အခန်း ၁၃၅
Vol. 12 Ch. 135
အခန်း ၁၃၅
ဂူချန်၏ စကားများကို နားထောင်ရင်း ဝမ်ကျူးမှာ ခေါင်းငိုက်စိုက်ကျလျက် ဘာမှ ပြန်မပြောဘဲ ရပ်နေသည်။
တရားခွင်မှာ ဆက်လက်ဖြစ်ပေါ်နေပြီး ဝမ်ကျူးမှာမူ ဘာကိုမျှ မကြားချင်တော့ဘဲ ကိုယ့်ကိုကိုယ် ပိတ်လှောင်ထားလိုက်သည်။
သူမ၏ စိုးရိမ်ပူပန်မှုများမှာ အထွတ်အထိပ်သို့ ရောက်လုနီးပါး ဖြစ်နေပြီး လျူဂျွန်အပေါ်တွင်လည်း အလွန်အမင်း ဒေါသထွက်နေမိသည်။
ဘာကြောင့် လျူဂျွန်က သတ်သေရတာလဲ။
သူသာ ငါ့ကို တကယ်ချစ်ရင် ဒီလိုမျိုး ငါ့ကို လူတွေရဲ့ အဆဲအဆိုခံရအောင် ထားခဲ့ပြီး သေသင့်လို့လား။
လျူဂျွန်မှာရော အပြစ်မရှိဘူးလား။
သူလုပ်သမျှအရာအားလုံးကပဲ မှန်နေတာလား။
တရားသူကြီး လီခန်းက ဝမ်ကျူးကို ကြည့်ပြီး "တရားခံဘက်ကနေ ထွက်ဆိုချက် ပေးလိုပါသလား" ဟု မေးသည်။
ဝမ်ကျူးက ဘာမှ မကြားသယောင် ပြုနေသည်။
တရားသူကြီးက "တရားခံ ဝမ်ကျူး ခင်ဗျား ထွက်ဆိုနိုင်ပါတယ်။ ဒါမှမဟုတ် တိတ်ဆိတ်စွာ နေပိုင်ခွင့်လည်း ရှိပါတယ်" ဟု ထပ်မံပြောလိုက်သည်။
နောက်ဆုံးတွင် ဝမ်ကျူးက ပါးစပ်ဟ၍ "ကျွန်မ ဘာမှ နားမထောင်ချင်ဘူး။ တရားလို ရှေ့နေပြောတာတွေ အကုန်လုံး မမှန်ဘူးလို့ ထင်တယ်။ ကျွန်မတို့က ရည်းစားထားစဉ် ကာလအတွင်း နေ့စဉ် သုံးစွဲရတဲ့ ကုန်ကျစရိတ်တွေကို သုံးခဲ့တာပါ။ ယောကျာ်းလေးတစ်ယောက်က မိန်းကလေးအတွက် ပိုက်ဆံသုံးတာ ဘာမှ မမှားဘူးလို့ ထင်တယ်။ အားလုံးကို မေးခွန်းတစ်ခု မေးချင်တယ်"
ဝမ်ကျူးက ပရိသတ်ကို ကြည့်ပြီး "ရည်းစားထားတဲ့အခါ ယောကျာ်းလေးရော မိန်းကလေးပါ ပိုက်ဆံသုံးရတာ မဟုတ်ဘူးလား အထူးရက်တွေမှာ ငွေလွှဲတာက ပုံမှန်မဟုတ်ဘူးလား" ဟု မေးလိုက်သည်။
တိုက်ရိုက်ထုတ်လွှင့်မှုကို ကြည့်ရှုသူ သိန်းချီရှိနေပြီး သူမ၏ စကားကြောင့် အမျိုးသမီးအချို့က သူမဘက်မှ ထောက်ခံလာကြသည်။
[ဟုတ်တယ် ရည်းစားထားရင် ပိုက်ဆံသုံးရမှာပဲ...]
[ပိုက်ဆံသုံးတာက တစ်မျိုး၊ အမြဲတမ်း ပိုက်ဆံတောင်းနေတာကတော့ မမှန်ဘူး]
[ပိုက်ဆံမတတ်နိုင်ရင် ဘာလို့ ရည်းစားထားတာလဲ။ ရည်းစားကို ပံ့ပိုးပေးရတာ ယောကျာ်းလေးရဲ့ တာဝန်မဟုတ်ဘူးလား]
[မိန်းကလေးရဲ့ နုပျိုမှုက ပိုက်ဆံပဲ။ ယောကျာ်းလေးတစ်ယောက်က ပိုက်ဆံအနည်းငယ် သုံးတာ ပုံမှန်ပါပဲ]
[ရည်းစားထားပြီးမှ အခမဲ့ စားချင်တာလား။ ပိုက်ဆံမရှိရင် ရည်းစားမထားနဲ့ ရှက်ဖို့ကောင်းတယ်]
ဝမ်ကျူးက ဆက်ပြောသည်။
"လျူဂျွန်သာ သေမသွားဘူးဆိုရင် ကျွန်မတို့ နှစ်နှစ်လောက် တွဲပြီးမှ လမ်းခွဲခဲ့ကြမယ်။ အဲဒီအချိန်မှာ သူက သုံးစွဲခဲ့တဲ့ ပိုက်ဆံတွေ အကုန်ပြန်ပေးဖို့ တောင်းဆိုလာရင် အဲဒါက သဘာဝကျသလား"
"ကျွန်မလည်း သူနဲ့တွဲစဉ်က ခံစားချက်တွေ၊ အချိန်တွေကို အများကြီး မြှုပ်နှံထားတာပဲ။ လမ်းခွဲပြီးမှ အကုန်ပြန်တောင်းတာ ဘာသဘောလဲ။ ကျွန်မရဲ့ နုပျိုမှုကို ဘယ်သူက လျော်ပေးမှာလဲ ဒါက တရားလား"
"ဒီလိုဆိုရင် မိန်းကလေးတွေ ဘယ်လိုလုပ်ပြီး ရဲရဲဝံ့ဝံ့နဲ့ ရည်းစားထားရဲတော့မှာလဲ။ ယောက်ျားတစ်ယောက်က နှစ်နဲ့ချီပြီး တွဲပြီးမှ လမ်းခွဲတော့မယ်လို့ ပြောလာပြီး ပိုက်ဆံတွေ အကုန်ပြန်တောင်းတော့မယ်ဆိုရင် ဘယ်လိုလုပ်မလဲ။ သူတို့က တစ်ပြားမှ မဆုံးရှုံးဘူး ဒါပေမဲ့ ကျွန်မကရော ကျွန်မရဲ့ အချိန်တွေ၊ ခံစားချက်တွေက ဘယ်သူ့ဆီမှာ လျော်ကြေးသွားတောင်းရမှာလဲ"
ဝမ်ကျူးက ပိုမို၍ ဒေါသထွက်လာပြီး "လျူဂျွန်နဲ့ လမ်းခွဲရတဲ့ အကြောင်းရင်းက သူက ကျွန်မကို မကြာခဏ စိတ်တိုတတ်လို့ပါ။ သူက ကျွန်မကို ကောင်းကောင်း မဆက်ဆံခဲ့ဘူး။ ပိုက်ဆံလွှဲပေးတာလောက်နဲ့ပဲ သူကောင်းတယ်လို့ ထင်နေတာလား။ ကျွန်မ လိုအပ်တဲ့အချိန်မှာ သူ ဘယ်မှာလဲ ကျွန်မ ဗိုက်နာတဲ့အခါ ရေနွေးများများသောက်ဆိုတဲ့ စကားလုံးကလွဲပြီး ဘာများ ထူးခြားသွားလို့လဲ"
"ကျွန်မ သူ့ကို လက်ထပ်ပြီး ကလေးမွေးပေးဖို့အထိ စိတ်ကူးခဲ့တာပါ။ ကျွန်မသာ မရှိရင် သူ ကလေးရနိုင်ပါ့မလား။ မိန်းကလေးတစ်ယောက်ရဲ့ နုပျိုမှုက အဖိုးတန်ဆုံးပါ။ ကျွန်မ နှစ်နှစ်လောက် မြှုပ်နှံခဲ့တာ၊ လမ်းခွဲတာကလည်း သူ့ရဲ့ ဆိုးဝါးတဲ့ အပြုအမူတွေကြောင့်ပါ။ ကျွန်မ ပိုက်ဆံကိုပဲ စိတ်ဝင်စားတာလား။ သူက ကျွန်မကို ခြယ်လှယ်နေတာမို့လို့ ကျွန်မက ကြောက်ပြီး လမ်းခွဲဖို့ ဆုံးဖြတ်ခဲ့တာပါ"
"အခု သူက မြစ်ထဲခုန်ချသွားတယ်။ သူက ကျွန်မကို အရမ်းချစ်တယ်လို့ ထင်နေတာ။ တကယ်တော့ ဒါက ကျွန်မကို စိတ်ဓာတ်ရေးရာအရ အနိုင်ကျင့်တဲ့နည်းလမ်းတစ်ခုပဲ။ သူခုန်ချတာနဲ့ ကျွန်မနဲ့ ဘာဆိုင်လို့လဲ"
"ရှင်တို့က Chat Log တွေကို ကြည့်ပြီး ကျွန်မကို အပြစ်တင်နေကြတယ်။ လျူဂျွန်က ဘယ်လိုလူလဲဆိုတာ ရှင်တို့ သိကြလား။ သူက အတော်လေး အစွန်းရောက်တဲ့သူပါ။ ကျွန်မ သူ့ကို ကြောက်တယ်။ လမ်းခွဲဖို့ ကြိုးစားတိုင်း သူက အစွန်းရောက်တဲ့ လုပ်ရပ်တွေလုပ်တော့ ကျွန်မ ဘယ်လိုလုပ်ပြီး သူ့ကို ဆက်ချစ်နိုင်ပါ့မလဲ။ သူက တွဲမပေးရင် ခုန်ချမယ်လို့ ခြိမ်းခြောက်နေရင် ကျွန်မ ဘာတတ်နိုင်မှာလဲ"
ဝမ်ကျူးက ဆက်ပြောသည်။
"ဒါ တရားလား။ နုပျိုတဲ့ မိန်းကလေးတစ်ယောက်ဖြစ်တဲ့ ကျွန်မအတွက် တရားလား။ အခု သူက သေသွားပြီ။ ကျွန်မကတော့ တစ်ကမ္ဘာလုံးရဲ့ အွန်လိုင်းအနိုင်ကျင့်မှုကို ခံနေရတယ်။ ပိုက်ဆံတွေလည်း ပြန်ပေးရဦးမယ်တဲ့။ ရှေ့နေဂူ ဒါက တရားတယ်လို့ ရှင် ထင်လား"
ဝမ်ကျူးက ဂူချန်ကို မေးငေါ့ကြည့်ကာ သူမကိုယ်သူမ နစ်နာသူဟု ခံယူထားသည်။
သူမသည် ရှေ့နေမရှိသည့်တိုင် တရားခွင်တွင် ကိုယ့်ကိုကိုယ် အားတက်သရော ခုခံကာကွယ်
နေသည်။
ငါ့ဘက်ကတော့ တစ်ပြားတစ်ချပ်မှ ပြန်မပေးနိုင်ဘူး...
ဒါတွေအားလုံးက လျူဂျွန်ကိုယ်တိုင် စိတ်လိုလက်ရ လွှဲပေးထားတာလေ။
နှစ်နှစ်လောက် တွဲပြီးမှ စကားတစ်ခွန်းတည်းနဲ့ အကုန်ပြန်တောင်းရအောင် သူက ဘာသဘောလဲ...
"လျူဂျွန်က ကျွန်မအပေါ် အိမ်တွင်းအကြမ်းဖက်မှုတွေ လုပ်ခဲ့တာရှင့်... ဆဲဆိုတာ၊ ရိုက်နှက်တာတွေအထိ လုပ်ခဲ့တာ။
အားလပ်ရက်တွေကျရင် ပိုက်ဆံလေး နည်းနည်းပါးပါး လွှဲပေးရုံနဲ့ပဲ... ကျွန်မကို တကယ်ချစ်တယ်လို့ ထင်နေတာလား။
ကျွန်မ လိုချင်တဲ့အချစ်က အဲဒီလို ပိုက်ဆံနဲ့ ပေါက်တာမျိုး မဟုတ်ဘူး...
သူက တခြားမိန်းကလေးတွေနဲ့ ဂိမ်းဆော့ပြီး အချိန်ဖြုန်းနေတဲ့အချိန်မှာ ကျွန်မက ဘာလို့ ဒေါသမထွက်ရမှာလဲ။
သူ ကျွန်မကို အချိန်မပေးခဲ့ဘူး...
ပြဿနာတစ်ခုခု ဖြစ်လာတိုင်း ပိုက်ဆံပဲ ထုတ်ပေးပြီး ဖြေရှင်းဖို့ ကြိုးစားခဲ့တာ။
ကျွန်မက ပိုက်ဆံကို လိုချင်တာ မဟုတ်ဘူး အချစ်ကို လိုချင်တာ…
အဲဒီလို အစွန်းရောက်တဲ့လူမျိုးနဲ့ ဆက်တွဲနေရမှာကို ကျွန်မ ဘယ်လောက်တောင် ကြောက်ခဲ့ရလဲ..."
ဝမ်ကျူးက ဆေးရုံမှတ်တမ်းစာရွက်တွေကို လေထဲမှာ တရမ်းရမ်းလုပ်ရင်း လျူရှောင်နန်ကို စိုက်ကြည့်ကာ အော်ဟစ်လိုက်ပြန်သည်။
"ကျွန်မ အခု စိတ်ကျရောဂါဖြစ်နေပြီ... အခုတော့ ရှင်တို့ ကျေနပ်ကြပြီလား...
လျူရှောင်နန်...
နင့်အစ်ကို သေသွားရတဲ့ ကိစ္စနဲ့ပတ်သက်ပြီး... နင် ဘာလို့ နင့်အစ်ကို့အပြစ်ကို မစဉ်းစားတာလဲ။ သူက အစွန်းရောက်လွန်းလို့ သူ့ဘာသာ သတ်သေသွားတာလေ...
နင့်အစ်ကို သေတာက... ငါက တိုက်ပေါ်က တွန်းချလိုက်လို့လား... ဟမ်... နင်တို့မှာ သက်သေရှိရင် ငါ့ကို အခုပဲ သေဒဏ်ပေးလိုက်ပါလား... ငါ လုံးဝ မကြောက်ဘူး..."
ထိုနောက် တရားသူကြီးကိုကြည့်ကာ…
"သူ ကိုယ့်ဘာသာကိုယ် သေတာ... ကျွန်မနဲ့ ဘာဆိုင်လို့လဲ...
ဒါက သူ့ရဲ့ ရွေးချယ်မှုပဲလေ။
အခု သူ သေသွားတော့... ကျွန်မကပဲ စိတ်ဖိစီးမှုတွေ၊ အွန်လိုင်းပေါ်က အသရေဖျက်မှုတွေကို ဘာလို့ ခံရမှာလဲ...
ကျွန်မရဲ့ နောင်ရေး ဘဝတစ်ခုလုံး ပျက်စီးသွားပြီ။
နောက်ဘဝမှာ ကျွန်မ ဘယ်သူနဲ့ လက်ထပ်ရတော့မှာလဲ...
ဘယ်သူကရော ကျွန်မလို မိန်းမမျိုးကို စိတ်ဝင်စားတော့မှာလဲ...
ဒါတွေအားလုံးအတွက် ဘယ်သူက တာဝန်ယူမှာလဲ..."
"ဒါက တကယ့်ကို တရားမမျှတဘူး...
ကျွန်မ ပိုက်ဆံ တစ်ပြားမှ ပြန်မပေးနိုင်ဘူး...
ဒါတွေက ချစ်သူသက်တမ်းတစ်လျှောက် ပေးခဲ့တဲ့ လက်ဆောင်တွေပဲ...
လိမ်လည်တာ မဟုတ်ဘူး။
ယောကျာ်းတစ်ယောက်ဆီက ပိုက်ဆံလေး နည်းနည်းပါးပါး သုံးချင်တာနဲ့ပဲ... ကျွန်မက လိမ်လည်သူ ဖြစ်သွားရောလား...
သူကိုယ်တိုင် စိတ်ဆန္ဒအလျောက် ပေးခဲ့တာတွေကို အခုမှ လာပြီး ပြန်တောင်းနေတာ တကယ့်ကို အဓိပ္ပာယ်မရှိတဲ့ ကိစ္စပဲ..."