အခန်း ၁၃၆

အခန်း ၁၃၆

တိုက်ရိုက်ထုတ်လွှင့်မှုအခန်းအတွင်းရှိ ပရိသတ်များမှာ ဒေါသပေါက်ကွဲနေကြသည်။

ဝမ်ကျူးကို ထောက်ခံသူမှာ အနည်းငယ်သာ ရှိပြီး အများစုမှာ သူမအား ပြင်းပြင်းထန်ထန် ဝေဖန်ဆဲဆိုနေကြသည်။

[တကယ့်ကို ရွံစရာကောင်းတဲ့ မိန်းမ ဒီလောက်အထိ အရှက်မရှိတာမျိုး တစ်ခါမှ မမြင်ဖူးဘူး]

[လျူဂျွန်က မင်းအတွက် ငွေရှာဖို့ အသက်စွန့်ပြီး အလုပ်လုပ်ခဲ့တာလေ။ သူကိုယ်တိုင်တောင် အစားအသောက် ချွေတာစားနေရတာကို မင်းက အိမ်တွင်းအကြမ်းဖက်တယ်လို့ စွပ်စွဲရက်တယ်။ မင်းမှာ အဲဒီလို ပြောဖို့ရော အရည်အချင်းရှိလို့လား]

[ပိုက်ဆံလွှဲပေးတာလောက်နဲ့တင် မလုံလောက်ဘူးတဲ့လား သူ့ပိုက်ဆံအကုန်လုံး မင်းဆီ ရောက်သွားတာကို မင်းက ဘာမှ မတောင်းခဲ့ဘူးလို့ ပြောနေတာလား]

[ဒီနှစ်နှစ်အတွင်း မင်းတောင်းခဲ့တဲ့ ငွေ ၆ သိန်း ၃ သောင်းက ရိုးရိုးရှင်းရှင်း သုံးစွဲတာမျိုးလား ဘယ်သူကများ ရည်းစားထားရင် ဒီလောက် ပိုက်ဆံ တောင်းကြသလဲ]

[လျူဂျွန်ကတော့ တကယ်ကို သနားဖို့ကောင်းတယ်... သူ့ပိုက်ဆံတွေ အကုန်လုံး မင်းဆီပေးပြီး နောက်ဆုံးတော့ ဘာမှ မကျန်ခဲ့ဘဲနဲ့]

လူအများစုက လျူဂျွန်ကို ကြောင်လေးဟု ချစ်စနိုးခေါ်ကြသည်။

"သူ အဲဒီတံတားပေါ်မှာ တစ်ယောက်တည်း ရပ်နေခဲ့တဲ့ နောက်ဆုံးအချိန်လေးမှာ ရင်ထဲမှာ ဘာတွေများ တွေးပြီး ကြေကွဲနေခဲ့မလဲ..."

"လွန်ခဲ့တဲ့ နှစ်နှစ်လုံးလုံး... နေပူမိုးရွာမရှောင် ပင်ပင်ပန်းပန်းနဲ့ သွေးချွေးစတေးပြီး ရှာဖွေခဲ့သမျှ အရာအားလုံးကို ဝမ်ကျူး ဆိုတဲ့ မိန်းမဆီ အကုန်ပုံအပ်ခဲ့တဲ့သူက နောက်ဆုံးကျတော့ ဘာတစ်ခုမှ ပြန်မရခဲ့တဲ့အပြင် နှလုံးသားတစ်ခုလုံး ဆုတ်ဖြဲခံရပြီး ဘဝကိုပါ စွန့်လွှတ်သွားခဲ့ရရှာတယ်..."

"ဒါကို... အဲဒီ ဝမ်ကျူး ဆိုတဲ့ သွေးအေးမိန်းမကတော့... သူမနဲ့ လုံးဝ မသက်ဆိုင်ပါဘူးတဲ့...။ သူ သေသွားတာက သူ့ရဲ့ ရွေးချယ်မှု သက်သက်ပဲဆိုပြီး သူမပါးစပ်ကနေ အဆိပ်အတောက်တွေနဲ့ပြည့်နေတဲ့စကားတွေကို သွေးအေးအေးနဲ့ အခိုင်အမာ ပြောထွက်နေသေးတယ်...

တကယ့်ကို တိရစ္ဆာန်ထက်တောင် ယုတ်မာပြီး ရက်စက်လွန်းတဲ့ မိန်းမပဲ..."

ထို့အပြင် လျူရှောင်နန်ကိုလည်း ပြန်လည် တရားစွဲမည်ဟု ခြိမ်းခြောက်နေသည်။

ယခုအခါ ဝမ်ကျူးက ပိုက်ဆံ တစ်ပြားမှ ပြန်မပေးနိုင်တော့ကြောင်း ငြင်းဆိုနေသည်။

ဂူချန် စကားမပြောရသေးခင်မှာပင် ဝမ်ကျူးက တရားသူကြီးကို အသစ်တစ်ခု ထပ်မေးလိုက်သည်။

"တရားသူကြီးရှင် ကျွန်မမှာ မေးစရာ ရှိသေးတယ်"

"ပြောပါ"

လီခန်းက ပြန်ဖြေသည်။

ဝမ်ကျူးက လျူရှောင်နန်ကို ကြည့်ကာ "နင်က လျူဂျွန်သေပြီလို့ ပြောပြီး ငါ့ဆီက ပိုက်ဆံတွေ အတင်းပြန်တောင်းဖို့ အွန်လိုင်းမှာ လှုံ့ဆော်နေတာ မဟုတ်ဘူးလား။

လျူဂျွန် တကယ်သေတာရော ဟုတ်ရဲ့လား။

သူ အခုထိ အသက်ရှင်နေသေးရင်ကော နင်တို့နှစ်ယောက် ပူးပေါင်းပြီး ငါ့ကို လိမ်လည်လှည့်ဖြားနေတာ ဖြစ်နိုင်တယ်" ဟု အော်ပြောလိုက်သည်။

သူမ တွေးလေလေ ပို၍ ယုံကြည်မိလေ ဖြစ်သည်။

လျူဂျွန် အသက်ရှင်နေနိုင်သေးသည်ဟု သူမ ထင်လိုက်သည်။

လျူဂျွန်၏ ရုပ်အလောင်းကို သူမ ကိုယ်တိုင် မမြင်ခဲ့ရပေ။

"နင်တို့ အခုချက်ချင်း လျူဂျွန်ရဲ့ သေဆုံးမှု အစီရင်ခံစာကို ထုတ်ပြ သေစာရင်းရော၊ မီးသင်္ဂြိုဟ်ကြောင်း လက်မှတ်ပါ ပြ အဲဒါတွေ မပြနိုင်ရင် နင်တို့ လိမ်နေတာပဲ။ ငါ လက်မှတ်တွေကိုပဲ ယုံမယ် ကျန်တာတွေ အကုန် အတုတွေပဲ"

ဝမ်ကျူး၏ စကားကြောင့် တိုက်ရိုက်ထုတ်လွှင့်မှုအား ကြည့်နေသူများအားလုံးမှာ ဘာပြောရမှန်းမသိအောင် ဖြစ်သွားကြသည်။

တရားခွင်အတွင်းရှိ ပရိသတ်များမှာ ဝမ်ကျူး၏ ပြောစကားများကြောင့် အံ့အားသင့်သွားကြသည်။

[သူမ အရူးထနေတာလား]

[ဒါ တရားရုံးရောက်နေတာလေ။ လူတစ်ယောက်ရဲ့ သေဆုံးမှုကို ဘယ်လိုလုပ် အတုလို့ တွေးရတာလဲ]

[ဝမ်ကျူးရဲ့ အတွေးအခေါ်တွေက တဖြည်းဖြည်း ရူးသွပ်လာနေပြီ]

[အရူးမ ဝမ်ကျူး သေစာရင်းကို မင်းက ဘာမို့လို့ လာကြည့်ချင်ရတာလဲ]

လျူရှောင်နန်က သေစာရင်းနှင့် မီးသင်္ဂြိုဟ်ကြောင်း လက်မှတ်များကို ချက်ချင်း ထုတ်ပြလိုက်သည်။

"ကျွန်မအစ်ကို မြစ်ထဲခုန်ချပြီး ဆုံးပါးသွားတာပါ။ ဒါတွေက ဆေးရုံက ထုတ်ပေးထားတဲ့ တရားဝင် စာရွက်စာတမ်းတွေပါ။ ကျွန်မအစ်ကို မရှိတော့ဘူးဆိုတာ လူတိုင်း သိပြီးသားပါ။ ဘာလို့ ဒီအကြောင်းကိုပဲ ထပ်ခါထပ်ခါ ပြောနေရတာလဲ။ သူသာ အသက်ရှင်နေရင်ကော ဒီပိုက်ဆံတွေ ပြန်ပေးစရာ မလိုတော့ဘူးလို့ မင်း ထင်နေတာလား"

လျူရှောင်နန်က ငိုယိုကာ ပြောလိုက်သည်။

လူတိုင်းသည် စာရွက်စာတမ်းများကို မြင်တွေ့လိုက်ရသည်။

လျူဂျွန်က တကယ်ပင် ထွက်ခွာသွားခဲ့ပြီဖြစ်သည်။

လူတိုင်း၏ နှလုံးသားတွင် ဝမ်းနည်းမှုများ တက်ကြွလာသည်။

ဝမ်ကျူးကမူ ဆက်လက်၍ ငြင်းခုံနေဆဲပင်။

[ရှေ့နေဂူ ဝမ်ကျူးကို ထောင်ချလို့ မရဘူးလား]

[ပိုက်ဆံပြန်မပေးရင် သူမကို ထောင်ထဲပို့လိုက်ပါ]

ဝမ်ကျူးက "နင့်အစ်ကို သေတာနဲ့ ပိုက်ဆံနဲ့ ဘာဆိုင်လို့လဲ။ အကုန်လုံးက သူကိုယ်တိုင် စိတ်ဆန္ဒအလျောက် ပေးတာပဲလေ။ Chat Log မှာ ကြည့်လေ ပိုက်ဆံမရှိလို့ တောင်းတာကို သူပေးတာပဲ။ အခုမှ ဘာလို့ ပြန်တောင်းနေတာလဲ ကျွန်မ ဘာမှ ပြန်မပေးဘူး" ဟု အော်ဟစ်ကာ ပြောဆိုနေသည်။

တရားသူကြီး လီခန်းက တူကို ထုကာ "တိတ်ဆိတ်ကြပါ" ဟု အမိန့်ပေးလိုက်သည်။

ထို့နောက် ဂူချန်ကို လှည့်ကြည့်ကာ "တရားလို ရှေ့နေဘက်က နောက်ထပ် တင်ပြစရာ ရှိသေးသလား" ဟု မေးမြန်းသည်။

ဂူချန်က ငြိမ်သက်စွာပင် ထရပ်လိုက်သည်။

"တရားသူကြီးချုပ်ခင်ဗျာ အမှုက ရှင်းနေပါပြီ။ ဝမ်ကျူးဟာ လျူဂျွန်နဲ့ တွဲတဲ့ ၂ နှစ်တာ ကာလအတွင်း လက်ထပ်မယ်လို့ လိမ်လည်ပြီး ပိုက်ဆံတွေကို နည်းလမ်းမျိုးစုံနဲ့ လိမ်လည်ရယူခဲ့ပါတယ်။ ပန်းဆိုင်ဖွင့်ခြင်း၊ ကာကွယ်ဆေးထိုးခြင်း၊ အာမခံဝယ်ခြင်း စတဲ့ အကြောင်းပြချက်တွေနဲ့ ယွမ် ၄ သောင်းကျော်အပြင် ကျန်တဲ့ငွေတွေကိုလည်း ပိုင်စိုးပိုင်နင်းနဲ့ လိမ်လည်ယူခဲ့တာပါ"

"ဒါ့အပြင် ဆက်ဆံရေးကာလအတွင်း ဝမ်ကျူးက လျူဂျွန်ရဲ့ ပိုက်ဆံတွေကို သုံးပြီး တခြားယောက်ျားတွေကို ငှားရမ်းခြင်း၊ KTV၊ နိုက်ကလပ်တွေမှာ ပျော်ပါးခြင်းတွေ ပြုလုပ်ခဲ့ပါတယ်။ စုစုပေါင်း လိမ်လည်ရယူခဲ့တဲ့ ပမာဏက ယွမ် ၆ သိန်း ၃ သောင်းပါ"

"ရာဇသတ်ကြီး ဥပဒေပုဒ်မ ၂၆၆ အရ လိမ်လည်မှုပမာဏ ယွမ် ၅ သိန်းကျော်ပါက အလွန်ကြီးမားသော ပမာဏအဖြစ် သတ်မှတ်ပြီး ထောင်ဒဏ် ၁၀ နှစ် သို့မဟုတ် တစ်သက်တစ်ကျွန်းအထိ ချမှတ်နိုင်ပါတယ်။ ဝမ်ကျူးရဲ့ လိမ်လည်မှုက အဲဒီပမာဏကို ရောက်ရှိနေပြီ ဖြစ်တဲ့အတွက် သူမကို ထောင်ဒဏ် ၁၀ နှစ်ကျော် ချမှတ်ပေးဖို့ တောင်းဆိုပါတယ်"

ဂူချန်၏ တောင်းဆိုချက်မှာ တရားခွင်တစ်ခုလုံးကို တိတ်ဆိတ်သွားစေသည်။

ဝမ်ကျူးမှာ မျက်လုံးများ ပြူးကျယ်လျက် လန့်သွားပြီး ခြေလက်များ တုန်ရီလာတော့သည်။