အခန်း ၁၈၇

အပိုင်း(၁၈၇) မှော်ဆေးတောင့်

ယနေ့ ဖြစ်ပျက်ခဲ့သော ကိစ္စရပ်များက အလွန် များပြားလွန်းလှသည်။

ယခုအချိန်တွင် ချန်းရီက အိပ်ချင်မူးတူး ဖြစ်နေပြီ ဖြစ်သည်။

လမ်းစဉ် အစွမ်းပိုင်ရှင် တစ်ယောက် ဖြစ်လာသောကြောင့် ခန္ဓာကိုယ် ကြံ့ခိုင်မှုက သာမန်လူများထက် များစွာ ပိုမို အားကောင်းလာသော်လည်း စွမ်းအင်ကုန်ဆုံးမှုကလည်း သာမန်လူများထက် များစွာ ပိုများလှသည်။

ညာဘက်မျက်လုံးကို ဖယ်ရှားခံလိုက်ရသည့် အချက်ကလည်း ပေါင်းစပ်သွားသောကြောင့် ယနေ့တွင် ချန်းရီက အလွန်ပင် ပင်ပန်းနွမ်းနယ်နေခဲ့သည်။

ထို့ပြင် ယခင်က မြူခိုးကျွန်များနှင့် ရင်ဆိုင်ပြီး တပ်သားများ များစွာ ထုတ်လုပ်တိုက်ခိုက်ခဲ့ရသေးသည်။

တဝူမြို့တွင်း၌ ခေါက်တုံ့ခေါက်ပြန် ကားပတ်မောင်းနေခဲ့ရသည်လည်း ပါဝင်ပေသည်။

ချန်းရီက ပင်ပန်းနွမ်းနယ်မှု၏ အမြင့်ဆုံးအမှတ်သို့ ရောက်ရှိနေခဲ့ပြီ ဖြစ်သည်။

သို့သော် ကမ္ဘာပျက်ကပ်ကြီးက ခေါင်းပေါ်တွင် ဆွဲထားသော ဓားတစ်လက်ကဲ့သို့ပင်၊ ဆက်လက် အသက်ရှင်နိုင်ရန်အတွက် ပို၍ ကြိုးစားအားထုတ်ရမည်ဆိုသည်ကို ချန်းရီအား အချိန်တိုင်း သတိပေးနေခဲ့သည်။

သတ်ဖြတ်မှတ် ခြောက်သောင်းက စနစ်၏ လက်ကျန်စာရင်းထဲတွင် အသင့်ရှိနေသည်။

ထို့ပြင် စနစ်၏ တာဝန်ကလည်း လစ်လပ်နေသော အခြေအနေတွင် ရှိနေသည်။

ယခုအချိန်တွင် အသုံးမချပါက လုံးဝ အလဟဿ ဖြစ်သွားပေလိမ့်မည်။

သတ်ဖြတ်မှတ် တစ်မှတ်ကိုပင် နှစ်ပိုင်းခွဲ၍ သုံးတတ်သော ကပ်စေးနှဲ ချန်းရီအတွက်မူ ယင်းက လုံးဝ ခွင့်လွှတ်၍ မရနိုင်သော ကိစ္စပင် ဖြစ်သည်။

စိတ်ကို အတင်းအကျပ် လန်းဆန်းစေလိုက်သည်။

ချန်းရီက သတ်ဖြတ်မှတ် ခြောက်သောင်းကို မည်သို့ အကျိုးရှိဆုံး အသုံးချမည်နည်း ဆိုသည်ကို စတင် စီစဉ်တော့သည်။

လောလောဆယ်တွင် ကမ္ဘာပျက်ကပ် ပစ်ကပ်ကားကို မိစ္ဆာပစ်ကပ်ကား အဖြစ် အဆင့်မြှင့်တင်ရန်က သိသာထင်ရှားစွာပင် လက်တွေ့မကျသေးပေ။

သတ်ဖြတ်မှတ် နှစ်သိန်းဆိုသည်က အချိန်တိုအတွင်း၌ လုံးဝ မဖြစ်နိုင်သော ကိစ္စဖြစ်သည်။

ယခင်က စနစ်ထံမှ ချေးထားသော အကြွေးကိုပင် ပြန်မဆပ်ရသေးပေ။

စနစ်က အကြွေးဆပ်ရန် အသိပေးချက်များ အကြိမ်ကြိမ် ပေးပို့ခဲ့သော်လည်း ချန်းရီကမူ မမြင်ယောင်သာ ဆောင်နေခဲ့သည်။

စနစ်၏ တစ်ခုတည်းသော ကောင်းကျိုးက အကြွေးကို အတင်းအကျပ် မတောင်းသည့်အပြင် ပိုင်ရှင်၏ အကောင့်လက်ကျန်ထဲမှ အလိုအလျောက် ဖြတ်တောက်ခြင်းမျိုး မလုပ်ခြင်းပင် ဖြစ်သည်။

ဤအချက်အတွက်မူ ချန်းရီက အမှတ်ကောင်းကောင်း ပေးရမည် ဖြစ်သည်။

သေချာသည်ကတော့ ဤအချက်ကပင် ချန်းရီကဲ့သို့ အကြွေးမဆပ်ချင်သော လူလည်များကို မွေးဖွားပေးလိုက်ခြင်းပင် ဖြစ်သည်။

အသက်ရှင်သန်နိုင်ရန်အတွက် ဤကဲ့သို့သော နာမည်ဆိုးလေးကိုမူ အရေးစိုက်မနေတော့ပေ။

လောလောဆယ်တွင် အဆင့်မြှင့်တင်ရန် လမ်းကြောင်း နှစ်ခု ရှိသည်။

တစ်ခုကမူ ကမ္ဘာပျက်ကပ် ပစ်ကပ်ကားကို ဆက်လက် အဆင့်မြှင့်တင်ရန် ဖြစ်သည်။

ကမ္ဘာပျက်ကပ် ပစ်ကပ်ကားကို အဆင့်မြှင့်တင်ခြင်းက သာမန် ယာဉ်တစ်စီးကဲ့သို့ ရိုးရှင်းသော ကိစ္စ မဟုတ်တော့ပေ။

ကမ္ဘာပျက်ကပ် ပစ်ကပ်ကားကို အဆင့်မြှင့်လိုက်ပါက ကိုယ်တိုင်၏ ရှင်သန်နိုင်စွမ်းကလည်း များစွာ တိုးတက်လာမည် ဖြစ်သည်။

ယခင်က ရုံမြို့၌ ရှိစဉ်က ၎င်းကို သက်သေပြခဲ့ပြီး ဖြစ်သည်။

ထို့ပြင် ကမ္ဘာပျက်ကပ် ပစ်ကပ်ကားက စောစောကတည်းက စုတ်ပြတ်သတ်နေခဲ့ပြီ ဖြစ်ပြီး ကြည့်ရသည်မှာ စက်ရုံဟောင်းမှ မောင်းထွက်လာသော ပုံစံမျိုး ပေါက်နေသည်။

ခေါင်းဆောင်ချူ၏ အဆင့်မြှင့်တင်ထားသော လမ်းကြမ်းမောင်းကားကလည်း အနည်းငယ် စုတ်ပြတ်နေသော်လည်း ချန်းရီကားနှင့် ယှဉ်လိုက်ပါက မိုးနှင့် မြေကဲ့သို့ ကွာခြားလှသည်။

ကမ္ဘာပျက်ကပ် ပစ်ကပ်ကား၏ ကိုယ်ထည်တွင် အကောင်းပကတိ ကျန်နေသော ဆေးသားဆို၍ တစ်နေရာမျှ မရှိတော့ပေ။

ထို့ပြင် ဆီတိုင်ကီကိုလည်း အဆင့်မြှင့်တင် ပြင်ဆင်ခြင်းက အကောင်းဆုံး ဖြစ်ပေလိမ့်မည်။

လောလောဆယ် ဆယ့်ခြောက်ဂါလန်ခန့်ဆံ့သော ဆီတိုင်ကီက တကယ်ကို မလုံလောက်တော့ပေ။

ထို့နောက် အရိပ်ဆွဲယူခြင်း၏ သံကြိုးကလည်း မရဏနတ်သမီး၏ ဆွဲဖြတ်ခြင်းကို ခံလိုက်ရသောကြောင့် ဤအစွမ်းအပေါ်တွင်လည်း များစွာ ထိခိုက်မှု ရှိသွားသည်။

ဆီတိုင်ကီက အဓိက ပြဿနာ မဟုတ်သော်လည်း ယခုအချိန်တွင် သတ်ဖြတ်မှတ် ခြောက်သောင်း ရှိနေသောကြောင့် ကြိုတင် ဖြေရှင်းလိုက်ခြင်းက အကောင်းဆုံး ဖြစ်ပေလိမ့်မည်။

နောက်တစ်ခုကမူ ကား၏ အင်ဂျင် ပြဿနာပင် ဖြစ်သည်။

၂.၀ ၏ စွမ်းအားက အနည်းငယ် အားနည်းနေသေးသည်။

သာမန် မောင်းနှင်ရန်အတွက် ပြဿနာ မရှိသော်လည်း ယခုက ကမ္ဘာပျက်ကပ် ဖြစ်နေသည်။

မှန်းဆ၍ မရနိုင်သော အခြေအနေများစွာက အချိန်မရွေး ဖြစ်ပေါ်လာနိုင်ခြေ ရှိသည်။

ချန်းရီက ပစ်ကပ်ကားကို ဤမျှ ဂရုစိုက်နေခြင်းအား အပြစ်တင်၍ မရပေ။

ကမ္ဘာပျက်ကပ် ရွှေ့ပြောင်းမှုအတွင်းတွင် ယာဉ်ဆိုသည်က အစွမ်းပိုင်ရှင်တိုင်း၏ အခြေခံ အုတ်မြစ်ပင် ဖြစ်သည်။

ယာဉ်တန်း၏ အခြေခံ အုတ်မြစ်ဖြစ်သကဲ့သို့ သာမန်လူများ၏ အခြေခံ အုတ်မြစ်လည်း ဖြစ်သည်။

ထို့ပြင် ကားနောက်ခန်း ပြဿနာလည်း ရှိသေးသည်။ ရွက်ဖျင်တဲထဲတွင် အမြဲတမ်း အိပ်နေရန်ဆိုသည်က အဆင်မပြေလှပေ။

ကားနောက်ခန်း အမိုးတစ်ခု ပြုလုပ်လိုက်ခြင်းက အကောင်းဆုံး ဖြစ်ပြီး နောက်ပိုင်း၌ အမိုးအောက်တွင် အိပ်ရသည်က များစွာ ပို၍ သက်သောင့်သက်သာ ရှိပေလိမ့်မည်။

ထို့အပြင် အမိုးပါလာပါက ကိုယ်ပိုင် လျှို့ဝှက်ချက် အချို့ကိုလည်း အမိုးအောက်တွင် လွတ်လွတ်လပ်လပ် လုပ်ဆောင်နိုင်ပေလိမ့်မည်။

ရိက္ခာပစ္စည်းများ ထားရန်လည်း နေရာ ပိုများလာမည်။

လောလောဆယ်တွင် ရိက္ခာအများစုကို ချန်းရီက ယာဉ်မောင်းခန်း၏ နောက်ခုံ၌သာ တင်ထားရသည်။

နောက်ခုံ၏ သိုလှောင်နိုင်သော နေရာက ကန့်သတ်ချက် ရှိနေသည်။

ကားနောက်ခန်း နေရာလောက် များစွာ မကျယ်ဝန်းပေ။

ရိက္ခာများကို ကားနောက်ခန်းတွင် မထားရသည့် အဓိက အကြောင်းရင်းက နောက်ခန်း၌ အကာအကွယ် မရှိသောကြောင့်ပင် ဖြစ်သည်။

မည်သူမဆို မျက်လုံးတစ်ချက် ဝေ့ကြည့်လိုက်ရုံမျှဖြင့် မိမိတွင် မည်သည့်ပစ္စည်းများ ရှိနေသည်ကို မြင်နိုင်စွမ်း ရှိသည်။

ထို့ပြင် အမိုးအကာ မရှိပါက ပစ္စည်းများ ပျောက်ရှရန်လည်း အလွန် လွယ်ကူသည်။

ကိုယ်တိုင်က အစွမ်းပိုင်ရှင် ဖြစ်နေလျှင်ပင် အစားအသောက် ငတ်မွတ်၍ ရူးသွပ်နေသောသူများကို တားဆီးနိုင်ရန် ခက်ခဲပေလိမ့်မည်။

ထို့နောက် ရှေ့ဆက်သွားပါက အခြား ယာဉ်တန်းများနှင့် သေချာပေါက် ဆုံတွေ့ရဦးမည်။

ယခင်က အကြမ်းဖျင်း လုပ်ထားသော ကားအမိုးက သဲမုန်တိုင်း တိုက်ခတ်၍ လွင့်ပါသွားပြီးကတည်းက ချန်းရီက အမိုးအသစ် ပြန်မလုပ်ဖြစ်သေးပေ။

နောက်ထပ် လမ်းကြောင်းတစ်ခုကမူ မိမိကိုယ်ပိုင် စွမ်းအားကို အဆင့်မြှင့်တင်ရန် ဖြစ်သည်။

လမ်းစဉ် အဆင့် (၂) ကို အဆင့်မြှင့်တင်ပြီးနောက်တွင် ယခင်က အသက်ရှူကျင့်စဉ်က သိသိသာသာ အားနည်းသွားခဲ့သည်။

တဝူမြို့၌ သွေးရောင်လမင်းကို မမြင်ရ၍ အသက်ရှူကျင့်စဉ်ကို ကျင့်ကြံ၍ မရသော်လည်း။

ယခင်က အသက်ရှူကျင့်စဉ်က သိသိသာသာ ခေတ်နောက်ကျသွားပြီဖြစ်ကြောင်းကို ချန်းရီက ခံစားမိနေသည်။

ထင်းခုတ်ဓားမက ယခုဆိုလျှင် နံပါတ်စဉ် နှစ်ထောင် ရှိနေပြီဖြစ်ရာ အနာဂတ် အချိန်အတိုင်းအတာ တစ်ခုအထိမူ လုံလောက်နေပြီ ဖြစ်သည်။

မီးခိုးအဖြစ်သို့ ပြန်လည်ရောက်ရှိခြင်းနှင့် သုံးရက်တစ်ကိုယ်ခွဲ အစွမ်းများ ရှိနေသောကြောင့် အသက်ကယ်နိုင်စွမ်းကလည်း များစွာ တိုးတက်လာခဲ့ပြီ ဖြစ်သည်။

လမ်းစဉ် အဆင့် (၃) သို့ တက်ရန်ကမူ အချိန်တိုအတွင်း၌ မြန်မြန်ဆန်ဆန် ဖြစ်လာလိမ့်မည် မဟုတ်ဟု ခန့်မှန်းရသည်။

ချန်းရီတွင် ခံစားချက် တစ်မျိုးပင် ရှိနေသေးသည်။

လမ်းစဉ် အဆင့် (၃) က မီးခိုးတမန်တော် လမ်းစဉ်၏ ဘေးထွက် လမ်းစဉ်ခွဲကို နှိုးဆွပေးနိုင်လိမ့်မည်ဟုပင် ဖြစ်သည်။

သေချာသည်ကမူ ၎င်းက ခံစားချက် တစ်ခုသာ ဖြစ်ပြီး မည်သည့် အထောက်အထားမျှ မရှိပေ။

သဘာဝလွန် လမ်းစဉ်များက ထူးဆန်းသော အရာများကဲ့သို့ပင် မှန်းဆ၍ မရနိုင်သော မသေချာ မရေရာမှုများကို ပိုင်ဆိုင်ထားကြသည်။

ခေါင်းဆောင်ချူချယ်အား မေးကြည့်သောအခါ၌လည်း လမ်းစဉ်တော်တော်များများတွင် ကိုယ်ပိုင် လမ်းစဉ်ခွဲများ ရှိခြင်းက မထူးဆန်းကြောင်း ချူချယ်က ပြောခဲ့သည်။

တိုက်တန် လမ်းစဉ်တွင် ခေါင်းနှစ်လုံး လူ့ဘီလူးကြီးနှင့် စက္ခုဦးခေါင်းဆိုသည့် လမ်းစဉ်ခွဲများ ရှိနေသကဲ့သို့ပင် ဖြစ်သည်။

စနစ် လက်ကျန်ထဲမှ သတ်ဖြတ်မှတ် ခြောက်သောင်း...

ချန်းရီက အတွေးနက်သွားသည်။

နောက်ပိုင်း တိုးတက်မှုများအတွက်။

ဤဆုံးဖြတ်ချက်ကို အလွန် သတိထားမှ ရပေလိမ့်မည်။

အမှားတစ်ခု ဆုံးဖြတ်မိလိုက်ပါက အနာဂတ်၏ တစ်ချိန်ချိန်တွင် နာမည်မရှိသော တောင်ကုန်းငယ် တစ်ခုပေါ်၌ အသေဆိုးဖြင့် သေဆုံးသွားနိုင်ပြီး ထူးဆန်းသောအရာများ၏ အရှင်လတ်လတ် ဝါးမြိုခြင်းကို ခံရနိုင်ခြေ ရှိသည်။

ထိုကဲ့သို့သော ဇာတ်သိမ်းမျိုးကို ချန်းရီက လုံးဝ မလိုချင်ပေ။

ဟွာဇီး ဆေးလိပ်မှ ထွက်ပေါ်လာသော မီးရောင် မှိန်မှိန်လေးက ချန်းရီ၏ နှာခေါင်းနှင့် ပါးစပ် ပုံပန်းသဏ္ဌာန်ကို လင်းထိန်သွားစေသည်။

သွေးရောင် မျက်တောင်အိမ်က အမှောင်ထုထဲတွင် သွေးရောင်အလင်း သဲ့သဲ့လေး တောက်ပနေသည်။

ဟွာဇီး ဆေးလိပ် နှစ်လိပ် ကုန်သွားသော အချိန်တွင်မူ။

ချန်းရီက အံကြိတ်လိုက်ပြီး စိတ်ထဲတွင် ဆုံးဖြတ်ချက် တစ်ခုကို ချမှတ်လိုက်သည်။

မျက်စိရှေ့တွင် စနစ်၏ မျက်နှာပြင် ပေါ်လာသည်။

တစ်မိနစ် ကြာပြီးနောက်...

[အတည်ပြုပါသလား]

စနစ်ထံမှ မေးခွန်း ထွက်ပေါ်လာသည်။

ချန်းရီက အနည်းငယ်မျှ တွေဝေမနေဘဲ အတည်ပြုခြင်းကို တိုက်ရိုက် နှိပ်လိုက်သည်။

သတ်ဖြတ်မှတ် ခြောက်သောင်းထဲမှ ငါးသောင်း တိုက်ရိုက် ဖြတ်တောက်ခံလိုက်ရသည်။

စောစောကပင် မိမိကိုယ်ကိုယ် သူဌေးတစ်ယောက်ဟု ထင်မှတ်နေခဲ့သေးသည်။

ယခုမူ မျက်တောင်တစ်ခတ် အတွင်း၌ပင် သူတောင်းစား ဖြစ်သွားခဲ့ချေပြီ။

ကျန်ရှိနေသေးသော သတ်ဖြတ်မှတ် တစ်သောင်းကို ကြည့်ရင်း ချန်းရီ၏ ရင်ထဲတွင် သွေးစက်စက် ကျနေသကဲ့သို့ ခံစားလိုက်ရသည်။

၎င်းက သတ်ဖြတ်မှတ် ငါးသောင်းတောင် ဖြစ်သည်။

ဤအရာက အလွန်ပင် အသုံးအဖြုန်း ကြီးလွန်းလှသည်။

လက်ဖဝါးထဲမှ အပြာရောင် အလင်းများ တောက်ပနေသော ဆေးတောင့်ကို ကြည့်လိုက်သည်။

လမ်းစဉ်ဆေးထိုးအပ်ကဲ့သို့ နက်ရှိုင်းသော အပြာရောင် အလင်းတန်းလေး တောက်ပနေသည်။

ဆေးတောင့်ထဲတွင် အပြာရောင် အမှုန့်အချို့က လှည့်ပတ် သွားလာနေသည်။

လက်သည်းခွံ အရွယ်အစားလောက်သာ ရှိသော ဤအရာလေးက သတ်ဖြတ်မှတ် ထိုမျှ များပြားသည်နှင့် မတန်ဟု ချန်းရီက မည်သို့ ကြည့်ကြည့် ထင်မြင်နေမိသည်။

မျက်စိရှေ့မှ အရာကမူ ဒဏ္ဍာရီလာ မှော်ဆေးတောင့်ပင် ဖြစ်သည်။

လမ်းစဉ်ဆေးထိုးအပ်ထက် များစွာ ပို၍ တန်ဖိုးကြီးမားသော အရာဖြစ်သည်။

ချန်းရီက မှော်ဆေးတောင့်ကို လဲလှယ်ရန်သာ ရွေးချယ်လိုက်ခြင်း ဖြစ်သည်။

ကျန်ရှိနေသော သတ်ဖြတ်မှတ် တစ်သောင်းကိုမူ ကမ္ဘာပျက်ကပ် ပစ်ကပ်ကားကို အဆင့်မြှင့်တင် ပြင်ဆင်ရန် ချန်ထားဖို့ ရည်ရွယ်ထားသည်။

အနည်းငယ် ချွေတာသုံးလျှင်မူ လောက်ငှပေလိမ့်မည်။

ကမ္ဘာပျက်ကပ် ပစ်ကပ်ကားကို အဆင့်မြှင့်တင်ရသော ကုန်ကျစရိတ်နှင့် ယှဉ်လိုက်ပါက သဘာဝလွန် လမ်းစဉ်နှင့် သက်ဆိုင်သည့် ဤအရာများက တကယ်ကို အဓိပ္ပာယ်မရှိလောက်အောင် ဈေးကြီးလွန်းလှသည်။

လမ်းစဉ်ဆေးထိုးအပ်က တွက်ခြေကိုက်သေးသည်။ လမ်းစဉ်ဆေးထိုးအပ် တစ်ချောင်းလျှင် သုံးထောင်သာ ပေးရသည်။

မှော်ဆေးတောင့်ကမူ ငါးသောင်းတောင် ပေးရသည်။

ငါးသောင်းတောင်။

သေလိုက်ပါတော့... ဤအရာက အလွန် ဈေးကြီးလွန်းနေသည် မဟုတ်ပါလော။

လူ့ခန္ဓာကိုယ်၏ အလားအလာများကို အမြင့်မားဆုံး ထုတ်ဖော်ပေးနိုင်စွမ်း ရှိကြောင်း ချူချယ် ပြောခဲ့ဖူးသော်လည်း အမှန်လော အမှားလော ဆိုသည်ကိုမူ မသိရပေ။

ချန်းရီ သိထားသော အချက်အလက်များအရ။

မှော်ဆေးတောင့်၏ အထက်တွင် မိစ္ဆာသစ်သီး ရှိသေးသည်။

၎င်းက ဆံပင်ပန်းရောင် ကောင်မလေး စားသွားသော အမျိုးအစားပင် ဖြစ်သည်။

စနစ်မှပင် လဲလှယ်၍ မရနိုင်သော အရာဖြစ်သည်။

ထို့ကြောင့် ဤမှော်ဆေးတောင့်က ချန်းရီ လောလောဆယ် လဲလှယ်၍ရသော အစွမ်းအထက်ဆုံး မှော်ဆေးပင် ဖြစ်သည်။

ရင်ထဲမှ စိတ်လှုပ်ရှားမှုက အိပ်ချင်စိတ်ကို ယာယီ ဖိနှိပ်ထားလိုက်သည်။

ချန်းရီက မှော်ဆေးတောင့်ကို အဆင့်မြှင့်တင်၍ ရမရ စနစ်အား စမ်းသပ် မေးမြန်းကြည့်လိုက်သည်။

ရလာသော အဖြေကမူ အဆင့်မြှင့်တင်၍ ရသည်ဆိုခြင်းပင် ဖြစ်သည်။

သို့သော် မိုးပေါ်ထောင်နေသော သတ်ဖြတ်မှတ် အရေအတွက်ကို လိုအပ်သည်။

ယခင်က လမ်းစဉ်ဆေးထိုးအပ်ကို အဆင့်မြှင့်တင်ရန် စမ်းသပ်ခဲ့စဉ်ကနှင့် အဖြေတူတူပင် ဖြစ်သည်။

လိုအပ်သော သတ်ဖြတ်မှတ်၏ အနောက်တွင် အရှည်ကြီး တွဲနေသည့် သုညများကို မြင်လိုက်ရသောအခါ။

ချန်းရီက ဤအတွေးကို လက်လျှော့လိုက်တော့သည်။

စမတ်နာရီကို ကြည့်လိုက်ရာ ယခုအချိန်က နံနက် တစ်နာရီ ထိုးနေချေပြီ။ ခေါင်းဆောင်ချူက နံနက် ငါးနာရီဆိုလျှင် လူများကို နှိုး၍ ခရီးဆက်ရန် ခေါ်လောက်ပြီဟု ခန့်မှန်းရသည်။

အချိန်မစောတော့ပေ။

ချန်းရီက အပြာရောင် အလင်းများ ထွက်နေသော မှော်ဆေးတောင့်ကို ပါးစပ်ထဲသို့ တိုက်ရိုက် ပစ်ထည့်လိုက်သည်။

သူမှော်ဆေးတောင့်ကို မျိုချလိုက်သည်။

ချန်းရီက သေချာ အာရုံခံကြည့်လိုက်သော်လည်း ခန္ဓာကိုယ်ထဲတွင် နွေးထွေးသော စီးဆင်းမှုကဲ့သို့သော စွမ်းအင် လှည့်ပတ်မှု မည်သည့်အရာမျှ မရှိပေ။

ဇွဲမလျှော့ဘဲ ဆယ်မိနစ်ခန့် ဆက်၍ အာရုံခံကြည့်နေသေးသည်။

ထို့နောက်မှ ချန်းရီက နှစ်နှစ်ခြိုက်ခြိုက် အိပ်ပျော်သွားတော့သည်။

ဆက်ရန်...