အခန်း ၆၉၅

အနာဂတ်ရဲ့ အစားပုပ်ကလေးကို ချုပ်ချယ်ခြင်း

အပိုင်း ၆၉၅

တစ်နေကုန်လုံး အင်တာနက်ကြည့်ရှုနေခဲ့ပြီး အဖိုးနျဥ်၏ ချီးကျူးမှုကို ခံခဲ့ရသော မော့ချူးသည် သူမ၏ ဗီဒီယိုဖိုင်က အွန်လိုင်းပေါ်တွင် ဤမျှလောက်ကြီးမားသော လှုပ်ခတ်မှု ဖြစ်ပွားစေခဲ့သည်ကို မသိရှိခဲ့ပါချေ...

ထိုသို့ဖြစ်ရခြင်း အကြောင်းရင်းမှာ အင်တာနက်အသုံးပြုသူတစ်ဦး၏ ‘စူးရှထက်မြက်သော မျက်လုံးများ’ ကြောင့် ဖြစ်သည်!

သူမသည် ထိုဗီဒီယိုဖိုင်ကို အကြိမ်အနည်းငယ်မျှ ကြည့်ရှုခဲ့ပြီးနောက်၊ ၎င်းထဲမှ အရေးကြီးသော အချက်အလက်တစ်ခုကို အမှန်တကယ်ပင် တူးဆွရှာဖွေနိုင်ခဲ့သည်။ သူမ ချက်ချင်း အံ့အားသင့်သွားခဲ့ရတော့သည်!

ထို့နောက်တွင်မူ၊ တစ်ယောက်တည်း ပျော်ရွှင်ရတာထက် အားလုံးအတူတူ ပျော်ရွှင်ရတာက ပိုကောင်းသည်ဟူသော စိတ်ဓာတ်ဖြင့်၊ ထိုအင်တာနက်အသုံးပြုသူသည် အဆိုပါသတင်းကို ကြယ်တာရာကွန်ရက်ပေါ်သို့ တင်လိုက်တော့သည်။

“ဟိုလေ... ငါ ကြားတာ မှားသွားလို့လား။ ရှောင်ချူးက သူမရဲ့ ဝမ်းဗိုက်ထဲက ကလေးအကြောင်းကို ပြောပြတဲ့အခါ ‘သူတို့’ ဆိုတဲ့ စကားလုံးကို သုံးသွားတာ။ ဒါဆိုရင်... ရှောင်ချူးရဲ့ ဝမ်းဗိုက်ထဲမှာ... ကလေးတစ်ယောက်ထက်မက ရှိနေတာလား?!”

ကြည့်စရာလား၊ ဤမျှလောက် အသေးစိတ်ကျလှသော ရှာဖွေမှုအဆင့်အတန်းမှာ ကျွမ်းကျင်ပညာရှင်တစ်ဦးထက်ပင် မနိမ့်ပါချေ!

ပြီးတော့ ဤမှတ်ချက်ကို ဆွေးနွေးပွဲဖိုရမ်၏ အပေါ်ဆုံးတွင် ထားရှိခဲ့သည်။

၎င်းက လူတိုင်း၏ အာရုံစိုက်မှုကို ချက်ချင်းဖမ်းစားနိုင်ခဲ့တော့သည်!

အစပိုင်းတွင်မူ လူတိုင်း၏ နှလုံးသားထဲ၌ ဝမ်းနည်းမှု အရိပ်အယောင်အချို့ ရှိနေသေးသော်လည်း၊ ယခုအခါတွင်မူ ဤသတင်းကောင်းကြောင့် ၎င်းတို့အားလုံး ပျောက်ကွယ်သွားခဲ့ရပြီ ဖြစ်သည်။ လွန်ကဲလှသော စိတ်လှုပ်ရှားမှုများနှင့် သိလိုစိတ်တို့က သူတို့၏ နှလုံးသားထဲ၌ ချက်ချင်း တိုးပွားလာခဲ့တော့သည်!

လူတိုင်း မနေနိုင်ဘဲ စိတ်လှုပ်ရှားစွာဖြင့် လက်ဝါးချင်း ပွတ်လိုက်ကြမိသည်!

... ဘာကြီးလဲ?!

ရှောင်ချူးက ကလေးတစ်ယောက်ထက်မက ကိုယ်ဝန်ဆောင်ထားတာလား။

ဝိုးးး! ဤသတင်းက တကယ်ကိုပင် အံ့အားသင့်စရာ ကောင်းလှပေသည်!

သူတို့၏ စိတ်ဓာတ်များ ပြန်လည်တက်ကြွလာခဲ့ပြီး၊ အင်တာနက်အသုံးပြုသူအားလုံးသည် စုံထောက်များအဖြစ်သို့ ပြောင်းလဲသွားခဲ့ကြသည်။ သူတို့သည် လင့်ခ်ကို နှိပ်၍ ဗီဒီယိုဖိုင်ကို အကြိမ်ကြိမ် ပြန်ကြည့်ခဲ့ကြတော့သည်!

တစ်ချက်ကြည့်လိုက်ရုံဖြင့်ပင်၊ သူတို့သည် ၎င်းထဲရှိ သေးငယ်သော အသေးစိတ် အချက်အလက်များကို အမှန်တကယ်ပင် ရှာဖွေတွေ့ရှိခဲ့ကြသည်။

ရှောင်ချူးက သူမ၏ ဝမ်းဗိုက်ထဲက ကလေးအကြောင်းကို ဖော်ပြသည့်အခါ၊ သူမသည် အများကိန်းကို အမှန်တကယ်ပင် အသုံးပြုခဲ့ခြင်း ဖြစ်သည်!

ဒါက ဘာကို ဆိုလိုတာလဲ။

ဒါက ရှောင်ချူးမှာ အနည်းဆုံး ကလေးနှစ်ယောက် ကိုယ်ဝန်ရှိနေပြီဆိုတာကို ဆိုလိုတာ ဖြစ်သည်!

ယခင်က အတော်လေး တိတ်ဆိတ်နေခဲ့သော ဆွေးနွေးမှုကဏ္ဍမှာ ရုတ်တရက်ဆိုသလို ပိတ်ပင်ကန့်သတ်ချက်များ ဖယ်ရှားလိုက်သည့်အလား ပြန်လည်စည်ကားလာခဲ့တော့သည်!

လူတိုင်းက ဤကိစ္စရပ်အပေါ်တွင်သာ အာရုံစိုက်လိုက်ကြပြီး...

“တွေ့လား။ ငါ ဘာပြောခဲ့လဲ။ ကံကောင်းစေတဲ့ ကြယ်ပွင့်လေးက တကယ်ကို အံ့ဩစရာကောင်းတာပဲ! ကိုယ်ဝန်ရှိရုံတင်မကဘူး၊ ကလေးတစ်ယောက်ထက်မကတောင် ရှိနေတာ! သူမက အကောင်းဆုံးပဲ! နင်တို့ အရှုံးပေးကြပြီလား?!”

ဟုတ်ကဲ့! သူတို့ အရှုံးပေးကြပါပြီ!

ဤမှတ်ချက်တစ်ခုတည်းတင်ပင် လူဆိုးကြီးကို ဒူးထောက်အရှုံးပေးနေကြသော အီမိုဂျီအမြောက်အမြား ပါဝင်နေခဲ့သည်။ တကယ်ကို စိတ်ဝင်စားစရာ ကောင်းလှပေသည်!

“ဟဲဟဲ... ကဲ၊ ငါတို့ရဲ့ ထူးချွန်လှတဲ့ အမျိုးသားထုကြီးရဲ့ ကိုယ်စားလှယ်အနေနဲ့၊ ငါတို့လည်း ဗိုလ်မှူးကြီးနျဉ်၊ ရဲဘော် နျဉ်ယွိယွမ်ကို နွေးထွေးစွာ ဂုဏ်ပြုကြောင်း ပြောကြားရမှာပေါ့! ငါ ပြောရဦးမယ်၊ ဒီလူငယ်လေးရဲ့ ‘စွမ်းဆောင်ရည်’ က တကယ်ကို အားကောင်းလှတာပဲ!”

နျဉ်ယွိယွမ်၏ ကြိုးပမ်းအားထုတ်မှုများ မရှိခဲ့ပါက၊ ရှောင်ချူးအနေဖြင့် ကလေးကို ဤမျှလောက် ချောချောမွေ့မွေ့ ရရှိနိုင်လိမ့်မည် မဟုတ်ပါချေ၊ ဟုတ်တယ်မလား။

ဤစကားများကို ပြောဆိုလိုက်သည်နှင့်တစ်ပြိုင်နက်၊ ၎င်းက အမျိုးသားအင်တာနက်အသုံးပြုသူ အမြောက်အမြား၏ သဘောကျမှုကို ချက်ချင်း ရရှိခဲ့တော့သည်! ဒါပေါ့! ငါတို့ အမျိုးသားထုကြီးရဲ့ ကြိုးစားအားထုတ်မှုတွေကိုလည်း လျစ်လျူရှုထားလို့ မရဘူး မဟုတ်လား။

ထို့ကြောင့် ဤမှတ်ချက်နှင့်အတူ၊ နျဉ်ယွိယွမ်၏ တစ်ကိုယ်တော် ပရိသတ်အရေအတွက်မှာ အမြောက်အမြား တိုးပွားလာခဲ့တော့သည်!

အချို့လူများကမူ သူ့ထံသို့ လျှို့ဝှက်စာတိုများ ပေးပို့၍၊ သူ၏ ပုံမှန်စားသောက်မှုပုံစံနှင့် လူနေမှုပုံစံများကို မေးမြန်းကြပြီး၊ သူတို့လည်း ဖခင်တစ်ဦးဖြစ်လာစေရန်အတွက် သူ၏နည်းလမ်းများကို လိုက်နာ၍ ကျန်းမာရေး ထိန်းသိမ်းစောင့်ရှောက်ရန် ပြင်ဆင်ထားကြောင်း ပြောဆိုကြသည်။ မည်သူသိနိုင်မည်နည်း၊ သူတို့လည်း မကြာမီ အဖေလောင်းတစ်ဦး ဖြစ်လာနိုင်သည်လေ!

ဤကဲ့သို့ပင်၊ သူတို့သည် မိမိကိုယ်မိမိ ထိန်းချုပ်နိုင်စွမ်း မရှိကြတော့ပါချေ။

အချို့လူများကမူ နျဉ်ယွိယွမ်နှင့် ရှောင်ချူးတို့၏ အိပ်ယာထက်က ပုံစံများနှင့် အနေအထားများကိုပါ တိုက်ရိုက် မေးမြန်းခဲ့ကြသေးသည်။ သူ၏ အဆိုအရ၊ အကယ်၍ သူ ဤအရာများကို နားလည်သဘောပေါက်သွားပါက၊ သူ အောင်မြင်စွာ ဖခင်တစ်ဦးဖြစ်လာနိုင်မည့် အခွင့်အရေးမှာ ထက်ဝက်ကျော်အထိ တိုးပွားလာလိမ့်မည်ဖြစ်ကြောင်း ပြောကြသည်။

နျဉ်ယွိယွမ် ဤမြင်ကွင်းကို ကြည့်ရင်း ရယ်ရခက်၊ ငိုရခက် ဖြစ်သွားခဲ့ရတော့သည်!

သူ့မှာ အခြားရွေးချယ်စရာ မရှိပါချေ။ အမျိုးသားထုကြီး၏ အများစုက သူ့ကို တကယ်ပဲ မနာလိုဖြစ်နေကြခြင်း ဖြစ်သည်လေ!

ပြောစမ်းပါဦး၊ ဗိုလ်မှူးကြီးနျဉ်က သူ၏ ဘဝအထွတ်အထိပ်သို့ ရောက်ရှိရန်အတွက် လှည့်စားမှုအချို့ ပြုလုပ်ခဲ့ခြင်း ဖြစ်ရမည်လား။

သူ့မှာ အာဏာနှင့် ခွန်အား ရှိနေခဲ့ပြီ ဖြစ်သည်။ ပိုမို၍ အရေးကြီးသည်မှာ၊ သူသည် မော့ချူးကဲ့သို့သော သေးသွယ်လှပသည့် ဇနီးလေးကိုပင် လက်ထပ်ခွင့် ရရှိခဲ့ခြင်း ဖြစ်သည်။ ယခုအခါတွင်မူ သူ့၌ ကလေးများပါ ရှိနေခဲ့ပြီဖြစ်ရာ — နှစ်ယောက်တောင် ဖြစ်သည်!

သေသေချာချာ တွေးတောကြည့်မည်ဆိုပါက၊ နျဉ်ယွိယွမ်သည် ယခုအချိန်တွင် လူငယ်တစ်ဦးမျှသာ ရှိပါသေးသည်။ အကယ်၍ သူတို့သာ သူ၏နေရာတွင် ရှိနေခဲ့မည်ဆိုပါက၊ ဇနီးနှင့် ကလေးများကို ထားရှိရန် ဝေးစွ၊ အမျိုးသမီးတစ်ဦး၏ နူးညံ့လှသော လက်ကလေးကိုပင် ဆုပ်ကိုင်နိုင်ကြလိမ့်မည် မဟုတ်ပါချေ!

ဤရက်စက်လှသော ကွာခြားချက်ကြီးက တကယ်ကိုပင် နှလုံးသားကို နာကျင်စေလှပေသည်...

ထို့ကြောင့် လူတိုင်းက နျဉ်ယွိယွမ်၏ ကျော်စောလှသော ဂုဏ်သတင်းကို မေ့လျော့လျက်၊ လျှို့ဝှက်စာတိုများမှတစ်ဆင့် သူ့ထံသို့ တိုက်ရိုက် ချဉ်းကပ်ရန် ကြိုးစားကြပြီး၊ သူ၏ လျှို့ဝှက်ချက်အချို့ကို စူးစမ်းရန် မျှော်လင့်နေကြတော့သည်။

ကံကောင်းထောက်မစွာဖြင့်၊ သူတို့သည် ဗီဒီယိုဖိုင်ကို ဖွင့်မကြည့်ရန် လိမ္မာပါးနပ်စွာ ရွေးချယ်ခဲ့ကြသည်၊ သို့မဟုတ်ပါက သူတို့သည် နျဉ်ယွိယွမ်၏ မည်းမှောင်နေသော ခန့်ညားသည့် မျက်နှာကြီးကြောင့် ထိတ်လန့်သွားကြပေလိမ့်မည်!

ဟဲဟဲ!

နျဉ်ယွိယွမ် သူ၏ မျက်ခုံးကို အနည်းငယ် ပင့်လိုက်သည်... ဤလူစုက တကယ်ကို သတ္တိကောင်းလှပေသည်!

သူတို့က အမှန်တကယ်ပင် သူနှင့် ရှောင်ချူးတို့၏ အိပ်ခန်းထဲက လျှို့ဝှက်ချက်ကို မေးမြန်းဝံ့ကြသည်လား! သူတို့က အိပ်ယာထက်က ပုံစံကဲ့သို့သော အလွန်အမင်း ပုဂ္ဂိုလ်ရေးဆန်လှသည့် မေးခွန်းမျိုးကိုပင် မေးမြန်းဝံ့ကြပေသည်။

နျဉ်ယွိယွမ်၏ နှုတ်ခမ်းထောင့်စွန်းများ အနည်းငယ် တွန့်ကွေးသွားခဲ့ရသည်။ သူသည် သူ၏ သွယ်လျသော လက်ချောင်းလေးများကို ဆန့်ထုတ်လိုက်ပြီး တာမီနယ် ပေါ်တွင် အကြိမ်အနည်းငယ် နှိပ်လိုက်တော့သည်။

~တောက်-တောက်~

တစ်ချိန်တည်းမှာပင်၊ ပြန်လည်ဖြေကြားသည့် အချက်ပြသံ ပဲ့တင်ထပ်သွားခဲ့သည်။

အွန်လိုင်းပေါ်တွင် ဗိုလ်မှူးကြီးနျဉ်၏ ပြန်လည်ဖြေကြားမှုကို စိုးရိမ်တကြီး စောင့်ဆိုင်းနေကြသော အမျိုးသားထုကြီးအားလုံး မနေနိုင်ဘဲ စိတ်လှုပ်ရှားသွားခဲ့ကြရသည်!

ဘာကြီးလဲ?!

ဗိုလ်မှူးကြီးနျဉ်က သူတို့ကို တကယ် ပြန်ဖြေခဲ့တာလား။

သူတို့ တကယ်ကိုပင် အလွန်အမင်း စိတ်လှုပ်ရှားသွားခဲ့ကြရသည်။ သူတို့၏ သေးငယ်သော နှလုံးသားလေးများမှာ ရူးသွပ်စွာ ခုန်နေခဲ့ကြသည်... ဖြစ်နိုင်သည်မှာ သူတို့သည် အဆင့်ကျော်ဖြတ်နိုင်မည့် လျှို့ဝှက်ချက်ကို ရရှိတော့မည်ဖြစ်ပြီး၊ သူတို့၏ ဘဝအထွတ်အထိပ်သို့ အတူတကွ လျှောက်လှမ်းနိုင်ကြတော့မည်လား။

သူတို့၏ လက်များ တုန်ရင်နေခဲ့ကြပြီး၊ စိတ်လှုပ်ရှားမှုကို မဖုံးကွယ်နိုင်ဘဲ ဗိုလ်မှူးကြီးနျဉ်၏ ပြန်လည်ဖြေကြားချက်ကို နှိပ်၍ ကြည့်လိုက်ကြတော့သည်...

ဟုတ်ပါတယ်!

၎င်းမှာ အလွန်ပင် တိုတောင်းပြီး လိုရင်းတိုရှင်း ဖြစ်ကာ၊ ပုဒ်ဖြတ်ပုဒ်ရပ်များအပါအဝင် စကားလုံး ဆယ်လုံးထက်ပင် မပိုပါချေ...

သေသေချာချာ ထပ်ကြည့်လိုက်သည့်အခါတွင်မူ၊ လူတိုင်း၏ မျက်သူငယ်အိမ်များ တစ်ပြိုင်နက်တည်း ကျယ်ပြန့်သွားခဲ့ရတော့သည်!

ဘာကြီးလဲ။

သူတို့ မျက်စိမှားနေတာလား။ အမျိုးသားထုကြီးသည် တစ်ယောက်ပြီးတစ်ယောက် မျက်စိကို ပွတ်သတ်လိုက်ကြပြီး၊ ထို့နောက် ဆက်သွယ်ရေးစက်ကို မော့ကြည့်လိုက်ကြသည်။ ပြန်လည်ဖြေကြားချက်မှာ အတူတူပင် ဖြစ်နေသဖြင့်၊ လူတိုင်း၏ မျက်နှာများ ချက်ချင်းပင် တစ်ပြိုင်နက်တည်း မည်းမှောင်သွားခဲ့ရတော့သည်!

နျဉ်ယွိယွမ်၏ ပြန်လည်ဖြေကြားချက်မှာ တညီတညွတ်တည်း ဖြစ်နေခဲ့သည်။

“ကျေးဇူးတင်ပါတယ်! ဒါကို ပါရမီပါတာလို့ ခေါ်တယ်!”

ဤပြန်လည်ဖြေကြားချက်ကို မြင်တွေ့လိုက်ရသည့်အခါ၊ လူတိုင်း သွေးတစ်လုတ်မျှပင် အန်ထုတ်မတတ် ဖြစ်သွားခဲ့ရသည်!

တောက်! ... ပါရမီပါတာ ဟုတ်လား?!

သူတို့အားလုံးက အမျိုးသားတွေပဲလေ၊ ဒါကို သူတို့ ဘာကြောင့် နားမလည်ဘဲ နေပါ့မလဲ။

နျဉ်ယွိယွမ်သည် အမျိုးသားတစ်ယောက်အနေဖြင့် မိမိ၏ စွမ်းဆောင်ရည်ကို သွယ်ဝိုက်သောနည်းဖြင့် ကြွားဝါနေခြင်း ဖြစ်သည်!

ဖူး!

မင်းက ဒါကို ပြောထွက်ရဲသေးတယ်၊ ငါတို့ကတော့ နားထောင်ဖို့တောင် ရှက်လှပြီ!

လူတိုင်း နှလုံးသား ကွဲကြေသွားခဲ့ရသည်။ သူတို့သည် နျဉ်ယွိယွမ်က ကွယ်ရာတွင် ဤကဲ့သို့သော လူစားမျိုး ဖြစ်လိမ့်မည်ဟု ဘယ်တုန်းကမှ မထင်မှတ်ထားခဲ့ကြပါချေ!

၎င်းမှာ တကယ်ကိုပင် ညစ်ပတ်လွန်းလှပြီး စိတ်ဓာတ်ကျစရာ ကောင်းလှပေသည်!

ဟွန့်!

ဒါက စကားလုံးတွေ သက်သက်ပဲ မဟုတ်လား။ ငါတို့ လက်တွေ့ဘဝမှာ ဘာလို့ ယှဉ်ပြိုင်မကြည့်ကြတာလဲ။ ငါတို့ ဘာလို့ ဓာတ်ပုံတစ်ပုံ ချမပြကြတာလဲ။ စကားပုံတစ်ခု ရှိသည်မဟုတ်လား — ဓာတ်ပုံရှိမှ အမှန်တရား ရှိတယ်ဆိုတာလေ!

ထို့ကြောင့် ဆက်၍ မအောင့်အည်းနိုင်တော့သော အမျိုးသာအင်တာနက်အသုံးပြုသူများသည် ချက်ချင်းပင် တိုက်ခိုက်ပါတော့သည်! ဤကဲ့သို့သော ကိစ္စရပ်မျိုးတွင် မည်သည့်အမျိုးသားမျှ နောက်ဆုတ်ရန် သို့မဟုတ် မလုပ်နိုင်ပါဟု ပြောဆိုရန် အလိုမရှိကြပါချေ!

တောက်တီးတောက်တဲ့!

...

ခေတ္တမျှ တိတ်ဆိတ်သွားခဲ့ပြီးနောက်၊ အင်တာနက်အသုံးပြုသူများသည် ဗိုလ်မှူးကြီးနျဉ်၏ အကောင့်ကို တစ်ယောက်ပြီးတစ်ယောက် ရွေးချယ်လိုက်ကြပြီး... သူတို့မှာ Follow လုပ်ထားခြင်းကို ပယ်ဖျက်ရန်မှလွဲ၍ ရွေးချယ်စရာ မရှိတော့ပါချေ။ ဤရိုက်ခတ်မှုက တကယ်ကိုပင် အလွန်အမင်း ပြင်းထန်လွန်းလှသည်လေ!

ထို့ကြောင့် နျဉ်ယွိယွမ်၏ အကောင့်ရှိ ပရိသတ်အရေအတွက်မှာ ဆက်တိုက်ဆိုသလို မြင့်တက်နေခဲ့သော်လည်း၊ ခေတ္တမျှအတွင်းမှာပင်၊ လူအမြောက်အမြားမှာ ဖန် အဖြစ်မှ မုန်းတီးသူများ (Haters) အဖြစ်သို့ ပြောင်းလဲသွားခဲ့ကြတော့သည်!

ထိုလူဦးရေ ပမာဏမှာ တကယ်ကိုပင် အံ့အားသင့်စရာ ကောင်းလှပေသည်!

ဒါပေါ့၊ ဤ ‘ပရိသတ်များ ထွက်ပြေးမှု’ ဖြစ်ရပ်မှာလည်း ဖျော်ဖြေရေးလောကတွင် အမြဲတမ်း တည်ရှိနေမည့် သမိုင်းဝင် အံ့ဖွယ်ဖြစ်ရပ်တစ်ခု ဖြစ်လာခဲ့သည်။ မည်သူမျှ ၎င်း၏ နောက်ကွယ်က အကြောင်းရင်းကို ရှင်းလင်းစွာ မပြောပြနိုင်ခဲ့ကြသော်လည်း၊ ဒါပေါ့၊ ထင်ကြေးပေးမှုများစွာတော့ ရှိနေခဲ့သည်...

တစ်ချိန်တည်းမှာပင်၊ အင်တာနက်ပေါ်ရှိ ဆွေးနွေးမှုများမှာလည်း တစ်ရက်ထက်တစ်ရက် ပို၍ပြင်းထန်လာခဲ့သည်။

လူတိုင်းက ‘ခန့်မှန်းကစားနည်း’ ဂိမ်းတစ်ခုကို စတင်ကစားလာခဲ့ကြသည်။

အဓိက အကြောင်းအရာ နှစ်ခု ရှိနေခဲ့သည်။

တစ်ခုမှာ ရှောင်ချူးတွင် ကလေးမည်မျှ ရှိနေလဲဆိုသည်နှင့်၊ အခြားတစ်ခုမှာ ဤကလေးများ၏ ကျား/မ လိင်အမျိုးအစားက ဘာလဲဆိုသည်ပင် ဖြစ်သည်။

ဤမေးခွန်းနှစ်ခုမှာ ရိုးရှင်းသည်ဟု ထင်ရသော်လည်း၊ အင်တာနက်အသုံးပြုသူများ၏ စိတ်အားထက်သန်မှုမှာ အလွန်အမင်း မြင့်မားနေခဲ့သည်!

ဤအချိန်ကာလအတွင်း၌၊ သင်သည် အဖွဲ့ချုပ်၏ စတားနက်သို့ ဝင်ရောက်လိုက်သည်နှင့်တစ်ပြိုင်နက်၊ ဖိုရမ်အားလုံးနီးပါးတွင် ဤကိစ္စရပ်ကိုသာ ဆွေးနွေးနေကြသည်ကို မြင်တွေ့ရလိမ့်မည်။ ၎င်းမှာ တရားဝင် ဖိုရမ်ကြီးများဖြစ်စေ သို့မဟုတ် သေးငယ်ပြီး စိတ်ဝင်စားစရာမကောင်းသော ဖိုရမ်ငယ်လေးများဖြစ်စေ၊ မည်သည့် ချွင်းချက်မျှ ရှိမနေခဲ့ပါချေ။

လူအချို့ကမူ ဤကိစ္စအတွက် သီးသန့် လောင်းကြေးတစ်ခုကိုပင် ပြုလုပ်ခဲ့ကြသေးသည်။ ၎င်းမှာ ပျော်ရွှင်စရာ သက်သက်အတွက်သာ ဖြစ်သော်လည်း၊ လူအမြောက်အမြား၏ အာရုံစိုက်မှုကို ချက်ချင်း ဖမ်းစားနိုင်ခဲ့သည်။

လူတိုင်းနီးပါး ပါဝင်ဆင်နွှဲနေကြသော ဤ ‘ခန့်မှန်းကစားနည်း’ ဂိမ်းသည် အဖွဲ့ချုပ်၏ အထက်လူကြီးများ၏ အာရုံစိုက်မှုကို သဘာဝအတိုင်းပင် ဖမ်းစားနိုင်ခဲ့တော့သည်... အွန်လိုင်းပေါ်ရှိ ဆွေးနွေးမှုများကို ကြည့်ရင်း၊ လူတိုင်း မနေနိုင်ဘဲ ရယ်ရခက်၊ ငိုရခက် ဖြစ်သွားခဲ့ကြရသည်!

သင် မယုံကြည်ဘူးလား။

ဒါဆိုရင် သင့်ဘာသာသင် ကြည့်ရှုလိုက်ပါဦး!

အင်တာနက်အသုံးပြုသူ (က) - “ငါ့အထင်တော့ ရှောင်ချူးမှာ ကလေးသုံးယောက် ရှိနေတာ ဖြစ်ရမယ်! ကျား/မ အနေနဲ့ကတော့၊ သမီးနှစ်ယောက်နဲ့ သားတစ်ယောက်ပေါ့! အမလေး! သေသေချာချာ တွေးကြည့်ရင်၊ ဒီအချိုးအစားက တကယ်ကို အံ့ဩစရာကောင်းလှတယ်။ ဒါက ငါ့ရဲ့ စိတ်ကူးထဲက အနာဂတ်နဲ့ လုံးဝ တူညီနေတာပဲ!”

အင်တာနက်အသုံးပြုသူ (ခ) - “ဘာတွေလဲ။ သုံးယောက်တည်းလား။ နင်က ငါတို့ရဲ့ ရှောင်ချူးနဲ့ ဗိုလ်မှူးကြီးနျဉ်တို့ရဲ့ စွမ်းဆောင်ရည်ကို အထင်သေးလွန်းရာ ကျနေပြီ! အနည်းဆုံးတော့ လေးယောက် ဒါမှမဟုတ် ငါးယောက် ရှိရမှာပေါ့! သမီးသုံးယောက်နဲ့ သားနှစ်ယောက်ဆိုရင်တော့ အကောင်းဆုံးပဲ!”

အင်တာနက်အသုံးပြုသူ (ဂ) - “ဟုတ်တယ်! ငါ အပေါ်ကလူရဲ့ သဘောထားကို ထောက်ခံတယ်! အချိန်တန်ရင်၊ ငါ ရှောင်ချူးရဲ့ ကလေးထိန်းအလုပ်အတွက် သွားရောက်လျှောက်ဦးမယ်။ အမလေး! ဗိုလ်မှူးကြီးနျဉ်နဲ့ ရှောင်ချူးတို့ရဲ့ အားသာချက်တွေကို ပေါင်းစပ်ထားတဲ့ ကလေးတွေက ဘယ်လောက်တောင် လှပလိုက်မလဲ! စဉ်းစားကြည့်ရုံတင် ငါ့ရဲ့ နှလုံးသားလေး အရည်ပျော်သွားပြီ...”

အောက်သို့ ဆက်ကြည့်လိုက်သည့်အခါတွင်မူ၊ ကလေးထိန်း ဖြစ်လာစေရန်အတွက် ကြိုတင်၍ ချိန်းဆိုမှု ပြုလုပ်ချင်နေကြသော အင်တာနက်အသုံးပြုသူအမြောက်အမြား ရှိနေဆဲ ဖြစ်သည်ကို မြင်တွေ့ရလိမ့်မည်!

...

“ကဲပါ... တော်လောက်ပြီ၊”

အထက်လူကြီးများက ပြုံးလျက် အကြီးအကဲလျို ထံသို့ ဗီဒီယိုစာတိုတစ်စောင် ပေးပို့လိုက်သည်။ “သူတို့ရဲ့ စစ်ဆေးမှု ရလဒ်တွေကို အွန်လိုင်းပေါ်မှာ အမြန်ဆုံး တင်ပေးလိုက်ပါဦး။ မဟုတ်ရင်၊ သူတို့ကို ဒီအတိုင်း ဆက်လွှတ်ထားမယ်ဆိုရင်၊ ရှောင်ချူးမှာ တစ်ခါတည်းနဲ့ ကလေးခြောက်ယောက်တောင် ရသွားနိုင်တယ်!”

သို့သော်လည်း၊ အမှန်အတိုင်း ပြောရမည်ဆိုပါက အဖွဲ့ချုပ်၏ ပြည်သူများမှာ တကယ်ကိုပင် ချစ်စရာကောင်းလွန်းလှပေသည်...

“အင်း။”

အကြီးအကဲလျိုသည်လည်း အွန်လိုင်းပေါ်ရှိ သတင်းများကို အာရုံစိုက်နေခဲ့ခြင်း ဖြစ်သည်။ သူ ၎င်းကို ကြားလိုက်ရသည့်အခါ မနေနိုင်ဘဲ ပြုံးလျက် ခေါင်းညိတ်ပြလိုက်သည်။

“စိတ်မပူပါနဲ့၊ ကျွန်တော် ချက်ချင်း ရလဒ်တွေကို တင်ပေးလိုက်ပါ့မယ်!”

ကျုံးဝမ်နှင့် ကျိုးလင်တို့ သတင်းရရှိသည့်အခါ၊ သူတို့ ချက်ချင်း လက်တွေ့အကောင်အထည်ဖော် ဆောင်ရွက်ခဲ့ကြသည်။ မကြာမီအချိန်အတွင်းမှာပင်၊ တာဝန်ရှိသူများသည် ရှောင်ချူး၏ နောက်ဆုံး စစ်ဆေးမှု ရလဒ်များနှင့်အတူ သူတို့ ကြို၍ မှတ်တမ်းတင်ထားခဲ့သော သန္ဓေသား၏ လှုပ်ရှားမှု ဗီဒီယိုဖိုင်များကို တရားဝင် ဝဘ်ဆိုက်ပေါ်သို့ တင်ပေးလိုက်တော့သည်...

၎င်းသည် စတားနက်ပေါ်သို့ မမျှော်လင့်ဘဲ နောက်ထပ် ဗုံးတစ်လုံး ထပ်ချလိုက်ခြင်းနှင့် လုံးဝ ခြားနားမှု မရှိပါချေ!

အင်တာနက်အသုံးပြုသူများလုံးသည် ထိုပေါက်ကွဲမှုကြောင့် ဆွံ့အသွားခဲ့ကြရပြီး၊ အချိန်အတော်ကြာအောင်ပင် အံ့အားသင့်မှုများထဲမှ ပြန်လည်ရုန်းထွက်နိုင်ခြင်း မရှိခဲ့ကြပါချေ!