ဝိညာဉ် နတ်ပန်း နှင့် အခြားသော ယဇ်ပူဇော် ပစ္စည်းများ အပေါ်သို့ တိုက်ရိုက် လွှမ်းခြုံ သွားလေသည်။

မျက်တောင်တစ်ခတ် အတွင်း အလင်းတန်းများ လင်းလက်သွားပြီး ယဇ်ပူဇော် ပစ္စည်းများ အားလုံးကို အပြည့်အဝ မျိုချ ဖျက်ဆီးပစ်လိုက်ကာ ကောင်းကင်ယဇ်ပလ္လင် ကျောက်တိုင် အတွင်းသို့ တိုက်ရိုက် ရောက်ရှိသွားပြီး လုံးဝ ပျောက်ကွယ် သွားခဲ့လေပြီ။

ထို့နောက် လျှို့ဝှက်ဆန်းကြယ်သော စွမ်းအားကြီး တစ်ခုက သူ၏ တစ်ကိုယ်လုံးကို လွှမ်းခြုံသွားပြီး မကြာမီမှာပင် အသက်စွမ်းအင်များ စုပ်ယူခံလိုက်ရလေသည်။

ကျန်းချဲ့သည် မိမိ၏ သက်တမ်းများ အလျင်အမြန် ကုန်ဆုံးသွားကြောင်းကို ကောင်းစွာ ခံစား သိရှိလိုက်လေသည်။ သို့သော် သူ လုံးဝ မထိတ်လန့်သွားဘဲ အလွန် ရင်းနှီးနေသည့်အလား ပင်ဖြစ်သည်။ အဘယ်ကြောင့်ဆိုသော် ဤကဲ့သို့သော လုပ်ငန်းစဉ်မျိုးကို သူ အကြိမ် ဆယ်ဂဏန်းခန့် ကြုံတွေ့ခဲ့ဖူးသောကြောင့် ပင်ဖြစ်သည်။

ယဇ်ပူဇော် ပစ္စည်းများ အားလုံးကို အပြည့်အဝ မျိုချပြီးနောက် အစိမ်းရောင် အလင်းတန်း တစ်ခု ဖြည်းညင်းစွာ ထွက်ပေါ်လာပြီး ကောင်းကင်ယဇ်ပလ္လင် ကျောက်တိုင် အထက်တွင် လွင့်မျောနေလေသည်။

ထို့နောက် ကျန်းချဲ့၏ ရုပ်ခန္ဓာ အတွင်းသို့ ရုတ်တရက် ဝင်ရောက်လာလေသည်။

မျက်လုံးကို ပြန်ဖွင့်လိုက်ချိန်တွင် လောကကြီး တစ်ခုလုံး ပြောင်းလဲသွားခဲ့လေပြီ။ မျက်စိရှေ့တွင် မှုန်ဝါးဝါး ပုံရိပ်များ အဆက်မပြတ် ယှက်နွှယ် ထွက်ပေါ်နေလေသည်။

သူနှင့် ရင်းနှီးသော မြင်ကွင်းများ ပါဝင်သလို သူ တစ်ခါမှ မကြုံတွေ့ ဖူးသော မြင်ကွင်းများလည်း ပါဝင်လေသည်။

ဤသည်မှာ ရှန်ရှန်းအဆင့် ၏ စိတ်နှလုံး မိစ္ဆာ ကပ်ဘေး ပင်ဖြစ်ကြောင်း ကျန်းချဲ့ ကောင်းစွာ သိရှိထားလေသည်။

ဤသည်မှာ ရှန်ရှန်းအဆင့်သို့ တက်လှမ်းရန် အတွက် ပထမဆုံး အဆင့် ဖြစ်ပြီး အခက်ခဲဆုံး အဆင့်လည်း ဖြစ်လေသည်။ အကယ်၍ စိတ်ကူးယဉ် ကမ္ဘာထဲတွင် နစ်မြုပ်သွားပါက ရွှေအမြုတေသာ ပျက်စီးသွားပြီး သန္ဓေသား တည်ဆောက်နိုင်မည် မဟုတ်ချေ။

ပုံရိပ်များ အချင်းချင်း ယှက်နွှယ်နေပြီး အဆက်မပြတ် လှုပ်ရှားနေကာ ကျန်းချဲ့၏ မျက်စိရှေ့တွင် ထွက်ပေါ်နေလေသည်။

သူ၏ ရင်ထဲရှိ အနက်ရှိုင်းဆုံး နေရာမှ အကြောက်တရားများကို ဆွဲထုတ်ရန် ကြိုးစားနေသည့် အလား ပင်ဖြစ်သည်။ သူ၏ စိတ်အာရုံ အနည်းငယ် လှုပ်ရှားသွားသည်နှင့် တစ်ပြိုင်နက် စိတ်နှလုံး မိစ္ဆာ၏ စိတ်ကူးယဉ် ကမ္ဘာထဲသို့ ချက်ချင်း ဆွဲသွင်းခံရမည် ဖြစ်လေသည်။

ကျန်းချဲ့၏ အကြောက်တရားက ဘာများလဲ။

အဆင့်တက်လှမ်းမှု ကျရှုံးပြီး ရွှေအမြုတေ ပျက်စီးကာ အသက်သေဆုံးသွားမှာလား အဲ့ဒီနောက်ပိုင်း သုံးစားမရတဲ့ အမှိုက်ကောင် ဖြစ်သွားမှာလား။

ပွင့်ပွင့်လင်းလင်း ပြောပြလိုက်ပေမဲ့ ယောက္ခထီး ဖြစ်သူက ဒေါသထွက်ပြီး သူ့ကို သတ်ပစ်လိုက်မှာလား။

ဒါမှမဟုတ် သူ သတ်ဖြတ်ခဲ့တဲ့ ရန်သူတွေက သူ့ဆီ လာပြီး အသက် လာတောင်း ကြမှာလား။

ဘာတစ်ခုမှ မဟုတ်ချေ။

ကောင်းကင်ယဇ်ပလ္လင် ကျောက်တိုင် ရှိနေသရွေ့ ကျန်းချဲ့၏ နောက်ခံ အင်အားက အပြည့်အဝ ရှိနေလေသည်။

သူ အဆင့်တက်လှမ်းမှု ကျရှုံးမည်ကို လုံးဝ မကြောက်ရွံ့ချေ။ ဤသည်မှာ သူ့ကို အမြဲတမ်း ယုံကြည်ချက် ပေးစွမ်း နိုင်သော အရာ ပင်ဖြစ်သည်။ ယဇ်ပူဇော် ပစ္စည်းများ လုံလောက်သရွေ့ အရာအားလုံးကို ဖန်တီးပေးနိုင်စွမ်း ရှိလေသည်။

သူသာ ရှန်ရှန်းအဆင့်ကို ရောက်ရှိသွားပါက သူ၏ စွမ်းအားများ ချက်ချင်း အကြီးအကျယ် တိုးတက်လာမည် ဖြစ်ပြီး အဆင့်အတန်း နှင့် ဂုဏ်သတင်း များမှာလည်း ယခုအခါ လောကတစ်ခွင်လုံး တွင် နေမင်းကြီး အလား တောက်ပ နေပြီ ဖြစ်ရာ ချီကျန်းနန် သည် မည်မျှပင် ဒေါသထွက် ပါစေ သူ့ကို သေချာပေါက် သတ်ပစ်လိမ့်မည် မဟုတ်ချေ။

မည်သို့ပင်ဆိုစေ ချီမိသားစု၏ ခေါင်းဆောင် တစ်ယောက် အနေဖြင့် သူ အလေးထားဆုံး အရာမှာ အကျိုးအမြတ် သာ ဖြစ်လေသည်။

ဤအချက်ကို ယခင်က ချီနင်ပင်း နှင့် ဝေ့ကျွင်းကျဲ တို့၏ စေ့စပ်ပွဲ ကို ကြည့်ခြင်းအားဖြင့် ကောင်းစွာ သိရှိနိုင်လေသည်။

ရန်သူများ လာရောက် အသက်တောင်း မည် ကိုတော့ ကျန်းချဲ့၏ မျက်လုံးထဲတွင် လုံးဝ ထည့်မထားခဲ့ချေ။ အသက်ရှင်နေတဲ့ လူကိုတောင် မကြောက်တာ သေသွားတဲ့ လက်အောက်ခံ ရှုံးနိမ့်သူ တစ္ဆေ တွေကို ကြောက်စရာ အကြောင်း ရှိလို့လား။

ထိုအရာများ အားလုံးမှာ ကျန်းချဲ့၏ အကြောက်တရား မဟုတ်ချေ။

သူ၏ အကြောက်တရားမှာ လမ်းညွှန်ပြသပေးနေသော ဤ ကောင်းကင်ယဇ်ပလ္လင် ကျောက်တိုင်ကို ဆုံးရှုံးသွားမည်ကို ကြောက်ရွံ့ခြင်း သူတစ်ပါး၏ အသက်ကို သတ်မှတ် ပိုင်စွမ်းနိုင်သော စွမ်းအားများကို ဆုံးရှုံးသွားမည်ကို ကြောက်ရွံ့ခြင်း မြင့်မားသော နေရာမှ မြေကြီးပေါ်သို့ ပြုတ်ကျသွားမည်ကို ကြောက်ရွံ့ခြင်း ပင်ဖြစ်သည်။

တကယ်ပဲ။

ကျန်းချဲ့၏ ရင်ထဲတွင် ဤ အတွေး ဖြတ်ပြေးသွားသည့် အချိန်လေး တွင် လောကကြီး ပြောင်းလဲသွားခဲ့လေပြီ။

စူးရှသော အလင်းတန်းများက အရာအားလုံးကို ဖုံးကွယ်သွားလေသည်။

ကျန်းချဲ့သည် ကူးပြောင်း မလာမီက သူ၏ ယခင် ဘဝကို ပြန်လည် မြင်တွေ့လိုက်ရလေသည်။ ဤနေရာတွင် သူသည် ကောင်းကင်နှင့် မြေကြီးကိုပင် ဖျက်ဆီးပစ်နိုင်သော သိုင်းပညာရှင်ကြီး တစ်ယောက် မဟုတ်တော့ဘဲ အိပ်မက်ထဲမှ ရုတ်တရက် နိုးထလာပြီး သာမန် လူတစ်ယောက် အဖြစ်သို့ ပြန်လည် ရောက်ရှိသွားခဲ့လေပြီ။

သို့သော် သူ့တွင် မှတ်ဉာဏ်များ ရှိနေသေးလေသည်။

သို့သော် အဓိက ပြဿနာမှာ ဤနေရာတွင် သူ့ထံ၌ ကပ်ဆိုးတစ်သောင်း မိစ္ဆာဓား မရှိချေ ကောင်းကင်ထိုးဖောက် နတ်သုံးခွလှံ လည်း မရှိချေ တောင်နှိမ် နတ်ကြေးဒယ်အိုး လည်း မရှိချေ ယင်ယန် မိစ္ဆာမီးတောက် မဟာ နတ်စွမ်းရည် လည်း မရှိတော့ချေ။

သူသည် သာမန် လူတစ်ယောက် သာ ဖြစ်ပြီး အခြေခံ အကျဆုံး ဖြစ်သော နွားရိုင်း အားအင် ကျင့်စဉ် ကိုပင် လေ့ကျင့်၍ မရနိုင်တော့ချေ။

မြင့်မားသော နေရာမှ ပြုတ်ကျလာသည့် ခံစားချက်က သူ့ကို လက်တွေ့ ဘဝကို လက်ခံနိုင်စွမ်း မရှိအောင် ပြုလုပ်လိုက်ပြီး နေ့တိုင်း အရက်သောက် ကာ မူးယစ်နေပြီး ပါးစပ်မှလည်း အဓိပ္ပာယ် မရှိသော စကားများကို အဆက်မပြတ် ရေရွတ်နေလေသည်။

'ငါက တော်ဝင်နန်းတော်ရဲ့ နံပါတ်တစ် ပါရမီရှင်ကွ...'

'လူပေါင်း သောင်းချီရဲ့ အထက်မှာ ရှိတဲ့ အဆင့်လေး အရာရှိ တစ်ယောက်... ညီအစ်မ နှစ်ယောက်စလုံး တော်ဝင် မင်းသမီးလေးတွေရော နာမည်ကြီး အလှပန်းတွေရော အများကြီး ပိုင်ဆိုင်ထားတဲ့ အထက်တန်းစား လူတစ်ယောက်ကွ...'

စသည်ဖြင့် ရေရွတ်နေလေသည်။

နောက်ဆုံးတွင်တော့ သူသည် စိတ်ကျန်းမာရေး ဆေးရုံသို့ အပို့ခံလိုက်ရပြီး မျက်နှာမှာလည်း တစ်နေ့တခြား ပိုမို ဖြူရော် ချို့တဲ့လာလေသည်။ နေ့တိုင်း နံရံထောင့်တွင် ကွေးကွေးလေး ထိုင်ကာ မျက်လုံးများ ပြူးကျယ်နေပြီး။

'အကုန်လုံးက အတုတွေပဲ... အရာအားလုံးက အတုတွေပဲ...' ဟု အဆက်မပြတ် ရေရွတ်နေပြီး လူတစ်ကိုယ်လုံး အကြီးအကျယ် ပြိုလဲ ပျက်စီးလုနီးပါး ဖြစ်နေလေပြီ။

'ဒါက ငါ့ရဲ့ အကြောက်တရားလား...'

ပုံသဏ္ဌာန်မဲ့သော ကျန်းချဲ့သည် နံရံထောင့်တွင် ကွေးကွေးလေး ထိုင်ကာ စိတ်ဓာတ်ကျနေသော အခြား မိမိကိုယ်ကိုယ် ကို ကြည့်ရင်း ကိုယ့်ဘာသာ ရေရွတ်လိုက်လေသည်။ သူ အဆက်မပြတ် စောင့်ကြည့် နေခဲ့ပြီး ဘေးလူ တစ်ယောက် အနေဖြင့် ရင်ထဲတွင် အနည်းငယ် တုန်လှုပ် သွားမိလေသည်။

တစ်ဖက်လူကို အချိန်အတော်ကြာအောင် စူးစိုက်ကြည့်ပြီးနောက် ကျန်းချဲ့ ရုတ်တရက် ရယ်မောလိုက်လေသည်။ ဘေးပတ်ဝန်းကျင်ကို တစ်ချက် လှည့်ကြည့်ကာ ကိုယ့်ဘာသာ ပြောလိုက်လေသည်။

'ဒါ ငါ မဟုတ်ဘူး... ငါ့ရဲ့ စရိုက်လည်း လုံးဝ မဟုတ်ဘူး... ငါသာ တကယ်ပဲ အရာအားလုံးကို ဆုံးရှုံးသွားခဲ့မယ် ဆိုရင် စိတ်ဓာတ်တော့ ကျမိမှာပေါ့... ဒါပေမဲ့ လုံးဝ ပြိုလဲသွားမှာတော့ မဟုတ်ဘူး... မင်း ဖန်တီးထားတာတွေက အရမ်းကို အတုအယောင် ဆန်လွန်းတယ်...'

'မင်းက ငါ့ကို ခံစားချက်တွေ တူညီသွားအောင် လုပ်နိုင်မယ်လို့ ထင်နေတာလား... မဟုတ်ဘူး... ဒါက ငါ့ကို ပိုပြီး ကြံ့ခိုင်လာစေဖို့ သက်သက်ပဲ... ကောင်းကင်ယဇ်ပလ္လင် ကျောက်တိုင် မရှိလည်း ဒီအရာတွေ အားလုံး မရှိလည်း ငါက ငါပဲ... အရင်လောက် ကြီးမားတဲ့ အာဏာတွေ မရနိုင်တာမျိုးတော့ ဖြစ်နိုင်တာပေါ့...'

'ဒါပေမဲ့ အထက်ကို တက်လှမ်းချင်တဲ့ ငါ့ရဲ့ စိတ်နှလုံး ကတော့ ဘယ်တော့မှ ဘယ်တော့မှ အရှုံးပေးမှာ မဟုတ်ဘူး... ဘယ်ကမ္ဘာမှာပဲ ရောက်နေပါစေ ငါ တစ်လှမ်းချင်းစီ တစ်လှမ်းချင်းစီ သေချာပေါက် အထက်ကို တက်လှမ်းမှာပဲ...'

'မဟုတ်ဘူး မင်း ကြောက်နေတယ်... မင်း ထိတ်လန့်နေတယ်... ဒီစကားတွေက မင်းကိုယ်မင်း ဖုံးကွယ်ဖို့ အကာအကွယ် တစ်ခု သက်သက်ပဲ... မင်း တကယ်ပဲ မကြောက်ဘူး ဆိုရင် ငါ့အနားကို လာပြီး ငါနဲ့ လာပေါင်းစပ်လိုက်လေ...'

'ဒါပေမဲ့ မင်းကို ငါ ပြောမယ်... အဲ့ဒီလို ပေါင်းစပ်လိုက်တာနဲ့ မင်း ဒီနေရာမှာ ထာဝရ ကျန်ရစ်ခဲ့လိမ့်မယ်... ကောင်းကင်ယဇ်ပလ္လင် ကျောက်တိုင် တောင် မင်းကို ကယ်တင်နိုင်မှာ မဟုတ်ဘူး...'

ရုတ်တရက် နံရံထောင့်တွင် ကွေးကွေးလေး ထိုင်နေသော စိတ်နှလုံး မိစ္ဆာ ကိုယ်ပွားက ချက်ချင်း အသိတရား ပြန်ဝင်လာပြီး ကျန်းချဲ့ကို စူးစိုက်ကြည့်ကာ ပြောလိုက်လေသည်။ မျက်ဝန်းများထဲတွင် လှောင်ပြောင် သရော်မှုများ အပြည့်အဝ ပေါ်လွင်နေလေသည်။

'မင်း သိပါတယ်... ငါ ဘာမှ မလုပ်ရင်တောင် ဒီနေရာက ငါ့ကို လုံးဝ ပိတ်လှောင်ထားနိုင်မှာ မဟုတ်ဘူး ဆိုတာ...'

ကျန်းချဲ့က စိတ်နှလုံး မိစ္ဆာ ကိုယ်ပွား ကို စူးစိုက်ကြည့်ကာ လေဟာနယ်ကို လက်ညှိုးထိုးပြပြီး ပြောလိုက်လေသည်။

'ဟုတ်ပါတယ်... ပိတ်လှောင်ထားလို့ မရဘူးလေ... ဒါပေမဲ့ မင်းက စမ်းသပ်ကြည့်ဖို့ မရဲဘူး မဟုတ်လား... ဟဲဟဲ... မင်းလို လူမျိုးက တကယ်ကို ဟန်ဆောင်ကောင်းလွန်းတယ်... ကိုယ့်ကိုယ်ကိုယ် တောင် ယုံကြည်သွားတဲ့ အထိ ဟန်ဆောင်ကောင်းတာ...'

'မင်း ရင်ထဲမှာ ကြောက်နေရက်နဲ့ ဘာလို့ ပါးစပ်ကနေ အတင်း ငြင်းနေရတာလဲ... မင်း ရင်ထဲမှာ အကြောက်တရား မရှိဘူး ဆိုရင် ငါက ဘာလို့ ထွက်လာတော့မှာလဲ...'

စိတ်နှလုံး မိစ္ဆာ ကိုယ်ပွား ၏ မျက်ဝန်းများထဲတွင် လှောင်ပြောင်မှုများ ပြည့်နှက်နေပြီး အထင်သေးသော အမူအရာများ ပေါ်လွင်နေလေသည်။

ကျန်းချဲ့ အချိန်အနည်းငယ်မျှ တိတ်ဆိတ်သွားပြီးနောက် ရုတ်တရက် ရယ်မောလိုက်လေသည်။

'ဒါက ဟန်ဆောင်နေတာ မဟုတ်ဘူး... ဒါက ငါ့ရဲ့ အစစ်အမှန် စိတ်နှလုံးပဲ... ငါက သာမန်အားဖြင့် လူကောင်း တစ်ယောက်တော့ လုံးဝ မဟုတ်ပါဘူး... သူတော်စင် လည်း လုပ်လို့ မရဘူး... ဒါပေမဲ့ ငါ့ရဲ့ ရည်မှန်းချက် က အရမ်း ရှင်းလင်းတယ်... စွမ်းအား နဲ့ အာဏာကို ရှာဖွေချင်တယ်...'

'အပြစ်ကင်းတဲ့ သူတွေကို အလကားသက်သက် မသတ်ဖူးဘူး... တချို့ လူတွေကိုတောင် ငါ ကယ်တင်ပေးခဲ့ဖူးသေးတယ်... ဒါက ဟန်ဆောင်တာလား... လုပ်ရပ်ကိုပဲ ကြည့်ပါ စိတ်နှလုံးကို မကြည့်ပါနဲ့... စိတ်နှလုံးကို ကြည့်ရင် သူတော်စင် ဆိုတာ မရှိနိုင်ပါဘူး... ငါ့ရဲ့ အတွေးတွေ ရှင်းလင်းနေဖို့ပဲ လိုတယ်... ငါ ဘယ်လို လုပ်ရမယ် ဆိုတာ မင်း လာသင်ပေးစရာ မလိုဘူး...'

ထိုသို့ ပြောပြီးနောက် ကျန်းချဲ့ ခြေတစ်လှမ်း ရှေ့သို့ တိုးလိုက်ပြီး လက်နှစ်ဖက်ကို ဖြန့်ကာ စိတ်နှလုံး မိစ္ဆာ ကိုယ်ပွားကို တိုက်ရိုက် ပွေ့ဖက်လိုက်လေသည်။

အကြောက်တရားကို ရင်ဆိုင်ရန် အကောင်းဆုံး နည်းလမ်းမှာ အကြောက်တရားကို တိုက်ရိုက် ရင်ဆိုင်ခြင်း ပင်ဖြစ်သည်။

သူနှင့် တစ်ဖက်လူ ပွေ့ဖက်လိုက်သည့် အချိန်တွင် တစ်ဖက်လူ ပြောခဲ့သော 'ဒီနေရာမှာ ထာဝရ ကျန်ရစ်ခဲ့လိမ့်မယ်' ဆိုသည့် စကားများ အားလုံးမှာ အတုအယောင်များ သာ ဖြစ်ကြောင်း သိလိုက်ရလေသည်။ တစ်ဖက်လူ ပျောက်ကွယ်သွားခြင်း မဟုတ်ဘဲ တိတိကျကျ ပြောရမည် ဆိုလျှင် သူ့ ကိုယ်ထဲသို့ ပေါင်းစပ် ဝင်ရောက်လာခြင်း ပင်ဖြစ်သည်။

စိတ်နှလုံး မိစ္ဆာ ကိုယ်ပွား ချက်ချင်း ထိတ်လန့်သွားလေသည်။

'မဟုတ်ဘူး... မင်း ငါ့ကို လိမ်တယ်... မင်းက မကြောက်ဘူး လို့ ပြောခဲ့တယ်... ဒါပေမဲ့ မင်း တကယ်တော့ ကြောက်နေတယ်... မင်း ဒီလို လုပ်ရဲတာက မင်းမှာ နောက်ခံ အင်အား ရှိနေလို့ပဲ... ကောင်းကင်ယဇ်ပလ္လင် ကျောက်တိုင် ရှိနေလို့ မင်း ငါ့ကို မကြောက်တာပဲ...'

သူ၏ စကားများမှာ အမှန်တကယ်ပင် အတုအယောင် များသာ ဖြစ်လေသည်။

'ထာဝရ ကျန်ရစ်ခဲ့လိမ့်မယ်' ဆိုသည့် စကားများမှာလည်း ခြောက်လှန့်သော စကားများ သာ ဖြစ်ပြီး ဤသို့ ပြောရခြင်းမှာ ကျန်းချဲ့ ကို တွေဝေသွားစေရန် နှင့် သူ၏ ရင်ထဲတွင် ကြောက်ရွံ့မှု အစအနလေး တစ်ခု ချန်ထားခဲ့စေရန် ရည်ရွယ်ချက် ဖြင့်သာ ဖြစ်လေသည်။

အကြောက်တရား ဆိုသည့် ခံစားချက်ကို သူ လုံးဝ ထိန်းချုပ်၍ မရနိုင်သလို သူ ကိုယ်တိုင် လည်း ပျောက်ကွယ် သွားမည်သာ ဖြစ်လေသည်။

သို့သော် တစ်ဖက်လူ အနည်းငယ် တွေဝေသွားသည် နှင့် တစ်ပြိုင်နက် မျက်တောင်တစ်ခတ် မျှသာ ဖြစ်လျှင်တောင် မှ သူ ထာဝရ ရှင်သန် နိုင်မည် ဖြစ်လေသည်။

ကောင်းကင်ယဇ်ပလ္လင် ကျောက်တိုင် ကိုယ်တိုင် ပင်လျှင် ပေါင်းစပ်သွားသော သူ့ကို လုံးဝ ဖျက်ဆီးပစ်နိုင်မည် မဟုတ်ချေ။

အဘယ်ကြောင့်ဆိုသော် ကျန်းချဲ့ သည် သူ ဖြစ်ပြီး သူ သည်လည်း ကျန်းချဲ့ ဖြစ်သောကြောင့် ပင်ဖြစ်သည်။

သူသည် အတွေးတစ်ခု သာ ဖြစ်ပြီး ကျန်းချဲ့၏ ရင်ထဲမှ ရုတ်တရက် ပေါ်ထွက်လာသော အကြောက်တရား အတွေးလေး တစ်ခုမှ အစပြုလာခြင်း ပင်ဖြစ်သည်။

သူ အလိုရှိသည်မှာ အကြောက်တရား မဟုတ်ဘဲ တစ်ဖက်လူ၏ တွေဝေမှု သာ ဖြစ်လေသည်။ အကြောက်တရား သည် အပြင်ပန်း သဏ္ဌာန်သာ ဖြစ်ပြီး စစ်မှန်သော အကြောက်တရား သည်သာ စိတ်နှလုံး၏ အနှစ်သာရ ဖြစ်လေသည်။

ကျန်းချဲ့ တွေဝေသွားသည် နှင့် တစ်ပြိုင်နက် သူသည် ဤ စိတ်ကူးယဉ် ကမ္ဘာနှင့် ပေါင်းစပ်ကာ တစ်ဖက်လူ၏ တာအို နှလုံးသား တွင် အက်ကွဲကြောင်း တစ်ခုကို ဖန်တီးနိုင်မည် ဖြစ်လေသည်။ အဘယ်ကြောင့်ဆိုသော် ၎င်းသည်သာ ရင်ထဲမှ အစစ်အမှန် ကြောက်ရွံ့မှု ဖြစ်သောကြောင့် ပင်ဖြစ်သည်။

သို့သော် ပေါင်းစပ်လိုက်သည့် အချိန်တွင် ကျန်းချဲ့၏ အကြောက်တရား ကို သူ ခံစားလိုက်ရသော်လည်း တစ်ဖက်လူ ထံတွင် အနည်းငယ်လေးမျှ ပင် တွေဝေမှု မရှိသည်ကို တွေ့လိုက်ရလေသည်။

ဤသည်မှာ လုံးဝ ပုံမှန် မဟုတ်ချေ။

မည်သူမဆို ကြောက်ရွံ့နေသည်ကို သိလျက်နှင့် အသေခံရန် ကိုယ်တိုင်ကိုယ်ကျ ရွေးချယ်လိမ့်မည် မဟုတ်ချေ။ သို့သော် ကျန်းချဲ့ ကတော့ ဤသို့ လုပ်ဆောင်ခဲ့လေသည်။

အရာအားလုံးမှာ သူ့တွင် နောက်ခံ အင်အား ရှိနေသောကြောင့် ပင်ဖြစ်သည်။ သူ့ကို အတုအယောင် တစ်ခု အဖြစ်သာ သတ်မှတ်ထားခြင်း ပင်ဖြစ်သည်။

လက်နှစ်ဖက်ကို ဖြန့်ထားရင်း ကျန်းချဲ့ ရယ်မောလိုက်လေသည်။

'ဟုတ်တယ်... ငါ မင်းကို လိမ်လိုက်တာကွ... နောက်နေတာလား... ငါ့မှာ နောက်ခံ အင်အား ရှိနေပြီ ဆိုမှတော့ ဘာလို့ မင်းရဲ့ ထိန်းချုပ်မှုကို ခံရမှာလဲ... မင်းရဲ့ စကားတွေက တကယ်ကို ကြောက်စရာ ကောင်းပါတယ်... ဒါပေမဲ့ ငါက ရင်ထဲကနေ တကယ်ကြီး ကြောက်နေမှာ မဟုတ်ဘူး... ဘာလို့လဲဆိုတော့ ငါ ဘယ်လိုပဲ လုပ်လုပ် ဘာမှ ဖြစ်မှာ မဟုတ်လို့ပဲ...'

'မင်းက ငါနဲ့ လာပေါင်းစပ်တယ်လို့ ထင်နေတာလား... အမှန်တကယ်တော့ ငါက မင်းကို မျိုချပြီး မင်းကို ငါ့ရဲ့ အာဟာရ တစ်ခု အဖြစ် ပြောင်းလဲပစ်လိုက်တာပဲ...'

စိတ်နှလုံး မိစ္ဆာ ကိုယ်ပွားက မကျေမနပ် ဖြင့် ဒေါသတကြီး ဟစ်အော်နေချိန်တွင် လေဟာနယ်ထက်မှ ရွှေရောင် အလင်းတန်း တစ်ခု လူ့လောကသို့ ကျဆင်းလာပြီး ရွှေရောင် လမ်းမကြီး တစ်ခုကို ဖန်တီးပေးလိုက်လေသည်။

နောက်တစ်စက္ကန့်တွင် ကျန်းချဲ့ နေရာတွင်ပင် ချက်ချင်း အဆင့်တက်လှမ်း သွားလေတော့သည်။

မျက်တောင်တစ်ခတ် အတွင်း စိတ်ကူးယဉ် ကမ္ဘာကြီး ပြိုကွဲသွားပြီး လောကကြီး တစ်ခုလုံး ပျက်စီးသွားခဲ့လေသည်။

တစ်ချိန်တည်းမှာပင် လျှို့ဝှက်ဆန်းကြယ်သော နားလည် သဘောပေါက်မှု များက သူ၏ စိတ်နှလုံး ထဲသို့ အဆက်မပြတ် ဝင်ရောက်လာလေသည်။

မျက်လုံးကို ဖွင့်လိုက်ရာ ကျန်းချဲ့၏ မျက်ဝန်းများထဲတွင် ရွှေရောင် အလင်းတန်းများ လင်းလက်သွားပြီး အလင်းတိုင် ကြီးနှစ်ခု အလား ကိုးလွှာ ကောင်းကင်ယံသို့ တိုက်ရိုက် ထိုးဖောက်သွားလေသည်။

သူ လေဟာနယ်ထက်တွင် ရပ်လိုက်သည် နှင့် တစ်ပြိုင်နက် ပတ်ဝန်းကျင်မှ စုဝေးလာသော ကောင်းကင်နှင့် မြေကြီး၏ မူလစွမ်းအင် များမှာ ပို၍ပင် ရူးသွပ် ကြမ်းတမ်း လာလေသည်။ အနက်ရောင် တိမ်တိုက် ကြီးများကလည်း မြောက်ပိုင်း ချီမိသားစု တစ်ခုလုံးကို အလျင်အမြန် လွှမ်းခြုံလာလေသည်။

အောက်ဘက်တွင် ချီကျန်းနန် နှင့် ချီထျန်းကျုံး အပါအဝင် ချီမိသားစု၏ မဟာသိုင်းသခင်ကြီးများ အားလုံး အကြီးအကျယ် သက်ပြင်းချလိုက်နိုင်ကြပြီး မျက်နှာပေါ်တွင် အချိန်အတော်ကြာ ပျောက်ကွယ်နေခဲ့သော အပြုံးများ ပြန်လည် ပေါ်လွင်လာလေသည်။

စိတ်နှလုံး မိစ္ဆာ ကပ်ဘေး အဆင့်ကို ကျန်းချဲ့ အောင်မြင်စွာ ကျော်ဖြတ်နိုင်ခဲ့ပြီ ဖြစ်ကြောင်း သူတို့ ကောင်းစွာ သိရှိလိုက်လေသည်။

ဤအဆင့်ကို ကျော်ဖြတ်ပြီးသည် နှင့် နောက်ဆက်တွဲ အနေဖြင့် ရွှေအမြုတေကို ခွဲဖြာ၍ သန္ဓေသား တည်ဆောက်ခြင်း ရှန်ရှန်းအဆင့် သို့ တက်လှမ်းခြင်း များ လာတော့မည် ဖြစ်လေသည်။

ဤအဆင့်သို့ ရောက်ရှိသွားပြီ ဖြစ်ရာ အကယ်၍ ကျန်းချဲ့ အဆင့်တက်လှမ်းမှု ကျရှုံးသွားမည် ဆိုလျှင်တောင် သူတို့ အနေဖြင့် ကျန်းချဲ့၏ အခြေခံ အုတ်မြစ်ကို ကာကွယ်ပေးနိုင်မည်ဟု အပြည့်အဝ ယုံကြည်ထားကြလေသည်။

အခန်း (၃၅၆) ရွှေအမြုတေပျက်စီးပြီး ယွမ်ယင်းတည်ဆောက်ခြင်း။ နိမိတ်လက္ခဏာလေးခု ပေါင်းစပ်၍ နတ်ဘုရားဖြစ်လာခြင်း

အဆုံးအစမရှိသော ကောင်းကင်နှင့် မြေကြီး၏ မူလစွမ်းအင်များ စုဝေးလာပြီး အလွန် ကြီးမားလှသော လေဆင်နှာမောင်းကြီး တစ်ခုအဖြစ်သို့ ပြောင်းလဲသွားလေသည်။

ကျန်းချဲ့သည် ထိုလေဆင်နှာမောင်းကြီး၏ အလယ်ဗဟိုတွင် တိုက်ရိုက် ရှိနေလေသည်။

အနက်ရောင် တိမ်တိုက်ကြီးများက ကောင်းကင်တစ်ခုလုံးကို လွှမ်းခြုံထားပြီး နေရောင်ခြည်ကိုပင် ပိတ်ဆို့ထားလေသည်။

ကျန်းချဲ့၏ တစ်ကိုယ်လုံးမှ ရွှေရောင် အလင်းတန်းများ ဖြာထွက်နေပြီး ကိုးလွှာကောင်းကင်ယံမှ ဆင်းသက်လာသော နတ်ဘုရားတစ်ပါးအလား ပင်ဖြစ်သည်။ ယခုအချိန်တွင် သူသည် ကောင်းကင်နှင့် မြေကြီး၏ ဗဟိုချက်မအဖြစ်သို့ တိုက်ရိုက် ရောက်ရှိနေပြီး ချီမိသားစု အတွင်းရှိ လူတိုင်း၏ အကြည့်များကလည်း သူ၏အပေါ်သို့သာ ကျရောက်နေကြလေသည်။

အားလုံး၏ မျက်ဝန်းများထဲတွင် အလွန် နက်ရှိုင်းသော အံ့အားသင့်မှုများ ပြည့်နှက်နေလေသည်။

အစွမ်းထက်တယ် လျှို့ဝှက်ဆန်းကြယ်တယ်။

ဤသည်မှာ သူတို့၏ ရင်ထဲတွင် အနက်ရှိုင်းဆုံး ခံစားနေရသော တစ်ခုတည်းသော အတွေးများ ပင်ဖြစ်သည်။

ယခုအချိန်တွင် ကျန်းချဲ့၏ အခြေအနေမှာ အလွန် လျှို့ဝှက်ဆန်းကြယ်နေလေသည်။ သူသည် အရာအားလုံးကို မေ့လျော့နေသည့်အလား သူ၏ မျက်လုံးများထဲတွင် သူ၏ ခန္ဓာကိုယ်အတွင်း၌ လင်းလက်တောက်ပနေသော ရွှေအမြုတေလေး တစ်ခုတည်းသာ ရှိနေလေသည်။ တစ်ကိုယ်လုံးမှာလည်း လျှို့ဝှက်ဆန်းကြယ်သော တာအို အရှိန်အဝါဖြင့် လွှမ်းခြုံနေလေသည်။

ပါးစပ်ကို ဟကာ တစ်ချက် မှုတ်ထုတ်လိုက်ရာ ကျန်းချဲ့၏ ခန္ဓာကိုယ်အတွင်းမှ ရွှေအမြုတေလေး တစ်ခု ထွက်ပေါ်လာလေသည်။

မျက်တောင်တစ်ခတ် အတွင်းမှာပင် ကောင်းကင်နှင့် မြေကြီး၏ အရောင်အသွေးများ ပြောင်းလဲသွားခဲ့လေသည်။

မှိုင်းညို့နေသော အပြာရောင် ကောင်းကင်ကြီးက လေဟာနယ်တစ်ခုလုံးကို လွှမ်းခြုံသွားပြီး ပင်လယ်ပြင်ကြီး တစ်ခုအလား ဖြစ်သွားလေသည်။ ယခု သူ ထုတ်လွှတ်လိုက်သော ရွှေအမြုတေသည် ထိုပင်လယ်ပြင်ထက်တွင် လင်းလက်တောက်ပနေသော လမင်းကြီးတစ်စင်းအလား ကောင်းကင်နှင့် မြေကြီးကို အလင်းရောင်ပေးစွမ်းနေပြီး ဖြည်းညင်းစွာ မြင့်တက်လာလေသည်။

ဤမြင်ကွင်းက ချီမိသားစုမှ လူတိုင်းကို နောက်တစ်ကြိမ် ထပ်မံ၍ အကြီးအကျယ် အံ့အားသင့်သွားစေခဲ့လေသည်။

မွေးရာပါ နိမိတ်လက္ခဏာ။ ပင်လယ်ပြင်ထက်မှ လမင်းကြီး ထွက်ပေါ်လာခြင်းပင် ဖြစ်သည်။

"ဒါ ဒါက ဒဏ္ဍာရီထဲက ယွမ်ယင်းတည်ဆောက်ချိန်မှာ ထွက်ပေါ်လာတဲ့ နိမိတ်လက္ခဏာများလား"

ချီမိသားစု၏ ရွှေအမြုတေအဆင့် သိုင်းသခင်တစ်ယောက်က လုံးဝ မထိန်းချုပ်နိုင်တော့ဘဲ အံ့အားသင့်စွာ အော်ဟစ်လိုက်လေသည်။

"မှန်တယ် အရင်တုန်းက ဒီလိုမြင်ကွင်းမျိုးကို ကိုယ်တိုင် မျက်မြင်ကိုယ်တွေ့ ကြုံတွေ့ခဲ့ဖူးတယ် ဒါက နိမိတ်လက္ခဏာပဲ"

လူတစ်ယောက်က အလွန် ယုံကြည်ချက်ရှိစွာဖြင့် အတည်ပြု ပြောဆိုလိုက်လေသည်။

"သိုင်းအဆင့် သတ်မှတ်ချက်စာရင်းရဲ့ နံပါတ်တစ်ဆိုတာ တကယ်ပဲ နာမည်နဲ့ လိုက်ဖက်တာပဲ"

"ဒါကို နာမည်နဲ့ လိုက်ဖက်တယ်လို့ ခေါ်လို့ မရသေးပါဘူး ကျန်းချဲ့လို ပြိုင်ဘက်ကင်း ပါရမီရှင်မျိုးအတွက် နိမိတ်လက္ခဏာ ထွက်ပေါ်လာတာက အရမ်းကို သာမန်ကိစ္စတစ်ခုပါ တကယ်လို့သာ ထွက်မလာဘူးဆိုရင် အဲ့ဒါကမှ တကယ့်ကို ပုံမှန်မဟုတ်တာ"

လူတစ်ယောက်က ဝင်ရောက်ရှင်းပြလိုက်လေသည်။

သိုင်းပညာရှင်များ ယွမ်ယင်းတည်ဆောက်ချိန်တွင် အဆင့်မြင့် ရွှေအမြုတေများကို ပိုင်ဆိုင်ထားသူတိုင်းသည် နိမိတ်လက္ခဏာများ ထွက်ပေါ်လာလေ့ ရှိလေသည်။ သိုင်းပညာရှင်များ အတွက်တော့ ဤသည်မှာ အလွန် ကြီးမားသော အကျိုးကျေးဇူးများကို ရရှိစေနိုင်လေသည်။

"အဆင့်မြင့် ရွှေအမြုတေပါလား ဟူး ငါသာ အဆင့်မြင့် ရွှေအမြုတေကို ပိုင်ဆိုင်ခဲ့မယ်ဆိုရင် ယွမ်ယင်းတည်ဆောက်ဖို့အတွက် ဘာတွေများ ပူပန်နေစရာ လိုတော့မှာလဲ"

အစောပိုင်းက လူက အလွန် သက်ပြင်းချလိုက်ပြီး ကျန်းချဲ့ကို ကြည့်နေသော မျက်ဝန်းများထဲတွင် အားကျငေးမောသော အမူအရာများ အပြည့်အဝ ပေါ်လွင်နေလေသည်။

"နေဦး အဲ့ဒါက အဆင့်မြင့် ရွှေအမြုတေနဲ့ သိပ်မတူဘူး စာအုပ်ထဲမှာ ရေးထားတာတွေနဲ့ မတူဘူး"

"အဆင့်မြင့် ရွှေအမြုတေ မဟုတ်ဘူးဆိုရင် ဘာလဲ"

"ပြီးပြည့်စုံတဲ့ ရွှေအမြုတေလေ"

ချီကျန်းနန်၏ အသံက အလွန် လေးနက်နေပြီး လေဟာနယ်ထက်တွင် ဖြည်းညင်းစွာ မြင့်တက်လာသော ရွှေအမြုတေကို စူးစိုက်ကြည့်နေလေသည်။

ပြီးပြည့်စုံပြီး အပြည့်အဝ စုံလင်နေကာ ရွှေရောင် အလင်းတန်းများ လောကကို လင်းထိန်စေလေသည်။

ဤသည်မှာ ဒဏ္ဍာရီထဲတွင် မှတ်တမ်းတင်ထားသော ပြီးပြည့်စုံသည့် ရွှေအမြုတေ၏ ပုံစံပင်ဖြစ်ကြောင်း သူ ကောင်းစွာ သိရှိထားလေသည်။

ဤအချက်က သူ့ကို အံ့အားသင့်စေခဲ့သလို တစ်ချိန်တည်းမှာပင် အလွန် သဘာဝကျသည် ဟုလည်း ခံစားရစေလေသည်။

အဆင့်မြင့် ရွှေအမြုတေကို တည်ဆောက်နိုင်သူတိုင်းသည် ရှန်ရှန်းအဆင့်သို့ တက်လှမ်းနိုင်ရန် အရည်အချင်း ရှိကြလေသည်။ သို့သော် ကျန်းချဲ့သည် အစကတည်းက ရှန်ရှန်းအဆင့်သို့ တက်လှမ်းမည့် အရည်အချင်းကိုသာ ပြသခဲ့ခြင်း မဟုတ်ဘဲ သိုင်းသူတော်စင် ဖြစ်လာမည့် အရည်အချင်းများကိုပါ အပြည့်အဝ ပြသနိုင်ခဲ့သူ တစ်ယောက် ပင်ဖြစ်သည်။

ဤကဲ့သို့သော အခြေခံအုတ်မြစ်မျိုး ရှိနေသဖြင့်သာ လောကတစ်ခွင်မှ သူရဲကောင်းများကို ဖိနှိပ်ကာ သိုင်းလျှို့ဝှက်နယ်မြေ၏ နံပါတ်တစ် နေရာကို ရယူနိုင်ခဲ့ခြင်း ပင်ဖြစ်သည်။

ပြီးပြည့်စုံသည့် ရွှေအမြုတေ သာလျှင် ဤမျှလောက် ကြောက်စရာကောင်းသော စွမ်းအားများကို ပိုင်ဆိုင်နိုင်မည် ဖြစ်လေသည်။

"တကယ်ပဲ ပြီးပြည့်စုံတဲ့ ရွှေအမြုတေပဲ တကယ်ကို အံ့အားသင့်စရာ ကောင်းသလို အရမ်းကို သဘာဝကျတယ်လို့လည်း ခံစားရတယ် မိသားစုခေါင်းဆောင် ဒီသမက်ကို ရွေးချယ်ခဲ့တာ တကယ်ကို မှန်ကန်လွန်းပါတယ် ဒီကောင်လေးမှာ သိုင်းသူတော်စင် ဖြစ်လာမယ့် အရည်အချင်းတွေ ရှိနေတယ် နောက်ပိုင်းကျရင် ငါတို့ချီမိသားစုရဲ့ အဓိက မဏ္ဍိုင်ကြီးတစ်ခု သေချာပေါက် ဖြစ်လာတော့မှာပဲ"

အကြီးအကဲချုပ် ချီထျန်းကျုံးက ဝင်ရောက် ထောက်ခံလိုက်လေသည်။

"အရင်တုန်းက ဒီလူအိုကြီး ယွမ်ယင်းတည်ဆောက်တုန်းကလည်း သဘာဝ နိမိတ်လက္ခဏာတွေ ထွက်ပေါ်လာခဲ့ဖူးတယ် ဒါပေမဲ့ ကျန်းချဲ့ရဲ့ နိမိတ်လက္ခဏာတွေက တစ်ခုတည်းနဲ့တော့ ပြီးသွားမယ် မထင်ဘူး မိသားစုခေါင်းဆောင် အကြီးအကဲချုပ် ခင်ဗျားတို့ ဘယ်လိုထင်လဲ ကျန်းချဲ့ရဲ့ ယွမ်ယင်းတည်ဆောက်မှုမှာ နိမိတ်လက္ခဏာ နှစ်ခုလောက် ပါလာနိုင်မလား"

ဒုတိယအကြီးအကဲ ချီထျန်းဟယ်က ရုတ်တရက် ဝင်ရောက် မေးမြန်းလိုက်လေသည်။

ချီထျန်းကျုံးက ခပ်ဖျော့ဖျော့ ပြုံးလိုက်ပြီး ပြန်ဖြေသည်။

"ဒါက သေချာပေါက်ပါပဲ"

ချီကျန်းနန်၏ မျက်နှာထားက အလွန် လေးနက်နေပြီး ခေါင်းညိတ်ကာ မှတ်ချက်ချလိုက်လေသည်။

"အနည်းဆုံးတော့ နိမိတ်လက္ခဏာ နှစ်ခုတော့ ထွက်ပေါ်လာလိမ့်မယ်"

ချီထျန်းဟယ်၏ ရင်ထဲတွင် အနည်းငယ် ထိတ်လန့်သွားပြီး ချီကျန်းနန်ကို အလျင်အမြန် လှမ်းကြည့်လိုက်လေသည်။

"ဒါဆို မိသားစုခေါင်းဆောင်က ကျန်းချဲ့မှာ နိမိတ်လက္ခဏာ သုံးခုလောက် ထွက်ပေါ်လာလိမ့်မယ်လို့များ ထင်နေတာလား"

"မိသားစုရဲ့ မှတ်တမ်းတွေအရ ဘိုးဘေးကြီး ယွမ်ယင်းတည်ဆောက်တုန်းက နိမိတ်လက္ခဏာ သုံးခု ထွက်ပေါ်လာခဲ့ဖူးတယ်တဲ့ တတိယ နိမိတ်လက္ခဏာက တစ်ဝက်ပဲ ထွက်ပေါ်လာပေမဲ့လည်း အလင်းတန်းသုံးခု ပေါင်းစပ်ပြီး နတ်ဘုရားဖြစ်လာတယ်လို့ ပြောလို့ရတယ်လေ"

"ဘိုးဘေးကြီး ကိုယ်တိုင် ပြောခဲ့ဖူးတာက ဒီကောင်လေးက သူ့လိုပဲတဲ့ ဒါကြောင့် ကျန်းချဲ့ရဲ့ ယွမ်ယင်းတည်ဆောက်မှုမှာလည်း နိမိတ်လက္ခဏာ သုံးခုလောက် ထွက်ပေါ်လာနိုင်တယ်"

ချီကျန်းနန်က အလွန် ပေါ့ပေါ့ပါးပါးဖြင့် ပြန်ဖြေလိုက်လေသည်။

"တကယ်လို့ အဲ့ဒီလိုသာဆိုရင် ကျန်းချဲ့က တကယ်ပဲ သိုင်းသူတော်စင် ဖြစ်လာမယ့် အရည်အချင်းတွေကို အပြည့်အဝ ပိုင်ဆိုင်နေပြီပေါ့"

ချီထျန်းကျုံး၏ မျက်လုံးများ ကျဉ်းမြောင်းသွားပြီး ယခုအချိန်တွင် အလွန် တည်ကြည်လေးနက်နေလေသည်။

နိမိတ်လက္ခဏာ အမျိုးမျိုးက စွမ်းအားများကို တိုက်ရိုက် မတိုးတက်စေနိုင်သော်လည်း ရွှေအမြုတေ၏ အရည်အသွေးနှင့် သိုင်းပညာရှင်၏ အခြေခံအုတ်မြစ်များကို အပြည့်အဝ ကိုယ်စားပြုနေလေသည်။ သိုင်းပညာရှင်တစ်ယောက်၏ ပါရမီကို အထင်ရှားဆုံး ပြသနိုင်သော လက္ခဏာများ ပင်ဖြစ်သည်။

နိမိတ်လက္ခဏာ နှစ်ခု ထွက်ပေါ်နိုင်သူတိုင်းသည် လမ်းခုလတ်တွင် မသေဆုံးသွားသရွေ့ သိုင်းသူတော်စင် ဖြစ်လာရန် အပြည့်အဝ အရည်အချင်း ရှိကြလေသည်။

"ဟော ကြည့်စမ်း ဒုတိယ နိမိတ်လက္ခဏာ ထွက်လာပြီ"

ချီမိသားစု၏ မဟာသိုင်းသခင်ကြီးတစ်ယောက်က ရုတ်တရက် အော်ဟစ်လိုက်လေသည်။

လူတိုင်း၏ အကြည့်များကလည်း လေဟာနယ်ထက်သို့ တပြိုင်နက်တည်း ကျရောက်သွားကြလေသည်။

လေဟာနယ်ထက်တွင်။

ကျန်းချဲ့သည် လက်နှစ်ဖက်ကို ဖြန့်ထားသော အနေအထားဖြင့်သာ ရှိနေဆဲဖြစ်ပြီး တစ်ကိုယ်လုံးကို မူလစွမ်းအင် လေဆင်နှာမောင်းကြီးဖြင့် လွှမ်းခြုံထားလေသည်။ အစောပိုင်းက ထွက်ပေါ်လာသော ပင်လယ်ပြင်ထက်မှ လမင်းကြီး၏ အလယ်တွင် ရုတ်တရက် နောက်ထပ် နိမိတ်လက္ခဏာအသစ် တစ်ခု ထွက်ပေါ်လာပြန်လေသည်။

မူလစွမ်းအင် လေဆင်နှာမောင်းကြီး၏ အလယ်ဗဟိုတွင်။

အလွန် တောက်ပသော အလင်းတန်းများကို ထုတ်လွှတ်နေသည့် ပေတစ်ရာခန့် ကြီးမားလှသော ရွှေရောင် ကြာပန်းကြီးတစ်ပွင့်က ပင်လယ်ပြင်ထက်တွင် အမြစ်တွယ်နေသည့်အလား ကြာဖူးလေးက ဖြည်းညင်းစွာ ပွင့်ထွက်လာပြီး ရွှေအမြုတေကို အလယ်တွင် လွှမ်းခြုံထားလိုက်လေသည်။ ပတ်ဝန်းကျင်မှ ကောင်းကင်နှင့် မြေကြီး၏ မူလစွမ်းအင်များ စုဝေးလာမှုကိုလည်း ပိုမို လျင်မြန်လာစေခဲ့လေသည်။

"ဒီနိမိတ်လက္ခဏာကို ကျုပ် စာအုပ်ထဲမှာ မြင်ဖူးတယ် ဒုက္ခပင်လယ်ထဲမှာ ရွှေရောင်ကြာပန်း ပွင့်တာပဲ"

အကြီးအကဲချုပ် ချီထျန်းကျုံးက အသံနိမ့်နိမ့်ဖြင့် ပြောလိုက်လေသည်။

"ထင်တဲ့အတိုင်းပဲ"

ချီကျန်းနန်၏ မျက်လုံးများထဲတွင်တော့ အများကြီး အံ့အားသင့်သော အမူအရာများ မရှိတော့ချေ။ အဘယ်ကြောင့်ဆိုသော် ကျန်းချဲ့သည် ပြီးပြည့်စုံသော ရွှေအမြုတေကို ပိုင်ဆိုင်ထားကြောင်း သူ သိရှိလိုက်သည်နှင့် တစ်ပြိုင်နက် အနည်းဆုံး နိမိတ်လက္ခဏာ နှစ်ခုလောက် ထွက်ပေါ်လာမည်မှာ သေချာကြောင်း သူ အပြည့်အဝ ယုံကြည်ထားခဲ့သောကြောင့် ပင်ဖြစ်သည်။

ယခုမြင်ကွင်းက သူ၏ ယုံကြည်ချက်ကို ပိုမို ခိုင်မာသွားစေခဲ့ခြင်း သာဖြစ်လေသည်။

"တကယ်ကို ထူးခြားပြောင်မြောက်တဲ့ ပါရမီတွေပဲ"

ချီထျန်းဟယ်လည်း မုတ်ဆိတ်မွေးများကို သပ်ကာ ခေါင်းညိတ်လိုက်လေသည်။

ဝမ်ပင်း အိမ်တော်ထက်တွင်။

ချီမိသားစု၏ ညီအစ်မ နှစ်ယောက်စလုံးလည်း မျက်လုံးများ ပြူးကျယ်နေကြပြီး ချီနင်ပင်းက မျက်လုံးများကို ပွတ်ကာ အံ့အားသင့်စွာဖြင့် ပြောလိုက်လေသည်။

"အစ်မ ဒုက္ခပင်လယ်ထဲမှာ ရွှေရောင်ကြာပန်း ပွင့်လာတာပဲ"

"ငါ သိတယ် နင် တိုးတိုးပြောပါ"

ချီဝမ်ကျင်းက ပြန်ပြောလိုက်ပြီး ညီမဖြစ်သူကို အလွန်အမင်း အံ့အားသင့်မနေရန် သတိပေးလိုက်သော်လည်း အမှန်တကယ်တွင်တော့ သူမ၏ မျက်ဝန်းများထဲတွင်လည်း အလွန်အမင်း အံ့အားသင့်နေသော အမူအရာများ အပြည့်အဝ ပေါ်လွင်နေလေသည်။

"ပင်လယ်ပြင်ထက်က လမင်းကြီးရယ် ဒုက္ခပင်လယ်ထဲက ရွှေရောင်ကြာပန်းရယ် အစ်မ ခဲအိုက တကယ်ကို အစွမ်းထက်လွန်းတာပဲ"

ချီနင်ပင်းသည် ဗဟုသုတမရှိသော သူတစ်ယောက် လုံးဝ မဟုတ်ချေ။ သူမ၏ စွမ်းအားသည် ချီဝမ်ကျင်းလောက် မမြင့်မားသော်လည်း ချီမိသားစု၏ နယ်မြေတွင် အမြဲတမ်း နေထိုင်ခဲ့သဖြင့် ဗဟုသုတအပိုင်းတွင်တော့ အစ်မဖြစ်သူထက် ပို၍ပင် ကြွယ်ဝလေသည်။

"သိုင်းလျှို့ဝှက်နယ်မြေရဲ့ နံပါတ်တစ်ဆိုမှတော့ သေချာပေါက် အစွမ်းထက်မှာပေါ့"

"အစ်မ ခဲအိုလို အစွမ်းထက်တဲ့လူကို ရွေးချယ်မိလို့ အခုချိန်မှာ အရမ်း ကံကောင်းတယ်လို့ ခံစားနေရတယ် မဟုတ်လား"

"နင်ကရော သူ့ရဲ့ မိန်းမ မဟုတ်လို့လား"

"ညီမက အဲ့ဒီသဘော ပြောတာ မဟုတ်ပါဘူး"

"တော်ပြီ စကားမပြောနဲ့တော့ အမြုတေကွဲတော့မယ် ထင်တယ်"

ချီဝမ်ကျင်းက ညီမဖြစ်သူကို ဖြောင်းဖြလိုက်ပြီး လေဟာနယ်ထက်ရှိ မြင်ကွင်းကိုသာ မလွှဲတမ်း စူးစိုက်ကြည့်နေလိုက်လေသည်။

'တကယ်လို့သာ ဒီလိုဖြစ်လာမယ်ဆိုရင် အဖေက သေချာပေါက် လက်ခံပေးနိုင်မှာပါ'

ခြံဝင်းငယ်လေး အတွင်းတွင် ချီရှောက်ယန်လည်း ဤမြင်ကွင်းများကို ကြည့်ရှုနေပြီး ကျန်းချဲ့၏ နိမိတ်လက္ခဏာ နှစ်ခုကို မြင်တွေ့ရချိန်တွင် ရင်ထဲတွင် တိတ်တဆိတ် တွေးတောနေမိလေသည်။

အလွန် ပါရမီထူးချွန်သော သိုင်းပညာရှင်များ ပင်လျှင် များသောအားဖြင့် နိမိတ်လက္ခဏာ တစ်ခုသာ ထွက်ပေါ်လာလေ့ရှိပြီး နိမိတ်လက္ခဏာ နှစ်ခု ထွက်ပေါ်နိုင်သူတိုင်းသည် သိုင်းသူတော်စင် ဖြစ်လာရန် အပြည့်အဝ အရည်အချင်း ရှိကြသည်ဟု သိုင်းလောကတွင် ရှေးယခင်ကတည်းက အဆိုရှိခဲ့လေသည်။

ဤစကားကို သိရှိသူ အလွန် နည်းပါးသလို သိပ်ပြီး တိကျမှုမရှိသော်လည်း သိုင်းပညာရှင် အများစုကတော့ ဤစကားကို အပြည့်အဝ ယုံကြည်ကြလေသည်။

ချီမိသားစု၏ သခင်လေးတစ်ယောက် အနေဖြင့် လျှို့ဝှက်ချက်များကို သိရှိထားသူဖြစ်ရာ သဘာဝကျကျပင် ဤစကားကို အပြည့်အဝ ယုံကြည်သူ တစ်ယောက် ဖြစ်လေသည်။

လေဟာနယ်ထက်တွင်။

နိမိတ်လက္ခဏာ နှစ်ခု အချင်းချင်း ယှက်နွှယ်နေပြီး အလွန် လျှို့ဝှက်ဆန်းကြယ်နေလေသည်။ ကျန်းချဲ့လည်း ထိုနိမိတ်လက္ခဏာများ၏ အတွင်းတွင် ရှိနေသော်လည်း သူကိုယ်တိုင်တော့ သတိမထားမိခဲ့ချေ။ ယခုအချိန်တွင် သူသည် အဆင့်တက်လှမ်းမှုတွင်သာ အပြည့်အဝ အာရုံစိုက်နေလေသည်။

သူနှင့် အသက်ဆက်စပ်နေသော ရွှေအမြုတေ၏ အတွင်းတွင် အလွန် အစွမ်းထက်သော နတ်စွမ်းအင်များ အလွန် လျင်မြန်စွာ ကြီးထွားလာနေကြောင်းကို သူ ကောင်းစွာ ခံစားသိရှိနေလေသည်။

ထိုအချိန်တွင်။

ရုတ်တရက် နဂါးဟိန်းသံ နှစ်ခု လေဟာနယ်တွင် ပဲ့တင်ထပ်သွားလေသည်။

လူတိုင်း၏ အကြည့်များအောက်တွင်ပင် ကျန်းချဲ့၏ ခန္ဓာကိုယ်ထဲမှ နဂါးပုံသဏ္ဌာန် အရိပ်နှစ်ခု အရှိန်အဟုန်ဖြင့် ပျံထွက်လာလေသည်။ တစ်ကောင်မှာ မီးနဂါးတစ်ကောင်အလား ရွှေဝါရောင် အလင်းတန်းများကို ထုတ်လွှတ်နေပြီး အခြားတစ်ကောင်မှာတော့ ရေခဲအလား အလွန် အေးစက်နေကာ အပြာဖျော့ရောင် အလင်းတန်းများကို ထုတ်လွှတ်နေလေသည်။

ထိုက်ရွှမ် မူလယန် ဝိညာဉ်စွမ်းအင်။

ထိုက်ယင် ရွှမ်ယွမ် ဝိညာဉ်စွမ်းအင်။

ယင်နှင့်ယန် နဂါးစစ်စစ် နှစ်ကောင်အဖြစ်သို့ ပြောင်းလဲသွားပြီး ကောင်းကင်နှင့် မြေကြီးအကြားတွင် ပျံသန်းနေကာ တိတိကျကျ ပြောရမည်ဆိုလျှင် ကျန်းချဲ့၏ ပတ်လည်တွင် ပျံသန်းနေပြီး ရွှေရောင် ကြာပန်းကြီးကို လှည့်ပတ်နေကာ ဆွဲငင်မှု တစ်ခုကို ခံနေရသည့်အလား ပင်ဖြစ်သည်။

"ဘာ တတိယ နိမိတ်လက္ခဏာလား"

"တတိယ နိမိတ်လက္ခဏာလား"

ဤအချိန်တွင် အကြီးအကဲချုပ် ချီထျန်းကျုံး ကိုယ်တိုင်ပင်လျှင် မျက်လုံးများ ကျဉ်းမြောင်းသွားပြီး ရင်ထဲတွင် မြေငလျင်ကြီး တစ်ခု လှုပ်ခတ်သွားသည့်အလား အကြီးအကျယ် တုန်လှုပ်သွားခဲ့ရလေသည်။

ချီကျန်းနန်လည်း လက်သီးများကို တင်းတင်းဆုပ်ထားပြီး လေဟာနယ်ထက်ရှိ နဂါးပုံသဏ္ဌာန် အရိပ်နှစ်ခုကို မလွှဲတမ်း စူးစိုက်ကြည့်နေလေသည်။

"ယင်နဲ့ယန် နဂါးအဖြစ် ပြောင်းလဲသွားတာပဲ"

ချီထျန်းဟယ်က စကားလုံးများကို ဖြည်းညင်းစွာ ရေရွတ်လိုက်လေသည်။

ရင်ဘတ်မှာလည်း အဆက်မပြတ် နိမ့်ချည်မြင့်ချည် ဖြစ်နေပြီး ယခုအချိန်တွင် သူ၏ စိတ်နှလုံးများ အလွန်အမင်း လှုပ်ရှားနေကြောင်း ထင်ရှားလှပေသည်။

အဘယ်ကြောင့်ဆိုသော် ဤသည်မှာ တတိယ နိမိတ်လက္ခဏာ ပင်ဖြစ်သောကြောင့် ပင်ဖြစ်သည်။

သိုင်းသူတော်စင် ဖြစ်သွားခဲ့ပြီဖြစ်သော သူတို့၏ ဘိုးဘေးကြီး ချီမိသားစု တစ်ခုလုံး၏ အစောင့်အရှောက် နတ်ဘုရားကြီး ပင်လျှင် အရင်တုန်းက မှတ်တမ်းများအရ နိမိတ်လက္ခဏာ သုံးခုသာ ရှိခဲ့ပြီး အရေးအကြီးဆုံး အချက်မှာ တတိယ နိမိတ်လက္ခဏာသည် လုံးဝ အပြည့်အဝ ပေါ်ထွက်လာခဲ့ခြင်း မရှိခဲ့ချေ။

သို့သော် ယခုအခါ ယခုအချိန်တွင်တော့ သူတို့အားလုံး ဤမြင်ကွင်းကို ကိုယ်တိုင် မျက်မြင်ကိုယ်တွေ့ ကြုံတွေ့လိုက်ရလေပြီ။

'ငါတို့ မြောက်ပိုင်း ချီမိသားစု နောင်တစ်ချိန်ကျရင် နတ်ဘုရားဂိုဏ်းကြီးတွေနဲ့တောင် ယှဉ်ပြိုင်နိုင်စွမ်း ရှိလာတော့မယ် ထင်တယ်'

ချီကျန်းနန်၏ ရင်ထဲတွင် တိတ်တဆိတ် တွေးတောလိုက်ပြီး ရင်ထဲတွင်လည်း သူရဲကောင်းပီသသော စိတ်ဓာတ်များ ပေါက်ဖွားလာခဲ့လေသည်။

ချီမိသားစု၏ နေရာတစ်နေရာတွင် ကပ်ဆိုးတစ်သောင်း မိစ္ဆာဓား၏ အနီးတွင် ချီရွှယ်မိစ္ဆာသခင်သည်လည်း သူ၏ အစစ်အမှန် ခန္ဓာကိုယ်ကို ဖန်တီးကာ လေဟာနယ်ထက်ရှိ မြင်ကွင်းကို ကြည့်ရှုနေပြီး မျက်ဝန်းများထဲတွင်လည်း အလင်းတန်းများ အဆက်မပြတ် ဖြတ်ပြေးနေလေသည်။

ကျန်းချဲ့ နိမိတ်လက္ခဏာ နှစ်ခု ထွက်ပေါ်လာခြင်းကို သူ လုံးဝ အံ့အားသင့်ခြင်း မရှိခဲ့ချေ။ မည်သို့ပင်ဆိုစေ ယခင်က ကျန်းချဲ့ ပြီးပြည့်စုံသော ရွှေအမြုတေကို တည်ဆောက်နိုင်ခဲ့သည်ကို သူ ကိုယ်တိုင် မျက်မြင်ကိုယ်တွေ့ ကြုံတွေ့ခဲ့ရသည် မဟုတ်ပါလား။

သို့သော် နိမိတ်လက္ခဏာ သုံးခုကတော့ သူ့ကို အနည်းငယ် အံ့အားသင့်သွားစေခဲ့လေသည်။

ယခင်က သူ၏ အတိတ်ကို ပြန်လည် တွေးတောကြည့်သောအခါ ဒုတိယ နိမိတ်လက္ခဏာကိုပင် အောင်မြင်အောင် မဖန်တီးနိုင်ခဲ့ချေ။

ကျန်းချဲ့နှင့် နှိုင်းယှဉ်ပါက သူသည် အမှိုက်ကောင်တစ်ကောင်နှင့် လုံးဝ ခြားနားခြင်း မရှိတော့ချေ။

အသက်ပြင်းပြင်း တစ်ချက် ရှူသွင်းလိုက်ပြီး ယခင်က ကျန်းချဲ့နှင့် အသေအလဲ မတိုက်ခိုက်ခဲ့မိသည်ကို ပို၍ပင် ဝမ်းသာနေမိလေသည်။

နိမိတ်လက္ခဏာ သုံးခုဖြင့် အဆင့်တက်လှမ်းလာသူ နောင်တစ်ချိန်တွင် သူ၏ အစစ်အမှန် ခန္ဓာကိုယ်ကို ပြန်လည် ရရှိရန်နှင့် နောက်ထပ် တစ်ဆင့် ထပ်မံ တက်လှမ်းနိုင်ရန် မျှော်လင့်ချက်များ အားလုံးသည် ကျန်းချဲ့၏ အပေါ်တွင်သာ ရှိနေတော့လေသည်။

"ကောင်လေး တော်တော် မဆိုးဘူးပဲ"

ချီရွှယ်မိစ္ဆာသခင်က တိုးညှင်းစွာ ညည်းတွားလိုက်လေသည်။

လေဟာနယ်ထက်တွင် နိမိတ်လက္ခဏာ သုံးခုက ကောင်းကင်နှင့် မြေကြီးကို လွှမ်းခြုံထားပြီး ကျန်းချဲ့၏ ပုံစံမှာ ပို၍ပင် လျှို့ဝှက်ဆန်းကြယ်လာကာ နတ်ဘုရား သားရဲများ ခြံရံနေသည့်အလား ပင်ဖြစ်သည်။

ယခုအချိန်တွင် ရွှေရောင်ကြာပန်းဖြင့် ဖုံးလွှမ်းထားသော ရွှေအမြုတေပေါ်တွင် အလွန် သေးငယ်သော အက်ကွဲကြောင်းလေး တစ်ခု ရုတ်တရက် ပေါ်လာခဲ့လေသည်။

အမြုတေကွဲပြီ အမြုတေကွဲပြီ။

အောက်ဘက်တွင် ရှိနေသော လူတိုင်း၏ အကြည့်များက ဤမြင်ကွင်းကို မလွှဲတမ်း စူးစိုက်ကြည့်နေကြပြီး မည်သည့် အမှားအယွင်းမျှ မဖြစ်ပေါ်စေရန် ရင်ထဲတွင် အဆက်မပြတ် ဆုတောင်းနေကြလေသည်။

အလင်းတန်းသုံးခု ပေါင်းစပ်ပြီး နတ်ဘုရားဖြစ်လာသည် ဆိုမှတော့ ကျန်းချဲ့သည် နောင်တစ်ချိန်တွင် သေချာပေါက် သိုင်းသူတော်စင် ဖြစ်လာတော့မည် ဖြစ်လေသည်။

ချီမိသားစု အနေဖြင့်လည်း ဤအရာမှနေ၍ အလွန် ကြီးမားသော အကျိုးကျေးဇူးများကို ရရှိလာမည်မှာ အသေအချာ ပင်ဖြစ်သည်။

သို့သော် လူတိုင်း၏ အာရုံစိုက်နေသည့် အချိန်လေးတွင်ပင် မထင်မှတ်ထားသော အပြောင်းအလဲကြီး ထပ်မံ ဖြစ်ပေါ်လာပြန်လေသည်။

ရွှေအမြုတေပေါ်ရှိ အက်ကွဲကြောင်းများ တဖြည်းဖြည်း ကြီးမားလာပြီး ယခုအချိန်တွင် ပင့်ကူအိမ်တစ်ခုအလား အက်ကွဲကြောင်းများ အပြည့်အဝ ပြည့်နှက်နေကာ လျှို့ဝှက်ဆန်းကြယ်သော အလင်းတန်းများ ကလည်း အရပ်လေးမျက်နှာသို့ အဆက်မပြတ် ပျံ့နှံ့ထွက်ပေါ်နေလေသည်။

ထိုအချိန်တွင်ပင်။

ကိုးလွှာကောင်းကင်ယံထက်မှ ခရမ်းရောင် မြစ်ကြီးတစ်စင်း အရှိန်အဟုန်ဖြင့် ကျဆင်းလာပြီး လေဟာနယ် တစ်ခုလုံးရှိ တိမ်တိုက်များကို အပိုင်းပိုင်း အစစ ရိုက်ချိုးပစ်လိုက်ကာ ရွှေအမြုတေအတွင်းသို့ တိုက်ရိုက် ဝင်ရောက်သွားလေတော့သည်။

စတုတ္ထ နိမိတ်လက္ခဏာ။

"မဖြစ်နိုင်ဘူး ဒါ လုံးဝ မဖြစ်နိုင်ဘူး"

အကြီးအကဲချုပ် ချီထျန်းကျုံး၏ လက်မောင်းများ ပင်လျှင် အနည်းငယ် တုန်ယင်နေပြီး ဤမြင်ကွင်းကို လုံးဝ မယုံကြည်နိုင်စွာဖြင့် ကြည့်ရှုနေလေသည်။

အခြားသော မဟာသိုင်းသခင်ကြီးများ၏ မျက်နှာထားမှာလည်း အလွန် ထူးဆန်းနေလေသည်။

ပထမဆုံး နိမိတ်လက္ခဏာ ထွက်ပေါ်လာခြင်းကို ပုံမှန်အတိုင်းသာ ဖြစ်သည်ဟု ထင်မှတ်ခဲ့ကြပြီး ဒုတိယ နိမိတ်လက္ခဏာ ထွက်ပေါ်လာချိန်တွင်တော့ အနည်းငယ် အံ့အားသင့်သွားကြသော်လည်း သေချာ တွေးကြည့်လိုက်သောအခါ လုံးဝ သဘာဝကျသည်ဟု ခံစားခဲ့ရလေသည်။ တတိယ နိမိတ်လက္ခဏာ ထွက်ပေါ်လာချိန်တွင်တော့ သူတို့အားလုံး အလွန်အမင်း အံ့အားသင့် ထိတ်လန့်သွားကြပြီး။

တစ်ချိန်တည်းမှာပင် အလွန် ဝမ်းသာပျော်ရွှင်သွားခဲ့ကြလေသည်။

သို့သော် စတုတ္ထ နိမိတ်လက္ခဏာ ထွက်ပေါ်လာသော အခါတွင်တော့ လုံးဝ မယုံကြည်နိုင်လောက်အောင် ဖြစ်သွားရလေသည်။

"ဒီလူအိုကြီး အလင်းတန်းလေးခု ပေါင်းစပ်ပြီး နတ်ဘုရားဖြစ်လာတယ် ဆိုတာမျိုးကို တစ်ခါမှ မကြားဖူးခဲ့ဘူး ဒါ ဘယ်လို ဖြစ်ရတာလဲ ကျန်းချဲ့က ဘယ်လိုလုပ်ပြီး ဒီလို ဖြစ်နေရတာလဲ"

ချီထျန်းဟယ် လုံးဝ မထိန်းချုပ်နိုင်တော့ဘဲ အော်ဟစ်လိုက်လေသည်။

ချီကျန်းနန်၏ မျက်မှောင်များလည်း အလွန် တင်းတင်းကျုံ့သွားပြီး လုံးဝ နားမလည်နိုင်သော အမူအရာဖြင့် တွေးတောနေမိလေသည်။

"ခင်ဗျားတို့ ဘယ်လိုထင်လဲ အရင်တုန်းက သိုင်းလျှို့ဝှက်နယ်မြေထဲမှာ ကံကြမ္မာ အရင်းအမြစ်တွေရဲ့ လွှမ်းခြုံခြင်းကို ခံခဲ့ရလို့များ ဒီလို အခြေအနေမျိုး ဖြစ်လာတာလား"

ချီထျန်းကျုံးက အချိန်အနည်းငယ်မျှ စဉ်းစားပြီးနောက် ရုတ်တရက် မေးလိုက်လေသည်။

"ကံကြမ္မာ အရင်းအမြစ်တွေရဲ့ လွှမ်းခြုံခြင်း..."

"သိုင်းလျှို့ဝှက်နယ်မြေရဲ့ နံပါတ်တစ်..."

ချီကျန်းနန်က အသက်ပြင်းပြင်း တစ်ချက် ရှူသွင်းလိုက်ပြီး မျက်လုံးများ အလွန် တောက်ပလာလေသည်။

"ခရမ်းရောင် အလင်းတန်းတွေ ကောင်းကင်ကနေ ကျဆင်းလာတာ ဒါ ဒါ နောက်နေတာလား"

ချီရွှယ်မိစ္ဆာသခင် နေရာတွင်ပင် မှင်သက်သွားပြီး မျက်နှာပေါ်တွင် လုံးဝ မယုံကြည်နိုင်သော အမူအရာများ အပြည့်အဝ ပေါ်လွင်နေလေသည်။

နိမိတ်လက္ခဏာ သုံးခုက သိုင်းသူတော်စင် ဖြစ်လာမည့် အရည်အချင်းဆိုရင် နိမိတ်လက္ခဏာ လေးခုကရော ဘာဖြစ်မလဲ။

ဘာကြောင့်မှန်း မသိသော်လည်း မျက်စိရှေ့ရှိ အရာအားလုံးမှာ အတုအယောင်များ ဖြစ်ပြီး လုံးဝ အစစ်အမှန် မဟုတ်ဘူးဟု သူ အမြဲတမ်း ခံစားနေရလေသည်။

ချီမိသားစု၏ နေရာတစ်နေရာတွင် လေဟာနယ် လှိုင်းဂယက် ထသွားလေသည်။

ခရမ်းရောင် ဝတ်ရုံကို ဝတ်ဆင်ထားသော လူငယ်တစ်ယောက် ဖြည်းညင်းစွာ ကိုယ်ရောင်ပြလာလေသည်။ တစ်ကိုယ်လုံးတွင် ထူးဆန်းသော အလင်းတန်းများ လွှမ်းခြုံနေသဖြင့် မျက်နှာကို လုံးဝ ရှင်းလင်းစွာ မမြင်ရချေ။ တစ်ကိုယ်လုံးမှာ ကောင်းကင်နှင့် မြေကြီးနှင့် အပြည့်အဝ ပေါင်းစပ်နေသည့်အလား ပင်ဖြစ်သည်။

လက်နှစ်ဖက်ကို နောက်ပစ်ကာ လေဟာနယ်ထက်တွင် ရပ်နေပြီး အရှေ့ဘက်တွင် ထွက်ပေါ်နေသော နိမိတ်လက္ခဏာ လေးခုကို စူးစိုက်ကြည့်နေလေသည်။

အသက်ရှူ အကြိမ်ရေ အနည်းငယ်ခန့် တိတ်ဆိတ်ငြိမ်သက် နေပြီးနောက်မှသာ လှည့်ထွက်သွားလေတော့သည်။

သူသည်လည်း ကျန်းချဲ့၏ အဆင့်တက်လှမ်းမှုကို စောင့်ကြည့်နေခဲ့သူ တစ်ယောက် ပင်ဖြစ်သည်။ အစပိုင်းက ထွက်ပေါ်လာသော နိမိတ်လက္ခဏာ အချို့က သူ့ကို ကိုယ်ရောင်ပြလာအောင် ဆွဲဆောင်နိုင်စွမ်း မရှိခဲ့သော်လည်း စတုတ္ထ နိမိတ်လက္ခဏာ ထွက်ပေါ်လာချိန်တွင်တော့ သူ လုံးဝ မနေနိုင်တော့ချေ။

ကိုယ်တိုင်ကိုယ်ကျ ထွက်လာပြီး တစ်ချက် ကြည့်ရှုရမည်သာ ဖြစ်လေသည်။

"ဒါဆိုရင်တော့ ဒီရှင်းပြချက် တစ်ခုပဲ ရှိတော့မယ် ထင်တယ် မဟုတ်ရင် နိမိတ်လက္ခဏာ လေးခုဆိုတာ လုံးဝ မဖြစ်နိုင်ဘူး ဒါပေမဲ့ ဒီခရမ်းရောင် အလင်းတန်းတွေ ကောင်းကင်ကနေ ကျဆင်းလာတာက ဘယ်လို အစွမ်းမျိုး ရှိလဲဆိုတာတော့ မသိဘူး"

ချီထျန်းဟယ်က အကြီးအကဲချုပ်၏ အမြင်ကို သဘောတူလိုက်လေသည်။

"ဒီခရမ်းရောင် အလင်းတန်းတွေက နည်းနည်းလေး မှုန်ဝါးနေသလိုပဲ တခြား နိမိတ်လက္ခဏာ သုံးခုလောက် အစစ်အမှန် မဆန်ဘူး"

ချီမိသားစု၏ မဟာသိုင်းသခင်ကြီး တစ်ယောက်က အချိန်အနည်းငယ်မျှ စူးစိုက်ကြည့်ပြီးနောက် ရုတ်တရက် ဝင်ရောက် ပြောဆိုလိုက်လေသည်။

သူ၏ စကားကို ကြားလိုက်ရသောအခါ လူတိုင်း၏ အကြည့်များက ခရမ်းရောင် အလင်းတန်းများ ဆီသို့ ရောက်ရှိသွားကြပြီး သေချာစွာ ကြည့်ရှုလိုက်သောအခါ သူ ပြောသည့်အတိုင်းပင် အနည်းငယ် မှုန်ဝါးဝါး ဖြစ်နေကြောင်းကို တွေ့လိုက်ရလေသည်။ တဖြည်းဖြည်းနှင့် ပျောက်ကွယ်သွားတော့မည့်အလား ပင်ဖြစ်သည်။

အခြား နိမိတ်လက္ခဏာ သုံးခုကဲ့သို့ တကယ့် အစစ်အမှန် လုံးဝ မဟုတ်ချေ။

"ဒီလိုဆိုရင်တောင်မှ အလင်းတန်းလေးခု ပေါင်းစပ်ပြီး နတ်ဘုရားဖြစ်လာတယ် ဆိုတာ သာမန်လူ လုံးဝ မဟုတ်ဘူး ကျန်းချဲ့သာ အဆင့်တက်လှမ်း ပြီးသွားရင် ဒီလောက် ကြီးမားတဲ့ အခြေခံအုတ်မြစ်ကြောင့် သူ့ရဲ့ စွမ်းအားတွေလည်း အဆပေါင်းများစွာ တိုးတက်လာမှာ အသေအချာပဲ"

ချီထျန်းကျုံးက တိုးညှင်းစွာ ပြောလိုက်လေသည်။

"ပင်လယ်ပြင်ထက်က လမင်းကြီး ဒုက္ခပင်လယ်ထဲက ရွှေရောင်ကြာပန်း ယင်နဲ့ယန် နဂါးစစ်စစ်အဖြစ် ပြောင်းလဲသွားတာ ခရမ်းရောင် အလင်းတန်းတွေ ကောင်းကင်ကနေ ကျဆင်းလာတာ တကယ်ကို ထင်မထားခဲ့ဘူး ငါလည်း ဒီမြင်ကွင်းကို ကိုယ်တိုင် မျက်မြင်ကိုယ်တွေ့ ကြုံရမယ့်နေ့ ရှိလာလိမ့်မယ်လို့ တကယ်ကို ဒီတစ်ခေါက် ခရီးစဉ်က လုံးဝ အလဟဿ မဖြစ်ခဲ့ဘူးပဲ"

မဟာသိုင်းသခင်ကြီး တစ်ယောက်က အလွန်အမင်း သက်ပြင်းချလိုက်လေသည်။ သူသည် မူလက ချီမိသားစု၏ အကျိုးအမြတ်များကို အခြားဒေသတွင် သွားရောက် စောင့်ရှောက်နေရသူ ဖြစ်ပြီး ချီမိသားစု၏ မင်္ဂလာပွဲ ကြောင့်သာ ဤနေရာသို့ ပြန်လာခဲ့ခြင်း ဖြစ်လေသည်။ ဤကိစ္စနှင့် ပတ်သက်၍ သူ၏ ရင်ထဲတွင် မကျေမနပ် မှုများ မရှိခဲ့သော်လည်း

မည်သည့် ဝမ်းသာပျော်ရွှင်မှု မျှလည်း မရှိခဲ့ချေ။ သို့သော် ယခုအခါတွင်တော့ သူ အလွန် ဝမ်းသာနေမိလေပြီ။

"ကျန်းချဲ့ ယွမ်ယင်းတည်ဆောက် ပြီးသွားရင် ငါ့ရဲ့ မိသားစုခေါင်းဆောင် အမိန့်နဲ့ ဒီနေ့ ချီမိသားစုဝင်တွေ အားလုံး စိတ်နှလုံးမိစ္ဆာ သွေးသစ္စာ ဆိုရမယ် ကျန်းချဲ့ရဲ့ နိမိတ်လက္ခဏာ လေးခုနဲ့ ယွမ်ယင်းတည်ဆောက်တဲ့ ကိစ္စကို လုံးဝ သတင်းမပေါက်ကြားစေရဘူး"

"ငါ ကိုယ်တိုင်လည်း သစ္စာဆိုမယ်"

ချီကျန်းနန်က ရုတ်တရက် အလွန် တည်ကြည်လေးနက်သော လေသံဖြင့် အမိန့်ပေးလိုက်လေသည်။

ချီထျန်းကျုံးနှင့် အခြားသူများလည်း ခေါင်းညိတ်ကာ သဘောတူလိုက်ကြလေသည်။ အဘယ်ကြောင့်ဆိုသော် ဤကဲ့သို့သော နိမိတ်လက္ခဏာများသည် အလွန်အမင်း ကြောက်စရာ ကောင်းလွန်းသဖြင့် သတင်းပေါက်ကြားသွားပါက မလိုအပ်သော ပြဿနာများကို ဖိတ်ခေါ်ရာ ရောက်မည်ဖြစ်ပြီး ကျန်းချဲ့၏ တိုးတက်မှုများကိုပင် အဟန့်အတား ဖြစ်လာနိုင်ချေ ရှိသောကြောင့် ပင်ဖြစ်သည်။

"ဒါ ဒါဆိုရင် အပြင်ဘက်ကို ဘယ်လို သတင်းလွှင့်ရမလဲ"

"ကျန်းချဲ့က နိမိတ်လက္ခဏာ နှစ်ခုနဲ့ ယွမ်ယင်းတည်ဆောက်ခဲ့တယ်လို့ပဲ ပြောလိုက် ပြီးတော့ မိသားစု အတွင်းက တပည့်တွေကိုလည်း ဒီသတင်းပဲ ပြောခိုင်းလိုက် နောက်က နိမိတ်လက္ခဏာ နှစ်ခုက ကျန်းချဲ့ရဲ့ ထူးဆန်းတဲ့ ရတနာကနေ ထွက်လာတာလို့ပဲ ပြောလိုက်"

"ဘာပဲဖြစ်ဖြစ် ဒီကိစ္စကို လုံးဝ သတင်းပေါက်ကြားခွင့် မပေးနိုင်ဘူး"

ချီကျန်းနန်က အလွန် တည်ကြည်လေးနက်စွာဖြင့် ပြန်ဖြေလိုက်လေသည်။

နိမိတ်လက္ခဏာ နှစ်ခုဖြင့် ယွမ်ယင်းတည်ဆောက်ခြင်းသည်လည်း အလွန် အံ့အားသင့်စရာ ကောင်းသော်လည်း ကျန်းချဲ့တွင် သိုင်းသူတော်စင် ဖြစ်လာမည့် အရည်အချင်းများ ရှိနေကြောင်း လူတိုင်း သိရှိထားပြီး ဖြစ်ရာ သတင်းပျံ့နှံ့သွားလျှင်တောင်မှ အလွန်အမင်း ကြီးမားသော လှိုင်းဂယက်ကြီးကို ဖြစ်ပေါ်စေမည် မဟုတ်ချေ။

"ကျုပ် နားလည်ပါပြီ"

ချီထျန်းဟယ် လည်း ဤကိစ္စ၏ အရေးကြီးပုံကို ကောင်းစွာ နားလည်သဘောပေါက် သဖြင့် ချက်ချင်းပင် ခေါင်းညိတ်လိုက်လေသည်။

လေဟာနယ်ထက်တွင်။

စတုတ္ထ နိမိတ်လက္ခဏာ ထွက်ပေါ်လာပြီးနောက် ရွှေရောင်ကြာပန်း၏ အတွင်းတွင် ရှိနေသော ရွှေအမြုတေလည်း ယခုအချိန်တွင် ၎င်း၏ ကန့်သတ်ချက်သို့ အပြည့်အဝ ရောက်ရှိသွားခဲ့လေပြီ။ အက်ကွဲကြောင်းများက ပိုမို ထင်ရှားလာပြီး အက်ကွဲကြောင်းများ ကြားမှ ကလေးငယ်၏ လက်လေးတစ်ဖက် ဖြည်းညင်းစွာ ထွက်ပေါ်လာသည် ကိုပင် မြင်တွေ့နေရလေသည်။

"ဝုန်း"

လေဟာနယ်ထက်တွင် အလွန် ကြီးမားသော ပေါက်ကွဲသံကြီး တစ်ခု ပဲ့တင်ထပ်သွားလေသည်။

မျက်တောင်တစ်ခတ် အတွင်း နတ်ဘုရား အလင်းတန်းများ လောကကို လင်းထိန်သွားစေခဲ့လေသည်။

ကျန်းချဲ့နှင့် အလွန် တူညီသော ကလေးငယ်တစ်ယောက် ရွှေအမြုတေထဲမှ တိုက်ရိုက် ထွက်ပေါ်လာပြီး ပတ်ဝန်းကျင်တွင် ပျက်စီးနေသော ရွှေအမြုတေ အပိုင်းအစများ အားလုံး ထိုကလေးငယ်ထံသို့ ရူးသွပ်ကြမ်းတမ်းစွာ စုဝေးသွားကြလေသည်။ မျက်တောင်တစ်ခတ် အတွင်းမှာပင် ထိုကလေးငယ်သည် တစ်လက်မခန့် အရပ် ပိုရှည်လာလေသည်။

အရှိန်အဝါများကလည်း ပို၍ပင် ကြောက်စရာ ကောင်းလာလေသည်။

ထို့နောက်။

နှစ်လက်မ အရွယ် ယွမ်ယင်းလေးက လက်နှစ်ဖက်ကို ဆန့်တန်းလိုက်ပြီး ခရမ်းရောင် အလင်းတန်းများကို တစ်စက်မကျန် အပြည့်အဝ မျိုချပစ်လိုက်လေသည်။ ယင်နှင့်ယန် မီးနဂါးကြီး နှစ်ကောင်ကလည်း ဟိန်းဟောက်သံကြီး တစ်ချက်နှင့်အတူ ယွမ်ယင်း၏ ခန္ဓာကိုယ်ထဲသို့ ရုတ်တရက် ဝင်ရောက်သွားကြပြီး ပေတစ်ရာခန့် ကြီးမားသော ရွှေရောင်ကြာပန်းကြီးကလည်း ရွှေရောင် အလင်းတန်းလေးများ အဖြစ် ပြောင်းလဲသွားကာ လေဟာနယ် တစ်ခုလုံးကို လွှမ်းခြုံသွားလေသည်။

အဆုံးအစမရှိသော ကောင်းကင်နှင့် မြေကြီး၏ မူလစွမ်းအင်များလည်း ကျန်းချဲ့၏ ယွမ်ယင်းမှနေ၍ အပြည့်အဝ စုပ်ယူခြင်းကို ခံလိုက်ရလေသည်။

နောက်ဆုံးတွင်တော့ ပင်လယ်ပြင်ထက်မှ လမင်းကြီး။

ထိုလမင်းကြီးက ကျန်းချဲ့၏ ယွမ်ယင်းနှင့် တဖြည်းဖြည်း ပေါင်းစပ်သွားပြီး ပတ်ဝန်းကျင်တွင် ရှိနေသော မှုန်ဝါးဝါး ပင်လယ်ပြင်ကြီးလည်း ကောင်းကင်နှင့် မြေကြီးအကြားတွင် အလျင်အမြန် ပျောက်ကွယ်သွားခဲ့လေသည်။ မျက်တောင်တစ်ခတ် အတွင်းမှာပင် နိမိတ်လက္ခဏာ လေးခုစလုံး လုံးဝ ပျောက်ကွယ်သွားခဲ့လေပြီ။

ကျန်းချဲ့၏ နှစ်လက်မ အရွယ် ယွမ်ယင်းလေး၏ ခန္ဓာကိုယ်က ပိုမို ထင်ရှားလာပြီးနောက် ကျန်းချဲ့ကို တစ်ချက် လှမ်းကြည့်လိုက်ရာ သူ့ကို အချင်းချင်း စိတ်ချင်းဆက်သွယ်နေသည့် ခံစားချက်မျိုးကို ရရှိစေခဲ့လေသည်။

သို့သော် ယခုအချိန်ထိ ပတ်ဝန်းကျင်ရှိ မူလစွမ်းအင် လေဆင်နှာမောင်းကြီးကတော့ လုံးဝ ပျောက်ကွယ်သွားခြင်း မရှိသေးချေ။

နှစ်လက်မ အရွယ် ယွမ်ယင်းလေး ချက်ချင်းပင် တင်ပျဉ်ခွေ ထိုင်လိုက်လေသည်။

လက်နှစ်ဖက်ဖြင့် အစီအရင်များကို အဆက်မပြတ် ပြောင်းလဲလိုက်ရာ တစ်ကိုယ်လုံးမှ နတ်ဘုရား အလင်းတန်းများ လျှံကျနေလေသည်။

မျက်တောင်တစ်ခတ် အတွင်းမှာပင် အဆုံးအစမရှိသော တွင်းနက်ကြီး တစ်ခုအလား ကောင်းကင်နှင့် မြေကြီးအကြားရှိ မူလစွမ်းအင်များ အားလုံးကို တစ်စက်မကျန် အပြည့်အဝ မျိုချပစ်လိုက်ပြီး မိမိ၏ အာဟာရ အဖြစ်သို့ ပြောင်းလဲပစ်လိုက်လေသည်။ တစ်ချိန်တည်းမှာပင် အလွန် အစွမ်းထက်သော အခြေခံအုတ်မြစ်နှင့် မရေမတွက်နိုင်သော မူလစွမ်းအင်များ၏ အကူအညီဖြင့်။

ကျန်းချဲ့၏ ယွမ်ယင်းက နောက်ထပ် တစ်လက်မ ထပ်မံ ကြီးထွားလာပြန်လေသည်။

သုံးလက်မ အရွယ်အထိ တိုက်ရိုက် ရောက်ရှိသွားခဲ့လေပြီ။

"ပထမဆုံး ယွမ်ယင်းတည်ဆောက်တဲ့ အချိန်မှာတင် သုံးလက်မ အရွယ်ကို ရောက်သွားတယ် ကျန်းချဲ့က တကယ်ကို အလင်းတန်းလေးခု ပေါင်းစပ်တဲ့ နတ်ဘုရားနဲ့ တန်ပါတယ်"

ချီထျန်းကျုံးက ပါးစပ်အဟောင်းသားဖြင့် အလွန်အမင်း အံ့အားသင့်နေသော အမူအရာဖြင့် ပြောလိုက်လေသည်။

အခြားသူများလည်း အားလုံး ဤအတိုင်းပင် ဖြစ်ကြလေသည်။

အဘယ်ကြောင့်ဆိုသော် ယွမ်ယင်း၏ အရွယ်အစားသည် ရှန်ရှန်းအဆင့်တွင် သိုင်းပညာရှင်တစ်ယောက်၏ စွမ်းအားကို တိုက်ရိုက် ကိုယ်စားပြုနေသောကြောင့် ပင်ဖြစ်သည်။

ယွမ်ယင်း သုံးလက်မ ဆိုလျှင် ရှန်ရှန်း အစောပိုင်းအဆင့်၏ အထွတ်အထိပ်။

ယွမ်ယင်း ခြောက်လက်မ ဆိုလျှင် ရှန်ရှန်း အလယ်အလတ်အဆင့်၏ အထွတ်အထိပ်။

ယွမ်ယင်း ကိုးလက်မ ဆိုလျှင် ရှန်ရှန်း နောက်ပိုင်းအဆင့်၏ အထွတ်အထိပ်။

"ဟူး..."

ချီကျန်းနန်လည်း သက်ပြင်းကြီး တစ်ချက်ကို ချလိုက်လေသည်။

အဘယ်ကြောင့်ဆိုသော် ယခုအချိန်တွင် သူ ဘာစကားမှ ဆက်မပြောတတ်အောင် ဖြစ်နေသောကြောင့် ပင်ဖြစ်သည်။

အကြီးအကဲချုပ်၏ အနောက်မှနေ၍ ထပ်မံ ချီးကျူးရန် ဆိုသည်မှာလည်း သူ၏ စရိုက်မျိုး လုံးဝ မဟုတ်ချေ။

သို့သော် ရင်ထဲရှိ အံ့အားသင့်မှုများကတော့ အနည်းငယ်လေးမျှပင် လျော့ကျသွားခြင်း မရှိချေ။

ကျန်းချဲ့၏ အခြေခံအုတ်မြစ်က အလွန် ကြောက်စရာ ကောင်းလွန်းပြီး သူ၏ ဘဝတစ်လျှောက်လုံးတွင် ပထမဆုံးအကြိမ် မြင်တွေ့ဖူးခြင်း ပင်ဖြစ်သည်။

ရှန်ရှန်းအဆင့်သို့ စတင် တက်လှမ်းသည်နှင့် တစ်ပြိုင်နက် အစောပိုင်းအဆင့်၏ အထွတ်အထိပ်သို့ တိုက်ရိုက် ရောက်ရှိသွားခဲ့လေပြီ။

"ချီး အရမ်း လွန်လွန်းနေပြီကွာ"

ချီရွှယ်မိစ္ဆာသခင်က တိုးညှင်းစွာ ကျိန်ဆဲလိုက်ပြီး ယခုအချိန်တွင် သူ၏ ရင်ထဲ၌ ဤစကားတစ်ခွန်းသာ ရှိတော့လေသည်။

လွန်လွန်းတယ် အရမ်း လွန်လွန်းနေပြီ။

ယွမ်ယင်း စတင်တည်ဆောက်သည်နှင့် တစ်ပြိုင်နက် သုံးလက်မ အရွယ်အထိ ကြီးထွားလာသော သိုင်းပညာရှင်မျိုးကို သူ ပထမဆုံးအကြိမ် မြင်တွေ့ဖူးခြင်း ပင်ဖြစ်သည်။

တကယ်ကို အံ့အားသင့်စရာ ကောင်းလွန်းလှပေသည်။

"ဒီကောင်လေး ဘာတွေများ စားပြီး ကြီးလာတာလဲ မသိဘူး မကြာခင်မှာ ငါ့ကိုတောင် မီတော့မယ် ထင်တယ်"

ချီရွှယ်မိစ္ဆာသခင်က ခေါင်းရမ်းလိုက်ပြီး ယခုအချိန်တွင် ဆက်လက် မကြည့်လိုတော့ဘဲ သွေးရောင် အလင်းတန်းတစ်ခုအဖြစ် ပြောင်းလဲသွားကာ ကပ်ဆိုးတစ်သောင်း မိစ္ဆာဓား အတွင်းသို့ တိုက်ရိုက် ဝင်ရောက် ပျောက်ကွယ်သွားလေတော့သည်။

သူ၏ စိတ်များကို အနည်းငယ် တည်ငြိမ်အောင် ပြန်လည် ထိန်းချုပ်ရမည် ဖြစ်လေသည်။ မဟုတ်ပါက နောက်တစ်ကြိမ် ကျန်းချဲ့နှင့် တွေ့ဆုံသည့်အခါ သူ၏ အံ့အားသင့်နေသော အမူအရာများကို မတော်တဆ ပြသမိသွားပြီး ကျန်းချဲ့ကို ပိုမို မာနထောင်လွှားသွားစေမည်ကို သူ အလွန် စိုးရိမ်နေမိလေသည်။

"အစ်မ ခဲအို အောင်မြင်သွားပြီ အောင်မြင်သွားပြီ"

ချီနင်ပင်းသည် ယခုအချိန်တွင် အလွန် ဝမ်းသာနေပြီး မျက်နှာပေါ်တွင် အပျော်တွေ အပြည့်အဝ ပေါ်လွင်နေလေသည်။

ယခင်က ကျန်းချဲ့ ပြောခဲ့သော စကားကို သူမ ကောင်းစွာ မှတ်မိနေလေသည်။

ရှန်ရှန်းအဆင့်သို့ တက်လှမ်းပြီးသည်နှင့် ဖခင်ဖြစ်သူနှင့် ပွင့်ပွင့်လင်းလင်း သွားရောက် ပြောဆိုမည်ဟူသော စကား ပင်ဖြစ်သည်။

ဤသည်မှာ သူမအတွက် အလွန် အရေးကြီးလှပေသည်။

"အင်း ငါ မြင်တယ် မြင်တယ်"

ချီဝမ်ကျင်းက ချီနင်ပင်းကို ဖက်ထားပြီး အလွန် လေးနက်စွာဖြင့် ခေါင်းညိတ်လိုက်လေသည်။

လေဟာနယ်ထက်တွင် အဆုံးအစမရှိသော အနက်ရောင် တိမ်တိုက်ကြီးများ ပျောက်ကွယ်သွားပြီး မူလစွမ်းအင် လေဆင်နှာမောင်းကြီးလည်း လုံးဝ ပျောက်ကွယ်သွားကာ လောကကြီး တစ်ခုလုံး ပြန်လည် တိတ်ဆိတ်ငြိမ်သက် သွားခဲ့လေပြီ။

ကျန်းချဲ့က ခေါင်းမော့ကာ ယွမ်ယင်းနှင့် အချင်းချင်း တစ်ချက် ကြည့်လိုက်ပြီးနောက် အသက်ရှူ အကြိမ်ရေ အနည်းငယ် အကြာတွင် သုံးလက်မ အရွယ် ယွမ်ယင်းလေးက လေဟာနယ်ထက်တွင် အလင်းတန်းတစ်ခုအဖြစ် ပြောင်းလဲသွားပြီး။

ကျန်းချဲ့၏ မျက်ခုံးနှစ်ခု ကြားရှိ နတ်ဘုရား သင်္ကေတ အတွင်းသို့ တိုက်ရိုက် ဝင်ရောက်သွားလေတော့သည်။

ယွမ်ယင်းတည်ဆောက် ပြီးစီးသည်နှင့် ချက်ချင်းပင် ဒန်ထျန်းကို စွန့်ခွာ၍ နတ်ဘုရား သင်္ကေတတွင် နေရာယူရမည် ဖြစ်လေသည်။

"ဝုန်း"

ဦးနှောက်အတွင်းတွင် အလွန် ကျယ်လောင်သော ပေါက်ကွဲသံကြီး တစ်ခု ပဲ့တင်ထပ်သွားပြီး မူလက သိပ်မကြီးမားသော နတ်ဘုရား သင်္ကေတမှာ အလွန် လျင်မြန်စွာ ကျယ်ပြန့်လာလေသည်။ တစ်ချိန်တည်းမှာပင် သူ၏ ဝိညာဉ်အာရုံကလည်း အလွန် လျင်မြန်စွာ တိုးတက်လာပြီး ထိုအရာများအပြင် ကျန်းချဲ့၏ ကိုယ်ပေါ်မှ အရှိန်အဝါများကလည်း တစ်ဆင့်ပြီးတစ်ဆင့် အဆက်မပြတ် မြင့်တက်လာလေသည်။

ယွမ်ယင်း အစောပိုင်းအဆင့်၏ အထွတ်အထိပ်သို့ ရောက်ရှိသွားမှသာ လုံးဝ ရပ်တန့်သွားခဲ့လေတော့သည်။